ಮೋಹಕ ನಟ ನಟಿಯರೋ? ಮಾದಕ ವ್ಯಸನಿಗಳೋ?

ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ) ಬೆಂಗಳೂರಿನ ಕಲ್ಯಾಣ್ ನಗರದ ರಾಯಲ್ ಸೂಟ್ಸ್ ಹೋಟೆಲ್ ಅಪಾರ್ಟ್ಮೆಂಟ್ನಿಂದ ಆಗಸ್ಟ್ 21 ರಂದು ಮಾಜಿ ಕಿರುತೆರೆ ನಟಿ ಅನಿಕಾ ಡಿ ಮತ್ತು ಅವರ ಇಬ್ಬರು ಸಹಚರರಾದ ಎಂ ಅನೂಪ್ ಮತ್ತು ಆರ್ ರವೀಂದ್ರನ್ ಅವರನ್ನು ಬಂಧಿಸಿ ಅವರಿಂದ 145 ಎಂಡಿಎಂಎ ಮಾತ್ರೆಗಳು ಮತ್ತು 2.2 ಲಕ್ಷ ರೂ.ಗಳ ಹಣವನ್ನು ವಶಪಡಿಸಿಕೊಂಡಿದ್ದಲ್ಲದೇ ಅವರ ಮಾಹಿತಿಯ ಮೇಲೆ ಇತರೇ ಹಲವಾರು ಕಡೆ ಧಾಳಿ ನಡೆಸಿ. 96 ಎಂಡಿಎಂಎ ಮತ್ತು 180 ಎಲ್ಎಸ್ಡಿ ಬ್ಲಾಟ್ಗಳನ್ನು ಮುಟ್ಟುಗೋಲು ಹಾಕಿಕೊಂಡು ನಂತರ, ದೊಡ್ಡಗುಬ್ಬಿಯಲ್ಲಿರುವ ಅನಿಖಾ ಡಿ ಅವರ ಮನೆಯಿಂದಲೂ 270 ಎಂಡಿಎಂ ಮಾತ್ರೆಗಳನ್ನು ವಶಪಡಿಸಿಕೊಂಡಿದೆ.

ತನಿಖೆಯ ಸಮಯದಲ್ಲಿ ಈ ಎಲ್ಲಾ ಮಾದಕದ್ರವ್ಯಗಳನ್ನು ಕನ್ನಡದ ಹಿರಿ ಮತ್ತು ಕಿರಿ ತೆರೆಯ ಪ್ರಮುಖ ಸಂಗೀತಗಾರರು, ನಟ, ನಟಿಯರಲ್ಲದೇ ರಾಜ್ಯದ ಉದ್ಯಮಿಗಳು ಮತ್ತು ರಾಜಕಾರಣಿಗಳ ಮಕ್ಕಳಿಗೆ ಸರಬರಾಜು ಮಾಡುತ್ತಿದ್ದರೆಂಬ ಭಯಂಕರ ವಿಷಯ ಹೊರಬಿದ್ದಿದ್ದು. ಸುಮಾರು ನಾಲ್ಕು ಪುಟಗಳಲ್ಲಿ ಬಹುತೇಕರ ಹೆಸರುಗಳನ್ನು ಬಹಿರಂಗ ಪಡಿಸಿದ್ದಾರೆ ಎಂಬ ಸುದ್ದಿ ಎಲ್ಲೆಡೆ ಹರಿದಾಡುತ್ತಿದೆ.

ಆರೋಪಿಗಳು ವಿದೇಶಗಳಿಂದ ಈ ಮಾದಕದ್ರವ್ಯಗಳನ್ನು ಕಳ್ಳಸಾಗಣೆ ಮಾಡಿ ಅದನ್ನು ಗುಟ್ಟಾಗಿ ನಗರದ ಖ್ಯಾತನಾಮರಿಗೆ ತಲುಪಿಸುತ್ತಿದ್ದರು ಎಂದು ತಿಳಿದು ಬಂದಿದೆ. ಆರೋಪಿಗಳ ಮೊಬೈಲಿನಲ್ಲಿರುವ ಮೊಬೈಲ್ ಸಂಖ್ಯೆಗಳಲ್ಲಿ ಬಹುತೇಕ ಖ್ಯಾತ ಕನ್ನಡ ಸಿನೆಮಾ ರಂಗದ ನಟ ನಟಿಯರು, ಪ್ರಮುಖ ಸಂಗೀತಗಾರರು ಮತ್ತು ವಿವಿಐಪಿಗಳ ಮಕ್ಕಳುಗಳಿಗೆ ಸೇರಿದ್ದಾಗಿದ್ದು ಅವರೊಡನೆ ಇರುವ ಅನೇಕ ಪೋಟೋಗಳೂ ಮೊಬೈಲಿನಲ್ಲಿ ಲಭ್ಯವಾಗಿದೆ ಎಂದು ತಿಳಿದು ಬಂದಿದೆ.

ಬಂಧಿತ ಡ್ರಗ್ ಡೀಲರ್ ಅನಿಕಾ, ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜಿನಲ್ಲಿ ಕನ್ನಡ ಸ್ಟಾರ್ ನಟಿಯೊಬ್ಬರು ಆಕೆಯ ಸಹಪಾಠಿಯಾಗಿದ್ದರು ಎಂಬ ಎಂಬ ವಿಚಾರ ತನಿಖೆಯ ಸಮಯದಲ್ಲಿ ಅಧಿಕಾರಿಗಳಿಗೆ ತಿಳಿದು ಬಂದಿದ್ದು, ಬಹುಶಃ ಆಕೆಯ ಮೂಲಕವೇ, ಅನಿಖಾ ಕಿರತೆರೆಯಲ್ಲಿ ಕೆಲ ಕಾಲ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸಿ, ಎಲ್ಲರ ಸಂಪರ್ಕ ಪಡೆದುಕೊಂಡ ನಂತರ ತನ್ನ ನಟನೆಯನ್ನು ನಿಲ್ಲಿಸಿ ಮಾದಕ ವಸ್ತುಗಳನ್ನು ಎಲ್ಲರಿಗೂ ಪೂರೈಸುತ್ತಿರಬಹುದಾ? ಎಂದು ತನಿಖೆ ನಡೆಸುತ್ತಿದ್ದಾರೆ.

ಈ ಸುದ್ದಿ ಕಾಳ್ಗಿಚ್ಚಿನಂತೆ ಹೊರ ಬೀಳಿತ್ತಿದ್ದಂತೆಯೇ. ಕ್ರೀಡಾಪಟು. ಪತ್ರಿಕೋದ್ಯಮಿ, ನಟ ಮತ್ತು ಖ್ಯಾತ ಚಲನಚಿತ್ರ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಅವರು ಇದರ ಕುರಿತಂತೆ ನೀಡಿರುವ ಹೇಳಿಕೆ ಮತ್ತಷ್ಟು ಆಘಾತಕಾರಿಯಾಗಿದೆ. ಸಮಾಜಕ್ಕೆ ಒಳ್ಳೆಯದಾಗಬೇಕು, ಯುವ ಜನತೆ ಮಾದಕ ಜಾಲದಲ್ಲಿ ಸಿಲುಕಬಾರದು ಎಂಬ ಕಳಕಳಿಯಿಂದಾಗಿ ತಾನು ತನಗೆ ಗೊತ್ತಿರುವ ಎಲ್ಲಾ ಮಾಹಿತಿಗಳನ್ನೂ ನೀಡಲು ಸಿದ್ದ ಎಂದು ಹೇಳಿರುವ ಅವರು, ಇದರಿಂದ ತಮ್ಮ ಮೇಲೆ ಹಲ್ಲೆಗಳಾಗುವ ಸಂಭವಿದ್ದು ಅದಕ್ಕೆ ಸೂಕ್ತ ಭಧ್ರತೆಯನ್ನೂ ಪೋಲೀಸರಲ್ಲಿ ಕೋರಿದ್ದಾರೆ.
ಗಾಂಧೀನಗರದಲ್ಲಿ ದಿಢೀರನೆ ಹೆಸರು ಮಾಡಿದ ಕೆಲ ಯುವ ನಟ, ನಟಿಯರು ಡ್ರಗ್ ಜಾಲದಲ್ಲಿ ಸಿಲುಕಿರುವುದು ತಮ್ಮ ಗಮನಕ್ಕೆ ಬಂದಿದ್ದು ಈ ಕುರಿತಂತ ಅನೇಕ ಹಿರಿಯ ನಟರು ತಮ್ಮ ಬಳಿ ಅಳಲನ್ನು ತೋಡಿಕೊಂಡಿದ್ದಾರೆ ಇದರ ಬಗ್ಗೆ ನ್ಯಾಯಯುತವಾದ ತನಿಖೆ ನಡೆದು ಇದರ ಹಿಂದೆ ಯಾರು ಇದ್ದಾರೆ ಮತ್ತು ಈ ಜಾಲದಲ್ಲಿ ಚಲಚಿತ್ರರಂಗದ ಯಾರ್ಯಾರು ಭಾಗಿಗಳಾಗಿದ್ದಾರೆ ಎಂಬುದು ಹೊರಬರಬೇಕಿದೆ ಎಂದು ಹೇಳಿದ್ದಾರೆ.

ಮುಂಬೈ ಚಿತ್ರ ಜಗತ್ತಿನಲ್ಲಿ ಅನೇಕ ನಟ, ನಟಿಯರು ಇಂತಹ ಜಾಲದಲ್ಲಿ ಸಿಲುಕಿರುವುದು ಈಗಾಗಲೇ ಜಗಜ್ಜಾಹೀರಾಗಿದ್ದು ನಮ್ಮ ಚಂದನವನ ಅದೇ ದಾರಿಯನ್ನು ಹಿಡಿಯಬಾರದು ಎಂಬ ಆಶಯದೊಂದಿಗೆ ಪೋಲೀಸರ ತನಿಖೆಗೆ ಎಲ್ಲ ರೀತಿಯಲ್ಲಿಯೂ ಸಿದ್ಧರಿರುವುದಾಗಿ ಇಂದ್ರಜಿತ್ ಲಂಕೇಶ್ ತಿಳಿಸಿದ್ದಾರೆ. ಕನ್ನಡ ಚಿತ್ರರಂಗದ ಮಂದಿ ಡ್ರಗ್ಸ್ ಮಾಫಿಯಾದಲ್ಲಿ ಸಿಲುಕಿದ್ದಾರೆ ಎಂಬುದು ಹೋಸಾ ವಿಷಯವೇನಲ್ಲ. ಮೂರ್ನಾಲ್ಕು ವರ್ಷಗಳ ಹಿಂದೆಯೇ ಅಶೋಕ ಪಿಲ್ಲರ್ ಬಳಿ ಬೆಳ್ಳಂಬೆಳಿಗ್ಗೆ ಖ್ಯಾತ ಮದ್ಯ ಉದ್ಯಮಿಯ ಮೊಮ್ಮಗ ಮತ್ತು ಹಲವಾರು ಕನ್ನಡ ಚಿತ್ರರಂಗದ ಉದಯೋನ್ಮುಖ ನಟರು ಮತ್ತು ಹೆಸರಾಂತ ನಟರ ಮಗನ ಕಾರ್ ಅಪಘಾತಕ್ಕೆ ಒಳಗಾದ ಸಮಯದಲ್ಲಿ ಆ ಕಾರ್ ಒಳಗೆ ಇದ್ದವರೆಲ್ಲರೂ ಮಾದಕದ್ರವ್ಯದ ನಶೆಯಲ್ಲಿದ್ದರು ಮತ್ತು ಅಲ್ಲಿ ಮಾದಕ ವಸ್ತುಗಳು ದೊರೆಕಿತ್ತು ಎಂದು ಪ್ರತ್ಯಕ್ಷದರ್ಶಿಗಳೇ ತಿಳಿಸಿದರೂ ಕಾಣದ ಕೈಗಳ ವಶೀಲೀಕರಣದಿಂದಾಗಿ ತನಿಖೆ ಹಳ್ಳ ಹಿಡಿದದ್ದನ್ನು ಇಂದ್ರಜಿತ್ ಲಂಕೇಶ್ ನೆನಪಿಸಿದ್ದಾರೆ.

ಅದೇ ರೀತಿ ಲಾಕ್ಡೌನ್ ಆರಂಭದ ವೇಳೆಯಲ್ಲಿ ನಟಿ ಶರ್ಮಿಳಾ ಮಾಂಡ್ರೆ ಅವರ ಕಾರು ಮೌಂಟ್ ಕಾರ್ಮೆಲ್ ಕಾಲೇಜ್ ಬಳಿ ತಡರಾತ್ರಿಯಲ್ಲಿ ಅಪಘಾತವಾದ ಸಮಯದಲ್ಲಿಯೂ ಕಾರಿನಲ್ಲಿ ಇದ್ದವರೆಲ್ಲರೂ ಮಾದಕ ದ್ರವ್ಯಗಳನ್ನು ಸೇವಿಸಿದ್ದರು ಎಂಬ ಗಂಭೀರ ಆರೋಪ ಕೇಳಿಬಂದಿತ್ತು. ಆಗ ಶರ್ಮಿಳಾ ಮಾಂಡ್ರೆ ಅವರ ಜೊತೆ ಆ ಕಾರಿನಲ್ಲಿ ಇದ್ದದ್ದು ಬೆಂಗಳೂರಿನ ದೊಡ್ಡ ಡ್ರಗ್ಸ್ ಪೆಡ್ಲರ್ ಎಂಬ ಆರೋಪ ಕೇಳಿ ಬರುತ್ತಿದೆ.

ಈ ದಂಧೆ ಕೇವಲ ಮಾದಕ ದ್ರವ್ಯಕ್ಕೆ ಮಾತ್ರವೇ ಮೀಸಲಾಗಿರದೇ ಹಿರಿ ಮತ್ತು ಕಿರಿತೆರೆಯ ಉದಯೋನ್ಮುಖ ನಟಿಯರನ್ನು ಬಳಸಿಕೊಂಡು ಉದ್ಯಮಿಗಳು. ರಾಜಕಾರಣಿಗಳು ಮತ್ತು ಅವರ ಮಕ್ಕಳನ್ನು ಹನಿಟ್ರ್ಯಾಪ್ ಕೂಡಾ ಮಾಡಿದ ಆರೋಪ ಸಹ ಕೇಳಿ ಬರುತ್ತಿದೆ. ಇದಲ್ಲದೇ ಕೆಪಿಎಲ್ ಮ್ಯಾಚ್ ಫಿಕ್ಸಿಂಗ್ ಮತ್ತು ಸ್ಪಾಟ್ ಫಿಕ್ಸಿಂಗ್ನಲ್ಲಿ ಈಗಾಗಲೇ ಸಿಕ್ಕಿ ಹಾಕಿಕೊಂಡಿರುವ ಕರ್ನಾಟಕದ ಖ್ಯಾತ ಕ್ರಿಕೆಟಿಗರ ಜೊತೆಯೂ ಇದರ ಸಂಬಂಧ ಇರಬಹುದು ಎಂಬ ಅನುಮಾನ ಬಂದಿದ್ದು ಪೋಲೀಸರ ನಿಷ್ಪಕ್ಷಪಾತ ಅನಿಕೆಯ ಮುಖಾಂತರ ತಿಳಿದು ಬರುವ ಸಾಧ್ಯತೆ ಇದೆ.

ಕೆಲ ನಟ ನಟಿಯರು ಶೂಟಿಂಗ್ ಗೆ ಬರುವಾಗಲೂ ಮಾದಕದ್ರವ್ಯ ಸೇವಿಸಿ ನೆಶೆಯಲ್ಲಿ ಇರುತ್ತಾರೆ ಇಲ್ಲವೇ, ಶೂಟಿಂಗ್ ಮುಗಿದ ನಂತರ ತಮ್ಮ ಕ್ಯಾರಾವಾನ್ಗಳಲ್ಲಿ ಕುಳಿತು ಒಟ್ಟಾಗಿಯೇ ಮಾದಕದ್ರವ್ಯಗಳನ್ನು ಸೇವಿಸುತ್ತಾರೆ ಎಂಬ ಆರೋಪ ಕೇಳಿ ಬರುತ್ತಿದೆ. ಇದಕ್ಕೆ ಪುಷ್ಠಿ ನೀಡುವಂತೆ ಈ ನಟರು ಆಗ್ಗಾಗ್ಗೆ ತಮ್ಮ ಫಾರ್ಮ್ ಹೌಸಿನಲ್ಲಿಯೋ ಅಥವಾ ನಗರದ ಹೊರವಲಯದ ರೆಸಾರ್ಟ್ಗಳಲ್ಲಿ ರೇವ್ ಪಾರ್ಟಿ ನಡೆಸುತ್ತಾ ಅಲ್ಲಿಗೆ ಬರುವ ಅನೇಕ ನಟ ನಟಿಯರ ಕಾರ್ ಗಳಲ್ಲಿ ಬಹಳಷ್ಟು ಬಾರಿ ಮಾದಕ ವಸ್ತುಗಳು ಪತ್ತೆ ಯಾಗಿದ್ದರೂ ತಮ್ಮ ಪ್ರಭಾವ ಬಳಸಿ ಪ್ರಕರಣವನ್ನು ‌ಮುಚ್ಚಿಹಾಕಿದ್ದಾರೆ ಎನ್ನಲಾಗಿದೆ.

ಕೇವಲ ಒಂದೆರಡು ಚಿತ್ರಗಳಲ್ಲಿ ನಟಿಸಿದ ನಟ ನಟಿಯರೂ ಈ ರೀತಿಯ ವ್ಯವಹಾರದಿಂದಲೇ, ರಾತ್ರೋ ರಾತ್ರಿ ಬೆಂಜ್, ಮರ್ಸಿಡಿಸ್ ಕಾರ್ ಗಳಲ್ಲಿ ಓಡಾಡುತ್ತಿರುವುದು ಎಲ್ಲರ ಗಮನಕ್ಕೆ ಬಂದಿದೆ. ಇದಕ್ಕೆ ಸ್ಪಂದಿಸಿರುವ ಖ್ಯಾತ ನಿರ್ಮಾಪಕ ರಾಕ್‌ ಲೈನ್ ವೆಂಕಟೇಶ್ ನಮ್ಮ ಕನ್ನಡ ಇಂಡಸ್ಟ್ರಿಯಲ್ಲಿ ಆ ರೀತಿ ಯಾರೂ ಇಲ್ಲ ಎಂದು ತಿಪ್ಪೇ ಸಾರಿಸಿದ್ದರೆ, ಗುಳಿಗೆ ಕೆನ್ನೆಯ ನಟಿ ರಚಿತಾ ರಾಮ್, ಕರ್ಮ ಅನ್ನೋದು ಇದೆಯಲ್ಲಾ ನಾವು ಬಿಟ್ಟರೂ ಅದು ನಮ್ಮನ್ನ ಬಿಡೋದಿಲ್ಲ. ನಾನ್ ತಗೋಳೋದಿಲ್ಲ.. ತಗೋಳೋರ್ ಬಗ್ಗೆ ನನಗೆ ಗೊತ್ತಿಲ್ಲ.. ನಮ್ಮ ನಮ್ಮ ಫ್ಯಾಮಿಲಿನ ನಾವೇ ನೋಡ್ಕೋಬೇಕು.. ಯಾರೂ ಸಹ ಬಂದು ನೋಡ್ಕೋಳೊಲ್ಲ.. ಅದಕ್ಕಾಗಿ ಯಾರೂ ಸಹ ಇಂತಹ ವಸ್ತುಗಳಿಗೆ ದಾಸರಾಗಬೇಡಿ.. ಆರೋಗ್ಯ ಕಾಪಾಡಿಕೊಳ್ಳಿ ಎಂದಿದ್ದಾರೆ.

ಆದರೆ ಇದಕ್ಕೆ ತದ್ವಿರುದ್ದವಾಗಿ ಶ್ರೇಷ್ಠ ಮನುಜ ಜನ್ಮ! ಅದು ನಶ್ವರ ಸತ್ಯ! ಆದರೂ ಆ ನಶ್ವರ ದೇಹ ನಶಿಸುವ ಮುನ್ನ ಸಾರ್ಥಕಪಡಿಸಿ ಬದುಕಬೇಕು. ನಶೆ ಹಿಂದೆ ಬರೀ ಸಿನಿಮಾ ಅಲ್ಲಾ, ಸಮಾಜವೇ ಆಕರ್ಷಿತ ಆಗುತ್ತಿದೆ. ಯಾರು ಶ್ರಮಪಟ್ಟು ಜೀವನ ಗೆದ್ದಿರುತ್ತಾರೆ ಅವರ ಹೆಜ್ಜೆ ತಪ್ಪುದಾರಿ ತುಳಿಯದು. ಯಾರು ವಾಮಮಾರ್ಗದಲ್ಲಿ ಗೆದ್ದಿರುತ್ತಾರೆ ಅವರೇ ನಶೆಹಾದರದ ದಾಸರು. ಉಪ್ಪು ತಿಂದವ ನೀರು ಕುಡಿಯುವ ಎಂದು ಟ್ವೀಟ್ ಮಾಡಿರುವ ಹಿರಿಯ ನಟ ಜಗ್ಗೇಶ್‌. ಒಂದು ಹಳೇ ಘಟನೆಯನ್ನೂ ಅವರು ನೆನಪು ಮಾಡಿಕೊಂಡಿದ್ದಾರೆ. ಬಲವಂತಕ್ಕೆ 2017ರಲ್ಲಿ ಒಬ್ಬ ರಾಜಕಾರಣಿಯ ಪಾರ್ಟಿಗೆ ಹೋಗಿದ್ದೆ. ಅರ್ಧ ಗಂಟೆಗೆ ಆ ಜಾಗ ಅಲ್ಲಿದ್ದವರ ಆರ್ಭಟ. ಬಂದು ಸೇರಿದ ಅರ್ಧ ಉಡುಗೆ ಸುಂದರಿಯರನ್ನು ಕಂಡು ನಾನು ನನ್ನ ಆತ್ಮೀಯ ಯುವನಟ ಹೇಳದೆ ಕೇಳದೆ ಲಿಫ್ಟು ಬಳಸದೆ 12 ಮಹಡಿ ಇಳಿದು ಓಡಿ ಬಂದಿದ್ದೆವಯ.. ಅದೇ ಕಡೆ, ಇಂದಿಗೂ ನನಗೆ ಯಾರೂ ಕರೆಮಾಡದಂತೆ ಮೊಬೈಲ್ ವರ್ಜಿಸಿದೆ. ಅಲ್ಲಿದ್ದವರು ಸಮಾಜದ ಎಲ್ಲ ಮುಖಗಳು’ ಎಂದು ಜಗ್ಗೇಶ್‌ ಟ್ವೀಟ್‌ ಮಾಡಿದ್ದಾರೆ.

ಈ ರೀತಿಯ ವೈರುದ್ಯ ಹೇಳಿಕೆಯನ್ನು ಗಮನಿಸಿದರೆ ಚಂದನವನದಲ್ಲಿ ಎಲ್ಲವೂ ಸರಿಯಿಲ್ಲ. ಸರಿ ಪಡಿಸಿಕೊಳ್ಳುವ ಸಮಯ ಬಂದಿದ್ದರೂ ಅದನ್ನು ಸರಿಪಡಿಸಿಕೊಳ್ಳುವ ಮನಸ್ಥಿತಿಯಲ್ಲಿ ಹೆಚ್ಚಿನವರು ಇಲ್ಲ ಎಂದು ಸ್ಪಷ್ಟವಾಗಿ ಗೋಚರಿಸುತ್ತಿದೆ ಚಂದನವನದಲ್ಲಿ ಚಂದನದ ಘಮಲಿನ ಜೊತೆ ಚರಸ್ ಮತ್ತು ಗಾಂ‍ಜಾ ಘಮಲು ನಟ ನಟಿಯರ ಅಮಲೇರಿಸಿದೆ ಎನ್ನುವುದು ಘನ ಘೋರ ಸತ್ಯವಾಗಿದೆ.

ಈ ಕರಾಳ ದಂಧೆ ಕೇವಲ ಚಿತ್ರರಂಗ, ರಾಜಕೀಯ, ಉದ್ಯಮ ಮತ್ತು ಕ್ರೀಡಾರಂಗಕ್ಕೆ ಮಾತ್ರವೇ ಮೀಸಲಾಗಿರದೇ, ತನ್ನ ಕಬಂಧ ಬಾಹುಗಳನ್ನು ಮಧ್ಯಮ ವರ್ಗದ ಯುವಕ ಯುವತಿಯರತ್ತವೂ ಚಾಚಿ, ಬಾಳಿ ಬೆಳಗ ಬೇಕಾಗಿದ್ದವರು ಸಣ್ಣ ಸಣ್ಣ ವಯಸ್ಸಿಗೇ ಮಾದಕದ್ರವ್ಯಗಳಿಗೆ ದಾಸರಾಗಿ ಅನೈತಿಕ ಚಟುವಟಿಕೆಗಳು ಮತ್ತು ಕಾನೂನು ಬಾಹೀರ ಚಟುವಟಿಕೆಗಳಲ್ಲಿ ಭಾಗಿಯಾಗಿ ವಯಸ್ಸಲ್ಲದ ವಯಸ್ಸಿಗೆ ಸಾವನ್ನಪ್ಪಿ ಪೋಷಕರ ಕಣ್ಣೀರು ಕೋಡಿ ಹರಿಯುತ್ತಿರುವುದು ನಿಜಕ್ಕೂ ಆಘಾತಕಾರಿಯಾಗಿದೆ.

ಕಬ್ಬಿಣ ಕೆಂಪಗೆ ಕಾದಿರುವಾಗಲೇ ಬಗ್ಗಿಸಬೇಕು ಎನ್ನುವಂತೆ ಈ ಸುದ್ದಿ ಹಸಿಯಾಗಿರುವಾಗಲೇ ಯಾರದೇ ವಶೀಲಿಗೆ ಒಳಗಾಗದೇ ಸೂಕ್ತ ತನಿಖೆ ನಡೆಸಿ ಅಪರಾಧಿಗಳಿಗೆ ಶಿಕ್ಷೆ ಕೊಡಿಸುವ ಮೂಲಕ ಸಮಾಜವನ್ನು ಸರಿದಾರಿಗೆ ತರಬೇಕೆಂದು ಪೊಲೀಸ್ ಆಯುಕ್ತ ಕಮಲ್ ಪಂತ್ ಅವರಲ್ಲಿ ಈ ಮೂಲಕ ಕೇಳಿ ಕೊಳ್ಳೋಣ.

ಏನಂತೀರೀ?

ಜನಮರುಳೋ ಜಾತ್ರೆ ಮರುಳೋ?

ಕಳೆದು ಒಂದೆರಡು ವಾರಗಳಿಂದ ಕೂರೋನಾ ರೋಗಾಣುವುಗಿಂತಲೂ ಅತ್ಯಂತ ಹೆಚ್ಚಾಗಿ ಹರಡಿದ ವಿಷಯವೆಂದರೆ, ಮಂಡ್ಯಾ ಜಿಲ್ಲೆಯ ಮಳವಳ್ಳಿ ತಾಲ್ಲೂಕ್ಕಿನ ನೆಟ್ಕಲ್ ಎಂಬ ಗ್ರಾಮದ ಮಹತ್ವಾಕಾಂಕ್ಷಿ ಪ್ರತಾಪ್ ಅಲಿಯಾಸ್ ದ್ರೋಣ್ ಪ್ರತಾಪ್ ವಿಷಯ ಬಗ್ಗೆಯೇ. ಸುಮಾರು ಒಂದೆರಡು ವರ್ಷಗಳ ಹಿಂದೆ ಇದ್ದಕ್ಕಿದ್ದಂತೆಯೇ ದ್ರೋಣ್ ಕುರಿತಂತೆ ತನ್ನ ಸಂಶೋಧನೆಯ ಫಲವಾಗಿ ಅಂತರಾಷ್ಟ್ರೀಯ ಪ್ರಶಸ್ತಿಗಳಿಗೆ ಭಾಜನರಾಗಿರುವ ಯುವ ವಿಜ್ಞಾನಿ, ಕಸದಿಂದ ರಸ ತೆಗೆಯುವಂತೆ ಹಳೆಯ ಎಲೆಕ್ಟ್ರಾನಿಕ್ಸ್ ಉಪಕರಣಗಳನ್ನು ಬಳಸಿಕೊಂಡು ಸುಮಾರು 600 ಕ್ಕೂ ಹೆಚ್ಚು ದ್ರೋಣ್ ಗಳನ್ನು ತಯಾರಿಸಿದ್ದಾನೆ. ಕೇವಲ 21 ವರ್ಷದ ವಯಸ್ಸಿನ ಪ್ರತಾಪ್ ಅವರ ಈ ಸಾಧನೆಗಾಗಿ ದೇಶ ವಿದೇಶಗಳಲ್ಲಿ ಪ್ರಸಿದ್ಧರಾಗಿ ತಿಂಗಳಲ್ಲಿ 20-25 ದಿನಗಳನ್ನು ವಿದೇಶಗಳಲ್ಲಿಯೇ ಕಳೆಯುವ ಈತನನ್ನು ಅನೇಕ ಬಹುರಾಷ್ಟ್ರೀಯ ಕಂಪನಿಗಳು ತಮ್ಮ ಸಂಸ್ಥೆಯಲ್ಲಿ ಮಾಸಿಕ 16 ಲಕ್ಷ ರೂಗಳು, 5 ಕೋಣೆಗಳುಳ್ಳ ಮನೆ ಮತ್ತು 2.5 ಕೋಟಿ ಬೆಲೆಬಾಳುವ ಕಾರನ್ನು ನೀಡುವುದಾಗಿ ಹೇಳಿದ್ದರೂ, ಒಬ್ಬ ದೇಶಪ್ರೇಮಿಯಾಗಿ ಈ ಆಫರ್ ಗಳನ್ನು ತಿರಸ್ಕರಿಸಿ ತನ್ನ ಈ ಸಾಧನೆ ಭಾರತದ ಸೇನೆಗೆ ಮೀಸಲಾಗಿಟ್ಟಿದ್ದೇನೆ ಎಂದು ಪುಂಖಾನು ಪುಂಖವಾಗಿ ಹೇಳುತ್ತಿದ್ದದ್ದನ್ನು ಕೇಳಿ ಮೈ ರೋಮಾಂಚನವಾಗಿದ್ದಂತೂ ಸುಳ್ಳಲ್ಲ. ಅದಕ್ಕೂ ಒಂದು ಹೆಜ್ಜೆ ಮುಂದೆ ಹೋಗಿ, ಈತನ ಸಾಧನೆಯನ್ನು ಗಮನಿಸಿದ ನಮ್ಮ ಹೆಮ್ಮೆಯ ಪ್ರಧಾನ ಮಂತ್ರಿಗಳಾದ ಶ್ರೀ ನರೇಂದ್ರ ಮೋದಿಯವರು ಈತನನ್ನು ನಮ್ಮ ಡಿಆರ್‌ಡಿಒ ಸಂಸ್ಥೆಯಲ್ಲಿ ಯುವ ವಿಜ್ಞಾನಿಯಾಗಿ ಸೇರಿಸಿಕೊಳ್ಳಬೇಕು ಎಂಬ ವಿಷಯ ಓದಿದ ನಂತರವಂತೂ ಪ್ರತಾಪ್ ಮತ್ತು ಪ್ರಧಾನಿಗಳ ಬಗ್ಗೆ ಹೆಮ್ಮೆಯಾಗಿತ್ತು.

kageಆದರೆ ಇದ್ದಕ್ಕಿದ್ದಂತೆಯೇ ದೇಶದಲ್ಲಿ ನಡೆಯುವ ಸುದ್ದಿ ಮತ್ತು ಅಭಿಪ್ರಾಯಗಳ ಕುರಿತಾದ ಮಾಹಿತಿಯನ್ನು ವಾಸ್ತವವಾಗಿ ಪರಿಶೀಲನೆ ಮಾಡುವಂತಹ OpIndia.com ಎಂಬ ವೆಬ್‌ಸೈಟ್ ಒಂದು ದ್ರೋಣ್ ಪ್ರತಾಪ್ ಕುರಿತಂತೆ ಸುದೀರ್ಘವಾದ ತನಿಖೆ ನಡೆಸಿ ಆತ ಇದುವರೆಗೂ ಹೇಳಿದ್ದೆಲ್ಲವೂ ಹಸೀ ಸುಳ್ಳು. ಆತ ಯಾವುದೇ ಅಂತರಾಷ್ಟ್ರೀಯ ಪ್ರಶಸ್ತಿ ಪುರಸ್ಕಾರಗಳನ್ನು ಪಡದೇ ಇಲ್ಲ. ನಿಜಕ್ಕೂ ಆತ ಹೇಳಿದಂತಹ ಸ್ಪರ್ಧೆಗಳೇ ನಡೆದಿಲ್ಲ ಎಂದು ತಿಳಿಸಿದ್ದಲ್ಲದೇ ಆತನ ಇದುವರೆಗಿನ ಭಾಷಣವೆಲ್ಲವೂ ಹಸೀ ಸುಳ್ಳು ಎಂದು ವೈಜ್ಞಾನಿಕವಾಗಿ ದಾಖಲೆಯ ಸಮೇತ ಎಳೆ ಎಳೆಯಾಗಿ ಬಿಚ್ಚಿಟ್ಟಿತೋ ಆಗ ನಿಜಕ್ಕೂ ಮನಸ್ಸಿಗೆ ದುಃಖವಾಗ ತೊಡಗಿತು. ಕುರಿ ಹಳ್ಳಕ್ಕೆ ಬಿದ್ದರೆ ಆಳಿಗೊಂದು ಕಲ್ಲನ್ನು ಹೋಡೆಯುವಂತೆ ಎಲ್ಲಾ ಮಾಧ್ಯಮಗಳೂ ಸಾಮಾಜಿಕ ಜಾಲ ತಾಣಗಳು ಆತನ ವಿರುದ್ಧವಾಗಿ ಬರೆಯ ತೊಡಗಿದಾಗ, ದೇವರೇ ಆತನ ಮೇಲಿರುವ ಈ ಎಲ್ಲಾ ಅರೋಪಗಳೂ ಸುಳ್ಳಾಗಿರಲಿ ಎಂದು ಮನಸ್ಸು ಹಾತೊರೆದಿದ್ದಲ್ಲದೇ ಅದನ್ನೇ ನಾನು ನನ್ನ ಮುಖ ಪುಟದಲ್ಲಿ ಹಾಕಿಕೊಂಡಿದ್ದೆ.

ಇಷ್ಟೆಲ್ಲಾ ನಡೆಯುತ್ತಿರುವಾಗ ಪ್ರತಾಪ್ ಏಕೆ ಸಾರ್ವಜನಿಕವಾಗಿ ಹೇಳಿಕೆ ನೀಡುತ್ತಿಲ್ಲಾ ಎಂದು ಯೋಚಿಸುತ್ತಿದ್ದಾಗಲೇ, ಪ್ರತಾಪ್ ಕೂಡ ಕೆಲವು ಮಾಧ್ಯಮಗಳ ಮೂಲಕ ತನ್ನ ಮೇಲಿನ ಈ ಆರೋಪಗಳೆಲ್ಲವೂ ಸುಳ್ಳು. ನಾನು ಇದುವರೆವಿಗೂ ಹೇಳಿದ್ದೆಲ್ಲವೂ ಸತ್ಯ. ನನ್ನ ವಿರುದ್ಧ ಕಾಣದ ಕೈಗಳ ಷಡ್ಯಂತ್ರ ನಡೆಯುತ್ತಿದೆ. ಈ ಕುರಿತಂತೆ ಇನ್ನೆರಡು ದಿನಗಳಲ್ಲಿ ದಾಖಲೆ ಸಮೇತ ತಿಳಿಸುತ್ತೇನೆ ಎಂದಾಗ ಮನಸ್ಸಿಗೆ ಕೊಂಚ ನಿರಾಳವಾಗಿತ್ತು.

BTVನೆನ್ನೆ ಸಂಜೆ B-TVಯಲ್ಲಿ ಕಿರಿಕ್ ಕೀರ್ತಿಯ ಸಂದರ್ಶನದಲ್ಲಿ ಪ್ರತಾಪನ ಪ್ರಲಾಪಗಳನ್ನು ನೋಡುತ್ತಿದ್ದಂತೆಯೇ ನನ್ನ ಆಶಾವಾದದ ಆಸೆಗಳೆಂಬ ಗಾಳಿ ತುಂಬಿದ್ದ ಬೆಲೂನ್ ಡಬ್ ಎಂದು ಒಡೆದು ಹೋಗಿ ನುಚ್ಚುನೂರಾಯಿತು. ಆತ ಈ ಮೊದಲೇ ಹೇಳಿದ್ದ ಸುಳ್ಳನ್ನು ಸತ್ಯ ಮಾಡಲು ಸುಳ್ಳಿನ ಮೇಲೆ ಸುಳ್ಳನ್ನು ಹೇಳುತ್ತಾ ಹೋಗುತ್ತಿದ್ದದ್ದು ಸ್ಪಷ್ಟವಾಗಿ ಗೊಚರಿಸಿತು.  ಸಂದರ್ಶಕ ಕೇಳುತ್ತಿದ್ದ ಪ್ರಶ್ನೆಗಳಿಗೆ ಸಂಬಂಧವೇ ಇಲ್ಲದೇ ಓತ ಪ್ರೋತವಾಗಿ ಆತ ನೀಡುತ್ತಿದ್ದ ಉತ್ತರಗಳು ಕೆಲವು ವರ್ಷಗಳ ಹಿಂದೆ ಅರ್ನಾಬ್ ಗೋಸ್ವಾಮಿ ಮತ್ತು ರಾಹುಲ್ ಗಾಂಧಿ ಸಂದರ್ಶನವನ್ನು ನೆನಪಿಸಿ ಸ್ಪಷ್ಟವಾಗಿ ಪ್ರತಾಪ್ ವಿಜ್ಞಾನಿಗಿಂತ ಒಬ್ಬ ಅವಕಾಶವಾದಿ ಎಂಬುದು ಜಗಜ್ಜಹೀರಾತಾಯಿತು.

jaggeshನಿಜ ಹೇಳಬೇಕೆಂದರೆ ಆತನಿಗೆ ದ್ರೋಣ್ ಬಗ್ಗೆ ಅಲ್ಪ ಸ್ವಲ್ಪ ಜ್ಞಾನವಿದೆ ಅದನ್ನೇ ಆತನ ತಾತಾ ಅಜ್ಜಿಯರು ಉತ್ಪೇಕ್ಷೆಯಾಗಿ ಹಿರಿಯ ನಟ ಜಗ್ಗೇಶ್ ಅವರಿಗೆ ವಿದೇಶದಲ್ಲಿ ತಿಳಿಸಿದ್ದಾರೆ. ಭಾರತಕ್ಕೆ ಮರಳಿಬಂದ ನಂತರ ಕುತೂಹಲದಿಂದ ಆತನನ್ನು ತಮ್ಮ ಮನೆಗೆ ಕರಿಸಿ ಮಾತಾನಾಡಿಸಿದಾಗ ಜಗ್ಗೇಶ್ ಅವರು ನಡೆಸಿಕೊಡುತ್ತಿದ್ದ ಕಾಗೇ ಹಾರಿಸುವ ಕಾರ್ಯಕ್ರಮಕ್ಕಿಂತಲೂ ಹೆಚ್ಚಾಗಿಯೇ ಈಗ ಕಾಗೇ ಹಾರಿಸಿದ್ದಾನೆ ಅದನ್ನು ತಮ್ಮ ಮುಗ್ಧತೆಯಿಂದ ನಂಬಿದ ಜಗ್ಗೇಶ್ ಅವರು ಒಬ್ಬ ಗ್ರಾಮೀಣ ಪ್ರತಿಭೆಗೆ ತನ್ನ ಕೈಲಾದ ಮಟ್ಟಿಗೆ ಸಹಾಯ ಮಾಡುವ ಉದ್ದೇಶದಿಂದ ತಮ್ಮ ರಾಜಕೀಯ ಪ್ರಭಾವ ಬಳೆಸಿಕೊಂಡು ಮಂತ್ರಿ ಮಾಗಧರಿಗೆ ಅವನನ್ನು ಪರಿಚಯಿಸಿದ್ದಲ್ಲದೇ ಜೀ ಟಿವಿಯ ತಮ್ಮ ಕಾರ್ಯಕ್ರಮವೊಂದರ ಮೂಲಕ ಈತನನ್ನು ಜಗತ್ತಿಗೆ ಪರಿಚಯಿಸಿದ್ದಾರೆ.

ರೋಗಿ ಬಯಸಿದ್ದೂ ಹಾಲು ಅನ್ನ. ವೈದ್ಯ ಹೇಳಿದ್ದೂ ಹಾಲೂ ಅನ್ನ ಎನ್ನುವಂತೆ ತನಗೆ ಸಿಕ್ಕ ಇಂತಹ ಅದ್ಭುತ ಅವಕಾಶವನ್ನು ಸದ್ಬಳಕೆ ಮಾಡಿಕೊಂಡ ಪ್ರತಾಪ್, ಅತ್ಯಂತ ಮುಗ್ಧತೆಯಿಂದ ಮರುಳು ಮಾಡಿದ್ದಾನೆ. ಅಲ್ಲಿಂದ ಶುರುವಾಯಿತು ನೋಡಿ ಮಾಧ್ಯಮಗಳ ಪ್ರತಾಪ. ಸದಾ ಕಾಲವೂ TRP ಹಿಂದೆ ಬಿದ್ದು ಸಣ್ಣ ಸಣ್ಣ ವಿಷಯಗಳನ್ನೂ ವಾಸ್ತವವನ್ನು ಅರಿಯದೇ ಅತೀ ವರ್ಣರಂಜಿತವಾಗಿ ತೋರಿಸಲು ಹಪಾಹಪಿಸುವ ಕನ್ನಡದ ಎಲ್ಲಾ ಮಾಧ್ಯಮಗಳೂ Zee Kannadaಕ್ಕಿಂತಲೂ ಒಂದು ಹೆಜ್ಜೇ ಮುಂದೆ ಹೋಗಿ ಆತನ ಪೂರ್ವಾಪರಗಳನ್ನು ತಿಳಿಯದೇ, ಸುಖಾ ಸುಮ್ಮನೆ ಆತನನ್ನು ಹೊಗಳಿ ಅಟ್ಟಕ್ಕೇರಿಸುತ್ತಿದ್ದಂತೆಯೇ ಪ್ರತಾಪನಿಗೆ ರೊಟ್ಟಿ ಜಾರೀ ತುಪ್ಪಕ್ಕೆ ಬಿದ್ದಂತಾಗಿ ಇದೇ ಸುಸಂದರ್ಭ ಎಂದು ಇದೇ ಪ್ರಸಿದ್ಧಿಯನ್ನೇ ಬಳಸಿಕೊಂಡು ರಾಜಕಾರಣಿಗಳು, ಉದ್ಯಮಿಗಳು ಮತ್ತು ಮಠ ಮಾನ್ಯಗಳಿಂದ ಕೋಟ್ಯಾಂತರ ರೂಪಾಯಿಗಳನ್ನು ತನ್ನ ಮುಂದಿನ ಸಂಶೋಧನೆಗಾಗಿ ದೇಣಿಗೆಯ ರೂಪದಲ್ಲಿ ಕಬಳಿಸಿದ್ದಾನೆ.

ಕಳ್ಳನ ಹೆಂಡತಿ ಯಾವಾಗಲೂ ಮುಂ.. ಎನ್ನುವ ಗಾದೆಯಂತೆ ಯಾವಾಗ ಈತನ ಸುಳ್ಳುಗಳು ಬಟ್ಟ ಬಯಲಾಯಿತೋ ಆತ ಸಮಾಜದ ಮುಂದೆ ಬೆತ್ತಲಾಗಿದ್ದಾನೆ. ಆತನೇ ಅನೇಕ ಬಾರಿ ಹೇಳಿಕೊಂಡಂತೆ ತಾನೊಬ್ಬ ಮುಗ್ಧ ಮತ್ತು ಮಹಾನ್ ದೇಶ ಭಕ್ತ ಎಂಬುದು ಸತ್ಯವಾಗಿದ್ದಲ್ಲಿ ಹೇಳಿದ್ದ ಸುಳ್ಳಿಗೆ ಮತ್ತೊಂದು ಸುಳ್ಳುಗಳ ಸರಮಾಲೆಯನ್ನು ಜೋಡಿಸುತ್ತಾ ವಿತಂಡ ವಾದ ಮಾಡದೇ ಎಲ್ಲರ ಬಳಿಯೂ ತಪ್ಪಾಗಿದೆ ಕ್ಷಮಿಸೀ ಎಂದಿದ್ದರೇ, ಏನೋ ಹುಡುಗು ಬುದ್ಧಿಯ ಹುಡುಗಾ ಈ ರೀತಿಯ ತಪ್ಪು ಮಾಡಿದ್ದಾನೆ. ಮುಂದೆ ಈ ರೀತಿ ಮಾಡ ಬೇಡ ಎಂದು ಸುಮ್ಮನಾಗುತ್ತಿದ್ದರೇನೋ? ಅದರೆ ಪ್ರಾಯಶಃ ಅವನ ಅಹಂ ಮತ್ತು ಅವನ ಹಿಂದಿದ್ದ ಮಾಧ್ಯಮಗಳು ಅಡ್ದಿಯಾಗಿವೆ.

ಯಾವ ಮಾಧ್ಯಮಗಳು ಅತನ ಪೂರ್ವಾಪರಗಳನ್ನು ಪರಿಶೀಲಿಸದೇ ಕೇವಲ ತಮ್ಮ TRPಗಾಗಿ ಅವನ ಎಲ್ಲಾ ಸಾಧನೆಗಳನ್ನು ಅನುಮೋದಿಸಿದ್ದವೋ ಈಗ ಅದೇ ಮಾಧ್ಯಮಗಳು ಮತ್ತದೇ TRP ಗಾಗಿ ಆತನನ್ನು ಬಳಸಿಕೊಳ್ಳುತ್ತಿವೆ. ಆದರೆ ಈ ಬಾರಿ ಆತನನ್ನು ಅಪರಾಧಿಗಳೆಂದು ಬಿಂಬಿಸಿ ಅದೇ ಮಾಧ್ಯಮಗಳು ನ್ಯಾಯಾಧೀಶರ ಸ್ಥಾನವನ್ನು ಆಲಂಕರಿಸಿರುವುದು ಅಸಹ್ಯವನ್ನು ತರಿಸುತ್ತಿದೆ. ಯಾವುದೇ ಸುದ್ದಿಯನ್ನು ಪ್ರಸಾರ ಮಾಡುವ ಮೊದಲು ಅದರ ಕುರಿತಂತೆ ಮಾಹಿತಿಯನ್ನು ಕಲೆಹಾಕಿ ವಾಸ್ತವತೆಯನ್ನು ಜನರ ಮುಂದೆ ಪ್ರಸಾರ ಮಾಡುವುದು ಒಂದು ಜವಾಬ್ಧಾರೀ ಪತ್ರಕರ್ತ ಮತ್ತು ಮಾಧ್ಯಮದ ಕರ್ತವ್ಯ. ಆದರೆ ಈ ಹಿಂದೇ ಮಾಡಿದಂತೆ ಈ ಬಾರಿಯೂ ಅತನನ್ನೇ ಮುಂದೆ ಕೂರಿಸಿಕೊಂಡೋ ಇಲ್ಲವೇ ವೀಡಿಯೋ ಸಂದರ್ಶನದ ಮೂಲಕ ಆತ ಒಪ್ಪಿಸುವ ಗಿಣಿ ಪಾಠವನ್ನೇ ತನಿಖೆ ನಡೆಸದೇ ನೇರ ಪ್ರಸಾರ ಮಾಡುತ್ತಿರುವುದು ಯಾವ ಪತ್ರಿಕಾ ಧರ್ಮ?

ಅತ ಹೇಳುತ್ತಿರುವುದು ಸತ್ಯವೋ ಇಲ್ಲವೇ ಸುಳ್ಳೋ ಎಂದು ನಿರ್ಧರಿಸಲು ದ್ರೋಣ್ ಕುರಿತಂತೆ ವಿಷಯ ತಜ್ಞರನ್ನು ತಮ್ಮ ಚರ್ಚೆಯಲ್ಲಿ ಕುಳ್ಳಸಿರಿಕೊಂಡು ಸತ್ಯಾಸತ್ಯೆಯನ್ನು ತಿಳಿಯಬಹುದಿತ್ತಲ್ಲವೇ? ಅದೇ ರೀತಿ ಆತನಿಗೆ ಹಣ ಕೊಟ್ಟು ಮೋಸ ಹೋದ ವ್ಯಕ್ತಿಗಳನ್ನು ಚರ್ಚೆಗೆ ಆಹ್ವಾನಿಸಿ ಅವರೆಲ್ಲರೂ ಪ್ರತಾಪನ ಮಾತಿಗೆ ಹೇಗೆ ಮರುಳಾದರೂ ಎಂಬುದನ್ನು ಜನರಿಗೆ ತಿಳಿಯ ಪಡಿಸಿ ಮುಂದೆ ಯಾರೂ ಈ ರೀತಿಯ ಮೋಸಕ್ಕೆ ಒಳಗಾಗದ ರೀತಿ ಎಚ್ಚರಿಸಬಹುದಿತ್ತಲ್ಲವೇ? ಈ ರೀತಿ ಮಾಡಿ ಹಿಂದೆ ತಾವೇ ಆತನನ್ನು ಹೊಗಳಿ ಅಟ್ಟಕ್ಕೇರಿಸಿದ್ದ ತಪ್ಪನ್ನಾದರೂ ತಿದ್ದಿಕೊಳ್ಳಬಹುದಾಗಿತ್ತು.

ಮುಗ್ಧತೆಯಿಂದ ಆರಂಭವಾದ ಈ ಪ್ರಕರಣ ಈಗ ಹುಂಬತನಕ್ಕೆ ತಲುಪಿದೆ.

ಆದರೆ ಪ್ರತಾಪನಿಗಾಗಲೀ ಮಾಧ್ಯಮಗಳಿಗಾಗಲೀ ತಮ್ಮ ತಪ್ಪನ್ನು ಒಪ್ಪಿ ತಿದ್ದಿಕೊಳ್ಳುವ ಮನೋಭಾವ ಇಲ್ಲವಾಗಿದೆ ಎಲ್ಲರಿಗೂ ಹುಚ್ಚು ಮುಂಡೆ ಮದುವೆಯಲ್ಲಿ ಉಂಡವನೇ ಜಾಣ ಎನ್ನುವಂತೆ ತಮಗೆ ಏನು ಬೇಕೋ ಅದನ್ನು ಆದಷ್ಟೋ ಬೇಗನೆ ಗೆಬರಿಕೊಂಡು ಸದ್ದಿಲ್ಲದೇ ಸುಮ್ಮನಾಗಿ ಬಿಡುವ ಹಪಾಹಪಿ. ಜನರ ನೆನಪಿನ ಶಕ್ತಿ ಬಹಳ ಕಡಿಮೆ. ಇಷ್ಟರ ಮಧ್ಯೆ ಮತ್ತೊಂದು ಸಮಸ್ಯೆ ಬಂದಿತೆಂದರೆ ಇದನ್ನು ಬಿಟ್ಟು ಮತ್ತೊಂದು ವಿಷಯದ ಬಗ್ಗೆ ಗಮನ ಹರಿಸುತ್ತಾರೆ ಎಂಬ ಸತ್ಯವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ.

ಈ ಪ್ರಸಂಗವನ್ನು ನೋಡುತ್ತಿದ್ದರೆ, ಮುಗ್ಧತೆಯಿಂದ ಆರಂಭವಾದ ಈ ಪ್ರಕರಣ ಈಗ ಹುಂಬತನಕ್ಕೆ ತಲುಪಿದೆ. ಪ್ರತಾಪ್ ತನ್ನ ಬೆರುಗು ಮಾತುಗಳಿಂದ ಆರಂಭದಲ್ಲಿ ಒಂದಷ್ಟು ಜನರಿಗೆ ಪ್ರೇರಣಾದಾಯಕವಾಗಿದ್ದಂತೂ ಸುಳ್ಳಲ್ಲ. ಇದುವರೆವಿಗೂ ಆತನ ವಿರುದ್ಧ ಆರ್ಥಿಕವಾಗಿಯಾಗಲೀ ಅಥವಾ ಇನ್ನಾವುದೇ ರೀತಿಯಲ್ಲಾಗಲೀ ನಷ್ಟ ಹೊಂದಿರುವ ಬಗ್ಗೆ ಯಾರೂ ಯಾವುದೇ ಲಿಖಿತ ದೂರನ್ನು ನೀಡಿಲ್ಲವಾದ್ದರಿಂದ ಇನ್ನು ಕೆಲವೇ ಕೆಲವು ದಿನಗಳಲ್ಲಿ ಈ ಪ್ರಕರಣ ಜನರ ಮನಸ್ಸಿನಿಂದ ಮರೆತು ಹೋಗುತ್ತದೆ. ಎಲ್ಲಿಯ ವರೆಗೆ ಪ್ರತ್ಯಕ್ಷಿಸಿ ನೋಡಿದರೂ ಪ್ರಮಾಣಿಸಿ ನೋಡು ಎನ್ನುವುದನ್ನು ಅನುಸರಿಸುವುದಿಲ್ಲವೋ ಅಲ್ಲಿಯ ವರೆಗೂ ಇಂತಹ ಮೋಸಗಾರರು ಮತ್ತು ಅದರ ದುರ್ಲಾಭವನ್ನು ಪಡೆಯುವ ಮಾಧ್ಯಮಗಳು ಇದ್ದೇ ಇರುತ್ತವೆ.

WhatsApp Image 2020-07-17 at 11.35.35 AMಇದೇ ಸಮಯದಲ್ಲಿ ಪ್ರತಾಪನನ್ನು ಪರಿಚಯಿಸಿದ ತಪ್ಪಿನ ಅರಿವಾಗಿ, ಪ್ರಾಮಾಣಿಕವಾಗಿ ಕಲಿತು ಅರಿತ ಜ್ಞಾನಿ ಸಾವಿರ ಅನುಮಾನದ ಪ್ರಶ್ನೆಗೆ ಒಂದೆ ಮಾತಿನಲ್ಲಿ ಸಾಕ್ಷಿಸಮೇತ ಉತ್ತರಕೊಟ್ಟು ಪುಟಿದೇಳುತ್ತಾನೆ! ಆಂತರ್ಯದಲ್ಲಿ ಗೆದ್ದು ಗಳಿಸಲು ವಾಮಮಾರ್ಗ ಅನುಸರಿಸುವವ ಮಾತಿಗೆ ಮಾತು ಪೋಣಿಸಿ ಅನುಮಾನಿಸಿದವರ ದಾರಿ ತಪ್ಪಿಸಿ ಬೀಸುವ ದೊಣ್ಣೆ ತಪ್ಪಿಸಿಕೊಳ್ಳಲು ಯತ್ನಿಸುತ್ತಾನೆ! ಜಾಲತಾಣ ಬಲ್ಲವರಿಗೆ ಕೋಟಿ ಕಣ್ಣು ಅರಿವಿರಲಿ ಮನುಜ! ಎಂದು ಪರೋಕ್ಷವಾಗಿ ನೀಡಿರುವ ಎಚ್ಚರಿಕೆ ನಿಜಕ್ಕೂ ಮಾರ್ಮಿಕವಾಗಿದೆ.

ಏನಂತೀರೀ?

ನಾ ಕಂಡಂತೆ ಪ್ರೀಮಿಯರ್ ಪದ್ಮಿನಿ

ಮನುಷ್ಯ ಸಂಘ ಜೀವಿ. ಆವನು ಹೆಚ್ಚು ಕಾಲ ಏಕಂತವಾಗಿರಲಾರ. ಹಾಗಾಗಿ ಬಲು ಬೇಗ ತಮ್ಮ ಅಭಿರುಚಿಗೆ ತಕ್ಕಂತೆ ಗೆಳೆಯ/ಗೆಳತಿಯರನ್ನು ಮಾಡಿಕೊಳ್ಳುತ್ತಾನೆ. ತಮ್ಮ ಸುಖಃ ದುಃಖಗಳನ್ನು ಹಂಚಿಕೊಳ್ಳುತ್ತಾನೆ. ಇದು ಬಾಲ್ಯದಿಂದ ಆರಂಭವಾಗಿ, ಯೌವನದಲ್ಲಿ ಮುಂದುವರೆದು, ವೃದ್ದಾಪ್ಯದಲ್ಲಿಯೂ ಕಾಣ ಬಹುದಾಗಿದೆ. ಅದಕ್ಕನುಗಣವಾಗಿ ಯೌವನದಲ್ಲಿ ಮದುವೆ ಎಂಬ ಕಟ್ಟು ಪಾಡಿನ ಬಂಧನದಲ್ಲಿ ಸಿಕ್ಕಿಸಿ ಅದಕ್ಕೊಂದು ಸುಮಧುರ ಬಾಂಧ್ಯವ್ಯವನ್ನು ಬೆಸೆದಿದ್ದಾರೆ ನಮ್ಮ ಪೂರ್ವಜರು. ಆದರೆ ಇಂದು ಆ ರೀತಿಯ ಮೌಲ್ಯಗಳೆಲ್ಲಾ ಮಾಯವಾಗಿ ಪಾಶ್ವಾತ್ಯೀಕರಣದ ಅಂಧಾನುಕರಣದಲ್ಲಿ ಮದುವೆಯೆಂಬ ಸುಮಧುರ ಬಾಂಧವ್ಯ ಮರೆಯಾಗಿ ಕೇವಲ ದೈಹಿಕ ಆಕರ್ಷಣೆಗಳೇ ಪ್ರಾಧಾನ್ಯತೆ ಪಡೆಯುತ್ತಿರುವುದು ನಿಜಕ್ಕೂ ದುಃಖಕರ.

ಇಂದು ಯಾವುದೇ ವಯಸ್ಸಿನ ಒಂದು ಹೆಣ್ಣು ಮತ್ತು ಗಂಡು ಪರಸ್ಪರ ಅನ್ಯೋನ್ಯವಾಗಿದ್ದಾರೆ ಎಂದರೆ ಸಮಾಜ ಅವರನ್ನು ನೋಡುವ ರೀತಿಯೇ ಸರಿಯಾಗಿರುವುದಿಲ್ಲ. ಎಲ್ಲರ ಮಧ್ಯೆಯಲ್ಲೂ ಅನೈತಿಕ ಸಂಬಂಧದ ಕರಿನೆರಳ ಛಾಯೆಯಡಿಯಲ್ಲಿಯೇ ನೋಡುವುದು ನಿಜಕ್ಕೂ ಶೋಚನೀಯವೇ ಸರಿ. ವಯಸ್ಸಿಗೆ ಬಂದ ಮಗಳನ್ನು ಕುಡಿದ ಅಮಲಿನಲ್ಲಿ ತಂದೆಯೇ ತನ್ನ ದೈಹಿಕ ವಾಂಛೆಗೆ ಬಲಿ ತೆಗೆದುಕೊಂಡಿರುವ ಅನೇಕ ಸಂದರ್ಭಗಳನ್ನು ಈಗಾಗಲೇ ಕೇಳಿದ್ದೇವೆ. ವಯಸ್ಸಿಗೆ ಬಂದ ಮಕ್ಕಳು ಇರುವಾಗ ಗಂಡ ಹೆಂಡತಿಯರು ಪರಸ್ಪರ ವಿಚ್ಚೇದನ ಪಡೆದು ಬೇರೆಯವರನ್ನು ಮದುವೆಯಾಗುತ್ತಿರುವ ವಿಷಯಗಳನ್ನು ನಾವಿಂದು ನೋಡುತ್ತಿದ್ದೇವೆ. ಹಾಗಾಗಿ ಇಂದು ಸಂಬಂಧಗಳಿಗೆ ಬೆಲೆ ಇಲ್ಲರೆ ಎಲ್ಲವೂ ಅವರರವರ ತೆವಲುಗಳಿಗೆ ಸೀಮಿತವಾಗಿ ಹೋಗುತ್ತಿರುವುದು ನಮ್ಮ ಸಂಸ್ಕೃತಿಯ ಅವನತಿಯೆಂದೇ ಹೇಳಬಹುದು. ಇಂತಹ ಎಲ್ಲಾ ಗೋಜಲುಗಳನ್ನೂ ಸುಂದರವಾಗಿ ಕಣ್ಣಿಗೆ ಕಟ್ಟುವಂತೆ ಕಡೆಯ ತನಕ ನಮ್ಮೊಡನೆ ಉಳಿಯುವವರೇ ನಮ್ಮ ನಿಜವಾದ ಬಂಧುಗಳು ಎಂಬ ನೀತಿಯನ್ನು ಸುಂದರವಾಗಿ ಹೇಳುವ ಚಿತ್ರವೇ ಪ್ರೀಮಿಯರ್ ಪದ್ಮಿನಿ.

ಸಾಧಾರಣವಾಗಿ ಜಗ್ಗೇಶ್ ಸಿನಿಮಾ ಎಂದರೆ ಕುಟುಂಬ ಸಮೇತ ನೋಡಲು ಸ್ವಲ್ಪ ಮುಜುಗರವಾಗುವಂತಹ ಪರಿಸ್ಥಿತಿ ಆರಂಭದಲ್ಲಿ ಇರುತ್ತಿತ್ತು. ಆದರೆ ಕಾಯಿ ಹಣ್ಣಾಗಿ ಪಕ್ವವಾಗುವಂತೆ ಇತ್ತೀಚೆಗೆ ಅವರು ತಮ್ಮ ವಯಸ್ಸಿಗೆ ಅನುಗುಣವಾಗಿ ಪಾತ್ರಗಳನ್ನು ಆಯ್ಕೆಮಾಡಿಕೊಳ್ಳುತ್ತಾ ತಮ್ಮ ಪಾತ್ರಗಳಲ್ಲಿ ಪರಕಾಯ ಪ್ರವೇಶ ಮಾಡುತ್ತಿರುವುದು ಮೆಚ್ಚಬೇಕಾದ ಅಂಶ. ಇನ್ನು ಹುಣಸೇ ಮರಕ್ಕೆ ಮುಪ್ಪಾದ್ರೇ, ಹುಳಿಯು ಮುಪ್ಪಾ? ಎನ್ನುವಂತೆ ದತ್ತಣ್ಣನವರಿಗೆ ವಯಸ್ಸಾದರೂ, ತುಂಟತನದ ಪಾತ್ರಗಳು ಅವರಿಂದ ದೂರವಾಗಿಲ್ಲ. ನೆರೆ ಮನೆಯ ಮಧ್ಯವಯಸ್ಸಿನ ಗಂಡು ಮತ್ತು ಹೆಣ್ಣು ಮನೆಯೊಳಗೆ ಕುಳಿತು ಮಾತನಾಡುತ್ತಿದ್ದರೆ, ನಗುತ್ತಿದ್ದರೆ ಅದನ್ನು ಕದ್ದು ಕೇಳುತ್ತಾ ಅವರ ವಯಸ್ಸಾದ ಹೆಂಡತಿಗೆ ಅದರ ವೀಕ್ಷಕ ವಿವರಣೆಯನ್ನು ನೀಡುವ, ಶಿವ ಪೂಜೆಯಲ್ಲಿ ಕರಡಿ ಬಿಟ್ಟಂತೆ ಆ ಗಂಡು, ಹೆಣ್ಣುಗಳ ಮಧ್ಯೆ ಅನಾವಶ್ಯಕವಾಗಿ ಬಂದು ಪಿರಿಪಿರಿಮಾಡುತ್ತಾ ಅಲ್ಲಲ್ಲಿ ನಗೆಯುಕ್ಕಿಸುವುದರಲ್ಲಿ ದತ್ತಣ್ಣ ಸಫಲರಾಗಿದ್ದಾರೆ.

ಮದುವೆ ಆಗಿ ಮಕ್ಕಳಾದ ತಕ್ಷಣ ಬಹುತೇಕ ನಾಯಕಿಯರು ಚಿತ್ರರಂಗದಿಂದ ದೂರವಿದ್ದರೆ, ಇತ್ತೀಚೆಗೆ ಹಲವಾರು ನಾಯಕಿಯರು ತಮ್ಮ ವಯಸ್ಸನ್ನು ದಿಕ್ಕರಿಸಿ ತಮ್ಮ ಸೌಂದರ್ಯವನ್ನು ಕಾಪಾಡಿಕೊಂಡು ಅದಕ್ಕನುಗುಣವಾಗಿ, ಇಂದಿನ ನಾಯಕಿಯರನ್ನೂ ನೀವಾಳಿಸಿ ಹಾಕುವಂತೆ ಆಭಿನಯಿಸುತ್ತಿದ್ದಾರೆ. ಅಂತಹ ಕೆಲ ನಟಿಯರಲ್ಲಿ ಬಹುಭಾಷಾ ಕಲಾವಿದೆ ಮಧು ಮತ್ತು ಕನ್ನಡತಿ ಸುಧಾರಾಣಿ ಪ್ರಮುಖರು. ಜಗ್ಗೇಶರಿಂದ ವಿವಾಹ ವಿಚ್ವೇದನ ಪಡೆದು ಮತ್ತೊಬ್ಬ ವಿಧುರನೊಂದಿಗೆ ಮದುವೆಯಾಗ ಬಯಸುವ ಹೆಂಡತಿಯಾಗಿ ಮಧು ನಟಿಸಿದ್ದರೆ. ಚೆಂದುಳ್ಳಿ ಚೆಲುವೆ ಸುಧಾರಾಣಿ ಪಾತ್ರವನ್ನು ಇಲ್ಲಿ ಬಣ್ಣಿಸುವುದಕ್ಕಿಂತ ಚಿತ್ರಮಂದಿರದಲ್ಲೇ ನೋಡಿ ಆನಂದಿಸುವುದೇ ಉತ್ತಮ.

ಇನ್ನು ತಂದೆ ತಾಯಿಯರಿಂದ ಬೇರ್ಪಟ್ಟ ಮಗನಾಗಿ ವಿವೇಕ್ ಸಿಂಹ ಮತ್ತು ಅದೇ ರೀತಿ ತಾಯಿ ಇಲ್ಲದ ತಬ್ಬಲಿಯಾಗಿ ಆತನ ಗೆಳತಿಯ ಪಾತ್ರದಲ್ಲಿ ಹಿತಾ ಚಂದ್ರಶೇಖರ್ ಪೈಪೋಟಿಗೆ ಬಿದ್ದವರಂತೆ ನಟಿಸಿದ್ದಾರೆ ಎಂದರೆ ಅತಿಶಯೋಕ್ತಿಯೇನಲ್ಲ. ನಂಬಿದ ಹುಡುಗನಿಂದ ಮೋಸ ಹೋಗಿ ಮದ್ಯದ ವ್ಯಸನಕ್ಕೆ ಬಿದ್ದಿರುವ ಹುಡುಗಿ ಅದೇ ರೀತಿ ಚಿಕ್ಕವಯಸ್ಸಿನಿಂದಲೂ ತಂದೆ ತಾಯಿರ ವಾತ್ಸಲ್ಯವೇ ಕಾಣದೇ ದುಶ್ಚಟಗಳಿಗೆ ಬಲಿಯಾದ ಹುಡುಗ ನಂತರ ಪರಸ್ಪರ ಆಕರ್ಶಿತರಾಗುವ ಸ್ನೇಹಿತರಾಗಿ ಬಿಂದಾಸ್ ಆಗಿ ನಟಿಸಿದ್ದಾರೆ. ವಿವೇಕ್ ಸಿಂಹ ಅಪಘಾತದಿಂದ ಸಾಯುವ ಮೊದಲು ಆಡುವ ಮಾತುಗಳಂತೂ ತಮ್ಮ ತಮ್ಮ ತೆವಲುಗಳಿಗೆ ಮಕ್ಕಳನ್ನು ದೂರಮಾಡಿದ ತಂದೆ ತಾಯಿಯರ ಮನಸ್ಸನ್ನು ಬಡಿದೆಚ್ಚರ ಪಡಿಸುವಂತಿದೆ. ನಾಡಿನಲ್ಲೇ ಕನ್ನಡ ಮಾಯೇಯಾಗುತ್ತಿರುವಾಗ ನಾಯಕಿ ಕುಡಿದ ಅಮಲಿನಲ್ಲಿಯೂ ಕನ್ನಡ ಹಾಡಿಗೆ ಒತ್ತಾಯಿಸುವುದು ಮತ್ತು ನಾಯಕ ಅವಳ ಇಚ್ಛೆಯನ್ನು ಪೂರೈಸುವುದು ಸ್ವಲ್ಪ ಬಾಲಿಶ ಎನಿಸಿದರೂ ನಿರ್ದೇಶಕರ ಕನ್ನಡ ಪ್ರೇಮವನ್ನು ಎತ್ತಿ ತೋರಿಸುತ್ತದೆ.

ಇನ್ನು ವಯಸ್ಸಿಗೆ ಬಂದ ತನ್ನ ಅಕ್ಕ, ತಂದೆಯಿಂದಲೇ ಮೋಸಹೋಗಿದ್ದನ್ನು ನೋಡಿ ತಂದೆಯನ್ನು ವಿರೋಧಿಸಿ ಮನೆ ಬಿಟ್ಟು ನಾನಾ ರೀತಿಯ ಕೆಲಸಗಳನ್ನು ಮಾಡಿ ಕಡೆಯದಾಗಿ ಜಗ್ಗೇಶ್ ಅವರ ಕಾರ್ ಡ್ರೈವರ್ ಆಗಿ ಬಂದು ಸೇರುವ ಪಾತ್ರದಲ್ಲಿ ಪ್ರಮೋದ್ ಅತ್ಯುತ್ತಮವಾಗಿ ನಟಿಸಿದ್ದಾರೆ ಎನ್ನುವುದಕ್ಕಿಂತ ಆ ಪಾತ್ರವೇ ತಾನಾಗಿದ್ದಾರೆ ಎನ್ನಲಡ್ಡಿಯಿಲ್ಲ. ಬೆಂಜ್ ಕಾರ್ ಓಡಿಸುವ ಭ್ರಮೆಯಲ್ಲಿದ್ದವನಿಗೆ ಪ್ರೀಮಿಯರ್ ಪದ್ಮಿನಿ ಕಾರ್ ಓಡಿಸುವ, ಎಫ್ ಎಂ ರೇಡಿಯೋ ಕೇಳುವ ತವಕದವನು ಮಾಲೀಕನ ಇಚ್ಛೆಯಂತೆ ಹಿಂದೂಸ್ತಾನಿ ಆಲಾಪ್ ಕೇಳಬೇಕಾದ ಕರ್ಮವನ್ನು ನೋಡಲು ಮಜಾ ಕೊಡುತ್ತದೆ. ಕೇವಲ ಕಾರ್ ಚಾಲಕನಾಗಿರದೇ ಒಡೆಯನ ಒಡೆದ ಕುಟುಂಬವನ್ನು ಸರಿ ಪಡಿಸಲು ಪ್ರಯತ್ನಿಸುವ ಮತ್ತು ಮಗನನ್ನು ಕಳೆದು ಕೊಂಡ ಜಗ್ಗೇಶ್ ಅವರಿಗೆ ಮಗನಂತೆ ಕಟ್ಟ ಕಡೆಯವರೆಗೆ ಸಾಥ್ ಕೊಡುವ ಅವರ ಪಾತ್ರ ನಿಜಕ್ಕೂ ಮನೋಹರವಾಗಿದೆ.

ಕಿರುತೆರೆಯಲ್ಲಿ ಬ್ಲಾಕ್ಬಸ್ಟರ್ ಧಾರವಾಹಿಗಳನ್ನು ನಿರ್ಮಿಸಿ, ನಿರ್ದೇಶಿಸಿ ಖ್ಯಾತಿ ಹೊಂದಿರುವ ಶೃತಿನಾಯ್ಡು ನಿರ್ಮಾಣದ, ರಮೇಶ್ ಇಂದಿರಾ ನಿರ್ದೇಶನದ ಚೊಚ್ಚಲು ಪ್ರಯತ್ನ ನಿಜಕ್ಕೂ ಸಫಲವಾಗಿದೇ ಎಂದೇ ಹೇಳಬೇಕು. ಎಂದಿನಂತೆ ನಾಲ್ಕು ಹಾಡು, ಮೂರು ಫೈಟ್, ಎರಡು ವಿದೇಶದಲ್ಲಿ ಚಿತ್ರೀಕರಣದ ದೃಶ್ಯ ಎಂಬ ಸಿದ್ಧ ಪಡಿಸಿದ ಸೂತ್ರಕ್ಕೆ ಜೋತು ಬೀಳದೆ ಕೌಟುಂಬಿಕ ಮೌಲ್ಯಗಳ ಜೊತೆಗೆ
ಮನಸ್ಸಿಗೆ ಮುದ ನೀಡುವಂತಹ ಹಾಡುಗಳಿರುವ, ಸಾಕಷ್ಟು ಪಂಚಿಂಗೆ ಮತ್ತು ಜೋಶ್ ಇರುವ ಸಂಭಾಷಣೆ, ಅಲ್ಲಲ್ಲಿ ಕಚಗುಳಿ ಇಡಿಸುವ ಹಾಸ್ಯದೊಂದಿಗೆ ಮನರಂಜಿಸುವಂಥ ಸಿನಿಮಾ ಮಾಡಿದ್ದಾರೆ.

ಇಡೀ ಚಿತ್ರದಲ್ಲಿ ಎಲ್ಲವೂ ಚೆನ್ನಾಗಿದೆ ಎನ್ನುವಂತಿಲ್ಲ. ಹುಡುಗ ಮತ್ತು ಹುಡುಗಿ ಬಿಂದಾಸ್ ಎನ್ನುದನ್ನು ತೋರಿಸಲು ಅನಗತ್ಯವಾದಷ್ಟು ಕುಡಿತ ಮತ್ತು ಸಿಗರೇಟ್ ಸೇದುವುದನ್ನು ತೋರಿಸಿರುವುದನ್ನು ಕಡಿಮೆ ಮಾಡಬಹುದಾಗಿತ್ತೇನೋ? ಮೊದಲೇ ಜಗ್ಗೇಶ್ ಚಿತ್ರ, ನೀರ್ದೋಸೆ ಚಿತ್ರವಾದ ಮೇಲೆಂತೂ ಜಗ್ಗೇಶ್ ಮತ್ತು ದತ್ತಣ್ಣ ಜೋಡಿಯಲ್ಲಿ ಡಬಲ್ ಮೀನಿಂಗ್ ಡೈಲಾಗ್ ಇರಲೇ ಬೇಕು ಅಂತಾ ಏನೋ ಅಲ್ಲಲ್ಲಿ ತೂರಿಸಲಾಗಿದೆ. ಅಂತರ್ಜಾತಿ ವಿವಾಹ ಎಂದು ಎತ್ತಿ ತೋರಿಸಲು, ಜಗ್ಗೇಶ್ ಹುಷಾರಿಲ್ಲದ ತಮ್ಮ ತಾಯಿಯನ್ನು ನೋಡಲು ಬಂದಾಗ, ತನ್ನ ನೋವನ್ನೂ ಮರೆತು, ಸಂಧ್ಯಾವಂದನೆ ಮಾಡ್ತಾ ಇದ್ದೀಯೇನೋ ಅಂತಾ ಕೇಳುವುದರ ಮೂಲಕ, ಒಂದು ಸಮುದಾಯವನ್ನು ಕುಹಕವಾಡೋದು ಅಗತ್ಯವಿತ್ತಾ? ತಮ್ಮ ಸೀರಿಯಲ್ನಲ್ಲಿ ಮಾಡೋ ಬಹುತೇಕ ಕಲಾವಿದರನ್ನೇ ಸಿನಿಮಾದಲ್ಲೂ ಹಾಕಿಕೊಂಡಿರುವುದರಿಂದ ಸಿನಿಮಾ ನೋಡುವಾಗ, ಸೀರಿಯಲ್ ನೋಡುತ್ತಿರುವ ಆನುಭವ ಆಗಿದ್ದಂತೂ ಸುಳ್ಳಲ್ಲ.

ಬಹುಪಾಲು ಒಳ್ಳೆಯ ಅಂಶಗಳು ಇದ್ದಾಗ ಮತ್ತು ಮೊದಲನೇ ಬಾರಿ ನಿರ್ದೇಶನ ಮಾಡುತ್ತಿರುವಾಗ ಇಂತಹ ಸಣ್ಣ ಪುಟ್ಟ ನ್ಯೂನತೆಯನ್ನು ಪಕ್ಕಕ್ಕೆ ಇಟ್ಟು ನೋಡಿದಾಗ ಒಂದು ಉತ್ತಮ ಸಂದೇಶವುಳ್ಳ ಸಿನಿಮಾವನ್ನು ಕೊಟ್ಟಿರುವ ಪ್ರೀಮಿಯರ್ ಪದ್ಮಾವತಿ ಚಿತ್ರ ತಂಡ ಮೇಲೆ ಮುಂಬರುವ ದಿನಗಳಲ್ಲಿ ಇನ್ನಷ್ಟು ನಿರೀಕ್ಷೆಗಳನ್ನು ಇಟ್ಟುಕೊಳ್ಳಬಹುದು ಎಂದನಿಸುತ್ತದೆ.

ಏನಂತೀರೀ?