ಗುಜರಾತಿ ಥೇಪ್ಲ

WhatsApp Image 2021-09-27 at 7.12.41 AM (1)

ಪ್ರತೀ ದಿನ ಬೆಳಿಗ್ಗೆ ಅದೇ ರೊಟ್ಟಿ, ಚಪಾತಿನಾ? ಎಂದು ಕೇಳುವ ಮಕ್ಕಳಿಗೆ ಯಾವ ತಿಂಡಿ ಮಾಡೋದಪ್ಪಾ ಎಂಬ ಜಿಜ್ಞಾಸೆ ಬಹುತೇಕ ಹೆಣ್ಣುಮಕ್ಕಳಿಗೆ ಕಾಡುವುದು ಸಹಜವಾಗಿದೆ. ಅಂತಹವರಿಗಾಗಿಯೇ ಆಕರ್ಷಣೀಯವಾದ, ಅಷ್ಟೇ ಪರಿಮಳಯುಕ್ತವಾದ, ಪೌಷ್ಥಿಕವಾದ, ರುಚಿಯಾದ ಮನೆಯವರೆಲ್ಲರೂ ಇನ್ನೂ ಬೇಕು ಮತ್ತಷ್ಟು ಬೇಕು ಎಂದು ಕೇಳಿ ಕೇಳಿ ತಿನ್ನುವಂತಹ ಗುಜರಾತಿ ಥೇಪ್ಲ ಮಾಡುವ ವಿಧಾನವನ್ನು ನಮ್ಮ ನಳಪಾಕದಲ್ಲಿ ತಿಳಿದುಕೊಳ್ಳೋಣ.

ಥೇಪ್ಲ ತಯಾರಿಸಲು ಬೇಕಾಗುವ ಪದಾರ್ಥಗಳು

  • ಗೋಧಿ ಹಿಟ್ಟು – 2 ಬಟ್ಟಲು
  • ಕಡಲೇ ಹಿಟ್ಟು – 1/4 ಬಟ್ಟಲು
  • ಅಚ್ಚ ಮೆಣಸಿನ ಪುಡಿ – 1 (ಖಾರಕ್ಕೆ ಅನುಗುಣವಾಗಿ)
  • ಬಿಳಿ ಎಳ್ಳು/ನೈಲಾನ್ ಎಳ್ಳು – 1 ಚಮಚ
  • ಅರಿಶಿನ – 1/4 ಚಮ‍ಚ
  • ಓಂ ಕಾಳು -1/4 ಚಮ‍ಚ
  • ಅಡುಗೆ ಎಣ್ಣೆ – 1/4 ಬಟ್ಟಲು
  • ಕತ್ತರಿಸಿದ ಹಸಿ ಮೆಣಸಿನಕಾಯಿ 1-2
  • ತುರಿದ ಶುಂಠಿ (ತುರಿದ)
  • ಸಣ್ಣಗೆ ಕತ್ತರಿಸಿದ ಮೆಂತ್ಯದ ಸೊಪ್ಪು – 1 ಕಪ್
  • ಹುಳಿ ಮೊಸರು – 1/2 ಬಟ್ಟಲು
  • ರುಚಿಗೆ ಉಪ್ಪು
  • ಹಿಟ್ಟನ್ನು ಕಲೆಸಲು ಅಗತ್ಯವಾದಷ್ತು ನೀರು

ಥೇಪ್ಲ ತಯಾರಿಸುವ ವಿಧಾನ

  • ಅಗಲವಾದ ಪಾತ್ರೆಯಲ್ಲಿ ಗೋಧಿ ಹಿಟ್ಟು ಮತ್ತು ಕಡಲೆ ಹಿಟ್ಟನ್ನು ತೆಗೆದುಕೊಂಡು ಅದಕ್ಕೆ ಮೆಣಸಿನ ಪುಡಿ, ಅರಿಶಿನ, ಎಳ್ಳು, ಓಂ ಕಾಳು ಮತ್ತು ಉಪ್ಪು ಬೆರೆಸಿಕೊಂಡು ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ.
  • ಅದೇ ಮಿಶ್ರಣಕ್ಕೆ ಕತ್ತರಿಸಿದ ಹಸಿ ಮೆಣಸಿನಕಾಯಿ ತುರಿದ ಶುಂಠಿ, ಸಣ್ಣಗೆ ಕತ್ತರಿಸಿದ ಮೆಂತ್ಯದ ಸೊಪ್ಪನ್ನು ಬೆರೆಸಿ, ಅದಕ್ಕೆ ಅರ್ಧ ಕಪ್ ಮೊಸರು ಸೇರಿಸಿ ಜೊತೆಗೆ ಅಗತ್ಯವಿದ್ದಷ್ಟು ನೀರನ್ನು ಬೆರೆಸಿ ಚಪಾತಿ ಮಾಡುವ ಹದಕ್ಕೆ ಕಲೆಸಿಕೊಳ್ಳಿ.
  • ಕಲೆಸಿದ ಜಿಟ್ಟಿಗೆ 2 ಚಮಚ ಎಣ್ಣೆ ಸೇರಿಸಿ ಚೆನ್ನಾಗಿ ಕಲೆಸಿ, 5 ನಿಮಿಷಗಳ ಕಾಲ ಹೊಂದಿಕೊಳ್ಳಲು ಬಿಡಿ.
  • ಒಲೆಯ ಮೇಲೆ ಕಾವಲಿಯನ್ನು ಬಿಸಿಯಾಗಲು ಬಿಡಿ
  • ಕಲೆಸಿದ ಹಿಟ್ಟನ್ನು ಸಣ್ಣ ಸಣ್ಣ ಉಂಡೆಗಳನ್ನಗಿ ಮಾಡಿ ಚಪಾತಿ ಲಟ್ಟಿಸಿದಂತೆ ಲಟ್ಟಿಸಿ ಕಾಯ್ದ ಕಾವಲಿಯ ಮೇಲೆ ಅಗತ್ಯಕ್ಕೆ ತಕ್ಕಷ್ಟು ಎಣ್ಣೆಯನ್ನು ಸೇರಿಸಿ ಎರಡೂ ಬದಿಯಲ್ಲಿ ಬೇಯಿಸಿದಲ್ಲಿ ರುಚಿ ರುಚಿಯಾದ ಘಮ್ಮೆನ್ನುವ ಥೇಪ್ಲ ಸವಿಯಲು ಸಿದ್ಧ.

WhatsApp Image 2021-09-27 at 7.12.41 AM

ಬಿಸಿ ಬಿಸಿಯಾದ ಥೇಪ್ಲವನ್ನು ಉಪ್ಪಿನಕಾಯಿ ಮತ್ತು ಜೀರಿಗೆಪುಡಿ, ಮೆಣಸಿನಪುಡಿ ಮತ್ತು ಉಪ್ಪು ಸಮಪ್ರಮಾಣದಲ್ಲಿ ಬೆರೆಸಿದ ಮೊಸರಿನೊಂದಿಗೆ ತಿನ್ನಲು ಮಜವಾಗಿರುತ್ತದೆ.
ಇದಕ್ಕೇ, ಹಣ್ಣಿನ ಜಾಮ್ ಇಲ್ಲವೇ ಬೆಣ್ಣೆಯನ್ನು ಸವರಿ ರೋಲ್ ಮಾಡಿ ಕೊಟ್ಟಲ್ಲಿ ಮಕ್ಕಳು ಚಪ್ಪರಿಸಿಕೊಂಡು ತಿನ್ನುತ್ತಾರೆ.

ಇನ್ನೇಕೆ ತಡಾ ನೋಡ್ಕೊಳ್ಳೀ, ಮಾಡ್ಕೊಳ್ಳೀ, ತಿನ್ಕೋಳ್ಳಿ

ಏನಂತೀರೀ?

ನಿಮ್ಮವನೇ ಉಮಾಸುತ

WhatsApp_Image_2021-09-27_at_7.12.41_AM__2_-removebg-preview

ಮನದಾಳದ ಮಾತು : ಮೆಂತ್ಯದ ಸೊಪ್ಪಿನ ಬದಲಾಗಿ ತುರಿದ ಕ್ಯಾರೆಟ್, ಮೂಲಂಗಿ ಇಲ್ಲವೇ, ಬೇಯಿಸಿದ ಆಲೂಗಡ್ಡೆ ಅಥವಾ ನುಣ್ಣಗೆ ಹೆಚ್ಚಿದ ನಾನಾ ವಿವಿಧ ತರಕಾರಿ ಮತ್ತು ಸೊಪ್ಪಿನೊಂದಿಗೂ ತಯಾರಿಸುಬಹುದಾಗಿದೆ. ಥೇಪ್ಲ ರುಚಿಯನ್ನು ಇನ್ನಷ್ಟು ಹೆಚ್ಚಿಸುವ ಸಲುವಾಗಿ ಸಣ್ಣಗೆ ಜಜ್ಜಿದ ಬೆಳ್ಳುಳ್ಳಿಯನ್ನು ಸೇರಿಸಬಹುದಾಗಿದೆ.

ಇನ್ನು ಮೆಂತ್ಯಾ ಸೊಪ್ಪು ಕಹಿ ಗುಣವನ್ನು ಹೊಂದಿದ್ದರೂ ಅದರಲ್ಲಿರುವ ಅನೇಕ ಔಷಧೀಯ ಗುಣಗಳಿವೆ. ಇದರಲ್ಲಿ ಅಧಿಕ ಪ್ರಮಾಣದ ಕಬ್ಬಿಣಾಂಶ ಇರುವುದರಿಂದ ರಕ್ತ ಹೀನತೆಗೆ ರಾಮಬಾಣವಾಗಿದೆ. ಇನ್ನು ಪೌಷ್ಟಿಕಾಂಶದ ಆಗರವಾಗಿರುವ ಮೆಂತ್ಯ ಸೊಪ್ಪಿನ್ನು ಹೊಟ್ಟೆ ನೋವು, ಅಜೀರ್ಣ, ಗ್ಯಾಸ್ ಹಾಗೂ ತ್ವಚೆಯ ಸಮಸ್ಯೆ ಸೇರಿದಂತೆ ಇನ್ನೂ ಅನೇಕ ತೊಂದರೆಗಳಿಗೆ ಮನೆ ಔಷಧಿಯ ರೂಪದಲ್ಲಿ ಬಳಸಬಹುದಾಗಿದೆ. ಹಾಗಾಗಿಯೇ ನಮ್ಮ ಆಯುರ್ವೇದದಲ್ಲಿ ಮೆಂತ್ಯ ಸೊಪ್ಪನ್ನು ಮಧುಮೇಹ, ಮಲಬದ್ಧತೆ ಮತ್ತು ಮೂತ್ರಪಿಂಡದ ಚಿಕಿತ್ಸೆಯಲ್ಲಿ ಔಷಧರೂಪದಲ್ಲಿ ಬಳಸುತ್ತಾರೆ ಹಾಗಾಗಿಯೇ ಮೆಂತ್ಯ ಸೊಪ್ಪನ್ನು ದಿನ ನಿತ್ಯದ ಆಹಾರದಲ್ಲಿ ಬಳಕೆ ಮಾಡುವುದರಿಂದ ಅರೋಗ್ಯವನ್ನು ಕಾಪಾಡಿಕೊಳ್ಳಬಹುದಾಗಿದೆ.

ಅವಲಕ್ಕಿ ಪರೋಟ

parota2-removebg-preview

ಸಾಧಾರಣವಾಗಿ ಎಲ್ಲರ ಮನೆಗಳಲ್ಲಿಯೂ ಅವಲಕ್ಕಿ ಒಗ್ಗರಣೆ, ಹುಳಿಯವಲಕ್ಕಿ, ಇಲ್ಲವೇ ಖಾರದ ಅವಲಕ್ಕಿ ಬೆಳಿಗ್ಗೆ ತಿಂಡಿಗೇ ಮಾಡಿದ್ರೇ, ಮಧ್ಯಾಹ್ನದ ಊಟಕ್ಕೋ ಇಲ್ಲವೇ ರಾತ್ರಿಯ ಊಟಕ್ಕೆ ಗೋಧಿ ಚಪಾತಿ ಮತ್ತು ಪರೋಟ ಇದ್ದೇ ಇರುತ್ತದೆ. ಹಾಗಾಗಿ ಇವತ್ತು ಅವಲಕ್ಕಿ ಮತ್ತು ಗೋಧಿ ಹಿಟ್ಟು ಎರಡೂ ಸೇರಿಸಿ ಗರಿಗರಿಯಾದ ವಿಭಿನ್ನ ರುಚಿಯ ಅವಲಕ್ಕಿ ಪರೋಟ ತಯಾರಿಸುವುದನ್ನು ನಮ್ಮ ನಳಪಾಕ ಮಾಲಿಕೆಯಲ್ಲಿ ತಿಳಿಸಿಕೊಡುತ್ತಿದ್ದೇವೆ.

ಸುಮಾರು 4-5 ಜನರು ಸವಿಯಬಹುದಾದಷ್ಟು ಅವಲಕ್ಕಿ ಪರೋಟ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

  • ಅವಲಕ್ಕಿ – 150ಗ್ರಾಂ
  • ಗೋಧಿಹಿಟ್ಟು – 200ಗ್ರಾಂ
  • ಜೀರಿಗೆ – 1/2 ಚಮಚ
  • ದನಿಯಾ ಪುಡಿ – 1/2 ಚಮಚ
  • ಗರಂ ಮಸಾಲ ಪುಡಿ – 1/4 ‍ಚಮಚ
  • ಅರಿಶಿನ – ಒಂದು ಚಿಟಿಕೆ
  • ಮಧ್ಯಮ ಗಾತ್ರದ ಬೇಯಿಸಿದ ಆಲೂಗೆಡ್ಡೆ – 2
  • ಹಸಿಮೆಣಸಿನ ಕಾಯಿ – 6 (ಖಾರಕ್ಕೆ ತಕ್ಕಷ್ಟು)
  • ಶುಂಠಿ – 1 ಇಂಚು
  • ಬೆಳ್ಳುಳ್ಳಿ – 6 ಎಸಳುಗಳು
  • ಕೊತ್ತಂಬರಿ ಸೊಪ್ಪು – ಸ್ವಲ್ಪ
  • ಕರಿಬೇವು – ಸ್ವಲ್ಪ
  • ಉಪ್ಪು- ರುಚಿಗೆ ತಕ್ಕಷ್ಟು

ಅವಲಕ್ಕಿ ಪರೋಟ ತಯಾರಿಸುವ ವಿಧಾನ

  • ಎರಡು ಆಲೂಗೆಡ್ಡೆಗಳನ್ನು ಚೆನ್ನಾಗಿ ತೊಳೆದು ಬೇಯಿಸಿ ಆರಿದ ನಂತರ ಸಿಪ್ಪೆ ತೆಗೆದಿಟ್ಟು ಕೊಳ್ಳಿ
  • ಜೀರಿಗೆ, ಹಸೀ ಮೆಣಸಿನಕಾಯಿ, ಶುಂಠಿ, ಬೆಳ್ಳುಳ್ಳಿ, ಕೊತ್ತಂಬರಿ ಮತ್ತು ಕರಿಬೇವು ಸೊಪ್ಪನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ
  • ಅವಲಕ್ಕಿಯನ್ನು ಸ್ವಲ್ಪ ಜರಡಿಯಾಡಿಸಿ ಶುದ್ಧಿ ಮಾಡಿಕೊಂಡು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿ ಕೊಳ್ಳಿ
  • ಒಂದು ಅಗಲವಾದ ಪಾತ್ರೆಯನ್ನು ತೆಗೆದುಕೊಂಡು ಅದರಲ್ಲಿ ಗೋಧಿಹಿಟ್ಟು, ಬೇಯಿಸಿದ
    ಆಲೂಗೆಡ್ಡೆ, ರುಬ್ಬಿಕೊಂಡ ಮಿಶ್ರಣದ ಜೊತೆ, ಪುಡಿ ಮಾಡಿಟ್ಟುಕೊಂಡ ಅವಲಕ್ಕಿ, ರುಚಿಗೆ ತಕ್ಕಷ್ಟು ಉಪ್ಪು, ಅರಿಶಿನ, ಗರಂ ಮಸಾಲ ಮತ್ತು ದನಿಯಾಪುಡಿಯನ್ನು ಸೇರಿಸಿ ಗಟ್ಟಿಯಾಗಿ ಚಪಾತಿ ಹದಕ್ಕೆ ಕಲಸಿಕೊಂಡು ಸುಮಾರು 1/2ಗಂಟೆಗಳ ಕಾಲ ಒಂದು ತಟ್ಟೆಯನ್ನು ಮುಚ್ಚಿಡಿ.
  • ಕಲೆಸಿದ ಹಿಟ್ಟುಗಳನ್ನು ಸಣ್ಣ ಸಣ್ಣದಾದ ಉಂಡೆಗಳನ್ನಾಗಿ ಮಾಡಿಕೊಂಡು ಪರೋಟದ ಗಾತ್ರ ಮತ್ತು ನಿಮಗೆ ಇಷ್ಟ ಬಂದ ಆಕಾರಕ್ಕೆ ತಕ್ಕಂತೆ ಲಟ್ಟಿಸಿ ಬಿಸಿಯಾದ ಕಾವಲಿಯ ಮೇಲೆ ಎರಡೂ ಬದಿಯಲ್ಲೂ ಬೇಯಿಸಿದರೆ ರುಚಿ ರುಚಿಯಾದ ಬಿಸಿ ಬಿಸಿಯಾದ ಅವಲಕ್ಕಿ ಪರೋಟ ಸವಿಯಲು ಸಿದ್ಧ.

parota

ಈ ಪರೋಟವನ್ನು ಯಾವುದೇ ಉಪ್ಪಿನ ಕಾಯಿ, ಚೆಟ್ನೀಪುಡಿ, ಗೊಜ್ಜು, ತುಪ್ಪಾ, ಬೆಣ್ಣೆ ಮತ್ತು ಮೊಸರಿನೊಂದಿಗೆ ಸವಿಯಲು ಮಜವಾಗಿರುತ್ತದೆ.

ಇನ್ನೇಕೆ ತಡಾ, ಓದ್ಕೋಳೀ, ಮಾಡ್ಕೊಳೀ, ತಿನ್ಕೋಳಿ.

ಏನಂತೀರೀ?
ನಿಮ್ಮವನೇ ಉಮಾಸುತ

ಮನದಾಳದ ಮಾತು : ಗೋಧಿ ಹಿಟ್ಟಿನೊಂದಿಗೆ ಅವಲಕ್ಕಿ ಬೆರೆಸುವುದರಿಂದ ಪರೋಟ ವಿಭಿನ್ನವಾದ ರುಚಿಯಾಗಿ ಮತ್ತು ಗರಿ ಗರಿಯಾಗಿರುತ್ತದೆ. ಆಲೂಗಡ್ಡೆಯ ಬದಲು ಪುದೀನಾ, ಪಾಲಕ್ ಇಲ್ಲವೇ ಮೆಂತ್ಯೇ ಸೊಪ್ಪು ಅಥವಾ ಬೇಯಿಸಿದ ಹೂಕೋಸು (ಗೋಬಿ) ಸಹಾ ಬಳಸ ಬಹುದಾಗಿದೆ.

ಈ ಪಾಕಶಾಸ್ತ್ರದ ವಿಧಾನವನ್ನು ತಿಳಿಸಿಕೊಟ್ಟ ಶ್ರೀ ಆನಂದ್ ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳು

ಸೌತೆಕಾಯಿ ಹಸೀ‌ ಮಜ್ಜಿಗೆ ಹುಳಿ

ಮನೆಯಲ್ಲಿ ಮೊಸರು ಹೆಚ್ಚಿಗೆ ಉಳಿದು ಬಿಟ್ಟಲ್ಲಿ ಅಥವಾ ಮನೆಗೆ ಇದ್ದಕ್ಕಿದ್ದಂತೆಯೇ ಯಾರಾದ್ರೂ ಸಂಬಂಧೀಕರು ಬಂದು ಬಿಟ್ಟಲ್ಲಿ ಅಷ್ಟು ಹೊತ್ತಿನಲ್ಲಿ ಹುಳಿ, ಸಾರು ಮುಂತಾದವುಗಳನ್ನು ಮಾಡಲು ಪುರುಸೊತ್ತು ಇಲ್ಲದಿದ್ದಲ್ಲಿ, ದಿಡೀರ್ ಎಂದು ತಯಾರಿಸಬಹುದಾದ ಮತ್ತು ದೇಹದ ಆರೋಗ್ಯಕ್ಕೂ ಉತ್ತಮವಾದ ಸೌತೇಕಾಯಿ ಹಸೀ ಮಜ್ಜಿಗೆ ಹುಳಿ ಮಾಡುವ ವಿಧಾನವನ್ನು ನಮ್ಮ ನಳಪಾಕ ಮಾಲಿಕೆಯಲ್ಲಿ ತಿಳಿಸಿಕೊಡುತ್ತಿದ್ದೇವೆ.

ಸುಮಾರು 4-5 ಜನರು ಸವಿಯಬಹುದಾದಷ್ಟು ಸೌತೇಕಾಯಿ ಹಸೀ ಮಜ್ಜಿಗೆ ಹುಳಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

  • ಎಳೆಯ ಸೌತೇಕಾಯಿ – 1
  • ತೆಂಗಿನತುರಿ – 1 ಬಟ್ಟಲು
  • ಮೊಸರು – 1 ಬಟ್ಟಲು
  • ಜೀರಿಗೆ – 1/2 ಚಮಚ
  • ಹುರಿಗಡಲೆ –  2 ಚಮಚ
  • ಮೆಂತ್ಯ –  1/2 ಚಮಚ
  • ಸಾಸಿವೆ  – 1/2 ಚಮಚ
  • ಹಸೀ ಮೆಣಸಿನಕಾಯಿಗಳು – 5 ರಿಂದ 6
  • ಕತ್ತರಿಸಿದ ಕೊತ್ತಂಬರಿ ಸೊಪ್ಪು – 2 ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ಒಗ್ಗರಣೆಗೆ ಬೇಕಾಗುವ ಸಾಮಗ್ರಿಗಳು

  • ಅಡುಗೆ ಎಣ್ಣೆ – 2 ಚಮಚ
  • ಸಾಸಿವೆ –  1 ಚಮಚ
  • ಕರಿಬೇವಿನ ಸೊಪ್ಪು – 4-6 ಎಲೆಗಳು
  • ಒಣ ಮೆಣಸಿನಕಾಯಿ – 2-3
  • ಚಿಟುಕಿ ಇಂಗು
  • ಚಿಟುಕಿ ಅರಿಶಿನ

ಹಸೀ‌ ಮಜ್ಜಿಗೆ ಹುಳಿ ತಯಾರಿಸುವ ವಿಧಾನ

  • ಸೌತೇಕಾಯಿಯನ್ನು ಚೆನ್ನಾಗಿ ತೊಳೆದು ಸಿಪ್ಪೇ ತೆಗೆದು ಸಣ್ಣಗೆ ಹೆಚ್ಚಿಕೊಳ್ಳಿ.
  • ಮೊಸರನ್ನು ಕಡಗೋಲು (ಮಂತು) ಸಹಾಯದಿಂದ ಚೆನ್ನಾಗಿ ಕಡೆದುಕೊಂಡು ಒಂದು ಪಾತ್ರೆಗೆ ಹಾಕಿಕೊಳ್ಳಿ.
  • ಸಣ್ಣ ಬಾಣಲಿಯಲ್ಲಿ ಮೆಂತ್ಯ, ಸಾಸಿವೆ ಮತ್ತು ಜೀರಿಗೆಯನ್ನು ಹಸೀ ಹೋಗುವ ವರೆಗೂ ಹುರಿದುಕೊಳ್ಳಿ
  • ಮಿಕ್ಸಿ ಜಾರಿಗೆ ತೆಂಗಿನತುರಿ, ಹುರಿಗಡಲೆ, ಹಸೀ ಮೆಣಸಿನಕಾಯಿ ಮತ್ತು ಹುರಿದುಕೊಂಡ ಪದಾರ್ಥಗಳನ್ನು ಹಾಕಿ ಜೊತೆಗೆ ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ಗಟ್ಟಿಯಾಗಿ ರುಬ್ಬಿಕೊಳ್ಳಿ.
  • ಸಣ್ಣ ಬಾಣಲಿಯಲ್ಲಿ ಎಣ್ಣೆ ಹಾಕಿ, ಎಣ್ಣೆ ಕಾದ ನಂತರ, ಸಾಸಿವೆ ಸಿಡಿಸಿಕೊಂಡ ನಂತರ, ಕರೀಬೇವು, ಇಂಗು,  ಅರಿಶಿನ, ಕತ್ತರಿಸಿದ ಒಣಮೆಣಸಿನಕಾಯಿಯನ್ನು ಹಾಕಿ  ಒಗ್ಗರಣೆ ಮಾಡಿಕೊಳ್ಳಿ.
  • ರುಬ್ಬಿಕೊಂಡ ಮಿಶ್ರಣವನ್ನು ಒಂದು ಪಾತ್ರೆಗೆ ಹಾಕಿಕೊಂಡು ಅದಕ್ಕೆ ಕಡೆದ ಮೊಸರು, ಹೆಚ್ಚಿದ ಸೌತೇಕಾಯಿ ಮತ್ತು ಒಗ್ಗರಣೆಯನ್ನು ಬೆರೆಸಿ, ಅದಕ್ಕೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ, ಹದಕ್ಕೆ ತಕ್ಕಷ್ಟು ನೀರನ್ನು ಸೇರಿಸಿ ಕಲಸಿದಲ್ಲಿ ರುಚಿ ರುಚಿಯಾದ ಸೌತೇಕಾಯಿ ಹಸೀ ಮಜ್ಜಿಗೆ ಹುಳಿ ಸವಿಯಲು ಸಿದ್ದ.

ಮೊದಲೇ ತಿಳಿಸಿದಂತೆ ಈ ಹಸೀ ಮಜ್ಜಿಗೆ ಹುಳಿಯನ್ನು ದೋಸೆ,  ಚಪಾತಿಗಳಲ್ಲದೇ, ಅನ್ನದ ಜೊತೆಯೂ ಕಲಸಿಕೊಂಡು ತಿನ್ನಲು ಮಜವಾಗಿರುತ್ತದೆ.

ಇನ್ನೇಕೆ ತಡಾ, ಓದ್ಕೋಳೀ, ಮಾಡ್ಕೊಳೀ, ತಿನ್ಕೋಳಿ.

ಏನಂತೀರೀ?

ನಿಮ್ಮವನೇ ಉಮಾಸುತ

 

ಮನದಾಳದ ಮಾತು : ಈ ಬೇಸಿಗೆ ಕಾಲದಲ್ಲಂತೂ ಬಿಸಿಲಿನ ಪ್ರಮಾಣ ಜಾಸ್ತಿಯಾಗಿ ಮೈಯಲ್ಲಿರುವ ನೀರಿನ ಪ್ರಮಾಣವೆಲ್ಲಾ ಬೆವರಿನ ಮೂಲಕ ಹೊರ ಹೋಗಿ, ನಿರ್ಜಲೀಕರಣದ ಸಮಸ್ಯೆಗೆ ಸೌತೇಕಾಯಿ ಮತ್ತು ಮೊಸರು ಎರಡೂ ಸಹಾ ರಾಮಬಾಣವಾಗಿದೆ.  ಸೌತೆಕಾಯಿ, ದೇಹದಲ್ಲಿರುವ ಅನುಪಯುಕ್ತ ಹಾಗೂ ವಿಷಕಾರಕ ವಸ್ತುಗಳನ್ನು ಹೊರಹಾಕುವುದಲ್ಲದೇ, ಪ್ರತೀ ದಿನವೂ ಹಸೀ ಸೌತೇಕಾಯಿಯನ್ನು ಸೇವಿಸುವುದರಿಂದ  ಮೂತ್ರ ಪಿಂಡದಲ್ಲಿರಬಹುದಾದ ಕಲ್ಲುಗಳನ್ನು ಕರಗಿಸುತ್ತದೆ, ಎದೆ, ಗರ್ಭಾಶಯ, ಅಂಡಾಶಯದ ಕ್ಯಾನ್ಸರ್‌ ಗಳನ್ನೂ  ತಪ್ಪಿಸುತ್ತದೆ. ತೆಳುವಾದ ಸೌತೆಕಾಯಿಯ ಹೋಳನ್ನು ನಾಲಿಗೆಯ ಮೇಲೆ ಇಟ್ಟುಕೊಂಡು ಅರ್ಧ ನಿಮಿಷಗಳ ಕಾಲಾ ಬಾಯಿಯ ಒಳಗೆಲ್ಲಾ ಹೋಗುವಂತೆ ಮುಕ್ಕಳಿಸಿದಲ್ಲಿ, ಬಾಯಲ್ಲಿರ ಬಹುದಾದ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವುದಲ್ಲದೇ, ಬಾಯಿಯ ದುರ್ವಾಸನೆಯನ್ನೂ ಸಹಾ  ಕಡಿಮೆ ಮಾಡುತ್ತದೆ.

ಬಾಳೇಹಣ್ಣಿನ ಜಾಮೂನು

ಸಾಧಾರಣವಾಗಿ ಎಲ್ಲರ ಮನೆಯಲ್ಲಿಯೂ ಸಂಭ್ರಮವನ್ನು  ಸಿಹಿತಿಂಡಿಯನ್ನು ಪರಸ್ಪರ  ಹಂಚಿತಿನ್ನುವ ಮೂಲಕ ಸಂಭ್ರಮಿಸುವುದು ವಾಡಿಕೆ. ಹಾಗೆ ಸಿಹಿತಿಂಡಿಯನ್ನು ತಯಾರಿಸುವ ವೇಳೆ ಥಟ್ ಅಂತಾ ನೆನಪಾಗೋದೇ ಜಾಮೂನು.  ಅಂಗಡಿಯಲ್ಲಿ ಸಿಗುವ instant jamun mix  ತಂದು ಮಾಡುವ ಬದಲು ಮನೆಯಲ್ಲಿಯೇ ಇರುವ ಬಾಳೇಹಣ್ಣು ಮತ್ತು ಉದ್ದಿನಬೇಳೆ ಬಳಸಿ  ಅತ್ಯಂತ ರುಚಿಕರವಾದ  ಬಾಳೇಹಣ್ಣಿನ ಜಾಮೂನು ತಯಾರಿಸುವ ವಿಧಾನವನ್ನು  ನಮ್ಮ ನಳಪಾಕದಲ್ಲಿ ತಿಳಿದು ಕೊಳ್ಳೋಣ.

ಸುಮಾರು 20-30 ಬಾಳೇಹಣ್ಣಿನ ಜಾಮೂನು ಮಾಡಲು ಬೇಕಾಗುವ ಸಾಮಗ್ರಿಗಳು

  • ಉದ್ದಿನ ಬೇಳೆ – 1 ಬಟ್ಟಲು
  • ಸಕ್ಕರೆ – 2 ಬಟ್ಟಲು
  • ಏಲಕ್ಕಿ ಪುಡಿ – 1/4 ಚಮಚ
  • ಕಚ್ಚಾ ಪಚ್ಚಬಾಳೆ 5-6
  • ಕರಿಯಲು ಅಡುಗೆ ಎಣ್ಣೆ

jamun2ಬಾಳೇಹಣ್ಣಿನ ಜಾಮೂನು ತಯಾರಿಸುವ ವಿಧಾನ :

  • ಉದ್ದಿನಬೇಳೆಯನ್ನು ಚೆನ್ನಾಗಿ ತೊಳೆದು ಸುಮಾರು ಮೂರರಿಂದ ನಾಲ್ಕು ಗಂಟೆಗಳ ಕಾಲ ನೆನೆಸಿಟ್ಟು ಕೊಳ್ಳಬೇಕು
  • ನೆನೆಸಿಟ್ಟ ಉದ್ದಿನ ಬೇಳೆಯನ್ನು ಮಿಕ್ಸಿ ಇಲ್ಲವೇ ಗ್ರೈಂಡರಿನಲ್ಲಿ  ನುಣ್ಣಗೆ ಇಡ್ಲಿಗೆ ರುಬ್ಬಿಕೊಳ್ಳುವಂತೆ ರುಬ್ಬಿಟ್ಟುಕೊಳ್ಳಬೇಕು.
  • ಒಂದು ಅಗಲವಾದ ಗಟ್ಟಿ ತಳದ ಪಾತ್ರೆಗಲ್ಲಿ ಎರಡು ಲೋಟ ನೀರನ್ನು ಹಾಕಿ ಅದಕ್ಕೆ ಎರಡು ಬಟ್ಟಲು ಸಕ್ಕರೆಯನ್ನು ಹಾಕಿ ಸಣ್ಣ ಉರಿಯಲ್ಲಿ  ಪಾಕ ಬರುವವರೆಗೂ ಕುದಿಸಿಕೊಳ್ಳಬೇಕು
  • ಈ ಸಕ್ಕರೆ ಪಾಕಕ್ಕೆ ಏಲಕ್ಕಿ ಪುಡಿ ಬೆರೆಸಿ ಅದು ಆರಲು ಬಿಡಬೇಕು.
  • ಸಿಪ್ಪೆ ಸುಲಿದ ಕಚಾ ಪಚ್ಚಬಾಳೆಹಣ್ಣುಗಳನ್ನು  ಮಧ್ಯಮಗಾತ್ರದ ಬಿಲ್ಲೆ ಆಕಾರದಲ್ಲಿ ಕತ್ತರಿಸಿಕೊಂಡು ರುಬ್ಬಿಟ್ಟುಕೊಂಡ ಉದ್ದಿನಬೇಳೆ ಹಿಟ್ಟಿನಲ್ಲಿ ಕಲೆಸಿಕೊಳ್ಳಬೇಕು
  • ಬಾಣಲೆಯಲ್ಲಿ ಅಡುಗೆ ಎಣ್ಣೆ ಹಾಕಿ, ಎಣ್ಣೆ ಕಾದ ನಂತರ ಒಲೆಯ ಉರಿಯನ್ನು ಸಣ್ಣದಾಗಿ ಮಾಡಿ,  ಉದ್ದಿನಹಿಟ್ಟಿನಲ್ಲಿ ಅದ್ದಿದ ಬಾಳೇಹಣ್ಣುಗಳನ್ನು  ಹಾಕಿ ಚೆನ್ನಾಗಿ ಕೆಂಪಗೆ ಬರುವವರೆಗೂ ಕರಿದು ಸ್ವಲ್ಪ ಆರಲು ಬಿಡಬೇಕು.
  • ಆರಿದ ಕರಿದ ಜಾಮೂನುಗಳನ್ನು ಸಕ್ಕರೆ ಪಾಕದಲ್ಲಿ ಸುಮಾರು ಹತ್ತರಿಂದ ಹದಿನೈದು ನಿಮಿಷಗಳಷ್ಟು ನೆನೆಸಿಟ್ಟಲ್ಲಿ ರುಚಿಕರವಾದ, ಸ್ವಾದಿಷ್ಟವಾದ ಬಾಳೆಹಣ್ಣಿನ ಜಾಮೂನು ಸವಿಯಲು ಸಿದ್ಧ.

ಇನ್ನೇಕೆ ತಡಾ ನೋಡ್ಕೋಳ್ಳಿ, ಓದ್ಕೋಳ್ಳಿ , ಮಾಡ್ಕೋಳ್ಳಿ , ತಿನ್ಕೊಳ್ಳಿ

ಏನಂತೀರೀ?

ಮನದಾಳದ ಮಾತು :  ಇಡ್ಲೀ ಮಾಡಲು ರುಬ್ಬಿಟ್ಟುಕೊಂಡ ಉದ್ದಿನ ಹಿಟ್ಟಿನಲ್ಲೂ ಹುದುಗು ಬರುವ ಮುನ್ನಾ ಈ ಜಾಮೂನು ಮಾಡಲು ಬಳೆಸಿಕೊಳ್ಳಬಹುದು. ಪಚ್ಚಬಾಳೇ ಬದಲಿಗೆ ನೇಂದ್ರ ಬಾಳೆಯನ್ನು ಬಳೆಸಿದಲ್ಲಿ  ರುಚಿಯೂ ಚೆನ್ನಾಗಿರುತ್ತದೆ ಮತ್ತು  ಜಾಮೂನಿನ ಗಾತ್ರವೂ  ದೊಡ್ಡದಾಗಿರುತ್ತದೆ.

ಈ ಪಾಕವಿಧಾನವನ್ನು ತಿಳಿಸಿಕೊಟ್ಟ ಶ್ರೀಮತಿ ಶೈಲಾ ಅನಂತರಾಮು ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳು

#ನಳಪಾಕ

#ಬಾಳೇಹಣ್ಣಿನ_ಜಾಮೂನು

#ಜಾಮೂನು

#ಏನಂತೀರೀ