ಕೈದಾಳ ಶ್ರೀ ಚನ್ನಕೇಶವ

ಹೇಳೀ ಕೇಳಿ ಕರ್ನಾಟಕ ಶಿಲ್ಪಕಲೆಗಳ ತವರೂರಾಗಿದೆ. ಬೇಲೂರು ಹಳೇಬೀಡು ಶ್ರವಣ ಬೆಳಗೋಳ ಹಂಪೆಯಂತ ಪುಣ್ಯಕ್ಷೇತ್ರಗಳಲ್ಲಿ ಶಿಲ್ಪಿಗಳು ಕಲ್ಲಿನಲ್ಲಿ ಅರಳಿಸಿರುವ ಕೆತ್ತನೆಗಳು ಜಗತ್ರ್ಪಸಿದ್ಧವಾದರೆ, ಕರ್ನಾಟಕದ ಸಾವಿರಾರು ಊರುಗಳಲ್ಲಿ ಬೆಳಕಿಗೇ ಬಾರದಂತಹ ವೈಶಿಷ್ಟ್ಯತೆಯುಳ್ಳ ದೇವಾಲಯಗಳ ಸಂಖ್ಯೆ ಅಗಣಿತವಾಗಿದೆ. ನಾವಿದು ತುಮಕೂರಿನಿಂದ ಕೇವಲ 7 ಕಿ.ಮೀ ದೂರದಲ್ಲಿ ಅತ್ಯಂತ ಸುಂದರವಾದ ಹೊಯ್ಸಳ ಶೈಲಿಯ ಚನ್ನಕೇಶವನ ದೇವಾಲಯವಿರುವ ಕೈದಾಳದ ದರ್ಶನವನ್ನು ಕುಳಿತಲ್ಲಿಂದಲೇ ಮಾಡೋಣ ಬನ್ನಿ.

ಕಲ್ಪತರು ನಾಡು ತುಮಕೂರಿನಿಂದ ಕುಣಿಗಲ್ ಕಡೆಗೆ ಹೋಗುವ ರಸ್ತೆಯಲ್ಲಿ ಸುಮಾರು 6 ಕಿ.ಮೀ ಪ್ರಯಾಣಿಸಿದಲ್ಲಿ ಎಡಗಡೆಗೆ ಇತಿಹಾಸ ಪ್ರಸಿದ್ದವಾದ ಗಣೇಶನ ದೇವಾಲಯವಿರುವ ಗೂಳೂರು ಸಿಕ್ಕರೆ, ಬಲಗಡೆ 1 ಕಿ.ಮೀ ಪ್ರಯಾಣಿಸಿದಲ್ಲಿ ಅಪರೂಪದ ಕೆತ್ತನೆಯಿಂದ ಕೂಡಿರುವ ಕೈದಾಳದ ಚನ್ನಕೇಶವ ದೇವಾಲಯವನ್ನು ತಲುಪಬಹುದಾಗಿದೆ.

kaidala31150 ವರ್ಷಗಳ ಇತಿಹಾಸ ಹೊಂದಿರುವ ಈ ದೇಗುಲ ದ್ರಾವೀಡ ಶೈಲಿಯಲ್ಲಿದ್ದು 1150-51ರಲ್ಲಿ ಹೊಯ್ಸಳ 1ನೆಯ ನರಸಿಂಹನ ಸಾಮಂತನಾಗಿದ್ದ ಬಾಚಿ ಅಥವಾ ಗುಳೇ-ಬಾಚಿ ಎಂಬವನು ಈ ದೇವಸ್ಥಾನವನ್ನೂ ಇತರ ವಿಷ್ಣು ಜಿನ ದೇವಾಲಯಗಳನ್ನೂ ಕಟ್ಟಿಸಿದನೆಂದು ಅಲ್ಲಿರುವ ಶಾಸನದಿಂದ ತಿಳಿದುಬರುತ್ತದೆ. ಈ ಚನ್ನಕೇಶವ ದೇಗುಲದಲ್ಲಿ ಚನ್ನಕೇಶವ ಮತ್ತು ಗಂಗಾಧರೇಶ್ವರ ಮೂರ್ತಿಯನ್ನು ಪೂಜಿಸಲಾಗುತ್ತದೆ. 12ನೇ ಶತಮಾನಕ್ಕೆ ಸಂಬಂಧಿಸಿದ ಶಿಲಾ ಶಾಸನವನ್ನೂ ಇಲ್ಲಿ ಕಾಣಬಹುದಾಗಿದೆ. ಈ ದೇವಾಲಯವನ್ನು ಹೊರಗಡೆಯಿಂದ ನೋಡಿದಲ್ಲಿ ಕೋಟೆಯಂತಿದ್ದು. ಉಳಿದ ದೇವಾಲಯಕ್ಕಿಂತ ಸ್ವಲ್ಪ ಭಿನ್ನವಾದ ಶೈಲಿಯಲ್ಲಿದ್ದು ಜಕಣಾಚಾರಿಯ ಕೆತ್ತನೆಯ ಶೈಲಿಗೆ ಕನ್ನಡಿ ಹಿಡಿದಂತಿದೆ. ದೇವಾಲಯದ ಒಳಗಡೆ ಒಂದು ವಿಶಾಲವಾದ ಮಂಟಪವಿದೆ. ಈ ನವರಂಗದಲ್ಲಿ ಹೊಯ್ಸಳ ಶೈಲಿಯಲ್ಲಿ ಕೆತ್ತಲಾದ, ಕರಿಕಲ್ಲಿನ, ನಯವಾದ ನಾಲ್ಕು ಕಂಬಗಳಿದ್ದು. ಈ ಕಂಬಗಳ ತಳಭಾಗದ ನಾಲ್ಕು ಪಕ್ಕಗಳಲ್ಲೂ ಶಿವ, ಬ್ರಹ್ಮ, ವಿಷ್ಣು, ಭೈರವ, ಕೃಷ್ಣ, ಗಣಪತಿ, ವೀರಭದ್ರ ಮುಂತಾದ ದೇವತೆಗಳ ಉಬ್ಬು ಚಿತ್ರಗಳನ್ನು ಅತ್ಯಂತ ಸುಂದರವಾಗಿ ಕೆತ್ತಲಾಗಿದೆ. ನವರಂಗದ ಗೋಡೆಗಳ ಹೊರವಲಯ ಆನೆ ಮತ್ತು ಹೂವಿನ ಚಿತ್ರಣಗಳ ಪಟ್ಟಿಕೆಗಳಿಂದ ಅಲಂಕೃತವಾಗಿದೆ. ಇಲ್ಲಿರುವ ಪ್ರತಿಯೊಂದು ಕಂಬಕ್ಕೂ ವಿಶೇಷವಾದ ಕೆತ್ತನೆ ನೀಡಿ ಸಿಂಗರಿಸಿರುವುದು ಈ ದೇಗುಲದ ಕಲೆಯ ಶ್ರೀಮಂತಿಕೆಯನ್ನು ತೋರಿಸುವುದಲ್ಲದೇ, ಇದು ಬೇಲೂರು ಚನ್ನಕೇಶವ ದೇವಾಲಯವನ್ನು ನೆನಪಿಸುತ್ತವೆ. ಮೂರ್ತಿ ಚಿಕ್ಕದಾದರೂ ಕೀರ್ತಿ ದೊಡ್ಡದು ಎನ್ನುವಂತೆ ಈ ದೇಗುಲ ನೋಡಲು ಚಿಕ್ಕದಾದರೂ ಕೆತ್ತನೆ ಹಾಗೂ ವಾಸ್ತುಶಿಲ್ಪಗಳು ಬಹಳ ಅಪರೂಪದ ಶೈಲಿಯಲ್ಲಿದೆ.

kaidala_chennakeshavaಈ ದೇವಾಲಯದ ಮಹಾದ್ವಾರದ ಮೇಲಿನ ಸುಂದರವಾದ ಗೋಪುರ ವಿಜಯನಗರ ಕಾಲದಲ್ಲಿ ನಿರ್ಮಿತವಾದ್ದು ಎನ್ನಲಾಗುತ್ತದೆ. ಗರ್ಭಗುಡಿಯಲ್ಲಿರುವ 5 1/2’ ಎತ್ತರವಿರುವ ಸುಂದರವಾದ ಚನ್ನಕೇಶವನನ್ನು ಸುಮಾರು 2 1/2′ ಎತ್ತರದ ಪೀಠದ ಮೇಲೆ ನಿಲ್ಲಿಸಲಾಗಿದೆ. ವಿಗ್ರಹದ ಪ್ರಭಾವಳಿಯಲ್ಲಿ ದಶಾವತಾರದ ಚಿತ್ರಗಳನ್ನು ಮನೋಹರವಾಗಿ ಕೆತ್ತಲಾಗಿದ್ದು ಈ ಮೂರ್ತಿ ಪಶ್ಚಿಮಾಭಿಮುಖವಾಗಿರುವುದು ಬಹಳ ವಿಶೇಷವಾಗಿದೆ. ಮಹಾದ್ವಾರದ ಬಲಬದಿಯ ಕಂಬವೊಂದರ ಮೇಲೆ ಪತ್ನೀ ಸಹಿತನಾದ ಚೆನ್ನಕೇಶವನನ್ನೂ ಎಡಗಡೆಯ ಕಂಬದ ಮೇಲೆ ಅಂಜಲಿ ಬದ್ಧನೂ ಉತ್ತರೀಯಧಾರಿಯೂ ಖಡ್ಗಭೂಷಿತನೂ ಆದ ಮೂರ್ತಿಯನ್ನು ಚಿತ್ರಿಸಲಾಗಿದೆ. ಇದನ್ನು ಜಕಣಾಚಾರಿಯ ಮೂರ್ತಿಯೆಂದು ಕೆಲವರು ಹೇಳಿದರೆ ಇನ್ನೂ ಕೆಲವರು ಇದು ದೇವಾಲಯವನ್ನು ನಿರ್ಮಿಸಿದ ಬಾಚಿ ಸಾಮಂತನ ಮೂರ್ತಿ ಎನ್ನುತ್ತಾರೆ.

kai7ಸಾಧಾರಣವಾಗಿ ವರ್ಷಕ್ಕೊಮ್ಮೆ ಕೆಲವೊಂದು ದೇವಾಲಯಗಳಲ್ಲಿ ಸೂರ್ಯನ ಕಿರಣಗಳು ಸ್ವಾಮಿಯ ಮೇಲೆ ಬೀಳುವಂತಿದ್ದರೆ ಈ ದೇವಾಲಯದಲ್ಲಿ ಮಾತ್ರ ಪ್ರತಿ ದಿನವೂ ಸೂರ್ಯೋದಯದ ಸಮಯದಲ್ಲಿ ದೇವಾಲಯದ ರಕ್ಷಣಾಗೋಡೆಯ ಕಿಂಡಿಯಿಂದ ಹಾಯ್ದು ಬರುವ ಸೂರ್ಯನ ಕಿರಣಗಳು ಗರುಡನ ಕಿವಿಯ ಮೂಲಕ ಹಾಯ್ದು ದೇವಾಲಯವದ ಕಿಂಡಿಯ ಮೂಲಕ ಪ್ರವೇಶಿಸಿ ಶ್ರೀ ಚನ್ನಕೇಶವ ಸ್ವಾಮಿಯ ಪಾದಗಳನ್ನು ಸ್ಪರ್ಶಿಸುವುದು ಅತ್ಯಂತ ವಿಶೇಷವಾಗಿದೆ.

ಈ ಹಿಂದೆ ಈ ಊರು ಒಂದು ಪುಟ್ಟ ರಾಜ್ಯದ ಮುಖ್ಯ ನಗರವಾಗಿತ್ತೆಂದೂ ಇದಕ್ಕೆ ಕಿರದೀಕಾಪರ, ಕಿರಿದಾನಗರಿ ಕ್ರೀಡಾಪುರವೆಂಬ ಹೆಸರಿದ್ದು ನಂತರ ಅಮರ ಶಿಲ್ಪಿ ಜಗಣಾಚಾರಿಯಿಂದಾಗಿ ಈ ಊರಿಗೆ ಕೈದಾಳ ಎಂಬ ಹೆಸರು ಬಂದಿತು ಎಂಬುದಕ್ಕೆ ಒಂದು ರೋಚಕವಾದ ಕಥೆ. ಇದೆ.

ಈ ಊರು ಪ್ರಸಿದ್ಧ ಶಿಲ್ಪಿ ಜಕಣಾಚಾರಿಯ ಜನ್ಮಸ್ಥಳವಾಗಿದ್ದು ಅತ ಬಹಳ ಚಿಕ್ಕ ವಯಸ್ಸಿನಲ್ಲಿಯೇ ತನ್ನ ಕಲೆಯನ್ನು ಬೆಳೆಸುವುದಕ್ಕೋಕ್ಕೋಸ್ಕರ ಇತರ ಶಿಲ್ಪಿಗಳ ಜೊತೆಗೂಡಿ ತನ್ನ ಹೆಂಡತಿ ಮಕ್ಕಳು, ಮನೆ ಮಠ ಎಲ್ಲವನ್ನೂ ತೊರೆದು ಊರೂರು ಸುತ್ತುತ್ತಿರುವಾಗ ಹೊಯ್ಸಳರ ರಾಜ ಬೇಲೂರು ಮತ್ತು ಹಳೇಬೀಡಿನಲ್ಲಿ ಮಹಾ ದೇವಾಲಯವನ್ನು ನಿರ್ಮಿಸುತ್ತಿರುವ ವಿಷಯ ತಿಳಿದು ಅಲ್ಲಿಗೆ ಅಂದು ಪ್ರಧಾನ ಶಿಲ್ಪಿಯಾಗಿ ಬೇಲೂರಿನ ಶ್ರೀ ಚನ್ನಕೇಶವಸ್ವಾಮಿ ದೇವಸ್ಥಾನದ ನಿರ್ಮಾಣವನ್ನು ಕೈಗೆತ್ತಿಕೊಂಡು ಅತ್ಯಂತ ಅದ್ಭುತವಾದ ದೇವಾಲಯವನ್ನು ನಿರ್ಮಿಸಿ ಇನ್ನೇನು ಎಲ್ಲಾ ಕೆಲಸಗಳೂ ಮುಗಿಯುವ ಹಂತಕ್ಕೆ ಬಂದಿದ್ದು ಕೇವಲ ಚನ್ನಕೇಶವನ ವಿಗ್ರಹದ ಪ್ರತಿಷ್ಠಾಪನೆ ಮಾತ್ರ ಬಾಕಿ ಇರುತ್ತದೆ. ಅದೇ ಸಮಯಕ್ಕೆ ಅಲ್ಲಿಗೆ ಬಂದು ಯುವ ಶಿಲ್ಪಿಯೊಬ್ಬ ಆ ದೇವಾಲಯವನ್ನೆಲ್ಲಾ ಕೂಲಂಕಶವಾಗಿ ಪರೀಕ್ಷಿಸುತ್ತಾ ಕಡೆಗೆ ಮೂಲ ವಿಗ್ರಹವಾದ ಚನ್ನಕೇಶವನನ್ನು ನೋಡಿ ಇದರಲ್ಲಿ ಒಂದು ನ್ಯೂನತೆ ಇರುವ ಕಾರಣ ಇದು ಪೂಜಿಸಲು ಯೋಗ್ಯವಾಗಿಲ್ಲ ಎಂದು ಹೇಳಿದನಂತೆ.

jakanachariಯಕ್ಕಚ್ಚಿತ್ ಯುವಕನೊಬ್ಬ ಈ ರೀತಿಯಾಗಿ ಹೇಳಿದ್ದನ್ನು ಸಹಿಸಿದ ಜಕಣಾಚಾರಿ ಕೋಪಗೊಂಡು ಮಾತಿನ ಭರದಲ್ಲಿ ಈ ವಿಗ್ರಹದಲ್ಲಿ ಏನಾದರೂ ನ್ಯೂನತೆ ಇದ್ದಲ್ಲಿ ತಾನು ತನ್ನ ಬಲಗೈಯನ್ನು ಕತ್ತರಿಸಿ ಕೊಳ್ಳುವುದಾಗಿ ಆಣೆ ಮಾಡುತ್ತಾನೆ. ಆಗ ಅಲಿದ್ದವರೆಲ್ಲರೂ ಸೇರಿ ಆ ವಿಗ್ರಹವನ್ನು ಪರೀಕ್ಷೆ ಮಾಡುವ ಸಲುವಾಗಿ ಇಡೀ ವಿಗ್ರಹಕ್ಕೆ ಶ್ರೀಗಂಧದ ಲೇಪನವನ್ನು ಹಚ್ಚುತ್ತಾರೆ. ಕೆಲ ಸಮಯದ ನಂತರ ಇಡೀ ವಿಗ್ರಹಕ್ಕೆ ಹಚ್ಚಿದ್ದ ಶ್ರೀಗಂಧವೆಲ್ಲಾ ಒಣಗಿದರೂ ವಿಗ್ರಹದ ಹೊಕ್ಕಳು ಭಾಗ ಮಾತ್ರ ಇನ್ನೂ ಹಸಿಯಾಗಿಯೇ ಉಳಿದಿರುವುದನ್ನು ಗಮನಿಸಿದ ಆ ತರುಣ ಒಂದು ಉಳಿಯಲ್ಲಿ ಹೊಟ್ಟೆಯ ಮೇಲೆ ಒಡೆದಾಗ ವಿಗ್ರಹ ಭಿನ್ನಗೊಂಡು ಹೊಟ್ಟೆಯಿಂದ ನೀರು ಮತ್ತು ಜೀವಂತ ಕಪ್ಪೆಯೊಂದು ಹೊರಬಂದದ್ದನು ಗಮನಿಸಿದ ಜಕಣಾಚಾರಿ ಅವಮಾನ ತಾಳಲಾರದೇ ತಾನು ಪ್ರಮಾಣ ಮಾಡಿದಂತೆ ತನ್ನ ಬಲಗೈಯನ್ನು ಆ ಕೂಡಲೇ ಕತ್ತರಿಸಿ ಕೊಳ್ಳುತ್ತಾನೆ. ಅಂದಿನಿಂದ ಆ ವಿಗ್ರಹ ಕಪ್ಪೇ ಚನ್ನಿಗರಾಯ ಎಂಬ ಹೆಸರಿನಿಂದ ಖ್ಯಾತಿ ಪಡೆದದ್ದು ಇತಿಹಾಸ.

ಆದಾದ ನಂತರ ಆ ತರುಣನ ವೃತ್ತಾಂತವನ್ನು ಕೂಲಕುಂಶವಾಗಿ ವಿಚಾರಿಸಿದಾಗ ಆತ ಬೇರರೂ ಅಗಿರದೇ ಚಗಣಾಚಾರಿ ಊರಿನಲ್ಲಿ ಬಿಟ್ಟು ಬಿಟ್ಟು ಬಂದಿದ್ದ ಅವನ ಮಗ ಡಕಣಾಚಾರಿಯೇ ಆಗಿದ್ದು ಆತ ದೊಡ್ಡವನಾಗಿ, ತನ್ನ ತಂದೆಯಂತೆಯೇ ಶಿಲ್ಪ ಕಲೆಯ ಗೀಳನ್ನು ಹಚ್ಚಿಕೊಂಡು ತಂದೆಯನ್ನು ಅರಸುತ್ತಾ ಬೇಲೂರಿಗೆ ಬಂದಿರುತ್ತಾನೆ. ಇದಾದ ಕೆಲವು ದಿನಗಳ ನಂತರ ಜಕಣಾಚಾರಿಗೆ ಚನ್ನಕೇಶವ ಕನಸಿನಲ್ಲಿ ಬಂದು ಆತನ ಹುಟ್ಟೂರಿನಲ್ಲಿ ದೇವಾಲಯವನ್ನು ಕಟ್ಟಲು ಆಜ್ಞಾಪಿಸುತ್ತಾನೆ. ಭಗವಂತನ ಆದೇಶದಂತೆ ತನ್ನ ಸ್ವಸ್ಥಳಕ್ಕೆ ಹಿಂದಿರುಗಿ ಅಲ್ಲಿ ಈ ಚೆನ್ನಕೇಶವನ ದೇವಾಲಯವನ್ನು ಮಗನ ಸಹಾಯದಿಂದ ಕೇವಲ ಎಡಗೈಯಿಂದಲೇ ನಿರ್ಮಿಸುತ್ತಾನೆ. ಹೀಗೆ ಸುಂದರವಾಗಿ ನಿರ್ಮಾಣ ಗೊಳ್ಳುತ್ತಿದ್ದ ದೇವಾಲದಿಂದ ಸಂತೃಪ್ತನಾದ ಭಗವಂತನು ಅವನು ಕತ್ತರಿಸಿಕೊಂಡಿದ್ದ ಬಲಗೈಯನ್ನು ಮತ್ತೆ ಮರಳಿ ಕೊಟ್ಟನೆಂಬ ಕಾರಣದಿಂದಾಗಿ ಆ ಊರಿಗೆ ಕೈದಾಳವೆಂಬ ಹೆಸರಾಯಿತು ಎಂಬ ಐತಿಹ್ಯವಿದೆ.

ಈ ಕೈದಾಳ ದೇವಸ್ಥಾನವನ್ನು ನಿರ್ಮಿಸುತ್ತಿರುವಾಗಲೇ ಸುಮಾರು 80ಕ್ಕೂ ಹೆಚ್ಚಿನ ವರ್ಷ ವಯಸ್ಸಾಗಿದ್ದ ಜಕಣಾಚಾರಿಯು ವಯೋಸಹಜವಾಗಿ ನಿಧನರಾದ ಕಾರಣ ಈ ದೇವಾಲಯದ ಹೊರ ವಲಯಗಳ ನಿರ್ಮಾಣ ಅರ್ಧದಲ್ಲೇ ನಿಂತಿತಲ್ಲದೇ ದೇಗುಲದ ಗಾತ್ರವೂ ಚಿಕ್ಕದಾಗಿಯೇ ಉಳಿಯಿತು ಎನ್ನಲಾಗುತ್ತದೆ.

ಬೆಂಗಳೂರಿನಿಂದ ಸುಮಾರು 71ಕಿ.ಮೀ ದೂರದಲ್ಲಿರುವ ತುಮಕೂರಿಗೆ ಬಸ್ ,ರೈಲುಗಳ ಮೂಲಕ ಬಂದು ಅಲ್ಲಿಂದ ಕೈದಾಳಕ್ಕೆ ಬಹಳ ಬಸ್ಸುಗಳಿದ್ದು ಕೇವಲ 10 ರಿಂದ 15 ನಿಮಿಷಗಳಲ್ಲಿ ಚನ್ನಕೇಶವ ದೇವಸ್ಥಾನವನ್ನು ತಲುಪಬಹುದಾಗಿದೆ.

ಪ್ರತಿ ದಿನ ಬೆಳಗ್ಗೆ 8.30 ರಿಂದ ಮಧ್ಯಾಹ್ನ 12.30ರ ವರೆಗೆ ಸಂಜೆ 6.30 ರಿಂದ 8.30ರ ವರೆಗೆ ದೇವಾಲಯದಲ್ಲಿ ದರ್ಶನಕ್ಕೆ ಅವಕಾಶವಿದ್ದು, ವಾರದ ರಜೆ ಹಾಗೂ ಸರ್ಕಾರಿ ರಜೆಯ ದಿನದಂದು ಬೆಳಗ್ಗೆ 10.30 ರಿಂದ 2.30ರವರೆಗೆ ಸಂಜೆ 5.30 ರಿಂದ 8.30 ರವರೆಗೆ ತೆರೆದಿರುತ್ತದೆ. ಊಟ ತಿಂಡಿಗಳ ವ್ಯವಸ್ಥೆ ಇಲ್ಲಿ ಇಲ್ಲದಿರುವ ಕಾರಣ ಬರುವಾಗಲೇ ತುಮಕೂರಿನಲ್ಲಿ ಮುಗಿಸಿಕೊಂಡು ಬಂದಲ್ಲಿ ಉತ್ತಮ. ಇನ್ನೂ ಬಾದ್ರಪದ ಮಾಸದಿಂದ ಕಾರ್ತೀಕ ಮಾಸದ ನಡುವಿನಲ್ಲಿ ಇಲ್ಲಿಗೆ ಬಂದಲ್ಲಿ ಭಾದ್ರಪದ ಮಾಸದ ಶುಕ್ಲ ಪಕ್ಷದ ಚೌತಿಯ ದಿನದಂದೇ ಮಣ್ಣಿನಲ್ಲಿ ಗಣೇಶನನ್ನು ತಯಾರಿಸಲು ಆರಂಭಿಸಿ ವಿಜಯದಶಮಿಯ ವೇಳೆಗೆ ಮುಗಿಸಿ, ದೀಪಾವಳಿ ಹಬ್ಬದಿಂದ ನಿತ್ಯ ಪೂಜೆ ನಡೆಸಿ ಕಾರ್ತಿಕ ಮಾಸದ ಅಮಾವಾಸ್ಯೆಯ ನಂತರ ಬರುವ ಭಾನುವಾರದಂದು ವಿಸರ್ಜಿಸುವ ಇತಿಹಾಸ ಪ್ರಸಿದ್ಧ ಗೂಳೂರು ಗಣೇಶನ ದರ್ಶನವನ್ನೂ ಪಡೆಯಬಹುದಾಗಿದೆ. ಅಲ್ಲಿಂದ ಸುಮಾರು 20 ಕಿಮೀ ದೂರದಲ್ಲಿರುವ ಕೂರ್ಮಪೀಠ ಸಹಿತ ಶ್ರೀಚಕ್ರದ ಆಕಾರದಲ್ಲೇ ನಿರ್ಮಿತವಾಗಿರುವು ಪವಿತ್ರ ಕ್ಷೇತ್ರ ಹೆಬ್ಬೂರಿನ ಕಾಮಾಕ್ಷಿ ದೇವಿಯ ದರ್ಶನವನ್ನು ಮಾಡಬಹುದಾಗಿದೆ.

ಇಷ್ಟೆಲ್ಲಾ ಮಾಹಿತಿ ತಿಳಿದ ನಂತರ ಇನ್ನೇಕೆ ತಡಾ. ಈ ವಾರಾಂತ್ಯದಲ್ಲಿ ಸಮಯ ಮಾಡಿಕೊಂಡು ಕೈದಾಳದ ಶ್ರೀ ಚನ್ನಕೇಶವ ಮತ್ತು ಗಂಗಾಧರೇಶ್ವರ ಸ್ವಾಮಿಯ ದರ್ಶನ ಪಡೆದು ನಿಮ್ಮ ಅನುಭವವನ್ನು ನಮ್ಮೊಂದಿಗೆ ಹಂಚಿಕೊಳ್ತೀರೀ ತಾನೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಶ್ರೀ ರಾಮಾನುಜಾಚಾರ್ಯರ ಸಮಾನತೆಯ ಪ್ರತಿಮೆ

Shanakra-01ಏಳನೇ ಶತಮಾನದಲ್ಲಿ ಬೌದ್ಧ ಮತ್ತು ಜೈನಮತಗಳು ಉಚ್ಛ್ರಾಯ ಸ್ಥಿತಿಯಲ್ಲಿದ್ದು ನಾನಾ ಕಾರಣಗಳಿಂದಾಗಿ ಹಿಂದೂಧರ್ಮದ ಅನೇಕರು ಮತಾಂತರಗೊಂಡು ಹಿಂದೂ ಧರ್ಮದ ಅವಸಾನವಾಗಲಿದೇ ಎಂದೇ ಕಳವಳಗೊಂಡಿದ್ದಾಗ,  ಹಿಂದೂ ಧರ್ಮದ ಪುನರುತ್ಥಾನಕ್ಕೆ ಆ ಭಗವಂತನೇ ಶಂಕರಾಚಾರ್ಯರು, ರಾಮಾನುಜಾಚಾರ್ಯರು ಮತ್ತು ಮಧ್ವಾಚಾರ್ಯರು ಎಂಬ ಆಚಾರ್ಯತ್ರಯರ ಮೂಲಕ ಮನುಷ್ಯ ಸ್ವರೂಪವಾಗಿ ಭಾರತದಲ್ಲಿ ಹುಟ್ಟಿ ಬಂದು ಸನಾತನ ಧರ್ಮದ ಬಗ್ಗೆ ಇದ್ದ ತಪ್ಪು ತಿಳುವಳಿಕೆಗಳನ್ನು ಹೋಗಲಾಡಿಸಿ ಸನಾತನಧರ್ಮವನ್ನು ಸರಳೀಕರಿಸಿ ಮತ್ತೆ ನಮ್ಮ ದೇಶದಲ್ಲಿ ಹಿಂದೂ ಧರ್ಮ ತಲೆ ಎತ್ತುವಂತೆ ಮಾಡಿದ ಮಹಾನುಭಾವರು. ಕ್ರಿ.ಶ 788 ರಲ್ಲಿ ಅವತರಿಸಿದ ಶ್ರೀ ಶಂಕರಾಚಾರ್ಯರು ಅಹಂ ಬ್ರಹ್ಮಾಸ್ಮಿ ಎಂದರೆ, ಎಲ್ಲರಲ್ಲೂ ಭಗವಂತನು ಇದ್ದಾನೆ ಎಂಬ ಅದ್ವೈತ ತತ್ವವನ್ನು ಪ್ರತಿಪಾದಿಸಿದರೆ, ಕ್ರಿ.ಶ 1017 ರಲ್ಲಿ ಅವತರಿಸಿದ ರಾಮಾನುಜಾಚಾರ್ಯರು ಹರಿಯೇ ಸರ್ವೋತ್ತಮ ಎಂಬ ವಿಶಿಷ್ಠಾದ್ವೈತವನ್ನು ಪ್ರತಿಪಾದಿಸಿದರೆ, ಕ್ರಿ.ಶ.1238 ರಲ್ಲಿ ಅವತರಿಸಿದ ಮಧ್ವಾಚಾರ್ಯರು ಹರಿ ಸರ್ವೋತ್ತಮ ವಾಯು ಜೀವೋತ್ತಮ ಎಂಬ ದ್ವೈತ ತತ್ವವನ್ನು ಪ್ರತಿಪಾದಿಸುವ ಮೂಲಕ ನಮ್ಮ ದೇಶದಲ್ಲಿ ಹಿಂದೂಧರ್ಮವನ್ನು ಎತ್ತಿ ಹಿಡಿದ ಪ್ರಾಥಃಸ್ಮರಣೀಯ ಮಹಾನುಭಾವರು ಎಂದರೂ ಅತಿಶಯವಲ್ಲ.

r2ಕೆಲ ತಿಂಗಳುಗಳ ಹಿಂದೆ ಕೇದಾರದಲ್ಲಿ ಶ್ರೀ ಶಂಕರಾಚಾರ್ಯರ ಪ್ರತಿಮೆಯನ್ನು ಪ್ರತಿಷ್ಟಾಪನೆ ಮಾಡಿದ್ದರೆ, ದಿ. 05.02.2022 ರ ವಸಂತ ಪಂಚಮಿಯ ಶುಭದಿನದಂದು ತೆಲಂಗಾಣದ ಶಂಷಾಬಾದ್ ನಲ್ಲಿ ಪ್ರಪಂಚದ ಎರಡನೇ ಅತಿ ದೊಡ್ಡ (ಕುಳಿತಿರುವ ಭಂಗಿ)ಯ ಶ್ರೀ ವೈಷ್ಣವ ಧರ್ಮದ ಪ್ರತಿಪಾದಕರಾದ ಶ್ರೀ ರಾಮಾನುಜಾಚಾರ್ಯರ ಸಮಾನತೆಯ ಪ್ರತಿಮೆಯನ್ನು ಅನಾವರಣಗೊಳಿಸಲಾಯಿತು. ಈ ಮಂದಿರದ ಒಟ್ಟು ಎತ್ತರ 216 ಅಡಿಗಳಿದ್ದು ನಮಸ್ಕಾರ ಸ್ಥಿತಿಯಲ್ಲಿ ಕುಳಿತಿರುವ ಆಚಾರ್ಯ ಶ್ರೀ ರಾಮಾನುಜರ ವಿಗ್ರಹದ ಎತ್ತರವೇ 108 ಅಡಿಗಳಷ್ಟು ಭವ್ಯ್ವವಾಗಿದೆ.

ಈ ಸಮಾನತೆಯ

ಪ್ರತಿಮೆಯ ವೈಶಿಷ್ಟ್ಯಗಳು ಈ ರೀತಿಯಾಗಿದೆ.

  • ಶ್ರೀ ಚಿನ್ನ ಜೀಯರ್ ಸ್ವಾಮಿಯವರ ಪರಿಕಲ್ಪನೆಯಂತೆ ಹೈದ್ರಾಬಾದ್‍ನ ಮುಚ್ಚಿಂತಲದಲ್ಲಿ ಅವರ ಆಶ್ರಮದ 40 ಎಕರೆ ವಿಸ್ತಾರವಾದ ಆವರಣದಲ್ಲಿ ವಿಶಿಷ್ಟಾದ್ವೈತ ಸಿದ್ಧಾಂತದ ಪ್ರತಿಪಾದಕ ರಾಮಾನುಜಾಚಾರ್ಯರ ಸಹಸ್ರಾಬ್ಧಿಯ (ರಾಮಾನುಜಾಚಾರ್ಯರ 1,000 ವರ್ಷಗಳ ಜಯಂತಿ) ಪ್ರಯುಕ್ತ 216 ಅಡಿ ಎತ್ತರದ ದೇವಾಲಯ ನಿರ್ಮಾಣ ಮಾಡಲಾಗಿದ್ದು ಅದರಲ್ಲಿ ವಿಗ್ರಹದ ಎತ್ತರವೇ 108 ಅಡಿ ಇದ್ದು ಶ್ರೀ ರಾಮಾನುಜರ ಕೈಯಲ್ಲಿರುವ ತ್ರಿದಂಡವೂ ಸೇರಿ 135 ಅಡಿ ಎತ್ತರವಿದೆ.
  • 2017 ರಲ್ಲಿ ಆರಂಭಿಸಲಾದ ಈ ಮಂದಿರದ ನಿರ್ಮಾಣ ನಾಲ್ಕು ವರ್ಷಗಳಲ್ಲಿ ಧ್ಯಾನ ಮುದ್ರೆಯಲ್ಲಿ ಕುಳಿತಿರುವ ರಾಮಾನುಜಾಚಾರ್ಯರು ಪ್ರತಿಮೆಯ ವೇದಿಕೆಯ ಎತ್ತರ 54 ಅಡಿ, ಪದ್ಮಪೀಠದ ಎತ್ತರ 27 ಅಡಿ ಇದ್ದು, ದ್ರಾವಿಡ ರಾಜ್ಯಗಳ ಶಿಲ್ಪಗಳ ಮಾದರಿಯಲ್ಲಿ ವಿಗ್ರಹದ ರಚನೆ ಮಾಡಿದ್ದು ಸುಮಾರು 7 ಸಾವಿರ ಟನ್ ಗಳಷ್ಟು ಬಂಗಾರ, ಬೆಳ್ಳಿ, ತಾಮ್ರ, ಕಂಚು ಮತ್ತು ಸೀಸವೂ ಸೇರಿದಂತೆ ಪಂಚಲೋಹಗಳಿಂದ ಈ ಪ್ರತಿಮೆಯನ್ನು ನಿರ್ಮಿಸಲಾಗಿದೆ.
  • ಈ ಯೋಜನೆಯ ಒಟ್ಟು ವೆಚ್ಚ ಸುಮಾರು ₹1,000 ಕೋಟಿಗಳಾಗಿದ್ದು ವಿಶ್ವಾದ್ಯಂತ ಹರಡಿಕೊಂಡಿರುವ ಅಚಾರ್ಯರ ಭಕ್ತರು ಮತ್ತು ದಾನಿಗಳಿಂದ ನಿಧಿ ಸಂಗ್ರಹಿಸಿ ನಿರ್ಮಿಸಲಾಗಿದೆ.
  • ಭದ್ರವೇದಿ ಎಂಬ ಮೂರು ಅಂತಸ್ತಿನ 54 ಅಡಿ ರಚನೆಯ ಮೇಲೆ ನಿರ್ಮಿಸಲಾದ ಬೃಹತ್ ಕಮಲದ ಮೇಲೆ ಪ್ರತಿಮೆಯನ್ನು ಇರಿಸಲಾಗಿದ್ದು, 63,444 ಚದರ ಅಡಿ ವಿಸ್ತೀರ್ಣವನ್ನು ಹೊಂದಿರುವ ನೆಲ ಮಹಡಿಯು ರಾಮಾನುಜಾಚಾರ್ಯರ ಜೀವನ ಮತ್ತು ಅವರ ತತ್ವಶಾಸ್ತ್ರದ ಹಿರಿಮೆ ಗರಿಮೆಯನ್ನು ಚಿತ್ರಾತ್ಮಕವಾಗಿ ಪ್ರಸ್ತುತಿಪಡಿಸುವಂತಿದೆ.
  • ಎರಡನೇ ಮಹಡಿಯಲ್ಲಿ, ಸುಮಾರು 300,000 ಚದರ ಅಡಿ ಪ್ರದೇಶದಲ್ಲಿ ರಾಮಾನುಜಾಚಾರ್ಯರ ದೇವಸ್ಥಾನವಿದ್ದು, ಅಲ್ಲಿ ಅವರ 120 ಕೆಜಿ ಚಿನ್ನದ ಪ್ರತಿಮೆಯನ್ನು ದೈನಂದಿನ ಪೂಜೆಗಾಗಿ ಸ್ಥಾಪನೆ ಮಾಡಲಾಗಿದೆ.
    14,700 ಚದರ ಅಡಿಯ ಮೇಲಿನ ಮಹಡಿಯಲ್ಲಿ ವೈದಿಕ ಡಿಜಿಟಲ್ ಗ್ರಂಥಾಲಯ ಮತ್ತು ಸಂಶೋಧನಾ ಕೇಂದ್ರವಿದೆ.
  • ಭದ್ರವೇದಿಯ ಹೊರಗೆ, ಪ್ರತಿಮೆಯ ಸುತ್ತಲೂ 34 ಎಕರೆ ಭೂಮಿಯಲ್ಲಿ ಕಲ್ಲಿನಲ್ಲಿ ನಿರ್ಮಿಸಲಾದ 108 ದಿವ್ಯ ಕ್ಷೇತ್ರಗಳ, 108 ಸುಂದರ ವಿಷ್ಣು ದೇಗುಲಗಳಿಂದ ಸುತ್ತುವರಿಯಲ್ಪಟ್ಟಿದೆ.
  • ವಿಶ್ವ ಭ್ರಾತುತ್ವ ಮತ್ತು ವಿಶ್ವ ಸಮಾನತೆಯನ್ನು ಸಾರುವ ನಿಟ್ಟಿನಿಂದ ಪ್ರಪಂಚದ ಎಲ್ಲಾ ದೇಶಗಳ ಧ್ವಜಗಳನ್ನು ಈ ಪ್ರತಿಮೆಯ ಬಳಿ ಸ್ಥಾಪಿಸುವ ಉದ್ದೇಶವನ್ನು ಹೊಂದಿದ್ದು, ನಂಬಿಕೆ, ಜಾತಿ ಮತ್ತು ಪಂಥ ಸೇರಿದಂತೆ ಜೀವನದ ಎಲ್ಲಾ ಅಂಶಗಳಲ್ಲಿ ಶ್ರೀ ರಾಮಾನುಜಾಚಾರ್ಯರು ಪ್ರಚಾರ ಮಾಡಿದ ಸಮಾನತೆಯ ಕಲ್ಪನೆಗೆ ಅನುಗುಣವಾಗಿ ಇದನ್ನು ನಿರ್ಮಿಸಲಾಗಿದೆ.
  • ಮಂದಿರವೂ ಸೇರಿದಂತೆ ಒಟ್ಟು 216 ಅಡಿ ಎತ್ತರದ ಈ ಬೃಹತ್ ಪ್ರತಿಮೆಯು ವಿಶ್ವದ 2ನೇ ಅತೀ ಎತ್ತರದ ಪ್ರತಿಮೆ ಎಂಬ ಹೆಗ್ಗಳಿಕೆ ಪಾತ್ರವಾಗಿರುವುದು ಗಮನಾರ್ಹವಾಗಿದೆ.

ರಾಷ್ಟ್ರಪತಿಗಳಾದ ಶ್ರೀ ರಾಮನಾಥ್ ಕೋವಿಂದ್, ಉಪರಾಷ್ಟ್ರಪತಿಗಳಾದ ಶ್ರೀ ಎಂ ವೆಂಕಯ್ಯ ನಾಯ್ಡು ಮತ್ತು ವಿಶ್ವದ ಎಲ್ಲೆಡೆಯಿಂದಲೂ ಬಂದಿದ್ದ ಹಲವಾರು ಗಣ್ಯರ ಸಮ್ಮುಖದಲ್ಲಿ ಶ್ರೀ ಶ್ರೀ ಶ್ರೀ ಚಿನ್ನ ಜೀಯರ್ ಸ್ವಾಮಿಗಳ ನೇತೃತ್ವದಲ್ಲಿ ಶ್ರೀ ರಾಮಾನುಜಾಚಾರ್ಯರ ಪ್ರತಿಮೆ ಅನಾವರಣಗೊಳಿಸಿ ಮಾತನಾಡಿದ ಪ್ರಧಾನಿಗಳಾದ ಶ್ರೀ ನರೇಂದ್ರ ಮೋದಿ, ರಾಮಾನುಜರ ಜ್ಞಾನ ಇಡೀ ವಿಶ್ವಕ್ಕೆ ವ್ಯಾಪಿಸಲಿದ್ದು, ಮಾನವೀಯ ಶಕ್ತಿಗೆ ಪ್ರೇರೆಪಣೆ ನೀಡಿದೆ. ಮುಂದಿನ ಪೀಳಿಗೆಗೆ ಈ ಪುರಾತನ ಸಂಸ್ಕೃತಿಯನ್ನು ಬಿಂಬಿಸಲು ಈ ಪ್ರತಿಮೆ ದಾರಿ ದೀಪವಾಗಲಿದೆ. ಸಮಾನತೆಯ ಪ್ರತಿಮೆ ಯುವಕರನ್ನು ಸ್ಫೂರ್ತಿಗೊಳಿಸುತ್ತದೆ. ರಾಮಾನುಜಾಚಾರ್ಯರ ಈ ಪ್ರತಿಮೆ ಅವರ ಜ್ಞಾನ, ನಿರ್ಲಿಪ್ತತೆ ಮತ್ತು ಆದರ್ಶಗಳ ಸಂಕೇತವಾಗಿದೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

ಸನಾತನ ಸಂಸ್ಕೃತಿ ಉಳಿವಿಗಾಗಿ ಮತ್ತು ಅಸಮಾನತೆಯನ್ನು ಹೋಗಲಾಡಿಸುವ ಅಲುವಾಗಿ ಸುಮಾರು 120 ವರ್ಷಗಳ ಕಾಲ ಜೀವಿಸಿದ್ದ ಶ್ರೀ ರಾಮಾನುಜಾಚಾರ್ಯರ ಬಗೆ ಹೆಚ್ಚಿನ ಮಾಹಿತಿಯನ್ನು ಈ https://enantheeri.com/2020/04/28/ramanujacharya/ ಲೇಖನದ ಮೂಲಕ ತಿಳಿದು ಕೊಳ್ಳಬಹುದಾಗಿದೆ.

te7ಪಾಶ್ಚಿಮಾತ್ಯ ಅಂಧಾನುಕರಣೆ ಮತ್ತು ಅನ್ಯಮತೀಯರ ನಾನಾರೀತಿಯ ಆಮಿಷಗಳ ಕಾರಣದಿಂದಾಗಿ ಹೆಚ್ಚುತ್ತಿರುವ ಮತಾಂತರದ ಈ ಕಾಲದಲ್ಲಿ ಶ್ರೀ ರಾಮಾನುಜಾಚಾರ್ಯರ ಈ ಬೃಹತ್ ಪ್ರತಿಮೆಯು ಅನಾವರಣಗೊಂಡಿರುವುದು ಇಂದಿನ ಯವಜನತೆಗೆ ನಮ್ಮ ಸನಾತನ ಧರ್ಮದ ಹಿರಿಮೆ ಮತ್ತು ಗರಿಮೆಯ ಬಗ್ಗೆ ಒಲವು ಮೂಡಿಸುವಂತಾಗಲಿ ಎನ್ನುವುದೇ ಎಲ್ಲರ ಆಶಯವಾಗಿದೆ.

ಆಚಾರ್ಯ ದೇವೋಭವ. ಧರ್ಮೋ ರಕ್ಷತಿ ರಕ್ಷಿತಃ ಅಲ್ವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಕೋತಿ ರಾಜ್ ಉರ್ಫ್ ಜ್ಯೋತಿರಾಜ್

ಜೀವಶಾಸ್ತ್ರದಲ್ಲಿ ನಾವೆಲ್ಲರೂ ಓದಿದಂತೆ ಮಂಗನಿಂದ ಮಾನವನಾಗಿ ಪರಿವರ್ತನೆಯಾದ ಎಂದು ಕೇಳಿದ್ದೇವೆ. ಅದಕ್ಕೆ ಪುರಾವೆ ಎನ್ನುವಂತೆ ಇಲ್ಲೊಬ್ಬ ಮನುಷ್ಯ ಅಕ್ಷರಶಃ ಮಂಗನಂತೆ ಚಂಗನೆ ಒಂದು ಕೆಡೆಯಿಂದ ಮತ್ತೊಂದು ಕಡೆಗೆ ಹಾರುತ್ತಾ ಎತ್ತೆರತ್ತರದ ಯಾವುದೇ ಅಸರೆ ಇಲ್ಲದ ಬಂಡೆಗಳನ್ನು ಯಾವುದೇ ಅಥವಾ ಯಾರದ್ದೇ ಸಹಾಯವಿಲ್ಲದೇ ಏರುತ್ತಾ ಇಳಿಯುತ್ತಾ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಸಾಧನೆಗಳನ್ನು ಮಾಡಿರುವ ಕೋತಿರಾಜ್ ಅಲಿಯಾಸ್ ಜ್ಯೋತಿರಾಜ್ ಅವರ ಬಗ್ಗೆ ನಾವಿಂದು ತಿಳಿಯೋಣ ಬನ್ನಿ.

ಸಂದರ್ಶನವೊಂದರಲ್ಲಿ ಜ್ಯೋತಿರಾಜ್ ಅವರೇ ಹೇಳಿದಂತೆ ಅವರು ಮೂಲತಃ ತಮಿಳುನಾಡಿನವರು. 1988 ಆಗಸ್ಟ್ 15 ರಂದು ಜನಿಸಿದವರು. ತಮಿಳುನಾಡು ಮಧುರೆ ಜಿಲ್ಲೆಯ ತೇನಿ ಗ್ರಾಮದ ಜ್ಯೋತಿರಾಜ್ ಅವರಿಗೆ ಕೇವಲ ೩ ವರ್ಷದ ವಯಸ್ಸಾಗಿರುವಾಗ ತಮ್ಮ ಊರಿನ ಹತ್ತಿರದ ಜಾತ್ರೆಯೊಂದರರಲ್ಲಿ ತಮ್ಮ ಪೋಷಕರಿಂದ ತಪ್ಪಿಸಿಕೊಂಡು ತಮಿಳು ಮೂಲದವರೇ ಆದರೂ ಬಾಗಲಕೋಟೆಯಲ್ಲಿ ಬೇಕರಿಯೊಂದನ್ನು ನಡೆಸುತ್ತಿದ್ದ ದಂಪತಿಗಳ ಕೈಗೆ ಸಿಕ್ಕಿ ಅವರ ಆಶ್ರಯದಲ್ಲೇ ಸುಮಾರು 10-12 ವರ್ಷಗಳ ಕಾಲ ಬೆಳೆಯುತ್ತಾರೆ. ಅವರ ಮನೆಯಲ್ಲಿ ಕೊಡುತ್ತಿದ್ದ ಕಾಟವನ್ನು ತಾಳಲಾರದೇ, ಹೇಗಾದರೂ ಮಾಡಿ ಬೆಂಗಳೂರಿಗೆ ಹೋಗಿ ಯಾವುದಾದರೂ ಕೆಲಸ ಗಿಟ್ಟಿಸಿಕೊಂಡು ಜೀವನವನ್ನು ನಡೆಸಿಕೊಂಡು ಹೋಗಬಹುದು ಎಂದು ನಿರ್ಧರಿಸಿ ಬಾಗಲಕೋಟೆಯ ಬೇಕರಿಯಿಂದ ಓಡಿ ಬೆಂಗಳೂರಿಗೆ ಬರುವ ದಾರಿಯಲ್ಲಿ ಚಿತ್ರದುರ್ಗದ ಬಳಿ ಮಹದೇವಪ್ಪ ಎಂಬುವರ ಪರಿಚಯವಾಗಿ ಅವರ ಮನೆಯಲ್ಲೇ ಕೆಲ ವರ್ಷಗಳಿದ್ದು ಅವರ ಜೊತೆಯಲ್ಲೇ ಕಟ್ಟಡ ಕೆಲಸದ ಕೂಲೀ ಕಾರ್ಮಿಕನಾಗಿ ಕೆಲಸ ಮಾಡುತ್ತಾ ಜೀವನ ಸಾಗಿಸುತ್ತಿರುತ್ತಾರೆ.

ಅದೊಮ್ಮೆ ಅದಾವುದೋ ವಯಕ್ತಿಕ ಕಾರಣಗಳಿಂದ ಜೀವನದಲ್ಲಿ ಜಿಗುಪ್ಸೆಗೊಂಡ ಜ್ಯೋತಿರಾಜ್ ಸಾಯಲು ನಿರ್ಧರಿಸಿ, ಮೊತ್ತ ಮೊದಲ ಬಾರಿಗೆ ಚಿತ್ರದುರ್ಗದ ಏಳು ಸುತ್ತಿನ ಕಲ್ಲಿನ ಕೋಟೆಗೆ ಬಂದು ದಿನವಿಡೀ ಕೋಟೆಯೆಲ್ಲಾ ಸುತ್ತಾಡಿ ಸಂಜೆ ಹೊತ್ತಿಗೆ ಅಲ್ಲಿಯ ಗುಡಿಯೊಂದರ ಹಿಂದೆ ಸುಮಾರು ಅರ್ಧಲೀಟರ್ ಕೀಟನಾಶಕವನ್ನು ಕುಡಿದು ಸತ್ತೇ ಹೋದನೆಂದು ಭ್ರಮಿಸಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿರುತ್ತಾರೆ. ಆಯಸ್ಸು ಗಟ್ಟಿಗಿದ್ದರೆ ಯಾರೂ ಏನೂ ಮಾಡಲಾಗುವುದಿಲ್ಲ ಎನ್ನುವಂತೆ ಮಾರನೇಯ ದಿನ ಬೆಳಿಗ್ಗೆ ಸಹಜವಾಗಿ ಎಚ್ಚರವಾಗಿ ತಾನು ಸತ್ತಿಲ್ಲದಿರುವುದನ್ನು ಖಚಿತಪಡಿಸಿಕೊಂಡು ಅಲ್ಲಿಂದ ಗೋಪಾಲಸ್ವಾಮಿ ಹೊಂಡದಲ್ಲಿ ಬಿದ್ದು ಸಾಯಲು ಪ್ರಯತ್ನಿಸಿದರಾದರೂ ಸರಾಗವಾಗಿ ಈಜು ಬರುತ್ತಿದ್ದ ಕಾರಣ ಅಲ್ಲಿಯೂ ಸಾಯಲಾಗದೇ ಅಂತಿಮವಾಗಿ ಅಲ್ಲಿಯೇ ಇದ್ದ ಸುಮಾರು 80-100 ಅಡಿ ಎತ್ತರದ ಹಂಸಗೀತೆ ಎಂಬ ಹೆಬ್ಬಂಡೆ ಏರಿ ಆ ಬಂಡೆಯಿಂದ ಕೆಳಗೆ ಬಿದ್ದು ಸಾಯ ಬಹುದು ಎಂದು ನಿರ್ಧರಿಸಿ ನೋಡ ನೋಡುತ್ತಿದ್ದಂತೆಯೇ ಯಾವುದೇ ಸಹಾಯವಿಲ್ಲದೇ ಚಕ ಚಕನೆ ಆ ಬಂಡೆಯನ್ನು ಏರಿ ಕೆಳಗೆ ನೋಡಿದ್ದಲ್ಲಿ ದುರ್ಗವನ್ನು ನೋಡಲು ಬಂದಿದ್ದ ಪ್ರವಾಸಿಗರು ಜೋರಾಗಿ ಚಪ್ಪಾಳೆ ತಟ್ಟುತ್ತಾ ಸಿಳ್ಳೇ ಹೊಡೆಯುತ್ತಾ ಅಲ್ನೋಡ್ರೋ ಕೋತಿ ಮನುಷ್ಯ ಎಂದು ಕೂಗಿಹೇಳೀದ್ದೇ ಅವರ ಜೀವನದಲ್ಲಿ ಭಾರೀ ಬದಲಾವಣೆ ತರುತ್ತದೆ.

kothiದುರ್ಗದ ಕೋಟೆಯಲ್ಲಿದ್ದ ಕೋತಿಗಳು ಅಷ್ಟು ಸಲೀಸಾಗಿ ಮರದಿಂದ ಮರಕ್ಕೆ, ಬಂಡೆಯಿಂದ ಬಂಡೆಗೆ ಹೇಗೆ ಹಾರುತ್ತವೆ ಎಂಬುದನ್ನು ಗಮನಿಸಿ, ತಾನೂ ಅದೇ ರೀತಿ ಬೃಹತ್ ಬಂಡೆಗಲ್ಲುಗಳನ್ನು ಹತ್ತುವ ಸಾಹಸಿ ಗುಣವನ್ನು ಮೈಗೂಡಿಸಿಕೊಂಡ ಜ್ಯೋತಿರಾಜ್ ಅಲ್ಲಿಂದ ಕೋತಿರಾಜ್ ಆಗಿ ಬದಲಾವಣೆಯಾಗುತ್ತಾರೆ. ಕೋಟೆಯ ವೀಕ್ಷಣೆಗೆ ಬರುವ ರಾಜ್ಯ, ಹೊರರಾಜ್ಯ, ವಿದೇಶಿ ಪ್ರವಾಸಿಗರ ಮುಂದೆ ತನ್ನ ಈ ಸಾಹಸವನ್ನು ಪ್ರದರ್ಶಿಸಿ ಅವರು ಕೊಡುವ ಅಷ್ಟಿಷ್ಟು ಹಣದಿಂದಲೇ ಜೀವನವನ್ನು ನಡೆಸಿಕೊಂಡು ಹೋಗುತ್ತಿರುವಾಗಲೇ ಅವರ ಈ ಸಾಹಸ ಒಬ್ಬರಿಂದ ಮತ್ತೊಬ್ಬರಿಗೆ ತಿಳಿಯುತ್ತಾ ಹೋಗಿ ದೇಶ ವಿದೇಶದ ಮಾಧ್ಯಮದವರು ಆವರನ್ನು ಸಂದರ್ಶಿಸಿದ್ದಲ್ಲದೇ, ಆತನ ಸಾಹಸ ಕುರಿತಂತೆ ಕತೆಗಳು, ಡಾಕ್ಯೂಮೆಂಟರಿಗಳನ್ನು ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹರಿ ಬಿಡುವ ಮೂಲಕ ಜ್ಯೊತಿರಾಜ್ ಅಲಿಯಾಸ್ ಕೋತಿರಾಜ್ ಪ್ರಖ್ಯಾತಿಯನ್ನು ಹೊಂದುತ್ತಾರೆ. ಈತನ ಜನಪ್ರಿಯತೆಯನ್ನು ಬಳಸಿಕೊಂಡು ಹಣ ಮಾಡಬಹುದೆಂದು ಈತನನ್ನು ನಾಯಕತ್ವದಲ್ಲಿ ಜ್ಯೋತಿ ಅಲಿಯಾಸ್ ಕೋತಿರಾಜ ಕನ್ನಡ ಚಿತ್ರವೊಂದು ಬಿಡುಗಡೆಯಾಗಿ ನಿರೀಕ್ಷಿತ ಯಶಸ್ಸು ಕಾಣದಿದ್ದರೂ ಕೋತಿರಾಜ್ ನ ಸಮಗ್ರ ಪರಿಚಯ ನಾಡಿಗೆ ಆಗುತ್ತದೆ.

kothi3ತಮಿಳು ಭಾಷೆಯ ವೃತ್ತ ಪತ್ರಿಕೆಯಲ್ಲಿ ಕೋತಿರಾಜ್ ಬಗ್ಗೆ ಬಂದಿದ್ದ ವಿಷಯವನ್ನು ಓದಿ ತಿಳಿದ ಆತನ ನಿಜವಾದ ತಂದೆ ವಂಡಿಕಾರನ್ ಈಶ್ವರನ್ ಅವರು ಆತ ತನ್ನ ಮಗ ಎಂದು ತಿಳಿದು ಮಗನನ್ನು ಹುಡುಕಿಕೊಂಡು ಚಿತ್ರದುರ್ಗಕ್ಕೆ ಬಂದು 90ರ ದಶಕಲ್ಲಿ ವೀರಪಾಂಡಿ ಜಾತ್ರೆಯಲ್ಲಿ ತಾವು ಕಳೆದು ಕೊಂಡ ಮಗ ಈತನೆಂದೇ ಗುರುತಿಸುತ್ತಾರೆ. ನಂತರ ಆತನನ್ನು ಸಾಕಿ ಬೆಳಿಸಿದ್ದ ಬಾಗಲಕೋಟೆಯ ಬೇಕರಿ ಕುಟುಂಬದ ಮಧ್ಯಸ್ಥಿಕೆಯಲ್ಲಿ ಎಲ್ಲವೂ ನಿರ್ಧಾರವಾಗಿ ಜ್ಯೋತಿರಾಜ್ ತನ್ನ ಹುಟ್ಟೂರಿಗೆ ಹೋದಾಗ ಅದೇ ಜಾತ್ರೆಯ ಸಮಯವಾಗಿದ್ದು ಕಳೆದು ಹೋದ ತನ್ನ ಮಗ ಸಿಕ್ಕ ಸಂತೋಷದಲ್ಲಿ ಆತನ ತಂದೆ ಸುಮಾರು 10-12 ಹೋತಗಳನ್ನು ಕಡಿಸಿ ಭೂರಿ ಭೋಜನವನ್ನು ತಯಾರಿಸಿ ಇಡೀ ಊರಿಗೇ ಊಟಹಾಕಿಸುತ್ತಾರೆ. ಈತನ ಸಾಹಸವನ್ನು ಕಂಡ ತಮಿಳುನಾಡು ಸರ್ಕಾರವೂ ಆತನಿಗೆ ಬೇಕಾದ ಸಹಾಯ ಮಾಡಲು ಮುಂದಾದರೂ, ತಾನು ಹುಟ್ಟಿದ್ದು ತಮಿಳುನಾಡಾದರು ನನ್ನ ಕರ್ಮ ಭೂಮಿ ಕರ್ನಾಟಕ ಅದರಲ್ಲೂ ಚಿತ್ರದುರ್ಗ. ಹಾಗಾಗಿ ನಾನು ಎಂದೆಂದೂ ಕನ್ನಡಿಗನೇ ಮತ್ತು ನಾನು ಸಾಯುವುದೂ ಕನ್ನಡಿಗನಾಗಿಯೇ ಎಂದು ಹೆಮ್ಮೆಯಿಂದ ನುಡಿದು ಮತ್ತೆ ಚಿತ್ರದುರ್ಗಕ್ಕೆ ಹಿಂದಿರುಗುತ್ತಾನೆ.

discoveryಅದೇ ಸಮಯಕ್ಕೆ ಈತನ ಸಾಹಸದ ಬಗ್ಗೆ ತಿಳಿದ ಡಿಸ್ಕವರಿ ಛಾನೆಲ್ ತಮ್ಮ ಸೂಪರ್ ಹೀಮ್ಯಾನ್ ಸರಣಿಗೆ ಈತನನ್ನು ಸಂಪರ್ಕಿಸಿ ಚಿತ್ರೀಕರಣಕ್ಕೆ ವಿದೇಶಕ್ಕೆ ಬರಲು ಸೂಚಿಸುತ್ತಾರೆ. ಅಷ್ಟು ದೊಡ್ಡ ಮಾಧ್ಯಮವು ತನಗೆ ಅವಕಾಶವನ್ನು ಕೊಟ್ಟಿದ್ದಕ್ಕಾಗಿ ಸಂತೋಷವಾದರೂ, ತನ್ನ ಪ್ರತಿಭೆಯನ್ನು ಪ್ರೋತ್ಸಾಹಿಸಿ ತನಗೆ ಈ ಪರಿಯಾದ ಬೆಂಬಲವನ್ನು ನೀಡಿರುವ ಚಿತ್ರದುರ್ಗದಲ್ಲಿ ಚಿತ್ರೀಕರಿಸಿದಲ್ಲಿ ಮಾತ್ರವೇ ತಾನು ಒಪ್ಪಿಕೊಳ್ಳುವುದಾಗಿ ಷರತ್ತನ್ನು ಹಾಕುತ್ತಾನೆ. ಆರಂಭದಲ್ಲಿ ಛಾನೆಲ್ ಅವರು ಅದಕ್ಕೊಪ್ಪದೇ ಹೋದರೂ ನಂತರದ ದಿನಗಳಲ್ಲಿ ಅದಕ್ಕೊಪ್ಪಿ ಚಿತ್ರದುರ್ಗಕ್ಕೆ ಬಂದು ಈತನ ಸಾಹಸಗಳನ್ನೆಲ್ಲಾ ನೋಡಿ ಅಚ್ಚರಿಗೊಂಡು ಕಡೆಗೆ ದುರ್ಗದ ಬಳಿಯೇ ಇರುವ ಚಂದವಳ್ಳಿ ತೋಟದಲ್ಲಿದ್ದ ಕಡಿದಾದ ಯಾವುದೇ ಹಿಡಿತವೂ ಸಿಗದಿದ್ದಂತಹ ಬಂಡೆಯೊಂದನ್ನು ಏರಲು ಸೂಚಿಸುತ್ತಾರೆ. ಅವರ ಸವಾಲನ್ನು ಸ್ವೀಕರಿಸಿದ ಕೋತಿರಾಜ್ ಅವರು ಊಹಿಸಿದ್ದಕ್ಕಿಂತಲೂ ಕಡಿಮೆ ಸಮಯದಲ್ಲಿ ಆ ಬಂಡೆಯನ್ನು ಏರುವ ಮೂಲಕ ತಾನು ಕೇವಲ super he man ಮಾತ್ರವಾಗಿರದೇ, super super he man ಎಂದು ಸಾಭೀತು ಮಾಡಿ ತೋರಿಸುವ ಮೂಲಕ ಜಗದ್ವಿಖ್ಯಾತರಾಗುತ್ತಾರೆ.

ಚಿತ್ರದುರ್ಗದ ಬೆಟ್ಟವಲ್ಲದೇ ಕನ್ಯಾಕುಮಾರಿಯಿಂದ ಕಾಶ್ಮೀರದ ವರಗೆ, ಅಟಕ್ ನಿಂದ ಕಟಕ್ ವರೆಗೆ ದೇಶಾದ್ಯಂತ ಇರುವ ನಾನಾ ಸಾಹಸ ಬಂಡೆಗಳನ್ನು ಏರುವುದರ ಜೊತೆಗೆ ಭಾರತದ ಸ್ಪೈಡರ್ಮ್ಯಾನ್ ಎಂದೇ ಪ್ರಖ್ಯಾತಿ ಪಡೆಯುತ್ತಾರೆ. ಬರಿಗೈಯಲ್ಲಿಯೇ ಕಡಿದಾದ ಬಂಡೆಗಳನ್ನು ಸುಲಭವಾಗಿ ಏರುವ ಕರ್ನಾಟಕದ ಈ ಪ್ರತಿಭಾವಂತ ಪರ್ವತಾರೋಹಿ ಜ್ಯೋತಿರಾಜ್ ತನ್ನೀ ವಿದ್ಯೆಯನ್ನು ಹತ್ತಾರು ಹುಡುಗರಿಗೆ ಕಲಿಸಿಕೊಡಬೇಕು ಎಂದು ನಿರ್ಧರಿಸಿದ್ದಲ್ಲದೇ, ಈ ವಿದ್ಯೆಯಿಂದ ನಾಲ್ಕಾರು ಜೀವ ಉಳಿಸುವ ಕೆಲಸಕ್ಕೆ ಬಳಸಿಕೊಂಡು ಸಾರ್ಥಕತೆ ಪಡೆಯಲು ನಿರ್ಧರಿಸಿ, ದೂರದ ಅಮೇರಿಕಾದಲ್ಲಿ ಬೆಟ್ಟ ಗುಡ್ಡಗಳಲ್ಲಿ ಸಿಲುಕಿಕೊಂಡವರನ್ನು ಪಾರುಮಾಡುವುದರ ಕುರಿತಂತೆ ತರಭೇತಿಯನ್ನೂ ಪಡೆದು ಬಂಡೆಗಳ ಮಧ್ಯೆ ಸಿಲುಕಿ ಕೊಂಡಿದ್ದ ಹತ್ತು ಹಲವಾರು ಜನರ ಪ್ರಾಣವನ್ನು ಉಳಿಸಿದ್ದಾರೆ. ಈಗಾಗಲೇ ಅವರಿಂದ ತರಭೇತಿ ಪಡೆದ ಅನೇಕರು ಸೇನೆ ಮತ್ತು ಪೋಲೀಸ್ ಕೆಲವನ್ನು ಗಿಟ್ಟಿಸಿಕೊಂಡಿದ್ದರೆ, ಇಂದಿಗೂ ಸುಮಾರು 8-10 ಹುಡುಗರ ಸಂಪೂರ್ಣ ಜವಾಬ್ಧಾರಿಯನ್ನು ಜ್ಯೋತಿ ರಾಜ್ ನಿಭಾಯಿಸುತ್ತಿರುವುದು ಅತ್ಯಂತ ಶ್ಲಾಘನಿಯವಾಗಿದೆ.

ಫೆಬ್ರವರಿ 28, 2018 ರಂದು ವಿಶ್ವವಿಖ್ಯಾತ ಜೋಗದ ಜಲಪಾತಕ್ಕೆ ಬಂದಿದ್ದ ಯುವಕರ ತಂಡವು ಕಾಲು ಜಾರಿ ಜೋಗದ ಪ್ರಪಾತಕ್ಕೆ ಬಿದ್ದು ಹೋದಾಗ, ಅವರ ಶವದ ಪತ್ತೆಗಾಗಿ ಪೋಲಿಸರು ಜ್ಯೋತಿರಾಜ್ ಅವರ ಸಹಾಯವನ್ನು ಕೇಳಿಕೊಳ್ಳುತ್ತಾರೆ. ಸುಮಾರು800-1000 ಅಡಿಗಳಷ್ಟು ಎತ್ತರವಿರುವ ಜೋಗದ ಜಲಪಾತವನ್ನು ಅದಾಗಲೇ ೬-೮ ಬಾರಿ ಹತ್ತಿ ಇಳಿದಿದ್ದ ಕೋತಿರಾಜ್ ಅದಕ್ಕೆ ಒಪ್ಪಿಕೊಂಡು ಆ ಕೆಲಸದಲ್ಲಿ ನಿರತನಾಗಿ ಆ ಹುಡುಗನ ಶವವನ್ನು ಪತ್ತೆ ಹಚ್ಚಿ ತನ್ನ ಹೆಗಲಮೇಲೆ ಹಾಕಿಕೊಂಡು ಮೇಲೇರುತ್ತಿರುವಾಗ ಸಡಿಲವಾಗಿದ್ದ ಬಂಡೆ ಕಲ್ಲೊಂದು ಜ್ಯೋತಿರಾಜ್ ತಲೆಯ ಮೇಲೆ ಬಿದ್ದು ಎಲ್ಲರೂ ನೋಡ ನೋಡುತ್ತಿದ್ದಂತೆಯೇ ಕೈ ಜಾರಿ ಜ್ಯೋತಿರಾಜ್ ಪ್ರಪಾತಕ್ಕೆ ಜಾರಿ ಬೀಳುವ ಮೂಲಕ ಎಲ್ಲರೂ ಜ್ಯೋತಿರಾಜ್ ಸತ್ತನೆಂದೇ ಭಾವಿಸಿದ್ದಾಗ ಅಷ್ಟೆಲ್ಲಾ ಅಪಘಾತಗಳ ನಡುವೆಯೂ ಬದುಕುಳಿದ ಜ್ಯೋತಿರಾಜ್ ನನ್ನು ಚಿಕಿತ್ಸೆಗಾಗಿ ಆಸ್ಪತೆಗೆ ಸೇರಿಸಲಾಗುತ್ತದೆ. ಸುಮಾರು 9 ತಿಂಗಳುಗಳ ಕಾಲ ಆಸ್ಪತ್ರೆಯಲ್ಲಿ ಕಳೆದ 57 ಕೆಜಿ ತೂಕವಿದ್ದ ಜ್ಯೋತಿರಾಜ್, ಆಸ್ಪತ್ರೆಯಿಂದ ಹೊರಬರುವಷ್ಟರಲ್ಲಿ 96 ಕೆಜಿಯಷ್ಟು ದಪ್ಪವಾಗಿರುತ್ತಾರೆ.

ತನ್ನ ಕರ್ಮಭೂಮಿ ಚಿತ್ರದುರ್ಗದ ಕೋಟೆಯನ್ನು ಸರ್ಕಾರ ಅಭಿವೃದ್ಧಿ ಮಾಡುತ್ತಿಲ್ಲವ್ವಾದರಿಂದ ಅದಕ್ಕಾಗಿ ತನ್ನಿಂದೇನಾದರೂ ಸಹಾಯ ಮಾಡಲೇ ಬೇಕೆಂದು ನಿರ್ಧರಿಸಿ ದುಬೈನಲ್ಲಿರುವ ಪ್ರಪಂಚದ ಅತಿ ಎತ್ತರದ ಕಟ್ಟಡವಾದ ಬುರ್ಜ್ ಖಲೀಫಾ ಮತ್ತು ಅಮೆರಿಕಾದ ವೆನೆಜುಲ್ಲಾದಲ್ಲಿರುವ ಈ ಏಂಜಲ್ ಫಾಲ್ಸ್ ರುದ್ರ ರಮಣೀಯವಾದ ಮತ್ತು ಜಗತ್ತಿನ ಅತ್ಯಂತ ಕಡಿದಾದ ಜಾರುವ ಬಂಡೆಗಳಿರುವ ಜಲಪಾತವನ್ನು ಏರುವ ಮೂಲಕ ಬರುವ ಹಣದಲ್ಲಿ ಚಿತ್ರದುರ್ಗದ ಅಭಿವೃದ್ಧಿ ಮಾಡುತ್ತೇನೆೆ ಎಂಬ ಸಾಹಸಕ್ಕೆ ಕೈ ಹಾಕಿದ್ದರು. ದುರಾದೃಷ್ಟವಷಾತ್ ಅವರ ದೇಹದ ತೂಕ ಹೆಚ್ಚಾಗಿರುವ ಕಾರಣ ಈ ಸಾಹಸದಲ್ಲಿ ಪಾಲ್ಕೊಳ್ಳುವುದು ಪ್ರಾಣಕ್ಕೆ ಅಪಾಯ ಎಂದು ಅಲ್ಲಿನ್ನವರು ಸೂಚಿಸಿರುವ ಕಾರಣ ದೇಹದ ತೂಕವನ್ನು ಇಳಿಸಿ ಎಲ್ಲವೂ ಸುಗಮ ಎಂದು ಕೊಳ್ಳುತ್ತಿರುವಾಗಲೇ ಕೊರೋನಾ ಮಹಾಮಾರಿ ವಕ್ಕರಿಸಿ ಅವರ ಆಸೆಗೆ ತಣ್ಣಿರೆರೆಚಿದೆ.

azadಆಯುರ್ವೇದದ ಚಿಕಿತ್ಸೆ ಮತ್ತು ವ್ಯಾಯಾಮಗಳ ಮೂಲಕ ತೂಕ ಇಳಿಸಿಕೊಂಡು ಖಂಡಿತವಾಗಿಯೂ ಎಂಜಲ್ ಫಾಲ್ಸ್ ಏರಿಯೇ ತೀರುತ್ತೇನೆ ಎಂಬ ಭರವಸೆಯೊಂದಿಗೆ ತಮ್ಮ ಶಿಷ್ಯಂದಿರಿಗೆ ಪ್ರತಿದಿನವೂ ತರಭೇತಿ ನೀಡುತ್ತಾ ಪ್ರತೀ ಭಾನುವಾರ ದುರ್ಗದ ಪ್ರವಾಸಿಗರಿಗೆ ತಮ್ಮ ಸಾಹಸವನ್ನು ತೋರಿಸುತ್ತಾ ಅವರು ಕೊಡುವ ಅಲ್ಪ ಸ್ವಲ್ಪ ಹಣದಲ್ಲಿ ತಾವೂ ಮತ್ತು ತಮ್ಮ ಶಿಷ್ಯಂದಿರ ಜೀವನವನ್ನು ನಡೆಸಿಕೊಂಡು ಹೋಗುತ್ತಿದ್ದಾರೆ. ಸುದೀಪ್ ದರ್ಶನ್, ಶಾರೂಖ್ ಖಾನ್ ಅವರುಗಳು ಕೇವಲ ಸಿನಿಮಾದ ಹೀರೋಗಳಷ್ಟೇ. ಭಗತ್ ಸಿಂಗ್ ಮತ್ತು ಚಂದ್ರಶೇಖರ ಆಜಾದ್ ಅವರಂತಹವರು ಈ ದೇಶದ ನಿಜವಾದ ಹೀರೋಗಳಾಗಿದ್ದು ಅವರೇ ನನ್ನ ಸ್ಪೂರ್ತಿ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವ ಜ್ಯೋತಿರಾಜ್ ನನ್ನ ಜೀವಮಾನದಲ್ಲಿ ಖಂಡಿತವಾಗಿಯೂ ತನ್ನ ತಾಯ್ನಾಡಾದ ಭಾರತಕ್ಕೂ ಮತ್ತು ತನಗೆ ಆಶ್ರಯ ನೀಡಿದ ಕರ್ನಾಟಕ ಮತ್ತು ತನ್ನ ಕರ್ಮ ಭೂಮಿ ಚಿತ್ರದುರ್ಗಕ್ಕೆ ಕೀರ್ತಿ ತಂದೇ ತರುತ್ತೇನೆ ಎಂದು ಹೇಳುವಾಗ ಅವರ ದಿಟ್ಟ ನುಡಿಗಳು ಮತ್ತು ಹೊಳೆಯುವ ಕಣ್ಗಳು ನಿಜಕ್ಕೂ ನಮ್ಮ ನಿಮ್ಮಂತಹವರಿಗೆ ಪ್ರೇರಣೆ ನೀಡುತ್ತದೆ.

koti_jogಸುಮಾರು 830 ಅಡಿ ಎತ್ತರವಿರುವ ಕರ್ನಾಟಕದ ಅತಿ ದೊಡ್ಡದಾದ ಜೋಗ ಜಲಪಾತವನ್ನು ನೀರಿನ ಹರಿವಿಗೆ ವಿರುದ್ಧವಾಗಿ ಏರಿದ ಏಕೈಕ ವ್ಯಕ್ತಿ. ಯಾವುದೇ ಸಾಧನಗಳನ್ನು ಬಳಸದೇ ಕೇವಲ 15 ಸೆಕೆಂಡುಗಳಲ್ಲಿ ಹುಬ್ಬಳ್ಳಿಯ ಮೂರುಸಾವಿರ ಮಠದ ಗಡಿಯಾರ ಗೋಪುರವನ್ನು ಹತ್ತಿದಂತಹ ಅಂತಾರಾಷ್ಟ್ರೀಯ ರಾಕ್ಕ್ಲೈಂಬರ್ ಸಿ.ಎಂ.ಪ್ರವೀಣ್ರಿಂದ ತರಬೇತಿ ಪಡೆದಿರುವಂತಹ ಸಾಹಸಿ ಕೋತಿರಾಜ್ ಅವರು ಅತೀ ಶೀಘ್ರದಲ್ಲಿಯೇ ವೆನಿಜ್ಯೂವೆಲಾದ ಏಂಜಲ್ ಫಾಲ್ಸ್ ಏರುವ ಮೂಲಕ ಅವರಿಗೆ ಅಂತರಾಷ್ಟ್ರೀಯ ಮನ್ನಣೆ ಸಿಗುವ ಮೂಲಕ ಭಾರತದ ವಿಜಯ ಪತಾಕೆ ವಿಶ್ವಾದ್ಯಂತ ಹರಡಲಿ ತನ್ಮೂಲಕ ಜ್ಯೋತಿರಾಜ್ ಅವರ ಕನಸೆಲ್ಲಾ ನನಸಾಗಲಿ ಮತ್ತು ನಮ್ಮ ಇಂದಿನ ಯುವಜನತೆಗೆ ಪ್ರೇರಣೆಯಾಗಲಿ ಎಂದು ಹಾರೈಸೋಣ ಅಲ್ಲವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಕೂರ್ಮಗಢ ಶ್ರೀ ನರಸಿಂಹ ಸ್ವಾಮಿ

nar3ಹಿರಣ್ಯಕಷಿಪುವಿನ ಮಗ ಮಗ ಪ್ರಹ್ಲಾದ ಭಗವಾನ್ ವಿಷ್ಣು ಸರ್ವಾಂತರ್ಯಾಮಿ. ಆತ ಎಲ್ಲೆಡೆಯಲ್ಲಿಯೂ ಇದ್ದಾನೆ ಎನ್ನುತ್ತಾನೆ. ಆಗ ಕೋಪಗೊಂಡ ಹರಿಯ ವೈರಿ ಹಿರಣ್ಯಕಶಿಪು ಆ ನಿನ್ನ ಹರಿ ಇಲ್ಲಿರುವನೇ? ಅಲ್ಲಿರುವನೇ, ಆಕಾಶದಲ್ಲಿ ಇರುವನೇ, ಭೂಮಿಯಲ್ಲಿ ಇರುವನೇ ನೀರಿನಲ್ಲಿ ಇರುವನೇ? ಎಂದು ಕೇಳಿದಾಗ ಹೌದು ತಂದೆ ಆ ಹರಿ ಎಲ್ಲೆಲ್ಲೂ ಇದ್ದಾನೆ ಎಂದಾಗ ಸಿಟ್ಟಿನಲ್ಲಿ ತನ್ನ ಅರಮನೆಯ ಕಂಬವನ್ನು ತೋರಿಸಿ ಇಲ್ಲಿರುವನೇ ನಿನ್ನ ಹರಿ ಎಂದು ಆ ಕಂಭಕ್ಕೆ ಹೊಡೆದಾಗ ಆ ಕಂಬದಿಂದ ಹರಿ ನರಸಿಂಹಾವತಾರದಲ್ಲಿ ಬಂದು ಹಿರಣ್ಯಕಶಿಪುವನ್ನು ಸಾಯಿಸಿದ ಕಥೆ ನಮಗೆಲ್ಲಾ ಗೊತ್ತಿದೆ. ಆವರಿಬ್ಬರ ಸಂಭಾಷಣೆಯಲ್ಲಿ ಬರುವ ಆ ನಿನ್ನ ಹರಿಯು ನೀರಿನಲ್ಲೂ ಇರುವನೇ ಎಂಬುದಕ್ಕೆ ಜ್ವಲಂತ ಉದಾಹರಣೆಯಂತೆ ಕಾರವಾರದ ಅರಬ್ಬಿ ಸಮುದ್ರದ ಮಧ್ಯದಲ್ಲಿ ಇರುವ ಕೂರ್ಮಗಢದ ನರಸಿಂಹಸ್ವಾಮಿಯ ಬಗ್ಗೆ ತಿಳಿದುಕೊಳ್ಳೋಣ ಬನ್ನಿ,

kurma2ಕಾರವಾರ ಬಂದರಿನಿಂದ ಸುಮಾರು 6 ಕಿ.ಮೀ.ಗಳ ದೂರದಲ್ಲಿ ವಿಶಾಲವಾದ ಅರಬ್ಬೀ ಸಮುದ್ರದಲ್ಲಿ ನೂರು ಹೆಕ್ಟೇರ್ ಗಿಂತಲು ಅಧಿಕ ವಿಸ್ತೀರ್ಣದ ದ್ವೀಪವೊಂದಿದ್ದು ಅದಉ ನೋಡಲು ಆಮೆಯ ಆಕರ ಇರುವುದರಿಂದ ಅದನ್ನು ಕೂರ್ಮಗಢ ಎಂದು ಕರೆಯಲಾಗುತ್ತದೆ. ಈ ಕೂರ್ಮಗಢದಲ್ಲಿ ಪುರಾಣ ಪ್ರಸಿದ್ಧ ಶ್ರೀ ನರಸಿಂಹಸ್ವಾಮಿಯ ಗುಡಿಯೂ ಇರುವುದರಿಂದ ಈ ದ್ವೀಪಕ್ಕೆ ನರಸಿಂಹಗಡ ಎಂದೂ ಕರೆಯಲಾಗುತ್ತದೆ. ಸಮುದ್ರದ ತಡದಿಂದ ಸಾವಿರಾರು ಮೀಟರ್ ಎತ್ತರದಲ್ಲಿರುವ ದ್ವೀಪವನ್ನು ಹತ್ತಲು ಕಲ್ಲುಬಂಡೆಗಳ ಮಧ್ಯದಲ್ಲಿಯೇ ಕಾಲುದಾರಿಯನ್ನು ಕೊರೆಯಲಾಗಿದೆ.

narasimhaಈ ಕೂರ್ಮಗಡದಲ್ಲಿ ನರಸಿಂಹ ದೇವರ ಗುಡಿಯ ಪ್ರತಿಷ್ಟಾಪನೆಯ ಹಿಂದೆ ಪೌರಾಣಿಕದ ಐತಿಹ್ಯವಿದೆ. ಕಾರವಾರ ಮತ್ತು ಕೈಗಾ ನಡುವಿನಲ್ಲಿ ಕಡವಾಡ ಎಂಬ ಪ್ರದೇಶವಿದ್ದು ಅಲ್ಲಿನ ಗುಡಿಯೊಂದಕ್ಕಿ ಸಾಧುವೊಬ್ಬರು ಅರ್ಚಕರಾಗಿ ಬರುತ್ತಾರೆ. ಅದೊಮ್ಮೆ ಅವರು ದೇವಸ್ಥಾನಕ್ಕೆ ನಡೆದುಕೊಂಡು ಬರುವಾಗ ಅವರಿಗೊಂದು ಸಾಲಿಗ್ರಾಮ’ (ಅಂದರೆ ವಿಷ್ಣುವಿನ ಅವತಾರದ ಒಂದು ಚಿನ್ಹೆ) ಸಿಗುತ್ತದೆ, ಅದನ್ನು ಭೋವಿ ಸಮುದಾಯಕ್ಕೆ ಸೇರಿದವನೊಬ್ಬನಿಗೆ ನೀಡಿ ಅದನ್ನು ಕೂರ್ಮಗಡದಲ್ಲಿ ಪ್ರತಿಷ್ಠಾಪಿಸುವಂತೆ ಹೇಳುತ್ತಾರೆ. ಆ ವ್ಯಕ್ತಿಯು ಆ ಸಾಲಿಗ್ರಾಮವನ್ನು ಕೂರ್ಮಗಡದಲ್ಲಿ ಪ್ರತಿಷ್ಠಾಪಿಸಿದ ನಂತರ ನೀರಿಗೆ ಧುಮುಕಿದವರು ಮತ್ತೆಂದೂ ಹಿಂದಿರುಗಿ ಬರಲಿಲ್ಲವಂತೆ. ಆತ ಹಾಗೆ ಸ್ಥಾಪಿಸಿದ ಗುಡಿಯೇ ಇಂದಿನ ಶ್ರೀ ನರಸಿಂಹಸ್ವಾಮಿ ದೇವಾಲಯ. ಅಂದಿನಿಂದ ಆಲ್ಲಿನ ಸ್ಥಳೀಯರಿಗೆ ಮತ್ತು ಮೀನುಗಾರರಿಗೆ ಆ ನರಸಿಂಹನೇ ಪ್ರಮುಖ ದೇವರು. ಪ್ರತೀ ವರ್ಷ ಪುಷ್ಯ ಮಾಸದ ಹುಣ್ಣಿಮೆಯ ದಿನದಂದು ಇಲ್ಲಿ ಅತ್ಯಂತ ವಿಜೃಂಭಣೆಯಿಂದ ಜಾತ್ರೆಯನ್ನು ನಡೆಸಲಾಗುತ್ತದೆ,

ಕೇವಲ ಸ್ಥಳೀಯರಲ್ಲದೇ ಕರಾವಳಿ, ಉತ್ತರಕನ್ನಡದ ಕೆಲವು ಪ್ರದೇಶಗಳ ಜನರಲ್ಲದೇ ಅಕ್ಕ ಪಕ್ಕದ ರಾಜ್ಯಗಳಾದ ಗೋವಾ, ಮತ್ತು ಮಹಾರಾಷ್ಟ್ರಗಳಿಂದಲೂ ಬಂದು ಬಹಳ ಭಕ್ತಿಯಿಂದ ಈ ಜಾತ್ರೆಯಲ್ಲಿ ಪಾಲ್ಗೊಳ್ಳುತ್ತಾರೆ. ಹೀಗೆ ಜಾತ್ರೆಯಲ್ಲಿ ಭಗವಂತನನ್ನು ದರ್ಶನ ಮಾಡಲು ಬರುವವರು ಖಡ್ಡಾಯವಾಗಿ ಬಾಳೇಗೊನೆಯನ್ನು ದೇವರಿಗೆ ನೈವೇದ್ಯವಾಗಿ ತೆಗೆದುಕೊಂಡು ಬರುವುದು ಇಲ್ಲಿನ ಸಂಪ್ರದಾಯವಾಗಿದೆ. ಹೀಗೆ ದೇವರಿಗೆ ಬಾಳೇ ಗೊನೆಯನ್ನು ಅರ್ಪಿಸಿದಲ್ಲಿ ಭಗವಂತನು ಅವರಿಗೆ ಒಲಿದು ಇಡೀ ವರ್ಷ ಸುಭಿಕ್ಷವಾಗಿರುತ್ತದಲ್ಲದೇ ಹೆಚ್ಚಿನ ಮೀನು ಸಿಗುತ್ತದೆ ಎಂಬ ನಂಬಿಕೆ ಸ್ಥಳೀಯರದ್ದಾಗಿದೆ. ಆ ವರ್ಷ ಯಾರಿಗೆ ಹೆಚ್ಚಿನ ಮೀನು ದೊರೆತಿರುತ್ತದೆಯೋ ಅವರು ಒಂದಕ್ಕಿಂತಲು ಹೆಚ್ಚಿನ ಬಾಳೇ ಗೊನೆಯನ್ನು ನೈವೇದ್ಯಕ್ಕೆ ಅರ್ಪಿಸುವುದು ಅಲ್ಲಿನ ನಡೆದುಕೊಂಡು ಬಂದಿರುವ ರೂಢಿಯಾಗಿದೆ.

kurma1ಜಾತ್ರೆಯ ದಿನ ಕಡವಾಡದ ನರಸಿಂಹ ದೇವರನ್ನು ಬೆಳಗ್ಗೆಯೇ ಪಲ್ಲಕ್ಕಿ ಮೆರವಣಿಗೆಯಲ್ಲಿ ಕರೆತಂದು ಆನಂತರ ಅಲಂಕೃತ ದೋಣಿಯಲ್ಲಿ ಕೂರ್ಮಗಡಕ್ಕೆ ತಂದು ಆ ದ್ವೀಪದ ಕಟ್ಟೆಯ ಮೇಲಿಟ್ಟು ಅದಕ್ಕೆ ಶೋಡಶೋಪಚಾರ ಪೂಜೆಯನ್ನು ಮಾಡಿ, ಕಡವಾಡಕ್ಕೆ ಬಂದ ಭಕ್ತಾದಿಗಳೇ ಆಲ್ಲೇ ಅಡುಗೆಯನ್ನು ತಯಾರಿಸಿ ಬಾಳೇಹಣ್ಣಿನ ಜೊತೆ ಮಾಡಿದ ಅಡುಗೆಯನ್ನು ನೈವೇದ್ಯವನ್ನು ಮಾಡಿ ಎಲ್ಲರಿಗೂ ಪ್ರಸಾದವನ್ನು ಹಂಚುತ್ತಾರೆ. ಮಾರನೇಯದಿನ ಮತ್ತದೇ ದೋಣಿಯಲ್ಲಿ ಕಡವಾಡದ ದೇವಸ್ಥಾನಕ್ಕೆ ಮರಳಿ ತರುವುದರ ಮೂಲಕ ಜಾತ್ರೆ ಸಂಪನ್ನವಾಗುತ್ತದೆ,

2019ರಲ್ಲಿ ಈಜಾತ್ರೆಗೆ ಬಂದು ದೇವರ ದರ್ಶನ ಮಾಡಿ ಹಿಂದಿರುಗುವಾಗ ನಡೆದ ದೋಣಿ ದುರಂತದಲ್ಲಿ ಅನೇಕ ಜನರ ಸಾವು ನೋವು ಸಂಭವಿಸಿದ ನಂತರ ಈ ಜಾತ್ರೆಯಂದು ಬಹಳ ಎಚ್ಚರಿಕೆಯನ್ನು ವಹಿಸಲಾಗುತ್ತಿದೆ. ಈ ಕಹಿ ಘಟನೆಯ ಹಿನ್ನಲೆಯಲ್ಲಿ ಎಚ್ಚೆತ್ತುಕೊಂಡ ಉತ್ತರ ಕನ್ನಡ ಜಿಲ್ಲಾಡಳಿತವೂ ಕೇವಲ ಬೈತ್ಕೋಲ್ ಮೀನುಗಾರಿಕಾ ಬಂದರು ಮತ್ತು ಕಡವಾಡದ ಮೂಲಕ ಮಾತ್ರ ಬೋಟ್ ವ್ಯವಸ್ಥೆ ಮಾಡಿದೆ. ಹೀಗಾಗಿ ಭಕ್ತರಿಗೆ ಆಗುತ್ತಿದ್ದ ಅನಾನೂಕೂಲವನ್ನು ಕಂಡ ಸ್ಥಳೀಯ ಮೀನುಗಾರರು ಕಾರವಾರದ ಬೈತ್ಕೋಲ್ ಮೀನುಗಾರರು ತಮ್ಮ ಬೋಟ್​ಗಳ ಮೂಲಕ ಭಕ್ತರಿಗೆ ಉಚಿತ ಸೇವೆ ಸಲ್ಲಿಸುತ್ತಿದ್ದಾರೆ.

kurma3ಕಾರವಾರದ ಬಂದರಿನಿಂದ 6 ಕಿ.ಮೀ., ಕೋಡಿಭಾಗದಿಂದ 2 ಕಿ.ಮೀ. ದೇವಭಾಗದಿಂದ ಒಂದು ಕಿ.ಮೀ.ದೂರದಲ್ಲಿರುವ ಈ ದ್ವೀಪವು ಕಲ್ಲುಬಂಡೆಗಳಿಂದ ರೂಪುಗೊಂಡಿದ್ದರೂ ಮರಳಿನ ತೀರವಿರುವ ಕಾರಣ ಪ್ರವಾಸಕ್ಕೆ ಹೇಳಿಮಾಡಿಸಿದ ಸ್ಥಳವಾಗಿದೆ. ಕೂರ್ಮಗಡದಲ್ಲಿ ಕಡಿದಾದ ಗುಡ್ಡವನ್ನು ಏರಿದರೂ ಅಲ್ಲಿನ ಪ್ರಶಾಂತವಾದ ವಾತವರಣ ಮನಸ್ಸಿಗೆ ಮುದನೀಡುತ್ತದೆ. ಪ್ರವಾಸಿಗರ ಅನುಕೂಲಕ್ಕೆಂದೇ ಇಲ್ಲಿ ರೆಸಾರ್ಟ್ ಕೂಡ ಇದ್ದು ಊಟ-ತಿಂಡಿಯ ವ್ಯವಸ್ಥೆ ಅಚ್ಚುಕಟ್ಟಾಗಿದೆ. ಈ ಭಾಗಕ್ಕೆ ಪ್ರವಾಸ ಕೈಗೊಳ್ಳಲು ಸೆಪ್ಟೆಂಬರ್ನಿಂದ ಮಾರ್ಚ್ ತಿಂಗಳುಗಳ ಮಧ್ಯೆ ಸೂಕ್ತ ಸಮಯವಾಗಿದೆ. ಜಾತ್ರೆ ಸಮಯದಲ್ಲಿ ಇಲ್ಲಿಗೆ ಬರ ಬೇಕೆಂದರೆ, ಜಾತ್ರೆಯ ದಿನ ಬೆಳ್ಳಂಬೆಳಗ್ಗೆ ಕಾರವಾರದಿಂದ ಗೋವಾ ಮಾರ್ಗದಲ್ಲಿನ ಕಾಳಿ ನದಿ ಸೇತುವೆ ಬಳಿ ಬಂದು ಅಲ್ಲಿಂದ ದೋಣಿಗಳ ಮೂಲಕ ಕೂರ್ಮಗಡವನ್ನು ತಲುಪಬಹುದಾಗಿದೆ.

ಇಷ್ಟೆಲ್ಲಾ ಮಾಹಿತಿ ತಿಳಿದ ಮೇಲೆ ಇನ್ನೇಕೆ ತಡಾ ಸಮಯ ಮಾಡಿಕೊಂಡು ಕೂರ್ಮಗಡಕ್ಕೆ ಬೇಟಿ ನೀಡಿ ಶ್ರೀ ನರಸಿಂಹ ಸ್ವಾಮಿಯ ದರ್ಶನ ಮಾಡಿ ಕೃತಾರ್ಥರಾಗಿ ನಿಮ್ಮ ಸುಂದರವಾದ ಅನುಭವವನ್ನು ನಮ್ಮೊಂದಿಗೆ ಹಂಚ್ಕೊತೀರೀ ತಾನೇ?

ಏನಂತೀರಿ?
ನಿಮ್ಮವನೇ ಉಮಾಸುತ

ಧರ್ಮಸ್ಥಳದ ಲಕ್ಷದೀಪೋತ್ಸವ

KARಕರ್ನಾಟಕದ ಕರಾವಳಿಯ ದಕ್ಷಿಣ ಕನ್ನಡ ಕೇವಲ ನದಿಗಳಿಗಷ್ಟೇ ಅಲ್ಲದೇ, ದೇವಾಲಯಗಳಿಗೂ ಪ್ರಸಿದ್ಧವಾಗಿದೆ. ಅಲ್ಲಿ ಹರಿಯುವ ಪ್ರತೀ ನದಿ ಹಳ್ಳ ಕೊಳ್ಳಗಳ ತಟದಲ್ಲಿ ಪ್ರತಿ ಹತ್ತಿಪ್ಪತ್ತು ಕಿಮೀ ದೂರದಲ್ಲಿ ಒಂದೊಂದು ಒಂದೊಂದು ದೇವಸ್ಥಾನಗಳಿದ್ದು, ಅವುಗಳಲ್ಲಿ ಜೀವನದಿ ನೇತ್ರಾವತಿಯ ತಟದಲ್ಲಿರುವ ಯಾವುದೇ ಜಾತಿ ಧರ್ಮದ ಹಂಗಿಲ್ಲದೇ ಸಕಲ ಹಿಂದೂಗಳ ಧಾರ್ಮಿಕ ಕ್ಷೇತ್ರವೇ ಪುರಾಣ ಪ್ರಸಿದ್ಧ ಧರ್ಮಸ್ಥಳವಾಗಿದೆ. ಹೆಸರಿಗೆ ಅನ್ವರ್ಥದಂತೆ ಅದು ಶಾಂತಿ ಮತ್ತು ಧರ್ಮದ ಬೀಡಾಗಿದ್ದು ಧರ್ಮಸ್ಥಳದ ಮಂಜುನಾಥನ ಸ್ವಾಮಿಗೆ ಇಡೀ ದೇಶಾದ್ಯಂತ ಭಕ್ತಾದಿಗಳು ಇದ್ದು ಬಹಳ ನಂಬಿಕೆಗೆ ಹೆಸರುವಾಸಿಯಾಗಿದೆ. ಸ್ವತಃ ಜೈನರಾಗಿಯೂ 21 ತಲೆಮಾರುಗಳಿಂದ ಹೆಗ್ಗಡೆ ಕುಟುಂಬವು ಧರ್ಮಸ್ಥಳದಲ್ಲಿ ಧಾರ್ಮಿಕ ಚಟುವಟಿಕೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡು ವಿಧಿವತ್ತಾಗಿ ನಡೆಸಿಕೊಂಡು ಧರ್ಮಸ್ಥಳ ಕ್ಷೇತ್ರಕ್ಕೆ ಧಾರ್ಮಿಕ ಸಹಿಷ್ಣುತೆಯ ಶ್ರೀಕ್ಷೇತ್ರ ಎಂಬ ಹೆಸರು ಬರುವಂತೆ ಮಾಡಿದ್ದಾರೆ ಎಂದರೆ ಅತಿಶಯೋಕ್ತಿಯೇನಲ್ಲ.

dharma2ವರ್ಷದ 365 ದಿನಗಳೂ ಒಂದಲ್ಲಾ ಒಂದು ಧಾರ್ಮಿಕ ವಿವಿಧ ವಿಧಾನಗಳಿಂದಾಗಿ ಶ್ರೀಕ್ಷೇತ್ರಕ್ಕೆ ಭಕ್ತಾದಿಗಳು ವರ್ಷಪೂರ್ತಿಯೂ ಮಂಜುನಾಥನ ಸಂದರ್ಶನಕ್ಕೆಂದು ಇಲ್ಲಿಗೆ ಬರುವುದಲ್ಲದೇ, ಈ ಧಾರ್ಮಿಕ ಕ್ಷೇತ್ರದ ಐತಿಹಾಸಿಕ ಮಹತ್ವ ಮತ್ತು ಇಲ್ಲಿನ ನಡಾವಳಿಗಳಿಂದಾಗಿ ಬಹಳ ಪ್ರಾಮುಖ್ಯವನ್ನು ಪಡೆದಿದೆ.

annappaಸುಮಾರು 700 – 800 ವರ್ಷಗಳ ಇತಿಹಾಸವಿದೆ. ಈ ಪ್ರಾಂತ್ಯದ ನೆಲ್ಯಾಡಿಬೀಡು ಎನ್ನುವ ಮನೆಯಲ್ಲಿ ಮಹಾನ್ ದೈವಭಕ್ತರಾದ ಬಿರ್ಮಣ್ಣ ಪೆರ್ಗಡೆ ಮತ್ತು ಅಮ್ಮು ಬಲ್ಲಾಳ್ತಿ ಎನ್ನುವ ಜೈನ ಸಂಪ್ರದಾಯದ ದಂಪತಿಗಳು ತಮ್ಮ ಮನೆಗೆ ಬಂದ ನಾಲ್ಕು ಅತಿಥಿಗಳನ್ನು ನೇಮನಿಷ್ಠೆಯಿಂದ ಸತ್ಕರಿಸಿದರು. ಅಂದಿನ ರಾತ್ರಿ ಮನೆಗೆ ಬಂದಿದ್ದ ನಾಲ್ವರು ಅತಿಥಿಗಳು ಧರ್ಮದೇವತೆಗಳ ರೂಪದಲ್ಲಿ ಬಿರ್ಮಣ್ಣ ಹೆಗ್ಡೆಯವರ ಕನಸಿನಲ್ಲಿ ಅದೇ ಮನೆಯಲ್ಲಿ ನೆಲೆಸಲು ಇಚ್ಛಿಸಿಸುವುದಾಗಿ ತಿಳಿಸಿದ್ದಲ್ಲದೇ, ಅಲ್ಲೊಂದು ಶಿವಲಿಂಗವನ್ನು ಸ್ಥಾಪಿಸುವಂತೆ ಆದೇಶಿಸಿ, ತಮ್ಮ ಪ್ರತಿನಿಧಿಯಾಗಿ ಅಣ್ಣಪ್ಪಸ್ವಾಮಿಯನ್ನು ಕಳುಹಿಸಿ ಕೊಟ್ಟರು.

dh23ಅಣ್ಣಪ್ಪಸ್ವಾಮಿಯು ಮಂಗಳೂರಿನ ಕದ್ರಿ ಎನ್ನುವ ಪ್ರದೇಶದಿಂದ ಶಿವಲಿಂಗವನ್ನು ತರುವಷ್ಟರಲ್ಲಿ ಆ ಧರ್ಮದೇವತೆಗಳು ದೇವಾಲಯವನ್ನು ನಿರ್ಮಿಸಿ ಆ ದೇವಾಲಯದಲ್ಲಿ ಶಿವಲಿಂಗವನ್ನು ಪ್ರತಿಷ್ಠಾಪನೆ ಮಾಡಿದರು ಎನ್ನುವುದು ಈ ಕ್ಷೇತ್ರದ ಇತಿಹಾಸವಾಗಿದೆ. ಈ ಕ್ಷೇತ್ರದ ರಕ್ಷಣೆಗೆ ಧರ್ಮದೇವತೆಗಳ ಪ್ರತಿನಿಧಿ ಪಂಜುರ್ಲಿ ಅರ್ಥಾತ್ ಅಣ್ಣಪ್ಪನ ಶಕ್ತಿ ಅಪರಿಮಿತವಾಗಿದ್ದು, ಧರ್ಮದೇವತೆಗಳು ನಿರ್ಮಿಸಿದ ಈ ಕ್ಷೇತ್ರ ಧರ್ಮಸ್ಥಳವೆಂದು ಹೆಸರಾಯಿತು.

ಶ್ರೀ ಕ್ಷೇತ್ರದಲ್ಲಿ ದೈನಂದಿನ ಪೂಜೆ, ಅನ್ನ ಸಂತರ್ಪಣೆ, ಧಾರ್ಮಿಕ ವಿಧಿವಿಧಾನಗಳಲ್ಲಿ ಸ್ವಲ್ಪ ಲೋಪದೋಷ ಬಂದರೂ ಧರ್ಮಾಧಿಕಾರಿಗಳಿಗೆ ಅಣ್ಣಪ್ಪ ಕನಸಿನಲ್ಲಿ ಬಂದು ಎಚ್ಚರಿಸುತ್ತಾನೆ ಎನ್ನುವ ಮಾತು ಈಗಲೂ ಚಾಲ್ತಿಯಲ್ಲಿದೆ. ಉಡುಪಿಯ ಶ್ರೀ ವಾದಿರಾಜ ತೀರ್ಥರು ಇಲ್ಲಿಗೆ ಬಂದು ಶಿವನಿಗೆ ಪೂಜೆ ಸಲ್ಲಿಸುತ್ತಿದ್ದದ್ದರು ಎನ್ನುವ ಇತಿಹಾಸವಿದೆ. ಹೆಗ್ಗಡೆಯವರ ಕುಟುಂಬದ ಸುಮಾರು 20 ತಲೆಮಾರಿನವರು ಕ್ಷೇತ್ರಕ್ಕಾಗಿ ತಮ್ಮನ್ನು ಮುಡಿಪಾಗಿ ಇಟ್ಟು ಕೊಂಡಿದ್ದಾರೆ. 1918ರಲ್ಲಿ ಮಂಜಯ್ಯ ಹೆಗ್ಗಡೆಯವರು ಕ್ಷೇತ್ರದ ಧರ್ಮಾಧಿಕಾರಿಯಾಗಿ 37 ವರ್ಷ ಸೇವೆ ಸಲ್ಲಿಸಿದರು. ಆ ನಂತರ ರತ್ನವರ್ಮ ಹೆಗ್ಗಡೆಯವರು 13 ವರ್ಷ ಸೇವೆ ಸಲ್ಲಿಸಿದರೆ, ತನ್ನ ಇಪ್ಪತ್ತನೇ ವಯಸ್ಸಿನಿಂದ ಅಂದರೆ 1968ರಿಂದ ಡಾ. ವೀರೇಂದ್ರ ಹೆಗ್ಗಡೆಯವರು ಕ್ಷೇತ್ರದ ಜವಾಬ್ದಾರಿಯನ್ನು ವಹಿಸಿಕೊಂಡು ಥಾರ್ಮಿಕ ವಿಧಿವಿಧಾನಗಳ ಮೂಲಕ ವಿದ್ಯುಕ್ತವಾಗಿ ನಡೆಸಿಕೊಂಡು ಹೋಗುತ್ತಿದ್ದಾರೆ.

lakಚೈತ್ರಾ ಮಾಸದಲ್ಲಿ ಅಣ್ಣಪ್ಪ ದೈವಗಳ ನೇಮೋತ್ಸವ, ಮಹಾರಥೊತ್ಸವ, ಮಾಘ ಮಾಸದಲ್ಲಿ ಮಹಾಶಿವರಾತ್ರಿ ಮುಂತಾದ ಉತ್ಸವಗಳು ನಡೆದರೆ, ಪ್ರತೀ ವರ್ಷದ ಕಾರ್ತೀಕ ಮಾಸದ ಕಡೆಯ ಐದು ದಿನಗಳು ಬಹಳ ವಿಜೃಂಭಣೆಯಿಂದ ಇಲ್ಲಿ ನಡೆಯುವ ಲಕ್ಷದೀಪೋತ್ಸವ ಬಹಳ ವಿಶೇಷವಾಗಿದೆ

d5ಕಾರ್ತಿಕ ಮಾಸದ ಆರಂಭದಲ್ಲಿ ಎಲ್ಲೆಡೆಯೂ ದೀಪಾವಳಿ ಕಳೆದು ಮಾರ್ಗಶಿರ ಮಾಸದ ಮಾಗಿಯ ಛಳಿ ಅರಂಭವಾಗುವುದಕ್ಕೆ ಮುನ್ನಾ ಕಾರ್ತಿಕ ಮಾಸದ ಕೊನೆಯ ಐದು ದಿನಗಳಲ್ಲಿ ಧರ್ಮಸ್ಥಳದಲ್ಲಿ ಬಹಳ ವಿಜೃಂಭಣೆಯಿಂದ ನಡೆಯುವ ಉತ್ಸವವೇ ಲಕ್ಷದೀಪೋತ್ಸವ. ಈ ಉತ್ಸವವನ್ನು ವಿಶೇಷವಾಗಿ ಶ್ರೀ ಮಂಜುನಾಥ ಸ್ವಾಮಿಯ ವಿಹಾರ ಎಂದೇ ಕರೆಯಲಾಗುತ್ತದೆ. ಉತ್ಸವ ಮೂರ್ತಿಯನ್ನು ಮೆರವಣಿಗೆಯಲ್ಲಿ ಒಯ್ಯುವ ಮೊದಲು ಕ್ಷೇತ್ರಪಾಲ ಪೂಜೆಯನ್ನು ಮಾಡಿದ ನಂತರ ಸ್ವಾಮಿಯ ಉತ್ಸವ ಮೂರ್ತಿಯನ್ನು ದೇವಾಲಯದ ಗರ್ಭಗುಡಿಯ ಸುತ್ತಲೂ ಎರಡು ಬಾರಿ ಮತ್ತು ದೇವಾಲಯದ ಸುತ್ತಲೂ ನಾಲ್ಕು ಬಾರಿ ಮೆರವಣಿಗೆಯಲ್ಲಿ ಕೊಂಡೊಯ್ಯುವುದಲ್ಲದೇ, ನಾದಸ್ವರ ಮತ್ತು ಚಂಡೆಗಳೊಂದಿಗೆ ದೇವಾಲಯದ ಆವರಣದಲ್ಲಿ ಒಂಬತ್ತು ಬಾರಿ ಮೆರವಣಿಗೆ ಮಾಡಲಾಗುತ್ತದೆ. ಇದಾದ ನಂತರ ಮೂರ್ತಿಯನ್ನು ಬೆಳ್ಳಿ ರಥದಲ್ಲಿ ಕೂರಿಸಿ, ದೇವಸ್ಥಾನದ ಹೊರಗೆ ಬಂದು ರಾಜಬೀದಿಯಲ್ಲಿ ಭಕ್ತರಿಗೆ ದರ್ಶನ ಕೊಡುತ್ತಾ, ಹೊಸಕಟ್ಟೆ, ಲಲಿತೋದ್ಯಾನ, ಕೆರೆಕಟ್ಟೆ, ಕಂಚಿಮಾರುಕಟ್ಟೆ, ಗೌರಿಮಾರುಕಟ್ಟೆಗಳಲ್ಲಿ ವಿಹಾರ ನಡೆಯುತ್ತದೆ. ಸ್ವಾಮಿಯು ಗೌರಿಮಾರು ಕಟ್ಟೆಗೆ ಕೊಂಡೊಯ್ದಾಗ ಅಲ್ಲಿ ಅಷ್ಟಾವಧಾನ ಪೂಜೆಯನ್ನು ನಡೆಸಿದ ನಂತರ ಸಕಲ ಧಾರ್ಮಿಕ ವಿಧಿವಿಧಾನಗಳು ಮುಗಿದ ನಂತರ ಸಮಾನ ಉತ್ಸಾಹದಿಂದ ಮತ್ತೆ ಉತ್ಸವ ಮೂರ್ತಿಯನ್ನು ದೇವಸ್ಥಾನಕ್ಕೆ ತಂದು ಗುಡಿ ತುಂಬಿಸಲಾಗುತ್ತದೆ

d4ಈ ಸುಂದರ ಕ್ಷಣಗಳನ್ನು ಕಣ್ತುಂಬಿಸಿಕೊಳ್ಳುವ ಸಲುವಾಗಿ ದೇಶ ವಿದೇಶಗಳಿಂದ ಲಕ್ಷಾಂತರ ಭಕ್ತರು ಸ್ವಾಮಿಯ ದರ್ಶನಕ್ಕಾಗಿ ಶ್ರೀ ಕ್ಷೇತ್ರಕ್ಕೆ ಆಗಮಿಸಿ ರಾಜಬೀದಿಯಲ್ಲಿ ನಡೆಯುವ ಸ್ವಾಮಿಯ ವಿವಿಧ ಉತ್ಸವಗಳ ಮೆರವಣಿಗೆ, ರಥೋತ್ಸವ ಎಲ್ಲವನ್ನೂ ಆನಂದದಿಂದ ನೋಡಿ ಆನಂದಿತರಾಗುತ್ತಾರೆ. ಲಕ್ಷದೀಪೋತ್ಸವದ ಸಮಯದಲ್ಲಿ ಇಡೀ ಶ್ರೀ ಕ್ಷೇತ್ರವೆಲ್ಲಾ ಬಣ್ಣ ಬಣ್ಣದ ವಿದ್ಯುತ್ ದೀಪಗಳಿಂದ ಅಲಂಕರಿಸಿದ್ದನ್ನು ನೋಡಲು ಎರದು ಕಣ್ಣುಗಳು ಸಾಲದಾಗಿವೆ.

d1ಈ ದೀಪೋತ್ಸವದ ಸಮಯದಲ್ಲಿ ಶ್ರೀ ಕ್ಷೇತ್ರದಲ್ಲಿ ರಾಜ್ಯಮಟ್ಟದ ವಸ್ತು ಪ್ರದರ್ಶನ ಸಾಹಿತ್ಯ ಸಮ್ಮೇಳನ ಮತ್ತು ಸರ್ವಧರ್ಮ ಸಮ್ಮೇಳನಗಳು ನೆಡೆಯುತ್ತವೆ. ಕಳೆದ ವರ್ಷ ಕೊರೊನಾ ಮಹಾಮಾರಿಯಿಂದಾಗಿ ಸಾಂಕೇತಿಕವಾಗಿ ನಡೆದಿದ್ದ ದೀಪೋತ್ಸವ ಈ ಬಾರಿ ಕರೋನಾ ತುಸು ನಿರಾಳವಾಗಿದ್ದರೂ ಅನಗತ್ಯವಾಗಿ ಹೆಚ್ಚು ಜನರನ್ನು ಸೇರಿಸಬಾರದೆಂಬ ಸರ್ಕಾರದ ನಿಯಮವಿರುವುದರಿಂದ ಈ ದೀಪೋತ್ಸವವನ್ನು ವಾಹಿನಿಗಳ ಮೂಲಕ ನೇರಪ್ರಸಾರ ಮಾಡುವ ವ್ಯವಸ್ಥೆ ಇರುವ ಕಾರಣ ಭಕ್ತಾದಿಗಳು ಆನ್ಲೈನ್ ಮೂಲಕವೇ ಭಗವಂತನನ್ನು ನೋಡಿ ಪುನೀತರಾಗಬೇಕೆಂದೇ ಧರ್ಮಾಧಿಕಾರಿಗಳ ಆಶಯವಾಗಿದೆ.

ಇಷ್ಟು ಹೊತ್ತು ಧರ್ಮಸ್ಥಳದ ಲಕ್ಷ ದೀಪೋತ್ಸವದ ಝಲಕ್ ನೋಡಿ ಮಂಜುನಾಥ ಸ್ವಾಮಿಯನ್ನು ಕಣ್ತುಂಬಿಸಿಕೊಂಡಿದ್ದೀರಿ ಎನ್ನುವ ಆಶಾಭಾವನೆ ನಮ್ಮದಾಗಿದೆ. ಮುಂದೆ ಈ ಸಾಂಕ್ರಾಮಿಕ ಮಹಾಮಾರಿ ಎಲ್ಲವೂ ಕಡಿಮೆಯಾದಾಗ, ಸಮಯ ಮಾಡಿಕೊಂಡು ಧರ್ಮಸ್ಥಳದ ಮಂಜುನಾಥಸ್ವಾಮಿಯ ದರ್ಶನವನ್ನು ಪಡೆಯೋಣ ಎಂದು ಸಂಕಲ್ಪ ಮಾಡಿಕೊಳ್ಳೋಣ ಅಲ್ವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ದಕ್ಷಿಣ ಕಾಶೀ ಅಂತರ ಗಂಗೆ

ಇಂದು ಈ ವರ್ಷದ  ಮೊದಲ ಕಾರ್ತೀಕ ಸೋಮವಾರ.  ಕಾರ್ತೀಕ ಸೋಮವಾರದಂದು ಶಿವನ ದರ್ಶನ ಮಾಡಿದರೆ ಅದರಲ್ಲೂ ಕಾಶೀ ವಿಶ್ವೇಶ್ವರನ ದರ್ಶನ ಮಾಡಿದಲ್ಲಿ ಹೆಚ್ಚಿನ ಪುಣ್ಯ ಲಭಿಸುತ್ತದೆ  ಎನ್ನುವುದು ಶ್ರದ್ಧಾವಂತ ಹಿಂದೂಗಳ ನಂಬಿಕೆಯಾಗಿದೆ.  ದೂರದ ಕಾಶೀಗೆ ಹೋಗಿ ಗಂಗೆಯಲ್ಲಿ ಮಿಂದು ಕಾಶೀ ವಿಶ್ವೇಶ್ವರನ ದರ್ಶನದ ಭಾಗ್ಯ ಪಡೆಯಲು ಸಾಧ್ಯವಿಲ್ಲದವರು, ಇಲ್ಲೇ ಬೆಂಗಳೂರಿಗೆ ಹತ್ತಿರವಿರುವ ದಕ್ಷಿಣ ಕಾಶಿ ಪುಣ್ಯಕ್ಷೇತ್ರಕ್ಕೆ ಹೋಗಿ ಅಲ್ಲಿರುವ ಅಂತರಗಂಗೆಯಲ್ಲಿ  ಮಿಂದು ಕುಳಿತಲ್ಲಿಂದಲೇ ಕಾಶೀ ವಿಶ್ವೇಶ್ವರನ ದರ್ಶನ ಪಡೆಯೋಣ ಬನ್ನಿ

ant1ನಮಗೆಲ್ಲರಿಗೂ ತಿಳಿದಿರುವಂತೆ ಕೋಲಾರ  ಚಿನ್ನದ ಬೀಡು. ಇತ್ತೀಚೆಗೆ ಕೋಲಾರ ರೇಷ್ಮೆ ಮತ್ತು ಹಾಲಿನ ಹೊಳೆಯನ್ನೂ ಹರಿಸುತ್ತಿದೆ. ಇವೆಲ್ಲರದರ ಜೊತೆಗೆ ಅವಿಭಜಿತ ಕೋಲಾರ ಜಿಲ್ಲೆ ಹತ್ತು ಹಲವಾರು ಧಾರ್ಮಿಕ ಪುಣ್ಯಕ್ಷೇತ್ರಗಳನ್ನು ಒಳಗೊಂಡಂತಹ ನಾಡಾಗಿದೆ. ಅಂತಹ ಪುಣ್ಯಕ್ಶೇತ್ರಗಳಲ್ಲಿ ಒಂದಾದ, ಶತಶೃಂಗ ಪರ್ವತಗಳ ಸಾಲಿಗೆ ಸೇರಿರುವ  ಅಂತರಗಂಗೆ  ಶ್ರೀಕ್ಷೇತ್ರದ ದರ್ಶನ ಮಾಡೋಣ ಬನ್ನಿ.

WhatsApp Image 2021-11-07 at 7.04.25 PMಬೆಂಗಳೂರಿನಿಂದ 65 ಕಿಮೀ ದೂರದಲ್ಲಿರುವ ಕೋಲಾರಕ್ಕೆ ತಲುಪಿ ಅಲ್ಲಿಂದ ಕೇವಲ 5 ಕಿಮೀ ಪ್ರಯಾಣಿಸಿದಲ್ಲಿ ಸುಂದರವಾದ ಅಷ್ಟೇ ದಟ್ಟವಾದ ಗಿಡಮರಗಳಿಂದ ಆವೃತವಾದ ಅಂತರ ಗಂಗೆ ಬೆಟ್ಟವನ್ನು ಕಾಣಬಹುದಾಗಿದೆ. ಎಲ್ಲರೂ ಸುಲಭವಾಗಿ ಹತ್ತಬಹುದಾದಂತಹ 30-40 ಮೆಟ್ಟಿಲುಗಳು ಅಲ್ಲಿಂದ ಸ್ವಲ್ಪ ದಾರಿ ಮತ್ತೆ ಕೆಲವು ಮೆಟ್ಟಿಲುಗಳು ಮತ್ತೆ ಸ್ವಲ್ಪ ದಾರಿ ಹೀಗೆ ಕೆಳಗಿನಿಂದ ಬೆಟ್ಟದ ಮೇಲೆ ತಲುಪಲು ಸುಮಾರು 250-300 ಮೆಟ್ಟಿಲುಗಳನ್ನು 10-12 ನಿಮಿಷಗಳಲ್ಲಿ ಸುಲಭವಾಗಿ ಹತ್ತಬಹುದಾಗಿದೆ.  ಈ ಪ್ರದೇಶದಲ್ಲಿ ವಿಪರೀತ ಕೋತಿಗಳ ಹಾವಳಿಯಿದ್ದು  ತಮ್ಮ ಆಹಾರದ ಅರಸುವಿಕೆಯಲ್ಲಿ ಭಕ್ತಾದಿಗಳ ಮೇಲೆ ಧಿಡೀರ್ ಎಂದು ಧಾಳಿ ಮಾಡುವ ಸಂಭವವು ಹೆಚ್ಚಾಗಿರುವ ಕಾರಣ  ಪ್ರವಾಸಿಗರು ತುಸು ಜಾಗೃತೆಯನ್ನು ವಹಿಸಬೇಕಾಗಿದೆ. ಈ ಕಾನನದಲ್ಲಿ  ನರಿ, ತೋಳ, ಜಿಂಕೆ, ಕಾಡು ಹಂದಿ, ನವಿಲು, ಸಾರಂಗಿ ಮುಂತಾದ ವನ್ಯ ಜೀವಿಗಳಿವೆ ಎಂಬ ಫಲಕಗಳನ್ನು ಕಾಣಬಹುದಾದರೂ,  ಪ್ರಕೃತಿಯ ಮೇಲೆ ಮನುಷ್ಯರು ನಿರಂತರವಾಗಿ ನಡೆಸುತ್ತಿರುವ ದಬ್ಬಾಳಿಕೆಯಿಂದಾಗಿ  ಬಹುತೇಕ ಈ ಎಲ್ಲಾ ವನ್ಯ ಜೀವಿಗಳು  ಇಲ್ಲಿ ಕಾಣದಂತಾಗಿ ಹೋಗಿರುವುದು ವಿಪರ್ಯಾಸವೇ ಸರಿ.

ant6ಸಾವಿರಾರು ವರ್ಷಗಳ ಹಿಂದೆ ಮುಚ್ಚುಕುಂದ ಮಹರ್ಷಿಗಳು ಸ್ಥಾಪಿಸಿದ್ದಾರೆಂದು ಹೇಳಲಾಗಿರುವ ಶ್ರೀ ವಿಶ್ವನಾಥ ಸ್ವಾಮಿಯ ಸಣ್ಣ ದೇವಾಲಯವಿದ್ದು ಆ ದೇವಸ್ಥಾನಕ್ಕೆ ಹೋಗುವ ಮೊದಲು ಒಂದು ಸಣ್ಣದಾದ ಕಲ್ಯಾಣಿ ಇದೆ. ಕರ್ನಾಟಕದಲ್ಲಿ ಅತ್ಯಂತ ಕಡಿಮೆ ಮಳೆ ಬೀಳುವ ಪ್ರದೇಶಗಳಲ್ಲಿ ಕೋಲಾರ ಜಿಲ್ಲೆಯೂ ಒಂದಾಗಿದ್ದು ವರ್ಷದಲ್ಲಿ  ಕೇವಲ 40-50 ದಿನಗಳು ಇಲ್ಲಿ ಮಳೆ ಬೀಳಬಹುದು. ಆದರೆ, ಈ ಅಂತರಗಂಗೆಯಲ್ಲಿರುವ ಬಸವನ ಬಾಯಿಯಿಂದ ವರ್ಷಪೂರ್ತಿ  ನಿರಂತರವಾಗಿ  ಪವಿತ್ರ ಗಂಗೆ ಹರಿಯುತ್ತಿದೆ. ಈ ನೀರು ಹರಿಯುವ ಮೂಲ ಇದುವರೆಗೂ ಯಾರಿಗೂ ತಿಳಿದಿಲ್ಲವಾದರೂ ಈ ನೀರಿನ ಕುರಿತಾಗಿ ಮತ್ತು ಈ ಕ್ಷೇತ್ರಕ್ಕೆ ಅಂತರಗಂಗೆ ಎಂಬ ಹೆಸರು ಬರಲು ಒಂದು ಕುತೂಹಲಕಾರಿಯಾದ ಪೌರಾಣಿಕ ಕಥೆ ಇದೆ. ಹಾಗಾಗಿ ಈ ದೇವಸ್ಥಾನಕ್ಕೆ ಬರುವ ಬರುವ ಬಹುತೇಕ ಭಕ್ತಾದಿಗಳು ಬಸವನ ಬಾಯಿಯಿಂದ ಬರುವ ನೀರಿನಲ್ಲಿ ಮಿಂದು ಈ ಕಲ್ಯಾಣಿಯಲ್ಲಿ ಸ್ನಾನ ಮಾಡಿ ನಂತರ ದೇವಸ್ಥಾನಕ್ಕೆ ಪ್ರವೇಶಿಸುವುದು ಇಲ್ಲಿನ ಸಂಪ್ರದಾಯವಾಗಿದೆ. ಪವಿತ್ರವಾದ  ನೀರು ಔಷದೀಯ ಗುಣಗಳನ್ನು ಹೊಂದಿದ್ದು ಅದರಲ್ಲಿ ಸ್ನಾನ ಮಾಡುವುದರಿಂದ ಅನೇಕ ರೋಗ ರುಜಿನಗಳು ನಿವಾರಣೆಯಾಗುತ್ತದೆ ಎನ್ನುವುದು ಇಲ್ಲಿನ ಭಕ್ತಾದಿಗಳ ನಂಬಿಕೆಯಾಗಿದೆ.

ag1ಇಲ್ಲಿನ ಕಾಶೀ ವಿಶ್ವೇಶ್ವರ ಲಿಂಗದ ಪ್ರತಿಷ್ಟಾಪನೆ ಮತ್ತು ಈ ಕ್ಷೇತ್ರಕ್ಕೆ ಅಂತರಗಂಗೆ ಎಂಬ ಹೆಸರು ಬರುವ ಹಿಂದಿರುವ ಪೌರಾಣಿಕ ಕತೆಯೂ ಸಹಾ ರೋಚಕವಾಗಿದೆ.

ದ್ವಾಪರ ಯುಗ(ಮಹಾಭಾರತ)ದಲ್ಲಿ ಸಂದರ್ಭದಲ್ಲಿ ಪ್ರಜಾಪೀಡಕನಾಗಿದ್ದ ಕಾಲ್ಯವಾನ ಎಂಬ ರಾಕ್ಷಸನ  ಎಂಬ ರಾಕ್ಷಸನನ್ನು ಸಂಹರಿಸುವುದು ಶ್ರೀ ಕೃಷ್ಣನ ಕೈಯಲ್ಲಿಯಿರಲ್ಲಿಲ್ಲ ಹಾಗಾಗಿ ಆ ರಾಕ್ಷಸನನ್ನು ಸಂಹರಿಸುವುದಕ್ಕೆ ಒಂದು ಉಪಾಯ ಮಾಡಿ, ಶತಶೃಂಗ ಪರ್ವತದ ಒಂದು ಗುಹೆಯಲ್ಲಿ  ಮುಚ್ಚುಕುಂದ ಎಂಬ ಮಹರ್ಷಿಯೂ ಯೋಗನಿದ್ರೆ ಮಾಡುತ್ತಿದ್ದರು. ಆಗ ಶ್ರೀ ಕೃಷ್ಣನು ಕಾಲ್ಯವಾನನನನ್ನು ಕೆಣಕಿ ಮುಚ್ಚುಕುಂದ ಮಹರ್ಷಿಗಳು ಯೋಗನಿದ್ರೆ ಮಾಡುತ್ತಿರುವ ಗುಹೆಯಲ್ಲಿ ಓಡಿ ಹೋಗಿ ಮಾಯವಾಗಾಗುತ್ತಾನೆ.  ಆಗ ಆ ಕಾಲ್ಯವಾನ ರಾಕ್ಷಸ ಶ್ರೀ ಕೃಷ್ಣನನ್ನು ಹುಡುಕುತ್ತಾ ಮುಚ್ಚುಕುಂದರ ಗುಹೆಗೆ ಬಂದು ಯೋಗನಿದ್ರೆ ಮಾಡುತ್ತಿರುವ ಮುಚ್ಚುಕುಂದ ಮಹರ್ಷಿಯನೇ ಮಾಯಾವಿ ಶ್ರೀಕೃಷ್ಣ ಎಂದು ಭಾವಿಸಿ ಅವರಿಗೆ ತನ್ನ ಕಾಲಿನಿಂದ ಒದ್ದನು. ವಿನಾಕಾರಣ ತಮ್ಮ ಮೇಲೆ ಹಲ್ಲಿ ಮಾಡಿದ್ದರಿಂದ ಕೋಪಗೊಂಡ ಮುಚ್ಚುಕುಂದ ಮಹರ್ಷಿಗಳು ತಮ್ಮ ಯೋಗದೃಷ್ಟಿಯಿಂದ ಆ ಕಾಲ್ಯವಾನ ರಾಕ್ಷಸನನ್ನು ಸುಟ್ಟು  ಭಸ್ಮಮಾಡಿದರು. ಈ ಕಾಲ್ಯವಾನನಿಂದಾಗಿ ತನ್ನ ಯೋಗನಿದ್ರೆ ಭಂಗವಾಗಿದ್ದಲ್ಲದೇ, ತನಗೆ ಹತ್ಯಾ ದೋಷವು ತಗುಲಿತು ಎಂದು ಚಿಂತಿತರಾಗಿದ್ದಾಗ, ಶ್ರೀ ಕೃಷ್ಣನು ಮುಚ್ಚುಕುಂದ ಮಹರ್ಷಿಯವರಿಗೆ ಪ್ರತ್ಯಕ್ಷನಾಗಿ ಈ ರಾಕ್ಷಸನ ಅಂತ್ಯವು ನಿನ್ನ ಯೋಗದೃಷ್ಟಿಯಿಂದಲೇ ಅಂತ್ಯವಾಗಬೇಕೆಂದು ಕಾಲನಿಣ೯ಯವಾಗಿದ್ದರಿಂದ ನೀವು ಚಿಂತೆ ಮಾಡುವ ಅವಶ್ಯಕತೆ ಇಲ್ಲ. ನಿಮ್ಮ ಯೋಗನಿದ್ರೆ ಭಂಗದ ಪಾಪ ಪರಿಹಾರ ಮಾಡಿಕೊಳ್ಳಬೇಕೆಂದಲ್ಲಿ ಈ ಶತಶೃಂಗ ಪರ್ವತದ ಮಧ್ಯದ ಭಾಗದಲ್ಲಿ ಶಿವ ಲಿಂಗವೊಂದನ್ನು ಪ್ರತಿಷ್ಠಾಪಿಸಿ ಆ ಶಿವಲಿಂಗಕ್ಕೆ ಶ್ರೀ ಕಾಶೀವಿಶ್ವೇಶ್ವರ ಸ್ವಾಮಿ ಎಂದು ಹೆಸರಿಸಿ ಅದಕ್ಕೆ ನಿತ್ಯ  ಪೂಜಾ ಕೈಂಕರ್ಯಗಳನ್ನು ನೇರವೇರಿಸಿದಲ್ಲಿ ನಿಮ್ಮ ಯೋಗನಿದ್ರೆ ಭಂಗವಾದ ಪಾಪದ ಪರಿಹಾರವಾಗುತ್ತದೆ ಎಂದು ತಿಳಿಸುತ್ತಾನೆ. ಶ್ರೀ ಕೃಷ್ಣನು ಆಜ್ಞೆಯಂತೆ ಮಹರ್ಷಿಗಳು ಶತಶೃಂಗ ಪರ್ವತದ ಮಧ್ಯದ ಭಾಗದಲ್ಲಿ ಮಹಾಗಣಪತಿ, ಶ್ರೀ ವಿಶಾಲಾಕ್ಷೀ ಸಮೇತ ಶ್ರೀ ಕಾಶಿವಿಶ್ವೇಶ್ವರ ಸ್ವಾಮಿ ಹಾಗೂ ಪಂಚಲಿಂಗ, ನವಗ್ರಹಗಳು, ಶ್ರೀ ವಿರಾಂಜನೇಯ.ಸ್ವಾಮಿ ಮತ್ತು ಶ್ರೀ ಭೈಲೇಶ್ವರ ಸ್ವಾಮಿಯನ್ನು ಪ್ರತಿಷ್ಠಾಪಿಸಿದರು.

ತಾವು ಪ್ರತಿಷ್ಠಾಪನೆ ಮಾಡಿದ ದೇವರುಗಳಿಗೆ ನಿತ್ಯ ಅಭಿಷೇಕ ಮಾಡಲು ಆ ಶತಶೃಂಗ ಪರ್ವತದ ಸಮೀಪದಲ್ಲಿಯೂ ಹಾಗೂ ಸುತ್ತಮುತ್ತಲಿನಲ್ಲಿಯೂ ಶುದ್ಧವಾದ ಜಲ ಇಲ್ಲದಿದ್ದ ಕಾರಣ, ಮುಚ್ಚುಕುಂದ ಮಹರ್ಷಿಗಳು ಪ್ರಾತ:ಕಾಲ(ಸೂಯೋದಯ)ವಾಗುವಷ್ಠರಲ್ಲೇ ತಮ್ಮ ತಪ:ಶಕ್ತಿಯಿಂದ ಉತ್ತರ ಭಾರತದ ವಾರಣಾಸಿ(ಕಾಶಿ)ಕ್ಷೇತ್ರಕ್ಕೆ ಹೋಗಿ ಅಲ್ಲಿರುವ ಗಂಗೆಯಲ್ಲಿ ಮಿಂದು ತಮ್ಮ ನಿತ್ಯ ಕಮ೯(ಸಂಧ್ಯಾವಂದನೆ ಹಾಗೂ ಜಪ-ತಪ)ಗಳನ್ನು ಮುಗಿಸಿ ಅಲ್ಲಿರುವ ಶ್ರೀ ಕಾಶೀವಿಶ್ವೇಶ್ವರ ಸ್ವಾಮಿಯ ದರ್ಶನ ಪಡೆದು ಇಲ್ಲಿನ ದೇವರ ಅಭಿಷೇಕ್ಕಾಗಿ ಗಂಗೆಯನ್ನು ತೆಗೆದುಕೊಂಡು ತಾವು ಪ್ರತಿಷ್ಠಾಪಿಸಿರುವ ಶಿವ ಲಿಂಗಕ್ಕೆ ಅಭಿಷೇಕ ಹಾಗೂ  ಪೂಜೆಯನ್ನು ಮಾಡುತ್ತಿದ್ದರಂತೆ. ಹೀಗೆ ಪ್ರತಿದಿನವೂ ಅಷ್ಟು ದೂರದಿಂದ ಬರುತ್ತಿದ್ದ ಈ ಮುನಿಗಳನ್ನು ಗಮನಿಸಿದ ಗಂಗಾಮಾತೆಯು, ಎಲೈ ಮುನಿವರ್ಯರೇ  ನೀವು ಪ್ರತಿದಿನವೂ ಅಷ್ಟು ದೂರದಿಂದ ಬರುವ ಅವಶ್ಯಕತೆ ಇಲ್ಲ, ನಾನೇ ನೀವು ಇರುವಲ್ಲಿಗೆ ಬರುತ್ತೇನೆ ಎನ್ನುತ್ತಾಳೆ. ಗಂಗೆಯ ಮಾತನ್ನು ನಂಬದ ಮುನಿಗಳು ನೀನೇ ಅಲ್ಲಿಗೆ  ಬರುತ್ತೇಯೇ ಎಂದು ಹೇಗೆ ನಂಬುವುದು?  ಎಂಬ ಸಂದೇಹವನ್ನು ವ್ಯಕ್ತಪಡಿಸಿದಾಗ, ಋಷಿಗಳ ಕೈಯ್ಯಲ್ಲಿದ ಬೆತ್ತ, ನಿಂಬೇಹಣ್ಣು ಮತ್ತು ಕಮಂಡಲಗಳಲ್ಲಿ ಬೆತ್ತ ಮತ್ತು ನಿಂಬೇಹಣ್ಣುಗಳನ್ನು ಅವರಿಂದ ಪಡೆದುಕೊಂಡು ನೀವು ಈ ಕೂಡಲೇ ನಿಮ್ಮ ಪ್ರದೇಶಕ್ಕೆ ಹೋಗಿ. ನಿಮ್ಮ ಶಿವ ಲಿಂಗದ ತಳ ಭಾಗ(ಶಿವ ಲಿಂಗದ ಕೇಳ)ಭಾಗದಲ್ಲಿ ನಿಂಬೆ ಹಣ್ಣು,ಬೆತ್ತ ಹಾಗೂ ಗಂಗಾ ಜಲ ಈ ಮೂರು ಸೇರಿ ಅಂತರ ಮಾಗ೯ದಿಂದ ಬರುತ್ತೇನೆ ಎನ್ನುತ್ತಾಳೆ. ಆಗ ಆ ಮುಚ್ಚುಕುಂದ ಮಹರ್ಷಿಯು ಗಂಗಾ ದೇವಿಗೆ ನಮಸ್ಕರಿಸಿ ಶ್ರೀ ಕಾಶೀ ವಿಶ್ವೇಶ್ವರ ಸ್ವಾಮಿಯ ಸಮೀಪ ಬಂದು ನೋಡಿದಾಗ ಆ ಶಿವ ಲಿಂಗದ ತಳ ಭಾಗದಲ್ಲಿ ಗಂಗಾ ದೇವಿ ಹೇಳಿದಂತೆ ನಿಂಬೆ ಹಣ್ಣು, ಬೆತ್ತ ಹಾಗೂ ಗಂಗಾ ಜಲ ಈ ಮೂರು ಸೇರಿ ಶಿವ ಲಿಂಗ ಕೆಳಭಾಗದಲ್ಲಿ ಬರುವುದನ್ನು ಮುಚ್ಚುಕುಂದ ಮಹರ್ಷಿಯೂ  ನೋಡಿ  ಶ್ರೀ ಕಾಶೀವಿಶ್ವೇಶ್ವರ ಸ್ವಾಮಿಗೆ ನಮಸ್ಕರಿಸಿ ಆ ನಿಂಬೆ ಹಣ್ಣು  ಮತ್ತು ಆ ಬೆತ್ತವನ್ನು ಅವರ ಕೈಗೆ ತೆಗೆದುಕೊಂಡು ಆ ಗಂಗಾ ಜಲವನ್ನು ಮಾತ್ರ ಆ ಶಿವ ಲಿಂಗದ ತಳ ಭಾಗದಲ್ಲಿ ಸ್ಥಾಪಿಸಿದರು. ಆದಾದ ನಂತರ ಆ ಶತಶೃಂಗ ಪರ್ವತದ ಮಧ್ಯದ ಭಾಗದಲ್ಲಿರುವ ಶ್ರೀ ಕಾಶೀವಿಶ್ವೇಶ್ವರ ಸ್ವಾಮಿ ದೇವರ ಪಕ್ಕದ ಸ್ಥಳ(ದಕ್ಷಿಣ ಭಾಗ)ದಲ್ಲಿ ಎರಡು ಕಲ್ಲಿನ ಬಸವ ಮೂರ್ತಿಯನ್ನು ಮತ್ತು ವಿಷ್ಣುವಿನ ಮೂತಿ೯ಯನ್ನು ಪ್ರತಿಷ್ಠಾಪಿಸಿದರು. ನಂತರ ಒಂದು ಬಸವಣ್ಣನ ಬಾಯಿಂದ, ಮತ್ತೊಂದು ಬಸವಣ್ಣನ ಹೊಕ್ಕಳಿನಿಂದ ಹಾಗೂ ವಿಷ್ಣುಮೂತಿ೯ಯ ಪಾದದಿಂದ ಗಂಗಾ ಜಲವು ಬರುವಂತೆ ಸ್ಥಾಪಿಸಿದರು. ನದಿಯ ಮೂಲ ಋಷಿಯ ಮೂಲ ಹುಡುಕಬಾರದು ಎಂಬ ಮಾತಿದೆ ಅದೇ ರೀತಿ, ಆ ಉತ್ತರ ಭಾರತದ ಕಾಶಿಯಿಂದ ಗಂಗಾ ಜಲವು ಇಲ್ಲಿಗೆ ಅಂತರ ಮಾರ್ಗದಿಂದ ಬರುವುದಾಗಲಿ ಶಿವನ ತಳ ಭಾಗದಲ್ಲಿ ಬರುವುದಾಗಲಿ ಯಾರಿಗೂ ಕಾಣುವುದಿಲ್ಲವಾದ್ದರಿಂದ ಈ ಪ್ರದೇಶಕ್ಕೆ ಅಂತರಗಂಗೆ ಎಂಬ ಹೆಸರು ಬಂದಿತು ಎನ್ನಲಾಗಿದೆ. ಇನ್ನು ಉತ್ತರ ಭಾರತದ  ಗಂಗೆ  ದಕ್ಷಿಣ ಭಾರತದಲ್ಲಿರುವ ಈ ವಿಶ್ವೇಶ್ವರಸ್ವಾಮಿಯ ಕ್ಷೇತ್ರಕ್ಕೆ ಹರಿದು ಬಂದ ಕಾರಣ ಈ ಪ್ರದೇಶವನ್ನು ದಕ್ಷಿಣಕಾಶೀ ಎಂದೂ ಕರೆಯಲಾಗುತ್ತದೆೆ ಎಂಬ ಕಥೆಯನ್ನು ಈ ದೇವಾಲಯದ ಅರ್ಚಕರಾಗಿರುವ ಶ್ರೀ ಕಾಶೀವಿಶ್ವನಾಥ ದೀಕ್ಷಿತರು ಆವರಿಂದ ಕೇಳಿದಾಗ ನಿಜಕ್ಕೂ ರೋಚಕವೆನಿಸಿತು.  ಅಂದು ಹೀಗೆ ಉದ್ಭವವಾದ ಗಂಗೆಯು ಇದುವರೆಗೂ ನಿರಂತರವಾಗಿ ಹರಿದು ಬಸವಣ್ಣನ ಬಾಯಿಯಿಂದ ಹೊರಹೊಮ್ಮಿ ಕಲ್ಯಾಣಿಯ ಮೂಲಕ ಹೊರಹೋಗುವುದನ್ನು ಇಂದಿಗೂ ಕಾಣಬಹುದಾಗಿದ್ದು ಎಂತಹ ಬರ ಪರಿಸ್ಥಿತಿಯಲ್ಲಿಯೂ ಇದು ಬತ್ತದಿರುವುದು ನಿಜಕ್ಕೂ ಅದ್ಭುತವಾಗಿದೆ.

ಇನ್ನು ದೂರದಿಂದ ಈ ಬೆಟ್ಟವನ್ನು ನೋಡಿದಲ್ಲಿ ನೂರು ಶೃಂಗಗಳು ಅಂದರೆ ಕೋಡು ಅಥವಾ ಕೊಂಬುಗಳು ಇರುವಂತೆ ಕಾಣುವುದರಿಂದ ಇದನ್ನು ಶತಶೃಂಗ ಪರ್ವತ ಎಂದೂ ಕರೆಯಲಾಗುತ್ತದೆ. ಕಾಶೀ ವಿಶ್ವೇಶ್ವರ ಸ್ವಾಮಿಯ ಪಕ್ಕದಲ್ಲಿಯೇ ಒಂದು ಕಡೆ ವಿಶಾಲಾಕ್ಷಿ ಅಮ್ಮನವರಗುಡಿ ಮತ್ತೊಂದು ಕಡೆ ಗಣೇಶನ ಗುಡಿ ಮತ್ತು ಅದರ ಜೊತೆಯಲ್ಲಿಯೇ ವೀರಭಧ್ರಸ್ವಾಮಿಯನ್ನೂ ಕಾಣಬಹುದಾಗಿದೆ. ಇದೇ ಗುಡಿಯಲ್ಲಿ  ಹರಿಹರೇಶ್ವರ, ಮಹಾಬಲೇಶ್ವರ, ಮಲ್ಲಿಕಾರ್ಜುನೇಶ್ವರ, ಪಾತಾಳೇಶ್ವರ ಈ ನಾಲ್ಕು ಲಿಂಗಗಳ ಜೊತೆ ಕಾಶೀ ವಿಶ್ವೇಶ್ವರನೂ ಸೇರಿ ಒಟ್ಟು ಐದು ಲಿಂಗಗಳು ಸೇರಿ ಪಂಚಲಿಂಗಗಳ ದರ್ಶನ ಪಡೆಯುವ ಭಾಗ್ಯ ಈ ಕ್ಷೇತ್ರದಲ್ಲಿ ಪಡೆಯ ಬಹುದಾಗಿದೆ.

1959ರಲ್ಲಿ ಲಕ್ಷ್ಮಣ್ ರಾವ್ ಎಂಬ ಜಿಲ್ಲಾಧಿಕಾರಿಗಳ ಕಾಲದಲ್ಲಿ ಈ ದೇವಾಲಯವನ್ನು ಜೀರ್ಣೋದ್ಧಾರ ಮಾಡಿಸಿ ಚೆಂದದಾದ 250 ಮೆಟ್ಟಿಲುಗಳನ್ನು ಕಟ್ಟಿಸಿ ಆ ಬಸವಣ್ಣ ಬಾಯಿಂದ ಬರುವ ಗಂಗಾ ಜಲದ ಸ್ಥಳದ ಮೇಲೆ ಒಂದು ಗೋಪುರ ಕಟ್ಟಿ ಅಲ್ಲಿ ಪಕ್ಕದಲ್ಲಿ ಒಂದು ಸುಂದರವಾದ ಕಲ್ಯಾಣಿಯನ್ನು ಸಹಾ ಜೀರ್ಣೋದ್ಧಾರ ಮಾಡಿಸಿದರು. ವರ್ಷದ 365 ದಿನವೂ ಇಲ್ಲಿ ನಿತ್ಯ ಪೂಜೆ ಸಾಂಗೋಪಾಂಗವಾಗಿ ನಡೆಯುತ್ತಿದ್ದು ಹಬ್ಬಹರಿದಿನಗಳುಕಾತಿ೯ಕ ಮಾಸದ ಸೋಮವಾರಗಳು ಕಾತಿ೯ಕ ಮಾಸದ ಹುಣ್ಣಿಮೆ ಮಾರ್ಗಶಿರ ಮಾಸದ ಕೃತ್ತಿಕ ನಕ್ಷತ್ರದ ದಿನದಂದು ಇಲ್ಲಿ ಆಚರಿಸುವ ಲಕ್ಷದೀಪೋತ್ಸವದಲ್ಲಿ ಇಡೀ ಅಂತರಗಂಗೆ ಬೆಟ್ಟದ ಮೇಲೆ ದೀಪಾಲಂಕಾರವಾಗಿರುತ್ತದೆ. ಇನ್ನು ಮಹಾಶಿವರಾತ್ರಿಯ ದಿನದಂದು ಶ್ರೀ ಕಾಶೀವಿಶ್ವೇಶ್ವರ ಸ್ವಾಮಿಯ ಮೇಲೆ ಸೂರ್ಯನ ಕಿರಣ ಬೀಳುವುದು ಇಲ್ಲಿಯ ಮತ್ತೊಂದು ವಿಶೇಷವಾಗಿದೆ. ಅದೇ ರಾತ್ರಿ ಇಡೀ ಯಾಮದ ವಿಶೇಷ ಪೂಜೆ ನಡೆಯುತ್ತದೆ.  ಸದ್ಯಕ್ಕೆ ಈ ದೇವಸ್ಥಾನ ಮುಜರಾಯಿ ಇಲಾಖೆಗೆ ಸೇರಲ್ಪಟ್ಟಿದ್ದು ಭಕ್ತಾದಿಗಳು ಸಲ್ಲಿಸುವ ಕಾಣಿಕೆಗಳಿಂದಲೇ ದೇವಸ್ಥಾನ ನಿತ್ಯ ಪೂಜೆಗಳು ನಡೆಯುತ್ತಿದೆ.

ದೇವಾಲಯದ ಹಿಂಭಾಗದಲ್ಲಿ ಸ್ವಲ್ಪ ಕಿರಿದಾದ ಕಾಲು ಜಾಡಿನ ರಸ್ತೆಯ ಮೂಲಕ  ಅರಣ್ಯಕ್ಕೆ ಹೋಗುವ ಮಾರ್ಗವಿದೆ.  ಈ ಪ್ರದೇಶವು ಚಾರಣ ಪ್ರಿಯರಿಗೆ ಮತ್ತು, ಪರ್ವತಾರೋಹಣ ಮಾಡುವವರಿಗೆ  ತಮ್ಮ  ರಾತ್ರಿ ಸಂಚರಣೆ ಹಾಗು ಸಾಹಸ ಚಟುವಟಿಕೆಗಳನ್ನು ಮಾಡಲು ಪರಿಪೂರ್ಣ ಸ್ಥಳವಾಗಿದೆ. ಈ ಬೆಟ್ಟದ ಸುತ್ತಲೂ ಅನೇಕ ಅಗ್ನಿ ಪರ್ವತದ ಶಿಲೆಗಳು ಹಾಗು ನೈಸರ್ಗಿಕವಾಗಿ ಕೊರೆಯಲಾದ ಗುಹೆಗಳು ಇದ್ದು ಈ ಬೆಟ್ಟದ ಮೇಲ್ಭಾಗದಿಂದ ಕೋಲಾರದ ಪರಿಪೂರ್ಣ ಚಿತ್ರಣವನ್ನು ಕಾಣಬಹುದಾಗಿದೆ.  ಇದೇ ಪ್ರದೇಶದಲ್ಲಿಯೇ ಸಣ್ಣದಾಗಿ ಝರಿಯೊಂದು ಮೇಲಿಂದ ಕೆಳಗೆ ಬೀಳುವ ಮೂಲಕ ಸಣ್ಣದಾದ ಜಲಪಾತ ಇಲ್ಲಿಗೆ ಬರುವ ಭಕ್ತಾದಿಗಳಿಗೆ ಮತ್ತೊಂದು ಆಕರ್ಶಣೆಯಾಗಿದ್ದು  ಈ ನೀರು ಮಳೆಗಾಲದಲ್ಲಿ ಮಾತ್ರ ಕಾಣಬಹುದಾಗಿದೆ.

ಬೆಟ್ಟದ ತಟದಲ್ಲಿ ಒಂದೆರದು ಸಣ್ಣ ಕಾಫೀ ಟೀ, ತಂಪುಪಾನೀಯಗಳು   ಒಂದೆರಡು ಕಡೆ ಬೇಲ್ ಪುರಿ, ಕತ್ತರಿಸಿ ಖಾರ ಹಾಕಿದ ಸೌತೇಕಾಯಿ ಮತ್ತು ಕತ್ತರಿಸಿದ ಹಣ್ಣುಗಳು ಜೊತೆ ಬಾಟೆಲ್ ನೀರಿನ ಹೊರತಾಗಿ ಬೇರಾವುದೇ ಊಟೋಪಚಾರದ ವ್ಯವಸ್ಥೆ ಇಲ್ಲದಿರುವುದರಿಂದ  ಇಲ್ಲಿಗೆ ಬರುವಾಗ  ಕುಡಿಯಲು ಮತ್ತು ತಿನ್ನಲು ಅವಶ್ಯಕವಾದ ವಸ್ತುಗಳನ್ನು ತಮ್ಮೊಂದಿಗೆ ತರುವುದು ಒಳಿತು. ಅದರ ಜೊತೆಯಲ್ಲಿ ಈ ಪ್ರದೇಶ ಪ್ಲಾಸ್ಟಿಕ್ ಮುಕ್ತವಾದ ಪ್ರದೇಶ ಎಂಬುದಾಗಿರುವ ಕಾರಣ ತಾವು ತಂದಂತಹ ತ್ರಾಜ್ಯಗಳನ್ನು ಇಲ್ಲಿ ಬಿಸಾಡದಿರುವ ಮೂಲಕ ಈ ಪ್ರದೇಶದ ಸ್ವಚ್ಚತೆಯನ್ನು ಕಾಪಾಡುವುದು ಎಲ್ಲರ ಕರ್ತವ್ಯವಾಗಿದೆ. ಇನ್ನು ಇಲ್ಲಿರುವ ಗಿಡಮರ ಮತ್ತು ಪೊದೆಗಳು ಹೇರಳವಾಗಿರುವುದನ್ನು ದುರುಪಯೋಗ ಪಡಿಸಿಕೊಳ್ಳುವ ಪ್ರೇಮಿಗಳ ಸಂಖ್ಯೆಯೂ ಇಲ್ಲಿ ಕಡಿಮೇ ಇಲ್ಲದಿರುವ ಕಾರಣ  ಈ ಕುರಿತಂತೆ  ಇಲ್ಲಿನ ಅರಣ್ಯ ಇಲಾಖೆಯ ರಕ್ಷಣಾ ಇಲಾಖೆಯವರು ಗಮನ ಹರಿಸುವುದು ಸೂಕ್ತವಾಗಿದೆ.

ಇಷ್ಟೆಲ್ಲಾ ವಿಷಯಗಳನ್ನು ತಿಳಿದ ನಂತರ ಇನ್ಣೇಕ ತಡಾ,  ಈ ವಾರಾಂತ್ಯದಲ್ಲಿ ಸಮಯ ಮಾಡಿಕೊಂಡು ಕೋಲಾರದ ಅಂತರಗಂಗೆ ಅರ್ಥಾತ್ ದಕ್ಷಿಣಕಾಶಿಗೆ ಭೇಟಿ ನೀಡಿ ಬಸವಣ್ಣನ ಬಾಯಿಯಿಂದ ಬೀಳುವ ಔಷಧೀಯ ಗುಣವಿರುವ ನೀರಿನಲ್ಲಿ ಮಿಂದು ಶ್ರದ್ಧೆಯಿಂದ ಕಾಶೀವಿಶ್ವೇಶ್ವರನ ದರ್ಶನ ಪಡೆದು ನಿಮ್ಮ ಅನುಭವವನ್ನು ನಮ್ಮೊಂದಿಗೆ  ಹಂಚಿಕೊಳ್ತೀರೀ ಅಲ್ವೇ?

ಏನಂತೀರೀ?

ನಿಮ್ಮವನೇ ಉಮಾಸುತ ​

ಶ್ರೀರಂಗಂ ಸಂಜೀವನ ಆಂಜನೇಯ ಸ್ವಾಮಿ

anjaneya

ಕೆಲ ತಿಂಗಳುಗಳ ಹಿಂದೆ ತಮಿಳುನಾಡಿನ ಚೆನೈನಲ್ಲಿ ಕನ್ನಡಿಗರಾದ ಅರ್ಜುನ್ ಸರ್ಜಾವರ ಕುಟುಂಬ ಧ್ಯಾನಮುದ್ರೆಯಲ್ಲಿರುವ ಆಂಜನೇಯಸ್ವಾಮಿಯ ದೇವಸ್ಥಾನವನ್ನು ಲೋಕಾರ್ಪಣೆ ಮಾಡಿದ ವಿಡೀಯೋವನ್ನು ನಮ್ಮ ಛಾನೆಲ್ಲಿನಲ್ಲಿಯೇ ನೋಡಿ ಸಂಭ್ರಮ ಪಟ್ಟಿದ್ದೆವು. ಅದೇ ತಮಿಳುನಾಡಿನ ಶ್ರೀರಂಗಂ ಬಳಿಯ ಮೇಲೂರಿನ ಬಳಿ 37 ಅಡಿ ಎತ್ತರದ ಆಂಜನೇಯ ಸ್ವಾಮಿಯ ಪ್ರತಿಮೆ ಲೋಕಾರ್ಪಣೆ ಆಗಿರುವುದನ್ನು ಕಣ್ತುಂಬ ನೋಡಿ ಸಂಜೀವನ ಆಂಜನೇಯ ಸ್ವಾಮಿ ಕೃಪಾಶೀರ್ವಾದಕ್ಕೆ ಪಾತ್ರರಾಗೋಣ ಬನ್ನಿ.

truck

ವಿಶ್ವರೂಪ ಆಂಜನೇಯರ್ ಎಂದು ಹೆಸರಿನ ಖಾಸಗಿ ಟ್ರಸ್ಟ್ ಶ್ರೀರಂಗಂನ ಕೊಲ್ಲಿದಾಮ್ ತೀರದಲ್ಲಿ ಮೇಲೂರು ಎಂಬ ಗ್ರಾಮದ ಬಳಿ ಸುಮಾರು ಒಂದು ಎಕರೆ ಭೂಮಿಯಲ್ಲಿ ಈ ಖಾಸಗಿ ದೇವಸ್ಥಾನವನ್ನು ಸ್ಥಾಪಿಸಿದೆ. ತಿರುಪ್ಪೂರ್ ಜಿಲ್ಲೆಯ ತಿರುಮುರುಗನಪೂಂಡಿಯಲ್ಲಿ ಶಿಲ್ಪಿಗಳ ತಂಡ ಸುಮಾರು ಒಂದೂವರೆ ವರ್ಷಗಳ ಕಾಲ ನಿರ್ಮಿಸಿದ ಸುಮಾರು 120 ಟನ್ ತೂಕದ ಈ ಆಂಜನೇಯ ಸ್ವಾಮಿಯ ವಿಗ್ರಹವನ್ನು ಇದಕ್ಕೆಂದೇ 46 ಚಕ್ರಗಳನ್ನು ಹೊಂದಿರುವ ಬೃಹತ್ತಾದ ಟ್ರೇಲರ್ ಒಂದನ್ನು ವಿಶೇಷವಾಗಿ ಸಿದ್ಧಪಡಿಸಿ, ಸೆಪ್ಟೆಂಬರ್ 11 ರಂದು ತಿರುಮುರುಗನಪೂಂಡಿಯಿಂದ ಹೊರಟು ರಸ್ತೆಯ ಮುಖಾಂತರ ಎರಡು ದಿನಗಳ ಪ್ರಯಾಣದ ನಂತರ ಮೇಲೂರಿನ ಸಂಜೀವನ ಆಂಜನೇಯಸ್ವಾಮಿಯ ಆವರಣಕ್ಕೆ ತರಲಾಗಿತ್ತು.

a1

ತಮಿಳುನಾಡು ರಾಜ್ಯದಲ್ಲೇ ಅತ್ಯಂತ ಎತ್ತರವಾಗಿರುವ ಈ ವಿಗ್ರಹವನ್ನು ಪ್ರತಿಷ್ಠಾಪಿಸಲೆಂದೇ, ಸುಮಾರು ಒಂದು ತಿಂಗಳಿಗೂ ಅಧಿಕ ಕಾಲ ವಿಶೇಷ ಧಾರ್ಮಿಕ ವಿಧಿ ವಿಧಾನಗಳನ್ನು ನಡೆಸಿದ ನಂತರ ಪ್ರತಿಮೆ ಸ್ಥಾಪನೆಗೆ ನಾಲ್ಕು ಅಡಿ ಎತ್ತರದ ಅಡಿಪಾಯದ ಪೀಠವನ್ನು ನಿರ್ಮಿಸಿ ದಿ.25.10.2021 ರಂದು ಸಕಲ ವಿಧಿ ವಿಧಾನಗಳೊಂದಿಗೆ ಭಕ್ತರ ಜೈ ಶ್ರೀರಾಮ್, ಜೈ ಶ್ರೀರಾಮ್ ಎಂಬ ಘೋಷಣೆಗಳ ಮಧ್ಯೆಯೇ ಕ್ರೇನ್ ಮುಖಾಂತರ ಪೀಠದ ಮೇಲೆ ಯಶಸ್ವಿಯಾಗಿ ಪ್ರತಿಷ್ಠಾಪನೆ ಮಾಡಲಾಗಿದೆ. ಮುಂದಿನ 48 ದಿನಗಳ ಕಾಲ ಇಲ್ಲಿ ಮಂಡಲ ಪೂಜೆಯು ನಡೆಯುವ ಮೂಲಕ ದೇವರ ಪ್ರಾಣಪ್ರತಿಷ್ಠಾಪನಾ ಕಾರ್ಯ ಮುಂದುವರೆಯಲಿದೆ.

ಇದೇ ದೇವಸ್ಥಾನದ ಆವರಣದಲ್ಲಿ ಶ್ರೀರಾಮ, ಅಮ್ಮನವರು, ಚಕ್ರತಾಳ್ವಾರ್ ಮತ್ತು ಶ್ರೀ ಲಕ್ಷ್ಮಿ ನರಸಿಂಹ ಸ್ವಾಮಿಯ ನಾಲ್ಕು ದೇವಾಲಯಗಳೂ ಇದೇ ಆವರಣದಲ್ಲಿ ನಿರ್ಮಾಣಗೊಳ್ಳತ್ತಲಿದೆ. ಅದರ ಅಂಗವಾಗಿ ಕೆಲದಿನಗಳ ಹಿಂದೆ ಅಮ್ಮನವರ ಮೂರ್ತಿಯನ್ನೂ ಮತ್ತು ಶ್ರೀ ಲಕ್ಶ್ಮೀ ನರಸಿಂಹಸ್ವಾಮಿಯ ದೇವರ ವಿಗ್ರಹವನ್ನು ದೇವಾಲಯಗಳ ಸಂಕೀರ್ಣದಲ್ಲಿ ಪ್ರತಿಷ್ಠಾಪನೆ ಮಾಡಲಾಗಿದೆ. ಇನ್ನು ಕೆಲವೇ ಕೆಲವು ವರ್ಷಗಳಲ್ಲಿ ಇಲ್ಲಿ ಬೃಹತ್ತಾದ ದೇವಾಲಯಗಳ ಸಂಕೀರ್ಣ ಸಂಪೂರ್ಣವಾದ ನಂತರ ತಿರುಚ್ಚಿ ಮತ್ತು ಶ್ರೀರಂಗಕ್ಕೆ ಭೇಟಿ ನೀಡುವ ಪ್ರತಿಯೊಬ್ಬ ಆಸ್ತಿಕ ಬಂಧುಗಳೆಲ್ಲರೂ ಈ ದೇವಸ್ಥಾನಕ್ಕೂ ಖಂಡಿತವಾಗಿಯೂ ಈ ವಿಶ್ವರೂಪ ಆಂಜನೇಯಸ್ವಾಮಿಯ ದರ್ಶನಕ್ಕಾಗಿ ಭೇಟಿ ನೀಡಿ ಇಲ್ಲಿರುವ ಎಲ್ಲಾ ದೇವರುಗಳ ಆಶೀರ್ವಾದಕ್ಕೆ ಪಾತ್ರರಾಗುತ್ತಾರೆ ಎಂಬ ನಂಬಿಕೆ ಇದೆ ಎಂದು ಆಂಜನೇಯ ಸ್ವಾಮಿಯ ಪರಮ ಭಕ್ತರು ಮತ್ತು ಟ್ರಸ್ಟ್‌ನ ಉಸ್ತುವಾರಿಗಳು ಹಾಗೂ ಈ ದೇವಾಲಯದ ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀರಂಗಂನಲ್ಲಿ ವಾಸವಾಗಿರುವ ಶ್ರೀ ಆರ್. ವಾಸುದೇವನ್ ಅವರು ತಿಳಿಸಿದ್ದಾರೆ, ಇದೇ ದೇವಾಲಯದ ಆವರಣದಲ್ಲಿ ಗೋಶಾಲೆಯನ್ನೂ ಆರಂಭಿಸಲು ನಿರ್ಥರಿಸಿರುವುದು ಅತ್ಯಂತ ಶ್ಲಾಘನೀಯವಾಗಿದೆ.

ಈ ದೇವಸ್ಥಾನ ಮತ್ತು ಇಲ್ಲಿರುವ ಎಲ್ಲಾ ಪ್ರತಿಮೆಗಳನ್ನು ತಯಾರಿಸಲು ವಿಶೇಷ ಶಿಲ್ಪಿಗಳ ಒಂದು ಗುಂಪು ಕಳೆದ ಆರು ವರ್ಷಗಳಿಂದ ಕೆಲಸ ಮಾಡಿದೆಯಲ್ಲದೇ ಪ್ರತೀ . ಪ್ರತಿಮೆಯನ್ನೂ ಎಂಜಿನಿಯರ್‌ಗಳು ಮತ್ತು ಪುರೋಹಿತರ ಮಾರ್ಗದರ್ಶನದಲ್ಲಿ ವೈಜ್ಞಾನಿಕವಾಗಿಯೂ ಮತ್ತು ಸಾಂಪ್ರದಾಯಿಕವಾಗಿಯೂ ಇರುವಂತೆ ನಿರ್ಮಾಣ ಮಾಡುತ್ತಿರುವುದು ಅಭಿನಂದನಾರ್ಹವಾಗಿದೆ.

a2

ಪ್ರಸ್ತುತ ಇಲ್ಲಿ ಶ್ರೀ ಸಂಜೀವನ ಆಂಜನೇಯರ ಚಿಕ್ಕ ಮೂರ್ತಿಗೆ ನಿತ್ಯ ಪೂಜೆಗಳು ನಡೆಯುತ್ತಿದ್ದು ದೇಶವಿದೇಶಗಳ್ಲಿ ಇರುವ ಆಸ್ತಿಕ ಬಂಧುಗಳು ಮತ್ತು ದಾನಿಗಳ ಕೊಡುಗೆಯಿಂದ ಇಷ್ಟು ದೊಡ್ಡ ದೇವಾಲಯಗಳ ಸಂಕೀರ್ಣದ ಜೊತೆಗೆ ಇಷ್ಟು ಬೃಹತ್ತಾದ ಆಂಜನೇಯ ಸ್ವಾಮಿಯ ವಿಗ್ರಹವನ್ನು ಪ್ರತಿಷ್ಠಾಪನೆ ಮಾಡಲು ಸಾಧ್ಯವಾಯಿತು. ಭಕ್ತರ ಸಹಕಾರ ಇದೇ ರೀತಿಯಾಗಿಯೇ ಮುಂದುವರೆದಲ್ಲಿ ಅತ್ಯಂತ ಶೀಘ್ರವಾಗಿ ದೇವಾಲಯದ ಸಂಕೀರ್ಣ ಸಂಪೂರ್ಣಗೊಳ್ಳಲಿದ್ದೇವೆ ಎಂದು ದೇವಸ್ಥಾನದ ಟ್ರಸ್ಟಿಗಳು ತಿಳಿಸಿರುತ್ತಾರೆ.

ಇನ್ನೇಕೆ ತಡಾ ಒಂದೆರಡು ದಿನಗಳ ಕಾಲ ಸಮಯ ಮಾಡಿಕೊಂಡು ಆದಿರಂಗ, ಮಧ್ಯರಂಗ ಮತ್ತು ಅಂತ್ಯರಂಗಗಳಲ್ಲಿ ಒಂದಾದ ಶ್ರೀರಂಗಂನ ಅಂತ್ಯರಂಗನಾಥ ಸ್ವಾಮಿಯ ದರ್ಶನ ಮಾಡಿಕೊಂಡು ಹಾಗೇಯೇ ಸಂಜೀವನ ಆಂಜನೇಯ ಸ್ವಾಮಿಯ ದೇವಾಲಯಗಳ ಸಂಕೀರ್ಣಕ್ಕೆ ಭೇಟಿ ನೀಡಿ ಅಲ್ಲಿರುವ ಎಲ್ಲಾ ದೇವರುಗಳ ಕೃಪಾಶೀರ್ವಾದಕ್ಕೆ ಪಾತ್ರರಾಗ್ತೀರೀ ಅಲ್ವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಸದ್ಯಕ್ಕೆ ಇಲ್ಲಿಂದಲೇ ಸ್ವಾಮಿಯ ದರ್ಶನ ಪಡೆಯೋಣ ಬನ್ನಿ.

ಊನಕೋಟಿ

unakoti

ನಮ್ಮ ಸನಾತನ ಧರ್ಮದಲ್ಲಿ ಅನೇಕ ಪುರಾಣ ಪುಣ್ಯಕಥೆಗಳಿದ್ದು ಅವೆಲ್ಲವೂ ಭಾರತದಲ್ಲಿ ಸಾವಿರಾರು ವರ್ಷಗಳ ಹಿಂದೆ ನಡೆದದ್ದು ಎಂದು ನಂಬಿದರೆ, ಇನ್ನೂ ಅನೇಕರು ಅದು ಕೇವಲ ಕಾಲ್ಪನಿಕ ಕಟ್ಟು ಕಥೆ ಎಂದು ವಾದ ಮಾಡುವವರೂ ಇದ್ದಾರೆ. ಹಾಗೆ ವಾದ ಮಾಡುವವರಿಗೆ ಉತ್ತರಿಸುವಂತೆ ಆ ಪುರಾಣ ಕಥೆಗಳಲ್ಲಿ ಉಲ್ಲೇಖವಿರುವ ಬಹುತೇಕ ನದಿಗಳು, ನಗರಗಳು ಭಾರತಾದ್ಯಂತ ಹರಡಿಕೊಂಡಿದ್ದು ಈ ಪುರಾಣ ಕಥೆಗಳಿಗೆ ಪೂರಕವಾಗಿದೆ. ಪುರಾಣ ಕಥೆಯಲ್ಲಿ ಬರುವ ಇಂತಹದ್ದೇ ಒಂದು ದಂತಕತೆಗೆ ಜ್ವಲಂತ ಉದಾಹರಣೆಯಾಗಿ ತ್ರಿಪುರದ ಕಾಡುಗಳಲ್ಲಿ ಗೋಚರವಾಗಿರುವ, ಕಾಲ ಭೈರವನ ಪವಿತ್ರ ಯಾತ್ರಾ ಸ್ಥಳವಾದ ಊನಕೋಟಿಯ ಬಗ್ಗೆ ತಿಳಿದುಕೊಳ್ಳೋಣ.

un4

ಉತ್ತರ ತ್ರಿಪುರಾದ ಜಂಪುಯಿ ಬೆಟ್ಟಗಳ ಮೇಲೆ ಸ್ವರ್ಗವೇ ಭೂ ಲೋಕಕ್ಕೆ ಇಳಿದಿರುವಂತಹ ಕಾನನ್ದದಲ್ಲಿ ಸುಂದರವಾದ ಊನಕೋಟಿಯ ಪಾರಂಪರಿಕ ತಾಣವಿದೆ. ಇಲ್ಲಿನ ಬೃಹತ್ತಾದ ಬೆಟ್ಟದಲ್ಲಿ ಕೆತ್ತಲಾದ ದೈತ್ಯವಾದ ಬುಡಕಟ್ಟು ಮನುಷ್ಯರ ಮತ್ತು ವಿವಿಧ ಹಿಂದೂ ದೇವರುಗಳ ಕೆತ್ತನೆ ಇರುವ ಶಿಲ್ಪಗಳ ನೆಲೆಯಾಗಿದೆ. ಈ ಪ್ರದೇಶದಲ್ಲಿ ನೂರಾರು ಹಿಂದೂ ದೇವರುಗಳು ಮತ್ತು ದೇವತೆಗಳ ಮೂರ್ತಿಗಳು ಇದ್ದರೆ, ಇನ್ನೂ ಹಲವಾರು ಇನ್ನೂ ಪತ್ತೆಯಾಗದ ಶಿಲ್ಪಗಳು ಇಲ್ಲಿವೆ. ಎಲ್ಲಕ್ಕಿಂತಲೂ ಹೆಚ್ಚಾಗಿ, ಉನಕೋಟೀಶ್ವರ ಕಾಲ ಭೈರವನೆಂಬ 30 ಅಡಿ ಎತ್ತರದ ಶಿವನ ತಲೆಯ ಕೆತ್ತನೆಯು ಅತ್ಯಂತ ಆಕರ್ಷಣೀಯವಾಗಿರುವುದಲ್ಲದೇ, ಅತ್ಯಂತ ಪೂಜನೀಯವೂ ಆಗಿದೆ. ಈ ಕೆತ್ತನೆಗಳನ್ನು ಅತ್ಯಂತ ನುರಿತ ಕುಶಲಕರ್ಮಿಗಳು ಮಾಡಿರುವುದು ಸ್ಪಷ್ಟವಾಗಿರುವುದಲ್ಲದೇ, ಹಚ್ಚ ಹಸಿರಿನಿಂದ ಸುತ್ತುವರೆದಿರುವ ಈ ಸ್ಥಳವು ಶೈವ ತೀರ್ಥಯಾತ್ರೆಯ ಸ್ಥಳವಾಗಿದ್ದು 8 ನೇ ಅಥವಾ 9 ನೇ ಶತಮಾನ ಅಥವಾ ಬಹುಶಃ ಅದಕ್ಕಿಂತ ಮುಂಚಿನ ಪ್ರಾಚೀನ ದೇವಾಲಯಗಳ ಅವಶೇಷಗಳಿಂದ ಕೂಡಿದೆ. ಈ ಶಿಲ್ಪಕಲಾಕೃತಿಗಳು ಕಾಂಬೋಡಿಯಾದ ಅಂಕೋರ್ ವಾಟ್ ದೇವಸ್ಥಾನದಲ್ಲಿ ಇರುವಂತೆಯೇ ಇರುವುದು ಬಹಳ ವಿಶೇಷವಾಗಿದೆ.

ಈ ಪ್ರದೇಶದ ಹೆಸರಾದ ಊನಕೋಟಿ ಎಂದರೆ, ಒಂದು ಕೋಟಿಗಿಂತಲೂ ಒಂದು ಕಡಿಮೆ ಅಂದರೆ 99,99,999 ಎಂಬ ಸಂಖ್ಯೆಯಾಗುತ್ತದೆ. ಈ ಹೆಸರಿನ ಹಿಂದೆಯೂ ಕುತೂಹಲಕರವಾದ ಪೌರಾಣಿಕ ಕಥೆಗಳಿವೆ.

un1

ಹಿಂದೂ ಪುರಾಣಗಳ ಪ್ರಕಾರ, ಶಿವನು ಒಮ್ಮೆ ಕೈಲಾಸದಿಂದ ಕಾಶಿಗೆ ಹೋಗುವ ಮಾರ್ಗದಲ್ಲಿ ಈ ಪ್ರದೇಶದಲ್ಲಿ 99,99,999 ದೇವತೆಗಳು ಮತ್ತು ತನ್ನ ಗಣಗಳ ಜೊತೆಯಲ್ಲಿ ಒಂದು ರಾತ್ರಿ ಕಳೆದಿದ್ದಲ್ಲದೇ, ಮಾರನೆಯ ದಿನ ಸೂರ್ಯೋದಯಕ್ಕೆ ಮುಂಚೆಯೇ ಎಲ್ಲರೂ ಎದ್ದು ಕಾಶಿಯ ಕಡೆಗೆ ಹೋರಡುವಂತೆ ಸೂಚಿಸಿದ್ದನಂತೆ. ದುರದೃಷ್ಟವಶಾತ್, ಮಾರನೆಯ ದಿನ ಸೂರ್ಯೋದಯಕ್ಕಿಂತಲೂ ಮುಂಚೆ, ಮಹಾಶಿವನನ್ನು ಹೊರತುಪಡಿಸಿ ಉಳಿದವರಾರೂ ಎಚ್ಚರಗೊಳ್ಳದ ಕಾರಣ, ಪರಶಿವನೊಬ್ಬನೇ, ಕಾಶಿಗೆ ಹೊರಡುವ ಮುನ್ನ ಉಳಿದ ಎಲ್ಲರನ್ನೂ ಕಲ್ಲಾಗುವಂತೆ ಶಾಪ ಕೊಟ್ಟ ಕಾರಣ, ಕೋಟಿಗೆ ಒಂದು ಕಡಿಮೆ ಇದ್ದಷ್ಟು ಜನರೆಲ್ಲರೂ, ಈ ರೀತಿಯಾಗಿ ಕಲ್ಲಾಗಿ ಮಾರ್ಪಟ್ಟ ಕಾರಣ, ಈ ಪ್ರದೇಶಕ್ಕೆ ಊನಕೋಟಿ ಎಂಬ ಹೆಸರು ಬಂದಿತೆಂದು ನಂಬಲಾಗಿದೆ.

ಮತ್ತೊಂದು ಆವೃತ್ತಿಯ ಪ್ರಕಾರ, ಈ ಪ್ರದೇಶದಲ್ಲಿ ಕಾಲು ಕುಮಾರ್ ಎಂಬ ಪ್ರತಿಭಾವಂತ ಮತ್ತು ಶಿವಪಾರ್ವತಿಯ ಪರಮ ಭಕ್ತರಾಗಿದ್ದ ಶಿಲ್ಪಿ ಒಬ್ಬರಿದ್ದರಂತೆ. ಅದೊಮ್ಮೆ ಶಿವಪಾರ್ವತಿಯರು ಈ ಪ್ರದೇಶದ ಮೂಲಕ ಹಾದು ಹೋಗುವುದನ್ನು ಗಮನಿಸಿ ತನ್ನನ್ನೂ ಅವರೊಂದಿಗೆ ಕರೆದುಕೊಂಡು ಹೋಗಲು ಕೇಳಿದರಂತೆ.

un3

ಭಕ್ತನ ಈ ನಿವೇದನೆಯನ್ನು ಶಿವನು ಒಪ್ಪಿಕೊಳ್ಳಲು ನಿರಾಕರಿಸಿದಾಗ ಬೇಸರಗೊಂಡ ಭಕ್ತನ ಅಸೆಯನ್ನು ತಣಿಸುವ ಸಲುವಾಗಿ ಪಾರ್ವತಿಯು ಒಂದು ಪರಿಹಾರರ್ಥವಾಗಿ ಒಂದು ರಾತ್ರಿಯ ಒಳಗೆ, ಶಿವ ಮತ್ತು ಅವನ ಪರಿವಾರದ 1,00,00,000 ಪ್ರತಿಮೆಗಳನ್ನು ಕೆತ್ತಿದಲ್ಲಿ ಕಾಲು ಕುಮಾರ್ ಅವರನ್ನು ಕರೆದುಕೊಂಡು ಹೋಗುವುದಾಗಿ ಸೂಚಿಸುತ್ತಾಳೆ. ಇದಕ್ಕೆ ಒಪ್ಪಿದ ಕಾಲು ಕುಮಾರ್ ಲಗು ಬಗೆನೆ ಕಾರ್ಯವನ್ನು ಆರಂಭಿಸಿ ಬೆಳಗಾಗುವುದರೊಳಗೆ ಕೆತ್ತನೆಯನ್ನು ಮುಗಿಸಲು ಆರಂಭಿಸುತ್ತಾನ್ರೆ. ಆದರೆ ದುರದೃಷ್ಟವಶಾತ್, ಮರುದಿನ ಸೂರ್ಯೋದಯವಾಗುವ ಸಮಯಕ್ಕೆ ಕಾಲು ಕುಮಾರ್ ಒಂದು ಕೋಟಿಗೆ ಒಂದು ಕಡಿಮೆ ಪ್ರತಿಮೆಯನ್ನು ಕೆತ್ತಿದ್ದ ಕಾರಣ, ಶಿವಪಾರ್ವತಿಯರು ಅವನನ್ನು ಅಲ್ಲಿಯೇ ಬಿಟ್ಟು ತಮ್ಮ ಪ್ರಯಾಣವನ್ನು ಮುಂದುವರೆಸಿದರಂತೆ.

ಇದೇ ಕಥೆಯ ಮತ್ತೊಂದು ಆವೃತ್ತಿಯು ಇದ್ದು ಅದು ಇನ್ನೂ ಅರ್ಥಪೂರ್ಣವಾಗಿದೆ. ಶಿಲ್ಪಿ ಕಾಲು ಕುಮಾರ್ ಅವರಿಗೆ ಕನಸಿನಲ್ಲಿ ಶಿವನು ಪ್ರತ್ಯಕ್ಷವಾಗಿ ತನ್ನ ಮತ್ತು ತನ್ನ ಶಿಷ್ಯಗಣದ ಕೆತ್ತನೆಗಳನ್ನು ಕೆತ್ತುವಂತೆ ಸೂಚಿಸುತ್ತಾನೆ ಅದರಂತೆ ಕಾಲು ಕುಮಾರ್ ಕೆಲಸವನ್ನು ಆರಂಭಿಸಿ, 99,99,999 ಶಿವ ಮತ್ತು ಶಿವ ಗಣದ ಕೆತ್ತನೆಯನ್ನು ಕೆತ್ತಿ ಇದರ ಜೊತೆ ತನ್ನ ಖ್ಯಾತಿಯೂ ಶಾಶ್ವತವಾಗಿ ಇರಲೆಂಬ ಬಯಕೆಯಿಂದಾಗಿ ಕಡೆಯದಾಗಿ ತನ್ನದೇ ಆದ ಪ್ರತಿಕೃತಿಯನ್ನು ಕೆತ್ತಿ ತನ್ನ ಸ್ವಪ್ರತಿಷ್ಠೆಯಿಂದಾಗಿ ಕೋಟಿಗೆ ಒಂದು ಕಡಿಮೆ ದೇವಾನು ದೇವತೆಗಳ ಕೆತ್ತನೆ ಮಾಡಿದ ಕಾರಣ ಈ ಪ್ರದೇಶಕ್ಕೆ ಊನಕೋಟಿ ಎಂಬ ಹೆಸರು ಬಂದಿದೆ ಎಂಬ ಕಥೆಯೂ ಇದೆ.

ಈ ಕೆತ್ತನೆಗಳ ಹಿಂದಿನ ದಂತಕಥೆಗಳು ಏನೇ ಇರಲಿ, ಇಂದಿನ ಆಧುನಿಕ ಕಾಲದಲ್ಲಿಯೇ ಈ ಪ್ರದೇಶಕ್ಕೆ ಬರಲು ಕಷ್ಟವಾಗಿರುವ ಕಾಲದಲ್ಲಿ ಅದೆಷ್ಟೋ ಕಾಲದಲ್ಲಿ ಈ ಪ್ರಮಾಣದಲ್ಲಿ ಈ ಪ್ರದೇಶದಲ್ಲಿ ಅದೂ ಇಷ್ಟು ಸುಂದರವಾಗಿ ಸಾವಿರಾರು ಕೆತ್ತನೆಗಳನ್ನು ಕೆತ್ತಿರುವುದಕ್ಕೆ ಅಭಿನಂದನೆಗಳನ್ನು ಸಲ್ಲಿಸಲೇ ಬೇಕು. ಈ ವಿಸ್ಮಯಕಾರಿ ಕೆತ್ತನೆಗಳಲ್ಲಿ ಅತ್ಯಂತ ಪ್ರಸಿದ್ಧವಾದದ್ದು

unganesha

ಮತ್ತು ಈ ಪ್ರದೇಶದ ಕೇಂದ್ರ ಬಿಂದುವಾದ 30 ಅಡಿ ಎತ್ತರದ ಊನಕೋಟೀಶ್ವರ ಕಾಲ ಭೈರವನ ತಲೆ ಮತ್ತು ದೈತ್ಯಾಕಾರದ ಗಣೇಶನ ಆಕೃತಿಗಳು ನೋಡಲು ನಯನ ಮನೋಹರವಾಗಿದೆ. ಸುಮಾರು 10 ಅಡಿ ಎತ್ತರದ ಶಿವನ ಶಿರಸ್ತ್ರಾಣದ ಒಂದು ಬದಿಯಲ್ಲಿ ದುರ್ಗಾ ದೇವಿ ಸಿಂಹದ ಮೇಲೆ ನಿಂತಿದ್ದರೆ, ಮತ್ತೊಂದೆಡೆ ಗಂಗಾ ದೇವಿಯು ಮಕರ ರಾಶಿಯ ಮೇಲೆ ಕುಳಿತಿರುವಂತೆ ಕೆತ್ತಲಾಗಿದ್ದು, ಇವೆರಡರ ಜೊತೆ ನಂದಿ ಹನುಮಾನ್ ಮತ್ತು ರಾವಣ ಸೇರಿದಂತೆ ಹಲವಾರು ಮೂರ್ತಿಗಳನ್ನು ಕೆತ್ತಲಾಗಿರುವುದನ್ನು ನೋಡುವುದಕ್ಕೆ ಎರಡು ಕಣ್ಣುಗಳು ಸಾಲಾದಾಗಿದೆ.

un2

ಇಲ್ಲಿನ ಸ್ಥಳಿಯರ ಪ್ರಕಾರ 60ರ ದಶಕದಲ್ಲಿ ಈ ಪ್ರದೇಶದಲ್ಲಿ ಆದ ಭೂಕಂಪದಿಂದಾಗಿ ಆದ ಭೂಕುಸಿತದಿಂದಾಗಿ ಇನ್ನೂ ಸಾವಿರಾರು ಕೆತ್ತನೆಗಳು ಭೂಮಿಯೊಳಗೆ ಹುದುಗಿಹೋಗಿವೆ ಎಂದು ನಂಬಲಾಗಿದೆ. ಅದೇ ರೀತಿ ವರ್ಷದ 365 ದಿನಗಳೂ ಹರಿಯುವ ಜಲಪಾತವೂ ಸಹಾ ಇದೇ ಭೂಕಂಪದ ಸಮಯದಲ್ಲಿ ತನ್ನ ಪಾತ್ರವನ್ನು ಬದಲಿಸಿದೆ ಎಂದು ಹೇಳಲಾಗುತ್ತದೆ.

ಜಂಪುಯಿ ಬೆಟ್ಟಗಳು ತ್ರಿಪುರಾದ ಅತ್ಯುನ್ನತ ಗಿರಿಧಾಮವಾಗಿದ್ದು ಈ ಮೊದಲೇ ತಿಳಿಸಿದಂತೆ ಇಲ್ಲಿನ ವಾತಾವರಣವು ಸ್ವರ್ಗದಲ್ಲಿರುವಂತೆ ಭಾಸವಾಗುತ್ತದೆ ದಟ್ಟವಾದ ಕಾಡುಗಳ ಮಧ್ಯದಲ್ಲಿ ಸುಂದರ ವಾದ ಆರ್ಕಿಡ್‌ಗಳು, ಹಚ್ಚ ಹಸಿರಿನ ಭೂದೃಶ್ಯಗಳು ಮತ್ತು ಸುಂದರವಾದ ಕಿತ್ತಳೆ ತೋಟಗಳು. ಅದರ ಮಂಜಿನ ಕಣಿವೆಗಳ ವಿಹಂಗಮ ನೋಟಗಳು, ಕಿತ್ತಳೆ ಬಣ್ಣದ ಪರಿಮಳಯುಕ್ತ ಬೆಟ್ಟಗಳು ಮತ್ತು ವಿಶಿಷ್ಟವಾದ ವಾತಾವರಣವು ಇದನ್ನು ವಸಂತಕಾಲದ ಶಾಶ್ವತ ಆಸನ ಎಂದೇ ಹೆಚ್ಚು ಜನಪ್ರಿಯವಾಗಿದೆ ಈ ಬೆಟ್ಟ ಶ್ರೇಣಿಯ ಪೂರ್ವದಲ್ಲಿ ಮಿಜೋರಾಂ ಇದ್ದರೆ ದಕ್ಷಿಣದಲ್ಲಿ ಬಾಂಗ್ಲಾದೇಶದ ಚಿತ್ತಗಾಂಗ್ ಬೆಟ್ಟ ಪ್ರದೇಶವಿದೆ.

un1

ಪ್ರತಿ ವರ್ಷ ಜನವರಿ ತಿಂಗಳಿನಲ್ಲಿ ಸಣ್ಣದಾದ ಜಾತ್ರೆ ನಡೆದರೆ, ಏಪ್ರಿಲ್ ತಿಂಗಳಲ್ಲಿ ಅಶೋಕಸ್ತಮಿ ಮೇಳ ಎಂದು ಕರೆಯಲ್ಪಡುವ ದೊಡ್ಡ ಜಾತ್ರೆ ನಡೆಯುತ್ತದೆ. ಈ ಜಾತ್ರೆಗೆ ದೇಶ ವಿದೇಶಗಳಿಂದ ಸಾವಿರಾರು ಯಾತ್ರಿಕರು ಇಲ್ಲಿಗೆ ಭೇಟಿ ನೀಡಿ ಕಾಲ ಭೈರವೇಶ್ವರನ ಕೃಪಾಶೀರ್ವಾದಕ್ಕೆ ಪಾತ್ರರಾಗುವುದಲ್ಲದೇ, ಇಲ್ಲಿನ ಬೆಟ್ಟಗಳಲ್ಲಿ ಸಾಹಸಮಯ ಮತ್ತು ವಿಸ್ಮಯಕಾರಿ ಚಾರಣಗಳನ್ನು ಮಾಡುವುದಲ್ಲದೇ, ದಟ್ಟ ಮಂಜಿನ ನಡುವೆ ಆಕರ್ಷಕವಾಗಿ ಉದಯಿಸುವ ಸೂರ್ಯೋದಯ ಮತ್ತು ಹಾಗೇ ಮುಳುಗುವ ಸೂರ್ಯಾಸ್ತಗಳನ್ನು ಇಲ್ಲಿರುವ ಎತ್ತರದ . ವಾಚ್‌ಟವರ್ ಗಳ ಮೇಲೆ ನಿಂತು ಆನಂದಿಸುತ್ತಾರೆ. ಅದರ ಜೊತೆ ಜೊತೆಯಲ್ಲಿಯೇ ಅತ್ಯುನ್ನತ ಶಿಖರ -ಬೆಟ್ಲಿಂಗ್‌ಚಿಪ್ -ಬಾಂಗ್ಲಾದೇಶದ ಚಿತ್ತಗಾಂಗ್ ಬೆಟ್ಟ ಪ್ರದೇಶಗಳು, ಕಾಂಚನಪುರ -ದಸ್ತಾ ಕಣಿವೆ ಮತ್ತು ತ್ರಿಪುರಾ ಮತ್ತು ಮಿಜೋರಾಂನ ಇತರ ಬೆಟ್ಟಗಳ ಸಾಲುಗಳ ಪ್ರಕೃತಿಯನ್ನು ಆಹ್ಲಾದಿಸುತ್ತಾರೆ. ಅದೇ ರೀತಿ ಇದೇ ಬೆಟ್ಟದ ಬುಡದಲ್ಲಿರುವ ಲುಶಾಯ್ ಮತ್ತು ರಿಯಂಗ್ ಬುಡಕಟ್ಟುಗಳ ಸ್ಥಳೀಯ ಬುಡಕಟ್ಟು ಗ್ರಾಮಗಳಿಗೆ ಭೇಟಿ ನೀಡಿ ಅಲ್ಲಿಯ ಜನರ ಜನಪ್ರಿಯ ವರ್ಣಮಯ ಮಿಜೊ ಸಮುದಾಯದ ಆತಿಥ್ಯವನ್ನು ಸವಿಯುತ್ತಾರೆ.

ತ್ರಿಪುರಾದ ರಾಜಧಾನಿ ಅಗರ್ತಲಾ ಉನಕೋಟಿಯಿಂದ 180 ಕಿಮೀ ದೂರದಲ್ಲಿದ್ದು ಇಲ್ಲಿಗೆ ದೆಹಲಿ, ಕೋಲ್ಕತಾ ಮತ್ತು ಗುವಾಹಟಿಯಿಂದ ಏರ್ ಇಂಡಿಯಾ, ಜೆಟ್ ಏರ್‌ವೇಸ್ ಮತ್ತು ಇಂಡಿಗೋ ಏರ್‌ಲೈನ್ಸ್ ಗಳ ದೈನಂದಿನ ವಿಮಾನಗಳಿದ್ದು ಅಲ್ಲಿಂದ NH44 ಮೂಲಕ ಖಾಸಗೀ ವಾಹನಗಳ ಮೂಲಕ ಇಲ್ಲಿಗೆ ತಲುಪಬಹುದಾಗಿದೆ.

ಇನ್ನು ರೈಲಿನ ಮುಖಾಂತರವೂ ಕುಮಾರಘಾಟ್ (160 ಕಿಮೀ) ಮತ್ತು ಧರ್ಮನಗರ (200 ಕಿಮೀ) ರೈಲ್ವೇ ನಿಲ್ದಾಣಕ್ಕೆ ತಲುಪಿ ಅಲ್ಲಿಂದ ಸ್ಥಳೀಯ ಸಾರಿಗೆ ವ್ಯವಸ್ಥೆ ಇಲ್ಲವೇ ಖಾಸಗೀ ವಾಹನಗಳ ಮೂಲಕ ಊನಕೋಟಿಯನ್ನು ತಲುಪಬಹುದಾಗಿದೆ.

ಅದೇ ರೀತಿಯಲ್ಲಿ NH44 ರಸ್ತೆಯ ಮುಖಾಂತರವೂ ಅಗರ್ತಲ ತಲುಪಿ ಅಲ್ಲಿಂದ ನಿಯಮಿತವಾಗಿ ಸಂಚರಿಸುವ ಬಸ್ ಗಳ ಮುಖಾಂತರ ಊನಕೋಟಿಯನ್ನು ತಲುಪಬಹುದಾಗಿದೆ.

ಊನಕೋಟಿಯ ಬಗ್ಗೆ ಇಷ್ಟೆಲ್ಲಾ ತಿಳಿದುಕೊಂಡ ಮೇಲೆ ಇನ್ನೇಕೆ ತಡಾ, ಒಂದು ವಾರಗಳ ಕಾಲ ರಜೆ ಹಾಕಿಕೊಂಡು ಪೂರ್ವಾಂಚಲ ರಾಜ್ಯಗಳಿಗೆ ಪ್ರವಾಸ ಹೋಗಿ ಅದರ ಅನುಭವವನ್ನು ನಮ್ಮೊಂದಿಗೆ ಹಂಚಿಕೊಳ್ತೀರೀ ಅಲ್ವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಇದೇ ಲೇಖನ ಸಂಪ‌ ಮಾಸಪತ್ರಿಕೆ ಅಕ್ಟೋಬರ್ 2021ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

ವಿವೇಕಾನಂದ ಕೇಂದ್ರ, ಕನ್ಯಾಕುಮಾರಿ

vk7ಭಾರತ ಎಂದರೆ ಹಾವಾಡಿಗರ ದೇಶ, ಹಿಂದೂಗಳು ಎಂದರೆ ಮೂಢ ನಂಬಿಕೆಯ ಜನರು ಎಂದು ಇಡೀ ಜಗತ್ತೇ ಮೂದಲಿಸುತ್ತಿದ್ದಾಗ ವಿಶ್ವ ಧರ್ಮಗಳ ಸಂಸತ್ತು 11 ಸೆಪ್ಟೆಂಬರ್ 1893 ರಂದು ಚಿಕಾಗೋದಲ್ಲಿ ಐತಿಹಾಸಿಕ ದಿಕ್ಸೂಚಿ ಭಾಷಣವನ್ನು ಮಾಡಿ ಜಗತ್ತೇ ಭಾರತ ಮತ್ತು ಹಿಂದೂ ಧರ್ಮದತ್ತ ಬೆಚ್ಚಿ ಬೀಳುವಂತೆ ಮಾಡುವ ಮುನ್ನಾ ದೇಶಾದ್ಯಂತ ಪರಿವಾಜ್ರಕರಾಗಿ ಪರ್ಯಟನೆ ಮಾಡುತ್ತಿದ್ದಂತಹ ಸಮಯದಲ್ಲಿ, 24 ಡಿಸೆಂಬರ್ 1892 ರಂದು ಸ್ವಾಮೀ ವಿವೇಕಾನಂದರು ಕನ್ಯಾಕುಮಾರಿಯನ್ನು ತಲುಪಿದ್ದರು. ಸಮುದ್ರದ ದಂಡೆಯಲ್ಲೇ ಇರುವ ದೇವಿಯ ದರ್ಶನ ಪಡೆದು ಹಿಂದೂಮಹಾಸಾಗರ, ಅರಬ್ಬೀ ಸಮುದ್ರ ಮತ್ತು ಬಂಗಾಳಕೊಲ್ಲಿಗಳ ಸಂಗಮದಲ್ಲಿ ಸಮುದ್ರ ತಟದಿಂದ ಸುಮಾರು 500ಮೀ ದೂರ ಇರುವ ಬಂಡೆಯನ್ನು ನೋಡಿ ಅಲ್ಲಿಗೆ ಕರೆದೊಯ್ಯುವಂತೆ ಅಲ್ಲಿಯೇ ಇದ್ದ ದೋಣಿಯವರನ್ನು ಕೇಳಿಕೊಳ್ಳುತ್ತಾರೆ. ಆ ಸಮಯದಲ್ಲಿ ಭೋರ್ಗರೆಯುತ್ತಿದ್ದ ಸಮುದ್ರ ಅಲೆಗಳನ್ನು ಕಂಡು ಈ ಸಮಯದಲ್ಲಿ ದೋಣಿಯನ್ನು ಚಲಾಯಿಸುವುದು ಅಪಾಯಕರ ಎಂದಾಗ, ಅಲ್ಲಿನ ನಾವಿಕರ ಎಚ್ಚರಿಕೆಗೂ ಗಮನ ಹರಿಸದೇ, ತಾವೇ ಧೈರ್ಯದಿಂದ ಸಮುದ್ರಕ್ಕೆ ದುಮುಕಿ ಈಜಿಕೊಂಡು ಆ ಬೃಹತ್ ಬಂಡೆಯನ್ನು ತಲುಪುತ್ತಾರೆ. ಅಲ್ಲಿನ ಪ್ರಶಾಂತ ವಾತಾವರಣದಲ್ಲಿ ಸುಮಾರು 3 ದಿನಗಳ ಕಾಲ ಹಸಿವು, ನಿದ್ರೆ ನೀರಡಿಕೆಯಿಲ್ಲದೇ, ಧ್ಯಾನವನ್ನು ಮಾಡಿ, ಜ್ಞಾನೋದಯವನ್ನು ಪಡೆದು, ಮಾನವೀಯತೆಗಾಗಿ ತಮ್ಮ ಇಡೀ ಜೀವನವನ್ನೇ ಮುಡಿಪಾಗಿಡುವ ಸಂಕಲ್ಪವನ್ನು ತೆಗೆದುಕೊಳ್ಳುತ್ತಾರೆ.

ಆ ರೀತಿ ಸಂಕಲ್ಪ ಮಾಡಿದ ಸ್ವಾಮಿ ವಿವೇಕಾನಂದರು 1893 ರ ಚಿಕಾಗೋ ವಿಶ್ವ ಧರ್ಮ ಸಮ್ಮೇಳನದಲ್ಲಿ, ನನ್ನ ಅಮೇರಿಕಾದ ಸಹೋದರ ಸಹೋದರಿಯರೇ ಎಂದು ಭಾಷಣವನ್ನು ಆರಂಭಿಸಿ ಅಲ್ಲಿ ನೆರೆದಿದ್ದ ಸಭಿಕರನ್ನೆಲ್ಲಾ ಮಂತ್ರ ಮುಗ್ಧರನ್ನಾಗಿಸಿ ಭಾರತ, ಹಿಂದೂ ಧರ್ಮ, ಯೋಗ, ವೇದಾಂತದ ಮತ್ತು ಭಾರತೀಯ ತತ್ವಶಾಸ್ತ್ರಗಳನ್ನು ಪಾಶ್ಚಿಮಾತ್ಯ ದೇಶಗಳಿಗೆ ಪರಿಚಯಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಜನವರಿ 1962 ರಲ್ಲಿ, ಸ್ವಾಮೀಜಿಯವರ ಜನ್ಮ ಶತಮಾನೋತ್ಸವದ ಸಮಯದಲ್ಲಿ ಅವರು ಜ್ಞಾನೋದಯ ಪಡೆದ ಕನ್ಯಾಕುಮಾರಿಯ ಆ ಬೃಹತ್ ಬಂಡೆಯ ಮೇಲೆ ಸ್ವಾಮೀಜಿಯವರ ಸ್ಮಾರಕವೊಂದನ್ನು ಸ್ಥಾಪಿಸುವ ಸಂಕಲ್ಪವನ್ನು ಮಾಡಿದರು. ಈ ರೀತಿಯ ಮಹಾಸಂಕಲ್ಪವನ್ನು ನೆರೆವೇರಿಸಲು ಅಂದಿನ ಮದ್ರಾಸಿನ ಶ್ರೀ ರಾಮಕೃಷ್ಣ ಮಿಷನ್ ಅವರು ಸ್ಥಳ ಪರಿಶೀಲನೆಗೆ ಬಂದಾಗ ಈ ಸುಂದರ ಪರಿಕಲ್ಪನೆಯ ವಿರುದ್ಧ ಸ್ಥಳೀಯ ಕ್ಯಾಥೊಲಿಕ್ ಮೀನುಗಾರರ ಸಂಘವು ಉಗ್ರವಾಗಿ ಪ್ರತಿಭಟನೆ ನಡೆಸಿತಲ್ಲದೇ, ಆ ಬಂಡೆಯ ಮೇಲೊಂದು ದೊಡ್ಡದಾದ ಶಿಲುಬೆಯನ್ನು ಪ್ರತಿಷ್ಟಾಪನೆ ಮಾಡಲು ಹೊಂಚು ಹಾಕಿತು. ಇದರಿಂದ ಕೆಲ ಸಮಯ ಆ ಪ್ರದೇಶದಲ್ಲಿ ಹಿಂದೂ ಮತ್ತು ಕ್ರಿಶ್ಚಿಯನ್ನರ ನಡುವೆ ಉದ್ವಿಗ್ನ ಪರಿಸ್ಥಿತಿ ಉಂಟಾದ ಕಾರಣ ಆ ಸ್ಥಳವನ್ನು ನಿಷೇಧಿತ ಸ್ಥಳವೆಂದು ಗುರುತಿಸಿ, ಶಸ್ತ್ರಸಜ್ಜಿತ ಕಾವಲುಗಾರರನ್ನು ಅಲ್ಲಿಗೆ ಗಸ್ತು ಹಾಕುವಂತರ ಪರಿಸ್ಥಿತಿ ಬಂದೊದಗಿತ್ತು. ಹಿಂದೂಗಳ ಸತತ ಹೋರಾಟದ ಫಲವಾಗಿ ಜನವರಿ 17, 1963 ರಂದು ಸರ್ಕಾರವು ಅಲ್ಲಿಗೆ ಸ್ವಾಮಿ ವಿವೇಕಾನಂದರ ಸ್ಮಾರಕವನ್ನು ನಿರ್ಮಿಸಲು ಅನುಮತಿ ಕೊಡಲಾಯಿತು.

ನಿಜ ಹೇಳಬೇಕೆಂದರೆ, ಈ ಹೋರಾಟ ಮತುತ್ ಸ್ಮಾರಕದ ಹಿಂದಿನ ಸಂಪೂರ್ಣ ಶ್ರೇಯ ಶ್ರೀ ಏಕನಾಥ ರಾಮಕೃಷ್ಣ ರಾನಡೆ ಅವರಿಗೆ ಸಲ್ಲ ಬೇಕು ಎಂದರೆ ತಪ್ಪಾಗಲಾರದು. ಶ್ರೀ ಏಕನಾಥ ರಾನಡೆಯವರು ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ (ಆರ್ಎಸ್ಎಸ್) ಹಿರಿಯ ಪ್ರಚಾರಕರಾಗಿದ್ದಲ್ಲದೇ,ಸ್ವಾಮೀಜಿಗಳ ವಿಚಾರಧಾರೆಯಿಂದ ಪ್ರಭಾವಿತರಾಗಿದ್ದ ಅವರೊಬ್ಬ ಪ್ರಖ್ಯಾತ ಭಾರತೀಯ ಸಾಮಾಜಿಕ ಮತ್ತು ಆಧ್ಯಾತ್ಮಿಕ ಸುಧಾರಕರಾಗಿದ್ದರು. ಅವರ ನೇತೃತ್ವದಲ್ಲೇ, ವಿವೇಕಾನಂದ ರಾಕ್ ಮೆಮೋರಿಯಲ್ ಆರ್ಗನೈಸಿಂಗ್ ಕಮಿಟಿಯನ್ನು ಸ್ಥಾಪಿಸಲಾಯಿತು. ವಿವೇಕಾನಂದ ಶಿಲಾ ಸ್ಮಾರಕವು ರಾಷ್ಟ್ರೀಯ ಸ್ಮಾರಕ ಎಂದೇ ಜನರ ಮುಂದೆ ಬಿಂಬಿಸಿದ ಶ್ರೀ ರಾನಡೆಯವರು ಇದರ ನಿರ್ಮಾಣಕ್ಕೆ ಪ್ರತಿಯೊಬ್ಬ ಭಾರತೀಯರ ಕೊದುಗೆ ಇರಬೇಕೆಂದು ನಿರ್ಧರಿಸಿ, ಪ್ರತೀ ರಾಜ್ಯ ಸರ್ಕಾರವನ್ನು ಸಂಪರ್ಕಿಸಿದ್ದಲ್ಲದೇ, ಇನ್ನೂ ಹೆಚ್ಚಿನ ಧನಸಹಾಯಕ್ಕಾಗಿ ಒಂದು ರೂಪಾಯಿಯ ಪೋಸ್ಟ್ ಕಾರ್ಡ್ ಮಾದರಿಯನ್ನು ಅಚ್ಚು ಹಾಕಿಸಿ ದೇಶಾದ್ಯಂತ ಜನಸಾಮಾನ್ಯರಿಂದ ದೇಣಿಗೆಗಳನ್ನು ಸಂಗ್ರಹಿಸಿದರು. ಇಂತಹ ಪವಿತ್ರ ಕಾರ್ಯಕ್ಕಾಗಿ ಮೊದಲ ದೇಣಿಗೆಯನ್ನು ವಿಶ್ವಹಿಂದೂಪರಿಷತ್ತಿನ ಸ್ಥಾಪಕರಾದ ಪೂಜ್ಯ ಶ್ರೀ ಚಿನ್ಮಯಾನಂದರಿಂದ ಸಂಗ್ರಹಿಸುವ ಮೂಲಕ ಅಭಿಯಾನವನ್ನು ಆರಂಭಿಸಲಾಯಿತು.

ಒಂದು ಕಡೆ ಹಣ ಸಂಗ್ರಹದ ಆಭಿಯಾನ ನಡೆಯುತ್ತಿದ್ದರೆ ಮತ್ತೊಂದೆದೆ ಇಂತಹ ಸ್ಮಾರಕ ನಿರ್ಮಾಣಕ್ಕೆ ಅಗತ್ಯವಿರುವ ಕಟ್ಟಡ ನಿರ್ಮಾಣ ಸಾಮಗ್ರಿಗಳು, ಕಟ್ಟಡ ಕಟ್ಟಲು ಕಾರ್ಮಿಕರು ಎಲ್ಲವನ್ನೂ ಹೊಂಚುವುದು ಸುಲಭವಾಗಿರಲಿಲ್ಲ. ಇದೆಲ್ಲದರ ಮಧ್ಯೆ, ಈ ಕಾರ್ಯಕ್ಕೆ ತಡೆಯೊಡ್ಡಲು ಅಂದಿನ ಶಿಕ್ಷಣ ಮತ್ತು ಸಂಸ್ಕೃತಿ ಸಚಿವರಾಗಿದ್ದ ಹುಮಾಯೂನ್ ಕಬೀರ್ ಮತ್ತು ಮದ್ರಾಸ್ ರಾಜ್ಯದ ಮುಖ್ಯಮಂತ್ರಿ ಮಿಂಜೂರ್ ಭಕ್ತವತ್ಸಲಂ ನಾನಾರೀತಿಯ ರಾಜಕೀಯ ಒತ್ತಡಗಳನ್ನು ಹೇರುವುದರಲ್ಲಿ ಸಫಲವಾಗುತ್ತಿದ್ದಂತೆಯೇ ಸ್ಮಾರಕದ ನಿರ್ಮಾಣ ಕೊಂಚ ತಡವಾಗತೊಡಗಿತು. ಆಗ ಅಂದಿನ ಪ್ರಧಾನಿಗಳಾಗಿದ್ದ ಶ್ರೀ ಲಾಲ್ ಬಹದ್ದೂರ್ ಶಾಸ್ತ್ರಿಯವರ ಸಲಹೆಯಂತೆ ರಾನಡೆಯವರು, ಈ ಸ್ಮಾರಕ ನಿರ್ಮಾಣದ ಫಲವಾಗಿ ಸುಮಾರು 323 ಸಂಸತ್ ಸದಸ್ಯರ ಸಹಿಯನ್ನು ಸಂಗ್ರಹಿಸುವ ಹೊತ್ತಿಗೆ ಲಾಲ್ ಬಹದ್ದೂರು ವಿವಾದಾತ್ಮಕವಾಗಿ ನಿಧನರಾಗಿ, ಭಾರತದ ಪ್ರಧಾನ ಮಂತ್ರಿಯ ಸ್ಥಾನವನ್ನು ಶ್ರೀಮತಿ. ಇಂದಿರಾ ಗಾಂಧಿಯವರು ಅಲಂಕರಿಸಿದ್ದರು. ಪಕ್ಷಾತೀತವಾಗಿ ಇಷ್ಟೊಂದು ಸಾಂಸದರ ಬೆಂಬಲವಿದ್ದ ಯೋಜನೆಯನ್ನು ವಿಧಿ ಇಲ್ಲದೇ ಅನುಮೋದಿಸಲೇ ಬೇಕಾಯಿತು. ನಂತರ ಸ್ಮಾರಕದ ಕೆಲಸ ಚುರುಕುಗೊಂಡು ವಿವೇಕಾನಂದ ಶಿಲಾ ಸ್ಮಾರಕದ ನಿರ್ಮಾಣವು 1970 ರಲ್ಲಿ ಆರು ವರ್ಷಗಳ ಧಾಖಲೆಯ ಅವಧಿಯಲ್ಲಿ ಸುಮಾರು 650 ನುರಿತ ಕುಶಲಕರ್ಮಿಗಳು ಮತ್ತು ಕಾರ್ಮಿಕರ ಕಠಿಣ ಪರಿಶ್ರಮ, ಬದ್ಧತೆ ಮತ್ತು ಸಮರ್ಪಣೆಯ ಶ್ರಮದೊಂದಿಗೆ ಸಂಪೂರ್ಣವಾದಾಗ, ಅಂದಿನ ರಾಷ್ಟ್ರಪತಿಗಳಾಗಿದ್ದ ಶ್ರಿ ವಿ.ವಿ.ಗಿರಿ ಮತ್ತು ತಮಿಳುನಾಡಿನ ಮುಖ್ಯಮಂತ್ರಿಗಳಾಗಿದ್ದ ಶ್ರೀಕರುಣಾನಿಧಿಯವರ ಅಮೃತಹಸ್ತದಿಂದ 2 ನೇ ಸೆಪ್ಟೆಂಬರ್, 1970 ರಂದು ಲೋಕಾರ್ಪಣೆಗೊಂಡಾಗ ಇಡೀ ದೇಶವಾಸಿಗಳು ಸಂಭ್ರಮಗೊಂಡಿದ್ದರು.

ಈ ಭವ್ಯವಾದ ಸ್ಮಾರಕವು ಭಾರತದ ಸಾಂಪ್ರದಾಯಿಕ ಮತ್ತು ಆಧುನಿಕ ವಾಸ್ತುಶಿಲ್ಪ ಶೈಲಿಯ ಮಿಶ್ರಣವಾಗಿ ಅದರಲ್ಲೂ ವಿಶೇಷವಾಗಿ ತಮಿಳುನಾಡು ಮತ್ತು ಪಶ್ಚಿಮ ಬಂಗಾಳದ ವಾಸ್ತುಶಿಲ್ಪದ ಸಮ್ಮಿಳನವಾಗಿದೆ ಎನ್ನಬಹುದಾಗಿದೆ. ಸ್ಮಾರಕ ಮಂಟಪವು ಕೊಲ್ಕಾತ್ತಾದ ಬೇಲೂರಿನಲ್ಲಿರುವ ಶ್ರೀ ರಾಮಕೃಷ್ಣ ಮಠವನ್ನು ಹೋಲುತ್ತದೆ. ಇನ್ನು ಅದರ ಪ್ರವೇಶ ದ್ವಾರದ ವಿನ್ಯಾಸವು ಅಜಂತಾ ಮತ್ತು ಎಲ್ಲೋರ ವಾಸ್ತುಶಿಲ್ಪ ಶೈಲಿಗಳನ್ನು ಒಳಗೊಂಡಿದೆ. ಖ್ಯಾತ ಶಿಲ್ಪಿಗಳಾಗಿದ್ದ ಶ್ರೀ ಸೀತಾರಾಮ್ ಎಸ್. ಆರ್ಟೆಯವರ ನೇತೃತ್ವದಲ್ಲಿ ಅಲ್ಲಿನ ಪ್ರಮುಖ ಆಕರ್ಷಣೆಯಾದ, ಪರಿವ್ರಾಜಕ ಭಂಗಿಯಲ್ಲಿ ನಿಂತಿರುವ ಸ್ವಾಮಿ ವಿವೇಕಾನಂದರ ಜೀವಿತ ಗಾತ್ರದ ಕಂಚಿನ ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ. ದೇವಿ ಕನ್ಯಾ ಕುಮಾರಿಯ ಪವಿತ್ರ ಪಾದಗಳ ಸ್ಪರ್ಶವಾಗಿರುವ ಕಾರಣ ಈ ಬೃಹತ್ ಬಂಡೆಯನ್ನು ಶ್ರೀಪಾದ ಪರೈ ಎಂದೂ ಕರೆಯಲಾಗುತ್ತದೆ. ವಾಸ್ತವದಲ್ಲಿ ಅಲ್ಲಿರುವ ಕಲ್ಲಿನ ಬಣ್ಣವು ಕಂದು ಬಣ್ಣದಿಂದ ಕೂಡಿದ್ದು ಅದು ಮಾನವ ಹೆಜ್ಜೆಯ ಗುರುತಿನಂತೆ ಕಾಣುವುದರಿಂದ ಅದನ್ನು ಶ್ರೀ ಪಾದಂ ಎಂದು ಕರೆಯಲಾಗುತ್ತದೆ ಹಾಗಾಗಿ ಆ ಪವಿತ್ರ ಸ್ಥಳದಲ್ಲಿ ಶ್ರೀ ಪಾದಪರೈ ಮಂಟಪ’ ಎಂಬ ದೇವಾಲಯವನ್ನು ನಿರ್ಮಿಸಲಾಗಿದೆ.

ಸ್ಮಾರಕದೊಳಗೆ ಎರಡು ಪ್ರಮುಖ ರಚನೆಗಳಾಗಿ ವಿಭವಿಸಿದ್ದು, ಅದರಲ್ಲಿ ಮುಖ್ಯವಾಗಿ ಚೌಕಾಕಾರದಲ್ಲಿರುವ ಗರ್ಭ ಗ್ರಹದ ಒಳಪ್ರಾಕಾರ ಮತ್ತು ಹೊರಪ್ರಾಕಾರದ ಇರುವ ಶ್ರೀಪಾದ ಮಂಟಪವಾದರೆ, ಮತ್ತೊಂದು, ಸ್ವಾಮೀಜಿಯ ಗೌರವಾರ್ಥವಾಗಿ ನಿರ್ಮಿಸಲಾಗಿರುವ ವಿವೇಕಾನಂದ ಮಂಟಪವಾಗಿದೆ. ಈ ಮಂಟಪದಲ್ಲಿರುವ ಧ್ಯಾನ ಮಂಟಪ ಮತ್ತು ಸಭಾ ಮಂಟಪವನ್ನು ನಿರ್ಮಿಸಲಾಗಿದೆ. ಧ್ಯಾನ ಮಂದಿರದ ವಿನ್ಯಾಸವು ಭಾರತದ ದೇವಾಲಯದ ವಾಸ್ತುಶಿಲ್ಪದ ವಿವಿಧ ಶೈಲಿಗಳ ಸಮ್ಮೀಳಿತವಾಗಿದೆ. ಇಲ್ಲಿಗೆ ಬರುವ ಸಂದರ್ಶಕರಿಗೆ ಶಾಂತವಾಗಿ ಪ್ರಶಾಂತ ವಾತಾವರಣದಲ್ಲಿ ಕುಳಿತುಕೊಳ್ಳಲು, ವಿಶ್ರಾಂತಿ ಪಡೆಯಲು ಮತ್ತು ಧ್ಯಾನ ಮಾಡಲು ಅನುಕೂಲವಾಗುವಂತೆ 6 ಕೊಠಡಿಗಳನ್ನು ಹೊಂದಿದೆ. ಇನ್ನು ಸಭಾ ಮಂಟಪವು ಎಲ್ಲರೂ ಕುಳಿತು ಕೊಳ್ಳುವಂತಹ ವಿಶಾಲವಾಗಿದ್ದು, ಪ್ರತಿಮಾ ಮಂಟಪ ಎಂಬ ಪ್ರತಿಮೆ ವಿಭಾಗವನ್ನು ಒಳಗೊಂಡಿದ್ದು, ಸಭಾಂಗಣವನ್ನು ಒಳಗೊಂಡ ಕಾರಿಡಾರ್ ಮತ್ತು ಹೊರಗಿನ ಪ್ರಾಂಗಣವನ್ನು ಒಳಗೊಂಡಿದೆ. ಸ್ವಾಮಿಯವರ ಪ್ರತಿಮೆಯ ದೃಷ್ಟಿ ನೇರವಾಗಿ ಶ್ರೀಪಾದದ ಮೇಲೆ ಬೀಳುವ ರೀತಿಯಲ್ಲಿ ಪ್ರತಿಷ್ಠಾಪನೆ ಮಾಡಿರುವುದು ಗಮನಾರ್ಹವಾಗಿದ್ದು ಪ್ರತಿಯೊಬ್ಬ ಭಾರತೀಯರೂ ಖಂಡಿತವಾಗಿಯೂ ನೋಡಲೇ ಬೇಕಾದಂತಹ ಪ್ರೇಕ್ಷಣೀಯ ಮತ್ತು ಪುಣ್ಯಕ್ಷೇತ್ರವಾಗಿದೆ ಎಂದರೂ ಅತಿಶಯೋಕ್ತಿಯೇನಲ್ಲ.

ಖ್ಯಾತ ನಿರ್ದೇಶಕ ಶ್ರೀ ಪುಟ್ಟಣ್ಣ ಕಣಗಾಲ್ ಅವರ ನಿರ್ದೇಶನದ ಉಪಾಸನೆ ಚಿತ್ರದ ಹಾಡಿನಲ್ಲಿರುವ ಭಾರತ ಭೂಶಿರ ಮಂದಿರ ಸುಂದರಿ ಭುವನ ಮನೋಹರಿ ಕನ್ಯಾಕುಮಾರಿಯ ಈ ಬೃಹತ್ ಮತ್ತು ಭವ್ಯವಾದ ವಿವೇಕಾನಂದ ಶಿಲಾ ಸ್ಮಾರಕಕ್ಕೆ ಪ್ರತಿದಿನವೂ ಸಾವಿರಾರು ಪ್ರವಾಸಿಗರು ಇಲ್ಲಿನ ಸಮುದ್ರ ತೀರದಿಂದ ಸುಮಾರು ೨ ನಿಮಿಷದ ದೋಣಿಯ ಪ್ರಯಾಣದ ಮೂಲಕ ಇಲ್ಲಿಗೆ ಬಂದು ತಲುಪಬಹುದಾಗಿದೆ. ಈ ಸ್ಮಾರಕವು ವರ್ಷವಿಡೀ ಬೆಳಿಗ್ಗೆ 7.00 ರಿಂದ ಸಂಜೆ 5.00 ರವರೆಗೆ ಸಂದರ್ಶಕರ ಭೇಟಿಗೆ ಅವಕಾಶವಿದ್ದು ಇದಕ್ಕೆ ಅತ್ಯಲ್ಪ ಪ್ರವೇಶ ಶುಲ್ಕವಾದ ರೂ. 10/-ನ್ನು ನಿಗಧಿಪಡಿಸಿದ್ದು ಇನ್ನು ಕ್ಯಾಮೆರಾ ಬಳಸುವುದಕ್ಕೆ ರೂ. 10/- ಮತ್ತು ವಿಡಿಯೋ ಚಿತ್ರೀಕರಣಕ್ಕೆ ರೂ. 50/- ಪಾವತಿಸಬೇಕಾಗುತ್ತದೆ.

ಭಾರತದ ತುತ್ತ ತುದಿಯ ಪ್ರದೇಶವಾದ ಕನ್ಯಾಕುಮಾರಿಗೆ ದಕ್ಷಿಣ ಭಾರತದ ಎಲ್ಲಾ ಪ್ರಮುಖ ನಗರಗಳಿಂದಲು ಬಸ್ ಮತ್ತು ರೈಲು ಸಂಪರ್ಕವನ್ನು ಹೊಂದಿದೆ. ಇನ್ನು ವಿಮಾನದ ಮೂಲಕ ಇಲ್ಲಿಗೆ ಬರಲು ಇಚ್ಚಿಸುವರು ಕನ್ಯಾಕುಮಾರಿಯಿಂದ ಕೇವಲ 67 ಕಿಮೀ ದೂರದಲ್ಲಿರುವ ತಿರುವನಂತಪುರ ವಿಮಾನ ನಿಲ್ದಾಣಕ್ಕೆ ಬಂದು ಅಲ್ಲಿಂದ ಬಸ್ ಇಲ್ಲವೇ ಖಾಸಗೀ ವಾಹನಗಳ ಮೂಲಕ ತಲುಪಬಹುದಾಗಿದೆ.

ಇಷ್ಟೆಲ್ಲಾ ವಿವರಗಳನ್ನು ತಿಳಿದುಕೊಂಡ ಮೇಲೆ ಇನ್ನೇಕೆ ತಡಾ, ಸಮಯ ಮಾಡಿಕೊಂಡು ನಮ್ಮ ರಾಷ್ಟ್ರೀಯ ಸ್ಮಾರಕಗಳಲ್ಲಿ ಒಂದಾದ ಕನ್ಯಾಕುಮಾರಿಯ ವಿವೇಕಾನಂದ ಸ್ಮಾರಕವನ್ನು ನೋಡಿಕೊಂಡು ದೇಶಭಕ್ತಿಯ ಸ್ವಾಭಿಮಾನವನ್ನು ತುಂಬಿಕೊಳ್ಳೋಣ ಅಲ್ವೇ?

ಏನಂತೀರಿ?
ನಿಮ್ಮವನೇ ಉಮಾಸುತ

ಸಂಪಮಾಸ ಪತ್ರಿಕೆಯ ಸೆಪ್ಟೆಂಬರ್ ತಿಂಗಳಲ್ಲಿ ಈ ಲೇಖನ ಪ್ರಕಟವಾಗಿದೆ.