ಕ್ಯಾಪ್ಟನ್ ಗೋಪಿನಾಥ್

ನಾವೆಲ್ಲಾ ಚಿಕ್ಕವರಿರುವಾಗ ನಮ್ಮ ಮನೆಗಳ ಮೇಲೆ ಭಾರೀ ಶಭ್ಧವನ್ನು ಮಾಡುತ್ತಾ ಹೋಗುತ್ತಿದ್ದನ್ನು ನೋಡಿ ಅದಕ್ಕೆ ಕೈ ಬೀಸುವುದೇ ಭಾರೀ ಖುಷಿಯನ್ನು ಕೊಡುವ ಸಂಗಂತಿಯಾಗಿತ್ತು. ಏಕೆಂದರೆ ವಿಮಾನಯಾನ ಜನಸಾಮಾನ್ಯರಿಗೆ ಗಗನ ಕುಸುಮವಾಗಿತ್ತು. ಸಾಮಾನ್ಯ ಜನರು ದೂರದ ಊರುಗಳಿಗೆ ಹೋಗುವುದಕ್ಕೆ ರೈಲುಗಳನ್ನೇ ಅವಲಂಭಿಸಿ ಎರಡು ಮೂರು ದಿನಗಳ ಪ್ರಯಾಸಕರ ಪ್ರಯಾಣವನ್ನು ಮಾಡಬೇಕಿತ್ತು. ಆದರೆ 2003 ರಲ್ಲಿ ಆರಂಭವಾದ ಕಡಿಮೆ ದರದ ಡೆಕ್ಕನ್ ಏರ್ಲೈನ್ಸ್ ಮೂಲಕ ಎಲ್ಲಾ ಜನಸಾಮಾನ್ಯರೂ ವಿಮಾನದಲ್ಲಿ ಕೆಲವೇ ಗಂಟೆಗಳಲ್ಲಿ ತಮ್ಮ ನೆಚ್ಚಿನ ಊರುಗಳಿಗೆ ತಲುಪಬಹುದಾದಂತಹ ಸುವರ್ಣಾವಕಾಶವನ್ನು ಕಲ್ಪಿಸಿದವರೇ ನಮ್ಮ ಇಂದಿನ ಕನ್ನಡ ಕಲಿಗಳು ಕಥಾ ನಾಯಕ ಕ್ಯಾಪ್ಟನ್ ಗೋಪಿನಾಥ್.

1951 ರಲ್ಲಿ ಹಾಸನ ಜಿಲ್ಲೆಯ ಅರಕಲುಗೂಡು ತಾಲ್ಲೂಕಿನ ಹೇಮಾವತಿ ನದಿಯ ತಟದಲ್ಲಿರುವ ಸಣ್ಣ ಊರಾದ ಗೊರೂರಿನ ಸಂಪ್ರದಾಯಸ್ಥ ಕುಟುಂಬದಲ್ಲಿ ಎಂಟು ಮಕ್ಕಳಲ್ಲಿ ಎರಡನೆಯವರಾಗಿ ಗೋಪಿನಾಥ್ ಅವರ ಜನನವಾಗುತ್ತದೆ. ಸಾಹಿತಿಗಳು ಮತ್ತು ಕನ್ನಡ ಶಾಲೆಯ ಉಪಾಧ್ಯಾಯರಾಗಿದ್ದರೂ ಅವರ ತಂದೆಗೆ ಮನೆಯೇ ಮೊದಲ ಪಾಠ ಶಾಲೆ ತಾಯಿಯೇ ಮೊದಲ ಗುರು ಎಂಬ ಗಾದೆಯ ಅನ್ವಯದಂತೆ ಮಕ್ಕಳು ಶಾಲೆಗಿಂತಲೂ ಮನೆಯಲ್ಲಿಯೇ ನೆಮ್ಮದಿಯ ವಾತಾವರಣದಲ್ಲಿ ಚೆನ್ನಾಗಿ ಶಿಕ್ಷಣ ಕಲಿಯುತ್ತಾರೆ ಎಂಬ ನಂಬಿಕೆ ಇದ್ದ ಕಾರಣ ಗೋಪೀನಾಥ್ ಮನೆಯಲ್ಲಿಯೇ ಅಕ್ಷರಾಭ್ಯಾಸ ಮಾಡಿಕೊಂಡು ತಮ್ಮ ಪ್ರಾಥಮಿಕ ಶಿಕ್ಷಣವನ್ನೇ ಪಡೆಯದೇ ಐದನೇ ತರಗತಿಗೆ ನೇರವಾಗಿ ಸೇರಿಕೊಂಡಿದ್ದರು. ತಮ್ಮ ಮಾಧ್ಯಮಿಕ ವಿದ್ಯಾಭ್ಯಾಸ ಮುಗಿದ ನಂತರ 1962 ರಲ್ಲಿ, ಬಿಜಾಪುರದ ಸೈನಿಕ್ ಶಾಲೆಗೆ ಸೇರಿಕೊಳ್ಳುವ ಮೂಲಕ ಸಂಪ್ರದಾಯಸ್ಥ ಊರಿನಲ್ಲಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದರು. ಸಂಪ್ರದಾಯಸ್ಥ ಕುಟುಂಬದ ಸಣ್ಣ ವಯಸ್ಸಿನ ಸಸ್ಯಹಾರದ ಹುಡುಗ ಅದು ಹೇಗೆ ಸೈನಿಕ ಶಾಲೆಯಲ್ಲಿ ಸಶಸ್ತ್ರ ಪಡೆಗಳ ತರಭೇತಿ ಪಡೆಯಬಲ್ಲ ಎಂಬುದು ಎಲ್ಲರ ಆತಂಕವಾಗಿತ್ತು.

ಓದಿನಲ್ಲಿ ಬಹಳ ಚುರುಕಾಗಿದ್ದ ಗೋಪೀನಾಥ್ ತಮ್ಮ ರಾಷ್ಟ್ರೀಯ ರಕ್ಷಣಾ ಅಕಾಡೆಮಿ ಪರೀಕ್ಷೆಗಳನ್ನು ಉತ್ತಮ ಶ್ರೇಣಿಯಲ್ಲಿ ಪೂರ್ಣಗೋಳಿಸಿ ಭಾರತೀಯ ಮಿಲಿಟರಿ ಅಕಾಡೆಮಿಯಿಂದ ಪದವಿ ಪಡೆದದ್ದಲ್ಲದೇ ಸುಮಾರು ಎಂಟು ವರ್ಷಗಳ ಕಾಲ ಭಾರತೀಯ ಸೇನೆಯಲ್ಲಿ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದರಿಂದಲೇ ಕ್ಯಾಪ್ಟನ್ ಗೋಪಿನಾಥ್ ಎಂಬ ಹೆಸರನ್ನು ಅನ್ವರ್ಥವಾಗಿ ಗಿಟ್ಟಿಸಿಕೊಳ್ಳುತ್ತಾರೆ. ತಾವು ಸೇನೆಯಲ್ಲಿರುವಾಗಲೇ 1971 ರ ಬಾಂಗ್ಲಾದೇಶ ವಿಮೋಚನಾ ಯುದ್ಧದಲ್ಲಿಯೂ ಭಾಗವಾಗಿ ದೇಶದ ಪರವಾಗಿ ಹೋರಾಡಿದ್ದಕ್ಕಾಗಿ ಸರ್ಕಾರದಿಂದ ಕೃಷಿ ಭೂಮಿಯನ್ನೂ ಉಡುಗೊರೆಯಾಗಿ ಪಡೆಯುತ್ತಾರೆ.

ಮನಸ್ಸಿಗೆ ಹಿಡಿಸುವಷ್ಟು ದಿನ ಮಾತ್ರವೇ ಯಾವುದೇ ಕೆಲಸವನ್ನು ಮಾಡಬೇಕು. ಆ ಕೆಲಸದಲ್ಲಿ ಮನಸ್ಸು ವಿಮುಖವಾದರೆ ಹೊಸಾ ಕೆಲಸವನ್ನು ಮಾಡಬೇಕು ಎನ್ನುವ ನಿಯಮವನ್ನು ಪಾಲಿಸುವ ಗೋಪೀನಾಥ್ ಸೇನೆಯ ಏಕಾನತೆಯ ಕೆಲಸದಿಂದ ಬೇಸರ ಗೊಂಡು ತಮ್ಮ 28 ನೇ ವಯಸ್ಸಿನಲ್ಲಿಯೇ, ಸೈನ್ಯದಿಂದ ಸ್ವಯಂ ನಿವೃತ್ತಿ ಹೊಂದಿ ಸರ್ಕಾರ ನೀಡಿದ್ದ ಜಮೀನಿನಲ್ಲಿ ಕೃಷಿಯನ್ನು ಮಾಡುವುದರ ಜೊತೆಗೆ ಹೈನುಗಾರಿಕೆ, ಕೋಳೀ ಸಾಕಣೆ, ರೇಷ್ಮೇ ಸಾಕಣೆ ಮಾಡುತ್ತಾ ಸುಂದರವಾದ ಜೀವನ ಸಾಗಿಸುತ್ತಿದ್ದರು. ಇದೇ ಸಮಯದಲ್ಲಿ ತಮ್ಮ ಹಳ್ಳಿಯಿಂದ ನಗರಕ್ಕೆ ಬಂದು ಹೋಗಲು ಬುಲೆಟ್ ವಾಹನವನ್ನು ಬಳಸುತ್ತಿರುತ್ತಾರೆ. ಅದೊಮ್ಮೆ ಆವರ ಗಾಡಿ ಕೈ ಕೊಟ್ಟಾಗ, ಅದರ ರೀಪೇರಿಗೆ ಅಲ್ಲೆಲ್ಲೂ ಎನ್‌ಫೀಲ್ಡ್ ಬೈಕ್ ಸರ್ವಿಸ್ ಸೆಂಟರ್ ಇಲ್ಲದಿದ್ದನ್ನು ಮನಗೊಂಡು ತಾವೇಕೆ ಎನ್‌ಫೀಲ್ಡ್ ಬೈಕ್ ವ್ಯಾಪಾರ ಮಾಡಬಾರದು ಎಂದು ಯೋಚಿಸಿ ಚೆನೈಗೆ ಹೋಗಿ ಅಲ್ಲಿಯ ಅಧಿಕಾರಿಗಳಿಗೆ ಮನವೊಲಿಸಿ ಹಾಸನದಂತಹ ಜಿಲ್ಲಾ ಕೇಂದ್ರದಲ್ಲಿ ಎನ್‌ಫೀಲ್ಡ್ ಬೈಕ್ ಸೇಲ್ಸ್ & ಸರ್ವಿಸ್ ಆರಂಭಿಸಿ ನಂತರ ಅಕ್ಕ ಪಕ್ಕದ ಐದಾರು ಜಿಲ್ಲಾ ಕೇಂದ್ರಗಳಿಗೂ ವಿಸ್ತರಿಸಿ ಯಶಸ್ವಿ ವ್ಯಾಪಾರಿ ಎನಿಸಿಕೊಳ್ಳುತ್ತಾರೆ. ಇದೇ ಸಮಯದಲ್ಲಿಯೇ ಹೋಟೆಲ್ ಮಾಲೀಕರಾಗಿಯೂ ಸ್ಟಾಕ್ ಬ್ರೋಕರ್ ಆಗಿಯೂ ಕೆಲ ಕಾಲ ಜೀವನ ಸಾಗಿಸುತ್ತಾರೆ.

1995ರಲ್ಲಿ ವಾಯು ಸಾರಿಗೆಯಲ್ಲಿ ಹೊಸಾ ಉದ್ಯಮಿಗಳನ್ನು ಉತ್ತೇಜಿಸುವ ಸಲುವಾಗಿ ಹಲವಾರು ನಿಯಮಗಳನ್ನು ಸರ್ಕಾರ ಬದಲಿಸಿದನ್ನು ಗಮನಿಸಿದ ಕ್ಯಾಪ್ಟನ್ ಗೋಪಿನಾಥ್ ಬೆಂಗಳೂರಿನಲ್ಲಿ ಪ್ರಧಾನ ಕಛೇರಿಯಾರಂಭಿಸಿ 1997 ರಲ್ಲಿ ಡೆಕ್ಕನ್ ಏವಿಯೇಷನ್ ಎಂಬ ಖಾಸಗಿ ವಾಣಿಜ್ಯ ಹೆಲಿಕಾಪ್ಟರ್ ಸೇವೆಯನ್ನು ಕೇವಲ ಒಂದು ಹೆಲಿಕಾಪ್ಟರ್‌ನೊಂದಿಗೆ ಪ್ರಾರಂಭಿಸುತ್ತಾರೆ. ಸ್ವಲ್ಪವೇ ಸಮಯದಲ್ಲಿ ಈ ಹೆಲಿಕಾಪ್ಟರ್ ಸೇವೆ ಅಹಮದಾಬಾದ್, ಕೊಚ್ಚಿನ್, ದೆಹಲಿ, ಇಂದೋರ್, ಮುಂಬೈ, ಚೆನ್ನೈ, ಕೋಲ್ಕತಾ, ಬೆಂಗಳೂರು, ಹೈದರಾಬಾದ್, ಭುವನೇಶ್ವರ, ಜಮ್ ಷಡ್ಪುರ ಮತ್ತು ಕೂಚ್ ಬಿಹಾರ್ ಮುಂತಾದ ನಗರಗಳಿಗೆ ವಿಸ್ತರಿಸುತ್ತಾರೆ

ಇದೇ ಸಮಯದಲ್ಲಿಯೇ ಕುಗ್ರಾಮಾದ ಸಾಮಾನ್ಯ ಮಧ್ಯಮ ವರ್ಗದಿಂದ ಬಂದಿದ್ದ ಗೋಪೀನಾಥ್ ಅವರಿಗೆ ಪ್ರತಿಯೊಬ್ಬ ಭಾರತೀಯನೂ ಜೀವನದಲ್ಲಿ ಒಂದು ಬಾರಿಯಾದರೂ ವಿಮಾನ ಪ್ರಯಾಣ ಮಾಡಲಿ ಮತ್ತು ಭಾರತದ ಎರಡನೆಯ ದರ್ಜೆಯ ನಗರಗಳಾದ ಹುಬ್ಬಳ್ಳಿ, ಮಂಗಳೂರು, ಮೈಸೂರು, ಕೊಯಮತ್ತೂರು, ಮಧುರೈ, ವಿಶಾಖಪಟ್ಟಣ ಮುಂತಾದ ಪ್ರದೇಶಗಳಿಗೂ ವಿಮಾನ ಹಾರಾಟದ ವ್ಯವಸ್ಥೆಯಾಗಬೇಕೆಂಬ ಕನಸು ಕಂಡಿದ್ದರ ಪರಿಣಾಮ ಏರ್ ಡೆಕ್ಕನ್ ಎಂಬ ಭಾರತದ ಮೊದಲ ಕಡಿಮೆ-ವೆಚ್ಚದ ವಿಮಾನ ಯಾನ ಸಂಸ್ಥೆಯನ್ನು ತಮ್ಮ ಜೀವಮಾನದ ಉಳಿತಾಯವಲ್ಲದೇ ಸ್ನೇಹಿತರು ಮತ್ತು ತಮ್ಮ ಕುಟುಂಬದ ಇತರೇ ಸದಸ್ಯರಿಂದ 5 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸಿ ಆರಂಭಿಸಿದರು. ಇದರ ಮೊದಲ ವಿಮಾನ ಪ್ರಯಾಣವು 2003,ಆಗಸ್ಟ್ 23 ರಂದು ಹೈದ್ರಾಬಾದ್ ನಿಂದ ವಿಜಯವಾಡಕ್ಕೆ ತಮ್ಮ ವಿಮಾನವನ್ನು ಹಾರಿಸಿದ್ದರು. ಈ ಸಂಸ್ಥೆಯ ಚಿನ್ಹೆಯಲ್ಲಿ ಎರಡು ಹಸ್ತಗಳು ಸೇರಿಸಿ ಪಕ್ಷಿಯೊಂದು ಹಾರುತ್ತಿರುವುದನ್ನು ಸಂಕೇತಿಸಲಾಗಿತ್ತು. ಈ ವಿಮಾನಯಾನದ ಘೋಷಣಾ ವಾಕ್ಯವೂ ಸಹಾ ಸಿಂಪ್ಲಿ-ಫ್ಲೈ ಎಂದಿದ್ದು ಜನಸಾಮಾನ್ಯರಿಗೂ ಈಗ ವಿಮಾನ ಪ್ರಯಾಣ ಸಾಧ್ಯವೆಂದು ಸ್ಪಷ್ಟವಾಗಿ ತಿಳಿಸುವುದರಲ್ಲಿ ಸಫಲವಾಯಿತು. ಭಾರತೀಯರು ಇಂತಹ ಸುವರ್ಣಾವಕಾಶವನ್ನು ಅತ್ಯಂತ ಸಮರ್ಥವಾಗಿ ಬಳಸಿಕೊಂಡ ಪರಿಣಾಮ ಈ ಕಂಪನಿ ಅತ್ಯಂತ ಕಡಿಮೇ ಸಮಯದಲ್ಲಿಯೇ ತ್ವರಿತವಾದ ಯಶಸ್ಸನ್ನು ಕಂಡಿದ್ದಲ್ಲದೇ, ಅದಾಗಲೇ ಈ ವಿಮಾನ ಯಾನದ ಸೇವೆಯಲ್ಲಿದ್ದ ಇಂಡಿಗೊ ಏರ್‌ಲೈನ್ಸ್, ಗೋ ಏರ್, ಸ್ಪೈಸ್ ಜೆಟ್ ಮತ್ತು ಜೆಟ್ ಲೈಟ್‌ನಂತಹ ಹಲವಾರು ಕಂಪನಿಗಳು ಏರ್ ಡೆಕ್ಕನ್ ಜೊತೆ ಸ್ಪರ್ಧಿಸುವ ಸಲುವಾಗಿ ತಮ್ಮ ಟಿಕೆಟ್ ಬೆಲೆಯನ್ನೂ ಕಡಿಮೆ ಮಾಡಿ ಸ್ಪರ್ಧಾತ್ಮಕ ಬೆಲೆಗಳಲ್ಲಿ ತಮ್ಮ ಸೇವೆಯನ್ನು ಸಲ್ಲಿಸತೊಡಗಿ ಏರ್ ಡೆಕ್ಕನ್ ಕಂಪನಿಗೆ ತೀವ್ರವಾದ ಸ್ಪರ್ಧೆಯನ್ನು ಕೊಡಲಾರಂಭಿಸಿದವು. ಈ ರೀತಿಯ ವಿಮಾನಯಾನ ಅತಿಯಾದ ಸ್ಪರ್ಧೆಯಿಂದ ಗೋಪಿನಾಥ್ ಕಂಪನಿಗೆ ಆರ್ಥಿಕವಾಗಿ ಹೊಡೆತ ಬಿದ್ದದ್ದನ್ನು ತಾಳಲಾಗದೇ, ಏರ್ ಡೆಕ್ಕನ್ ಈ ಸ್ಪರ್ಧೆಯಿಂದ ಹೊರಗುಳಿಯಲು ನಿರ್ಧರಿಸುತ್ತಿದ್ದಾಗಲೇ ಏರ್ ಡೆಕ್ಕನ್ ಕಂಪನಿಯನ್ನು ವಿಜಯ್ ಮಲ್ಯರ ಕಿಂಗ್ ಫಿಷರ್ ಏರ್ಲೈನ್ಸ್ ನೊಂದಿಗೆ ವಿಲೀನ ಗೊಳಿಸಿ ಸಾಕಷ್ಟು ಲಾಭವನ್ನು ಗಳಿಸಿ ಆರ್ಥಿಕವಾಗಿ ಗೋಪಿನಾಥ್ ಸಧೃಢರಾದರೂ ಭಾರತೀಯರಿಗೆ ಅತೀ ಕಡಿಮೆ ವೆಚ್ಚದ ಸೇವೆಯ ವಿಮಾನ ಯಾನದ ಮೇಲೆ ಭಾರೀ ಹೊಡೆತ ಬಿದ್ದಿದ್ದಂತೂ ಸುಳ್ಳಲ್ಲ.

ತಮ್ಮ ಏರ್ ಡೆಕ್ಕನ್ ಸಂಸ್ಥೆಯನ್ನು ಕಿಂಗ್ ಫಿಷರ್ ಕಂಪನಿಯೊಂದಿಗೆ ವಿಲೀನ ಗೊಳಿಸಿದ ನಂತರ ಆವರ ಕಂಪನಿಯಲ್ಲಿ ಆರಂಭದಿಂದಲೂ ನಂಬಿಕಸ್ಥರಾಗಿ ಕೆಲಸ ಮಾಡುತ್ತಿದ್ದ ಕೆಲಸಗಾರರನ್ನು ಅವರ ಮನೆಗೆ ಕರೆಸಿಕೊಂಡು ಅವರೆಲ್ಲರಿಗೂ ತಮ್ಮ ಕೈಯ್ಯಾರೆ ಒಳ್ಳೆಯ ಊಟವನ್ನು ಬಡಿಸಿ ಅವರೊಂದಿಗೆ ತಾವೇಕೆ ಇಂತಹ ಕಠಿಣ ನಿರ್ಧಾರವನ್ನು ತೆಗೆದುಕೊಳ್ಳಬೇಕಾಯಿತು ಎಂಬುದನ್ನು ಮುಕ್ತವಾಗಿ ಮತ್ತು ಅವರಿಗೆ ವಿವರಿಸಿ ತಮ್ಮ ಮನಸ್ಸನ್ನು ಹಗುರ ಗೊಳಿಸಿಕೊಂಡ ಅತ್ಯಂತ ಸರಳ ವ್ಯಕ್ತಿ ಕ್ಯಾಪ್ಟನ್ ಗೋಪಿನಾಥ್.

ಇದೇ ಸಮಯದಲ್ಲಿ ಸ್ವಲ್ಪ ಬಿಡುವಾಗಿದ್ದ ಕಾರಣ ಸಿಂಪ್ಲೀ-ಫ್ಲೈ ಎಂಬ ತಮ್ಮ ವಿಮಾನ ಕಂಪನಿಯ ಅನುಭವವನ್ನು ಪುಸ್ತಕದ ರೂಪದಲ್ಲಿ ಹೊರತಂದು ಅವರ ಮಹತ್ವಾಕಾಂಕ್ಷೆಯ ದೃಷ್ಟಿಯನ್ನು, ಯಶಸ್ವಿ ವ್ಯವಹಾರ ಕಥೆಯನ್ನಾಗಿ ಪರಿವರ್ತಿಸುವ ಗಮನಾರ್ಹ ಪ್ರಯಾಣದ ಬಗ್ಗೆ ಬೆಳಕು ಚೆಲ್ಲುವುದರಲ್ಲಿ ಸಫಲರಾದರು. ಇತರೇ ಎಲ್ಲಾ ಉದ್ಯಮಿಗಳಿಗಿಂತ ಭಿನ್ನವಾಗಿ ಮತ್ತು ದೇಶದ ಅನೇಕ ಹೊಸಾ ಯುವ ಉದ್ಯಮಿಗಳಿಗೆ ಪ್ರೇರಣೆ ನೀಡುವಲ್ಲಿ ಕ್ಯಾಪ್ಟನ್ ಗೋಪಿನಾಥ್ ಅವರ ಬಹುತೇಕ ಎಲ್ಲಾ ಪ್ರಯತ್ನಗಳು ಯಶಸ್ವಿಯಾಗಿವೆ.

ಇವೆಲ್ಲದರ ಮಧ್ಯೆ ರಾಜಕೀಯದಲ್ಲಿ ತಮ್ಮ ಅದೃಷ್ಟವನ್ನು ಪರೀಕ್ಷಿಸುವ ಸಲುವಾಗಿ 2014ರ ಲೋಕಸಭಾ ಚುನಾವಣೆಯಲ್ಲಿ ಸ್ವತಂತ್ರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದರಾದರೂ ಸಾರ್ವಜನಿಕರಿಂದ ಸಾಕಷ್ಟು ಬೆಂಬಲವನ್ನು ಪಡೆಯುವುದರಲ್ಲಿ ವಿಫಲರಾದ ಗೋಪೀನಾಥ್ ಡೆಕ್ಕನ್ 360 ಎಂಬ ಸರಕು ಹಾರಾಟದ ಹೊಸ ಕಾರ್ಯಾಚರಣೆಯನ್ನು ಪ್ರಾರಂಭಿಸುವ ಮೂಲಕ ವಿಮಾನಯಾನದ ವ್ಯವಹಾರದಲ್ಲಿ ಮುಂದುವರೆಯಲು ಪ್ರಯತ್ನಿಸಿದರಾದರೂ ಅರ್ಥಿಕವಾಗಿ ಅದು ಕೈಹಿಡಿಯದ ಕಾರಣ ಅದನ್ನೂ ಸಹಾ ಮುಚ್ಚ ಬೇಕಾದದ್ದು ದುರಾದೃಷ್ಟಕರ ಸಂಗತಿ.

ಇಷ್ಟು ಕಡಿಮೆ ಅವಧಿಯಲ್ಲಿ ಅವರ ಅದ್ಭುತ ಯಶಸ್ಸನ್ನು ಮನಗಂಡು ಅನೇಕ ಪ್ರಸಿದ್ಧ ಮತ್ತು ಪ್ರತಿಷ್ಠಿತ ಸಂಸ್ಥೆಗಳಿಂದ ಅನೇಕ ಪ್ರಶಸ್ತಿ ಪುರಸ್ಕಾರಗಳನ್ನು ಪಡೆದಿದ್ದು ಅವುಗಳಲ್ಲಿ ಪ್ರಮುಖವಾಗಿರುವುದು

ಹಲವಾರಿ ಎಂಟರ್‌ಪ್ರೈಸ್‌ಗಾಗಿ ರೋಲೆಕ್ಸ್ ಪ್ರಶಸ್ತಿಗಳು,

ಕರ್ನಾಟಕ ಸರ್ಕಾರದ ರಾಜ್ಯೋತ್ಸವ ಪ್ರಶಸ್ತಿ,

  • ಚೆವಲಿಯರ್ ಡೆ ಲಾ ಲೀಜನ್ ಡಿ ಹೊನ್ನೂರ್,

  • ಪರ್ಸನಾಲಿಟಿ ಆಫ್ ದಿ ಡಿಕೇಡ್ ಪ್ರಶಸ್ತಿ

  • ಸರ್ ಎಂ ವಿಶ್ವೇಶ್ವರಯ ಸ್ಮಾರಕ ಪ್ರಶಸ್ತಿಗಳಾಗಿವೆ.

ಅವರ ಸಾಧನೆಗಳ ಕಾಲಘಟ್ಟಗಳು ಈ ರೀತಿಯಾಗಿದೆ

  • 1997: ಅವರು ಡೆಕ್ಕನ್ ಏವಿಯೇಷನ್ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದರು.

  • 2003: ಅವರು ಏರ್ ಡೆಕ್ಕನ್ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದರು.

  • 2004: ಡೆಕ್ಕನ್ ಏವಿಯೇಷನ್ ಶ್ರೀಲಂಕಾಕ್ಕೆ ವಿಸ್ತರಿಸಿತು.

  • 2007: ಏರ್ ಡೆಕ್ಕನ್ ಕಿಂಗ್‌ಫಿಶರ್ ಏರ್‌ಲೈನ್ಸ್‌ನೊಂದಿಗೆ ವಿಲೀನಗೊಂಡಿತು.

  • 2009: ಅವರು ಡೆಕ್ಕನ್ 360 ಅನ್ನು ಪ್ರಾರಂಭಿಸಿದರು

  • 2014: ಲೋಕಸಭಾ ಚುನಾವಣೆಗೆ ಸ್ಪರ್ಧಿಸಿದರು.

ಗೋಪಿನಾಥರ ಸಿಂಪ್ಲಿ ಫ್ಲೈ ಪುಸ್ತಕದಿಂದ ಪ್ರೇರಿತವಾಗಿ ತಮಿಳಿನಲ್ಲಿ ಸೂರ್ಯಾ ಅವರ ಆಭಿನಯದಲ್ಲಿ ಸೂರರೈ ಪೊಟ್ರು ಎಂಬ ಚಿತ್ರ ಸಿದ್ಧವಾಗಿದ್ದು ಇನ್ನೇನು ಕೆಲವೇ ದಿನಗಳಲ್ಲಿ ಅಮೆಜಾನ್ ಪ್ರೈಮ್‌ನಲ್ಲಿ ಬಿಡುಗಡೆಯಾಗಲಿದೆ. ಎತ್ತಿನ ಗಾಡಿ ಸವಾರಿ ಮಾಡುತ್ತಿದ್ದ ಸಾಧಾರಣ ವ್ಯಕ್ತಿ, ವಿಮಾನಯಾನದ ಸಂಸ್ಥೆಯನ್ನೇ ಆರಂಭಿಸಿ ಕಡಿಮೆ-ವೆಚ್ಚದ ವಿಮಾನಯಾನ ಸೇವೆಯನ್ನು ಪ್ರಾರಂಭಿಸುವ ಯುವಕನ ಕಥೆಯನ್ನು ಹೊಂದಿದೆ.

ಸದ್ಯದಲ್ಲಿ ಬೆಂಗಳೂರಿನಲ್ಲಿ ತಮ್ಮ ಕುಟುಂಬದೊಡನೆ ನೆಮ್ಮದಿಯ ಜೀವನ ನಡೆಸುತ್ತಿರುವ ಕ್ಯಾಪ್ಟನ್ ಗೋಪಿನಾಥ್, ಅನೇಕ ವಾರಪತ್ರಿಕೆಗಳಲ್ಲಿ ಸಕ್ರೀಯರಾಗಿ ಪ್ರಸಕ್ತ ವಿದ್ಯಮಾನಗಳ ಬಗ್ಗೆ ಪ್ರಚೋದನಕಾರಿ ಅಂಕಣಕಾರರಾಗಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. 2017 ರಲ್ಲಿ, ತಮ್ಮ ಆಸಕ್ತಿಗಳು ಮತ್ತು ಬದ್ಧತೆಯ ಆಳವನ್ನು ಸೆರೆಹಿಡಿಯುವ You Cannot Miss This Flight: Essays on Emerging India ಎಂಬ ಹೆಸರಿನ ಮತ್ತೊಂದು ಪುಸ್ತಕವನ್ನು ಬರೆದು ಖ್ಯಾತ ಲೇಖಕರಾಗಿಯೂ ಪ್ರಸಿದ್ಧಿ ಹೊಂದಿದ್ದಾರೆ.

ಸಾಧಾರಣ ಹಿನ್ನೆಲೆಯಿಂದ ಬಂದ ಕ್ಯಾಪ್ಟನ್ ಗೋಪಿನಾಥ್ ಅವರದ್ದು ಬಹುಮುಖ ವ್ಯಕ್ತಿತ್ವ. ಆರಂಭದಲ್ಲಿ ಸೇನಾಧಿಕಾರಿ, ಪರಿಸರ ಸ್ನೇಹಿ ಕೃಷಿಕ, ಭಾರತದ ಪ್ರಮುಖ ಉದ್ಯಮಿ, ಸ್ವತಂತ್ರ ರಾಜಕೀಯ ಅಭ್ಯರ್ಥಿ, ಪ್ರಸಿದ್ಧ ಲೇಖಕ ಹೀಗೆ ಹತ್ತು ಹಲವು ವಿಷಯಗಳಲ್ಲಿ ತುಂಬಾ ವೈವಿಧ್ಯತೆಯೊಂದಿಗೆ, ಅವರು ಅತ್ಯಂತ ಆಸಕ್ತಿದಾಯಕ ಮತ್ತು ವಿಶಿಷ್ಟ ವ್ಯಕ್ತಿಗಳಲ್ಲಿ ಒಬ್ಬರು ಎಂಬುದರಲ್ಲಿ ಸಂದೇಹವಿಲ್ಲ. ಇವೆಲ್ಲವುಗಳ ಹೊರತಾಗಿಯೂ, ಅವರು ಕಡಿಮೆ-ವೆಚ್ಚದ ವಿಮಾನಯಾನ ಸಂಸ್ಥೆಗಳ ಪ್ರವರ್ತಕರಾಗಿ ಭಾರತೀಯ ವಾಯುಯಾನದ ಕ್ಷೇತ್ರದಲ್ಲಿ ಕ್ರಾಂತಿಯುಂಟು ಮಾಡಿ ಜನ ಸಾಮಾನ್ಯರನ್ನೂ ಯಶಸ್ವಿಯಾಗಿ ವಿಮಾನಯಾನ ಮಾಡಿಸುವಲ್ಲಿ ಸಫಲತೆಯನ್ನು ಕಂಡ ಸಾಹಸಿ ಕ್ಯಾಪ್ಟನ್ ಗೋಪಿನಾಥ್ ನಮ್ಮ ಹೆಮ್ಮೆಯ ಕನ್ನಡದ ಕಲಿಗಳೇ ಸರಿ

ಏನಂತೀರೀ?

ಗೊರೂರು ರಾಮಸ್ವಾಮಿ ಅಯ್ಯಂಗಾರ್

ಗೊರೂರು ರಾಮಸ್ವಾಮಿ ಅಯ್ಯಂಗಾರ್ ಹಾಸನ ಜಿಲ್ಲೆಯ ಹೊಳೇನರಸೀಪುರ ತಾಲ್ಲೂಕಿನ ಹೇಮಾವತಿ ನದಿಯ ತಟದಲ್ಲಿರುವ ಗೊರೂರು ಎಂಬ ಗ್ರಾಮದಲ್ಲಿ ಶ್ರೀನಿವಾಸ ಅಯ್ಯಂಗಾರ್ ಮತ್ತು ಲಕ್ಷಮ್ಮ ದಂಪತಿಗಳಿಗೆ 1904ರ ಜುಲೈ 4ರಂದು ರಾಮಸ್ವಾಮಿ ಅಯ್ಯಂಗಾರ್ ಅವರು ಜನಿಸುತ್ತಾರೆ. ಓದಿನಲ್ಲಿ ಬಹಳ ಚುರುಕಾಗಿದ್ದ ರಾಮಸ್ವಾಮಿಗಳು ತಮ್ಮ ಹಳ್ಳಿಯಲ್ಲಿಯೇ ಲೋಯರ್ ಸೆಕೆಂಡರಿ ಶಿಕ್ಷಣವನ್ನು ಮುಗಿಸಿದ ಉನ್ನತ ವ್ಯಾಸಂಗಕ್ಕಾಗಿ ಹಾಸನದ ಸರ್ಕಾರಿ ಪ್ರೌಢಶಾಲೆಗೆ ಸೇರಿಕೊಂಡು ವ್ಯಾಸಂಗ ಮಾಡುತ್ತಿದ್ದ ಸಮಯದಲ್ಲಿ ಗಾಂಧೀಯವರ ಅಸಹಕಾರ ಚಳುವಳಿಯಿಂದ ಆಕರ್ಷಿತರಾಗಿ ಶಿಕ್ಷಣಕ್ಕೆ ವಿದಾಯ ಹೇಳಿದ್ದಲ್ಲದೇ, ಗಾಂಧಿಯವರ ಪರಮ ಅನುಯಾಯಿಯಾಗಿ ಅವರ ಆಶ್ರಮವನ್ನು ಸೇರಿಕೊಂಡು, ಗುಜರಾತಿನ ವಿದ್ಯಾಪೀಠದ ವಿದ್ಯಾರ್ಥಿಯಾಗುತ್ತಾರೆ. ಅಲ್ಲಿಯ ಶಿಕ್ಷಣದ ಬಳಿಕ ಮದ್ರಾಸಿನ ಲೋಕಮಿತ್ರ ಮತ್ತು ಭಾರತಿ ಪತ್ರಿಕೆಗಳ ಕನ್ನಡ ಸಮಾಚಾರ ಲೇಖಕರಾಗಿ ಸ್ವಲ್ಪಕಾಲ ಕೆಲಸಮಾಡಿ, ಕೆಂಗೇರಿಯ ಗುರುಕುಲಾಶ್ರಮವನ್ನು ಸೇರಿಕೊಂಡು ಹರಿಜನೋದ್ಧಾರವನ್ನು ಮುಖ್ಯ ಕಾರ್ಯವನ್ನಾಗಿ ಸ್ವೀಕರಿಸಿ, ಅದನ್ನು ಬಹಳ ಶ್ರದ್ಧೆಯಿಂದ ನಿರ್ವಹಿಸುತ್ತಾರೆ. ಆದಾದ ನಂತರ ಬೆಂಗಳೂರಿನ ಅಖಿಲ ಭಾರತ ಚರಕ ಸಂಘದ ಖಾದಿ ವಸ್ತ್ರಾಲಯದ ಸಂಚಾಲಕರಾಗಿದ್ದಲ್ಲದೇ, ಜೊತೆ ಜೊತೆಯಲ್ಲಿಯೇ ಸಾಹಿತ್ಯ ಸೇವೆಯನ್ನು ಮುಂದುವರಿಸುತ್ತಾರೆ,

1933ರ ಹೊತ್ತಿಗೆ ರಾಮಸ್ವಾಮಿ ಐಯ್ಯಂಗಾರರು, ತಮ್ಮ ಹುಟ್ಟೂರು ಗೊರೂರರಿಗೆ ಮರಳಿ, ಮೈಸೂರು ಗ್ರಾಮ ಸೇವಾಸಂಘವನ್ನು ಸ್ಥಾಪಿಸಿ, ಖಾದಿ ಪ್ರಚಾರ, ಹರಿಜನೋದ್ಧಾರ, ವಯಸ್ಕರ ಶಿಕ್ಷಣ, ಗ್ರಾಮ ಕೈಗಾರಿಕೆಗಳು ಮುಂತಾದ ರಚನಾತ್ಮಕ ಚಟುವಟಿಕೆಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಲ್ಲದೇ ತಮ್ಮ ಸುತ್ತಮುತ್ತಲಿನ ಊರಿನ ಜನರನ್ನೂ ಸ್ವಾತಂತ್ರ್ಯ ಚಳುವಳಿಯಲ್ಲಿ ಧುಮುಕುವಂತೆ ಪ್ರೇರೇಪಿಸುತ್ತಾರೆ. 1942ರ ಚಲೇಜಾವ್ ಚಳವಳಿಯಲ್ಲಿ ಭಾಗವಹಿಸಿದ ಪರಿಣಾಮ ಸೆರೆಮನೆ ವಾಸವನ್ನೂ ಅನುಭವಿಸುತ್ತಾರೆ. ಇದೇ ಸಮಯದಲ್ಲಿ ಮೈಸೂರಿನಲ್ಲಿ ನಡೆದ ಚಳುವಳಿಯಲ್ಲಿ ಪೋಲೀಸರು ನಡೆಸಿದ ಗೋಲೀಬಾರ್ ಸಮಯದಲ್ಲಿ ಅವರ ಮಗ ಹತನಾದ ನೆನಪಿಗಾಗಿಯೇ ಆ ಸ್ಥಳವನ್ನು ರಾಮಸ್ವಾಮಿ ಸರ್ಕಲ್ ಎಂದೇ ಇಂದಿಗೂ ಕರೆಯಲಾಗುತ್ತದೆ.

ಸ್ವಾತಂತ್ರ್ಯ ಬಂದ ನಂತರ ಮೈಸೂರಿನಲ್ಲಿ ಪ್ರಜಾ ಸರ್ಕಾರ ಸ್ಥಾಪನೆಗಾಗಿ ನಡೆದ ಚಳವಳಿಯಲ್ಲೂ ಭಾಗವಹಿಸಿದರು. ಅದು ಸ್ಥಾಪಿತವಾದ ಮೇಲೆ ಸುಮಾರು ಹನ್ನೆರಡು ವರ್ಷಗಳ ಕಾಲ ರಾಜ್ಯದ ವಿಧಾನಪರಿಷತ್ತಿನ ಸದಸ್ಯರಾಗಿದ್ದಲ್ಲದೇ, ಕರ್ನಾಟಕದ ಏಕೀಕರಣ ಚಳುವಳಿಗಳಲ್ಲಿ ಸಕ್ರೀಯವಾಗಿ ಹೋರಾಡಿದ್ದಲ್ಲದೇ, ಹರಿಜನೋದ್ಧಾರ ಮತ್ತು ಗ್ರಾಮೊದ್ಧಾರಕ್ಕಾಗಿ ಶ್ರಮಿಸಿದ ಅಪ್ರತಿಮ ಗಾಂಧಿವಾದಿಯಾಗಿದ್ದರು. ಗೊರೂರು ಗ್ರಾಮ ಮತ್ತು ಅದರ ಸುತ್ತ ಹರಿಯುವ ಹೇಮಾವತಿ ನದಿ, ಈ ಎರಡೂ ಗೊರೂರರ ಸಾಹಿತ್ಯದಿಂದ ಕನ್ನಡ ನಾಡಿನಲ್ಲಿ ಅಲ್ಲದೇ ಹೊರಜಗತ್ತಿಗೂ ಪರಿಚಯವಾಗುವಂತೆ ಮಾಡಿದರು ಎಂದರೂ ತಪ್ಪಾಗಲಾರದು. ಆರ್. ಕೆ ನಾರಾಯಣ ತಮ್ಮ ಕಲ್ಪನೆಯ ಊರಾದ ಮಾಲ್ಗುಡಿ ಊರಿನ ಬಗ್ಗೆ ಬರೆಯುವ ಎಷ್ಟೋ ವರ್ಷಗಳ ಮುಂಚೆಯೇ, ರಾಮಾಸ್ವಾಮೀ ಐಯ್ಯಂಗಾರರು ತಮ್ಮ ಸಾಹಿತ್ಯದಲ್ಲಿ ತಮ್ಮ ಊರಾದ ಗೋರೂರನ್ನು ತಮ್ಮ ಸಾಹಿತ್ಯದ ಮೂಲಕ ಅತ್ಯಂತ ನವಿರಾಗಿ ಚಿತ್ರಿಸಿಕೊಟ್ಟಿದ್ದಾರೆ. ಹೇಮಾವತಿ ನದಿಯ ಮೂಲಕ, ಒಂದು ಊರು ಮತ್ತು ನದಿಯೊಡನೆ ಅಭಿನ್ನತೆ ಸಾಧಿಸಿದ ಲೇಖಕರು ವಿರಳವೇ. ಹಳ್ಳಿಯ ಚಿತ್ರಗಳು, ಗರುಡಗಂಬದ ದಾಸಯ್ಯ, ನಮ್ಮ ಊರಿನ ರಸಿಕರು, ಬೆಟ್ಟದ ಮನೆಯಲ್ಲಿ ಮತ್ತು ಇತರ ಪ್ರಬಂಧಗಳಲ್ಲದೇ, ಕಥೆಗಳು ಮತ್ತು ವಿನೋದ ಚಿತ್ರಗಳು, ಬೆಸ್ತರ ಕರಿಯ, ಹೇಮಾವತಿಯ ತೀರದಲ್ಲಿ ಮತ್ತು ಇತರ ಪ್ರಬಂಧಗಳ ಮೂಲಕ ನಾಡಿನಲ್ಲಿ ಪ್ರಖ್ಯಾತರಾದರು. ಕನ್ನಡ ಚಿತ್ರರಂಗದಲ್ಲಿ ಅತ್ಯಂತ ಹೆಸರು ಗಳಿಸಿದ ಹೇಮಾವತಿ ಮತ್ತು‌ ಭೂತಯ್ಯನ ಮಗ ಅಯ್ಯು ಕಾದಂಬರಿಯ ಕತೃ ಸಹಾ ಗೊರೂರು ರಾಮಸ್ವಾಮಿ ಐಯ್ಯಂಗಾರರೇ.

ತಮ್ಮ ಸಾಹಿತ್ಯದ ಸೇವೆಗಾಗಿ ಗೌರವ ಡಾಕ್ಟರೇಟ್ ಪಡೆದು ಡಾ.ಗೊರೂರು ರಾಮಸ್ವಾಮಿ ಅಯ್ಯಂಗಾರ್ ಎಂದೇ ಖ್ಯಾತರಾಗಿದ್ದ ರಾಮಸ್ವಾಮಿ ಐಯ್ಯಂಗಾರ್ ಅವರ ಸಾಹಿತ್ಯ ಸೃಷ್ಟಿ ಸಮೃದ್ಧವಾದುದು. ಪ್ರಬಂಧ, ಕಥೆ, ಕಾದಂಬರಿ, ಪ್ರವಾಸ ಕಥನ, ವಿಮರ್ಶೆ, ಜೀವನ ಚಿತ್ರ, ಭಾಷಾಂತರ – ಹೀಗೆ ಆಡು ಮುಟ್ಟದ ಸೊಪ್ಪಿಲ್ಲ ಗೋರೂರು ಕೈಯಾಡಿಸದ ಸಾಹಿತ್ಯ ಪ್ರಕಾರವಿಲ್ಲ ಎಂದರೂ ತಪ್ಪಾಗಲಾರದು. ಅಮೇರಿಕಾದಲ್ಲಿ ಗೋರೂರು ಎಂಬ ಅವರ ಪ್ರವಾಸೀ ಕಥನ ಬಹುಶಃ ಕನ್ನಡದಲ್ಲಿ ಅತ್ಯಂತ ಪ್ರಖ್ಯಾತಿ ಪಡೆದ ಪ್ರವಾಸೀ ಕಥನ ಎನ್ನುವುದು ಗಮನಾರ್ಹ ಅಂಶ. ಈ ಕೃತಿಯೇ ನಂತರ ಬಹುತೇಕ ಸಾಹಿತಿಗಳಿಗೆ ತಮ್ಮ ಪ್ರವಾಸೀ ಕಥನವನ್ನು ಬರೆಯುವಂತೆ ಪ್ರೇರೇಪಣೆ ನೀಡಿತು ಎಂದರೂ ಅತಿಶಯೋಕ್ತಿಯಾಗಲಾರದು. ತಮ್ಮ ಪ್ರಬಂಧ ಸಾಹಿತ್ಯದಿಂದ ನಾಡನ್ನು ನಗಿಸಿ ನಲಿಸಿದ್ದಾರೆ ಗೊರೂರರು. ಹಾಗೆ ನೋಡಿದರೆ ನಮ್ಮ ಜನತೆಗೆ ನಗೆಯನ್ನು ಕಲಿಸಿದವರಲ್ಲಿ ಅವರು ಪ್ರಮುಖರು ಎನ್ನಬಹುದು.

ಕನ್ನಡಕ್ಕೆ ಗೊರೂರರ ಮುಖ್ಯವಾದ ಕೊಡುಗೆಯೇನು? ಎಂಬುದಕ್ಕೆ ಕುವೆಂಪು ಅವರು ಹೇಳಿದ, ಚಾರ್ಲ್ಸ್ ಡಿಕನ್ಸ್, ಆಲಿವರ್ ಗೋಲ್ಡ್ ಸ್ಮಿತ್, ಎ.ಜಿ. ಗಾರ್ಡಿನರ್ ಮುಂತಾದ ಇಂಗ್ಲಿಷ್ ಲೇಖಕರ ಬರವಣಿಗೆಯನ್ನು ಓದಿ, ಅಲ್ಲಿನ ವಿವಿಧ ರೀತಿಯ ಹಾಸ್ಯವನ್ನು ಚಪ್ಪರಿಸಿದ್ದ ನಮಗೆ ಕನ್ನಡದಲ್ಲಿ ಅಂಥಹ ಹಾಸ್ಯದ ಅರಕೆ ದೊಡ್ಡ ಕೊರಗನ್ನೇ ಉಂಟುಮಾಡಿತ್ತು. ಆ ಅರಕೆಯನ್ನು ಹೋಗಲಾಡಿಸಿದ ಕೆಲವೇ ಲೇಖಕರಲ್ಲಿ ಶ್ರೀ ಗೊರೂರು ರಾಮಸ್ವಾಮಿ ಅಯ್ಯಂಗಾರರು ನಿಶ್ಚಯವಾಗಿಯೂ ಅಗ್ರಸ್ಥಾನದಲ್ಲಿದ್ದಾರೆ ಎಂಬ ಹೇಳಿಕೆಯೇ, ಕನ್ನಡ ಸಾಹಿತ್ಯ ಲೋಕಕ್ಕೆ ಗೊರೂರು ಅವರ ಕೊಡುಗೆಯನ್ನು ತಿಳಿಸುತ್ತದೆ.

ಗಾಂಧೀವಾದಿ ಗೊರೂರರ ಜಾನಪದ ಪ್ರಜ್ಞೆ ಅದ್ಭುತವಾದುದು. ಅವರೇ ಹೇಳಿಕೊಂಡಂತೆ ಅವರು ಸಾಹಿತಿಗಿಂತ ಹೆಚ್ಚಾಗಿ ಜನಸಾಮಾನ್ಯರ ಮನುಷ್ಯ ಎಂದೇ ಅವರ ನಂಬಿಕೆಯಾಗಿತ್ತು. ಜಾನಪದ ಗುಣಗಳನ್ನೂ, ಶಕ್ತಿಯನ್ನೂ ಹೆಚ್ಚು ಹೆಚ್ಚು ನೋಡಿದಂತೆ, ಭಾರತವನ್ನು ಆಧುನಿಕ ನಾಗರೀಕತೆಯ ಸರ್ವನಾಶದಿಂದ ತಪ್ಪಿಸಬಲ್ಲಂತದ್ದು ಜಾನಪದವೊಂದೇ ಎಂಬ ನಂಬಿಕೆ ದೃಢವಾಗುತ್ತದೆ ಎಂದೇ ಪ್ರತಿಪಾದಿಸಿದರು. ಈ ಜಾನಪದ ಮತ್ತು ಜನಪರ ದೃಷ್ಟಿಯ ಹಿನ್ನೆಲೆಯಲ್ಲಿ ಗೊರೂರರ ಹಾಸ್ಯಪ್ರಜ್ಞೆ ಯಶಸ್ವಿಯಾಗಿ ಕೆಲಸ ಮಾಡಿದೆ ಮತ್ತು ಇಂದಿನ ಜನರಿಗೂ ಜಾನಪದದ ಸೊಗಡನ್ನು ಹಚ್ವ ಹಸಿರಾಗಿರಿಸುವುದರಲ್ಲಿ ಸಫಲವಾಗಿದೆ.

ಗೊರೂರರು ತಮ್ಮ ಬರಹಗಳಲ್ಲಿ ಈಗ ಕಾಣ ಸಿಗದ ಅಥವಾ ಆಧುನಿಕತೆಯಿಂದಾಗಿ ತ್ವರಿತವಾಗಿ ಮರೆಯಾಗುತ್ತಿರುವ ಹಳ್ಳಿಯ ಬದುಕನ್ನು ಅದರ ಎಲ್ಲ ಮುಖಗಳೊಡನೆ ಚಿತ್ರಿಸುವಲ್ಲಿ ಸಫಲರಾಗಿದ್ದಾರೆ. ಗ್ರಾಮೀಣ ಬದುಕಿನಲ್ಲಿ ಅಲ್ಲಿನ ಜನಸಾಮಾನ್ಯರೊಂದಿಗೆ ಬೆರೆತು ಒಂದಾಗಿ ಬಾಳಿದ್ದರಿಂದ ಇದು ಸಾಧ್ಯವಾಗಿದೆ ಎನ್ನಬಹುದಾಗಿದೆ. ಅವರ ಕೃತಿಗಳಲ್ಲಿ ಕಂಡು ಬರುವ ಪಾತ್ರ ವೈವಿಧ್ಯ ಅಪಾರವಾದುದು; ಅಲ್ಲಿ ಗ್ರಾಮದ ಎಲ್ಲ ವೃತ್ತಿಗಳ, ಎಲ್ಲ ಜಾತಿಗಳ ಜನರೂ ಇದ್ದಾರೆ – ಹಾರುವರಿಂದ ಹರಿಜನರ ತನಕ. ಅವರ ಗರುಡಗಂಬದ ದಾಸಯ್ಯ ಕೃತಿಯ ಮುನ್ನುಡಿಯಲ್ಲಿ ದ.ರಾ ಬೇಂದ್ರೆ ಅವರು ಹೇಳಿರುವಂತೆ ಒಬ್ಬ ಅರಸುಗಳೇ, ಹಜಾಮರೇ, ಹಾರುವರೇ, ತುರುಕರೇ, ದಾಸಯ್ಯಗಳೇ, ಬಯಲಾಟದವರೇ, ಸುಭೇಧಾರೇ, ಶಾನುಭೋಗೇ, ಹೊಲೆಯರೇ – ಇವರೆಲ್ಲರನ್ನೂ ಒಂದು ಮಾಲೆಯಲ್ಲಿ ಪೋಣಿಸಿದ ವಿಕಟ ಕವಿತ್ವವು ಪ್ರಶಂಸನೀಯವಾದುದೆಂದು ಯಾರು ಹೇಳಲಿಕ್ಕಿಲ್ಲ? ವರಕವಿಗಳ ಈ ಮಾತು ಗೊರೂರರ ಸಾಹಿತ್ಯಕ್ಕೆಲ್ಲಾ ಅನ್ವಯಿಸಬಹುದಾದ ಹೇಳಿಕೆಯಂತಿದೆ.

ನಮ್ಮ ಎಮ್ಮೆಗೆ ಮಾತು ತಿಳಿಯುವುದೇ? ಎಂಬ ಪ್ರಬಂಧದಲ್ಲಿ ಪ್ರಾಣಿ ಪಾತ್ರವನ್ನೂ ತಂದಿದ್ದಲ್ಲದೇ, ತಮ್ಮ ಪಾತ್ರಗಳ ಮೂಲಕ ಜಾತಿ-ಮತ-ಭೇದಗಳನ್ನು ಮೀರಿ ಎಲ್ಲರನ್ನೂ ಒಗ್ಗೂಡಿಸುವ ಕೆಲವು ಸೂತ್ರಗಳನ್ನು ಗೊರೂರರು ಗುರುತಿಸಿ, ಅವುಗಳಿಗೆ ಒತ್ತು ಕೊಡುವುದರ ಮೂಲಕ ಸಾಮರಸ್ಯಯುತವಾದ ಒಂದು ಸಮಷ್ಟಿಯ ಗ್ರಾಮೀಣ ಚಿತ್ರಣವನ್ನು ಮೂಡಿಸುವುದರಲ್ಲಿ ಎತ್ತಿದ ಕೈ.

ಗೊರೂರರ ಹಾಸ್ಯ ಪ್ರಜ್ಞೆಗೆ ಪ್ರತ್ಯಕ್ಷ ಸಾಕ್ಷಿಯಾಗುವ ಸುಸಂಧರ್ಭವೊಂದು ವಯಕ್ತಿಕವಾಗಿ ನನಗೆ ಲಭಿಸಿದ್ದು ಪೂರ್ವ ಜನ್ಮದ ಸುಕೃತವೇ ಸರಿ. ಆ ಸುಸಂಧರ್ಭ ನಿಜಕ್ಕೂ ಅವರ್ಣನೀಯ. ಗೋಕಾಕ್ ಚಳುವಳಿಯ ನಂತರ ವರನಟ ಡಾ. ರಾಜಕುಮಾರ್ ಮತ್ತು ಗೊರೂರು ರಾಮಸ್ವಾಮಿ ಐಯ್ಯಂಗಾರರನ್ನು ನಮ್ಮ ಬಿಇಎಲ್ ಲಲಿತಕಲಾಸಂಘ ಸನ್ಮಾನಿಸುವ ಕಾರ್ಯಕ್ರಮದಲ್ಲಿ ಈ ಇಬ್ಬರೂ ಮಹಾನ್ ದಿಗ್ಗಜರು ಒಂದೇ ವೇದಿಕೆಯ ಮೇಲಿದ್ದರು. ವೇದಿಕೆಯ ಮೇಲೆ ಕೇವಲ ರಾಜಕುಮಾರರು ಮಾತ್ರವೇ ಆಸೀನರಾಗಿದ್ದು ಅವರ ಧರ್ಮ ಪತ್ನಿ ಪಾರ್ವತಮ್ಮನವರು ವೇದಿಕೆಯ ಮುಂಭಾಗದಲ್ಲಿ ಕುಳಿತದ್ದನ್ನು ಗಮನಿಸಿದ ಗೊರೂರರು ತಮ್ಮ ಭಾಷಣದ ಮಧ್ಯೆ ತಮ್ಮ ಹಾಸ್ಯಪ್ರಜ್ಞೆಯನ್ನು ಬಳಸಿಕೊಂಡು ಇಂದೇಕೋ ವರನಟರು ಮಂಕಾಗಿ ಕಾಣುತ್ತಿದ್ದಾರಲ್ಲ. ಬಹುಶಃ ಇಂಜಿನ್ ಇಲ್ಲದೇ ಕೇವಲ ವ್ಯಾಗಿನ್ ನನ್ನು ವೇದಿಕೆಯ ಮೇಲೆ ಕೂರಿಸಿರುವ ಕಾರಣವೋ ? ಎಂದು ಛೇಡಿಸಿದ್ದಲ್ಲದೇ, ಬೇಕೆಂದೇ ದಪ್ಪಗಿದ್ದ ಪಾರ್ವತಮ್ಮ ರಾಜಕುಮಾರ್ ಅವರನ್ನು ಪರ್ವತಮ್ಮ ಎಂದೇ ಹಲವಾರು ಬಾರಿ ಸಂಬೋಧಿಸಿ ಎಲ್ಲರನ್ನೂ ನಗೆಗಡಲಿಗೆ ಜಾರಿಸಿದ್ದು ನನಗೆ ಇನ್ನೂ ಹಚ್ಚಹಸಿರಾಗಿಯೇ ನೆನಪಿದೆ. ಗೊರೂರರ ಹಾಸ್ಯಪ್ರಜ್ಞೆಯ ಅರಿವಿದ್ದ ಮತ್ತು ಸಾಹಿತ್ಯ ಪ್ರೇವಿಯೂ ಆಗಿದ್ದ ಪಾರ್ವತಮ್ಮ ರಾಜಕುಮಾರ್ ಅವರೂ ಸಹಾ ಇದನ್ನು ಸಹಜವಾಗಿ ಹಾಸ್ಯವಾಗಿಯೇ ತೆಗೆದುಕೊಂಡು ಬಿದ್ದೂ ಬಿದ್ದೂ ನಕ್ಕಿದ್ದೂ ಗಮನಾರ್ಹವಾಗಿತ್ತು.

ಖ್ಯಾತ ವಾಗ್ಗೇಯಕಾರರು ಕವಿಗಳು ಮತ್ತು ಹರಿಕಥಾ ವಿದ್ವಾಂಸರಾಗಿದ್ದ ನಮ್ಮ‌ ತಾತ‌ ಬಾಳಗಂಚಿ ಗಮಕಿ ನಂಜುಂಡಯ್ಯರೂ ಮತ್ತು ಗೊರೂರು ರಾಮಸ್ವಾಮಿಗಳ ನಡುವೆ ಗಳಸ್ಯ ಗಂಟಸ್ಯದ ಗೆಳೆತನದ ಪರಿಣಾಮವಾಗಿ ಅವರ ಮನೆಯಲ್ಲಿಯೇ ನಮ್ಮ ತಂದೆ, ಗಮಕಿ ಶಿವಮೂರ್ತಿಗಳು ತಮ್ಮ‌ ಪ್ರಾಥಮಿಕ‌ ಶಿಕ್ಷಣದ ಒಂದು ವರ್ಷದ ವಿದ್ಯಾಭ್ಯಾಸವನ್ನು‌ ಗೊರೂರಿನಲ್ಲಿ ಮಾಡಿದ್ದರು.

ಇಷ್ಟೆಲ್ಲಾ ಸಾಹಿತ್ಯ ಕೃಷಿ ನಡೆಸಿದ್ದ ಗೊರೂರರಿಗೆ ಅನೇಕ ಗೌರವಗಳು, ಪ್ರಶಸ್ತಿ ಪುರಸ್ಕಾರಗಳು ಅವರನ್ನರಸಿ ಬಂದವು. ಅವುಗಳಲ್ಲಿ ಮುಖ್ಯವಾಗಿ

  • ಅಖಿಲ ಕರ್ನಾಟಕ ಜಾನಪದ ಸಮ್ಮೇಳನದ ಅಧ್ಯಕ್ಷತೆ
  • ಅಖಿಲಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆ
  • ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ
  • ಕೇಂದ್ರ ಸಾಹಿತ್ಯ ಅಕಾಡಮಿ ಪ್ರಶಸ್ತಿ
  • ರಾಜ್ಯ ಸಾಹಿತ್ಯ ಅಕಾಡಮಿ ಪ್ರಶಸ್ತಿ
  • ದೇವರಾಜ ಬಹದ್ದೂರ್ ಪ್ರಶಸ್ತಿ
  • ಮೈಸೂರು ವಿಶ್ವವಿದ್ಯಾಲಯದ ಗೌರವ ಡಾಕ್ಟರೇಟ್
  • ಅಭಿಮಾನಿಗಳು ಅರ್ಪಿಸಿದ ಗ್ರಂಥ ಗೊರೂರು ಗೌರವಗ್ರಂಥ, ಸಂಸ್ಮರಣ ಗ್ರಂಥ ಹೇಮಾವತಿಯ ಚೇತನ
  • ಅವರ ಹೇಮಾವತಿ ಮತ್ತು ಭೂತಯ್ಯನ ಮಗ ಐಯ್ಯು ಚಲನಚಿತ್ರವಾಗಿದ್ದು ಹೀಗೆ ಹತ್ತು ಹಲವಾರು

ಗೊರೂರರ ಬರವಣಿಗೆ ಅಪರೂಪದ್ದು ಮತ್ತು ಅವರಿಗೇ ಅನುರೂಪವಾದದ್ದು. ಇಂತಹ ಗೊರೂರರು ತಮ್ಮ ವಯೋಸಹಜವಾಗಿ ಸೆಪ್ಟೆಂಬರ್ 28,1991ರಂದು ನಿಧನರಾದರು. ಈಗ ಗೊರೂರಂತಹ ಸಾಹಿಗಳು ನಮ್ಮಲ್ಲಿಲ್ಲ, ಅವರು ಚಿತ್ರಿಸಿದಂಥ ಸಮಾಜವೂ ಈಗ ಉಳಿದಿಲ್ಲವಾದರೂ, ಅವರು ಉಳಿಸಿ ಹೋಗಿರುವ ಅನುಭವ ಶ್ರೇಷ್ಠತೆ ನಮಗೆ ಆಸ್ತಿಯಾಗಿ ಉಳಿದಿದೆ ಮತ್ತು ಅದನ್ನು ಓದುತ್ತಾ ಹೋದಂತೆಲ್ಲಾ ಆ ಸುಂದರ ಚಿತ್ರಣ ನಮ್ಮ ಕಣ್ಣ ಮುಂದೆಯೇ ನಡೆಯುತ್ತಿದೆಯೇನೋ ಅನ್ನಿಸುವಂತೆ ಮೂಡುತ್ತಾ ಹೋಗುವುದರಿಂದಲೇ ನಮ್ಮ ಗೂರೂರು ರಾಮಸ್ವಾಮಿ ಐಯ್ಯಂಗಾರರು ನಮ್ಮ ಕನ್ನಡದ ಹೆಮ್ಮೆಯ ಕಲಿಗಳೇ ಸರಿ.

ಏನಂತೀರೀ?