ತಿರುಪತಿ ಹಿಂದೂಗಳ ಶ್ರದ್ಧಾ ಕೇಂದ್ರವೋ?  ಇಲ್ಲವೇ ವ್ಯಾಪಾರೀ ತಾಣವೋ?

ದೇವಸ್ಥಾನ ಅಥವಾ ದೇವಾಲಯ ಎಂದರೆ ಧಾರ್ಮಿಕ ಮತ್ತು ಅಧ್ಯಾತ್ಮಿಕ ಚಟುವಟಿಕೆಗಳಿಗೆ ಮೀಸಲಾಗಿರುವ ಸ್ಥಳವಾಗಿದ್ದು ಅಲ್ಲಿ ನಮ್ಮ ಸನಾತನ ಧರ್ಮದ  ಆಧಾರದಲ್ಲಿ ಪೂಜೆ ಪುನಸ್ಕಾರಗಳು ನಡೆಯುವ ಮೂಲಕ ಶ್ರದ್ಧಾ ಕೇಂದ್ರಗಳಾಗಿವೆ. ಭಕ್ತಾದಿಗಳು ದೇವಾಲಯಕ್ಕೆ ಹೋಗಿ ತಮ್ಮ ಶಕ್ತ್ಯಾನುಸಾರ ದೇವರನ್ನು ಪೂಜಿಸಿ ನೈವೇದ್ಯವನ್ನು ಅರ್ಪಿಸಿ ಯಥಾ ಶಕ್ತಿ ಕಾಣಿಕೆಯನ್ನು ಅರ್ಪಿಸಿ ಬರುತ್ತಾರೆ. ಇನ್ನು ದೇವಾಲಯಗಳೂ ಸಹಾ ಭಕ್ತರಿಂದ ಆ ರೀತಿಯಾಗಿ ಪಡೆದ ದೇಣಿಗೆಯಿಂದ ಭಕ್ತಾದಿಗಳಿಗೆ ದಿನ ನಿತ್ಯವೂ ದಾಸೋಹ ನಡೆಸುವುದಲ್ಲದೇ, ಲೋಕ ಕಲ್ಯಾಣಕ್ಕಾಗಿ ವಿವಿಧ ರೀತಿಯ ಹೋಮ ಹವನಗಳನ್ನು ನಡೆಸುತ್ತಾ, ವಸುದೈವ ಕುಟುಂಬಕಂ ಎಂಬ ತತ್ವದಡಿಯಲ್ಲಿ, ಸರ್ವೇ ಜನಾಃ ಸುಖಿನೋ ಭವಂತು. ಲೋಕಾಃ ಸಮಸ್ತಾಃ ಸನ್ಮಂಗಳಾನಿ ಭವಂತು ಎಂದು ಎಲ್ಲರಿಗೂ ಹಾರೈಸುತ್ತವೆ.

t5ಅದೇ ರೀತಿಯಲ್ಲೇ ಧರ್ಮ ಸ್ಥಾಪನೆಗಾಗಿ, ಭಕ್ತರ ಒಳಿತಿಗಾಗಿ ತಿರುಪತಿಯಲ್ಲಿ ವೆಂಕಟರಮಣ ಸ್ವಾಮಿ ಸಾವಿರಾರು ವರ್ಷಗಳಿಂದಲೂ ನೆಲೆಸಿದ್ದು ದೇಶ ವಿದೇಶಗಳಿಂದಲೂ ಲಕ್ಷಾಂತರ ಭಕ್ತಾದಿಗಳು ತಿಮ್ಮಪ್ಪನ ದರ್ಶನಕ್ಕಾಗಿ ಬರುವುದಲ್ಲದೇ ತಮ್ಮ ಮನೋಭಿಷ್ಟಗಳನ್ನು ಈಡೇರಲೆಂದು ವಿವಿಧ ಸೇವೆಗಳನ್ನು ಮಾಡಿಸುವುದಲ್ಲದೇ ಯಥಾಶಕ್ತಿ ದೇವರ ಹುಂಡಿಗೆ ಧನಕನಕಗಳನ್ನು ಅರ್ಪಿಸಿಸುತ್ತಾರೆ. ಹಾಗಾಗಿಯೇ ತಿರುಪತಿಯ ದೇವಾಲಯ ನಮ್ಮ ದೇಶದ ಅತ್ಯಂತ ಶ್ರೀಮಂತ ದೇವಾಲಯಗಳಲ್ಲಿ ಒಂದಾಗಿದೆ. 

kuberaಇನ್ನು ಭಕ್ತಾದಿಗಳು ತಿರುಪತಿಯ ಹುಂಡಿಗೆ ಯಥಾ ಶಕ್ತಿ ಧನಕನಕಗಳನ್ನು ಹಾಕುವ ಹಿಂದೆಯೋ ರೋಚಕವಾದ ಪೌರಾಣಿಕ ಕಥೆಯಿದೆ. ತ್ರೇತಾಯುಗದಲ್ಲಿ ಭಗವಾನ್ ಶ್ರೀನಿವಾಸನು ತಾಯಿ ಪದ್ಯಾವತಿಯನ್ನು ಮದುವೆಯಾಗಲು ಬಯಸಿದಾಗ ಆತನ ಬಳಿ ವಿವಾಹವಾಗಲು ಹಣವಿರಲಿಲ್ಲವಂತೆ. ಆಗ ಶ್ರೀನಿವಾಸನು ದೇವಲೋಕದ ಧನಿಕನಾದ ಕುಬೇರನ ಬಳಿ, ವೈಶಾಖಮಾಸದ, ಶುಕ್ಲಪಕ್ಷದ, ಸಪ್ತಮಿ ದಿನದಂದು, 14 ಲಕ್ಷ ಸುವರ್ಣ ವರಹಗಳನ್ನು ಸಾಲ ರೂಪದಲ್ಲಿ ಪಡೆದು, ವಿವಾಹವಾಗಿ ಸಾವಿರ ವರ್ಷಗಳ ಒಳಗಾಗಿ ಹದಿನಾಲ್ಕು ಲಕ್ಷ ವರಹಗಳ ಸಾಲವನ್ನು ಬಡ್ಡಿಯ ಸಮೇತ ತೀರಿಸುವುದಾಗಿ ಪಡೆದುಕೊಂಡಿರುತ್ತಾನೆ. ಶ್ರೀನಿವಾಸ ಪದ್ಮಾವತಿಯ ಮದುವೆಯಾಗಿ ಸಾವಿರಾರು ವರ್ಷಗಳು ಕಳೆದರೂ ಇನ್ನೂ ಕುಬೇರನ ಸಾಲವನ್ನು ಶ್ರೀನಿವಾಸನು ತೀರಿಸದಿರುವ ಕಾರಣ, ತಿಮ್ಮಪ್ಪನ ಹುಂಡಿಗೆ ಭಕ್ತಾದಿಗಳು ಯಥಾಶಕ್ತಿ ಕಾಣಿಕೆಯನ್ನು ಹಾಕುವ ಮೂಲಕ ಶ್ರೀನಿವಾಸನನ್ನು ಋಣಮುಕ್ತ ಮಾಡುವ ಅಚರಣೆ ರೂಡಿಯಲ್ಲಿದೆ.

promicery_noteಶ್ರೀನಿವಾಸರು ಕುಬೇರನಿಂದ ತನ್ನ ವಿವಾಹಕ್ಕಾಗಿ ಬ್ರಹ್ಮದೇವರ ಸಮಕ್ಷಮ ಮತ್ತು ಸಾಕ್ಷಿಯಲ್ಲಿ ಭಗವಾನ್ ರಾಮ ಮುದ್ರೆಯಿರುವ ಚಿನ್ನದ ನಾಣ್ಯಗಳನ್ನು ಸಾಲವಾಗಿ ಪಡೆದು ಕೊಂಡ ಪುರಾವೆಯಾಗಿ ಈ ಲೋಹದ ಶಾಸನವು ಇಂದಿಗೂ ತಿರುಪತಿ ದೇವಾಲಯದಲ್ಲಿ ಇದೆ ಎಂದು ಬಲ್ಲ ಮೂಲಗಳಿಂದ ತಿಳಿದು ಬಂದಿದೆ

t2ಸಾಮಾನ್ಯ ದಿನಗಳಲ್ಲಿ ಸರ್ವ ದರ್ಶನಕ್ಕೆ 18 ಗಂಟೆಗಳು ಮತ್ತು ವಿಶೇಷ ಹಬ್ಬ ಹರಿದಿನಗಳಲ್ಲಿ 20 ಗಂಟೆಗಳ ಕಾಲ ದೇವರ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಗುತ್ತದೆ. ಭಕ್ತಾದಿಗಳು ತಮ್ಮ ಅನುಕೂಲದಂತೆ  ಈ ಸಮಯದಲ್ಲಿ ನಡೆಯುವ ವಿವಿಧ ಸೇವೆಗಳಿಗೆ ಸೇವಾಶುಲ್ಕ ಕಟ್ಟಿ ಸರತಿ ಸಾಲಿನಲ್ಲಿ ನಿಂತು ಸ್ವಾಮಿಯ ದರ್ಶನದ ಪಡೆದು ಸ್ವಾಮಿಯ ಕೃಪಾಶೀರ್ವಾವಾದ ಪಡೆಯುವುದು ಅನೂಚಾನಾಗಿ ನಡೆದುಕೊಂಡು ಬಂದಿರುವ ಪದ್ಧತಿಯಾಗಿದೆ.

ದುರಾದೃಷ್ಟವಷಾತ್  ಅಂಧ್ರಪ್ರದೇಶದ ಸರ್ಕಾರ ಮತ್ತು ತಿರುಪತಿ ದೇವಾಲಯದ ಆಡಳಿತ ಮಂಡಳಿ ಅದೊಂದು ಧಾರ್ಮಿಕ ಶ್ರದ್ಧಾ ಕೇಂದ್ರ ಎಂಬುದನ್ನು ಮರೆತು ಜನ ಮರುಳೋ ಜಾತ್ರೆ ಮರುಳೋ ಎನ್ನುವಂತೆ ದೇವಾಲಯವನ್ನು ವ್ಯಾಪಾರಿತಾಣವಾಗಿ ಪರಿವರ್ತಿಸಿ, ಭಕ್ತಾದಿಗಳು ಹುಂಡಿಗೆ ಹಾಕುವ ಹಣವನ್ನು ಚಿನ್ನದ ಮೊಟ್ಟೆ ಇಡುವ ಕೋಳಿ ಎಂದು ಭಾವಿಸಿ, ದೇವಾಲಯದ ವಿವಿಧ ಸೇವಾ ಶುಲ್ಕವನ್ನು ಏಕಾಏಕಿ ಹೆಚ್ಚಿಸುವ ಮೂಲಕ ದೇವಾಲಯವನ್ನು ಆದಾಯದ ಕೇಂದ್ರವನ್ನಾಗಿಸಿ ಮಾಡಿರುವುದು ನಿಜಕ್ಕೂ ಕಳವಳಕಾರಿಯಾಗಿದೆ.

t3ನಿಜ ಹೇಳ ಬೇಕೆಂದರೆ, ಕಳೆದ ಮೂರ್ನಾಲ್ಕು ದಶಕಗಳಲ್ಲಿ ಆಂಧ್ರ ಪ್ರದೇಶದಲ್ಲಿ ಭಾರೀ ಪ್ರಮಾಣದ ಆಮಿಷದ ಮತಾಂತರವಾಗುತ್ತಿದ್ದು ದಿನೇ ದಿನೇ ಹೆಸರಿಗಷ್ಟೇ  ಹಿಂದೂಗಳಾಗಿದ್ದು ಅವರ ಆಚಾರ ವಿಚಾರಗಳಲ್ಲಿ ಕ್ರೈಸ್ತರಾಗಿ ಹೋಗಿರುವುದಕ್ಕೆ ಮಾಜೀ ಮುಖ್ಯಮಂತ್ರಿ ದಿವಂಗತ ವೈ ಎಸ್ ರಾಜಶೇಖರ್ ರೆಡ್ಡಿ ಮತ್ತು ಪ್ರಸ್ತುತ ಮುಖ್ಯಮಂತ್ರಿ ಜಗನ್ ಮೋಹನ್ ರೆಡ್ಡಿಯವರೇ ಸಾಕ್ಷಿ. ವೈ.ಎಸ್.ಆರ್ ರೆಡ್ಡಿ ಮುಖ್ಯಮಂತ್ರಿಯದ ಮೇಲಂತೂ ತಿರುಪತಿಯ ತಿರುಮಲ ದೇವಾಲಯದ ಅಡಳಿತ ಮಂಡಳಿ ಮತ್ತು  ಕೆಲಸಗಾರರಲ್ಲಿ ಹಿಂದೂಯೇತರರು ಇರಬಾರದೆಂಬ ನಿಯಮಗಳನ್ನೆಲ್ಲಾ ಗಾಳಿಗೆ ತೂರಿ ಆಯಕಟ್ಟಿನ ಜಾಗಗಳಲ್ಲಿ ತಮ್ಮ ಸಂಬಂಧೀಕರನ್ನೇ ನೇಮಕ ಮಾಡುವ ಮೂಲಕ ದೇವಾಲಯದಲ್ಲಿ  ಅರ್ಥಿಕ ಅವ್ಯವಸ್ಥೆಗಳಿಗೆ ಕಾರಣವಾಗಿದ್ದಲ್ಲದೇ ತಿರುಪತಿಯ ಸಪ್ತಗಿರಿಗಳಲ್ಲೇ  ಭಾರೀ ದೊಡ್ಡದಾದ ಚರ್ಚ್ ಕಟ್ಟಿದ್ದರೂ ಯಾವುದೇ ಕ್ರಮ ಕೈಗೊಳ್ಳದೇ ಹೋಗಿರುವುದು ನಿಜಕ್ಕೂ ವಿಪರ್ಯಾಸವಾಗಿದೆ.

ತಮ್ಮ ರಾಜಕೀಯದ ತೆವಲುಗಳಿಗಾಗಿ ವಿವಿಧ ರೀತಿಯ ಆಮಿಷಗಳು,  ಉಚಿತ ಭಾಗ್ಯಗಳನ್ನು ಜನರಿಗೆ  ಕೊಡುವ ಮೂಲಕ ಆಂಧ್ರ ಪ್ರದೇಶದ ಸರ್ಕಾರೀ ಖಜಾನೆಯನ್ನು ಬರಿದು ಮಾಡಿ ಸರ್ಕಾರವನ್ನು ನಡೆಸಲು ಹಣವಿಲ್ಲದೇ ತಿರುಪತಿ ದೇವಸ್ಥಾನಗಳ ಆಸ್ತಿಯನ್ನು ಹರಾಜು ಮಾಡುವಷ್ಟರ ಮಟ್ಟಿಗೆ ದಿವಾಳಿಯಾಗಿದೆ. ಇದಕ್ಕೆ ಭಕ್ತರು ಮತ್ತು ನ್ಯಾಯಾಲಯವೂ ವಿರೋಧ ವ್ಯಕ್ತಪಡಿಸಿದ ಕಾರಣ, ಸದ್ಯಕ್ಕೆ ಆದನ್ನು ಕೈ ಬಿಟ್ಟ ಸರ್ಕಾರ, ಪರೋಕ್ಷವಾಗಿ ದೇವಾಲಯದ ಸೇವಾಶುಲ್ಕವನ್ನು ಹೆಚ್ಚಿಸಲು ಹೊರಟಿರುವುದು ಅಕ್ಷಮ್ಯ  ಅಪರಾಧವೆಂದರೂ ತಪ್ಪಾಗದು.

ಕಳೆದ ವಾರ ಫೆ. 17ರಂದು  ಟಿಟಿಡಿ ಟ್ರಸ್ಟ್‌ ಸಭೆಯಲ್ಲಿ ವಿವೇಚನಾ ಕೋಟಾಕ್ಕೆ ಸಂಬಂಧಿಸಿದ ಸೇವೆಗಳ ದರದಲ್ಲಿ ಬದಲಾವಣೆ ಮಾಡುವ ಪ್ರಸ್ತಾಪನೆಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು ಈ ಹಿಂದಿದ್ದ ಸೇವಾ ಶುಲ್ಕವನ್ನು ಅವೈಜ್ಞಾನಿಕವಾಗಿ ಯದ್ವಾ ತದ್ವಾ ಈ ರೀತಿಯಲ್ಲಿ ಏರಿಸಲಾಗಿದೆ.

ಸೇವೆಗಳು

ಹಾಲಿ ದರ 

ಉದ್ದೇಶಿತ ದರ ₹

ಸುಪ್ರಭಾತ ಸೇವೆ 240 2000
ತೋಮಲ ಸೇವೆ ಮತ್ತು ಅರ್ಚನೆ 440 5000
ಕಲ್ಯಾಣೋತ್ಸವ 1000 2500
ವೇದಾಶೀರ್ವಾದ 3000 10000
ವಸ್ತ್ರಾಲಂಕಾರ 50000 100000

t4ಸುಪ್ರಭಾತ ಸೇವೆಯನ್ನು ₹ 120 ರಿಂದ ₹ 1000 ಕ್ಕೆ ಹೆಚ್ಚಿಸುವಂತೆ ಕೆಲವರು ಪ್ರಸ್ತಾಪಿಸಿದಾಗ, ದೇವಾಲಯದ ಆಡಳಿತ ಮಂಡಳಿಯ ಅಧ್ಯಕ್ಷರು, ತರಕಾರಿ ಮಂಡಿಯಲ್ಲಿ ಹರಾಜು ಹಾಕುವಂತೆಯೋ ಇಲ್ಲವೇ ಕುರಿ ವ್ಯಾಪಾರ ಮಾಡುವಂತೆಯೋ, ಹೇ ಅದನ್ನು ₹2000ಕ್ಕೆ ಹೆಚ್ಚಿಸಿದರೆ ಏನಾಗುತ್ತದೆ? ಎಂಬ ರೀತಿಯ ಪ್ರಶ್ನೆ ಕೇಳುತ್ತಾರೆ ಎಂದರೆ ಅವರ ದೃಷ್ಟಿಯಲ್ಲಿ ಅವರ  ದೇವಾಲಯ ಧಾರ್ಮಿಕ ಕೇಂದ್ರ ಎನ್ನುವುದಕ್ಕಿಂತಲೂ ವ್ಯಾಪಾರ ಕೇಂದ್ರ ಎಂದು ಭಾವಿಸಿರುವುದು ಸ್ಪಷ್ಟವಾಗಿ ತಿಳಿಯುತ್ತದೆ. ಈ ರೀತಿ ತಿರುಮಲದಲ್ಲಿರುವ ವೆಂಕಟೇಶ್ವರ ದೇಗುಲದಲ್ಲಿನ ಆರ್ಜಿತ ಸೇವೆಗಳ ಶುಲ್ಕಗಳಲ್ಲಿ ಗಣನೀಯವಾಗಿ ಪರಿಷ್ಕರಣೆ ಮಾಡುವುದರಿಂದ ವಿವೇಚನಾ ಕೋಟಾದ ಮೇಲೆ ಇರುವ ಒತ್ತಡ ತಗ್ಗಿಸಲು ಪ್ರಯತ್ನ ಮಾಡಲಾಗುತ್ತಿದೆ ಹೊರತು  ಇದರಿಂದ ಸಾಮಾನ್ಯ ಭಕ್ತರಿಗೆ ತೊಂದರೆಯಾಗದು  ಎಂದು ಜನರನ್ನು ದಿಕ್ಕು ತಪ್ಪಿಸುವ ಪ್ರಯತ್ನ ಮಾಡಲಾಗಿತ್ತಿದೆ.

ladduಇನ್ನು ತಿರುಪತಿಯ ತಿಮ್ಮಪ್ಪನಂತೆಯೇ, ತಿರುಪತಿ ದೇವಾಲಯದ  ಪ್ರಸಾದವಾದ ಲಾಡು ಎಂದರೆ ಎಲ್ಲರಿಗೂ ಅಚ್ಚು ಮೆಚ್ಚು. ತಿರುಪತಿಗೆ ಯಾರೇ ಹೋಗುತ್ತೇವೆ ಎಂದರು ಬಹುತೇಕರು ಅವರ ಕೈಯ್ಯಲ್ಲಿ ಹುಂಡಿಗೆ ಹಾಕಲು ಯಥಾಶಕ್ತಿ ಕಾಣಿಕೆಯನ್ನು ನೀಡುವುದಲ್ಲದೇ, ಬಂದ ನಂತರ ನಮಗೂ ಪ್ರಸಾದ ತನ್ನಿ ಎಂದು ಲಡ್ಡು ತರಲು  ಹಲವರು ಹಣ ಕೊಡುವುದು ವಾಡಿಕೆಯಾಗಿದೆ.  ತಿರುಪತಿ ಲಡ್ಡುವಿಗೆ ಇರುವ ಅಪಾರವಾದ ಬೇಡಿಕೆಯಿಂದಾಗಿ ಟಿಟಿಡಿಯು ಸಹಾ ನರೆರಾಜ್ಯದ ಪ್ರಮುಖ ಪಟ್ಟಣಗಲಲ್ಲಿ ತಿಮ್ಮಪ್ಪನ ದೇವಸ್ಥಾನವನ್ನು ಕಟ್ಟಿಸಿ ಅಲ್ಲಿಯೂ ತಿರುಪತಿ ಪ್ರಸಾದ ಲಭ್ಯವಾಗುವಂತೆ ಮಾಡಿರುವುದು ನಿಜಕ್ಕೂ ಅಭಿನಂದನಾರ್ಹವಾಗಿದೆ. ಅದೇ ರೀತಿಯಾಗಿ ಕೊರೊನಾ ಸಮಯದಲ್ಲಿ ಆನ್​ಲೈನ್​ ಮೂಲಕ   ಅರ್ಚನೆ, ಅಭಿಷೇಕ ಮುಂತಾದ ರೀತಿಯ ಸೇವೆಯನ್ನು ಮಾಡಿಸಿದವರಿಗೆ ಅಂಚೆಯ ಮೂಲಕವೂ  ಪ್ರಸಾದವನ್ನು ಕಳುಹಿಸಲಾಗುತ್ತಿದೆ.  ಈ ರೀತಿಯಾಗಿ ಬಹಳ ವಿಶೇಷವಾದ ರುಚಿ ಹೊಂದಿರುವ ತಿರುಪತಿಯ ಪ್ರಸಾದದ ಬೆಲೆಯನ್ನು ಸದ್ದಿಲ್ಲದೇ ಏರಿಕೆ ಮಾಡಿದ್ದಾರೆ.  ನೇರವಾಗಿ  ಲಡ್ಡುವಿನ ಪ್ರಸಾದ ಬೆಲೆಯನ್ನು ಏರಿಕೆ ಮಾಡಿಲ್ಲವಾದರೂ, ಕೇವಲ 100 ರೂಪಾಯಿ ಇದ್ದ ಜಿಲೇಬಿ ಪ್ರಸಾದದ ಬೆಲೆಯನ್ನು ಈಗ 500 ರೂಪಾಯಿಗೆ ಏರಿಸಿದೆ.

ಟಿಟಿಡಿ ಆಡಳಿತದ ಉನ್ನತಾಧಿಕಾರಿಗಳು ಟ್ರಸ್ಟ್ ಬೋರ್ಡ್‌ಗೆ ಪ್ರಸ್ತುತ 100 ರೂ.ಗೆ ಮಾರಾಟವಾಗುತ್ತಿರುವ ಜಿಲೇಬಿ ಮತ್ತು ಥೆಂಥೋಲವನ್ನು 2000 ರೂ.ಗೆ ಮಾರುವಂತೆ ಪ್ರಸ್ತಾಪವಿರಿಸಿದ್ದರು. ನಿಜ ಹೇಳಬೇಕೆಂದರೆ,  ಜಿಲೇಬಿ ಮತ್ತು ಥೆಂಥೋಲ ಸೆಟ್ ತಯಾರಿಸಲು ಟಿಟಿಡಿಗೆ ಆಗುವ ವೆಚ್ಚ ಕೇವಲ 147.50 ರೂ. ಆಗಿದ್ದು ಅದನ್ನು ಶೇಕಡಾ 239ರಷ್ಟು ಹೆಚ್ಚುವರಿ ಮಾಡಿ ಪ್ರಸಾದದಲ್ಲೂ ಲಾಭವನ್ನು ನಿರೀಕ್ಷೆ ಮಾಡುತ್ತಿರುವುದು ನಿಜಕ್ಕೂ ದುಃಖಕರವಾಗಿದೆ.

ಹಿಂದೂ ಭಕ್ತರಿಂದ ಈ ರೀತಿಯಾಗಿ ಲೂಟಿ ಮಾಡಿದ ಹಣವನ್ನು ಕ್ರೈಸ್ತ ಮತಾಂತರಕ್ಕೆ ಬಳಸಿಕೊಳ್ಳುವುದರ ಜೊತೆಗೆ ತಮ್ಮ ರಾಜಕೀಯದ ತೆವಲುಗಳಿಗೆ ಬಳಸಿಕೊಳ್ಳಲು ಮುಂದಾಗಿರುವ ಈ ಸರ್ಕಾರದ ಈ ನಿರ್ಧಾರವನ್ನು ಎಲ್ಲರೂ ಒಕ್ಕೊರಲಿನಿಂದ ಪ್ರತಿಭಟನೆ ಮಾಡುವುದಲ್ಲದೇ, ತಿರುಪತಿ ಹುಂಡಿಗೆ ಹಾಕುವ ಹಣವನ್ನು ತಮ್ಮ ಊರಿನಲ್ಲೇ ಇರುವ ದೇವಾಲಯದ ಜೀರ್ಣೋದ್ಧಾರಕ್ಕಾಗಲೀ ಇಲ್ಲವೇ,  ನಮ್ಮ ಪ್ರದೇಶದ ಸುತ್ತ ಮುತ್ತಲೂ ನಡೆಯುವ ಧಾರ್ಮಿಕ ಚಟುವಟಿಕೆಗಳು ಮತ್ತು ಹಿಂದೂಗಳ ಸಂರಕ್ಷಣೆಗಾಗಿ ಸದ್ಬಳಕೆ ಮಾಡುವ ಮೂಲಕ ಸದ್ದಿಲ್ಲದೇ ದೇವಾಲಯದ ಆದಾಯವನ್ನು ಕಡಿಮೆ ಮಾಡುವ ಮೂಲಕ  ಈ ಹಿಂದೂ ವಿರೋಧಿ ಸರ್ಕಾರಕ್ಕೆ ತಕ್ಕ ಪಾಠವನ್ನು ಕಲಿಸಬಹುದಾಗಿದೆ ಅಲ್ಲವೇ?

ಒಂದು ಗೆರೆಯನ್ನು ಮುಟ್ಟದೇ ಸಣ್ಣದಾಗಿ ಮಾಡ ಬೇಕೆಂದರೆ, ಅದರ  ಪಕ್ಕದಲ್ಲಿ ಒಂದು ದೊಡ್ಡದಾದ ಗೆರೆಯನ್ನು ಎಳೆಯುವ ಮೂಲಕ ಸಣ್ಣ ಮಾಡುವಂತೆ, ಯಾವುದೇ ರೀತಿಯ ಹಾರಾಟ, ಚೀರಾಟ,  ಹೋರಾಟ,  ಪ್ರತಿಭಟನೆಗಳು ಇಲ್ಲದೇ ಸದ್ದಿಲ್ಲದೇ ಆರ್ಥಿಕ ದಿಗ್ಭಂಧನ ಹೇರುವ ಮೂಲಕ ಸರಿದಾರಿಗೆ ತರಬಹುದಾಗಿದೆ ಅಲ್ಲದೇ, ಈಗಾಗಲೇ ನ್ಯಾಯಾಲಯದಲ್ಲಿ ತೀರ್ಪಿತ್ತಿರುವಂತೆ, ದೇವಾಲಯದ ಆಡಳಿತವನ್ನು ಸರ್ಕಾರ ಕೈಯಿಂದ ಸ್ಥಳೀಯ ಆಡಳಿತ ಮಂಡಳಿಗೆ ವರ್ಗಾಯಿಸಿ ದೇವಾಲಯದಲ್ಲಿ ಸಂಗ್ರಹವಾದ ಹಣವನ್ನು ಅಲ್ಲೇ ಡ್ರಾ  ಅಲ್ಲೇ ಬಹುಮಾನ ಎನ್ನುವಂತೆ  ಅದೇ ದೇವಾಲಯದ ಜೀರ್ಣೋದ್ಧಾರ ಮತ್ತು ವಿವಿಧ ಹಿಂದೂ ಧಾರ್ಮಿಕ ಕಾರ್ಯಗಳಿಗೆ ಬಳಸಿಕೊಳ್ಳುವ ಸಮಯ ಬಂದಿದೆ. ಒಗ್ಗಟ್ಟಿನಲ್ಲಿ ಬಲವಿದೆ ಮತ್ತು ಗೆಲ್ಲುವ ಛಲವಿದೆ ಅಲ್ವೇ?

ತಿರುಪತಿ ತಿಮ್ಮಪ್ಪನನ್ನು ಋಣಮುಕ್ತನಾಗಿ ಮಾಡುವ ಸಲುವಾಗಿ ಭಕ್ತಾದಿಗಳು ಹುಂಡಿಗೆ ಹಾಕುವ ಹಣವನ್ನು ಈ ಭ್ರಷ್ಟ ಹಿಂದೂ ವಿರೋಧಿಗಳು ಈ ರೀತಿಯಾಗಿ ಧರ್ಮವಿರೋಧಿ ಕಾರ್ಯಗಳಿಗೆ ಮತ್ತು ತಮ್ಮ ಖಜಾನೆಯನ್ನು ತಂಬಿಕೊಳ್ಳಲು ದುರ್ಬಳಕೆ ಮಾಡಿ ಕೊಳ್ಳುತ್ತಿರುವುದು ಧರ್ಮದ್ರೋಹವೇ ಸರಿ.

ಏನಂತೀರೀ?
ನಿಮ್ಮವನೇ ಉಮಾಸುತ

ಮಾಸ ಶಿವರಾತ್ರಿ

ನಮಗೆಲ್ಲಾ ತಿಳಿದಿರುವಂತೆ  ಫೆಬ್ರುವರಿ ಅಥವಾ ಮಾರ್ಚ್ ತಿಂಗಳಿನಲ್ಲಿ  ಮಾಗಿಯ ಚಳಿಯ ಇನ್ನೂ ಹೋಗದೇ ಇದ್ದಾಗ,  ಶಿಶಿರ ಋತುವಿನ ಮಾಘ ಮಾಸದ ಬಹುಳ ಚತುರ್ದಶಿಯಂದು ಶಿವರಾತ್ರಿ ಹಬ್ಬ ಕಳೆದ ಕೂಡಲೇ ಚಳಿ ಎಲ್ಲವೂ ಮಂಗಮಾಯ ಎಂದು ಮಾತನಾಡುವುದನ್ನುಕೇಳಿದ್ದೇವೆ. ಶಿವರಾತ್ರಿ ಹಬ್ಬದ  ದಿನವಿಡೀ ಉಪವಾಸ ಮಾಡಿ ರಾತ್ರಿ  ಜಾಗರಣೆಗಳನ್ನು ಮಾಡಿ,೪ ಯಾಮಗಳಲ್ಲೂ ಶಿವ ಪೂಜೆಯನ್ನು ಮಾಡುವ ಮೂಲಕ ಭಗವಾನ್ ಶಂಕರನನ್ನು  ಪ್ರಾರ್ಥಿಸಿ ಮಾರನೇಯ ದಿನ  ದಿನ ವಿವಿಧ ರೀತಿಯ ಭಕ್ಷ ಭೋಜನಗಗಳನ್ನು ತಯಾರಿಸಿ  ಭಗವಂತನಿಗೆ ನೈವೇದ್ಯ ಮಾದಿ ಹಂಚಿ ತಿನ್ನುವ ರೂಢಿಯಿದೆ. ಶಿವರಾತ್ರಿಯಂದ ತನ್ನನ್ನು ಭಕ್ತಿಯಿಂದ ಪೂಜಿಸಿದ  ಭಕ್ತರ ಸಕಲ ಇಷ್ಟಾರ್ಥಗಳನ್ನೂ ಆ ದಯಾಮಯಿ ಶಿವನು ಪೂರೈಸುತ್ತಾನೆ ಎನ್ನುವುದು ಭಕ್ತರ ನಂಬಿಕೆಯಾಗಿದೆ.

WhatsApp Image 2022-01-01 at 6.24.20 PMಕೇವಲ ಶಿವರಾತ್ರಿಯಲ್ಲದೇ, ಪ್ರತೀ ತಿಂಗಳು, ಕೃಷ್ಣ ಪಕ್ಷದ  14 ನೇ ದಿನ ಅರ್ಥಾತ್ ಕೃಷ್ಣ ಪಕ್ಷದ ಚತುರ್ದಶಿ ತಿಥಿಯಂದು ಮಾಸಿಕ ಶಿವರಾತ್ರಿಯನ್ನು  ಆಚರಿಸುವ ಸಂಪ್ರದಾಯವಿದೆ.  ಶಿವ ಮತ್ತು ಶಕ್ತಿಯ ಒಮ್ಮುಖವನ್ನು ಸೂಚಿಸುವ ಈ ಉತ್ಸವಕ್ಕೆ ಹೆಚ್ಚಿನ ಧಾರ್ಮಿಕ ಮಹತ್ವವಿದೆ. ಶಿವನು ಪುರುಷ ಶಕ್ತಿಯನ್ನು ಪ್ರತಿನಿಧಿಸಿದರೆ ಶಕ್ತಿ ಅಥವಾ ಪಾರ್ವತಿಯು ಪ್ರಕೃತಿ ಶಕ್ತಿಯನ್ನು ಸಂಕೇತಿಸುತ್ತಾರೆ. ಹಾಗಾಗಿ  ಶಿವನ  ಭಕ್ತರು ಈ ದಿನದಂದು ಉಪವಾಸವಿದ್ದು ಶಿವನನ್ನು ಭಕ್ತಿಯಿಂದ ಪೂಜಿಸಿದಲ್ಲಿ  ಅಸಾಧ್ಯ ಮತ್ತು ಕಷ್ಟಕರವಾದ ಕೆಲಸವನ್ನು ಸಾಧಿಸಲು ಶಿವಪಾರ್ವತಿಯರ ಆಶೀರ್ವಾದವಿರುತ್ತದೆ  ಎಂಬ ನಂಬಿಕೆ ಇಉವ ಕಾರಣ ಪ್ರತೀ ತಿಂಗಳೂ ಮಾಸ ಶಿವರಾತ್ರಿಯನ್ನು ಬಹಳ ಶ್ರದ್ಧಾ ಭಕ್ತಿಯಿಂದ ಆಚರಿಸಲಾಗುತ್ತದೆ.

ಮಾಸಿಕ ಶಿವರಾತ್ರಿಯನ್ನು ಆಚರಿಸಿವವರು ಇಡೀ ದಿನ ಉಪವಾಸವಿದ್ದು  ಶಿವ ದೇವಾಲಯಗಳಿಗೆ ಭೇಟಿ ನೀಡುವುದಲ್ಲದೇ ಸಂಜೆ ಶಿವ ಪೂಜೆಯನ್ನು ಮಾಡುತ್ತಾರೆ. ಈ ಪೂಜೆಯ ಸಮಯದಲ್ಲಿ  ಶಿವನ ವಿಗ್ರಹ ಅಥವಾ ಶಿವಲಿಂಗಕ್ಕೆ ಅಭಿಷೇಕ ಮಾಡುವ ಮೂಲಕ ಪೂಜೆ ಪ್ರಾರಂಭವಾಗುತ್ತದೆ. ಈ ಸಮಯದಲ್ಲಿ ಗಂಗಾಜಲ, ಹಾಲು, ತುಪ್ಪ, ಜೇನುತುಪ್ಪ, ಅರಿಶಿನ ಪುಡಿ, ಸಿಂಧೂರ, ಪನ್ನೀರುಗಳಿಂದ ಅಭಿಷೇಕಮಾಡಿದ ನಂತರ ಶಿವನ ವಿಗ್ರಹ ಅಥವಾ ಶಿವಲಿಂಗಕ್ಕೆ ಬಗೆ ಬಗೆಯ ಹೂವುಗಳಿಂದ ಅಲಂಕರಿಸಿ ವಿವಿಧ ಹಣ್ಣುಗಳನ್ನು  ನೈವೇದ್ಯ ಮಾಡಲಾಗುತ್ತದೆ.

ಪೂಜೆಯ ಸಮಯದಲ್ಲಿ  ರುದ್ರ ಮತ್ತು ಚಮಕಗಳನ್ನು ಪಠಣ ಮಾಡಿದರೆ ಇನ್ನೂ ಕೆಲವೆಡೆ ಸರಳವಾಗಿ, ಮಹಾಮೃತ್ಯುಂಜಯ ಮಂತ್ರವಾದ

ಓಂ ಹೌಂ ಜೂಂ ಸಃ ಓಂ ಭೂರ್ಭುವಃ ಸ್ವಃ

ಓಂ ತ್ರಯಂಬಕಂ ಯಜಾಮಹೇ ಸುಗಂಧಿಂ ಪುಷ್ಠಿವರ್ಧನಂ

ಊರ್ವರುಕಮಿವ ಬಂಧನಾನ್‌

ಮೃತ್ಯೋರ್ಮುಕ್ಷೀಯ ಮಾಮೃತಾತ್‌

ಓಂ ಸ್ವಃ ಭುವಃ ಭೂಃ ಓಂ ಸಃ ಜೂಂ ಹೌ ಓಂ

ಮತ್ತು

ರುದ್ರ ಗಾಯತ್ರಿ ಮಂತ್ರವಾದ

ಓಂ ತತ್ಪುರುಷಾಯ ವಿದ್ಮಹೇ

ಮಹಾದೇವಾಯ ಧೀಮಹಿ

ತನ್ನೋ ರುದ್ರಃ ಪ್ರಚೋದಯಾತ್‌   ಮಂತ್ರಗಳನ್ನು ಪಠಿಸಿ, ನಂತರ ಪರ ಶಿವನಿಗೆ ಆರತಿಯನ್ನು ಮಾಡಿದ ನಂತರ ಪ್ರಸಾದವನ್ನು ವಿತರಿಸಲಾಗುತ್ತದೆ.

ಅವಿವಾಹಿತರು ಈ ಮಾಸ ಶಿವರಾತ್ರಿಯಂದು ಶಿವನನ್ನು ಪೂಜೆ ಮಾಡುವ ಮೂಲಕ, ವಿವಾಹದ ವಿಳಂಬವನ್ನು ದೂರವಾಗಿ ಅವರ ವಿವಾಹದಲ್ಲಿ ಬರುವ ಅಡೆತಡೆಗಳನ್ನು ದೂರವಾಗಿ  ಅವರ ವೈವಾಹಿಕ ಜೀವನವು ತುಂಬಾ ಸಂತೋಷವಾಗಿರುತ್ತದೆ ಎಂಬ ನಂಬಿಕೆ ಇದೆ.

WhatsApp Image 2022-01-01 at 6.24.20 PM (1)ಈ ರೀತಿಯಾಗಿ ಶ್ರದ್ಧಾ ಭಕ್ತಿಯಿಂದ  ಪೂಜಿಸುವ ಮೂಲಕ, ಭಕ್ತರು ಆಂತರಿಕ ಶಾಂತಿಗಾಗಿ ಮತ್ತು ಶಾಶ್ವತ ಕೃಪಾಶೀರ್ವಾದವನ್ನು ಪಡೆಯಬಹುದು ಎಂದು ನಂಬಲಾಗಿದೆ. ಈ ರೀತಿಯಾಗಿ ಉಪವಾಸ ಮಾಡುವ ಮೂಲಕ  ಆತ್ಮಕ್ಕೆ ಮೋಕ್ಷ ಪಡೆಯಬಹುದು ಎನ್ನಲಾಗಿದೆ. ಒಟ್ಟಿನಲ್ಲಿ  ಶಿವನ ಆಶೀರ್ವಾದವನ್ನು ಪಡೆಯಲು ಮಾಸಿಕ ಶಿವರಾತ್ರಿಯನ್ನು ಆಚರಿಸುವುದು ಅತ್ಯಂತ ಸುಲಭವಾದ ಮಾರ್ಗವಾಗಿರುವ ಕಾರಣ ಶಿವನ ಪೂಜೆಯನ್ನು ಶ್ರದ್ಧಾ ಭಕ್ತಿಯಿಂದ ಪೂಜಿಸೋಣ ಅಲ್ಲವೇ?

ಏನಂತೀರಿ?

ನಿಮ್ಮವನೇ ಉಮಾಸುತ

ಮಹಾ ಶಿವರಾತ್ರಿ

ಹಿಂದೂಗಳ ಪವಿತ್ರ ಹಬ್ಬಗಳಲ್ಲಿ ಶಿವರಾತ್ರಿ ಹಬ್ಬವೂ ಒಂದಾಗಿದ್ದು ಇದು ಮಾಘ ಮಾಸದ ಕೃಷ್ಣ ಪಕ್ಷದ ಚತುರ್ದಶಿಯಂದು ಆಚರಿಸಲಾಗುತ್ತದೆ. ಈ ದಿನ ಬಹುತೇಕ ಶಿವಭಕ್ತರು ಇಡೀ ದಿನ ಉಪವಾಸವಿದ್ದು ಶ್ರದ್ಧಾಭಕ್ತಿಯಿಂದ ಶಿವಪೂಜೆಯನ್ನು ಮನೆಗಳಲ್ಲಿ ಮಾಡಿ ನಂತರದ ಹತ್ತಿರದ ಶಿವನ ದೇವಸ್ಥಾನಕ್ಕೆ ಹೋಗಿ ಪರಶಿವನ ದರ್ಶನ ಪಡೆದ ನಂತರ ಇಡೀ ರಾತ್ರಿ ನಿದ್ದೆ ಮಾಡದೇ ಶಿವಧ್ಯಾನ ಮಾಡುತ್ತಾ ಜಾಗರಣೆ ಮಾಡಿದರೆ, ತಾವು ಮಾಡಿದ ಪಾಪಗಳೆಲ್ಲವೂ ಪರಿಹಾರವಾಗಿ, ಮೋಕ್ಷ ಪ್ರಾಪ್ತವಾಗುತ್ತದೆ ಎಂಬುದು ಆಸ್ತಿಕ ಭಕ್ತ ಮಹಾಶಯರ ನಂಬಿಕೆಯಾಗಿದೆ.

ಶಿವರಾತ್ರಿಯ ಕುರಿತಾಗಿ ಅನೇಕ ಪೌರಾಣಿಕ ಮತ್ತು ಜನಪದ ಕಥೆಗಳು ಪ್ರಚಲಿತದಲ್ಲಿದೆ.

ಜಟಾಧರನಾದ ಪರಶಿವನನ್ನು ಹಿಮವಂತನ ಮಗಳಾದ ಗಿರಿಜೆಯು ಭಕ್ತಿಯಿಂದ ರ್ಪಾರ್ಥಿಸಿ, ಜಪ ತಪ ಮತ್ತು ಪೂಜೆಗಳನ್ನು ಮಾಡಿ ಶಿವನ ಮನಸ್ಸನ್ನು ಒಲಿಸಿಕೊಂಡು ವಿವಾಹವಾದದ್ದು ಶಿವರಾತ್ರಿಯಂದು ಎಂದು ಪುರಾಣದದಲ್ಲಿ ಹೇಳಲಾಗಿದೆ.

ಅದೇ ರೀತಿ ದೇವತೆಗಳು ಮತ್ತು ರಾಕ್ಷಸರುಗಳು ಅಮೃತಕ್ಕಾಗಿ ಸಮುದ್ರ ಮಂಥನ ಮಾಡುವ ಸಮಯದಲ್ಲಿ ಹಾಲಾಹಲ ಉತ್ಪತ್ತಿಯಾಗಿ ಅದರ ಪ್ರಭಾವದಿಂದ ಇಡೀ ಭೂಮಂಡಲವೇ ನಾಶವಾಗುವಂತಹ ಸಂದರ್ಭಬಂದಾಗ ಎಲ್ಲಾ ದೇವಾನು ದೇವತೆಗಳು ಪರಶಿವನನ್ನು ಪ್ರಾರ್ಥಿಸಿದಾಗ, ಸದಾಶಿವನು ಲೋಕ ಕಲ್ಯಾಣಕ್ಕಾಗಿ ಆ ಇಡೀ ಹಾಲಾಹಲವನ್ನು ಕುಡಿದದ್ದನ್ನು ಕಂಡು ಆತನ ಪತ್ನಿ ಪಾರ್ವತಿ ದೇವಿ ಓಡಿ ಬಂದು ಶಿವನ ಕುತ್ತಿಗೆಯನ್ನು ಹಿಡಿದುಕೊಂಡು ವಿಷ ಶಿವನ ಹೊಟ್ಟೆ ಸೇರದಂತೆ ಗಂಟಲಲ್ಲೇ ತಡೆ ಹಿಡಿದ್ದಲ್ಲದೇ, ಶಿವ ನಿದ್ರೆ ಮಾಡಿದರೆ ವಿಷವೆಲ್ಲಾ ದೇಹದಲ್ಲಿ ಸುಲಭವಾಗಿ ಹರಡುವ ಕಾರಣ, ದೇವಾನು ದೇವತೆಗಳೆಲ್ಲರೂ ಎಚ್ಚರವಾಗಿದ್ದು, ಇಡೀ ರಾತ್ರಿ ಶಿವನ ಧ್ಯಾನ ಮಾಡಿಕೊಂಡು ಶಿವ ನಿದ್ರಿಸದಂತೆ ನೋಡಿಕೊಂಡ ದಿನವನ್ನೇ ಶಿವರಾತ್ರಿ ಎಂದು ಆಚರಿಸುವ ರೂಢಿಯಾಯಿತು. ಶಿವನ ಕಂಠದಲ್ಲಿಯೇ ವಿಷವು ನಿಂತು ಹೋದ ಕಾರಣ ಅಂದಿನಿಂದ ಶಿವನನ್ನು ವಿಷಕಂಠ, ನೀಲಕಂಠ ಮತ್ತು ಶ್ರೀಕಂಠನೆಂದೂ ಕರೆಯಲಾರಂಭಿಸಿದರು. ಹಾಗೆ ನಂಜನ್ನು ಉಂಡ ಕಾರಣ ಈಶ್ವರ ನಂಜುಂಡೇಶ್ವರನಾದ.

ಇನ್ನು ಜನಪದ ಕಥೆಯ ಪ್ರಕಾರ ಅದೊಮ್ಮೆ ಬೇಡನೊಬ್ಬ ಕಾಡಿನಲ್ಲಿ ಬೇಟೆಗಾಗಿ ಹೋಗಿ ಇಡೀ ದಿನವೆಲ್ಲಾ ಅಲೆದಾಡಿದರೂ ಒಂದು ಬೇಟೆಯೂ ಸಿಗದೆ, ಕಾಡಿನಲ್ಲಿ ದಾರಿ ತಪ್ಪಿಸಿಕೊಂಡ. ಆಷ್ಟರಲ್ಲಾಗಲೇ ಕತ್ತಲಾಗಿದ್ದ ಕಾರಣ, ಕ್ರೂರ ಪ್ರಾಣಿಗಳಿಂದ ತಪ್ಪಿಸಿಕೊಳ್ಳುವ ಸಲುವಾಗಿ ಮರವೊಂದನ್ನು ಏರಿ ಕುಳಿತ. ಆ ಬೇಡನನ್ನು ನೋಡಿದ ಕ್ರೂರಮೃಗಗಳು ಮರವನ್ನು ಸುತ್ತುವರಿದಾಗ ಭಯಭೀತನಾದ ಬೇಡನು ಶಿವನ ಧ್ಯಾನ ಮಾಡುತ್ತಾ ಆತ ಕುಳಿತಿದ್ದ ಮರದ ಎಲೆಗಳನ್ನೇ ಕಿತ್ತು ಕೆಳಗೆ ಹಾಕತೊಡಗಿದ. ಅಚ್ಚರಿಯೆನ್ನುವಂತೆ ಆತ ಕುಳಿತಿದ್ದ ಮರ ಬಿಲ್ವಮರವಾಗಿದ್ದು, ಆತ ಎಸೆದ ಎಲೆಗಳು ಬಿಲ್ವಪತ್ರೆಯಗಿದ್ದು ಅದು ಅವನಿಗೇ ಅರಿವಿಲ್ಲದಂತೆಯೇ, ಮರದ ಕೆಳಗಡೆಯಿದ್ದ ಶಿವಲಿಂಗದ ಮೇಲೆ ಬೀಳತೊಡಗಿದವು. ಈ ರೀತಿಯಾಗಿ ಇಡೀ ರಾತ್ರಿ ಶಿವಧ್ಯಾನ ಮಾಡಿದ ಪರಿಣಾಮದಿಂದಾಗಿಯೇ ಬೇಡನಿಗೆ ಶಿವನೇ ಅಭಯದಾಯಕನಾದ ವಿಷಯ ಎಲ್ಲೆಡೆ ಹರಡಿ ಆ ದಿನವನ್ನು ಶಿವರಾತ್ರಿ ಎಂದು ಕರೆದು, ಅಂದಿನಿಂದ ಪ್ರತೀವರ್ಷವೂ ಶಿವರಾತ್ರಿಯನ್ನು ಭಯ ಭಕ್ತಿಗಳಿಂದ ಜಾಗರಣೆ ಮಾಡುತ್ತಾ ಶಿವಧ್ಯಾನ ಮಾಡುತ್ತಾ ಆಚರಿಸಲಾರಂಭಿಸಿದರು ಎಂದು ಈ ಪೌರಾಣಿಕ ಕಥೆ ಹೇಳುತ್ತದೆ.

ಇನ್ನು ವೈಜ್ಞಾನಿಕವಾಗಿ ನೋಡಿದರೆ, ರಥ ಸಪ್ತಮಿಯಂದು ಸೂರ್ಯ ಪಥವನ್ನು ಬದಲಿಸಿದ ನಂತರ ಶಿವರಾತ್ರಿಯವರೆಗೂ ಚಳಿ ಇದ್ದು ಶಿವರಾತ್ರಿಯ ನಂತರ ಛಳಿಯೆಲ್ಲಾ ಮಾಯವಾಗಿ ಬೇಸಿಗೆ ಪ್ರಾರಂಭವಾಗಿ ಹಗಲು ಹೆಚ್ಚಾಗಿರುತ್ತದೆ. ಹವಾಮಾನದ ಈ ವೈಪರೀತ್ಯದ ಸಮಯದಲ್ಲಿ ಮನುಷ್ಯರದ ದೇಹದಲ್ಲಿ ಬಹಳಷ್ಟು ಬದಲಾವಣೆಗಳಾಗಿ ಹಲವರಿಗೆ ಉಸಿರಾಟದ ತೊಂದರೆ ನೆಗಡಿ, ಕೆಮ್ಮು, ಶೀತದ ಬಾಧೆಗಳು ಕಾಣಿಸಿಕೊಳ್ಳುತ್ತದೆ. ಲಂಘನಂ ಪರಮೌಷಧಂ ಎನ್ನುವಂತೆ ಶಿವರಾತ್ರಿಯಂದು ಉಪವಾಸವಿದ್ದು ಮಹಾಶಿವನಿಗೆ ನೀರಿನ ಅಭಿಷೇಕ ಮತ್ತು ಬಿಲ್ವ ಪತ್ರೆಯ ಪೂಜೆ ಮಾಡುವ ಸಂದರ್ಭದಲ್ಲಿ ಬಿಲ್ವಪತ್ರೆಯ ವಾಸನೆ ನೋಡುವುದರಿಂದ ರೋಗರುಜಿನಗಳಿಂದ ಮುಕ್ತವಾಗ ಬಹುದಾಗಿದೆ.

ಶಿವರಾತ್ರಿಯ ದಿನದಂದು ಮನೆಯವರೆಲ್ಲರೂ ಹೊತ್ತಿಗೆ ಮುಂಚೆ ಎದ್ದು ತೈಲಾಭ್ಯಂಜನ ಮಾಡಿ, ಇಡೀ ದಿನವೂ ಉಪವಾಸವಿದ್ದು ಅಭಿಷೇಕಪ್ರಿಯ ಎಂದೇ ಖ್ಯಾತನಾದ ಶಿವನಿಗೆ ಹಾಲು, ಜೇನುತುಪ್ಪ, ನೀರು, ಬಿಲ್ವಪತ್ರೆ, ತುಳಸಿ, ಶ್ರೀಗಂಧಗಳಿಂದ ಶಿವನಿಗೆ ರುದ್ರಾಭಿಷೇಕಯುಕ್ತ ಪೂಜೆಯನ್ನು ಮಾಡಿ ಬಗೆ ಬಗೆಯ ಪತ್ರೆ ಮತ್ತು ಹೂಗಳಿಂದ ಶಿವನನ್ನು ಆಲಂಕರಿಸಿ ಪೂಜೆ ಮಾಡುವುದು ರೂಢಿಯಲ್ಲಿದೆ. ಅದರಲ್ಲೂ ಹೃದಯವನ್ನೇ ಹೋಲುವ ಬಿಲ್ಪಪತ್ರಾರ್ಚನೆ ವಿಶೇಷವಾಗಿದೆ. ಪೂಜೆಯ ಸಮಯದಲ್ಲಿ ರುದ್ರ, ನಮಕ ಮತ್ತು ಚಮಕಗಳನ್ನು ಬಾರಿ ಬಾರಿ, ಉಚ್ಚರಿಸುವುದರಿಂದ ಉಸಿರಾಟಕ್ಕೂ ಹೆಚ್ಚಿನ ಶಕ್ತಿ ಬರುವುದು ಮತ್ತು ಬಾಯಿಯಿಂದ ಹೊರ ಹೊಮ್ಮುವ ತರಂಗಗಳಿಂದ ಸುತ್ತ ಮುತ್ತಲಿನ ಪರಿಸರ ಶಕ್ತಿಯುತವಾಗುವುದು. ಇಡೀ ದಿನ ಶಿವ ಪಂಚಾಕ್ಷರಿ ಮಂತ್ರವಾದ ಓಂ ನಮ: ಶಿವಾಯ, ಹರ ಹರ ಮಹಾದೇವ, ಶಂಭೋ ಶಂಕರ ಎಂದು ದಿನವಿಡೀ ಧ್ಯಾನ ಮಾಡುತ್ತಾರೆ. ಈ ರೀತಿಯ ಪೂಜೆಯನ್ನು ಬೆಳಿಗ್ಗೆ ಸಂಜೆ ಮತ್ತು ರಾತ್ರಿ ಶಿವನ ಧ್ಯಾನ ಮಾಡುತ್ತಾ ಜಾಗರಣೆ ಮಾಡುವುದು ರೂಢಿಯಲ್ಲಿದೆ. ಜಾಗರಣೆ ಎಂದರೆ, ಜಾಗೃತರಾಗಿರೋದು ಎಂದರ್ಥವೂ ಇದೆ. ಬಹುತೇಕರು ಅಂದು ನಿಟ್ಟುಪವಾಸ ಮಾಡಿದರೆ, ಇನ್ನೂ ಕೆಲವರು ಅಲ್ಪಾಹಾರ ಇಲ್ಲವ್ವೇ ಫಲಾಹಾರವನ್ನು ಸೇವಿಸುವ ಪರಿಪಾಠವೂ ಇದೆ. ಶಿವರಾತ್ರಿಯ ರಾತ್ರಿಯ ದಿನ ಜಾಗರಣೆ ಮಾಡುವುದು ಮೋಕ್ಷದ ಕಡೆಗೆ ಹೊಗುವುದು ಎಂಬ ನಂಬಿಕೆಯೂ ಇದೆ.

ಶಿವರಾತ್ರಿಯಂದು ದೇಶದ ಪ್ರಮುಖ ಶಿವನ ದೇವಾಲಯಗಳಾದ ಕಾಶಿ ವಿಶ್ವನಾಥ, ಮುರುಡೇಶ್ವರ, ಗೋಕರ್ಣದ ಮಹಾಬಲೇಶ್ವರ, ನಂಜನಗೂಡಿನ ಶ್ರೀಕಂಠೇಶ್ವರನಿಗೆ, ರಾಮೇಶ್ವರದ ರಾಮೇಶ್ವರ, ತಂಜಾವೂರಿನ ಬೃಹದೇಶ್ವರ, ಕೊಯಮತ್ತೂರಿನ ಇಶಾ ಫೌಂಡೇಷನ್ನಿನ ಇನ್ನೂ ಅನೇಕ ಶಿವ ದೇವಾಲಯಗಳಲ್ಲಿ ವಿಶೇಷ ಪೂಜೆ ಆಯೋಜಿಸಲಾಗಿರುತ್ತದೆ. ಬಿಲ್ವಾರ್ಚನೆ, ರುದ್ರಾಭಿಷೇಕ, ಶಿವನಾಮ ಧ್ಯಾನಗಳ ಮೂಲಕ ಶಿವನನ್ನು ಆರಾಧಿಸಲಾಗುತ್ತದೆ. ಇಡೀ ರಾತ್ರಿ ಶಿವದೇವಾಲಯಗಳಲ್ಲಿ ರುದ್ರಪಠಣದ ಜೊತೆ ಜಾಗರಣೆ ನಡೆಯುತ್ತದೆ. ಇನ್ನೂ ಹಲವು ದೇವಾಲಯಗಳಲ್ಲಿ ಸಾಮೂಹಿಕ ಭಜನೆ, ಹರಿಕಥೆ, ಗಮಕವಾಚನಗಳನ್ನೂ ಏರ್ಪಡಿಸಿರುತ್ತಾರೆ.

WhatsApp Image 2022-03-01 at 4.41.47 AMಮಹಾ ಶಿವರಾತ್ರಿಯಂದು ಈ  ದ್ವಾದಶ ಜ್ಯೋತಿರ್ಲಿಂಗಗಳಲ್ಲಿ ಯಾವುದಾದರೊಂದು ಕ್ಷೇತ್ರದ ‌ದರ್ಶನ ಪಡೆದಲ್ಲಿ ಹೆಚ್ಚಿನ ಪುಣ್ಯ ಲಭಿಸುವುದು. ಹಾಗೆ ಈ ಶ್ರೀ ಕ್ಷೇತ್ರಗಳ ದರ್ಶನ ಮಾಡಲಾಗದಿದ್ದಲ್ಲಿ ಕನಿಷ್ಠ ಪಕ್ಷ ಪ್ರತಿನಿತ್ಯವೂ ಪಠಿಸಿದರೂ ಏಳು ಜನ್ಮಗಳ ಪಾಪಗಳು ನಾಶವಾಗುತ್ತದೆ ಎಂಬ ನಂಬಿಕೆ ಆಸ್ತಿಕರದ್ದಾಗಿದೆ.

ಸೌರಾಷ್ಟ್ರೇ ಸೋಮನಾಥಂ ಚ ಶ್ರೀಶೈಲೇ ಮಲ್ಲಿಕಾರ್ಜುನಮ್ ।
ಉಜ್ಜಯಿನ್ಯಾಂ ಮಹಾಕಾಲಂ ಓಂಕಾರಮ್ಮಲೇಶ್ವರಮ್ ॥
ಪರಲ್ಯಾಂ ವೈದ್ಯನಾಥಂ ಚ ಡಾಕಿನ್ಯಾಂ ಭೀಮಶಂಕರಮ್ ।
ಸೇತುಬಂಧೇ ತು ರಾಮೇಶಂ ನಾಗೇಶಂ ದ್ವಾರುಕಾವನೇll
ವಾರಾಣಸ್ಯಾಂ ತು ವಿಶ್ವೇಶಂ ತ್ರ್ಯಮ್ಬಕಂ ಗೌತಮೀತಟೇl
ಹಿಮಾಲಯೇ ತು ಕೇದಾರಂ ಘುಶ್ಮೇಶಂ ಚ ಶಿವಾಲಯೇ ॥
ಏತಾನಿ ಜ್ಯೋತಿರ್ಲಿಂಗಾನಿ ಸಾಯಂ ಪ್ರಾತಃ ಪಠೇನ್ನರಃl
ಸಪ್ತಜನ್ಮಕೃತಂ ಪಾಪಂ ಸ್ಮರಣೇನ ವಿನಶ್ಯತಿ ॥

ಭಗವಂತನ ಹೆಸರಿನಲ್ಲಿ ನಮ್ಮ ಮನಸ್ಸು ಮತ್ತು ಆರೋಗ್ಯ ಎರಡನ್ನೂ ಸುಧಾರಿಸುವ ಈ ಶಿವರಾತ್ರಿ ಹಬ್ಬವನ್ನು ಅರ್ಥಪೂರ್ಣವಾಗಿ ಭಗವಂತನನ್ನು ಸ್ಮರಿಸುತ್ತಾ ಆಚರಿಸುವ ಮೂಲಕ ಅದರ ಸತ್ಫಲವನ್ನು ಪಡೆಯೋಣ ಅಲ್ಲವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಕರ್ಮಯೋಗಿ ಹಾಗೂ ಭಕ್ತಿಯೋಗಿ 

melukoteಮಂಡ್ಯ ಜಿಲ್ಲೆಯ ಮೇಲುಕೋಟೆಯ ಚೆಲುವನಾರಾಯಣ ಸ್ವಾಮಿ ಮತ್ತು ಯೋಗಾನರಸಿಂಹ ಸ್ವಾಮಿ ಜಗದ್ವಿಖ್ಯಾತವಾದ ದೇವಾಲಯಗಳು. ಆಚಾರ್ಯ ತ್ರಯರಲ್ಲಿ ಒಬ್ಬರಾದ ಶ್ರೀ ರಾಮಾನುನುಜಾಚಾರ್ಯರ ಆರಾಧ್ಯ ದೈವವೂ ಹೌದು. ಪ್ರತಿನಿತ್ಯ ನೂರಾರೂ ಮತ್ತು ವಾರಾಂತ್ಯದಲ್ಲಿ ಸಾವಿರಾರು ಮತ್ತು ವಿಶೇಷ ದಿನಗಳಲ್ಲಿ ಅದರಲ್ಲೂ ವೈರಮುಡಿ ಉತ್ಸವದ ಸಮಯದಲ್ಲಿ ಲಕ್ಷಾಂತರ ಭಕ್ತಾದಿಗಳು ಸೇರುವ ಸ್ಥಳವಾಗಿದೆ. ಕಡಿದಾದ ಬೆಟ್ಟದ ತುದಿಯಲ್ಲಿ ಕಟ್ಟಿರುವ ದೇವಾಲಯ ನಿಜಕ್ಕೂ ಅಂದಿನ ದಿನದ ವಾಸ್ತುಪಂಡಿತರ ಮತ್ತು ಕುಶಲ ಕರ್ಮಿಗಳ ಅಧ್ಭುತ ಪರಿಣಿತಿಯ ದ್ಯೋತಕವಾಗಿದೆ. ಸುಮಾರು 300 ರಷ್ಟು ಕಡಿದಾದ ಎತ್ತರದ ಮೆಟ್ಟುಲುಗಳ ಯೋಗಾನರಸಿಂಹ ಸ್ವಾಮಿಯ ದೇವಾಲಯ ಸಾಮಾನ್ಯ ಆರೋಗ್ಯವಂತರಿಗೂ ಹತ್ತುವುದು ತುಸು ಕಷ್ಟವೇ ಸರಿ.

ಆದರೆ ಈ ಚಿತ್ರದಲ್ಲಿರುವ ಶ್ರೀಯುತ ಕಲಮೇಘಮ್ ರಾಮಸ್ವಾಮಿ ಅಯ್ಯಂಗಾರ್ ಪ್ರತಿನಿತ್ಯ ಶುಭ್ರವಾಗಿ ಮಡಿಯುಟ್ಟು ದೇವರ ಅಭಿಷೇಕಕ್ಕೂ ಮತ್ತು ನೈವೇದ್ಯಕ್ಕೂ ಅಗತ್ಯವಾದ ನೀರನ್ನು ಕೆಳಗಿನ ಕೊಳದಿಂದ ತಲೆಯ ಮೇಲೆ ಭಾರವಾದ ಹಿತ್ತಾಳೆಯ ಪಾತ್ರೆಯಲ್ಲಿ ಈ ಎಪ್ಪತ್ತರ ಇಳಿ ವಯಸ್ಸಿನಲ್ಲೂ ಹೊತ್ತು ಸಾಗುವುದನ್ನು ನನ್ನ ಸ್ನೇಹಿತನೊಬ್ಬ ಈ ಹಿಂದೆ ಮುಖಪುಟದಲ್ಲಿ ಹಾಕಿದ್ದಾಗ, ನನಗರಿವಿಲ್ಲದಂತೆಯೇ ಹೊಟ್ಟೆಯ ಪಾಡಿಗೆ ಏನೇನು ಮಾಡಬೇಕೋ, ಛೇ, ಅಯ್ಯೋ ಪಾಪ ಎಂದು ನಾನೇ ವ್ಯಾಖ್ಯಾನಿಸಿದ್ದು ನಂತರ ಕೆಲವು ಸ್ನೇಹಿತರು ಅದಕ್ಕೆ ಪರ ಮತ್ತು ವಿರೋಧವಾಗಿ ಚರ್ಚೆಯೂ ನಡೆಸಿದ್ದಾಗಿತ್ತು. ಅಂದಿನಿಂದ ಕುತೂಹಲಿತನಾಗಿ ಅವರನ್ನು ವಯಕ್ತಿಕವಾಗಿ ಭೇಟಿ ಮಾಡಲೇ ಬೇಕೆಂದು ಧೃಡ ಸಂಕಲ್ಪ ಮಾಡಿದ್ದೆನಾದರೂ, ತೇನ ವಿನಾ ತೃಣಮಪಿ ನಚಲತಿ ಎನ್ನುವಂತೆ ಆ ಭಗವಂತ ತನ್ನ ಬಳಿ ತಾನಾಗಿಯೇ ನಮ್ಮನ್ನು ಕರೆಸಿಕೊಳ್ಳುವವರೆಗೂ ಅದು ಸಾಧ್ಯವಾಗಿರಲಿಲ್ಲ. ಕಳೆದ ವಾರದ ಧೀರ್ಘ ವಾರಾಂತ್ಯದಲ್ಲಿ ನನಗೂ ಮತ್ತು ನಮ್ಮ ಮಕ್ಕಳಿಗೆ ರಜೆ ಇದ್ದ ಕಾರಣ ಹಾಗೂ ಹೊಸದಾಗಿ ಕೊಂಡುಕೊಂಡಿದ್ದ ವಾಹನದ ದೂರ ಪ್ರಯಾಣದ ಸವಿಯನ್ನು ಪಡೆಯದಿದ್ದ ಕಾರಣ ಮತ್ತು ರಾಷ್ಟ್ರೀಯ ಹೆದ್ದಾರಿ 48 ರ ರಸ್ತೆ ಅತ್ಯುತ್ತಮವಾಗಿದ್ದ ಕಾರಣ ಎಲ್ಲವೂ ಒಗ್ಗೂಡಿ ಬೆಳಿಗ್ಗೆಯೇ ಇತರೇ ವಾಹನಗಳು ರಸ್ತೆಗಳಿಗೆ ಇಳಿಯುವ ಮುನ್ನವೇ ಬೆಂಗಳೂರಿಂದ ಮೇಲುಕೋಟೆಗೆ ನಮ್ಮ ಸವಾರಿ ಹೊರಟೇ ಬಿಟ್ಟಿತು. ಹೊಸ ವಾಹನದ ಪ್ರಭಾವವೋ ರಸ್ತೆಯ ಪ್ರಭಾವವೋ, ದೇವರನ್ನು ಕಾಣುವ ನಮ್ಮ ಉತ್ಕಟ ಬಯಕೆಯೋ ಕಾಣೆ ಸುಮಾರು ಎರಡು ಗಂಟೆಗೆಳಲ್ಲಿಯೇ ಮೇಲುಕೋಟೆ ತಲುಪಿ ಪೂಜಾಸಾಮಗ್ರಿಗಳನ್ನೆಲ್ಲಾ ಕೊಂಡು ದೇವಸ್ಥಾನದ ಮೆಟ್ಟಿಲುಗಳನ್ನು ಸ್ವಲ್ಪ ತ್ರಾಸ ಪಟ್ಟು ಹತ್ತಿ ನೋಡಿದರೆ, ದೇವಾಲಯವೇ ಇನ್ನೂ ಭಕ್ತಾದಿಗಳಿಗೆ ತೆರೆದಿರಲಿಲ್ಲ. ಪೂಜಿಸಲೆಂದೇ ಅಲ್ಲಿಂದ ಬಂದೆ, ದರುಶನ ನೀಡೋ ಹೇ ತಂದೇ, ಎಂದು ಮನದಲ್ಲೇ ನೆನೆಯುತ್ತಾ ಕೈಯಲ್ಲಿದ್ದ ಹೂವು, ಹಣ್ಣು ಮತ್ತು ಕಾಯಿಗಳನ್ನು ಅಸಂಖ್ಯಾತ ಕಪಿ ಸೈನ್ಯಗಳ ದೃಷ್ಟಿಯಿಂದ ತಪ್ಪಿಸುತ್ತಾ , ಆರಿವಿಲ್ಲದೆ ಕೈಯಲ್ಲಿದ್ದ ಹಣ್ಣುಕಾಯಿ ಬುಟ್ಟಿಯನ್ನು ವಾನರ ಸೈನ್ಯ ಕಿತ್ತುಕೊಂಡಾಗ ಮತ್ತು ಕೆಲವು ಹೆಣ್ಣು ಮಕ್ಕಳು ಮುಡಿದಿದ್ದ ಮಲ್ಲಿಗೆ ಹೂವನ್ನು ಮಂಗಗಳು ಎಗರಿಸುತ್ತಿದ್ದಾಗ, ಅವರೆಲ್ಲರ ಚೀರಾಟಕ್ಕೆ ಮಮ್ಮಲ ಮರುಗುತ್ತಾ ಬೆಟ್ಟದ ತುದಿಯಿಂದ ಕೆಳಗಿನ ಜಗದ್ವಿಖ್ಯಾತ ಕಲ್ಯಾಣಿ, ಹಾಗೂ ಊರಿನ ರಮಣೀಯ ದೃಶ್ಯಗಳನ್ನು ಸವಿಯುತ್ತ ಸರದಿಯಲ್ಲಿ ನಿಂತಿರುವಾಗ ಅರ್ಚಕರುಗಳು ಬಂದು ದೇವಾಲಯದ ಬಾಗಿಲನ್ನು ತೆಗೆದು ನಮ್ಮೆಲ್ಲರಿಗೂ ಯೋಗಾನರಸಿಂಹನ ದರ್ಶನವನ್ನು ಕಣ್ತುಂಬ ನೋಡುವ ಅವಕಾಶವಿತ್ತರು. ಸಕುಟುಂಬ ಸಮೇತನಾಗಿ ಸಂಗೋಪಾಂಗವಾಗಿ ದೇವರ ದರ್ಶನವಾಗಿ ತೀರ್ಥ, ಪ್ರಸಾದವೆಲ್ಲಾ ಮುಗಿದು ದೇವಾಲಯದಿಂದ ಹೊರಬಂದರೂ ನನ್ನ ಕಣ್ಣುಗಳು ಶ್ರೀಯುತ ಕಲಮೇಘಮ್ ರಾಮಸ್ವಾಮಿ ಅಯ್ಯಂಗಾರ್ ಎಲ್ಲರ ಪ್ರೀತಿಯ ರಾಮಯ್ಯಂಗಾರರನ್ನೇ ಹುಡುಕುತ್ತಿತ್ತು.

ram1ನನ್ನ ಸುದೈವವೋ ಎನ್ನುವಂತೆ ಸುಮಾರು ಮುಕ್ಕಾಲು ಮೆಟ್ಟಿಲುಗಳನ್ನು ಇಳಿಯುತ್ತಿದ್ದಾಗ ಕೆಳಗಿನಿಂದ ಕಲ್ಯಾಣಿಯ ಬಳಿ ಮೆಟ್ಟಿಲುಗಳನ್ನು ಇಳಿಯುತ್ತಿದ್ದ ಶ್ರೀಯುತರು ನನ್ನ ಕಣ್ಣಿಗೆ ಕಾಣಿಸಿದಾಗ ನನಗೆ ದೇವರನ್ನು ಕಂಡಾಗ ಆಗಿದ್ದಕ್ಕಿಂತಲೂ ಹೆಚ್ಚಿನ ಆನಂದವಾಯಿತು ಎಂದರೆ ಅತಿಶಯೋಕ್ತಿಯೇನಲ್ಲ. ಅಲ್ಲಿಯೇ ಕುಟುಂಬದವನ್ನು ನಿಲ್ಲಿಸಿ, ದಡ ದಡನೆ ಮೆಟ್ಟಿಲುಗಳನ್ನು ಇಳಿದು ಅವರ ಬಳಿ ಬಂದು ಸ್ವಾಮಿ ನಮಸ್ಕಾರ ಎಂದೆ. ಅವರೂ ಸಹಾ ನಮಸ್ಕಾರ ಎಂದು ಪ್ರತಿವಂದಿಸಿದರಾದರೂ ಅವರ ಮುಖಚರ್ಯೆಯಲ್ಲಿ ಯಾರೀ ಅಪರಿಚಿತ? ವ್ಯಕ್ತಿ ಎಂಬ ಭಾವ ಗೋಚರಿಸುತ್ತಿತ್ತು.

ram2ಸ್ವಾಮಿ, ನಿಮಗೆ ನನ್ನ ಪರಿಚಯವಿಲ್ಲ. ಆದರೆ ನಿಮ್ಮನ್ನು ನನ್ನ ಸ್ನೇಹಿತ ನನಗೆ ಪರೋಕ್ಷವಾಗಿ ಪರಿಚಯಿಸಿದ್ದಾನೆ ಎಂದಾಗ, ಓಹೋ ಹಾಗೋ, ನನ್ನನ್ನು ಹಲವು ವೃತ್ತ ಪತ್ರಿಕೆಗಳು ಮತ್ತು ದೃಶ್ಯಮಾಧ್ಯಮಗಳು ಈಗಾಗಲೇ ಸಂದರ್ಶಿಸಿ ನಾಡಿನಾದ್ಯಂತ ನನ್ನನ್ನು ಪರಿಚಯ ಮಾಡಿಸಿ ಬಿಟ್ಟಿದ್ದಾರೆ ಎಂದು ಧನ್ಯತಾ ಭಾವದಿಂದ ನಗೆ ಚೆಲ್ಲಿದರು. ಹಾಗೆ ಮಾತಾನಾಡುತ್ತಲೇ ಚಳಿ ಮಳೆ ಗಾಳಿ ಯಾವುದನ್ನೂ ಲೆಖ್ಖಿಸದೇ ಕಲ್ಯಾಣಿಯಲ್ಲಿ ಮತ್ತೊಮ್ಮೆ ಮಿಂದು, ಬಟ್ಟೆಗಳನ್ನು ಒದ್ದೆ ಮಾಡಿಕೊಳ್ಳುತ್ತಲೇ, ಯಾವ ಊರು? ಎಲ್ಲಿಂದ ಬಂದಿದ್ದೀರಿ? ಯಾರು ಯಾರು ಬಂದಿದ್ದೀರೀ? ಎಂದು ಕುಶಲೋಪರಿಯನ್ನು ಅವರೇ ಶುರು ಮಾಡಿಕೊಂಡಾಗ ರೊಟ್ಟಿ ಜಾರಿ ತುಪ್ಪಕ್ಕೆ ಬಿದ್ದಂತಾಗಿ ನನ್ನ ಪ್ರವರಗಳನ್ನೆಲ್ಲಾ ಹೇಳಿ, ಸದ್ಯಕ್ಕೆ ಬೆಂಗಳೂರಿನ ವಿದ್ಯಾರಣ್ಯಪುರದಲ್ಲಿ ಕುಟುಂಬ ಸಮೇತ ವಾಸಿಸುತ್ತಿರುವುದಾಗಿ ತಿಳಿಸಿ ಇಡಿ ಕುಟುಂಬವನ್ನು ಅವರಿಗೆ ಪರಿಚಯಿಸಿದೆ. ಇಡೀ ನಮ್ಮ ಕುಟುಂಬದ ಮೇಲೆ ಚೆಲುವನಾರಾಯಣ ಅನುಗ್ರಹ ಸದಾಕಾಲವೂ ಇರಲಿ ಎಂದು ಹಾರೈಸಿ, ಓಹೋ ನೀವೂ ಕೂಡಾ ನಮ್ಮ ಊರಿನವರೇ, ನಮ್ಮವರೇ ಎಂದು ಉದ್ಗಾರ ತೆಗೆದಾಗ ನನಗಾಶ್ಚರ್ಯ!!

durga_prarameshwariಬೆಂಗಳೂರಿನ ವಿದ್ಯಾರಣ್ಯಪುರದ ದುರ್ಗಾಪರಮೇಶ್ವರಿ ದೇವಾಲಯದ ಹಿಂದಿನ ಬಡಾವಣೆಯಲ್ಲಿ ಅವರದ್ದೂ ಮತ್ತು ಅವರ ಸಹೋದರಿಯ ಸ್ವಂತ ಮನೆ ಇದೆ ಎಂದು ತಿಳಿಸಿ ಲೋಕಾಭಿರಾಮವಾಗಿ ಅಲ್ಲಿನ ಪ್ರಸಕ್ತ ಸ್ಥಿತಿಗತಿಗಳನ್ನೂ, ಇಂದಿನ ನಿವೇಶನಗಳ ಬೆಲೆಯನ್ನು ಅವರು ಕೊಂಡು ಕೊಂಡ ಬೆಲೆಗೆ ತಳುಕು ಹಾಕುತ್ತಾ ಎಲ್ಲ ಮಧ್ಯಮವರ್ಗದವರ ರೀತಿಯೇ ನನಗೆ ಕಂಡರು. ಜೊತೆ ಜೊತೆಗೇ ನೀರಿನ ಕೊಳಗವನ್ನು ಚೆನ್ನಾಗಿ ಹುಳಿ ಹಚ್ಚಿ ತೊಳೆದು ನೀರು ತುಂಬಿಸ ತೊಡಗಿದರು. ಅಷ್ಟರಲ್ಲಾಗಲೇ ನನಗೆ ಅವರೊಂದಿಗೆ ಸ್ವಲ್ಪ ಸಲುಗೆ ಬೆಳೆದು ನನ್ನ ಸಂಸ್ಕೃತ ಮತ್ತು ವೇದಾಧ್ಯಯನದ ಮೊದಲ ಗುರುಗಳಾದ ಮೇಲುಕೋಟೆಯವರೇ ಆದ ಕೀರ್ತಿಶೇಷ ಶ್ರೀ ಸಂಪತ್ ಅಯ್ಯಂಗಾರ್ ಮತ್ತು ಅವರ ಸಹೋದರಾದ ಶಡಗೋಪನ್ ಮತ್ತು ಗೋವಿಂದ ರಾಜು ಅವರ ಬಗ್ಗೆ ಮತ್ತವರ ಕುಟುಂಬದ ಬಗ್ಗೆ ವಿಚಾರಿಸಿದಾಗ ಅವರು ನನಗೇ ಮತ್ತೂ ಆತ್ಮೀಯರಾಗಿ ಅವರೆಲ್ಲರ ಬಗ್ಗೆಯೂ ತಿಳಿಸುತ್ತಾ ನಮ್ಮ ಗುರುಗಳು ವೈರಮುಡಿ ಸಮಯದಲ್ಲಿ ಅಹೋಬಲ ಮಠದಲ್ಲಿ ಮಾಡುತ್ತಿದ್ದ ಪ್ರವಚನಗಳನ್ನು ನೆನೆದು ಸ್ವಲ್ಪ ಕಾಲ ಗದ್ಗದಿತರಾದರು.

ಹಾಗೆಯೇ ಮಾತನಾಡುತ್ತಾ ಪ್ರತಿದಿನ ಎಂಟು ಹತ್ತು ಬಾರಿ ಕೆಳಗಿನಂದ ಮೇಲಕ್ಕೆ ನೀರನ್ನು ತೆಗೆದು ಕೊಂಡು ಹೋಗುವುದಾಗಿ ತಿಳಿಸಿ ವಿಶೇಷ ದಿನಗಳಲ್ಲಿ ಅದು ಇನ್ನೂ ಹೆಚ್ಚಾಗ ಬಹುದು ಎಂದು ತಿಳಿಸಿ ಸಿಂಬಿಯನ್ನು ತಲೆಯ ಮೇಲಿರಿಸಿಕೊಂಡು ನಿಧಾನವಾಗಿ ನೀರಿನ‌‌ ಕೊಳಗವನ್ನು ತಲೆಯ ಮೇಲೆ ಇರಿಸಿ ಕೊಂಡು ದೇವಾಲಯದ ಕಡಿದಾದ ಮೆಟ್ಟಲುಗಳನ್ನು ಏರತೊಡಗಿದಾಗ ಅವರಿಗೆ ವಂದಿಸಿ ಮೆಟ್ಟಿಲುಗಳನ್ನು ಇಳಿಯಲಾರಂಭಿಸಿದೆವು

ಅವರು ಈ ಎಪ್ಪತ್ತರ ಇಳಿ ವಯಸ್ಸಿನಲ್ಲಿ ಜೀವನ ನಡೆಸುವುದಕ್ಕೆ ಯಾವುದೇ ರೀತಿಯ ಆರ್ಥಿಕ ತೊಂದರೆ ಇಲ್ಲದಿದ್ದರೂ, ಕೇವಲ ದೇವರ ಮೇಲಿನ ಆನನ್ಯ ಭಕ್ತಿಯಿಂದ ಈ ಮಹತ್ಕಾರ್ಯವನ್ನು ಮಾಡುತ್ತಿರುವುದು ನನಗೆ ಅರಿವಾಗಿ ನಾನೇ ಅವರ ಬಗ್ಗೆ ತಿಳಿಯದೆ, ಉದರ ನಿಮಿತ್ತ ಬಹುಕೃತ ವೇಷಂ ಎಂದು ಮುಖ ಪುಟದಲ್ಲಿ ಹೇಳಿದ್ದಕ್ಕಾಗಿ ಪಶ್ವಾತ್ತಾಪವಾಗಿ ಅವರ ಬಳಿ ನನ್ನಿಂದಾಗಿ ಅರಿಯದೆ ಆದ ತಪ್ಪಿಗೆ ಕ್ಷಮೆಯನ್ನು ಕೋರಿ, ಮನಸ್ಸನ್ನು ಹಗುರ ಮಾಡಿಕೊಂಡೆ. ಶ್ರೀಯುತರಿಗೆ ಅವರು ಮಾಡುತ್ತಿರುವ ಕಾಯಕದಲ್ಲಿ ಯಾವುದೇ ರೀತಿಯ ಸಂಕೋಚವಿಲ್ಲದೆ ಹೆಚ್ಚಿನ ಆರ್ಥಿಕ ಪರಿಣಾಮಗಳನ್ನು ಯೋಚಿಸದೆ, ಕೇವಲ ಭಗವಂತನ ಸೇವೆ ಮಾಡುವ ಅವಕಾಶವಿದೆಯಲ್ಲಾ ಎಂದು ಧನಾತ್ಮಕವಾಗಿ ಆಲೋಚಿಸುತ್ತಿರುವ ಪರಿಣಾಮವಾಗಿ ಅವರು ಮಾಡುತ್ತಿರುವ ಎಲ್ಲಾ ಕೆಲಸ ಕಾರ್ಯಗಳೂ ಸುಲಭ ಸಾದ್ಯವಾಗಿದೆ. ಹಾಡುತ್ತಾ ಹಾಡುತ್ತಾ ರಾಗ ಎನ್ನುವಹಾಗೆ ಪ್ರತಿದಿನವೂ ಅದೇ ಮೆಟ್ಟಿಲುಗಳನ್ನು ನಿಶ್ಕಲ್ಮಶ ಮನಸ್ಸಿನಿಂದ ಧೃಡ ಸಂಕಲ್ಪದಿಂದ ಭಗಂತನನ್ನು ನೆನೆಯುತ್ತಾ ಹತ್ತುತ್ತಿರುವುದರಿಂದ ಅವರಿಗೆ ಅದು ಅಭ್ಯಾಸಗತವಾಗಿ ಹೋಗಿ ತಲೆಯ ಮೇಲಿರುವ ಭಾರವೂ ಅರಿವಾಗದೆ ಭಗವಂತನ ಸೇವೆಯನ್ನು ಮಾಡಲು ಸಾಧ್ಯವಾಗಿದೆ. ಈ ಜೀವ ಇರುವವರೆಗೂ ಆ ಭಗವಂತನ ಸೇವೆಯನ್ನು ಮಾಡುತ್ತಲೇ ಇರುವೆ ಎಂದು ಅವರು ಹೇಳುವಾಗ ಅವರ ಕಣ್ಣುಗಳಲ್ಲಿದ್ದ ಕ್ಷಾತ್ರ ತೇಜವನ್ನು ವರ್ಣಿಸಲಸದಳ ಮತ್ತು ಅದನ್ನು ಪ್ರತ್ಯಕ್ಷವಾಗಿ ನೋಡಿಯೇ ತೀರಬೇಕಷ್ಟೇ.

ನಾನು ಈಗಾಗಲೇ ಹತ್ತು ಹಲವು ಬಾರಿ ಹೇಳಿದಂತೆ, ಭಕ್ತಿ ಎನ್ನುವುದು ವ್ಯಾಪಾರವಲ್ಲ, ಅದು ಪ್ರದರ್ಶನಕ್ಕಿಟ್ಟ ವಸ್ತುವಲ್ಲ. ಅಂಧಾನುಕರಣೆ ಅಂತೂ ಅಲ್ಲವೇ ಅಲ್ಲ. ಅದು ನಮ್ಮಲ್ಲಿಯೇ ಭಗವಂತನನ್ನು ಕಾಣುವ ಪರಿ. ನಮ್ಮನ್ನೇ ನಾವು ಅರಿತು ಬಾಳುವ ಸರಿದಾರಿ. ಉತ್ಕಟ ಭಕ್ತಿಯ ಮೂಲಕ ನಮ್ಮೊಳಗೇ ಭಗವಂತನನ್ನು ಸಾಕ್ಷಾತ್ಕಾರಗೊಳಿಸಿ, ಯಾವುದೇ ಸಬೂಬು ಹೇಳದೆ ಭಗವಂತನನ್ನು ಒಲಿಸಿಕೊಳ್ಳುವ ಪರಿ. ಎಂಬ ವಾಕ್ಯಗಳನ್ನು ಅಕ್ಷರ ಸಹಾ ಪಾಲಿಸುತ್ತಿದ್ದರು.

ಹೀಗೆ ಮೇಲುಕೋಟೆಯ ಬಾಹುಬಲಿ ಎಂದೇ ಪ್ರಖ್ಯಾತರಾಗಿದ್ದ ಸುಮಾರು 70+ ವರ್ಷದ ಶ್ರೀ ಕಲಮೇಘಮ್ ರಾಮಸ್ವಾಮಿ ಅಯ್ಯಂಗಾರ್ ಅವರು ಜೂನ್ 14, 2022, ಮಂಗಳವಾರ ವಯೋಸಹಜ ಆರೋಗ್ಯ ಸಮಸ್ಯೆಗಳಿಂದ ವಿಧಿವಶರಾಗಿದ್ದಾರೆ ಎಂಬ ಸುದ್ಧಿ ಕೇಳಿ ಮನಸ್ಸಿಗೆ ಬಹಳವಾಗಿ ಆಘಾತವಾಯಿತು.

ಅವರ ಶ್ರದ್ಧೆ ಮತ್ತು ಭಕ್ತಿ ಇಂದಿನ ಯುವ ಜನರಿಗೆ ಪ್ರೇರಣಾದಾಯಕವೇ ಸರಿ. ಅವರ ಆತ್ಮಕ್ಕೆ ಅವರ ಆರಾಧ್ಯ ದೈವ ಆ ಮೇಲುಕೋಟೆಯ ಚಲುವ ನಾರಾಯಣಸ್ವಾಮಿ ಸದ್ಗತಿಯನ್ನು ನೀಡಲಿ ಎಂದು ನಾವು ನೀವು ಪ್ರಾರ್ಥಿಸೋಣ ಅಲ್ವೇ.

ನಾರಾಯಣ ನಾರಾಯಣ 🙏

ಏನಂತೀರೀ?
ನಿಮ್ಮವನೇ ಉಮಾಸುತ