ಸಮೀರ್ ವಾಂಖೆಡೆ

ವಾಂಖೆಡೆ ಎಂಬ ಹೆಸರು ಕೇಳಿದ ಕೂಡಲೇ ಕ್ರಿಕೆಟ್ ಪ್ರಿಯರಿಗೆಲ್ಲಾ ಥಟ್ ಅಂತಾ ನೆನಪಾಗೋದೇ, ಮುಂಬೈನಲ್ಲಿರುವ ಸುಪ್ರಸಿದ್ದ ವಾಂಖೆಡೆ ಕ್ರೀಡಾಂಗಣ. 1974 ರಲ್ಲಿ ಮುಂಬೈ ಕ್ರಿಕೆಟ್ ಸಂಘದ ಅಧ್ಯಕ್ಷರಾಗಿದ್ದ ಬ್ಯಾರಿಸ್ಟರ್ ಶೇಷರಾವ್ ವಾಂಖೆಡೆ ನೆನಪಿನಾರ್ಥ ಆ ಕ್ರೀಡಾಂಗಣಕ್ಕೆ ವಾಂಖೆಡೆ ಕ್ರೀಡಾಂಗಣ ಎಂಬ ಹೆಸರನ್ನಿಡಲಾಗಿದೆ. ಆದರೆ ಕಳೆದ ಎರಡು ಮೂರು ವಾರಗಳಿಂದ ದೇಶಾದ್ಯಂತ ಪ್ರಚಲಿವಿರುವ ಮತ್ತೊಂದು ಹೆಸರೇ ಸಮೀರ್ ವಾಂಖೆಡೆ. ಯಾರೀ ಸಮೀರ್ ವಾಂಖೆಡೆ? ಅವರ ಸಾಧನೆಗಳೇನು? ಅವರ ಹೆಸರು ಈಗ ಏಕೆ ಪ್ರಚಲಿತದಲ್ಲಿದೆ? ಎಂಬುದನ್ನು ಸವಿವರವಾಗಿ ತಿಳಿಯೋಣ.

samir8

2004ರ ಬ್ಯಾಚ್ ಇಂಡಿಯನ್ ರೆವಿನ್ಯೂ ಸರ್ವೀಸ್ (IRS) ಅಧಿಕಾರಿಯಾದ 42 ವರ್ಷದ ಸಮೀರ್ ವಾಂಖೆಡೆ ಮೂಲತಃ ಮುಂಬೈನವರೇ ಆಗಿದ್ದು ಅವರ ತಂದೆಯೂ ನಿವೃತ್ತ ಪೊಲೀಸ್ ಅಧಿಕಾರಿಗಳಾಗಿದ್ದಾರೆ. 2017ರಲ್ಲಿ ಸಮೀರ್ ಮರಾಠಿ ನಟಿ ಕ್ರಾಂತಿ ರೆಡ್ಕರ್‌ರನ್ನು ವಿವಾಹವಾಗಿದ್ದಾರೆ. ಸಮೀರ್ ಎನ್‍ಸಿಬಿಯಲ್ಲಿ ಸೇವೆ ಸಲ್ಲಿಸುವ ಮುನ್ನ ಏರ್ ಇಂಟೆಲಿಜೆನ್ಸ್ ಯೂನಿಟ್ (AIU) ಮತ್ತು ರಾಷ್ಟ್ರೀಯ ತನಿಖಾ ಏಜೆನ್ಸಿಯ ಹೆಚ್ಚುವರಿ ಎಸ್ಪಿಯಾಗಿ ಸೇವೆ ಸಲ್ಲಿಸಿರುವುದಲ್ಲದೇ, ಕಂದಾಯ ಗುಪ್ತಚರ ನಿರ್ದೇಶನಾಲಯದಲ್ಲೂ (DRI) ಜಂಟಿ ಆಯುಕ್ತರಾಗಿಯೂ ಕೆಲಸ ಮಾಡಿದ್ದವರು, ತಮ್ಮ ಸೇವಾ ಅವಧಿಯಲ್ಲಿ, ನ್ಯಾಯಯುತವಾಗಿ ತೆರಿಗೆಯನ್ನು ಕಟ್ಟದೇ ಸರ್ಕಾರಕ್ಕೆ ವಂಚಿಸುತ್ತಿದ್ದ ಸುಮಾರು 200 ಸೆಲೆಬ್ರಿಟಿಗಳು ಸೇರಿದಂತೆ 2,500 ಜನರನ್ನು ಪತ್ತೆಹಚ್ಚಿ ಕೇವಲ ಎರಡು ವರ್ಷಗಳಲ್ಲಿ ಅವರಿಂದ ದಂಡ ಸಹಿತ 87 ಕೋಟಿ ಆದಾಯವನ್ನು ರಾಜ್ಯದ ಬೊಕ್ಕಸಕ್ಕೆ ಸೇರುವಂತೆ ಮಾಡಿದ ಅತ್ಯಂತ ಪ್ರಾಮಾಣಿಕ, ನಿರ್ಭೀತ, ಶಿಸ್ತುಬದ್ಧ ಅಧಿಕಾರಿ ಎಂದು ಹೆಸರು ಮಾಡಿದ್ದಾರೆ.

samir7

ಕಳೆದ ವರ್ಷ ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಸತ್ತ ನಂತರ, ಅವನ ಸಾವಿನ ಸುತ್ತ ಮಾದಕ ದ್ರವ್ಯಗಳ ಜಾಡಿದೆ ಎಂಬುದನ್ನು ಅರಿತ ತನಿಖಾದಳ ಡ್ರಗ್ಸ್ ಆ್ಯಂಗಲ್ (Drugs Angle) ಎಂದು ಕರೆಯಲ್ಪಡುವ ತನಿಖೆ ಪ್ರಾರಂಭಿಸಿದಾಗಿನಿಂದ ಮಾದಕದ್ರವ್ಯ ನಿಯಂತ್ರಣ ಬ್ಯೂರೋ (NCB ) ಪ್ರಾಮುಖ್ಯತೆ ಪಡೆದು ಈ ಕಾರ್ಯಾಚರಣೆಗೆ ದಕ್ಷ ಅಧಿಕಾರಿ ಸಮೀರ್ ವಾಂಖೆಡೆ ಅವರಿಗೆ ನೇತೃತ್ವವಹಿಸಲಾಗಿದೆ. ಸಮೀರ್ ಮಾದಕ ದ್ರವ್ಯ ಜಾಲಗಳು ಹಾಗೂ ಅದರ ಹಿಂದಿನ ಕಾಣದ ಕೈಗಳನ್ನು ಬಗ್ಗು ಬಡಿದು ಮುಂಬೈ ನಗರವನ್ನು ಮಾದಕದ್ರವ್ಯದಿಂದ ಮುಕ್ತಗೊಳಿಸುವ ಸಂಕಲ್ಪತೊಟ್ಟು ನಿರ್ಭೀತಿಯಿಂದ ಕಾರ್ಯ ನಿರ್ವಹಿಸುತ್ತಿದ್ದಾರೆ.

samir5

ಇದೇ ಅಕ್ಟೋಬರ್ 3 ರಂದು ಮುಂಬೈ ನಗರದಲ್ಲಿ ಸಮುದ್ರ ಮಧ್ಯೆ ಕ್ರೂಸ್ ಒಂದರಲ್ಲಿ ರೇವ್ ಪಾರ್ಟಿ ನಡೆಯುತ್ತಿದೆ ಎಂಬ ಸಂದೇಶ ಸಿಕ್ಕ ನಂತರ ಸಮೀರ್ ವಾಂಖೆಡೆ ನೇತೃತ್ವದಲ್ಲಿ ಧಾಳಿ ನಡೆಸಿದಾಗ ಅ‍‍ಚ್ಚರಿ ಎನ್ನುವಂತೆ ಹಿಂದಿ ಚಲನಚಿತ್ರರಂಗದ ಖ್ಯಾತ ನಟ ಶಾರೂಖ್ ಖಾನ್ ಅವರ ಪುತ್ರ ಆರ್ಯನ್ ಖಾನ್ ಅವರನ್ನೂ ಒಳಗೊಂಡಂತೆ ಸುಮಾರು ಖ್ಯಾತನಾಮರ ಮಕ್ಕಳುಗಳನ್ನು ಬಂಧಿಸಿ ತನಿಖೆ ನಡೆಸಲಾಗುತ್ತಿದೆ. 23 ವರ್ಷದ ತರುಣ ಆರ್ಯನ್ ಖಾನ್ ಬಂಧನದ ಸುದ್ದಿ ತಿಳಿಯುತ್ತಿದ್ದಂತೆಯೇ ಹಲವಾರು ಬಾಲಿವುಡ್ ನಟ ನಟಿಯರು ನಾಚಿಕೆ ಮಾನ ಮರ್ಯಾದೆ ಇಲ್ಲದೇ ಆರ್ಯನ್ ಖಾನ್ ಪರ ವಹಿಸಿದ್ದಲ್ಲದೇ ಅಮಾಯಕರನ್ನು ಬಂಧಿಸಲಾಗಿದೆ ಎಂಬ ವಾದವನ್ನು ಇಟ್ಟರೇ ಇಂತಹ ಸಮಯಕ್ಕೇ ಕಾಯುತ್ತಿರುವ ಕೆಲ ಸಮಯ ಸಾಧಕರು ಇದಕ್ಕೂ ಕೋಮುವಾದವನ್ನು ಬಳಿದು ಆರ್ಯನ್ ಮುಸಲ್ಮಾನರಾಗಿರುವ ಕಾರಣ ಅವರ ವಿರುದ್ಧ ಇಲ್ಲದ ಸಲ್ಲದ ಆರೋಪದೊಂದಿಗೆ ನ್ಯಾಯಾಂಗ ಬಂಧನ ಮಾಡಲಾಗಿದೆ ಎಂಬ ವಾದವನ್ನು ಮಂಡಿಸಿರುವುದು ನಿಜಕ್ಕೂ ದುರಾದೃಷ್ಟವೇ ಸರಿ.

samir2

ಡ್ರಗ್ಸ್ ಪ್ರಕರಣದಲ್ಲಿ ಶಾರುಖ್ ಖಾನ್ ಮಗ ಆರ್ಯನ್ ಖಾನ್ ಅವರನ್ನು ಬಂಧಿಸಿದ ಕೂಡಲೇ, ದಕ್ಷ ಎನ್ಸಿಬಿ ಅಧಿಕಾರಿ ಸಮೀರ್ ವಾಂಖೆಡೆಯವರಿಗೆ ಸಾಕಷ್ಟು ತೊಂದರೆ ನೀಡಲು ಒಂದು ತಂಡವೇ ಸಿದ್ಧವಾಗಿದೆ. ಎಲ್ಲದ್ದಕ್ಕಿಂತಲೂ ಆಶ್ಚರ್ಯವೆಂದರೆ ಜನರ ಪರವಾಗಿ ಪ್ರಾಮಾಣಿಕವಾಗಿ ಮತ್ತು ನಿಸ್ವಾರ್ಥವಾಗಿ ಸೇವೆ ಸಲ್ಲಿಸುತ್ತೇನೆ ಎಂದು ಜನರ ಮುಂದೆ ಪ್ರಮಾಣವಚನ ಸ್ವೀಕರಿಸಿ ಮಹಾರಾಷ್ಟ್ರಾದ ಶಿವಸೇನೆ, ಕಾಂಗ್ರೇಸ್ ಮತ್ತು ಎನ್.ಸಿ.ಪಿ ಮೈತ್ರಿಯ ಸರ್ಕಾರದಲ್ಲಿ ಸಚಿವರಾಗಿರುವ ನವಾಬ್ ಮಲಿಕ್ ಸಮೀರ್ ವಾಂಖೆಡೆ ವಿರುದ್ಧ ತಿರುಗಿ ಬಿದ್ದಿದ್ದು. ಸಮೀರ್ ಅವರು ವೈಯಕ್ತಿಕ ದಾಖಲೆ ಹಾಗೂ ಜನ್ಮ ಪ್ರಮಾಣ ಪತ್ರವನ್ನು ನಕಲು ಮಾಡಿದ್ದಾರೆ. ಅವರು ಹುಟ್ಟಿನಿಂದ ಮುಸ್ಲಿಂ ಆಗಿದ್ದು, ಅವರ ನಿಜವಾದ ಹೆಸರು ಸಮೀರ್ ದಾವೂದ್ ವಾಂಖೆಡೆ ಎಂದು ಟೀಕೆ ಮಾಡಿದ್ದಲ್ಲದೇ ಈ ಪ್ರಕರಣದಲ್ಲಿ ಸುಮಾರು 25 ಕೋಟಿಗಳಷ್ಟು ಲಂಚವನ್ನು ಸಮೀರ್ ತಮ್ಮ ತಂಡದವರ ಮೂಲಕ ಪಡೆದಿದ್ದಾರೆ ಎಂಬ ಆರೋಪವನ್ನು ಮಾಡಿದ್ದಲ್ಲದೇ, ಲಾಕ್ ಡೌನ್ ಸಂದರ್ಭದಲ್ಲಿ ಸಮೀರ್ ಮಾಲ್ಡೀವ್ಸ್ ನಲ್ಲಿದ್ದು ಅಲ್ಲಿಂದಲೇ, ಅವರು ಬಾಲಿವುಡ್ ಸೆಲೆಬ್ರಿಟಿಗಳನ್ನು ಟಾರ್ಗೆಟ್ ಮಾಡಿ ಸುಲಿಗೆ ಮಾಡುತ್ತಿದ್ದಾರೆ ಎಂಬ ಆರೋಪವನ್ನು ಮಾಡುವ ಮೂಲಕ ಸಚಿವ ನವಾಬ್ ಮಲಿಕ್ ಇಡೀ ಪ್ರಕರಣದ ದಿಕ್ಕನ್ನು ತಪ್ಪಿಸಲು ಷಡ್ಯಂತ್ರ ಮಾಡಲು ಕಟಿ ಬದ್ಧರಾಗಿ ನಿಂತಿರುವುದು ಸ್ಸಷ್ಟವಾಗಿ ಗೋಚರಿಸುತ್ತಿರುವುದು ನಿಜಕ್ಕೂ ಅಸಹ್ಯಕರವಾಗಿದೆ.

ಬಾಲಿವುಡ್ ನಟ ನಟಿಯರು ನಾನಾ ರೀತಿಯ ಕಾರಣಗಳಿಂದ ಬಂಧನವಾದಾಗ ಅವರ ವಿರುದ್ಧ ತನಿಖೆ ನಡೆಸುವ ಶಕ್ತಿಯನ್ನು ಕುಗ್ಗಿಸುವ ಸಲುವಾಗಿ ಈ ರೀತಿಯ ಮಾಫಿಯಾ ಶಕ್ತಿಗಳು ಹುಟ್ಟಿಕೊಳ್ಳುವುದು ಹೊಸತೇನಲ್ಲ. ಬಾಲಿವುಡ್ಡಿನ ಮತ್ತೊಬ್ಬ ಖ್ಯಾ(ಕು)ತ ನಟ ಸಲ್ಮಾನ್ ಖಾನ್ ಚಲಾಯಿಸುತ್ತಿದ್ದ ಲ್ಯಾಂಡ್ ಕ್ರೂಸರ್ ಪಾದಚಾರಿ ಮಾರ್ಗದಲ್ಲಿ ಮಲಗಿದ್ದ ಐದು ಜನರರ ಮೇಲೆ ಹರಿದು ಅವರೆಲ್ಲರೂ ಸ್ಥಳದಲ್ಲೇ ಅಸುನೀಗಿದಾಗ ಅದೇ ಸ್ಥಳದಲ್ಲೇ ಕರ್ತವ್ಯ ನಿರ್ವಹಿಸುತ್ತಿದ್ದ 1998 ರ ಬ್ಯಾಚ್‌ಗೆ ಸೇರಿದ ರವೀಂದ್ರ ಪಾಟೀಲ್ ಪ್ರಮುಖ ಸಾಕ್ಷಿಯಾಗಿ ನ್ಯಾಯಾಲಯದಲ್ಲಿ ಸತ್ಯವನ್ನು ಹೇಳಿದ ಕಾರಣ, ಅವರ ಹೇಳಿಕೆಯ ಆಧಾರದ ಮೇಲೆ ಸಲ್ಮಾನ್‌ಗೆ 5 ವರ್ಷಗಳ ಶಿಕ್ಷೆ ವಿಧಿಸಲಾಯಿತು.

patil

ನ್ಯಾಯಾಲಯದಲ್ಲಿ ತನಿಖೆ ನಡೆಯುತ್ತಿದ್ದಾಗಲೇ ರವೀಂದ್ರ ಪಾಟೀಲ್ ಅವರಿಗೆ ತಮ್ಮ ಹೇಳಿಕೆಯನ್ನು ಬದಲಾಯಿಸುವಂತೆ ಒತ್ತಡವನ್ನು ಹೇರಲಾಗಿ ಅದಕ್ಕೆ ಜಗ್ಗದಿದ್ದಾಗ. ಅನೇಕ ಬೆದರಿಕೆಗಳನ್ನು ಹಾಕಲಾಯಿತು. ಅದಕ್ಕೂ ಜಗ್ಗದಿದ್ದಾಗ ಅವರ ಮೇಲೆ 20 ಕ್ಕೂ ಹೆಚ್ಚು ಕ್ರಿಮಿನಲ್ ಮೊಕದ್ದಮೆಗಳನ್ನು ಹಾಕುವ ಮುಖಾಂತರ ಅವರನ್ನು ಕೆಲಸದಿಂದ ವಜಾಗೊಳಿಸಲಾಯಿತು. ಸತ್ಯ ಹೇಳಿದ್ದಕ್ಕಾಗಿ ಈ ಪರಿಯ ಕಷ್ಟವನ್ನು ಅನುಭವಿಸಬೇಕಾಗಿ ಬಂದ ಕಾರಣ ರವೀಂದ್ರ ಅವರು ಮಾನಸಿಕ ಒತ್ತಡಕ್ಕೆ ಒಳಗಾಗಿ ರಸ್ತೆ ರಸ್ತೆಗಳಲ್ಲಿ ಭಿಕ್ಷೆ ಬೇಡುವಂತಾಯಿತು. ನಂತರದ ದಿನಗಳಲ್ಲಿ ಖಾಯಿಲೆಗೆ ತುತ್ತಾಗಿ ಸರ್ಕಾರಿ ಟಿಬಿ ಆಸ್ಪತ್ರೆಯಲ್ಲಿ ತಿಂಗಳಾನು ಗಟ್ಟಲೆ ನರಳಿ ನರಳಿ ಸಾವನ್ನಪ್ಪಿದ್ದು ನಿಜಕ್ಕೂ ದುಃಖಕರವೇ ಸರಿ.

ಈಗ ಅದೇ ಕಾರ್ಯತಂತ್ರವನ್ನು ಆರ್ಯನ್ ಖಾನ್ ಕೇಸ್ ನಲ್ಲಿಯೂ ಮುಂದುವರೆಸಿ ಸಮೀರ್ ವಾಖೆಂಡೆ ಅವರ ವಿರುದ್ದ ವಯಕ್ತಿಕವಾದ ಆರೋಪಗಳನ್ನು ಮಾಡುತ್ತಿರುವ ಮುಖಾಮ್ತರ ದೊಡ್ಡ ಷಡ್ಯಂತ್ರ ನಡೆಸುತ್ತಿರುವುದು ಸ್ವಷ್ಟವಾಗಿ ಗೋಚರಿಸುತ್ತಿದೆ.

samir3

ನಿಜ ಹೇಳಬೇಕೆಂದರೆ, ಜೂನ್ 2007 ರಲ್ಲಿ ಪುಣೆಯಲ್ಲಿ ರಾಜ್ಯ ಅಬಕಾರಿ ಇಲಾಖೆಯ ಹಿರಿಯ ಪೊಲೀಸ್ ಇನ್ಸ್‌ಪೆಕ್ಟರ್ ಆಗಿ ನಿವೃತ್ತರಾದ ಸಮೀರ್ ಅವರ ತಂದೆ ಜ್ಞಾನದೇವ್ ಕಚ್ರುಜಿ ವಾಂಖೆಡೆ ಅವರು ಜನ್ಮತಃ ಹಿಂದುಗಳಾಗಿದ್ದು, 6 ವರ್ಷದ ಹಿಂದೆಯೇ ಮೃತಪಟ್ಟಿರುವ ಜಹೀದಾ ಎಂಬ ಮುಸ್ಲಿಂ ಮಹಿಳೆಯನ್ನು ವಿವಾಹವಾಗಿ ಸಮೀರ್ ವಾಂಖೆಡೆ ಮತ್ತು ಕ್ರಿಮಿನಲ್ ಲಾಯರ್ ಆಗಿರುವ ಯಾಸ್ಮಿನ್ ವಾಂಖೆಡೆ ಎಂಬ ಇಬ್ಬರು ಮಕ್ಕಳಿದ್ದಾರೆ. 2006 ರಲ್ಲಿ ತಮ್ಮ ತಾಯಿಯ ಆಸೆಯಂತೆ ಮುಸ್ಲಿಂ ಸಂಪ್ರದಾಯದಂತೆಯೇ ಸಮೀರ್ ಶಬಾನಾ ಖುರೈಶಿ ಎಂಬ ಮುಸ್ಲಿಂ ಮಹಿಳೆಯನ್ನು ವಿವಾಹವಾದರೂ, ಮುಸ್ಲಿಂ ಆಗಿ ಮತಾಂತರವಾಗಿರಲಿಲ್ಲ. ನಂತರ 2016 ರಲ್ಲಿ ಸಿವಿಲ್ ನ್ಯಾಯಾಲಯದ ಮೂಲಕ ಪರಸ್ಪರ ಒಪ್ಪಂದದ ಮುಖಾಂತರ ಅವರಿಬ್ಬರಿಗೂ ವಿಚ್ಛೇದನವಾದ ನಂತರ 2017 ರಲ್ಲಿ ಕ್ರಾಂತಿ ರೆಡ್ಕರ್ ಎಂಬ ಹಿಂದೂ ಮರಾಠಿ ರಂಗಭೂಮಿ ಮತ್ತು ಚಲನಚಿತ್ರರಂಗದ ನಟಿಯಾನ್ನು ವಿವಾಹವಾಗಿದ್ದಾರೆ ಇವೆಲ್ಲವೂ ಸಮೀರ್ ಅವರ ವೈಯಕ್ತಿಕ ಬದುಕಾಗಿದ್ದು ಈಗ ಖಾರೂಖ್ ಖಾನ್ ಮಗನ ಬಂಧನ ನಡೆಸಿ ತನಿಖೆ ನಡೆಸುತ್ತಿರುವಾಘ ಅವರ ದಾಖಲೆಗಳನ್ನು ಸಾರ್ವಜನಿಕವಾಗಿ ಬಯಲು ಮಾಡುವ ಮೂಲಕ ಅವರ ಕುಟುಂಬದ ಖಾಸಗಿತನದಲ್ಲಿ ಮೂಗು ತೂರಿಸುವ ಕೆಲಸ ಮಾಡುತ್ತಿರುವುದು ನಿಜಕ್ಕೂ ಅಸಹ್ಯ ಎನಿಸುತ್ತಿದೆ.

samir1

ದಿಟ್ಟತನದ ದೈರ್ಯಸ್ಥ ಅಧಿಕಾರಿ ಸಮೀರ್ ವಾಂಖೆಡೆ ಈ ರೀತಿಯ ಗೊಡ್ಡು ಬೆದರಿಕೆಗಳಿಗೆ ಜಗ್ಗದೇ, ತನಿಖೆಯ ಹಾದಿ ತಪ್ಪಿಸುವ ಉದ್ದೇಶದಿಂದ ನನ್ನ ವಿರುದ್ಧ ಇಲ್ಲ ಸಲ್ಲದ ಆರೋಪಗಳನ್ನು ಮಾಡಲಾಗುತ್ತಿದೆ. ಬಾಲಿವುಡ್ ನಟ ಶಾರುಖ್ ಖಾನ್ ಅವರ ಮಗ ಆರ್ಯನ್ ಖಾನ್ ಡ್ರಗ್ಸ್ ಪ್ರಕರಣದಲ್ಲಿ ನವಾಬ್ ಮಲಿಕ್ ಅನಗತ್ಯವಾಗಿ ಹಸ್ತಕ್ಷೇಪ ಮಾಡುತ್ತಿದ್ದಾರೆ. ಈ ಪ್ರಕರಣದಲ್ಲಿ ನವಾಬ್ ಮಲಿಕ್ ಅವರನ್ನೂ ಬಂಧಿಸಬಹುದು ಎಂಬ ಭಯದಿಂದಾಗಿ ತನಿಖೆಯ ಹಾದಿ ತಪ್ಪಿಸಲು ನನ್ನ ವಿರುದ್ಧ ಆರೋಪಗಳನ್ನು ಮಾಡುವ ಮುಖಾಂತರ ಬಹಳ ಕೀಳುಮಟ್ಟದ ರಾಜಕೀಯ ಮಾಡುತ್ತಿದ್ದಾರೆ ಎಂದು ತಿರುಗಿ ಬಿದ್ದಿರುವುದಲ್ಲದೇ ನ್ಯಾಯಾಂಗದ ಮೊರೆ ಹೋಗಿರುವುದು ಶ್ಲಾಘನೀಯವಾಗಿದೆ.

samir6

ಸಮೀರ್ ಅವರ ಬೆಂಬಲಕ್ಕೆ ಅವರ ತಂದೆ ನಿವೃತ್ತ ಪೋಲೀಸ್ ಅಧಿಕಾರಿಗಳಾದ ಜ್ಞಾನದೇವ್ ವಾಂಖೆಡೆ ಮತ್ತು ಸಮೀರ್ ಅವರ ಪತ್ನಿ ಕ್ರಾಂತಿ ಅವರುಗಳು ನಿಂತಿದ್ದರೆ, ಈ ಪ್ರಕರಣವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದ ಕೇಂದ್ರದ ಗೃಹಇಲಾಖೆಯೂ ನಿರ್ಭಿಡೆಯಿಂದ ತನಿಖೆ ನಡೆಸುವಂತಾಗಲು ಸಮೀರ್ ಅವರಿಗೆ Z+ security ನೀಡುವ ಮೂಲಕ ಈ ಎಲ್ಲಾ ಮಾಫಿಯಾಗಳನ್ನು ಮಟ್ಟ ಹಾಕಲು ಸಮೀರ್ ಅವರ ಬೆಂಬಲಕ್ಕೆ ನಿಂತಿರುವುದು ಶ್ಲಾಘನಿಯವಾಗಿದೆ.

WhatsApp Image 2021-10-29 at 11.18.00 AM

ಇವಲ್ಲದರ ಮಧ್ಯೆ ಅಕ್ಟೋಬರ್ 28ರಂದು ನ್ಯಾಯಾಲಯ ಆರ್ಯನ್ ಖಾನ್ ಗೆ ಬೇಲ್ ನೀಡಿದ್ದು ಆತ ಜೈಲಿನಿಂದ ಹೊರ ಬಂದು ಮನೆ ಸೇರುವ ವೇಳೆಯಲ್ಲಿ ಭಾರಿ ಸಂಖ್ಯೆಯಲ್ಲಿ ಶಾರುಖ್ ಖಾನ್ ಅಭಿಮಾನಿಗಳು ಜಮಾಯಿಸಿ ಲಕ್ಷಾಂತರ ರೂಪಾಯಿಗಳ ಪಟಾಕಿಯನ್ನು ಸುಡುವ ಮೂಲಕ ಒಂದು ವಾರದ ಮೊದಲೇ ಮುಂಬೈಯಲ್ಲಿ ದೀವಾವಳಿಯನ್ನು ಆಚರಿಸಿ ಆರ್ಯನ್ ನಾವು ನಿಮ್ಮೊಂದಿಗೆ ಇದ್ದೇವೆ ಎಂಬ ಫಲಕಗಳನ್ನು ಹಿಡಿಯುವ ಮೂಲಕ ಬೆಚ್ಚು ಬೀಳಿಸಿದಾರೆ. ಇತ್ತೀಚಿಗೆ ನಾನಾ ರೀತಿಯ ಕ್ರಿಮಿನಲ್ ಆರೋಪಗಳ ಅಡಿಯಲ್ಲಿ ನ್ಯಾಯಾಂಗ ಬಂಧನದಲ್ಲಿ ತನಿಖೆಗೆ ಒಳಗಾಗಿ ಬಿಡುಗಡೆ ಆಗುವವರಿಗೆ ಸಾವಿರಾರು ಕೆಜಿ ಸೇಬಿನ ಹಾರ ಹಾಕಿ ಲಕ್ಷಾಂತರ ರೂಪಾಯಿಗಳ ಪಟಾಕಿ ಸಿಡಿಸಿ ಸಾವಿರಾರು ವಾಹನಗಳ ಮುಖಾಂತರ ನಾಲ್ಕಾರು ಗಂಟೆಗಳ ಕಾಲ ರಸ್ತೆಯನ್ನು ಅನಧಿಕೃತವಾಗಿ ಬಂದ್ ಮಾಡುವ ಸಂಪ್ರದಾಯವನ್ನು ಹುಟ್ಟು ಹಾಕುತ್ತಿರುವುದು ಈ ದೇಶ ಎತ್ತಸಾಗಲು ಹೊರಟಿದೆ ಎಂಬುದರ ಅರಿವಾಗುತ್ತಿದೆ.

ಈ ಲೇಖನದ ಮೂಲಕ ನಮ್ಮ ದೇಶವಾಸಿಗಳಲ್ಲಿ ಕೇಳಿಕೊಳ್ಳುವುದೇನೆಂದರೆ ದಯವಿಟ್ಟು ಕೆಟ್ಟ ಕೆಲಸಕ್ಕೆ ಧರ್ಮದ ನಂಟನ್ನು ಬೆರೆಸದಿರೋಣ. ಈ ದೇಶದಲ್ಲಿ ಯಾರೇ ತಪ್ಪು ಮಾಡಿದರೂ ಅಂತಹವರು ಶಿಕ್ಷೆಗೆ ಒಳಪಟ್ಟು ಮತ್ತೊಬ್ಬರು ಆಂತಹ ತಪ್ಪನ್ನು ಮರುಕಳಿಸಂದಂತೆ ಆಗಲಿ. ಇನ್ನು ತನಿಖೆ ನಡೆಸುತ್ತಿರುವವರು ಯಾವುದೇ ಜಾತಿ ಧರ್ಮಕ್ಕೇ ಸೇರಿದ್ದರೂ, ಒಬ್ಬ ನೈಜದೇಶಪ್ರೇಮಿಗಳ ರೀತಿಯಲ್ಲಿ ಅವರಿಗೆ ನೈತಿಕ ಬೆಂಬಲ ನೀಡುವ ಮೂಲಕ ಧರ್ಮಕ್ಕೂ, ಕರ್ತವ್ಯಕ್ಕೂ ಸಂಬಂಧ ಕಲ್ಸಿಸದಿರೋಣ ಮತ್ತು ನಿಜವಾದ ತಪ್ಪಿತಸ್ಥರಿಗೆ ಸಜ ಆಗುವಂತೆ ಆಶಿಸೋಣ.

ಏನಂತೀರೀ?
ನಿಮ್ಮವನೇ ಉಮಾಸುತ

ಸಿರಿವಂತರ ಮಕ್ಕಳೇ ಹೀಗೇಕೇ?

ಅಕ್ಟೋಬರ್ 2, ಗಾಂಧಿ ಜಯಂತಿ. ದೇಶಕ್ಕೆ ಸ್ವಾತ್ರಂತ್ರ್ಯ ತಂದು ಕೊಟ್ಟವರಲ್ಲಿ ಮುಂಚೂಣಿಯಲ್ಲಿದ್ದ ನಾಯಕನಿಗೆ ಗೌರವ ಅರ್ಪಿಸುವ ಸಲುವಾಗಿ ಅವರು ಪಾಲಿಸುತ್ತಿದ್ದ ಅಹಿಂಸಾ ತತ್ವವನ್ನು ಎತ್ತಿ ಹಿಡಿಯುವ ಸಲುವಾಗಿ ಆ ದಿನ ದೇಶಾದ್ಯಂತ ಮಧ್ಯ ಮತ್ತು ಮಾಂಸದ ವ್ಯಾಪಾರವನ್ನು ನೀಷೇಧಿಸಲಾಗಿರುತ್ತದೆ ಮತ್ತು ಇಡೀ ದಿನ ಗಾಂಧಿಯವರ ತತ್ವ ಮತ್ತು ಆದರ್ಶಗಳನ್ನು ಇಂದಿನ ಯುವ ಜನತೆಗೆ ತಿಳಿಸುವ ಕಾರ್ಯದಲ್ಲಿ ಬಹುತೇಕ ಎಲ್ಲರೂ ನಿರತರಾಗಿರುವಾಗಲೇ ಅದೇ ರಾತ್ರಿ ಮುಂಬೈಯ್ಯಿನ ಐಷಾರಾಮಿ ಹಡುಗೊಂದರಲ್ಲಿ ಬೆಚ್ಚಿ ಬೀಳುವ ಸಂಗತಿಯೊಂದು ನಡೆದಿದೆ. ಸಮಾಜದಲ್ಲಿ ಗಣ್ಯರೆನಿಸಿಕೊಂಡವರ ಮಕ್ಕಳು ಡ್ರಕ್ಸ್ ಪಾರ್ಟಿ ಮಾಡುತ್ತಿದ್ದಾಗ ಎನ್‍ಸಿಬಿಯ ಕೈಯಲ್ಲಿ ಸಿಕ್ಕಿ ಹಾಕಿಕೊಂಡಿರುವುದು ನಿಜಕ್ಕೂ ವಿಪರ್ಯಸವೇ ಸರಿ. ಅದರಲ್ಲೂ ಹಿಂದಿ ಚಿತ್ರರಂಗದ ಬಾದ್ ಷಹಾ ಎಂದೇ ಪ್ರಸಿದ್ಧಿಯಗಿರುವ ಶಾರೂಖ್ ಖಾನ್ ಮಗ ಆರ್ಯನ್ ಖಾನ್ ಸಹಿತ 8 ಜನರು ಎನ್‍ಸಿಬಿ ಬಲೆಗೆ ಬಿದ್ದಿರುವುದು ಗಮನಾರ್ಹವಾಗಿದೆ.

ಡ್ರಗ್ಸ್ ಕೇಸ್ ವಿಚಾರವಾಗಿ ಸದ್ಯ ನ್ಯಾಯಾಂಗ ಬಂಧನದಲ್ಲಿರುವ ಆರ್ಯನ್ ಖಾನ್ ತನಿಖೆಯ ಸಂಧರ್ಭದಲ್ಲಿ ಬಿಚ್ಚಿಟ್ಟಿರುವ ವಿಷಯಗಳು ನಿಜಕ್ಕೂ ಭಯ ಹುಟ್ಟಿಸುವಂತಿದೆ. ಆರ್ಯನ್ ಖಾನ್ ಮದ್ಯ, ಮಾದಕ ದ್ರವ್ಯದ ಅಭ್ಯಾಸ ಮತ್ತು ಮಾನಿನಿಯರ ಸಹವಾಸ ಸುಮಾರು ವರ್ಷಗಳ ಹಿಂದಿನಿಂದಲೂ ಇದ್ದು ಈ ವಿಷಯ ಅವರ ತಂದೆ ತಾಯಿಯರಿಗೆ ತಿಳಿದಿದ್ದು ಅವರೆಂದು ಅದರ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿಲ್ಲ‌ ಎನ್ನುವುದು ನಿಜಕ್ಕೂ ಅಚ್ಚರಿ ಮೂಡಿಸುತ್ತದೆ. ಇದಕ್ಕೆ ಪುರಾವೆ ಎನ್ನುವಂತೆ ಕೆಲವು ವರ್ಷಗಳ ಹಿಂದೆ ಹಿರಿಯ ನಟಿ ಸಿಮಿಗರೆವಾಲ್ ನಡೆಸಿ ಕೊಡುವ ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ ಶಾರೂಖ್ ಖಾನ್ ತನ್ನ ಮಗ, ಮದ್ಯ, ಮಾದಕ ದ್ರವ್ಯ ಮತ್ತು ಮಾನಿನಿಯರ ಸಹವಾಸ ಮಾಡಿದರೆ ತನ್ನದೇನೂ ಅಭ್ಯಂತರವಿಲ್ಲ. ಅವನು ಎಲ್ಲವನ್ನೂ ಅನುಭವಿಸಲಿ ಎಂಬ ಆಶೆಯನ್ನು ವ್ಯಕ್ತಪಡಿಸಿದ್ದರು. ಬಹುಶಃ ಮುಂದೊಂದು ದಿನ ತನ್ನ ಮಗ ಇದೇ ರೀತಿಯಾಗಿ ಸಿಕ್ಕಿಕೊಳ್ಳುತ್ತಾನೆ ಎಂಬ ದೂರಾಲೋಚನೆ ಇತ್ತೋ ಇಲ್ಲವೋ ಆದರೆ ಆವರ ಮಗ ಮಾತ್ರ ಅದನ್ನು ಅಕ್ಷರಶಃ ಮಾಡಿ ತೋರಿಸಿರುವುದು ನಿಜಕ್ಕೂ ದುಖಃಕರ ಎಂದರೂ ತಪ್ಪಾಗದು.

ಸ್ಟಾರ್ ಮಕ್ಕಳು ಈ ರೀತಿಯಾಗಿ ಕೆಟ್ಟ ಹಾದಿ ಹಿಡಿದಿರುವುದು ಇದೇ ಮೊದಲೇನಲ್ಲ ಮತ್ತು ಇದೇ ಕೊನೆಯೂ ಅಲ್ಲ ಎನ್ನುವುದು ಸತ್ಯ. ಬಾಲಿವುಡ್‌ನಲ್ಲಿ ಮುನ್ನಾಭಾಯಿ ಎಂದೇ ಪ್ರಸಿದ್ದಿ ಪಡೆದಿರುವ ಖಳನಾಯಕ್ ಖ್ಯಾತಿಯ ಸಂಜಯ್ ದತ್ ಅವರ ಜೀವನವೂ ಎಂಭತ್ತರ ದಶಕದಲ್ಲಿ ಇದೇ ರೀತಿಯಾಗಿತ್ತು. ಅಪ್ಪ ಸುನೀಲ್ ದತ್ ಪ್ರಖ್ಯಾತ ನಟರಾಗಿದ್ದಲ್ಲದೇ ರಾಜಕೀಯದಲ್ಲೂ ತೊಡಗಿಸಿಕೊಂಡಿದ್ದರು. ಇನ್ನು ಅಮ್ಮ ನರ್ಗೀಸ್ ಅಂದಿನ ಕಾಲದ ಹೆಸರಾಂತ ನಾಯಕಿಯಾಗಿ ಸದಾಕಾಲವೂ ತಮ್ಮ ತಮ್ಮ ಕೆಲಸದಲ್ಲಿ ನಿರತರಾಗಿದ್ದ ಕಾರಣ ಮಕ್ಕಳ ವಿದ್ಯಾಭ್ಯಾಸಕ್ಕೆ ತೊಂದರೆ ಆಗದಿರಲೆಂದು ಬೋರ್ಡಿಂಗ್ ಶಾಲೆಗೆ ಸೇರಿಸಿದ್ದರು. ಹೇಳಿ ಕೇಳಿ ಅದು ಹೆಸರುವಾಸಿಯಾದ ಬೋರ್ಡಿಂಗ್ ಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದವರೆಲ್ಲರೂ ಸಿರಿವಂತರ ಮಕ್ಕಳೇ, ಅಪ್ಪಾ ಅಮ್ಮಂದಿರ ಅಂಕುಶವಿಲ್ಲದೇ ಲಂಗು ಲಗಾಮಿಲ್ಲದೇ ಐಶಾರಾಮ್ಯ ಜೀವನ ನಡೆಸುತ್ತಲೇ ಕಲಿಯಬಾರದ ವಯಸ್ಸಿನಲ್ಲಿಯೇ ಎಲ್ಲಾ ದುರ್ವಿದ್ಯೆಗಳನ್ನು ಕಲಿತಾಗಿತ್ತು.1981 ರಲ್ಲಿ ಅದೇ ತಾನೇ ಸಂಜಯ್ ದತ್ ಅವರ ಚೊಚ್ಚಲು ಚಿತ್ರ ರಾಕಿ ಬಿಡುಗಡೆಯಾದ ಮೂರೇ ದಿನಕ್ಕೇ ಮೇದೋಜ್ಜೀರಕ ಗ್ರಂಥಿಯ ಕ್ಯಾನ್ಸರ್ ನಿಂದ ಬಹುದಿನಗಳ ಕಾಲ ನರಳುತ್ತಿದ್ದ ಆತನ ತಾಯಿ ನರ್ಗಿಸ್ ನಿಧನರಾದ ಮೇಲಂತೂ, ಅದೇ ದುಖಃವನ್ನು ಮರೆಯುವ ಸಲುವಾಗಿ ಆರಂಭಿಸಿದ ಕುಡಿತ ಮತ್ತು ಮಾದಕದ್ರವ್ಯದ ಸೇವನೆ, ಕೆಲವೇ ಕೆಲವು ದಿನಗಳಲ್ಲಿ ಮಿತಿಮೀರಿ ಹೋಗಿ ಸದಾಕಾಲವೂ ನಶೆಯಲ್ಲಿಯೇ ತೇಲಾಡುವಂತಾಗಿತ್ತು. ಇನ್ನು ಮಾದಕದ್ರವ್ಯವನ್ನು ಹೊಂದಿಸಿಕೊಳ್ಳುವ ಸಲುವಾಗಿ ದಾವೂದ್ ನಂತಹ ದೇಶದ್ರೋಹಿಯ ಪರಿಚಯವನ್ನು ಮಾಡಿಕೊಂಡು ಅವನೊಂದಿಗೆ ಅನೇಕ ಕಾನೂನು ಬಾಹ್ಯ ವ್ಯವಹಾರಗಳನ್ನೂ ಮಾಡಿ ಅಂತಿಮವಾಗಿ ಸೆರೆಮನೆಯಲ್ಲಿ ಕೊಲೆಗಡುಕರು ವಂಚಕರ ಜೊತೆಯಲ್ಲಿ ಶಿಕ್ಷೆಯನ್ನು ಅನುಭವಿಸಬೇಕಾಯಿತು.

ಇಂತಹ ವ್ಯಸನ ಕೇವಲ ಚಿತ್ರರಂಗಕ್ಕೆ ಮಾತ್ರವೇ ಮೀಸಲಾಗಿರದೇ, ಪ್ರಸಕ್ತ ರಾಜಕೀಯದಲ್ಲಿ ಮುಂಚೂಣಿಯಲ್ಲಿರುವ ನಾಯನೊಬ್ಬ ತನ್ನ ಗೆಳತಿಯೊಂದಿಗೆ ಅಂತರಾಷ್ಟ್ರೀಯ ವಿಮಾನ ನಿಲ್ಡಾಣದಲ್ಲಿ ಮಾದಕ ದ್ರವ್ಯದೊಂದಿಗೆ ಸಿಕ್ಕಿಕೊಂಡು ಆತನ ತಾಯಿಯ ಕೋರಿಕೆಯಂತೆ ಅಂದಿನ ಪ್ರಧಾನಿಗಳಾಗಿದ್ದ ಶ್ರೀ ಅಟಲ್ ಬಿಹಾರಿ ವಾಜಪೇಯಿಯವರು ಮಧ್ಯಸ್ಥಿಕೆ ವಹಿಸಿ ಆತನನ್ನು ಬಿಡಿಸಿದ್ದಲ್ಲದೇ ಮನೆಯನದ ಗೌರವವನ್ನು ಕಾಪಾಡುವ ಸಲುವಾಗಿ ಪ್ರಕರಣ ಹೊರಬಾರದಂತೆ ನೋಡಿಕೊಂಡರು ಎಂಬ ವಿಷಯ ಇಂದಿಗೂ ಚಾಲ್ತಿಯಲ್ಲಿದೆ. ಇಂದಿಗೂ ಆ ಸ್ವಘೋಷಿತ ಯುವ ರಾಜಕಾರಣಿಯ ಮಾತುಕತೆ, ವರ್ತನೆ ಮತ್ತು ಹಾವಭಾವಗಳನ್ನು ಸೂಕ್ಶ್ಮವಾಗಿ ಗಮನಿಸಿದಲ್ಲಿ ಆತ ಸದಾಕಾಲಚೂ ನಶೆಯಲ್ಲಿಯೇ ಇರುತ್ತಾನೇನೋ ಎಂಬತಿರುತ್ತದೆ ಎಂಬುದೇ ಬಹುತೇಕರ ಅಭಿಪ್ರಾಯವಾಗಿದೆ.

ಇದೇ ರೀತಿಯಲ್ಲೇ ಬೆಂಗಳೂರಿನ ಶಾಂತಿನಗರದ ಶಾಸಕರರ ಮಗನ ಹತ್ತಾರು ಪ್ರಕರಣಗಳು ದಾಖಲಾಗಿ ಇಂದಿಗೂ ನ್ಯಾಯಾಲಯದಲ್ಲಿ ವಿಚಾರಣೆಗಳು ನಡೆಯುತ್ತಿರುವುದನ್ನು ಸ್ಮರಿಸಬಹುದಾಗಿದೆ.

ಈ ಪ್ರಸಂಗಗಳನ್ನು ನೋಡಿ ಎಲ್ಲಾ ದೊಡ್ಡವರ ಮಕ್ಕಳೂ ಹೀಗೆಯೇ ಎಂದು ಸಾರಾಸಗಟಾಗಿ ಹೇಳಲಾಗದು. ಪ್ರಖ್ಯಾತ ಹಿಂದಿ ಚಿತ್ರವಾದ, ತ್ರೀ ಈಡಿಯಟ್ಸ್ ಸಿನಿಮಾದಲ್ಲಿ ನಟಿಸಿರುವ ಮಾಧವನ್, ಅವರ ಮಗ ವೇದಾಂತ್‌ ಇದಕ್ಕೆ ಅಪವಾದ ಎನ್ನುವಂತಿದ್ದು, ಆತ ಸ್ಟಾರ್ ಮಗ ಎಂಬ ಹಮ್ಮು ಬಿಮ್ಮು ಇಲ್ಲದೇ ಸುಸಂಸ್ಕೃತನಾಗಿ ಬೆಳೆದಿರುವುದಲ್ಲದೇ, ದೇಶದ ಉದಯೋನ್ಮುಖ ಈಜುಗಾರನಾಗಿ ತನ್ನ 14 ವಯಸ್ಸಿನಲ್ಲೇ, 2019ರಲ್ಲಿ ಏಷಿಯನ್ ಏಜ್ ಗ್ರೂಫ್ ಆಫ್ ಸ್ವಿಮ್ಮಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ 4x100m ಫ್ರೀಸ್ಟೈಲ್ ರಿಲೆಯ ತಂಡದ ಭಾಗವಾಗಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ತನ್ನ ಹೆತ್ತ ಪೋಷಕರಿಗೂ ಮತ್ತು ದೇಶಕ್ಕೂ ಹೆಮ್ಮೆ ತಂದಿದ್ದಾನೆ. ಈ ಸಂತೋಷದ ವಿಷಯವನ್ನು ಸೋಶಿಯಲ್ ಮೀಡಿಯಾದಲ್ಲಿ ಮಾಧವನ್ ಹಂಚಿಕೊಂಡು ದೇವರ ಕೃಪೆಯಿಂದಾಗಿ ದೇಶವವನ್ನು ಪ್ರತಿನಿಧಿಸಿದ ತನ್ನ ಮಗನ ಚೊಚ್ಚಲ ಪದಕವಾಗಿದೆ ಎಂದು ತಮ್ಮ ಮಗನ ಸಾಧನೆಯನ್ನು ಹಂಚಿಕೊಂಡಿದ್ದಲ್ಲದೇ, ಮಗನೇ, ಎಲ್ಲ ವಿಚಾರದಲ್ಲಿಯೂ ನನಗಿಂತಲೂ ನೀನು ಮುಂದಿದ್ದು, ನನಗೆ ಹೊಟ್ಟೆಕಿಚ್ಚು ಬರುವಂತೆ ಮಾಡಿದ್ದೀಯಾ. ನನ್ನ ಹೃದಯ ಹೆಮ್ಮೆಯಿಂದ ತುಂಬಿದೆ. ನಿನ್ನಿಂದ ನಾನು ತುಂಬ ಕಲಿಯುವುದಿದೆ. ನಿನ್ನಂತ ಮಗನನ್ನು ಪಡೆಯಲು ಪುಣ್ಯ ಮಾಡಿದ್ದೇನೆ ಎಂದು ಆನಂದ ಭಾಷ್ಪಸುರಿಸಿದ್ದನ್ನು ನೋಡಿದ್ದೇವೆ.

ದೊಡ್ಡವರ ಮಕ್ಕಳ ಡ್ರಗ್ಸ್ ಕೇಸ್‌ಗಳು ಕೇವಲ ನಮ್ಮ ದೇಶದಲ್ಲೇ ಮೊದಲೇನಲ್ಲ. ವಿಶ್ವದ ಹಲವು ರಾಷ್ಟ್ರಗಳಲ್ಲಿ ಸ್ಟಾರ್ ನಟರುಗಳು, ಕ್ರೀಡಾಪಟುಗಳು, ಪಾಪ್ ಹಾಡುಗಾರರು ಬಹಳಷ್ಟು ಸೆಲೆಬ್ರಿಟಿಗಳು ಡ್ರಗ್ಸ್ ಕೇಸ್‌ನಲ್ಲಿ ಸಿಕ್ಕಿಹಾಕಿಕೊಂಡಿದ್ದಾರೆ. ವಿಶ್ವದಾದ್ಯಂತ ಕೋಟ್ಯಾಂತರ ಅಭಿಮಾನಿಗಳನ್ನು ಹೊಂದಿರುವ ಪ್ರತಿಭಾನ್ವಿತ ನಟ ಜಾಕಿ ಚಾನ್ ಮಗನೂ ಸಹಾ ಒಮ್ಮೆ ಡ್ರಗ್ಸ್ ಕೇಸ್‌ನಲ್ಲಿ ಸಿಕ್ಕಿಹಾಕಿಕೊಂಡಿದ್ದ.

ಮಗ ಮಾದಕವಸ್ತು ಪ್ರಕರಣದಲ್ಲಿ ಸಿಲುಕಿಕೊಂಡ ಸುದ್ದಿ ತಿಳಿಯುತ್ತಿದ್ದಂತೆಯೇ ಉಳಿದೆಲ್ಲಾ ತಂದೆಯಂತೆ ತನ್ನ ಮಗನನನ್ನು ರಕ್ಷಿಸಲು ಮುಂದಾಗದ ಜಾಕಿ ಚಾನ್ ಅವನ ತಪ್ಪಿಗೆ ತಕ್ಕ ಶಿಕ್ಷೆಯಾಗಲಿ ಎಂಬ ಧೃಢನಿರ್ಧಾರ ತಾಳಿದ್ದಲ್ಲದೇ, ತಾನು ಬೆವರು ಸುರಿಸಿ ಕಷ್ಟ ಪಟ್ಟು ಸಂಪಾದನೆ ಮಾಡಿದ್ದ ಹಣದಲ್ಲಿ ಸುಮಾರು 350 ದಶಲಕ್ಷ ಡಾಲರ್ ಮೌಲ್ಯವನ್ನು ದಾನ ಮಾಡಿ, ಈ ಹಣದಲ್ಲಿ ತನ್ನ ಮಗನಾದ ಜೈಸಿಗೆ ಒಂದು ನಯಾಪೈಸೆಯೂ ಕೊಡುವುದಿಲ್ಲ ಎಂದು ಖಡಾಖಂಡಿತವಾಗಿ ಹೇಳಿದ್ದ.

ಚಿತ್ರರಂಗದ ಯಾವುದೇ ಹಿನ್ನಲೆಯಿಲ್ಲದೇ ಕೇವಲ ತನ್ನ ಸಾಹಸಮಯ ದೃಶ್ಯಗಳಿಂದಾಗಿ ಇಷ್ಟೆಲ್ಲಾ ಹಣವನ್ನು ಗಳಿಸಿದ್ದೇನೆ. ಅದೇ ಹಣದಲ್ಲಿ ತನ್ನ ಮಗನಿಗೆ ತಕ್ಕ ಮಟ್ಟಿಗಿನ ವಿದ್ಯಾಭ್ಯಾಸವನ್ನು ಮಾಡಿಸಿದ್ದೇನೆ. ಅವನು ಸಮರ್ಥನಾಗಿದ್ದಲ್ಲಿ ತನ್ನ ಸ್ವಂತ ಪರಿಶ್ರಮದಿಂದ ಹಣವನ್ನು ಸಂಪಾದಿಸಿ ಖರ್ಚು ಮಾಡಲಿ. ಆತನಿಗೆ ಅಗತ್ಯಕ್ಕಿಂತ ಹೆಚ್ಚಿನ ಹಣವನ್ನು ಕೊಟ್ಟ ಪರಿಣಾಮವಾಗಿಯೇ ಆತ ದುವ್ಯಸನಿಯಾಗಿದ್ದ. ಹಾಗಾಗಿ ಅವನಿಗೆ ಕಿಂಚಿತ್ತೂ ಆಸ್ತಿಯನ್ನು ನೀಡುವುದಿಲ್ಲ ಎಂದು ಹೇಳಿದ್ದು ಬಹುತೇಕರಿಗೆ ಅಚ್ಚರಿ ಮೂಡಿಸಿತ್ತು.

ಈ ಪ್ರಕರಣದ ನಂತರ ಜಾಕಿಚಾನ್ ಸಾರ್ವಜನಿಕವಾಗಿ ತನ್ನ ಮಗನ ಪರವಾಗಿ ಕ್ಷಮೆ ಕೇಳಿದ್ದಲ್ಲದೇ, ನನ್ನ ಮಗನ ಈ ಪ್ರಕರಣ ವಿಶ್ವದ ಎಲ್ಲಾ ಯುವಕರುಗಳಿಗೆ ಎಚ್ಚರಿಕೆಯ ಗಂಟೆಯಾಗಿ ಅವರೆಲ್ಲರೂ ಮಾದಕವಸ್ತುಗಳಿಂದ ದೂರವಿರುತ್ತಾರೆ. ಎಂದು ಭಾವಿಸುತ್ತೇನೆ ಎಂದು ಹೇಳಿದ್ದಲ್ಲದೇ, ನಾನಂತೂ ನನ್ನ ಮಗನನ್ನು ಸರಿಯಾಗಿ ಬೆಳೆಸುವಲ್ಲಿ ವಿಫಲವಾದೆ ಹಾಗಾಗಿ ಅವನ ದುಷ್ಕೃತ್ಯದ ಸಂಪೂರ್ಣ ಜವಾಬ್ದಾರಿಯನ್ನು ನಾನೇ ಹೊತ್ತುಕೊಂಡು ಇಡೀ ಸಮಾಜದ ಮುಂದೆ ಕ್ಷಮೆಯಾಚಿಸುತ್ತೇನೆ ಎಂದು ಹೇಳಿದ್ದು ಮನಕುಲುಕವಂತಿತ್ತು.

ಅದೇ ಹುಟ್ಟು ಸಿರಿವಂತರಾದ ಟಾಟಾ ಕುಟುಂಬದವರಾಗಲೀ, ವಿಪ್ರೋದ ಅಜೀಜ್ ಪ್ರೇಮ್ ಜೀ ಮಕ್ಕಳಾಗಲೀ, ಅಂಬಾನಿ ಮಕ್ಕಳಾಗಲೀ, ಇತ್ತೀಚೆಗೆ ಸಿರಿವಂತರಾದ ಇನ್ಫೋಸಿಸ್ ಸುಧಾಮೂರ್ತಿಯವರ ಮಕ್ಕಳು ಹುಟ್ಟುತ್ತಲೇ ಹಣವನ್ನು ನೋಡಿದರೂ, ತಂದೆ ತಾಯಿಯರ ಜವಾಬ್ದಾರಿತನದಿಂದಾಗಿ ಈ ರೀತಿಯಲ್ಲಿ ಹಾಳಾಗದೇ, ಉನ್ನತ ವ್ಯಾಸಂಗವನ್ನು ಮುಗಿಸಿ ತಮ್ಮ ಕುಟುಂಬದ ವ್ಯವಹಾರಗಳನ್ನು ಯಶಸ್ವಿಯಾಗಿ ಮನ್ನಡೆಸಿಕೊಂಡು ಹೋಗುತ್ತಿದ್ದಾರೆ.

ದುರಾದೃಷ್ಟವಶಾತ್ ಚಾಕೀಚಾನ್ ರಂತೆ ತಪ್ಪನ್ನು ಒಪ್ಪಿಕೊಂಡು ತಿದ್ದಿಕೊಳ್ಳುವ, ಇಲ್ಲವೇ ಮಾಧವನ್ ರೀತಿಯಲ್ಲಿ ಮಕ್ಕಳನ್ನು ಸಂಸ್ಕಾರವಂತರನ್ನಾಗಿ ಬೆಳೆಸುವ ಬಗ್ಗೆ ಇಂದಿನ ಬಹುತೇಕ ಸಿರಿವಂತರು ಗಮನಿಸುವ ಬದಲಾಗಿ, ಆರ್ಯನ್ ಖಾನ್ ಪ್ರಕರಣಕ್ಕೆ ಧರ್ಮ ಮತ್ತು ರಾಜಕೀಯವನ್ನು ಬೆರೆಸಿ, ಅನಗತ್ಯವಾಗಿ ಪ್ರಕರಣವನ್ನು ರಾಜಕೀಯವಾಗಿ ಗಬ್ಬೆಬ್ಬಿಸಲು ಪ್ರಯತ್ನಿಸುತ್ತಿರುವ ಕೆಲವು ನಟ ನಟಿಯರ ಬೌದ್ಧಿಕ ದಿವಾಳಿತನದ ಬಗ್ಗೆ ನಿಜಕ್ಕೂ ಖೇದಕರವೆನಿಸುತ್ತದೆ.

ಅಲ್ಪನಿಗೆ ಐಶ್ವರ್ಯ ಬಂದರೆ ಅರ್ಧ ರಾತ್ತಿಯಲ್ಲಿ ಕೊಡೆ ಹಿಡಿದು ನಡೆದನಂತೆ ಎನ್ನುವಂತೆ, ಇದ್ದಕ್ಕಿದ್ದಂತೆಯೇ ಹಣ ನೋಡಿದ ತಕ್ಷಣ ವಯಸ್ಸಿಗೆ ಬಂದ ಮಕ್ಕಳಿಗೆ ಉತ್ತಮ ಸಂಸ್ಕಾರವನ್ನು ಕಲಿಸದೇ ಹೋದಲ್ಲಿ ಈ ರೀತಿಯ ಪ್ರಸಂಗಗಳು ನಿರಂತರವಾಗಿ ನಡೆಯುತ್ತಲೇ ಇರುತ್ತದೆ. ಹಾಗಾಗಿ ಈ ಪ್ರಕರಣಗಳು ಎಲ್ಲಾ ಪೋಷಕರಿಗೂ ಎಚ್ಚರಿಕೆಯ ಗಂಟೆಯಾಗಿ ತಮ್ಮ ಎಷ್ಟೇ ದಣಿವರಿಯದ ಕೆಲಸಗಳ ಮಧ್ಯೆಯೂ, ಮಕ್ಕಳ ಬಗ್ಗೆ ಗಮನವಿರಲಿ ಎನ್ನುವುದಷ್ಟೇ ಈ ಲೇಖನದ ಉದ್ದೇಶವಾಗಿದೆಯೇ ಹೊರತು ಯಾರನ್ನೂ ತೆಗಳುವ ಇಲ್ಲವೇ ಯಾರನ್ನೋ ಹೊಗಳುವ ಇರಾದೆ ಇಲ್ಲವಾಗಿದೆ. ತಪ್ಪು ಮಾಡುವುದು ಸಹಜ ಆದರೆ ಅದೇ ತಪ್ಪನ್ನು ತಿದ್ದಿಕೊಂಡು ಯಶಸ್ವಿಯಾಗಿ ಮನ್ನಡೆಯುವವನೇ ಮನುಜ.

ಏನಂತೀರೀ?
ನಿಮ್ಮವನೇ ಉಮಾಸುತ