ತೂಕ ಮತ್ತು ಅಳತೆ

ಅದೊಂದು ಕೋಳಿ ಅಂಗಡಿ ಇನ್ನೇನು ಅಂಗಡಿಯನ್ನು ಮುಚ್ಚಬೇಕು ಎನ್ನುವ ಸಮಯದಲ್ಲಿ ಅಂಗಡಿಗೆ ಬಂದ ಮಹಿಳೆಯೊಬ್ಬಳು ಇನ್ನೂ ಕೋಳಿ ಸಿಗುತ್ತದೆಯೇ? ಎಂದು ವಿಚಾರಿಸುತ್ತಾಳೆ.

ಕಟುಕ ತನ್ನ ಆಳವಾದ ಫ್ರೀಜರ್ ಅನ್ನು ತೆರೆದುನೋಡಿ ಅಲ್ಲಿ ಉಳಿದಿದ್ದ ಏಕೈಕ ಕೋಳಿಯನ್ನು ಹೊರತೆಗೆದು ತಕ್ಕಡಿಯಮೇಲಿಟ್ಟು 1.5 ಕೆ.ಜಿ. 🐓 ಇದೆ ಕೊಡ್ಲಾ ಎಂದು ಕೇಳುತ್ತಾನೆ.

ತಕ್ಷಣವೇ ಮಹಿಳೆಯು ಕೋಳಿಯ ಗಾತ್ರ ಮತ್ತು ಪ್ರಮಾಣವನ್ನು ನೋಡಿ, ಇದಕ್ಕಿಂತ ಸ್ವಲ್ಪ ದೊಡ್ಡದಿದ್ದರೆ ಕೋಡ್ತೀರಾ ಎಂದು ವಿನಮ್ರವಾಗಿ ಕೇಳುತ್ತಾಳೆ.

ಕೂಡಲೇ ಕಟುಕನು ಆ ಕೋಳಿಯನ್ನು ಮತ್ತೆ ತನ್ನ ಫ್ರೀಜರ್‌ ಒಳಗೆ ಇಟ್ಟಂತೆ ಮಾಡಿ, ಎನೋ ಹುಡುಕಿದವನಂತೆ ನಟಿಸಿ, ಮತ್ತದೇ ಕೋಳಿಯನ್ನು ತೆಗೆದು ತಕ್ಕಡಿಯ ಮೇಲಿಟ್ಟು, ಆಕೆಗೆ ಕಾಣಿಸದಂತೆ ತನ್ನ ಹೆಬ್ಬೆರಳನ್ನು ತಕ್ಕಡಿಯ ಮೇಲೆ ಒತ್ತಿದಾಗ ಈ ಬಾರಿ ತಕ್ಕಡಿಯಲ್ಲಿ ಅದೇ ಕೋಳಿ 2 ಕೆಜಿಯ ತೂಕ ತೋರಿಸುತ್ತದೆ.

ವಾವ್!! ಅದ್ಭುತ. ದಯವಿಟ್ಟು ನನಗೆ ಆ ಎರಡೂ ಕೋಳಿಗಳನ್ನು ಕೊಡಿ ಎಂದು ಹೇಳುತ್ತಾ, ದುಡ್ಡು ಎಷ್ಟಾಯಿತು? ಎಂದು ವಿನಮ್ರಳಾಗಿ ಕೇಳುತ್ತಾಳೆ ಆ ಮಹಿಳೆ.

ಈ ರೀತಿಯ ಪರಿಸ್ಥಿತಿಯಲ್ಲಿ, ಕಟುಕನ ಸ್ಥಿತಿ ಇಂಗು ತಿಂದ ಮಂಗನಂತಾಗಿ ತನ್ನೆಲ್ಲಾ ಕುತಂತ್ರವೂ ಕೈಕೊಟ್ಟು ಅತ್ತ ದರಿ ಇತ್ತ ಪುಲಿ ಎನ್ನುವ ಪರಿಸ್ಥಿತಿ ಉಂಟಾಗುತ್ತದೆ.

ಈಗ ಕಟುಕ, ಆಕೆಯ ಮುಂದೆ ತನ್ನ ಮುಖ ತೋರಿಸಲಾಗದೇ ತನ್ನ ಕಸಾಯಿ ಖಾನೆಯ ದೊಡ್ಡ ಆಳವಾದ ಫ್ರೀಜರ್ ಒಳಗೆ ತಲೆಯನ್ನು ಹಾಕಿಕೊಂಡು ಇಲ್ಲದ ಮೊದಲ ಕೋಳಿಯನ್ನು ಹುಡುಕುತ್ತಿದ್ದಾನೆ ಅಥವಾ ಹುಡುವಂತೆ ನಟಿಸುತ್ತಿದ್ದಾನೆ.

ಇದೇ ರೀತಿಯ ಮತ್ತೊಂದು ದೃಷ್ಟಾಂತ ಹೀಗಿದೆ.

ನಗರದಲ್ಲಿ ಅದೊಂದು ದೊಡ್ಡದಾದ ಬೇಕರಿ. ಶುಚಿ, ರುಚಿ ಮತ್ತು ಪ್ರಾಮಾಣಿಕತೆಗೆ ಬಹಳ ಪ್ರಸಿದ್ದಿ ಪಡೆದಿದ್ದ ಕಾರಣ ಅವರ ವ್ಯಾಪಾರವೂ ಜೋರಾಗಿಯೇ ಇತ್ತು. ತಮ್ಮ ಉತ್ಪನ್ನದ ಗುಣ ಮಟ್ಟವನ್ನು ಕಾಪಾಡುವ ಸಲುವಾಗಿ ಹಸನಾದ ಬೆಣ್ಣೆಯನ್ನು ಪಕ್ಕದ ಹಳ್ಳಿಯಿಂದ ನೇರವಾಗಿ ಖರೀದಿ ಮಾಡುತ್ತಿದ್ದರು. ಆ ಬೆಣ್ಣೆಯವನೂ ಸಹಾ ಬಹಳ ಪ್ರಾಮಾಣಿಕನಾಗಿದ್ದು ಅನೇಕ ವರ್ಷಗಳಿಂದ ಯಾವುದೇ ತಕರಾರು ಇಲ್ಲದೇ ಬೆಣ್ಣೆಯನ್ನು ಬೇಕರಿಗೆ ತಂದು ಕೊಡುತ್ತಿದ್ದ.

ಅದೇಕೋ ಬೇಕರಿಯವರಿಗೆ ಬೆಣ್ಣೆಯವನ ತೂಕದ ಬಗ್ಗೆ ಸ್ವಲ್ಪ ಅನುಮಾನ ಬಂದು ಅದೊಮ್ಮೆ ಪರೀಕ್ಷಿಸಿ ನೋಡಿದಾಗ ಅರ್ಧ ಕೆಜಿಯ ಬೆಣ್ಣೆಯಲ್ಲಿ 50 ಗ್ರಾಂ ಕಡಿಮೆ ಇತ್ತು. ಕುತೂಹಲದಿಂದ ಎಲ್ಲಾ ಬೆಣ್ಣೆಯ ಪೊಟ್ಟಣಗಳನ್ನೂ ಪರೀಕ್ಶಿಸಿ ನೋಡಿದಾಗ ಎಲ್ಲವೂ 50 ಗ್ರಾಂ ಕಡಿಮೆ ಇದ್ದದ್ದನ್ನು ಕಂಡು ಅವರ ಕೋಪ ನೆತ್ತಿಗೇರಿತ್ತು. ಇಷ್ಟು ವರ್ಷಗಳಿಂದ ನಂಬಿದ್ದ ವ್ಯಕ್ತಿಯೇ ಈ ರೀತಿಯಾಗಿ ತಮಗೆ ಮೋಸ ಮಾಡುತ್ತಿರುವುದನ್ನು ಕಂಡು ಬಹಳ ಬೇಸರವಾಗಿ ಕೂಡಲೇ ಪೋಲೀಸರಿಗೆ ಬೆಣ್ಣೆಯವನ ವಿರುದ್ಧ ದೂರು ದಾಖಲಿಸಿದರು.

ಇದರ ಬಗ್ಗೆ ಅರಿವಿರದ ಬೆಣ್ಣೆಯವನು ಯಥಾ ಪ್ರಕಾರ ಮಾರನೆಯ ದಿನ ಬೇಕರಿಗೆ ಬೆಣ್ಣೆಯನ್ನು ಸರಬರಾಜು ಮಾಡಲು ಬಂದಾಗ ಪೋಲೀಸರು ಆತನನ್ನು ಬಂಧಿಸಿ ವಿಚಾರಣೆಗೆ ನ್ಯಾಯಾಧೀಶರ ಬಳಿ ಕರೆದೊಯ್ದರು. ತನ್ನನ್ನು ಬಂಧಿಸಿರುವ ಕಾರಣ ತಿಳಿಯದೆ ತಬ್ಬಿಬ್ಬಾಗಿದ್ದ ಬೆಣ್ಣೆಯವನು ನ್ಯಾಯಾಧೀಶರಿಂದ ತನ್ನ ಬೆಣ್ಣೆಯಲ್ಲಿ ತೂಕದ ವೆತ್ಯಾಸದ ಕುರಿತಂತೆ ತನ್ನ ಮೇಲಿನ ಆರೋಪವನ್ನು ಕೇಳಿ ದಂಗಾಗಿ ಹೋದನು. ಒಂದು ಕ್ಷಣ ಮೌನವಾಗಿದ್ದು ನಂತರ ಸ್ವಾಮೀ ತೂಕದಲ್ಲಿ ವೆತ್ಯಾಸವಾಗಿರುವುದು ಸತ್ಯ. ಆದರೆ ಇದಕ್ಕೆ ಪ್ರತಿಯಾದ ಶಿಕ್ಷೆಯನ್ನು ನೀವು ಬೇಕರಿಯವರಿಗೇ ಕೊಡಬೇಕಾಗುತ್ತದೆ ಎಂದು ಹೇಳಿದನು.

ಅರೇ ಇದೇನಿದು? ತೂಕಕ ತಪ್ಪನ್ನು ಒಪ್ಪಿಕೊಳ್ಳುತ್ತಿದ್ದಾನೆ ಆದರೆ ಶಿಕ್ಷೆ ಮಾತ್ರಾ ಆರೋಪ ಮಾಡಿದವರಿಗೇ ಕೊಡಲು ಹೇಳುತ್ತಿದ್ದಾನಲ್ಲಾ ಎಂದು ವಿಚಿತ್ರವಾಗಿ ನೋಡಿದಾಗ, ಬೆಣ್ಣೆಯವನು ಸ್ವಾಮೀ, ಇದುವರೆಗೂ ನಾನು ತೂಕ ಹಾಕಲು ಬಳಸುತ್ತಿದ್ದ ಅರ್ಧ ಕೇಜಿಯ ತೂಕದ ಬಟ್ಟು ಕೆಲ ದಿನಗಳಿಂದ ಕಳೆದು ಹೋಗಿತ್ತು. ಹಾಗಾಗಿ ನಾನು ತೂಕದ ಬಟ್ಟಿನ ಬದಲಾಗಿ ಬೇಕರಿಯಲ್ಲಿ ತರುವ ಅರ್ಧಕೇಜಿ ಕೇಕ್ ಇಟ್ಟು ತೂಕ ಮಾಡುತ್ತಿದ್ದೆ. ಈಗ ನನ್ನ ಬೆಣ್ಣೆಯ ತೂಕದಲ್ಲಿ ವೆತ್ಯಾಸವಿದೆ ಎಂದಲ್ಲಿ ಬೇಕರಿಯ ಕೇಕನ್ನೂ ಕೂಡಾ ತೂಕ ಮಾಡಬೇಕೆಂದು ಕೋರಿಕೊಳ್ಳುತ್ತಾನೆ.

ಪ್ರತ್ಯಕ್ಷಿಸಿ ನೋಡಿದರೂ, ಪ್ರಮಾಣಿಸಿ ನೋಡು ಎನ್ನುವ ತತ್ವದಡಿಯಲ್ಲಿ ನ್ಯಾಯಾಧೀಶರು, ಬೇಕರಿಯ ಕೇಕ್ ಮತ್ತು ತೂಕದ ತಕ್ಕಡಿಯನ್ನು ತರಿಸಿ ಕೇಕನ್ನು ತೂಗಿ ನೋಡಿದಾಗ ಅರ್ಧ ಕೇಜಿಯ ಬದಲಾಗಿ ಅದು ಕೇವಲ 450/- ಗ್ರಾಂ ಇದ್ದು 50ಗ್ರಾಂ ಕಡಿಮೆ ಇರುತ್ತದೆ. ಇದನ್ನು ಗಮನಿಸಿದ ಬೇಕರಿಯ ಮಾಲಿಕ ತಾನೇ ತೋಡಿದ ಗುಂಡಿಗೆ ತಾನೇ ಬೀಳಬೇಕಾಯಿತಲ್ಲಾ ಎಂದು ತನ್ನ ಹಳಿಯುತ್ತಾ ಬೆಬ್ಬೆಬ್ಬೇ ಎಂದು ನ್ಯಾಯಾಧೀಶರ ಮುಂದೆ ತಡವರಿಸುತ್ತಾನೆ.

ಈ ಎರಡೂ ಪ್ರಸಂಗಗಳನ್ನು ಗಮನಿಸಿದಲ್ಲಿ, ಎಲ್ಲಿಯವರೆಗೂ ಮೋಸ ಹೋಗುವ ಅಮಾಯಕರು ಇರುತ್ತಾರೋ ಅಲ್ಲಿಯವರೆಗೂ ಮೋಸ ಮಾಡುವವರು ಇದ್ದೇ ಇರುತ್ತಾರೆ. ಆದರೆ ಈಗ ಕಾಲ ಮುಂಚಿನಂತಿರದೇ ಗ್ರಾಹಕರು ಎಚ್ಚೆತ್ತು ಕೊಂಡಿರುವ ಕಾರಣ ಮುಂಚಿನಂತೆ ಸುಲಭವಾಗಿ ಮೋಸ ಮಾಡಲು ಅಸಾಧ್ಯವಾಗಿದೆ. ಹಾಲು ಕುಡಿದ ಮಕ್ಕಳೇ ದಕ್ಕೋದಿಲ್ಲ ಇನ್ನು ವಿಷ ಕುಡಿಸಿದ ಮಕ್ಕಳು ದಕ್ಕುತ್ತಾರಾ?

ಏನಂತೀರೀ?

ಸಾಮಾಜಿಕ ಜಾಲತಾಣ ಮತ್ತು ಬಹಳ ಹಿಂದೆ ಓದಿದ ಸಂದೇಶಗಳ ಭಾವಾನುವಾದವಾಗಿದೆ.

ಮಸಾಲೇ ದೋಸೆ

ದೋಸೆ ಎಂದ ತಕ್ಶಣ ನಮ್ಮೆಲ್ಲರ ಮನದಲ್ಲಿ ಥಟ್ ಅಂತಾ ಮೂಡೋದೇ, ಮಸಾಲೇ ದೋಸೆ. ಈಗ ಇರೋ ಬೇಲೆ ನೋಡಿದರೆ ಹೋಟೆಲ್ಗಳಿಗೆ ಹೋಗಿ ಹೊಟ್ಟೇ ತುಂಬಾ ದೋಸೆ ತಿನ್ನೋದು ಸಾಧ್ಯವೇ ಇಲ್ಲದ ಮಾತು. ಇನ್ನು ಮಸಾಲೇ ದೋಸೆಗೆ ರುಚಿ ಕೊಡೋದೇ ಒಳಗೆ ಹಾಕೋ ಕೆಂಪು ಚೆಟ್ನಿ, ಆದರೆ ಇತ್ತೀಚಿನ ದಿನಗಳಲ್ಲಿ ಬಹುತೇಕರು ಕೆಂಪು ಚೆಟ್ನಿ ಮಾಡೋದೇ ಇಲ್ಲ. ಅದರ ಬದಲಾಗಿ ಚೆಟ್ನೀ ಪುಡಿಯನ್ನು ಉದುರಿಸಿಕೊಡುತ್ತಾರಾದರೂ, ಮಸಾಲೇ ದೋಸೆ ರುಚಿ ಬರೋದಿಲ್ಲ. ಅದಕ್ಕಾಗಿಯೇ ದೋಸೆಗಳ ರಾಜ ಮಸಾಲೇ ದೋಸೆಯನ್ನು ಸಾಂಪ್ರದಾಯಿಕವಾಗಿ ಮತ್ತು ಧಿಡೀರ್ ಆಗಿ ಮನೆಯಲ್ಲಿಯೇ ತಯಾರಿಸಿಕೊಳ್ಳುವುದನ್ನು ಸವಿವರವಾಗಿ ವಿವರಿಸಿದ್ದೇನೆ.

ಸಾಂಪ್ರದಾಯಿಕವಾದ ಸುಮಾರು 12-15 ಮಸಾಲೇ ದೋಸೆ ತಯಾರಿಸಲು ಬೇಕಾಗುವ ಸಾಮಾಗ್ರಿಗಳು

  • ದೋಸೆ /ಪೊನ್ನಿ ಅಕ್ಕಿ – 3 ಲೋಟ
  • ಉದ್ದಿನ ಬೇಳೆ – 1ಲೋಟ
  • ಗಟ್ಟಿ ಅವಲಕ್ಕಿ – 1/2 ಲೋಟ
  • ಕಡಲೇಬೇಳೆ – 1/4 ಲೋಟ
  • ಮೆಂತ್ಯ – 1 ಚಮಚ
  • ಎಣ್ಣೆ ಎರಡು ದೊಡ್ಡ ಚಮಚ
  • ರುಚಿಗೆ ತಕ್ಕಷ್ಟು ಉಪ್ಪು

ದೋಸೆ ಹಿಟ್ಟನ್ನು ತಯಾರಿಸಿಕೊಳ್ಳುವ ವಿಧಾನ

  • ಅಕ್ಕಿ, ಉದ್ದಿನ ಬೇಳೆ , ಕಡಲೇ ಬೇಳೆ ಮತ್ತು ಮೆಂತೆಯನ್ನು ಚೆನ್ನಾಗಿ ತೊಳೆದು ಬೆಳ್ಳಿಗ್ಗೆ ನೀರಿನಲ್ಲಿ ಬೇರೆ ಬೇರೆಯಾಗಿ ನೆನೆಸಬೇಕು.
  • ನೆನೆಸಿಟ್ಟ ಪದಾರ್ಥಗಳನ್ನು ರುಬ್ಬಿಕೊಳ್ಳುವ ೧೦ ನಿಮಿಷಗಳಿಗಿಂತ ಮುಂಚೆ ಅವಲಕ್ಕಿಯನ್ನು ನೀರಿನಲ್ಲಿ ನೆನೆಸಬೇಕು.
  • ಸಂಜೆಯ ವೇಳೆಗೆ ಉದ್ದಿನ ಬೇಳೆಯನ್ನು ಮೊದಲು ಚೆನ್ನಾಗಿ ರುಬ್ಬಿಕೊಂಡು ಆದದ ನಂತರ ಅದಕ್ಕೆ ಮೆಂತ್ಯ, ಕಡಲೇಬೇಳೆ (ದೋಸೆ ಹೊಂಬಣ್ಣ ಬರಲು) ಮತ್ತು ಅಕ್ಕಿಯನ್ನು ಸೇರಿಸಿ ರುಬ್ಬಿ, ಸ್ವಲ್ಪ ನುಣ್ಣಗಾಗುವ ಸಮಯದಲ್ಲಿಯೇ ಅದಕ್ಕೆ ನೆನಸಿದ ಅವಲಕ್ಕಿಯನ್ನೂ ಸೇರಿಸಿ ರುಬ್ಬಿಕೊಳ್ಳಬೇಕು.
  • ರುಬ್ಬಿಟ್ಟು ಕೊಂಡ ಹಿಟ್ಟನ್ನು ಒಂದು ಪಾತ್ರೆಯಲ್ಲಿ ಹಾಕಿ ತಟ್ಟೆ ಮುಚ್ಚಿಟ್ಟಲ್ಲಿ ಬೆಳಗಾಗುವಷ್ಟರಲ್ಲಿ ಹಿಟ್ಟಿನಲ್ಲಿ ಈಸ್ಟ್ ಫಾರ್ಮಾಗಿ ಚೆನ್ನಾಗಿ ಹುದುಗು ಬಂದಿರುತ್ತದೆ
  • ದೋಸೆ ಹುಯ್ಯುವ ಮೊದಲು ದೊಸೆ ಸರಾಗವಾಗಿ ಹುಯ್ಯಲು ಆಗುವಷ್ಟು ನೀರು ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಬೆರೆಸಿ ಸ್ವಲ್ಪ ಹೊತ್ತು ಗೊಟಾಯಿಸಿದಲ್ಲಿ ದೋಸೆ ಹುಯ್ಯಲು ಹಿಟ್ಟು ಸಿದ್ಧವಾಗಿರುತ್ತದೆ.

ಆಲೂಗೆಡ್ಡೆ ಪಲ್ಯಕ್ಕೆ ಬೇಕಾಗುವ ಸಾಮಗ್ರಿಗಳು

alupalya1

  • ದೂಡ್ಡ ಗಾತ್ರದ ಆಲೂಗೆಡ್ಡೆ 4-5
  • ದೊಡ್ಡ ಗಾತ್ರದ ಈರುಳ್ಳಿ 1-2
  • ಹಸೀಮೆಣಸಿಕಕಾಯಿ 4-5
  • ತೆಂಗಿನ ಕಾಯಿ ತುರಿ 1/4 ಕಪ್
  • ಶುಂಠಿ 1 ಚಮಚ
  • ಕತ್ತರಿಸಿದ ಕೊತ್ತಂಬರಿ 1/2ಕಪ್
  • ಬೆಳ್ಳುಳ್ಲಿ ಎಸಳು 3-4 ( ಐಚ್ಚಿಕ)
  • ಕರಿಬೇವು
  • ಕಡಲೇ ಬೇಳೆ 1 ಚಮಚ
  • ಊದ್ದಿನ ಬೇಳೆ 1 ಚಮಚ
  • ಸಾಸಿವೆ 1/2 ಚಮಚ
  • ಚಿಟಿಕೆ ಇಂಗು
  • ಚಿಟಿಕೆ ಅರಿಶಿನ ಪುಡಿ
  • ರುಚಿಗೆ ತಕ್ಕಷ್ಟು ಉಪ್ಪು

ಆಲೂಗೆಡ್ಡೆ ಪಲ್ಯ ಮಾಡುವ ವಿಧಾನ

  • ಆಲೂಡೆಡ್ಡೆಯನ್ನು ಚೆನ್ನಾಗಿ ತೊಳೆದು ಕೊಂಡು ಸಿಪ್ಪೆಯನ್ನು ಸುಲಿದು, ನಾಲ್ಕು ಭಾಗಗಳನ್ನಾಗಿ ಮಾಡಿಕೊಂಡು ಸ್ವಲ್ಪ ಉಪ್ಪು ಬೆರೆಸಿ ಕುಕ್ಕರ್ ನಲ್ಲಿ ಮೂರ್ನಾಲ್ಕು ವಿಶಿಲ್ ಬರುವಷ್ತು ಹೊತ್ತು ಬೇಯಿಸಿಕೊಂಡು, ಆರಿದ ನಂತರ ನೀರನ್ನು ಬಗ್ಗಿಸಿಕೊಂಡು ಆಲೂಗೆಡ್ಡೆ ಸಣ್ಣ ಸಣ್ನ ಹೋಳುಗಳಾಗುವಷ್ಟರ ಮಟ್ಟಿಗೆ ಪುಡಿ ಮಾಡಿಕೊಳ್ಳಬೇಕು.
  • ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಚೆನ್ನಾಗಿ ಸಿಪ್ಪೆ ಸುಲಿದು ಸಣ್ಣದಾಗಿ ಹೆಚ್ಚಿಟ್ಟು ಕೊಳ್ಳಬೇಕು,
  • ದಪ್ಪ ತಳದ ಬಾಣಲೆಯಲ್ಲಿ ಎರಡು ಚಮಚ ಎಣ್ಣೆಯನ್ನು ಕಾಯಿಸಿ ಅದಕ್ಕೆ ಸಾಸಿವೆ ಹಾಕಿ ಚಟ ಪಟ ಎಂದು ಸಿಡಿದ ನಂತರ, ಕರಿಬೇಬು ಸೊಪ್ಪನ್ನು ಹಾಕಿದ ನಂತರ, ಕಡಲೇಬೇಳೆ ಮತ್ತು ಉದ್ದಿನಬೇಳಿ ಹಾಕಿ ಚೆನ್ನಾಗಿ ಕೆಂಪಗೆ ಬರುವವರೆಗೂ ಹುದಿಯಬೇಕು
  • ಸಣ್ಣಗೆ ಕತ್ತರಿಟ್ಟ ಈರುಳ್ಳಿಯನ್ನು ಒಗ್ಗರಣೆಗೆ ಹಾಕಿ, ಈರುಳ್ಳಿ ಕಂದು ಬರುವ ವರೆಗೂ ಹುರಿದುಕೊಳ್ಳಬೇಕು
  • ಆರೋಗ್ಯದ ದೃಷ್ಟಿಯಿಂದಲೂ ಮತ್ತು ರುಚಿಯನ್ನು ಹೆಚ್ಚಿಸಲು ತುರಿದಿಟ್ಟ ಶುಂಠಿ ಮತ್ತು ಸಣ್ಣಗೆ ಹೆಚ್ಚಿದ ಇಲ್ಲವೇ ಜೆಜ್ಜಿದ ಬೆಳ್ಳುಳ್ಳಿಯನ್ನು ಒಗ್ಗರಣೆಗೆ ಹಾಕಿ ಸ್ವಲ್ಪ ಹೊತ್ತು ಬಾಡಿಸಿಕೊಳ್ಳಬೇಕು
  • ಚಿಟುಕಿ ಅರಿಶಿನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಒಗ್ಗರಣೆಗೆ ಸೇರಿಸಿ, ಬೇಯಿಸಿ, ಸಣ್ಣ ಸಣ್ಣ ಹೋಳುಗಳಾಗಿ ಮಾಡಿಕೊಂಡಿದ್ದ ಆಲೂಗೆಡ್ಡೆಯನ್ನು ಒಗ್ಗರಣೆಗೆ ಸೇರಿಸಿ ಚೆನ್ನಾಗಿ ೮-೧೦ ನಿಮಿಷಗಳ ಕಾಲ ಬಾಡಿಸಿದಲ್ಲಿ ರುಚಿ ರುಚಿಯಾದ ಆಲೂಗೆಡ್ಡೆ ಪಲ್ಯ ಸಿದ್ದ
  • ತುರಿದಿಟ್ಟು ಕೊಂಡಿದ್ದ ತೆಂಗಿನ ತುರಿ ಮತ್ತು ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಪಲ್ಯಕ್ಕೆ ಬೇರಿಸದಲ್ಲಿ ಪಲ್ಯದ ರುಚಿಯೂ ಇಮ್ಮಡಿಯಾಗುತ್ತದೆ.

ಕೆಂಪು ಖಾರ ಚೆಟ್ನಿ ಮಾಡಲು ಬೇಕಾಗುವ ಸಾಮಗ್ರಿಗಳು

alupalya1

  • ತುರಿದ ಒಣ ಕೊಬ್ಬರಿ 1/2 ಕಪ್
  • ಒಣ ಮೆಣಿನಕಾಯಿ 6-8
  • ಬೆಲ್ಲ 2 ಚಮಚ
  • ಜೀರಿಗೆ 1/2 ಚಮಚ
  • ಈರುಳ್ಳಿ 1
  • ಬೆಳ್ಲುಳ್ಳಿ 4-5 ಎಸಳು
  • ಹುಣಸೇಹಣ್ಣು ನಿಂಬೇಹಣ್ಣಿನ ಗಾತ್ರದ್ದು
  • ಕೊತ್ತಂಬರಿ ಸೊಪ್ಪು
  • ಅಡುಗೆ ಎಣ್ಣೆ 1 ಸ್ಪೂನ್
  • ರುಚಿಗೆ ತಕ್ಕಷ್ಟು ಉಪ್ಪು

ಕೆಂಪು ಖಾರ ಚೆಟ್ನಿ ಮಾಡುವ ವಿಧಾನ

  • ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆಹಾಕಿ ಕಾದ ನಂತರ ಅದಕ್ಕೆ ಜೀರಿಗೆ ಹಾಕಿಕೊಂಡು ಬಾಡಿಸಿಕೊಂಡ ನಂತರ ಒಣಮೆಣಸಿನಕಾಯಿಯನ್ನು ಹಾಕಿ ಬಾಡಿಸಿಕೊಳ್ಳಬೇಕು
  • ಒಗ್ಗರಣೆ ಆರಿದ ನಂತರ, ಮೇಲೆ ಹೇಳಿದ ಎಲ್ಲಾ ವಸ್ತುಗಳೊಂದಿಗೆ ಒಗ್ಗರಣೆಯನ್ನೂ ಸೇರಿಸಿ, ಸ್ವಲ್ಪವೇ ನೀರು ಹಾಕಿ ನುಣ್ಣಗೆ ಗಟ್ಟಿಯಾಗಿ ರುಬ್ಬಿಕೊಂಡಲ್ಲಿ ಮಸಾಲೆ ದೋಸೆಗೆ ಒಳಗೆ ಹಾಕುವ ಕೆಂಪು ಚೆಟ್ನಿ ಸಿದ್ದ.

ಮಸಾಲೆ ದೋಸೆ ಮಾಡುವ ವಿಧಾನ

masale5

  • ಒಲೆಯ ಮೇಲೆ ಕಾವಲಿಯನ್ನು ಬಿಸಿಯಾಗಲು ಇಟ್ಟು ಒಂದು ಚಮಚ ಎಣ್ಣೆಯನ್ನು ಹಾಕಿ ಅರ್ಧ ಹೆಚ್ಚಿದ ಈರುಳ್ಳಿಯಲ್ಲಿ ಕಾವಲಿಯನ್ನು ಸವರಿದಲ್ಲಿ ದೋಸೆಯು ಗರಿಗರಿಯಾಗುತ್ತದೆ ಮತ್ತು ಕಾವಲಿಗೆ ಹಿಟ್ಟು ಅಷ್ಟಾಗಿ ಅಂಟಿಕೊಳ್ಳುವುದಿಲ್ಲ.
  • ಕಾವಲಿ ಕಾದ ಮೇಲೆ ಸ್ವಲ್ಪ ತೆಳುವಾಗಿ ಹಿಟ್ಟನ್ನು ಹುಯ್ದು , ಸ್ವಲ್ಪ ಬೆಂದ ಮೇಲೆ ರುಚಿಹೆಚ್ಚಿಸಲು ಸ್ವಲ್ಪ ಎಣ್ಣೆಯನ್ನು ಹಾಕಬೇಕು.
  • ದೋಸೆ ಅರ್ಧ ಬೆಂದ ಮೇಲೆ ಮಾಡಿಟ್ಟುಕೊಂಡ ಒಂದು ಚಮಚ ಕೆಂಪು ಚೆಟ್ನಿಯನ್ನು ದೋಸೆಯ ಮೇಲೆ ಸವರಿ ಸ್ವಲ್ಪ ಕಾಲ ಚೆನ್ನಾಗಿ ಬೇಯಿಸಬೇಕು.
  • ಈಗ ಮೂರು ಚಮಚ ಆಲೂಗೆಡ್ಡೆ ಪಲ್ಯವನ್ನು ಬೆಂದ ದೋಸೆಯೊಳಗೆ ಹಾಕಿ ಆರ್ಧ ನಿಮಿಷ ಬೇಯಿಸಿ ನಂತರ ದೋಸೆಯನ್ನು ಅರ್ಧಭಾಗ ಮುಚ್ಚುವಂತೆ ಮಗುಚಿಹಾಕಿ ತಟ್ಟೆಯಲ್ಲಿ ಹಾಕಿಕೊಟ್ಟಲ್ಲಿ ಗರಿಗರಿಯಾದ ರುಚಿಯಾದ ಮಸಾಲೇ ದೋಸೆ ಸಿದ್ದ

ಮನೆಯಲ್ಲಿ ರುಬ್ಬಿಕೊಳ್ಳುವ ವ್ಯವಸ್ಥೆ ಇಲ್ಲಾ ಎನ್ನುವಂತಹವರು ದಿಢೀರ್ ಮಸಾಲೇ ದೋಸೆ ಹಿಟ್ಟನ್ನು ಹೀಗೂ ತಯಾರಿಸಿಕೊಳ್ಳಬಹುದು

ದಿಢೀರ್ ಮಸಾಲೇ ದೋಸೆ ಹಿಟ್ಟನ್ನು ತಯಾರಿಸಲು ಬೇಕಾಗುವ ಪದಾರ್ಥಗಳು

  • ಅಕ್ಕಿ ಹಿಟ್ಟು 3 ಕಪ್
  • ಹುರಿಗಡಲೆ ಹಿಟ್ಟು, 1 ಕಪ್
  • ಗೋಧಿ ಹಿಟ್ಟು 1 ಕಪ್
  • ಹುಳಿ ಮೊಸರು 1 ಕಪ್
  • ಚಿಟಕಿ ಅಡುಗೆ ಸೋಡಾ
  • ರುಚಿಗೆ ತಕ್ಕಷ್ಟು ಉಪ್ಪು

ದಿಢೀರ್ ಮಸಾಲೇ ದೋಸೆ ಹಿಟ್ಟು ತಯಾರಿಸುವ ವಿಧಾನ

  • ಅಕ್ಕಿ ಹಿಟ್ಟು, ಹುರಿಗಡಲೆ ಹಿಟ್ಟು ಮತ್ತು ಗೋಧಿ ಹಿಟ್ಟು ಈ ಮೂರನ್ನು ಒಂದು ಪಾತ್ರೆಯಲ್ಲಿ ಹಾಕಿ ಅದಕ್ಕೆ ಎರಡು ಲೋಟ ನೀರನ್ನು ಸೇರಿಸಿ ಗಂಟು ಬಾರದಂತೆ ಚೆನ್ನಾಗಿ ಕಲೆಸಿಕೊಳ್ಳಬೇಕು. ನಂತರ ಅದಕ್ಕೆ ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಚಿಟುಕೆ, ಸೋಡಪುಡಿ ಮತ್ತು ಹುಳಿ ಮೊಸರು ಸೇರಿಸಿ ಚೆನ್ನಾಗಿ ಗೊಟಾಯಿಸಿ 10-15 ನಿಮಿಷಗಳಷ್ಟು ಹೊತ್ತು ಇಟ್ಟಲ್ಲಿ ದಿಢೀರ್ ಮಸಾಲೇ ದೋಸೇ ಹಿಟ್ಟು ಸಿದ್ದ.
  • ಮೇಲೆ ತಿಳಿಸಿದಂತೆ ಆಲೂಗೆಡ್ಡೆ ಪಲ್ಯ ಮತ್ತು ಕೆಂಪು ಚೆಟ್ನಿಯನ್ನು ತಯಾರಿಸಿಕೊಂಡು ಅಲ್ಲಿ ವಿವರಿಸಿದಂತೆಯೇ ಬಿಸಿಯಾದ ಕಾವಲಿಮೇಲೆ ದೋಸೆ ಹುಯ್ದು ಅದಕ್ಕೆ ಕೆಂಪು ಚೆಟ್ನಿ ಮತ್ತು ಅಲೂಗೆಡ್ಡೆ ಪಲ್ಯ ಸೇರಿಸಿದಲ್ಲಿ ದಿಡೀರ್ ಮಸಾಲೆ ದೋಸೆ ಸಿದ್ದ.

ಈ ಮಸಾಲೇ ದೋಸೆಯ ಜೊತೆಗೆ ಮನೆಯಲ್ಲಿ ಮಾಡಿದ ಬೆಣ್ಣೆ , ಕಾಯಿ ಚೆಟ್ನಿ ಮತ್ತು ಈರುಳ್ಳೀ ಸಾಂಬಾರ್ ಇದ್ದರಂತೂ ಸ್ವರ್ಗಕ್ಕೆ ಮೂರೇ ಗೇಣು .

ದೋಸೆಗಳ ರಾಜ, ಮಸಾಲೇ ದೋಸೆಯನ್ನು ಸಾಂಪ್ರದಾಯಿಕವಾಗಿಯೂ ಮತ್ತು ದಿಢೀರ್ ಆಗಿಯೂ ಮಾಡುವ ವಿಧಾನವನ್ನು ತಿಳಿಸಿಕೊಟ್ಟಿದ್ದೇವೆ.

ಓದ್ಕೋಳ್ಳಿ , ಮಾಡ್ಕೋಳ್ಳಿ, ತಿಂದ್ಕೋಳ್ಳಿ

ಏನಂತೀರೀ?

ಮದದಾಳದ ಮಾತು : ಮನೆಯಲ್ಲಿ ಈ ರೀತಿಯಾಗಿ ಎಷ್ಟೇ, ಶುಚಿ ರುಚಿಯಾಗಿ, ಆರೋಗ್ಯಕರವಾಗಿ ಮಸಾಲೇ ದೋಸೆ ಮಾಡಿದರೂ ಅದೇಕೋ ಏನೋ ಯಾವುದೇ ಸಣ್ಣ ಹೊಟೆಲ್ಲಿನಲ್ಲಿ ಮಾಡಿದಂತಹ ರುಚಿ ಬರುವುದೇ ಇಲ್ಲ ಎನ್ನುವುದು ಬಹುತೇಕರ ಅಳಲು. ಬಹುಶಃ ಅವರು ಬಳೆಸುವ ತೆಳುವಾದ ಅಗಲವಾದ ಕಾವಲಿ ಮತ್ತು ಆವರು ಎಗ್ಗಿಲ್ಲದೆ ಸುರಿಯುವ ಎಣ್ಣೆ ಹೆಚ್ಚು ರುಚಿಕೊಡಬಹುದೇನೋ? ಆರೋಗ್ಯದ ಹಿತದೃಷ್ಠಿಯಿಂದ ನೋಡಿದಲ್ಲಿ ಮನೆಯಲ್ಲಿ ಮಾಡಿಕೊಂಡು ತಿನ್ನುವುದೇ ಉತ್ತಮ.

ಬಾಗೇಪಲ್ಲಿ, ಚಿಕ್ಕಬಳ್ಳಾಪುರ ಚಿಂತಾಮಣಿ ಮತ್ತು ಶಿಡ್ಲಗಟ್ಟ ಕಡೆಯ ಕೆಲವು ಹೋಟೆಲ್ಗಳಲ್ಲಿ ಈಗಲೂ ಆಲೂಗೆಡ್ಡೆ ಪಲ್ಯದ ಬದಲಾಗಿ ಈರುಳ್ಳಿ, ಬೆಳ್ಳುಳ್ಳಿ ಮತ್ತು ಗರಂ ಮಸಾಲ ಹಾಕಿದ ರುಚಿಕರವಾದ ಚಿತ್ರಾನ್ನ ಹಾಕಿ ಮಸಾಲೇ ದೋಸೆ ಮಾಡಿಕೊಡುತ್ತಾರೆ. ಅದರ ರುಚಿಯನ್ನೊಮ್ಮೆ ಒಮ್ಮೆ ಹತ್ತಿತೆಂದರೆ ಮಸಾಲೇ ದೋಸೆಗೆ ಆಲೂಗೆಡೆ ಪಲ್ಯವೇ ಬೇಡ. ಚಿತ್ರಾನ್ನವೇ ಬೇಕು ಅಂತಾ ಹೇಳೋದಂತೂ ಖಂಡಿತ.