ಸಬ್ಬಸಿಗೆ ಸೊಪ್ಪಿನ ಬಾತ್

ssoppu

ಪ್ರತೀ ದಿನ ಬೆಳಿಗ್ಗೆ ಏನಪ್ಪಾ ತಿಂಡಿ ಮಾಡೋದೂ ಎಂಬ ಜಿಜ್ಞಾಸೆ ಬಹುತೇಕ ಹೆಣ್ಣುಮಕ್ಕಳಿಗೆ ಕಾಡುವುದು ಸಹಜವಾಗಿದೆ. ಅಂತಹವರೆಲ್ಲರಿಗೂ ಥಟ್ ಅಂತಾ ಸುಲಭವಾಗಿ ಆದರೆ ಅಷ್ಟೇ ಪರಿಮಳಯುಕ್ತ, ಪೌಷ್ಥಿಕವಾದ, ರುಚಿಯಾದ ಮನೆಯವರೆಲ್ಲರೂ ಇನ್ನೂ ಬೇಕು ಮತ್ತಷ್ಟು ಬೇಕು ಎಂದು ಕೇಳಿ ಕೇಳಿ ತಿನ್ನುವಂತಹ ಸಬ್ಬಸಿಗೆ ಸೊಪ್ಪಿನ ಬಾತ್ (ಸಬ್ಬಸಿಗೆ ಚಿತ್ರಾನ್ನ) ಮಾಡುವ ವಿಧಾನವನ್ನು ನಮ್ಮ ನಳಪಾಕದಲ್ಲಿ ತಿಳಿದುಕೊಳ್ಳೋಣ.

ಸಬ್ಬಸಿಗೆ ಸೊಪ್ಪಿನ ಬಾತ್ ತಯಾರಿಸಲು ಬೇಕಾಗುವ ಪದಾರ್ಥಗಳು

  • ಅಕ್ಕಿ – 1 ಬಟ್ಟಲು
  • ಅಡುಗೆ ಎಣ್ಣೆ – – 2 ರಿಂದ 3 ಚಮಚ
  • ಕಡಲೇ ಕಾಯಿ ಬೀಜ 1 ಚಮಚ
  • ಗೊಡಂಬಿ – 1 ಚಮಚ
  • ಕಡಲೇ ಬೇಳೆ – 1/2 ಚಮಚ
  • ಉದ್ದಿನ ಬೇಳೆ – 1/2 ಚಮಚ
  • ಸಾಸಿವೆ – 1/4 ಚಮಚ
  • ಜೀರಿಗೆ- 1/4 ಚಮಚ
  • ಚಕ್ಕೆ – 1/4 ಇಂಚು
  • ಚಿಟುಕಿ ಅರಿಶಿನ
  • ಚಿಟುಕಿ ಇಂಗು
  • ಸಬ್ಬಸಿಗೆ ಸೊಪ್ಪು – 1 ಕಟ್ಟು
  • ಸಣ್ಣಗೆ ಹೆಚ್ಚಿದ ಈರುಳ್ಳಿ – 1
  • ಬೆಳ್ಳುಳ್ಳಿ – 2 ರಿಂದ 3 ಎಸಳು (ಐಚ್ಛಿಕ)
  • ಹಸೀ ಬಟಾಣಿ – 1/2 ಬಟ್ಟಲು (ಐಚ್ಛಿಕ)
  • ಹಸಿ ಮೆಣಸಿನಕಾಯಿ – 3 ರಿಂದ 5 (ಖಾರಕ್ಕೆ ಅನುಗುಣವಾಗಿ)
  • ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಸ್ವಲ್ಪ
  • ಕರಿಬೇವಿನ ಸೊಪ್ಪು – ಸ್ವಲ್ಪ
  • ಶುಂಠಿ – 1/4 ಇಂಚು
  • ನಿಂಬೆ ರಸ – 1 ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ss1

ಸಬ್ಬಸಿಗೆ ಸೊಪ್ಪಿನ ಬಾತ್ ತಯಾರಿಸುವ ವಿಧಾನ

  • ಮೊದಲು ಅಕ್ಕಿಯನ್ನು ಚೆನ್ನಾಗಿ ತೊಳೆದು ಸ್ವಲ್ಪ ಉದುರಾಗಿರುವಂತೆ ಅನ್ನವನ್ನು ಮಾಡಿಕೊಂಡು ಅನ್ನವನ್ನು ಆರಲು ಬಿಡಿ. .
  • ಸಬ್ಬಸಿಗೆ ಸೊಪ್ಪನ್ನು ಚೆನ್ನಾಗಿ ಸ್ವಚ್ಛಗೊಳಿಸಿ ಅದನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ.
  • ಒಂದು ಗಟ್ಟಿ ತಳದ ಬಾಣಲಿಗೆ ಎಣ್ಣೆಯನ್ನು ಹಾಕಿ ಎಣ್ಣೆ ಕಾದ ನಂತರ ಅದಕ್ಕೆ ಸಾಸಿವೆ ಹಾಕಿ ಸಿಡಿಸಿಕೊಳ್ಳಿ
  • ನಂತರ ಕಡಲೇ ಕಾಯಿ ಬೀಜ, ಗೋಡಂಬಿ ಕಡಲೇಬೇಳೆ, ಉದ್ದಿನ ಬೇಳೆ, ಜೀರಿಗೆ ಮತ್ತು ಚಕ್ಕೆಯನ್ನು ಒಂದೊಂದಾಗಿ ಎಣ್ಣೆಗೆ ಹಾಕಿ ಕೆಂಪಗೆ ಬರುವವರೆಗೂ ಹುರಿದು ಕೊಳ್ಳಿ
  • ಈಗ ಹಸೀ ಮೆಣಸಿನಕಾಯಿ, ಕರಿಬೇವನ್ನು ಸೇರಿಸಿ ಹಸೀ ಹೋಗುವವರೆಗೂ ಹುರಿದುಕೊಂಡು ಅದಕ್ಕೆ ಕತ್ತರಿಸಿದ ಈರುಳ್ಳಿ ಸೇರಿಸಿ ಕೆಂಪಗೆ ಆಗುವರೆಗೂ ಹುರಿದುಕೊಳ್ಳಿ
  • ಈಗ ಹಸೀ ಬಟಾಣಿ, ಶುಂಠಿ ಮತ್ತು ಬೆಳ್ಳುಳ್ಳಿ ಸೇರಿಸಿ ಹಸೀ ಹೋಗುವವರೆಗೂ ಹುರಿದುಕೊಳ್ಳಿ
  • ಈಗ ಚಿಟುಕಿ ಇಂಗು ಮತ್ತು ಅರಿಶಿನ ಸೇರಿಸಿ ಅದಕ್ಕೆ ರುಚಿಗೆ ತಕ್ಕ ಉಪ್ಪು ಸೇರಿಸಿ
  • ನಂತರ ಹೆಚ್ಚಿದ ಸಬ್ಬಸಿಗೆ ಸೊಪ್ಪನ್ನು ಬೆರಸಿ ಅದಕ್ಕೆ ನಿಂಬೇ ಹಣ್ಣಿನ ರಸ ಸೇರಿ ಕೇವಲ ಒಂದೆರಡು ನಿಮಿಷ ಬಾಡಿಸಿದಲ್ಲಿ ಸಬ್ಬಸಿಗೆ ಸೊಪ್ಪಿನ ಬಾತ್ ಗೊಜ್ಜು ಸಿದ್ಧ. (ಸಬ್ಬಸಿಗೆ ಸೊಪ್ಪನ್ನು ಹೆಚ್ಚು ಬಾಡಿಸುವುದು/ಬೇಯಿಸುವುದರಿಂದ ಅದರ ಸುವಾಸನೆ ಮತ್ತು ಸತ್ವ ಕಳೆದು ಹೋಗುತ್ತದೆ)
  • ಆರಲು ಬಿಟ್ಟಿದ್ದ ಅನ್ನಕ್ಕೆ ಎರಡು ಚಮಚ ಎಣ್ಣೆಯನ್ನು ಬೆರೆಸಿ, ಅದಕ್ಕೆ ತಕ್ಕಷ್ಟು ತಯಾರಿಸಿ ಕೊಂಡಿರುವ ಗೊಜ್ಜನ್ನು ಬೆರೆಸಿ ಹದವಾಗಿ ಗಂಟಾಗದಂತೆ ಕಲೆಸಿ ಅದರ ಮೇಲೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಬೆರೆಸಿದಲ್ಲಿ ರುಚಿಕರವಾದ ಸಬ್ಬಸಿಗೆ ಸೊಪ್ಪಿನ ಬಾತ್ (ಸಬ್ಬಸಿಗೆ ಸೊಪ್ಪಿನ ಚಿತ್ರಾನ್ನ) ಸವಿಯಲು ಸಿದ್ದ.

ss2

ಈ ಬಾತಿಗೆ ದೊಡ್ಡ ಮೆಣಸಿನಕಾಯಿ, ಹಸೀ ಅವರೇಕಾಳು ಮತ್ತು ಕೊಬ್ಬರಿ ತುರಿಯನ್ನು ಸೇರಿಸಿದಲ್ಲಿ ಇದರ ರುಚಿಯನ್ನು ಮತ್ತಷ್ಟು ಹೆಚ್ಚಿಸಬಹುದು.

ಇನ್ನೇಕೆ ತಡಾ ನೋಡ್ಕೊಳ್ಳೀ, ಮಾಡ್ಕೊಳ್ಳೀ, ತಿನ್ಕೋಳ್ಳಿ

ಏನಂತೀರೀ?

ನಿಮ್ಮವನೇ ಉಮಾಸುತ

ಮನದಾಳದ ಮಾತು : ಸಬ್ಬಸಿಗೆ ಸೊಪ್ಪು ಕೇವಲ ರುಚಿ ಮತ್ತು ಸುವಾಸನೆಯನ್ನು ಹೆಚ್ಚಿಸುವುದಲ್ಲದೇ, ಬಹಳ ಆರೋಗ್ಯಕರವೂ ಹೌದು. ಸಬ್ಬಸಿಗೆ ಸೊಪ್ಪನ್ನು ನಿರಂತರವಾಗಿ ಸೇವಿಸುವ ಮೂಲಕ ನಿದ್ರಾಹೀನತೆಯನ್ನು ನಿವಾರಿಸಿಕೊಳ್ಳಬಹುದಾಗಿದೆ. ಸಬ್ಬಸಿಗೆ ಸೊಪ್ಪು ಜೀರ್ಣಕ್ರಿಯೆಗೆ ಸಹಕಾರಿಯಾಗಿದೆ. ಮಧುಮೇಹ ನಿಯಂತ್ರಣಕ್ಕೂ ಸಬ್ಬಸಿಗೆ ಸೊಪ್ಪು ರಾಮಬಾಣವಾಗಿದೆ. ಇನ್ನು ಹೆಣ್ಣುಮಕ್ಕಳಿಗಂತೂ ಸಬ್ಬಸಿಗೆ ಸೊಪ್ಪು ಬಹು ಉಪಕಾರಿಯಾಗಿದೆ. ಹೆಣ್ಣು ಮಕ್ಕಳ ಋತುಚಕ್ರವನ್ನು ಸರಿಪಡಿಸುವಲ್ಲಿ ಸಬ್ಬಸಿಗೆ ಸೊಪ್ಪು ಸಹಕಾರಿಯಾಗಿದೆ. ಬಾಣಂತಿಯರ ಎದೆಹಾಲಿನ ಪ್ರಮಾಣವನ್ನು ಹೆಚ್ಚಿಸುವ ಸಲುವಾಗಿ ಸಬ್ಬಸಿಗೆ ಸೊಪ್ಪನ್ನು ದಿನವೂ ಆಹಾರದ ರೂಪದಲ್ಲಿ ಕೊಡಲಾಗುತ್ತದೆ. ಸಣ್ಣ ಮಕ್ಕಳು ಪೆಟ್ಟು ಮಾಡಿಕೊಂಡಲ್ಲಿ, ಸಬ್ಬಸಿಗೆ ಸೊಪ್ಪಿನ ರಸವನ್ನು ಹಚ್ಚುವುದರಿಂದ, ಗಾಯವು ಬೇಗನೆ ವಾಸಿಯಾಗುತ್ತದೆ. ಇನ್ನು ಪದೇ ಪದೇ ಬಿಕ್ಕಳಿಗೆ ಬರುವವರಿಗೂ ಪ್ರತಿ ನಿತ್ಯದ ಆಹಾರದಲ್ಲಿ ಸಬ್ಬಸಿಗೆ ಸೊಪ್ಪಿನ ಬಳಕೆಯನ್ನು ಹೆಚ್ಚಿಸಿದ್ದಲ್ಲಿ ಬಿಕ್ಕಳಿಕೆಯನ್ನು ನಿಯಂತ್ರಿಸಬಹುದಾಗಿದೆ.

ಒರಳು ಕಲ್ಲು ಚಿತ್ರಾನ್ನ

ಸಭೆ ಸಮಾರಂಭಗಳಲ್ಲಿ ಎಲೆಯ ಕೊನೆಗೆ ಅಥವಾ ಮನೆಗಳಲ್ಲಿ ಬೆಳಗಿನ ತಿಂಡಿಗೆ ನಿಂಬೇಹಣ್ಣಿನ ಚಿತ್ರಾನ್ನ ಮಾಡುವುದು ವಾಡಿಕೆ ಅದರೇ ಅದೇ ರೀತಿಯ ಚಿತ್ರಾನ್ನ ತಿಂದು ಬೇಸರವಾಗಿದ್ದಲ್ಲಿ, ಸಾಂಪ್ರದಾಯಕವಾಗಿ ಅಡುಗೆಯಾದ ಒರಳು ಕಲ್ಲು ಚಿತ್ರಾನ್ನ ಮಾಡುವುದನ್ನು ನಮ್ಮ ಅನ್ನಪೂರ್ಣ ಮಾಲಿಕೆಯಲ್ಲಿ ತೋರಿಸಿ ಕೊಡುತ್ತಿದ್ದೇವೆ.

ಸುಮಾರು 4-5 ಜನರು ಸವಿಯಬಹುದಾದಷ್ಟು ಓರಳು ಕಲ್ಲು ಚಿತ್ರಾನ್ನ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಈ ರೀತಿಯಾಗಿವೆ

  • ತೆಂಗಿನಕಾಯಿ ತುರಿ- 1 ಬಟ್ಟಲು
  • ಜೀರಿಗೆ – 1 ಚಮಚ
  • ಬೆಲ್ಲ- ಸಣ್ಣ ಗಾತ್ರ
  • ಹುಣಸೇ ಹಣ್ಣು – ನಿಂಬೇ ಗಾತ್ರದ್ದು
  • ಹಸೀ ಮೆಣಸಿನ ಕಾಯಿ -4-6
  • ಕೊತ್ತಂಬರಿ ಸೊಪ್ಪು- ಸ್ವಲ್ಪ
  • ಅನ್ನ – 1 ಪಾವು

ಒಗ್ಗರಣೆ ಮಾಡಿಕೊಳ್ಳಲು ಬೇಕಾಗುವ ಸಾಮಗ್ರಿಗಳು

  • ಸಾಸಿವೆ – 1 ಚಮಚ
  • ಕಡಲೇ ಬೇಳೆ – 1 ಚಮಚ
  • ಉದ್ದಿನ ಬೇಳೆ – 1 ಚಮಚ
  • ಕಡಲೇಕಾಯಿ ಬೀಜ – 2-3 ಚಮಚ
  • ಒಣಮೆಣಸಿನ ಕಾಯಿ – 2-3
  • ಕರೀಬೇವಿನ ಸೊಪ್ಪು – 6-8 ಎಲೆಗಳು
  • ಅಡುಗೆ ಎಣ್ಣೆ – 2 ‍ಚಮಚ

ಒರಳು ಕಲ್ಲು ಚಿತ್ರಾನ್ನ ತಯಾರಿಸುವ ವಿಧಾನ

  • ಒಂದು ಪಾವು ಅಕ್ಕಿಯನ್ನು ಚೆನ್ನಾಗಿ ತೊಳೆದುಕೊಂಡು ಕುಕ್ಕರಿನಲ್ಲಿ ಅನ್ನ ಮಾಡಿಕೊಂಡು ಅನ್ನವನ್ನು ಆರಲು ಬಿಡಿ
  • ಮೇಲೆ ತಿಳಿಸಿದ ಎಲ್ಲಾ ಪರಿಕರಗಳನ್ನು ಸಾಂಪ್ರದಾಯಕವಾದ ಒರಳುಕಲ್ಲಿ (ಈಗ ಮಿಕ್ಸಿ)ನಲ್ಲಿ ತರಿ ತರಿಯಾಗಿ ರುಬ್ಬಿಕೊಳ್ಳಿ
  • ಒಂದು ಗಟ್ಟಿ ತಳದ ಬಾಣಲಿಯಲ್ಲಿ ಸ್ವಲ್ಪ ಎಣ್ಣೆ ಹಾಕಿಕೊಂಡು ಎಣ್ಣೆ ಕಾದ ನಂತರ ಸಾಸಿವೆ ಸಿಡಿಸಿ ಕೊಳ್ಳಿ
  • ನಂತರ ಕಡಲೇ ಬೇಳೆ, ಉದ್ದಿನ ಬೇಳೆ ಮತ್ತು ಕಡಲೇ ಕಾಯಿ ಬೀಜವನ್ನು ಬಾಣಲೆಗೆ ಹಾಕಿ ಕೆಂಪಗೆ ಬರುವಂತೆ ಹುರಿದುಕೊಳ್ಳಿ
  • ಈಗ ಒಣಮೆಣಸಿಕಾಯಿ ಮತ್ತು ಕರಿಬೇವನ್ನು ಹಾಕಿ ಹಸಿ ಹೋಗುವವರೆಗೂ ಹುರಿದುಕೊಳ್ಳಿ
  • ಈಗ ಚಿಟುಕಿ ಇಂಗು, ಅರಿಶಿನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ
  • ರುಬ್ಬಿಟ್ಟು ಕೊಂಡಿದ್ದ ಮಿಶ್ರಣವನ್ನು ಒಗ್ಗರಣೆಗೆ ಸೇರಿಸಿ ಮೂರ್ನಾಲ್ಕು ನಿಮಿಷಗಳಷ್ಟು ಕಾಲ ಬಾಡಿಸಿದಲ್ಲಿ ಒರಳು ಕಲ್ಲು ಚಿತ್ರಾನ್ನದ ಗೊಜ್ಜು ಸಿದ್ಧ.
  • ಆರಿದ ಅನ್ನದೊಂದಿಗೆ ರುಚಿಗೆ ತಕ್ಕಷ್ಟು ಒರಳು ಕಲ್ಲು ಚಿತ್ರಾನ್ನದ ಗೊಜ್ಜನ್ನು ಬೆರೆಸಿ ಕಲಸಿದಲ್ಲಿ ರುಚಿ ರುಚಿಯದ ಸಾಂಪ್ರದಾಯಕ ಒರಳು ಕಲ್ಲು ಚಿತ್ರಾನ್ನ ಸವಿಯಲು ಸಿದ್ಧ.

ಒರಳು ಕಲ್ಲು ಚಿತ್ರಾನ್ನ ಮಾಡುವುದನ್ನು ಈ ವಿಡೀಯೋ ಮುಖಾಂತರವೂ ನೋಡಿ ಕಲಿಯಬಹುದಾಗಿದೆ.

ಇನ್ನೇಕೆ ತಡಾ, ನೋಡ್ಕೋಳ್ಳಿ, ಓದ್ಕೋಳೀ, ಮಾಡ್ಕೊಳೀ, ತಿನ್ಕೋಳಿ.

ಏನಂತೀರೀ?

ಮನದಾಳದ ಮಾತು : ರುಬ್ಬಿಕೊಳ್ಳುವ ಸಾಮಗ್ರಿಗಳಲ್ಲಿ ಹಸೀ ಮೆಣಸಿನಕಾಯಿ ಬದಲಾಗಿ ಒಣ ಮೆಣಸಿನಕಾಯಿ ಮತ್ತು ಅದರ ಜೊತೆಗೆ ಸ್ವಲ್ಪ ಸಾಸಿವೆ ಬೆರಸಿ ರುಬ್ಬಿಕೊಂಡು ಇದೇ ವಿಧಾನವನ್ನು ಅನುಸರಿಸಿದರೆ ಕಾಯಿಸಾಸಿವೆ ಚಿತ್ರಾನ್ನವನ್ನು ತಯಾರಿಸಬಹುದಾಗಿದೆ.

ಜೀರಾ ರೈಸ್ ಮತ್ತು ದಾಲ್

ಅನ್ನದಿಂದ ಬಹಳ ಸುಲಭವಾಗಿ ಮಾಡುವ ತಿಂಡಿ ಎಂದರೆ ಚಿತ್ರಾನ್ನ. ಅದರೇ ಅದೇ ಚಿತ್ರಾನ್ನವನ್ನು ಎಷ್ಟು ಸಲಾ ಅಂತಾ ಮಕ್ಕಳು ತಿನ್ನುತ್ತಾರೆ. ಚಿತ್ರಾನ್ನಕ್ಕೆ ಬಳಸುವ ಪರಿಕರಗಳನ್ನೇ ಉಪಯೋಗಿಸಿ, ಮತ್ತೊಂದು ಅಧ್ಭುತವಾದ ಉತ್ತರ ಭಾರತದ ತಿಂಡಿಯನ್ನು ತಯಾರಿಸಬಹುದೇ ಅದೇ ಜೀರಿಗೇ ಅನ್ನ ಅಥವಾ ಜೀರಾ ರೈಸ್. ಬನ್ನಿ ಈಗ ಜೀರಾ ರೈಸ್ ಮತ್ತು ಅದರ ಜೊತೆಗೆ ನೆಂಚಿಕೊಳ್ಳಲು ರುಚಿಕರವಾದ ದಾಲ್ ಮಾಡುವುದು ಹೇಗೆ ಎಂಬುದನ್ನು ತಿಳಿಸಿಕೊಡುತ್ತೇನೆ.

ಸುಮಾರು ಐದಾರು ಜನರಿಗೆ ಸಾಕಾಗುವಷ್ಟು ಜೀರಾ ರೈಸ್ ಮತ್ತು ದಾಲ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

WhatsApp Image 2020-04-17 at 10.13.33 AM

  • ಅಕ್ಕಿ – 3 ಪಾವು
  • ಜೀರಿಗೆ – 2 ಚಮಚ
  • ತುಂಡರಿಸಿದ ಗೋಡಂಬಿ – 10-12
  • ಸಣ್ಣಗೆ ಕತ್ತರಿಸಿದ ಈರುಳ್ಳಿ – 2
  • ಉದ್ದುದ್ದ ಸೀಳಿದ ಮೆಣಸಿನಕಾಯಿ – 3-4
  • ಕರಿಬೇವು – 2 ಕಡ್ಡಿ
  • ತುಪ್ಪಾ – 2 ಚಮಚ
  • ಅಡುಗೆ ಎಣ್ಣೆ – 2 ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ಜೀರಾ ರೈಸ್ ತಯಾರಿಸುವ ವಿಧಾನ

  • ಅಕ್ಕಿಯನ್ನು ಚೆನ್ನಾಗಿ ತೊಳೆದು ಅದನ್ನು ಕುಕ್ಕರಿನಲ್ಲಿ ಸ್ವಲ್ಪ ಉದುರು ಉದುರಾಗುವಂತೆ ಅನ್ನವನ್ನು ಮಾಡಿಕೊಂಡು ಅದನ್ನು ತಣ್ಣಗೆ ಆರಲು ಬಿಡಿ.
  • ಅಗಲವಾದ ಬಾಣಲೆಯಲ್ಲಿ 2 ಚಮಚ ತುಪ್ಪ ಮತ್ತು ಎಣ್ಣೆಯನ್ನು ಹಾಕಿ ಅದು ಕಾದ ನಂತರ ಕತ್ತರಿಸಿದ ಈರುಳ್ಳಿ ಬೆರೆಸಿ ಅದು ಕೆಂಪಗಾಗುವಷ್ಟು ಹುರಿಯಿರಿ
  • ಈಗ ತುಂಡರಿಸಿದ ಗೋಡಂಬಿ ಬಾಣಲೆಗೆ ಹಾಕಿ ಕೆಂಪಗಾಗುವಷ್ಟು ಹುರಿಯಿರಿ
  • ಈಗ ಸೀಳಿದ ಮೆಣಸಿನಕಾಯಿಗಳನ್ನು ಮತ್ತು ಕರಿಬೇವನ್ನು ಬಾಣಲೆಗೆ ಹಾಕಿ ಚೆನ್ನಾಗಿ ಹುರಿಯಿರಿ
  • ಈಗ ಜೀರಿಗೆಯನ್ನು ಹಾಕಿ ಅದು ಕೆಂಪಗಾಗುವಂತೆ ಹುರಿಯಿರಿ
  • ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ತಣ್ಣಗೆ ಆರಿಸಿಟ್ಟಿದ್ದ ಅನ್ನವನ್ನು ಬಾಣಲೆಗೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಸಣ್ಣ ಉರಿಯಲ್ಲಿ ಐದಾರು ನಿಮಿಷಗಳಷ್ಟು ಬಾಡಿಸಿದಲ್ಲಿ ರುಚಿ ರುಚಿಯಾದ ಜೀರಾ ರೈಸ್ ಸಿದ್ಧ

ದಾಲ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

  • ತೊಗರೀ ಬೇಳೆ – 2 ಕಪ್
  • ಹೆಸರು ಬೇಳೆ – 2 ಕಪ್
  • ಜೀರಿಗೆ – 1/4 ಚಮಚ
  • ಸಾಸಿವೆ – 1/4 ಚಮಚ
  • ಅಚ್ಚ ಖಾರದ ಪುಡಿ – 1 ಚಮಚ
  • ಗರಂ ಮಸಾಲ ಪುಡಿ – 1 ಚಮಚ
  • ಸಾಸಿವೆ – 1/4 ಚಮಚ
  • ಅರಿಶಿನಪುಡಿ – 1/4 ಚಮಚ
  • ಸಣ್ಣಗೆ ಹೆಚ್ಚಿದ ಈರುಳ್ಳಿ – 1 ದೊಡ್ಡಗಾತ್ರದ್ದು
  • ಸೀಳಿದ ಮೆಣಸಿನಕಾಯಿ – 2-5 ಖಾರಕ್ಕೆ ಅನುಗುಣವಾಗಿ
  • ಬೆಳ್ಳುಳ್ಳಿ – 4-6 ಎಸಳು
  • ಶುಂಠಿ – 1 ಇಂಚು
  • ಕತ್ತರಿಸಿದ ಕೊತ್ತಂಬರಿ ಸೊಪ್ಪು 1 ಚಮಚ
  • ಕರಿಬೇವು – 2 ಕಡ್ಡಿ
  • ತುಪ್ಪಾ – 1 ಚಮಚ
  • ಅಡುಗೆ ಎಣ್ಣೆ – 2 ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ದಾಲ್ ತಯಾರಿಸುವ ವಿಧಾನ

WhatsApp Image 2020-04-17 at 10.15.27 AM

  • ಕುಕ್ಕರಿಗೆ ತೊಗರೀ ಬೇಳೆ ಮತ್ತು ಹೆಸರಬೇಳೆಯನ್ನು ಸಮ ಪ್ರಮಾಣದಲ್ಲಿ ಹಾಕಿ ಚೆನ್ನಾಗಿ ತೊಳೆದುಕೊಂಡು ಅದಕ್ಕಿ ನೀರು ಬೆರೆಸಿ ಚಿಟಿಕೆ ಅರಿಶಿನ ಪುಡಿಹಾಕಿ ಐದಾರು ವಿಷಿಲ್ ಬರುವಷ್ಟರ ವರೆಗೆ ಬೇಯಿಸಿಟ್ಟು ಕೊಂಡು ಅದನ್ನು ತಣ್ಣಗಾಗಲು ಬಿಡಿ
  • ಅಗಲವಾದ ಬಾಣಲೆಯಲ್ಲಿ 2 ಚಮಚ ಎಣ್ಣೆ ಮತ್ತು 1 ಚಮಚ ತುಪ್ಪಾ ಹಾಕಿ ಅದು ಕಾದ ನಂತರ ಸಾಸಿವೆ ಹಾಕಿ ಸಿಡಿಯಲು ಬಿಡಿ
  • ಈಗ ಕತ್ತರಿಸಿದ ಈರುಳ್ಳಿ ಬೆರೆಸಿ ಅದು ಕೆಂಪಗಾಗುವಷ್ಟು ಹುರಿಯಿರಿ
  • ಈಗ ಸೀಳಿದ ಮೆಣಸಿನಕಾಯಿ ಮತ್ತು ಕೊತ್ತಂಬರಿ ಸೊಪ್ಪನ್ನು ಹಾಕಿ ಚೆನ್ನಾಗಿ ಹುರಿಯಿರಿ
  • ಈಗ ಜೀರಿಗೆಯನ್ನು ಹಾಕಿ ಅದು ಕೆಂಪಗಾಗುವಂತೆ ಹುರಿಯಿರಿ
  • ಈಗ ರುಚಿಗೆ ತಕ್ಕಷ್ಟು ಉಪ್ಪು, ಅಚ್ಚ ಖಾರದ ಪುಡಿ, ಗರಂ ಮಸಾಲ ಸ್ವಲ್ಪ ಬಾಡಿಸಿಕೊಳ್ಳಿ
  • ಈಗ ಬೇಯಿಸಿದ ಬೇಳೆಯನ್ನು ಬಾಣಲೆಗೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಅಗತ್ಯಕ್ಕೆ ತಕ್ಕಷ್ಟು ನೀರು ಸೇರಿಸಿ ಸಣ್ಣ ಉರಿಯಲ್ಲಿ ಚೆನ್ನಾಗಿ ಕುದಿಸಿದಲ್ಲಿ ರುಚಿಯಾದ ದಾಲ್ ಸಿದ್ಧ.

ಬಿಸಿ ಬಿಸಿಯಾದ ಜೀರಾ ರೈಸ್ ಜೊತೆಯಲ್ಲಿ ಒಂದು ಬಟ್ಟಲು ದಾಲ್ ಮತ್ತು ಸೌತೇಕಾಯಿ, ಖಾರ ಬೇಕಿದ್ದಲ್ಲಿ ಹಸೀ ಮೆಣಸಿಕಾಯಿ, ಸಣ್ಣಗೆ ಕತ್ತರಿಸಿದ ನಿಂಬೇಹಣ್ಣಿನ ಜೊತೆ ತಿನ್ನಲು ಚೆನ್ನಾಗಿರುತ್ತದೆ.

ರುಚಿ ರುಚಿಯಾಗಿ ಮನೆಯಲ್ಲಿಯೇ ಜೀರಾ ರೈಸ್ ಮತ್ತು ದಾಲ್ ಮಾಡುವ ವಿಧಾನವನ್ನು ತಿಳಿಸಿಕೊಟ್ಟಿದ್ದೇನೆ.

ಇನ್ನೇಕೆ ತಡಾ ಓದ್ಕೋಳ್ಳಿ , ಮಾಡ್ಕೋಳ್ಳಿ , ತಿನ್ಕೊಳ್ಳಿ

ಏನಂತೀರೀ?

ಮನದಾಳದ ಮಾತು : ನಾನು ಮೊದಲ ಬಾರಿಗೆ ಜೀರಾ ರೈಸ್ ಸವಿದಿದ್ದು ಸುಮಾರು ೨೫ ವರ್ಷಗಳ ಹಿಂದೆ ಚೆನ್ನೈಯ್ಯಿನ ಮೈಲಾಪುರದ ಕರ್ಪಗಂ ದೇವಾಸ್ಥಾನದ ಎದುರಿಗಿದ್ದ ಸಂಗೀತಾ ಹೋಟೆಲ್ಲಿನಲ್ಲಿ. ದಿನಾ ಅದೇ ಊಟ ಮಾಡಿ ಬೇಜಾರಾಗಿದ್ದ ನನಗೆ ಮೊದಲಬಾರಿ ಜೀರಾ ರೈಸ್ ಆರ್ಡರ್ ಮಾಡಿದಾಗ ಅದು ಹೇಗಿರುತ್ತದೆ ಎಂದೂ ಗೊತ್ತಿರಲಿಲ್ಲ. ಹೆಸರಿಗೆ ಮಾತ್ರ ಜೀರಾ ರೈಸ್ ಅಂತಿದ್ರೂ, ಜೀರಾ ರೈಸ್ ನಲ್ಲಿ ಗೋಡಂಬಿ ಹುಡುಕುವ ಬದಲು, ಗೊಂಡಂಬಿಯಲ್ಲಿ ಜೀರಾ ರೈಸ್ ಹುಡುಕುವಂತಿದ್ದು ತುಂಬಾ ರುಚಿಕರವಾಗಿತ್ತು. ಹಾಗಾಗಿ ಅಂದಿಗೂ ಇಂದಿಗೂ ದಿಢೀರ್ ಎಂದು ಏನಾದ್ರೂ ಮಾಡ್ಬೇಕು ಅಂದ್ರೇ ಜೀರಾ ರೈಸ್ ಮಾಡಿ ಕೊಳ್ಳುತ್ತೇವೆ.