ಅರ್ಥಪೂರ್ಣ ವಿಶ್ವ ಪರಿಸರ ದಿನಾಚರಣೆಯ ಆಚರಣೆ

ವಿದ್ಯಾರಣ್ಯಪುರದ ವಿಶ್ವಗುರು ಚಾರಿಟೇಬಲ್ ಟ್ರಸ್ಟ್ ವತಿಯಿಂದ ವಿಶ್ವಪರಿಸರ ದಿನವಾದ ಜೂನ್ 6 2022ರಂದು ಹಮ್ಮಿಕೊಳ್ಳಲಾಗಿದ್ದ ವಿಶ್ವ ಪರಿಸರ ದಿನಾಚರಣೆ ಮತ್ತು ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮ ನಿಜಕ್ಕೂ ಅರ್ಥಪೂರ್ಣವಾಗಿತ್ತು.

ಕಾರ್ಯಕ್ರಮದ ಅತಿಥಿಗಳಾಗಿದ್ದ ಶ್ರೀ ಗಂಗಾಧರನ್ (ಆರೋಗ್ಯ ಭಾರತಿಯ ಪ್ರಾಂತ ಸಹಕೋಶಾಧ್ಯಕ್ಷರು) ಮತ್ತು ಶ್ರೀಮತಿ ಮನಿಲಾ ರೆಡ್ಡಿ, (ಸ್ವದೇಶಿ ಚಾಗರಣ ಮಂಚ್ ಮಹಿಳಾ ಘಟಕದ ಪ್ರಮುಖ್) ಮತ್ತು ಸಭೆಯಲ್ಲಿ ಸೇರಿದ್ದ ಕೆಲವು ಮಾತೆಯರಿಂದ ದೀಪವನ್ನು ಪ್ರಜ್ವಲಿ ಕಾರ್ಯಕ್ರಮಕ್ಕೆ ಅಧಿಕೃತವಾಗಿ ಚಾಲನೆ ನೀಡಿದರೆ, ರಾಮಚಂದ್ರಪುರದ ಕಲಾಸದ ಅಕಾಡೆಮಿ ಮಕ್ಕಳು ಸುಶ್ರಾವ್ಯವಾಗಿ ಹಾಡಿದ ಶಾರದೆಯ ಕುರಿತಾದ ಪ್ರಾರ್ಥನೆ ಕಾರ್ಯಕ್ರಮಕ್ಕೆ ದೈವೀ ಕಳೆಯನ್ನು ತಂದು ಕೊಟ್ಟಿತು.

ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಗಳ ಪರಿಚಯ ಮಾಡಿಕೊಡುತ್ತಾ ಅವರನ್ನು ಅಧಿಕೃತವಾಗಿ ಕಾರ್ಯಕ್ರಮಕ್ಕೆ ಸ್ವಾಗತ ಕೋರಿದ ವಿಶ್ವಗುರು ಫೌಂಡೇಷನ್ ಟ್ರಸ್ಟ್ ನ ಶ್ರೀ ಧನಂಜಯ್ ಮುರ್ದಂಬಿಲ್, ಕನ್ನಡಿಗರೇ ಬಹುಸಂಖ್ಯಾತರಾಗಿದ್ದರೂ ಕೆಲವು ಕಾಣದ ಕೈಗಳ ಕೈವಾಡದಿಂದ ಕೇರಳದ ಭಾಗವಾಗಿರುವ ಕಾಸರಗೋಡಿನ ಶ್ರೀ ಸಾಯಿ ಗೋಪಾಲಕೃಷ್ಣ ಭಟ್ ಅವರ ಸಮಾಜ ಸೇವೆಗಳಿಂದ ಪ್ರೇರಿತವಾದ ಮತ್ತು ಬಹುತೇಕ ಗೆಳೆಯರೇ ಸ್ವಸಹಾಯ ಪದ್ದತಿಯಲ್ಲಿ ಕಟ್ಟಿಕೊಂಡ ತಮ್ಮ ಟ್ರಸ್ಟ್ ಕಳೆದ ಮೂರ್ನಾಲ್ಕು ವರ್ಷಗಳಲ್ಲಿ ನಡೆಸಿದ ರಕ್ತದಾನ ಶಿಬಿರ, ಉಚಿತ ಆರೋಗ್ಯ ತಪಾಸಣಾ ಶಿಬಿರಗಳು, ಮಹಿಳೆಯರಿಗಾಗಿ ನಡೆಸಿದ ಕಾರ್ಯಾಗಾರಗಳು, ಮಕ್ಕಳಿಗಾಗಿ ನಡೆಸಿದ ಶ್ರೀಕೃಷ್ಣ ಜನ್ಮಾಷ್ಠಮಿಯ ಕಾರ್ಯಕ್ರಮಗಳನ್ನು ವಿವರಿಸಿದ್ದಲ್ಲದೇ, ತಮ್ಮ ಟ್ರಸ್ಟಿನ ಧ್ಯೇಯೋದ್ಧೇಶಗಳ ಕುರಿತಾದ ಹೆಚ್ಚಿನ ಮಾಹಿತಿಯನ್ನು ನೀಡಿದರು.

ಅದಾದ ನಂತರ ಕಾರ್ಯಕ್ರಮದ ಮುಖ್ಯ ಉದ್ದೇಶಗಳಲ್ಲಿ ಒಂದಾದ, ಇತ್ತೀಚೆಗೆ ನಡೆದ ಎಸ್.ಎಸ್.ಎಲ್.ಸಿ. ಪರೀಕ್ಷೆಯಲ್ಲಿ ರಾಜ್ಯಕ್ಕೆ 2 ನೇ ಮತ್ತು 3ನೇ ರ್ಯಾಂಕ್ ಪಡೆದ ದೊಡ್ಡಬೊಮ್ಮಸಂದ್ರ ಬಡಾವಣೆಯ ಇಬ್ಬರು ಅಪರೂಪದ ಎಲೆಮರೆಕಾಯಿಯಂತಹ ಪ್ರತಿಭೆಗಳಿಗೆ ಟ್ರಸ್ಟಿನ ವತಿಯಿಂದ ಪ್ರಶಸ್ತಿ ಪ್ರಮಾಣ ಪತ್ರ, ನೆನಪಿನ ಕಾಣಿಕೆ ಮತ್ತಿತರ ಬಹುಮಾನದೊಂದಿಗೆ ಪರಿಸರ ದಿನದ ಅಂಗವಾಗಿ ಗಿಡವನ್ನೂ ಸಹಾ ಕೊಟ್ಟಿದ್ದು ಅರ್ಥಪೂರ್ಣವಾಗಿದ್ದಲ್ಲದೇ, ಅನನ್ಯವಾಗಿತ್ತು.

ಮೊದಲಿಗೆ 625ಕ್ಕೆ 624 ಅಂಕಗಳನ್ನು ಗಳಿಸಿ ರಾಜ್ಯಕ್ಕೆ 2ನೇ ರ್ಯಾಂಕ್ ಗಳಿಸಿರುವ ಚಿರಂಜಿವಿ ಅಭಿಷೇಕ್ ಅವರಿಗೆ ಶ್ರೀ ಗಂಗಾಧರನ್ ಅವರು ಪ್ರಶಸ್ತಿ ಪ್ರಧಾನ ಮಾಡಿದರು. ಸೆಂಟ್ ಫಿಲೋಮಿನಾಸ್ ಶಾಲೆಯ ಈ ವಿದ್ಯಾರ್ಥಿ ಕನ್ನಡ, ಇಂಗ್ಲೀಷ್, ಹಿಂದಿ, ವಿಜ್ಞಾನ ಮತ್ತು ಸಮಾಜ ಶಾಸ್ತ್ರದಲ್ಲಿ ಪೂರ್ಣಾಂಕಗಳನ್ನು ಗಳಿಸಿ 100ಕ್ಕೆ 100 ಸುಲಭವಾಗಿ ಗಳಿಸಬಹುದಾದ ಗಣಿತದಲ್ಲಿ 99 ಅಂಕಗಳನ್ನು ಗಳಿಸುವ ಮೂಲಕ ಕೇವಲ 1 ಅಂಕದಿಂದ ರಾಜ್ಯಕ್ಕೆ ಮೊದಲನೇ ರ್ಯಾಂಕ್ ನಿಂದ ವಂಚಿತನಾಗಿದ್ದಾನೆ. ಈ ಬಾರಿ 145 ಮಂದಿ 625/625 ಗಳಿಸಿರುವುದು ದಾಖಲೆಯಾಗಿದೆ. ಖಾಸಗಿ ಕಂಪನಿಯಲ್ಲಿ ಪ್ರಾಜೆಕ್ಟ್ ಮ್ಯಾನೇಜರ್ ಆಗಿ ಉದ್ಯೋಗ ಮಾಡುತ್ತಿರುವ ಶ್ರೀ ದಿಲೀಪ್ ಮತ್ತು ಕನ್ನಡದಲ್ಲಿ ಸ್ನಾತಕೋತ್ತರ ಪದವಿ ಪಡೆದು ಕೆಲ ಕಾಲ ಶಿಕ್ಷಕಿಯಾಗಿದ್ದ ಶ್ರೀಮತಿ ಪ್ರೇಮಲತಾ ಅವರ ಪುತ್ರನಾದ ಅಭಿಷೇಕ್ ಮುಂದೆ ವಾಣಿಜ್ಯ ವಿಭಾಗದಲ್ಲಿ ತನ್ನ ವಿದ್ಯಾಭ್ಯಾಸ ಮುಂದುವರೆಸಿ, ಚಾರ್ಟೆಡ್ ಅಕೌಂಟೆಂಟ್ ಆಗಲು ಇಚ್ಚಿಸಿದ್ದಾನೆ.

ಇನ್ನು 625 ಕ್ಕೆ 623 ಅಂಕಗಳನ್ನುಗಳಿಸಿ ಕೇವಲ 2 ಅಂಕಗಳಿಂದ ಮೂರನೇ ರ್ಯಾಂಕ್ ಪಡೆದಿರುವ ರಾಮಚಂದ್ರ ಪುರದ ವಿಶ್ವ ಭಾರತಿ ಶಾಲೆಯ ಚಿರಂಜೀವಿ ಶರಣ್ ಗೆ ಶ್ರೀಮತಿ ಮನಿಲಾರೆಡ್ಡಿಯವರು ಪ್ರಶಸ್ತಿ ಪುರಸ್ಕಾರಗಳನ್ನು ವಿತರಿಸಿದರು. ಕನ್ನಡ, ಹಿಂದಿ, ವಿಜ್ಞಾನ ಮತ್ತು ಸಮಾಜ ಶಾಸ್ತ್ರದಲ್ಲಿ ಪೂರ್ಣಾಂಕಗಳನ್ನು ಗಳಿಸಿ ಇಂಗ್ಲೀಷ್ ನಲ್ಲಿ 124 ಮತ್ತು ಗಣಿತದಲ್ಲಿ 99 ಅಂಕಗಳನ್ನು ಗಳಿಸಿರುವ ಶರಣ್, ವಿದ್ಯೆಗೂ ಬಡತನಕ್ಕೂ ಸಂಬಂಧವೇ ಇಲ್ಲಾ ಎಂದು ತೋರಿಸಿಕೊಟ್ಟಿದ್ದಾನೆ. ತಂದೆ ಶ್ರೀ ಸುಬ್ರಮಣಿಯವರು ಬಾರ್ ಬೆಂಡಿಗ್ ಕೆಲಸ ಮಾಡಿದರೆ, ತಾಯಿ ಶ್ರೀಮತಿ ತಿಲಗವತಿ ಕುಟುಂಬವನ್ನು ನಿರ್ವಹಿಸಲು ಟೈಲರಿಂಗ್ ಮಾಡುತ್ತಿದ್ದಾರೆ. ಇಂಜಿನೀಯರಿಂಗ್ ಪದವಿ ಪಡೆದು ಸ್ವಂತ ಉದ್ಯೋಗ ಮಾಡಿ ತನ್ನ ಹೆತ್ತ ಪೋಷಕರನ್ನು ಚೆನ್ನಾಗಿ ನೋಡಿಕೊಳ್ಳಬೇಕೆನ್ನುವ ಬಯಕೆಯನ್ನು ಹೊಂದಿದ್ದಾನೆ.

ಪ್ರಶಸ್ತಿ ಪುರಸ್ಕಾರ ಮುಗಿದ ನಂತರ ಕಾರ್ಯಕ್ರಮದ ಮುಖ್ಯ ವಕ್ರಾರರಾಗಿ ಬಂದಿದ್ದ ಶ್ರೀ ಗಂಗಾಧರನ್, Health is first every thing is next ಎಂದು ಸೂಚ್ಯವಾಗಿ ಹೇಳಿ, ವಿಪರೀತ ನಗರೀಕರಣದಿಂದಾಗಿ ಕಾಡುಗಳೆಲ್ಲಾ ನಾಡುಗಳಾಗಿ ಮಾರ್ಪಟ್ಟ ಕಾರಣ ಪರಿಸರದ ಮೇಲೆ ಭಾರಿ ದುಷ್ಪರಿಣಾಮ ಬೀರಿದ್ದರಿಂದಲೇ ಎಲ್ಲರ ಆರೋಗ್ಯದ ಮೇಲೆ ದುಷ್ಪರಿಣಾಮಗಳಾಗುತ್ತಿವೆ ಎಂಬುದನ್ನು ಕೆಲ ಉದಾಹರಣೆಗಳ ಮೂಲಕ ವಿವರಿಸಿದ್ದಲ್ಲದೇ, ಮನುಷ್ಯರ ಆಹಾರ ಪದ್ದತಿ ಬದಲಾಗಿ packed food ಸೇವಿಸಲಾರಂಭಿಸಿದ್ದು ಮತ್ತು ಅನಗತ್ಯವಾಗಿ ಎಗ್ಗಿಲ್ಲದೇ, mobile ಬಳಕೆ ಮಾಡತೊಡಗಿದ ಕಾರಣ mobile tower frequency ನಿಂದಾಗಿ ಇಂದಿನ ಮಕ್ಕಳು ಗುಬ್ಬಚ್ಚಿಯನ್ನು ಕೇವಲ ಚಿತ್ರರೂಪದಲ್ಲಿ ನೋಡಬೇಕಾಗಿದೆ ಎಂದು ಮಾರ್ಮಿಕವಾಗಿ ಹೇಳಿದಾಗ ನೆರದಿದ್ದವರೆಲ್ಲರಿಗೂ ತಮ್ಮ ತಪ್ಪಿನ ಅರಿವಾಗಿದ್ದು ಸುಳ್ಳಲ್ಲ.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿಕೊಂಡಿದ್ದ ಶ್ರೀಮತಿ ಮನಿಲಾರೆಡ್ಡಿಯವರು ಮನೆಯಲ್ಲಿ ಮಹಿಳೆಯರು ಹೇಗೆ ಪರಿಸರದ ಮೇಲೆ ದುಷ್ಪರಿಣಾಮಗಳನ್ನು ಉಂಟು ಮಾಡುತ್ತಿದ್ದಾರೆ ಎಂಬುದನ್ನು ಸರಳವಾಗಿ ವಿವರಿಸಿದರು. ಹಿಂದೆ ಬಟ್ಟೆ ಒಗೆಯಲು, ಪಾತ್ರೆ ತೊಳೆಯಲು ಮತ್ತು ನೈಸರ್ಗಿಕವಾದ ಅಂಟುವಾಳಕಾಯಿಯನ್ನು ಬಳಸುತ್ತಿದ್ದರೆ, ಇಂದು ಎಲ್ಲಾ ಕಡೆಯಲ್ಲಿಯೂ ಎಗ್ಗಿಲ್ಲದೇ ರಾಸಾಯನಿಕ ಮಾರ್ಜಕಗಳನ್ನು ಬಳಸುವ ಮೂಲಕ ನೀರನ್ನು ಕಲುಷಿತ ಗೊಳಿಸುತ್ತಿರುವುದನ್ನು ಎತ್ತಿ ತೋರಿಸಿದರು. ಮನೆಯ ಮುಂದೆ ಕನಿಷ್ಟ ಪಕ್ಷ ಎರಡು ಗಿಡಗಳನ್ನಾದರೂ ನೆಡಬೇಕು ಅದು ಸಾಧ್ಯವಿಲ್ಲದೇ ಪಕ್ಷದಲ್ಲಿ ತಮ್ಮ ಸ್ವದೇಶೀ ಜಾಗರಣ ಮಂಚ್ ವತಿಯಿಂದ ತಾರಸೀ ತೋಟದ ಕಾರ್ಯಾಗಾರವನ್ನು ಮಾಡುವುದಾಗಿ ಭರವಸೆಯನ್ನು ನೀಡಿದರು.

ಭಾವ, ರಾಗ ತಾಳ ಸೇರಿಯೇ ಭಾರತ ಎಂಬ ಹೆಸರು ಬಂದಿತೆಂದು ಹೇಳುವ ಈ ನಮ್ಮ ಭಾರತ ದೇಶ, ಸಂಗೀತ ಸಾಹಿತ್ಯ, ಕಲೆ ಮತ್ತು ನೃತ್ಯಗಳಿಗೆ ಖ್ಯಾತಿ ಹೊಂದಿದ್ದು ಅದನ್ನು ಪ್ರತಿಪಾದಿಸುವಂತೆ ಮತ್ತು ಪರಿಸರ ದಿನಾಚರಣೆಗೆ ಸೂಕ್ತವಾಗುವಂತೆ, ಕಲಾಸದಾ ಮಕ್ಕಳು ಮಾಯದಂತ ಮಳೆ ಬಂತಣ್ಣಾ… ಜಾನಪದ ಗೀತೆಯನ್ನು ಸುಶ್ರಾವ್ಯವಾಗಿ ಹಾಡಿದರೆ, ಅವರೆಲ್ಲರ ಹಾಡಿನಿಂದ ಉತ್ತೇಜಿತಳಾಗದ ಪುಟಾಣಿ ಕು. ವಿಜ್ಞಾತ್ರಿಯೂ ಸಹಾ ತನ್ನ ಮುದ್ದಾದ ಕಂಠದಲ್ಲಿ ಹಾಡೊಂದನ್ನು ಹಾಡುವ ಮೂಲಕ ಎಲ್ಲರ ಮನಸ್ಸನ್ನು ಗೆದ್ದಳು. ಮಕ್ಕಳ ಹಾಡುಗಾರಿಕೆಗೆ ತುಂಬಿದ ಸಭಾಂಗಣದ ಸಭಿಕರ ಕರತಾಡಾಣದ ಸದ್ದನ್ನು ಕೇಳಿಸಿಕೊಳ್ಳುತ್ತಿದ್ದ SSMRV ಶಾಲೆಯ ಸಂಗೀತ ಶಿಕ್ಷಕಿಯಾಗಿರುವ ಶ್ರೀಮತಿ ಪ್ರೀತಿ ಜಯಂತ್ ಅವರಿಗೆ ಅ ಮಕ್ಕಳಿಗೆ ಕಷ್ಟ ಪಟ್ಟು ಹಾಡುಗಳನ್ನು ಹೇಳಿಕೊಟ್ಟಿದ್ದ ಶ್ರಮಕ್ಕೆ ಸಾರ್ಥಕತೆ ದೊರೆತ ಭಾವದಲ್ಲಿ ಆನಂದಭಾಷ್ಪ ಜಾರಿದ್ದು ಎದ್ದು ಕಾಣುತ್ತಿತ್ತು.

ಸದ್ಯಕ್ಕೆ ನಮ್ಮ ಪರಿಸರದಲ್ಲಿ ಎಲ್ಲರಣ್ನೂ ಕಾಡುತ್ತಿರುವ ಪೆಂಡಭೂತವಾದ ಸಮಸ್ಯೆ ಎಂದರೆ ಪ್ಲಾಸ್ಟಿಕ್. ನಾವು ದೈನಂದಿನದಲ್ಲಿ ಎಗ್ಗಿಲ್ಲದೇ ಬಳಸುವ ಪ್ಲಾಸ್ಟಿಕ್ ಅತ್ಯಂತ ಕೆಟ್ಟ ವಸ್ತುವಾಗಿದ್ದು ಅವುಗಳ ಬಳಕೆಯಿಂದಾಗಿ ಕ್ಯಾನ್ಸರ್ ನಂತಹ ಮಾರಕ ಖಾಯಿಲೆಗಳಿಗೂ ತುತ್ತಾಗುವುದಲ್ಲದೇ, ಪ್ಲಾಸ್ಟಿಕ್ ವಸ್ತುಗಳು ಸುಲಭವಾಗಿ ಮಣ್ಣಿನಲ್ಲಿ ಕರಗದೇ, ಅವುಗಳು ಕೊಳೆಯಲು ಸುಮಾರು 450 ವರ್ಷಗಳು ಬೇಕಾಗುವುದರಿಂದ ಪರಿಸರಕ್ಕೂ ಬಹಳ ಹಾನಿಕಾರಕವಾಗಿದೆ.

ಹಾಗಾಗಿ ವಿಶ್ವ ಪರಿಸರ ದಿನದಂದು ಈ ದೇಶದ ಉತ್ತಮ ಪ್ರಜೆಯಾಗಿ ಮತ್ತು ಈ ಭೂಮಿಯ ಜವಾಬ್ದಾರಿಯುತ ನಾಗರೀಕನಾಗಿ ನೆರೆದಿದ್ದ ಎಲ್ಲರೂ ತಮ್ಮ ಕೈ ಮುಂದೆ ಮಾಡಿ ಈ ಕೆಳಕಂಡಂತೆ ಪ್ಲಾಸ್ಟಿಕ್ ಬಳಕೆಯ ವಿರುದ್ಧ ಮಾಡಿದ ಈ ಪ್ರತಿಜ್ಞೆ ಶ್ಲಾಘನೀಯವಾಗಿತ್ತು.

  • ನಾನು ಇಂದಿನಿಂದ ಆರೋಗ್ಯ ಮತ್ತು ಪರಿಸರದ ಹಿತದೃಷ್ಟಿಯಿಂದ ಇಂದಿನಿಂದಲೇ ನಮ್ಮ ಮನೆಯಲ್ಲಿ ಆದಷ್ಟೂ ಪ್ಲಾಸ್ಟಿಕ್ ಉತ್ಪನ್ನಗಳನ್ನು ಬಳಸುವುದನ್ನು ಕ್ರಮೇಣ ಕಡಿಮೇ ಮಾಡುತ್ತಾ ಇನ್ನು ಕೆಲವೇ ತಿಂಗಳುಗಳಲ್ಲಿ ಸಂಪೂರ್ಣವಾಗಿ ಪ್ಲಾಸ್ಟಿಕ್ ಬಳಸುವುದನ್ನು ನಿಲ್ಲಿಸುತ್ತೇನೆ.
  • ದೈನಂದಿನ ಕಾರ್ಯಗಳಲ್ಲಿ ಏಕ ಬಳಕೆಯ ಪ್ಲಾಸ್ಟಿಕ್ ಬಳಸುವುದನ್ನು ಕಡಿಮೆ ಮಾಡುವ ಪ್ರಯತ್ನದಲ್ಲಿ, ಏಕ ಬಳಕೆಯ ಪ್ಲಾಸ್ಟಿಕ್ ವಸ್ತುಗಳಾದ ತಂಪು ಪಾನೀಯ ಕುಡಿಯುವ ಸ್ಟ್ರಾ, ಕ್ಯಾರಿ ಬ್ಯಾಗ್ಗಳು, ಚಾಕು ಕತ್ತರಿಗಳು ಇತ್ಯಾದಿಗಳ ಬಳಕೆಯನ್ನು ನಿಲ್ಲಿಸುತ್ತೇನೆ.
  • ನಾನು ಇನ್ನು ಮುಂದೆ ಬಟ್ಟೆಯ ಕೈಚೀಲ ಚೀಲ, ಮರುಬಳಕೆ ಮಾಡ ಬಹುದಾದ ಗಾಜು, ಪಿಂಗಾಣಿ ಇಲ್ಲವೇ ಲೋಹದ ಉಪಕರಣಗಳನ್ನು ಬಳಸುತ್ತೇನೆ.
  • ಮಾಲ್ ಇಲ್ಲವೇ ಬಜಾರ್ ಗಳಲ್ಲಿ ಪ್ಲಾಸ್ಟಿಕ್ ಫಿಲ್ಮ್ಗಳಲ್ಲಿ ಸುತ್ತಿದ ಹಣ್ಣುಗಳು ಮತ್ತು ತರಕಾರಿಗಳನ್ನು ಖರೀದಿಸುವುದಿಲ್ಲ.
  • ಏಕ ಬಳಕೆಯ ಪ್ಲಾಸ್ಟಿಕ್ ಅನ್ನು ಕಡಿಮೆ ಮಾಡುವ ಬಗ್ಗೆ ಬಂಧು ಮಿತ್ರರೊಂದಿಗೆ ವಿಚಾರ ತಿಳಿಸಿ ಅವರೂ ಸಹಾ ಪ್ಲಾಸ್ಟಿಕ್ ಬಳಕೆಯನ್ನು ಕಡಿಮೆ ಇಲ್ಲವೇ ಸಂಪೂರ್ಣ ನಿಷೇಧಮಾಡಲು ಕೋರಿಕೊಳ್ಳುತ್ತೇನೆ.
  • ಮರುಬಳಕೆ ಮತ್ತು ವಿಲೇವಾರಿಗಾಗಿ ನಮ್ಮ ಮನೆಯ ದೈನಂದಿನ ತ್ಯಾಜ್ಯವನ್ನು ಒಣ ಕಸ ಮತ್ತು ಹಸೀ ಕಸವನ್ನಾಗಿ ವಿಂಗಡಿಸುತ್ತೇನೆ.
  • ಹೊರಗಿನಿಂದ ಆಹಾರವನ್ನು ಪಾರ್ಸಲ್ ತರುವಾಗ ಸಾಧ್ಯವಾದಷ್ಟೂ ಮನೆಯಿಂದಲೇ ಡಬ್ಬಿ ಮತ್ತು ಪಾತ್ರೆಗಳನ್ನು ತೆಗೆದುಕೊಂಡು ಹೋಗುತ್ತೇನೆ.
  • ಆನ್ಲೈನ್ನಲ್ಲಿ ಮೂಲಕ ಆಹಾರವನ್ನು ಆರ್ಡರ್ ಮಾಡಿದಾಗ ದಯವಿಟ್ಟು ಪ್ಲಾಸ್ಟಿಕ್ ಡಬ್ಬಗಳಲ್ಲಿ ಆಹಾರವನ್ನು ಕಳುಹಿಸಬೇಡಿ ಎಂದು ರೆಸ್ಟೋರೆಂಟ್ಗಳಿಗೆ ಕೇಳಿಕೊಳ್ಳುತ್ತೇನೆ.
  • ಪ್ಲಾಸ್ಟಿಕ್ನಲ್ಲಿ ಸುತ್ತಿದ ಉಡುಗೊರೆಗಳು / ಹೂಗುಚ್ಛಗಳನ್ನು ಇನ್ನು ಮುಂದೆ ಯಾರಿಗೂ ಕೊಡುವುದಿಲ್ಲ.
  • ಈ ಮೂಲಕ ಇನ್ನು ಮುಂದೆ ನಮ್ಮ ಮನೆ ಪ್ಲಾಸ್ಟಿಕ್ ಮುಕ್ತ ಮನೆಯಾಗಿರುತ್ತದೆ ಎಂದು ಘೋಷಿಸುತ್ತೇನೆ.

ಇಂತಹ ಸುಂದರವಾದ ಮತ್ತು ಅರ್ಥಪೂರ್ಣವಾದ ಕಾರ್ಯಕ್ರಮವನ್ನು ನಡೆಸಲು ಪ್ರತ್ಯಕ್ಷವಾಗಿ ಮತ್ತು ಪರೋಕ್ಷವಾಗಿ ಸಹಕರಿಸಿದ ಎಲ್ಲರಿಗೂ ಧನ್ಯವಾದಗಳನ್ನು ವಿಶ್ವಗುರು ಚಾರಿಟೆಬಲ್ ಟ್ರಸ್ಟಿನ ರಕ್ಷಿತ್ ಶೆಟ್ಟಿಯವರು ವಂದನಾರ್ಪಣೆ ಅರ್ಪಿಸುವ ಮೂಲಕ ಕಾರ್ಯಕ್ರಮ ಸುಸಂಪನ್ನವಾಯಿತು.

ಪರಿಸರದ ಕಾಳಜಿಯನ್ನು ಕೇವಲ ಈ ದಿನಕ್ಕೇ ಅಥವಾ ಈ ಕಾರ್ಯಕ್ರಮಕ್ಕೇ ಮಾತ್ರವೇ ಸೀಮಿತಗೊಳಿಸದೇ, ಮನೆಗೆ ತೆರಳುವ ಮುನ್ನಾ ಇಂದು ಮಾಡಿದ ಪ್ರತಿಜ್ಞೆಯನ್ನು ಮತ್ತೊಮ್ಮೆ ಮನನ ಮಾಡಿಕೊಂಡು ಅದನ್ನು ಯಥಾವತ್ತಾಗಿ ಅನುಷ್ಠಾನ ಮಾಡಲೇ ಬೇಕೆಂದು ಇಡೀ ಕಾರ್ಯಕ್ರಮವನ್ನು ಅತ್ಯಂತ ಚೇತೋಭರಿತವಾಗಿ ನಿರೂಪಣೆ ಮಾಡಿದ ಶ್ರೀ ಶ್ರೀಕಂಠ ಬಾಳಗಂಚಿಯವರು ಮಾಡಿದ ಆಗ್ರಹಕ್ಕೆ ಎಲ್ಲರೂ ತಲೆದೂಗಿದ್ದು ಕಾರ್ಯಕ್ರಮಕ್ಕೆ ಸಾರ್ಥಕತೆಯನ್ನು ಎತ್ತಿ ತೋರಿಸಿತ್ತು.

ಕಾರ್ಯಕ್ರಮಕ್ಕೆ ಬಂದವರಿಗೆಲ್ಲರಿಗೂ ತೀರ್ಥ ರೂಪದಲ್ಲಿ ಬಿಸಿ ಬಿಸಿ ಬಾದಾಮಿ ಹಾಲನ್ನು ಕೊಟ್ಟಿದ್ದಲ್ಲದೇ, ಇನ್ನು ಪ್ರಸಾದ ರೂಪದಲ್ಲಿ ಮರ, ಹೂವಿನ ಗಿಡಗಳು ಮತ್ತು ಹುಲ್ಲಿನ ಜೀಜದ ಉಂಡೆಯನ್ನು ಶ್ರೀ ದರ್ಶನ್ ಅವರು ವಿತರಿಸಿದರು. ಈಗ ವಿತರಿಸಿದ ಬೀಜದುಂಡೆಯನ್ನು ಮನೆಯ ಮುಂದೆ ಹಾಕಿ, ಕಾಲಕಾಲಕ್ಕೆ ಅದಕ್ಕೆ ಪೋಷಣೆಯನ್ನು ಮಾಡಿ ಮುಂದಿನ ವರ್ಷ ಇದೇ ಕಾರ್ಯಕ್ರಮದಲ್ಲಿ ಅದರ ಭಾವಚಿತ್ರಗಳನ್ನು ಹಾಕಲು ಕೇಳಿಕೊಳ್ಳುವ ಮೂಲಕ  ಅರ್ಥಪೂರ್ಣವಾಗಿ ಪರಿಸರ ದಿನಾಚರಣೆ ಕಾರ್ಯಕ್ರಮಕ್ಕೆ ತೆರೆ ಎಳೆಯಲಾಯಿತು.

ಕಾರ್ಯಕ್ರಮಕ್ಕೆ ಭಂಗ ಬಾರದಿರಲೆಂದು ಎಲ್ಲರೂ ತಮ್ಮ ತಮ್ಮ ಮೊಬೈಲ್ ಫೋನುಗಳನ್ನು ನಿಶ್ಯಬ್ಧವಾಗಿಸಿದ್ದಲ್ಲದೇ, ಕಾರ್ಯಕ್ರಮದ ನಡುವೆ ಅನಗತ್ಯವಾಗಿ ಓಡಾಡದೇ, ಸಂಪೂರ್ಣ ಕಾರ್ಯಕ್ರಮದಲ್ಲಿ ಭಾಗಿಗಳಾಗಿ ಕಾಯಕ್ರಮವನ್ನು ಯಶಸ್ವಿಗೊಳಿಸಿದ್ದು ಕೊರೋನಾ ಮಹಾಮಾರಿ ಬಂದ ನಂತರ ಎಲ್ಲರೂ ಪರಿಸರ ಮತ್ತು ಸ್ವಚ್ಚತೆ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸುತ್ತಿದ್ದಾರೆ ಎಂದಿನಿಸಿದೆ ಅಲ್ವೇ?

ಏನಂತೀರೀ?
ನಿಮ್ಮವನೇ ಉಮಾಸುತ

ಪರಿಸರದ ಮೇಲೆ ಪ್ಲಾಸ್ಟಿಕ್ ಎಂಬ ಮಾರಿ

ಸರಿ ಸುಮಾರು ಮೂವತ್ತು ನಲವತ್ತು ವರ್ಷಗಳ ಹಿಂದೆ ಯಾವುದೇ ಮನೆಗಳಿಗೆ ಹೋದರೂ ನಮ್ಮನ್ನು ಆದರದಿಂದ ಸ್ವಾಗತಿಸುತ್ತಿದ್ದದ್ದು ಬಾಗಿಲಿಗೆ ಕಟ್ಟಿರುವ ಒಣಗಿದ ಮಾವಿನ ಎಲೆಯ ತೋರಣ. ತೋರಣದ ಅಡಿಯಲ್ಲಿ ತಲೆಬಾಗಿ ಮನೆಯ ಒಳ ಹೊಕ್ಕಲ್ಲಿ ವಿಶಾಲವಾದ ಪ್ರಾಂಗಣ ಅದರ ಮೂಲೆಯಲ್ಲೊಂದು ಕಾಲ್ತೊಳೆಯುವ ಸ್ಥಳ. ತಾಮ್ರವೋ ಇಲ್ಲವೇ ಹಿತ್ತಾಳೆ ಕೊಳಗದಲ್ಲಿದ್ದ ನೀರನ್ನು ತಂಬಿಗೆಯಿಂದ ತುಂಬಿಕೊಂಡು ಕಾಲ್ತೊಳೆದುಕೊಂಡು, ಶುದ್ಧವಾದ ವಸ್ತ್ರದಿಂದ ಒರೆಸಿಕೊಂಡು ಹಜಾರದಲ್ಲಿ ಹಾಕಿರುವ ನಾನಾ ರೀತಿಯ ಮರದ ಪೀಠೋಪರಣದ ಮೇಲೆ ಆಸೀನರಾಗುತ್ತಿದ್ದಂತೆಯೇ ಮನೆಯೊಡತಿ ಪಳ ಪಳನೆ ಹೊಳೆಯುತ್ತಿದ್ದ ಹಿತ್ತಾಳೆ ಲೋಟದಲ್ಲಿ ಶುದ್ಧವಾದ ಕುಡಿಯುವ ನೀರು ಜೊತೆಯಲ್ಲಿ ತಾಮ್ರದ ತಟ್ಟೆಯಲ್ಲಿ ಬೆಲ್ಲದ ತುಣುಕುಗಳನ್ನು ತಂಡಿಡುತ್ತಿದ್ದರು. ನಿಧಾನವಾಗಿ ನೀರು ಕುಡಿಯುತ್ತಾ ಮನೆಯ ಹಜಾರದ ಸುತ್ತ ಮುತ್ತಲೂ ಕಣ್ಣಾಡಿಸಿದಲ್ಲಿ ತೇಗ, ಬೀಟೆ, ಮರದ ಕಟ್ಟು ಹಾಕಲ್ಪಟ್ಟ ಹಲವಾರು ದೇವರ ಪಟಗಳು.

ತಿಂಡಿ ಇಲ್ಲವೇ ಊಟದ ಸಮಯಕ್ಕನುಗುಣವಾಗಿ ಊಟದ ಮನೆಯಲ್ಲಿ ಕುಳಿತುಕೊಂಡರೆ, ವಿಶಾಲವಾದ ತಟ್ಟೆಗಳೋ ಇಲ್ಲವೇ ಬಾಳೆ ಅಥವಾ ಪೋಣಿಸಿರುವ ಮುತ್ತುಗದ ಎಲೆಗಳ ಮೇಲೆ ಬಿಸಿ ಬಿಸಿ ಅಹಾರ ಅದರ ಮೇಲೆ ಶುದ್ಧವಾದ ಮತ್ತು ಹಸನಾದ ತುಪ್ಪಾ, ಜೊತೆಗೆ ಉಪ್ಪಿನಕಾಯಿ ಇಲ್ಲವೇ ಚೆಟ್ನಿಪುಡಿ ಜೊತೆಗೆ ಬಡಿಸದ ಆಹಾರವನ್ನು ಸವಿಯುತ್ತಿದ್ದರೆ ಆಹಾ ಮಹದಾನಂದ. ಊಟವಾದ ನಂತರ ಭುಕ್ತಾಯಾಸವನ್ನು ಪರಿಹರಿಸಿಕೊಳ್ಳಲು ಹಾಗೆಯೇ ಮಂಚದ ಮೇಲೆ ಪವಡಿಸಿಕೊಂಡು ಗಾಳಿಯಾಡಿಸಲು ಬಿದಿರಿನದೋ ಇಲ್ಲವೇ ಲಾಮಂಚದ ಬೀಸಣಿಗೆಯೊಂದಿಗೆ ಬೀಸಿಕೊಳ್ಳುತ್ತಿದ್ದರೆ ಅದುವೇ ಸ್ವರ್ಗ ಸುಖಃ.

ಆದರೆ ಇಂದು ಈ ಎಲ್ಲಾ ಚಿತ್ರಣವೂ ಸಂಪೂರ್ಣವಾಗಿ ಬದಲಾಗಿ ಹೋಗಿದೆ. ಔಷಧೀಗುಣವುಳ್ಳ ಮಾವು ಮತ್ತು ಬೇವಿನ ಎಲೆಯ ತೋರಣದ ಬದಲಿಗೆ ಸದಾ ಹಸಿರಾಗಿರುವ ಪ್ಲಾಸ್ಟಿಕ್ ತೋರಣ, ನೀರು ಇಡಲು ಪ್ಲಾಸ್ಟಿಕ್ ಬಕೀಟ್, ಬಿಂದಿಗೆ ಮತ್ತು ತಂಬಿಗೆ. ಕುಳಿತು ಕೊಳ್ಳಲು ಮತ್ತು ಆಯಾಸ ಪರಿಹರಿಸಿಕೊಳ್ಳಲು ಮತ್ತದೇ ಪ್ಲಾಸ್ಟಿಕ್ ಚೇರ್ ಮತ್ತು ಕುರ್ಚಿಗಳು. ಹಜಾರದಲ್ಲಿರುವ ದೇವರ ಪಟಗಳ ಮೇಲೆ ಎಂದೂ ಬಾಡದ ಮತ್ತು ಸುವಾಸನೆಯನ್ನೂ ಬೀರದ ನಿರ್ಜೀವ ಪ್ಲಾಸ್ಟಿಕ್ ಹಾರಗಳು. ಹಜಾರದಲ್ಲಿರುವ ಎಲ್ಲಾ ಎಲೆಕ್ಟ್ರಿಕಲ್ ಸ್ವಿಚ್ಗಳೂ ಪ್ಲಾಸ್ಟಿಕ್ಕಿನದೇ. ಆಹಾರ ಸೇವಿಸಲು ಮತ್ತು ನೀರು ಕುಡಿಯಲು ಆಕರ್ಶಕವಾದ ಬಣ್ಣ ಬಣ್ಣದ ಪ್ಲಾಸ್ಟಿಕ್ ತಟ್ಟೆ ಮತ್ತು ಲೋಟಗಳು. ಹೀಗೆ ನಮ್ಮ ಜೀವನ ಶೈಲಿಯಲ್ಲಿ ಸರ್ವವೂ ಪ್ಲಾಸ್ಟಿಕ್ ಮಯವಾಗಿ ಹೋಗಿರುವುದು ನಿಜಕ್ಕೂ ಆತಂಕ ಮತ್ತು ಕಳವಳಕಾರಿಯಾಗಿದೆ.

ಬೆಳಗ್ಗೆ ಎದ್ದು ಹಲ್ಲುಜ್ಜಲು ಬಳಸುವ ಬ್ರಷ್ನಿಂದ ಹಿಡಿದು, ನೀರಿಗಾಗಿ ಬಳಸುವ ಕೊಡ, ಬಕೆಟ್, ಅಡಿಗೆ ಮನೆಯಲ್ಲಿರುವ ಪಾತ್ರೆ ಪಗಡಗಳು, ಅರಿಯುವ ಒರಳು ಕಲ್ಲಿನ ಬದಲು ಪ್ಲಾಸ್ಟಿಕ್ ಮಿಕ್ಸರ್ಗಳು, ಚೆನ್ನ ಪಟ್ಟಣದ ಬಣ್ಣ ಬಣ್ಣದ ಮರದ ಆಟಿಕೆಗಳ ಜಾಗದಲ್ಲಿ ಚೀನಾ ದೇಶದಿಂದ ಆಮದಾದ ಅಗ್ಗದ ಪ್ಲಾಸ್ಟಿಕ್ ಆಟಿಕೆಗಳು, ಚರ್ಮದ ಚಪ್ಪಲಿಯ ಜಾಗದಲ್ಲಿ ಬಣ್ಣ ಬಣ್ಣದ ಪ್ಲಾಸ್ಟಿಕ್ ಶೂಗಳು ನೈಲಾನ್ ಸಾಕ್ಸಗಳು. ಮರದ ಪೆನ್ಸಿಲ್ ಮತ್ತು ಲೋಹದ ಪೆನ್ ಗಳ ಬದಲಾಗಿ ಪ್ಲಾಸ್ಟಿಕ್ ಪೆನ್ನು ಮತ್ತು ಪೆನ್ಸಿಲ್ಗಳು. ಬಟ್ಟೆಯ ಶಾಲಾ ಹಡಪದ ಬದಲಿಗೆ ಮತ್ತದೇ ಬಣ್ಣ ಬಣ್ಣದ ಪ್ಲಾಸ್ಟಿಕ್ ಸ್ಕೂಲ್ ಬ್ಯಾಗ್. ಹಿತ್ತಾಳೆ ಇಲ್ಲವೇ ಸ್ಟೀಲ್ ಊಟದ ದಬ್ಬಿಗಳ ಜಾಗದಲ್ಲಿ ತರ ತರಹದ ದುಬಾರಿ ಪ್ಲಾಸ್ಟಿಕ್ ವೇರ್ ಊಟದ ಡಬ್ಬಿಗಳು. ಇನ್ನು ಹೆಣ್ಣುಮಕ್ಕಳು ಹಾಕುವ ಚೆಪ್ಪಲಿ, ನೇತು ಹಾಕಿಕೊಳ್ಳುವ ಪರ್ಸ್, ಕೈಗೆ ಹಾಕಿಕೊಳ್ಳುವ ಬಳೆ, ತಲೆಗೆ ಹಾಕಿಕೊಳ್ಳುವ ಕ್ಲಿಪ್ಗಳು, ಮೇಕಪ್ ಮಾಡಿಕೊಳ್ಳಲು ಬಳೆಸುವ ಕಾಸ್ಮೆಟಿಕ್ ಡಬ್ಬಿ ಹೀಗೆ ಅಡಿಯಿಂದ ಮುಡಿಯವರೆಗೂ ಪ್ಲಾಸ್ಟಿಕ್. ಒಟ್ಟಿನಲ್ಲಿ ಆಡು ಮುಟ್ಟದ ಸೊಪ್ಪಿಲ್ಲ . ಪ್ಲಾಸ್ಟಿಕ್ ಇಲ್ಲದ ಜಾಗವೇ ಇಲ್ಲ ಎನ್ನುವ ಆಧುನಿಕ ಗಾದೆ ಮಾತಾಗಿದೆ.

ಇನ್ನೂ ಕೃಷಿಯಲ್ಲಂತೂ ಪ್ಲಾಸ್ಟಿಕ್ ಬಗ್ಗೆ ಹೇಳ ತೀರದು. ಗೊಬ್ಬರದ ಚೀಲದಿಂದ ಹಿಡಿದು, ಪಶು ಆಹಾರ ಚೀಲ, ಕೀಟನಾಶಕಗಳ ಕ್ಯಾನ್, ನೀರಿನ ಪೈಪ್, ಡ್ರಿಪ್ ಪೈಪ್, ಸ್ಪ್ರಿಂಕ್ಲರ್, ಜೆಟ್, ಪ್ಲಾಸ್ಟಿಕ್ ಟಾರ್ಪಾಲ್, ಕೀಟಗಳು ಮತ್ತು ಪಕ್ಷಿಗಳಿಂದ ರಕ್ಷಿಸುವ ನೆಟ್ಗಳು, ಮಣ್ಣು ತೆಗೆದು ಹಾಕಲು ಬಿದಿರಿನ ಮಂಕರಿಗಳ ಜಾಗದಲ್ಲಿ ಪ್ಲಾಸ್ಟಿಕ್ ಮೊರ ಮತ್ತು ಬುಟ್ಟಿಗಳು. ದನ ಕರುಗಳನ್ನು ಕಟ್ಟಿಹಾಕಲು ಮತ್ತು ಭಾವಿಗಳಿಂದ ನೀರು ಸೇದಲು ಬಳೆಸುತ್ತಿದ್ದ ಹಗ್ಗಗಳ ಜಾಗದಲ್ಲಿ ನೈಲಾನ್ ಹಗ್ಗಗಳು, ಚೀಲಗಳನ್ನು ಕಟ್ಟಲು ಗೋಣಿ ದಾರದ ಬದಲು ನೈಲಾನ್ ದಾರಗಳು ಹೀಗೆ ಎಲ್ಲಾ ಕಡೆಯಲ್ಲೂ ಪ್ಲಾಸ್ಟಿಕ್ ನಮ್ಮ ಬದುಕಿನಲ್ಲಿ ಆವರಿಸಿಕೊಂಡು, ಪ್ಲಾಸ್ಟಿಕ್ ಇಲ್ಲದೇ ಜೀವನವೇ ಸಾಧ್ಯವಿಲ್ಲ ಅದರ ಬದಲಿಗೆ ಬೇರೇನೂ ಬಳಸಲೂ ಸಾಧ್ಯವೇ ಇಲ್ಲ ಎನ್ನುವ ಸ್ಥಿತಿ ನಿರ್ಮಾಣವಾಗಿರುವುದು ಅತ್ಯಂತ ಕಳವಳಕಾರಿಯಾಗಿದೆ.

ಸಾಮಾನು ತರಲು ಇಲ್ಲವೇ ತರಕಾರಿ ತರಲು ಅಥವಾ ಬಟ್ಟೆಗಳನ್ನು ತರಲು ಅಂಗಡಿಗಳಿಗೆ ಹೋಗುವಾಗ ಕೈಚೀಲ ತೆಗೆದುಕೊಂಡು ಹೋಗುವ ಪದ್ಧತಿ ಎಂದೋ ಮಾಯಾವಾಗಿ ಬಿಟ್ಟಿದೆ. ಈಗ ಎಲ್ಲಾ ವಸ್ತುಗಳಿಗೂ ಒಂದೊಂದು ಬಗೆ ಬಗೆಯ ಪ್ಲಾಸ್ಟಿಕ್ ಕವರ್ ಮತ್ತು ಅವುಗಳನ್ನು ಒಟ್ಟಿಗೆ ತೆಗೆದುಕೊಂಡು ಹೋಗಲು ಮತ್ತೊಂದು ಆಕರ್ಷಕವಾದ ಬಣ್ಣ ಬಣ್ಣದ ಕ್ಯಾರಿಬ್ಯಾಗ್. ಸಾಮಾನುಗಳನ್ನು ಬಿಡಿ ಲೋಹದ ಕ್ಯಾನ್ ಇಲ್ಲವೇ ಗಾಜಿನ ಬಾಟೆಲ್ಗಳಲ್ಲಿರುತ್ತಿದ್ದ ಹಾಲು ಮೊಸರು, ತುಪ್ಪಾ ಬೆಣ್ಣೆ ಇಂದು ಪ್ಲಾಸ್ಟಿಕ್ ಕವರ್ಗಳಲ್ಲಿ ಸಿಗುವಂತಾಗಿದೆ. ನಮ್ಮಲ್ಲಿ ಹೀಗೆ ಪ್ರತಿಯೊಬ್ಬರೂ ತುದಿ ಕತ್ತರಿಸಿ ಬಳೆಸುವ ಹಾಲು ಪ್ಯಾಕೆಟ್ಗಳಿಂದಲೇ ಬೆಂಗಳೂರಿನಲ್ಲಿ ಪ್ರತಿದಿನ 50,00,000 ಪ್ಲಾಸ್ಟಿಕ್ ತುಣುಕುಗಳು ಕಸಕ್ಕೆ ಸೇರುತ್ತಿದೆ ಎನ್ನುವ ಅಂಕಿ ಅಂಶ ಅತ್ಯಂತ ಆತಂಕಕಾರಿಯಾಗಿದೆ.

ಏಲ್ಲೆಂದರೆಲ್ಲಿ ಬಿಸಾಡುವ ಪ್ಲಾಸ್ಟಿಕ್ ಕವರ್ಗಳು ಬೀಡಾಡಿ ಹಸುಗಳ ಜೀವಕ್ಕೆ ಮಾರಕವಾಗಿದೆ. ಥೈರಾಯ್ಡ್, ಅಸ್ತಮ, ಚರ್ಮ ರೋಗಗಳು, ಲೈಂಗಿಕ ದೌರ್ಬಲ್ಯ, ಹೃದಯ ಸಂಬಂಧಿತ ಖಾಯಿಲೆಗಳು ಕಡೆಗೆ ಕ್ಯಾನ್ಸರ್ ತರಹದ ಮಾರಕ ರೋಗವೂ ಪ್ಲಾಸ್ಟಿಕ್ ಕವರ್, ತಟ್ಟೆ, ಲೋಟ ಮತ್ತು ಡಬ್ಬಿಗಳನ್ನು ಬಳೆಸುವುದರಿಂದ ಬರುತ್ತದೆ ಎಂಬ ಅಂಶವು ವೈಜ್ಞಾನಿಕವಾಗಿ ಸಾಬೀತಾಗಿದೆ. ಬಿಸಿ ಬಿಸಿಯಾದ ಆಹಾರವನ್ನು ಪ್ಲಾಸ್ಟಿಕ್ ವಸ್ತುಗಳ ಮೇಲೆ ಸೇವಿಸುವುದು ಮತ್ತು ಬಹಳ ಕಾಲ ನೀರನ್ನು ಪ್ಲಾಸ್ಟಿಕ್ ಕ್ಯಾನ್ ಇಲ್ಲವೇ ಬಾಟಲ್ಗಲಲ್ಲಿ ಸಂಗ್ರಹಿಸುವುದೂ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತದೆ ಎನ್ನುವುದು ತಿಳಿದು ಬಂದಿದೆ.

ಅಗ್ಗವಾಗಿ ಮತ್ತು ಸುಲಭವಾಗಿ ತಯಾರಿಸ್ಪಡುವ ಪ್ಲಾಸ್ಟಿಕ್ ಒಮ್ಮೆ ಬಳಕೆ ಮಾಡಿದ ನಂತರ ಅದನ್ನು ನಾಶ ಮಾಡಲು ಸಾಧ್ಯವೇ ಇಲ್ಲವಾಗಿದೆ. ಈ ಪ್ಲಾಸ್ಟಿಕ್ ತ್ಯಾಜ್ಯ ಮಣ್ಣಿನಲ್ಲಿ ನೂರಾರು ವರ್ಷಗಳಾದರೂ ಕರಗದೇ ಇರುವುದರಿಂದ ಇದು ಪರಿಸರಕ್ಕೆ ಮಾರಿಯಾಗಿದೆ. ಈ ರೀತಿಯಾಗಿ ಮಣ್ಣಿನಲ್ಲಿ ಬೆರೆಯದ ಪ್ಲಾಸ್ಟಿಕ್ ನಿಂದಾಗಿಯೇ ಮಳೆಯ ನೀರು ಕೂಡ ಭೂಮಿಯ ಒಳಗೆ ಇಳಿಯದೆ, ಹಾಗೆಯೇ ಮೇಲ್ಪದರಲ್ಲಿಯೇ ಆವಿಯಾಗಿ ಇಂಗಿ ಹೋಗಿ ಅಂತರ್ಜಲ ಬತ್ತಿ ಹೋಗುವುದಕ್ಕೂ ಕಾರಣವಾಗಿದೆ (ಲೇಖನದ ಜೊತೆಗಿರುವ ಚಿತ್ರವನ್ನು ಗಮನಿಸಿ). ಹಾಗೊಂದು ವೇಳೆ ಈ ಪ್ಲಾಸ್ಟಿಕ್ ತ್ಯಾಜ್ಯವನ್ನು ನಾಶ ಪಡಿಸಲು ಬೆಂಕಿಯಿಂದ ಸುಟ್ಟಲ್ಲಿ ಅದರಿಂದ ಹೊರಹೊಮ್ಮುವ ಅನಿಲ ಮತ್ತಷ್ಟೂ ವಿಷಕಾರಿಯಾಗಿದೆ.

plastic

ಹನಿ ಹನಿ ಗೂಡಿದರೆ ಹಳ್ಳ, ತೆನೆ ತೆನೆ ಗೂಡಿದರೆ ಬಳ್ಳ ಎನ್ನುವಂತೆ ಈ ಕಾರ್ಯ ನಮ್ಮಿಂದ ಮತ್ತು ನಮ್ಮಗಳ ಮನೆಯಿಂದಲೇ ಪ್ರಾರಂಭವಾಗಲಿ. ಒಗ್ಗಟ್ಟಿನಲ್ಲಿ ಬಲವಿದೆ ಮತ್ತು ಛಲವಿದೆ. ಮನುಷ್ಯ ಒಮ್ಮೆ ಧೃಢ ನಿರ್ಧಾರ ಮಾಡಿದಲ್ಲಿ ಸಾಧಿಸಲು ಅಸಾಧ್ಯವೇ ಇಲ್ಲ. ಖಾಯಿಲೆ ಬಂದಾಗ ಚಿಕಿತ್ಸೆ ಮೂಲಕ ಸರಿಪಡಿಸಿಕೊಳ್ಳುವ ಬದಲು ಖಾಯಿಲೆಯೇ ಬಾರದಂತೆ ತಡೆಗಟ್ಟುವಿಕೆಯೇ ಉತ್ತಮವಾದ ವಿಧಾನ ಎನ್ನುವಂತೆ ನಮಗೆ ಸಾಧ್ಯವಾದಷ್ಟರ ಮಟ್ಟಿಗೆ ಪ್ಲಾಸ್ಟಿಕ್ ಬಳಕೆಯನ್ನು ಸ್ವಯಂಪ್ರೇರಿತವಾಗಿ ಕಡಿಮೆ ಮಾಡುತ್ತಾ ನಮ್ಮ ಅಕ್ಕ ಪಕ್ಕದವರಿಗೆ , ಬಂಧು ಮಿತ್ರರಿಗೆ ಇದರ ಬಗ್ಗೆ ಕಾಳಜಿ ಮೂಡಿಸುತ್ತಾ ನಮ್ಮ ಸುತ್ತ ಮುತ್ತಲಿನ ಪರಿಸರವನ್ನು ಆದಷ್ಟೂ ಪ್ಲಾಸಿಕ್ ಮುಕ್ತವನ್ನಾಗಿ ಮಾಡಬಹುದಲ್ಲವೇ? ನಮ್ಮ ಹಿರಿಯರು ನಮಗೆ ಉಳಿಸಿಹೋದ ಈ ಪರಿಸರವನ್ನು ನಾವುಗಳು ನಮ್ಮ ಮುಂದಿನ ಪೀಳಿಗೆಯವರಿಗೂ ಉಳಿಸಿಕೊಟ್ಟು ಹೋಗುವ ಜವಾಬ್ದಾರಿ ನಮ್ಮ ಮೇಲಿದೆಯಲ್ಲವೇ?

ಏನಂತೀರಿ?