ಅವಲಕ್ಕಿ ಪರೋಟ

parota2-removebg-preview

ಸಾಧಾರಣವಾಗಿ ಎಲ್ಲರ ಮನೆಗಳಲ್ಲಿಯೂ ಅವಲಕ್ಕಿ ಒಗ್ಗರಣೆ, ಹುಳಿಯವಲಕ್ಕಿ, ಇಲ್ಲವೇ ಖಾರದ ಅವಲಕ್ಕಿ ಬೆಳಿಗ್ಗೆ ತಿಂಡಿಗೇ ಮಾಡಿದ್ರೇ, ಮಧ್ಯಾಹ್ನದ ಊಟಕ್ಕೋ ಇಲ್ಲವೇ ರಾತ್ರಿಯ ಊಟಕ್ಕೆ ಗೋಧಿ ಚಪಾತಿ ಮತ್ತು ಪರೋಟ ಇದ್ದೇ ಇರುತ್ತದೆ. ಹಾಗಾಗಿ ಇವತ್ತು ಅವಲಕ್ಕಿ ಮತ್ತು ಗೋಧಿ ಹಿಟ್ಟು ಎರಡೂ ಸೇರಿಸಿ ಗರಿಗರಿಯಾದ ವಿಭಿನ್ನ ರುಚಿಯ ಅವಲಕ್ಕಿ ಪರೋಟ ತಯಾರಿಸುವುದನ್ನು ನಮ್ಮ ನಳಪಾಕ ಮಾಲಿಕೆಯಲ್ಲಿ ತಿಳಿಸಿಕೊಡುತ್ತಿದ್ದೇವೆ.

ಸುಮಾರು 4-5 ಜನರು ಸವಿಯಬಹುದಾದಷ್ಟು ಅವಲಕ್ಕಿ ಪರೋಟ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

  • ಅವಲಕ್ಕಿ – 150ಗ್ರಾಂ
  • ಗೋಧಿಹಿಟ್ಟು – 200ಗ್ರಾಂ
  • ಜೀರಿಗೆ – 1/2 ಚಮಚ
  • ದನಿಯಾ ಪುಡಿ – 1/2 ಚಮಚ
  • ಗರಂ ಮಸಾಲ ಪುಡಿ – 1/4 ‍ಚಮಚ
  • ಅರಿಶಿನ – ಒಂದು ಚಿಟಿಕೆ
  • ಮಧ್ಯಮ ಗಾತ್ರದ ಬೇಯಿಸಿದ ಆಲೂಗೆಡ್ಡೆ – 2
  • ಹಸಿಮೆಣಸಿನ ಕಾಯಿ – 6 (ಖಾರಕ್ಕೆ ತಕ್ಕಷ್ಟು)
  • ಶುಂಠಿ – 1 ಇಂಚು
  • ಬೆಳ್ಳುಳ್ಳಿ – 6 ಎಸಳುಗಳು
  • ಕೊತ್ತಂಬರಿ ಸೊಪ್ಪು – ಸ್ವಲ್ಪ
  • ಕರಿಬೇವು – ಸ್ವಲ್ಪ
  • ಉಪ್ಪು- ರುಚಿಗೆ ತಕ್ಕಷ್ಟು

ಅವಲಕ್ಕಿ ಪರೋಟ ತಯಾರಿಸುವ ವಿಧಾನ

  • ಎರಡು ಆಲೂಗೆಡ್ಡೆಗಳನ್ನು ಚೆನ್ನಾಗಿ ತೊಳೆದು ಬೇಯಿಸಿ ಆರಿದ ನಂತರ ಸಿಪ್ಪೆ ತೆಗೆದಿಟ್ಟು ಕೊಳ್ಳಿ
  • ಜೀರಿಗೆ, ಹಸೀ ಮೆಣಸಿನಕಾಯಿ, ಶುಂಠಿ, ಬೆಳ್ಳುಳ್ಳಿ, ಕೊತ್ತಂಬರಿ ಮತ್ತು ಕರಿಬೇವು ಸೊಪ್ಪನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ
  • ಅವಲಕ್ಕಿಯನ್ನು ಸ್ವಲ್ಪ ಜರಡಿಯಾಡಿಸಿ ಶುದ್ಧಿ ಮಾಡಿಕೊಂಡು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿ ಕೊಳ್ಳಿ
  • ಒಂದು ಅಗಲವಾದ ಪಾತ್ರೆಯನ್ನು ತೆಗೆದುಕೊಂಡು ಅದರಲ್ಲಿ ಗೋಧಿಹಿಟ್ಟು, ಬೇಯಿಸಿದ
    ಆಲೂಗೆಡ್ಡೆ, ರುಬ್ಬಿಕೊಂಡ ಮಿಶ್ರಣದ ಜೊತೆ, ಪುಡಿ ಮಾಡಿಟ್ಟುಕೊಂಡ ಅವಲಕ್ಕಿ, ರುಚಿಗೆ ತಕ್ಕಷ್ಟು ಉಪ್ಪು, ಅರಿಶಿನ, ಗರಂ ಮಸಾಲ ಮತ್ತು ದನಿಯಾಪುಡಿಯನ್ನು ಸೇರಿಸಿ ಗಟ್ಟಿಯಾಗಿ ಚಪಾತಿ ಹದಕ್ಕೆ ಕಲಸಿಕೊಂಡು ಸುಮಾರು 1/2ಗಂಟೆಗಳ ಕಾಲ ಒಂದು ತಟ್ಟೆಯನ್ನು ಮುಚ್ಚಿಡಿ.
  • ಕಲೆಸಿದ ಹಿಟ್ಟುಗಳನ್ನು ಸಣ್ಣ ಸಣ್ಣದಾದ ಉಂಡೆಗಳನ್ನಾಗಿ ಮಾಡಿಕೊಂಡು ಪರೋಟದ ಗಾತ್ರ ಮತ್ತು ನಿಮಗೆ ಇಷ್ಟ ಬಂದ ಆಕಾರಕ್ಕೆ ತಕ್ಕಂತೆ ಲಟ್ಟಿಸಿ ಬಿಸಿಯಾದ ಕಾವಲಿಯ ಮೇಲೆ ಎರಡೂ ಬದಿಯಲ್ಲೂ ಬೇಯಿಸಿದರೆ ರುಚಿ ರುಚಿಯಾದ ಬಿಸಿ ಬಿಸಿಯಾದ ಅವಲಕ್ಕಿ ಪರೋಟ ಸವಿಯಲು ಸಿದ್ಧ.

parota

ಈ ಪರೋಟವನ್ನು ಯಾವುದೇ ಉಪ್ಪಿನ ಕಾಯಿ, ಚೆಟ್ನೀಪುಡಿ, ಗೊಜ್ಜು, ತುಪ್ಪಾ, ಬೆಣ್ಣೆ ಮತ್ತು ಮೊಸರಿನೊಂದಿಗೆ ಸವಿಯಲು ಮಜವಾಗಿರುತ್ತದೆ.

ಇನ್ನೇಕೆ ತಡಾ, ಓದ್ಕೋಳೀ, ಮಾಡ್ಕೊಳೀ, ತಿನ್ಕೋಳಿ.

ಏನಂತೀರೀ?
ನಿಮ್ಮವನೇ ಉಮಾಸುತ

ಮನದಾಳದ ಮಾತು : ಗೋಧಿ ಹಿಟ್ಟಿನೊಂದಿಗೆ ಅವಲಕ್ಕಿ ಬೆರೆಸುವುದರಿಂದ ಪರೋಟ ವಿಭಿನ್ನವಾದ ರುಚಿಯಾಗಿ ಮತ್ತು ಗರಿ ಗರಿಯಾಗಿರುತ್ತದೆ. ಆಲೂಗಡ್ಡೆಯ ಬದಲು ಪುದೀನಾ, ಪಾಲಕ್ ಇಲ್ಲವೇ ಮೆಂತ್ಯೇ ಸೊಪ್ಪು ಅಥವಾ ಬೇಯಿಸಿದ ಹೂಕೋಸು (ಗೋಬಿ) ಸಹಾ ಬಳಸ ಬಹುದಾಗಿದೆ.

ಈ ಪಾಕಶಾಸ್ತ್ರದ ವಿಧಾನವನ್ನು ತಿಳಿಸಿಕೊಟ್ಟ ಶ್ರೀ ಆನಂದ್ ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳು

ಖಾರಾ ಅವಲಕ್ಕಿ (ಚೂಡಾ)

ಈಗಂತೂ ಮಳೆಗಾಲ. ಸಂಜೆ ಧೋ ಎಂದು ಮಳೆ ಬೀಳುತ್ತಿದ್ದರೆ, ನಾಲಿಗೆ ಬಿಸಿ ಬಿಸಿಯಾದ ಮತ್ತು ಖಾರವಾದ  ಕುರುಕಲನ್ನು ಬಯಸುತ್ತದೆ. ಚಹಾದ ಜೊತೆ ಚೂಡಾ ಹಂಗಾ ಎನ್ನುವಂತೆ ಬಿಸಿಬಿಸಿಯಾದ ಕಾಫೀ/ಟೀ  ಜೊತೆ ಖಾರದ ಅವಲಕ್ಕಿ ಅರ್ಥಾತ್ ಚೂಡ ತಿನ್ನಲು ಮಜವಾಗಿರುತ್ತದೆ. ಹಾಗಾಗಿ ನಮ್ಮ ನಳಪಾಕ ಮಾಲಿಕೆಯಲ್ಲಿ ಖಾರದ ಅವಲಕ್ಕಿಯನ್ನು ಮಾಡುವುದನ್ನು ತಿಳಿಸಿಕೊಡುತ್ತಿದ್ದೇವೆ.

ಸುಮಾರು 4-5 ಜನರು ಸವಿಯಬಹುದಾದಷ್ಟು ಖಾರ ಅವಲಕ್ಕಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

  • ತೆಳು(ಪೇಪರ್) ಅವಲಕ್ಕಿ 4 ಬಟ್ಟಲು
  • ಕಡಲೆಬೀಜ – 2 ಚಮಚ
  • ಹುರಿಗಡಲೆ –  2 ಚಮಚ
  • ಸಾಸಿವೆ – 1/2 ಚಮಚ
  • ತೆಳ್ಳಗೆ ಹೆಚ್ಚಿದ ಒಣ ಕೊಬ್ಬರಿ – 1/2 ಬಟ್ಟಲು
  • ಸಕ್ಕರೆ – 1/2 ಚಮಚ
  • ಚಿಟುಕಿ ಅರಿಶಿಣ
  • ಚಿಟುಕಿ ಇಂಗು
  • ಗೋಡಂಬಿ – 10 (ಐಚ್ಚಿಕ)
  • ಒಣದ್ರಾಕ್ಷಿ – 2 ಚಮಚ (ಐಚ್ಚಿಕ)
  • ಒಣಮೆಣಸಿನಕಾಯಿ – 4-6
  • ಹೆಚ್ಚಿದ ಹಸೀ ಮೆಣಸಿನಕಾಯಿ – 4-6
  • ಕರಿಬೇವಿನ ಎಸಳು 10-15
  • ಬೆಳ್ಳುಳ್ಳಿ – 4-6 ಎಸಳು (ಐಚ್ಚಿಕ)
  • ಅಡುಗೆ ಎಣ್ಣೆ – 4 ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ಖಾರದ ಅವಲಕ್ಕಿ ತಯಾರಿಸುವ ವಿಧಾನ

  • WhatsApp Image 2020-07-10 at 9.48.52 AMಮೊದಲು ತೆಳು ಅವಲಕ್ಕಿಯನ್ನು ಬಿಸಿಲಿನಲ್ಲಿ ಒಂದೆರಡು ದಿನಗಳ ಇಟ್ಟು ಚೆನ್ನಾಗಿ ಒಣಗಿಸಿಕೊಳ್ಳಿ
  • ಒಂದು ಅಗಲ ಬಾಣಲೆಗೆ ಎಣ್ಣೆ ಹಾಕಿ, ಎಣ್ಣೆ ಕಾದ ನಂತರ, ಸಾಸಿವೆ ಸಿಡಿಸಿಕೊಳ್ಳಿ
  • ಈಗ ಕಡಲೇಕಾಯಿ ಜೀಜ, ಗೋಡಂಬಿ ಚೆನ್ನಾಗಿ ಕೆಂಪಗೆ ಬರುವಂತೆ ಹುರಿದುಕೊಂಡು ಅದಕ್ಕೆ ಹುರಿಗಡಲೆ ಮತ್ತು ದ್ರಾಕ್ಷಿಯನ್ನು ಸೇರಿಸಿ ಚೆನ್ನಾಗಿ ಹುರಿದುಕೊಳ್ಳಿ
  • ಈಗ ಕರಿಬೇವು, ಇಂಗು, ಕತ್ತರಿಸಿದ ಹಸಿ ಮೆಣಸಿನಕಾಯಿ, ಒಣಮೆಣಸಿನಕಾಯಿ ಕತ್ತರಿಸಿ ಹಾಕಿ, ಬೆಳ್ಳುಳ್ಳಿಯನ್ನೂ ಸೇರಿಸಿ ಹಸೀ ಹೋಗುವವರೆಗೂ ಹುರಿದುಕೊಳ್ಳಿ
  • ತೆಳ್ಳಗೆ ಕತ್ತರಿಸಿದ ಒಣ ಕೊಬ್ಬರಿ ಚೂರುಗಳನ್ನು ಅದಕ್ಕೆ ಹಾಕಿ ಕೆಂಪಗೆ ಬರುವವಎಗೂ ಹುರಿದುಕೊಳ್ಳಿ
  • ಕಡೆಗೆ ಸಕ್ಕರೆ, ಅರಿಶಿನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ಕೈಯ್ಯಾಡಿಸಿ.
  • ಈ ಮಿಶ್ರಣಕ್ಕೆ  ತೆಳು ಅವಲಕ್ಕಿ ಸೇರಿಸಿ ಚೆನ್ನಾಗಿ ಕಲೆಸಿ ಸುಮಾರು ಐದಾರು ನಿಮಿಷಗಳಷ್ಟು ಕಾಲ ಕೈಯ್ಯಾಡಿಸಿದಲ್ಲಿ ಬಿಸಿ ಬಿಸಿಯಾದ ಮತ್ತು ಅಷ್ಟೇ ರುಚಿ ರುಚಿಯಾದ ಖಾರದ ಅವಲಕ್ಕಿ (ಚೂಡಾ ಅವಲಕ್ಕಿ) ಸಿದ್ಧ

ಇದನ್ನು ಗಾಳಿಯಾಡದಂತಹ ದಬ್ಬದಲ್ಲಿ ಮುಚ್ಚಿಟ್ಟು ಸುಮಾರು ಒಂದು ವಾರಗಳ ಕಾಲ ಇಟ್ಟು ತಿನ್ನಬಹುದು. ಇದನ್ನು ಹಾಗೆಯೂ ತಿನ್ನಬಹುದು ಇಲ್ಲವೇ ಕಾಫೀ ಅಥವಾ ಚಹಾದ ಜೊತೆ ತಿನ್ನಲು ಮಜವಾಗಿರುತ್ತದೆ.

ರುಚಿಕರವಾದ ಖಾರದ ಅವಲಕ್ಕಿ (ಚೂಡಾ ಅವಲಕ್ಕಿ)  ಮಾಡುವುದನ್ನು ತಿಳಿಸಿ ಕೊಟ್ಟಿದ್ದೇವೆ. ಇನ್ನೇಕೆ ತಡಾ, ಓದ್ಕೋಳೀ, ಮಾಡ್ಕೊಳೀ, ತಿನ್ಕೋಳಿ ಮತ್ತು ಈ ರುಚಿಯನ್ನು ನಿಮ್ಮ ಮನೆಯವರೆಲ್ಲರೂ ಮೆಚ್ಚಿದ ನಂತರ ನಮಗೆ ತಿಳಿಸುವುದನ್ನು ಮಾತ್ರ ಮರೆಯಬೇಡಿ.

ಏನಂತೀರೀ?

ಮನದಾಳದ ಮಾತು : ನಮ್ಮ ಸಂಪ್ರದಾಯದಲ್ಲಿ ಅವಲಕ್ಕಿಗೆ ಬಹಳ ಮಹತ್ವವಿದೆ. ಮಡಿ, ಹುಡಿ ನೈವೇದ್ಯ, ತಿಂಡಿ, ಫಲಹಾರ ಎಲ್ಲದಕ್ಕೂ ಅವಲಕ್ಕಿ ಸೈ. ಕೃಷ್ಣನ ಮನೆಗೆ ಸಹಾಯ ಬೇಡಲು ಬಂದ ಪರಮಾಪ್ತ ಕುಚೇಲನೂ ಹಿಡಿಯವಲಕ್ಕಿಯನ್ನೇ ತನ್ನ ಶಲ್ಯದಲ್ಲಿ ತಂದಿದ್ದ ಎಂದು ಹೇಳುತ್ತದೆ ನಮ್ಮ ಪುರಾಣಗಳು.  ಹಾಗಾಗಿ ಅವಲಕ್ಕಿಯನ್ನು ಯಾರೂ ಬೇಡಾ ಎನ್ನುವುದಿಲ್ಲ ಮತ್ತು ಬೇಡ ಎನ್ನಬಾರದೂ ಎನ್ನುತ್ತದೆ ನಮ್ಮ ಶಾಸ್ತ್ರ. ಒಮ್ಮೆ ನಿಮ್ಮ ಮನೆಗಳಲ್ಲಿ ಈ ಖಾರದ ಅವಲಕ್ಕಿಯನ್ನು ಪ್ರಯತ್ನಿಸಿ ನೋಡಿ ಅಭಿಪ್ರಾಯ ತಿಳಿಸಿ.