ಮತ್ತೆ ಮುದುಡಿತು ಕೈ , ಮತ್ತೊಮ್ಮೆ ಅರಳಿತು ಕಮಲ.

ಕಳೆದ ಎರಡು ತಿಂಗಳುಗಳಲ್ಲಿ , ಇಡೀ ವಿಶ್ವದ ಚಿತ್ತ ನಮ್ಮ ದೇಶದತ್ತ ಇತ್ತು. ಕಾರಣ, ವಿಶ್ವದಲ್ಲೇ ಅತ್ಯಂತ ದೊಡ್ಡ ಪ್ರಜಾಪ್ರಭುತ್ವ ದೇಶದ ಸಾರ್ವತ್ರಿಕ ಚುನಾವಣೆ ನಡೆಯುತ್ತಲಿತ್ತು. ಬಹುಶಃ ಪ್ರಪಂಚದ ಅತ್ಯಂತ ದೀರ್ಘಕಾಲದ ಮತ್ತು ಅತ್ಯಂತ ಹೆಚ್ಚಿನ
ಕ್ಷೇತ್ರಗಳು ಮತ್ತು ಮತದಾರರು ಪಾಲ್ಗೊಂಡ ಚುನಾವಣೆ ಎಂದರೆ ಇದುವೇ ಇರಬೇಕು.

2014 ರಲ್ಲಿ UPA-1 ಮತ್ತು UPA-2ರ ದುರಾಡಳಿತ ಮತ್ತು ಭ್ರಷ್ಟಾಚಾರದಿಂದ ಬೇಸತ್ತಿದ್ದ ಭಾರತೀಯರಿಗೆ ತಮ್ಮ ದೇಶವನ್ನು ಮುನ್ನಡೆಸಲು ಕಾಣಿಸಿದ ಏಕೈಕ ಆಶಾಕಿರಣವೆಂದರೆ ನರೇಂದ್ರ ದಾಮೋದರ್ ದಾಸ್ ಮೋದಿ. ಅರ್ಥಾತ್ ನರೇಂದ್ರ ಮೋದಿ ಎಲ್ಲರ ಪ್ರೀತಿಯ ಮೋದಿಜೀ. NDA ಎಂಬ ಹೆಸರಿನಲ್ಲಿ ಕೆಲವು ಪಕ್ಷದೊಡನೆ ಚುನಾವಣಾ ಪೂರ್ವ ಮೈತ್ರಿಮಾಡಿಕೊಂಡು ಎಲ್ಲರ ನಿರೀಕ್ಷೇಗೂ ಮೀರಿ ಪ್ರಪ್ರಥಮ ಬಾರಿಗೆ ಸ್ವಸಾಮರ್ಥ್ಯದಿಂದ ಬಹುಮತದೊಂದಿಗೆ ಸಂಸತ್ ಭವನಕ್ಕೆ ಸಾಷ್ಟಾಂಗ ನಮಸ್ಕಾರ ಮಾಡಿದ ಭವನ ಪ್ರವೇಶಿಸಿದ ಮೋದಿಯವರ ಸರ್ಕಾರ ಅಧಿಕಾರಕ್ಕೆ ಬಂದಾಗ, ಜನರ ನೀರೀಕ್ಷೆಗಳು ಅಪಾರ. ಕಾಂಗ್ರೇಸ್ಸಿನ ಕಳೆದ 60 ವರ್ಷಗಳಲ್ಲಿ ಮಾಡಲು ಸಾಧ್ಯಾವಾಗದಿದ್ದನ್ನು ಮೋದಿಯವರ ಸರ್ಕಾರ ಕೇವಲ 5 ವರ್ಷಗಳಲ್ಲಿ ಸಾಧಿಸಿ ತೋರಿಸಬೇಕೆಂಬ ಬಯಕೆ ಜನರದ್ದು. ಜನರ ನಿರೀಕ್ಶೆಯಷ್ಟಿಲ್ಲದ್ದಿದ್ದರೂ ದೇಶದ ಪ್ರಸಕ್ತ ಪರಿಸ್ಥಿತಿಗೆ ಅನುಗುಣವಾಗಿ ಐದು ವರ್ಷಗಳ ದಕ್ಷ ಭ್ರಷ್ಟಾಚಾರ ರಹಿತ ಆಡಳಿತ ನಡೆಸುತ್ತಾ, ದೇಶದಲ್ಲಿ ಒಂದರ ಮೇಲೊಂದು ರಾಜ್ಯಗಳಲ್ಲಿ ಅಧಿಕಾರ ಪಡೆದು ನಾಗಾಲೋಟದಿಂದ ಸಾಗುತ್ತಿದ್ದದ್ದು ವಿರೋಧಿಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ್ದಂತು ಸುಳ್ಳಲ್ಲ. ಇದು ಹೀಗೆಯೇ ಮುಂದುವರಿದರೆ, ಮುಂದೆಂದೂ ತಾವು ಅಧಿಕಾರಕ್ಕೆ ಬರುವುದಿರಲೀ, ಅಧಿಕಾರದ ಕನಸನ್ನೂ ಕಾಣಲು ಸಾಧ್ಯವಿಲ್ಲ ಎಂಬುದನ್ನು ಅರಿತ ಎಲ್ಲಾ ವಿರೋಧಿಗಳು ಮೋದಿಯವರ ಮೇಲೆ ಮುಗಿಬಿದ್ದವು. ಹಾಗೆ ಮುಗಿಬಿದ್ದ ವಿರೋಧಿಗಳಲ್ಲಿ ಯಾವುದೇ ಸೈದ್ಧಾಂತಿಕ ಕಾರಣಗಳಿರದೇ ಅದು ಕೇವಲ ಸ್ವಾರ್ಥಕಷ್ಟೇ ಮೀಸಲಾಗಿದ್ದದ್ದು ನಿಜಕ್ಕೂ ವಿಪರ್ಯಾಸ. ಅದರಲ್ಲೂ ಕಾಂಗ್ರೇಸ್ ಪಕ್ಷ ವಿನಾಕಾರಣ ಪ್ರಧಾನಿಗಳ ಮೇಲೆ ವಯಕ್ತಿಕ ದಾಳಿ ಮಾಡತೊಡಗಿತು. ಇಲ್ಲ ಸಲ್ಲದ ಸುಳ್ಳಾರೋಪಗಳನ್ನು ಮಾಡುತ್ತಾ ಸಾವಿರ ಸುಳ್ಳಿನ್ನೇ ಹೇಳಿ ಅದನ್ನೇ ನಿಜವನ್ನಾಗಿ ಮಾಡಿಸುವ ಗೋಬೆಲ್ಸ್ ತಂತ್ರಕ್ಕೆ ಶರಣಾಗಿದ್ದು ನಿಜಕ್ಕೂ ದುಃಖಕರವೇ ಸರಿ.

ಇದಕ್ಕೆ ತಕ್ಕಂತೆ, ರಾಜಾಸ್ಥಾನ, ಮಧ್ಯಪ್ರದೇಶ ಮತ್ತು ಛತ್ತೀಸ್ ಘಡದಲ್ಲಿ ದೀರ್ಘಕಾಲದ ಆಡಳಿತ ವಿರೋದಿ ಅಲೆಯಿಂದ ಅತ್ಯಂತ ಕಡಿಮೆ ಅಂತರದಲ್ಲಿ ಬಿಜೆಪಿ ಅಧಿಕಾರ ಕಳೆದುಕೊಂಡು ಕಾಂಗ್ರೇಸ್ ಅಧಿಕಾರ ಪಡುದುಕೊಂಡ ಮೇಲಂತೂ ಕಾಂಗ್ರೇಸ್ ಪಕ್ಷ ಮತ್ತದರ ನಾಯಕರ ತಲೆ ಭೂಮಿ ಮೇಲೆ ನಿಲ್ಲಲೇ ಇಲ್ಲ. ಮೋದಿಯವರ ಐದು ವರ್ಷದ ಆಡಳಿತದಲ್ಲಿ ಯಾವುದೇ ಕಪ್ಪು ಚುಕ್ಕೆಗಳು ಇಲ್ಲದಿದ್ದರೂ ದೇಶದ ರಕ್ಷಣೆಗಾಗಿ ಕಾಂಗ್ರೇಸ್ ಬಹುಕಾಲದಿಂದಲೂ ನೆನೆಗುದಿಗೆ ಬಿದ್ದಿದ್ದ ರಫೇಲ್ ಶಶಸ್ತ್ರಯುದ್ಧ ವಿಮಾನ ಖರೀದಿಯ ವ್ಯವಹಾರವನ್ನು ಮಾಡಿಮುಗಿಸಿದ ಮೇಲಂತೂ ರಾಹುಲ್ ಗಾಂಧಿ ವಿನಾಕಾರಣ 30,000 ಕೋಟಿ ಹಗರಣ ನಡೆದಿದೆ ಎಂದು ಸುಳ್ಳಾರೋಪ ಮಾಡತೊಡಗಿದರು. ಇದೇ ವಿಷಯ ಸುಪ್ರೀಂ ಕೋರ್ಟಿನಲ್ಲಿಯೂ ತನಿಖೆಯಾಗಿ ಅಲ್ಲಿಯೂ ಯಾವುದೇ ಅವ್ಯವಹಾರ ನಡೆದಿಲ್ಲ ಎಂದು ತೀರ್ಪು ಕೊಟ್ಟಮೇಲೂ, ಹೋದ ಬಂದ ಕಡೆಯಲ್ಲೆಲ್ಲಾ ಚೌಕೀದಾರ್ ಚೋರ್ ಹೈ ಎಂದು ಹಿಯ್ಯಾಳಿಸತೊಡಗಿದರು. ಆರಂಭದಲ್ಲಿ ಜನರಿಗೆ ಇವರ ಆರೋಪ ಸತ್ಯವೇ ಇರಬಹುದೇನೋ ಎಂದೆನಿಸಿದರೂ ಕ್ರಮೇಣ ಇದು ಕಾಂಗ್ರೇಸ್ಸಿಗರ ಕಟ್ಟು ಕಥೆ ಎಂಬುದರ ಅರಿವಾಗ ತೊಡಗಿತು.

ಲೋಕಸಭಾ ಚುನಾವಣೆಯ ಹತ್ತಿರ ಹತ್ತಿರ ಬಂದಂತೆಲ್ಲಾ ಸುಮಾರು ಇಪ್ಪತ್ತಕ್ಕೂ ಹೆಚ್ಚು ಪಕ್ಷಗಳು ಮಹಾಘಟ್ ಬಂಧನ್ ಎಂಬ ಹೆಸರಿನಲ್ಲಿ ಮೋದಿಯವರನ್ನು ಎದುರಿಸಲು ಒಂದಾಗಿ ಸಜ್ಜಾಗತೊಡಗಿದರೂ ಮತ್ತದೇ ಅವರರವರ ವಯಕ್ತಿಕ ಸ್ವಾರ್ಥ, ಅಹಂಗಳಿಂದಾಗಿ ಕೇವಲ ಉತ್ತರ ಪ್ರದೇಶದಲ್ಲಿ ಮಾಯಾವತಿ ಮತ್ತು ಅಕಿಲೇಶ್, ತಮಿಳುನಾಡಿನಲ್ಲಿ ಕಾಂಗ್ರೇಸ್ ಮತ್ತು ಡಿಎಂಕೆ ಒಂದವವೇ ಹೊರತು ಮಿಕ್ಕೆಲ್ಲಾ ಪಕ್ಷಗಳು ತಮ್ಮ ಸ್ವಂತ ಬಲದಿಂದಲೇ ಸ್ಪರ್ಧಿಸುವ ನಿರ್ಧಾರಕ್ಕೆ ಬಂದವು.

ಆದರೆ ಇದಕ್ಕೆ ತದ್ವಿರುದ್ದವಾಗಿ ಬಿಜೆಪಿ ಪಕ್ಷದವರು ತಮ್ಮ ಅಹಂ ಬದಿಗಿಟ್ಟು ಮಿತ್ರಪಕ್ಷಗಳನ್ನು ಓಲೈಸಿಕೊಂಡು ತಕ್ಕಮಟ್ಟಿಗಿನ ಸೀಟ್ ಹೊಂದಾಣಿಕೆ ಮಾಡಿಕೊಂಡು ಮೈತ್ರಿಯಿಂದ ಚುನಾವಣೆ ಸ್ಪರ್ಧಿಸಲು ನಿರ್ಧರಿಸಿದರಾದರೂ, ಅಲ್ಲಿ ಪಕ್ಷ, ಅಭ್ಯರ್ಥಿಗಳ ಹೊರತಾಗಿಯೂ ಸ್ಪರ್ಧೆ ಏನಿದ್ದರೂ ಏಕ ವ್ಯಕ್ತಿ ನರೇಂದ್ರ ಮೋದಿಯವರನ್ನೇ ಕೇಂದ್ರೀಕೃತವಾಗಿಸಿಕೊಂಡಿತು. ಇನ್ನು ಬಿಜೆಪಿ ಪಕ್ಷದ ಆಭ್ಯರ್ಥಿಗಳೂ ತಮ್ಮ ಸಾಮರ್ಥ್ಯವನ್ನು ಓರೆ ಹಚ್ಚುವ ಬದಲು ಎಂಬ ಘೋಷಣಾ ವಾಕ್ಯದೊಡನೆ ಪ್ರಚಾರ ಮಾಡಿದ್ದದ್ದು ಪ್ರಜಾಪ್ರಭುತ್ವವನ್ನೇ ಅಣಕ ಮಾಡುವಂತಿತ್ತು.

ಇನ್ನೂ ಎಲ್ಲಾ ಮಾಧ್ಯಮದವರೂ ಈ ಬಾರಿ 2014ರಲ್ಲಿ ಇದ್ದಂತೆ ಇದ್ದ ಮೋದಿಯವರ ಅಲೆ ಇಲ್ಲವಾದ್ದರಿಂದ ಬಿಜೆಪಿ ಮತ್ತೊಮ್ಮೆ ಅಧಿಕಾರಕ್ಕೆ ಬರುವುದು ಅಷ್ಟೊಂದು ಸುಲಭವಲ್ಲ ಎಂಬುದನ್ನು ಪದೇ ಪದೇ ಹೇಳುತ್ತಾ ಬಂದಿತೋ ಇದನ್ನೇ ಬಂಡವಾಳ ಮಾಡಿಕೊಂಡ ಕೆಲವೊಂದು ಪ್ರಾದೇಶಿಕ ಪಕ್ಷಗಳು ಕಿಂಗ್ ಮೇಕರ್ ಆಗುವ ಕನಸನ್ನು ಕಾಣ ತೊಡಗಿದವು. ಅದರಲ್ಲೂ ಪಶ್ವಿಮ ಬಂಗಾಳದ ಮಮತಾ ಬ್ಯಾನರ್ಜಿ, ಉತ್ತರ ಪ್ರದೇಶದ ಮಾಯಾವತೀ, ಆಂಧ್ರದ ಚಂದ್ರ ಬಾಬು ನಾಯ್ಡು, ತೆಲಂಗಾಣದ ಕೆಸಿಆರ್ ತಾವಾಗಲೇ ಪ್ರಧಾನಿ, ಉಪಪ್ರಧಾನಿಗಳಾಗಿಬಿಟ್ಟೆವು ಎಂಬಂತೆ ಆಡಲಾರಂಬಿಸಿದರು. ಇನ್ನು ಇದೇ ಕಡೇ ಚುನಾವಣೆ , ಕಡೇ ಚುನಾವಣೆ ಎಂದು ಹೇಳುತ್ತಲೇ ಚುನಾವಣೆ ಮೇಲೆ ಚುನಾವಣೆ ಸ್ಪರ್ಥಿಸುತ್ತಿರುವ ದಿನದ 24 ಘಂಟೆಗಳೂ ಮತ್ತು ವರ್ಷದ 365 ದಿನಗಳು ರಾಜಕೀಯವನ್ನೇ ಮಾಡುವ 86ರ ಮಾಜೀ ಪ್ರಧಾನಿ ದೇವೇಗೌಡರೂ ಮತ್ತೊಮ್ಮೆ ಪ್ರಧಾನಿಗಳಾಗುವ ಕನಸನ್ನು ಹೊತ್ತು ತಮ್ಮಿಬ್ಬರು ಮೂಮ್ಮಕ್ಕಳೊಂದಿಗೆ ಚುನಾವಣಾ ಕಣಕ್ಕೆ ಧುಮಿಕಿಯೇ ಬಿಟ್ಟರು.

ಚುನಾವಣಾ ಪ್ರಚಾರ ಆರಂಭವಾದ ಕೂಡಲೇ ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ದೇಶಾದ್ಯಂತ ದಿನಕ್ಕೆ ಎರಡು ಮೂರು, ಕೆಲವೊಂದು ಬಾರಿ ನಾಲ್ಕು ಪ್ರಚಾರ ಸಭೆಗಳನ್ನು ನಡೆಸುತ್ತಾ ಎಲ್ಲಾ ಕಡೆಯಲ್ಲೂ ಸ್ಥಳೀಯ ವಿಷಯಗಳ ಬಗ್ಗೆ ಮಾತನಾಡುತ್ತಾ ತಮ್ಮ ಆಭ್ಯರ್ಥಿಗಳ ಪರ ಮೋದಿ ಮತ್ತು ಅಮಿತ್ ಶಾ ಮತ ಯಾಚಿಸಿದರೆ, ಯಾರೋ ಬರೆದು ಕೊಟ್ಟದ್ದನ್ನು ಗಿಳಿ ಪಾಠದಂತೆ ಒಪ್ಪಿಸುವ ಪಪ್ಪು ರಾಹುಲ್ ಹಾಡಿದ್ದೇ ಹಾಡುವ ಕಿಸ್ವಾಯಿ ದಾಸ ಎನ್ನುವಂತೆ ರಫೇಲ್ ಮತ್ತು ಚೌಕೀದಾರ್ ಚೋರ್ ಬಿಟ್ಟರೆ ಮತ್ತೊಂದರ ಬಗ್ಗೆ ಮಾತನಾಡಲೇ ಇಲ್ಲ. ಇಷ್ಟರ ಮಧ್ಯೆ ರಫೇಲ್ ತೀರ್ಮಾನದ ಬಗ್ಗೆ ಪುನರ್ ಪರೀಶಿಲಿಸುವುದನ್ನು ಒಪ್ಪಿಕೊಂಡ ನ್ಯಾಯಾಲಯದ ಆದೇಶವನ್ನೇ ಇಟ್ಟುಕೊಂಡು, ನೋಡಿ ನ್ಯಾಯಲಯವೇ ಚೌಕೀದಾರ್ ಚೋರ್ ಎಂದು ಒಪ್ಪಿಕೊಂಡಿದೇ ಎಂದು ಸುಳ್ಳಾಡಿ ಉಚ್ಚ ನ್ಯಾಯಾಲಯದಿಂದ ಛೀಮಾರಿ ಹಾಕಿಸಿಕೊಂಡು ಕ್ಷಮಾಪಣಾ ಪತ್ರವನ್ನೂ ಬರೆದುಕೊಟ್ಟು ಜನರ ಮುಂದೆ ನಗೆಪಾಟಲಾಗಿದ್ದು ಸುಳ್ಳೇನಲ್ಲ.

ಇನ್ನೂ ಕರ್ನಾಟಕದಲ್ಲಂತೂ ಚುನಾವಣೆ ತಾರಕ್ಕೇರಿತು. ಅದರಲ್ಲೂ ಮಂಡ್ಯಾದಿಂದ ಖುದ್ದು ಮುಖ್ಯಮಂತ್ರಿಗಳ ಮಗ ನಿಖಿಲ್ ಮತ್ತು ದಿವಂಗಂತ ಅಂಬರೀಶ್ ಅವರ ಪತ್ನಿ ಸುಮಲತಾರವರ ನಡುವಿನ ಜಿದ್ದಾ ಜಿದ್ದಿನ ಪೈಪೋಟಿ ಇಡೀ ದೇಶದ ಗಮನವನ್ನು ಸೆಳೆಯಿತು. ಯತ್ರ ನಾರ್ಯಸ್ತು ಪೂಜ್ಯಂತೆ ತತ್ರ ರಮಂತೇ ದೇವತಾ. ಎಲ್ಲಿ ಸ್ತ್ರೀಯರು ಗೌರವಿಸಲ್ಪಡುತ್ತಾರೋ ಅಲ್ಲಿ ದೇವತೆಗಳು ಸಂತುಷ್ಟರಾಗಿರುತ್ತಾರೆ ಎಂಬ ನಮ್ಮ ಸಂಸ್ಕೃತಿಯನ್ನೂ ಮರೆತು ಹೀನಾಮಾನವಾಗಿ ವಯಕ್ತಿಕವಾಗಿ ನಿಂದಿಸ ತೊಡಗಿದರು. ಆಕೆಯ ಪರ ನಿಂತ ದರ್ಶನ್ ಮತ್ತು ಯಶ್ ನಾವುಗಳು ಅಮ್ಮನ ಪರ ದುಡಿಯುವ ಜೋಡೆತ್ತುಗಳು ಎಂದರೆ, ಸ್ವತಃ ಕುಮಾರಸ್ವಾಮಿಯವರೇ ತಮ್ಮ ಪದವಿಯ ಗೌರವನ್ನು ಬೀದಿಗೆ ಹರಾಜು ಮಾಡುವಂತೆ ಇವರು ಜೋಡೆತ್ತುಗಳಲ್ಲಾ, ಇವರು ಹೊಲ ಗದ್ದೆಗಳಿಗೆ ನುಗ್ಗುವ ಕಳ್ಳೆತ್ತುಗಳು. ನಿಜವಾದ ಜೋಡೆತ್ತುಗಳು ಎಂದರೇ ನಾವುಗಳೇ ಎಂದು ಪರಂಪರಾಗತ ವೈರಿಯಾದ ಡಿಕೆಶಿಯ ಹೆಗಲಿನ ಮೇಲೆ ಕೈ ಹಾಕಿ ಹೇಳಿದ್ದದ್ದು ಜನರಿಗೆ ಅಷ್ಟಾಗಿ ರುಚಿಸಲಿಲ್ಲ. ಯಥಾ ರಾಜಾ ತಥಾ ಪ್ರಜಾ ಎನ್ನುವಂತೆ ಮುಖ್ಯಮಂತ್ರಿಗಳೇ ನಿಂದಿಸಿದಾಗ ನಮ್ಮದೂ ಒಂದು ಪಾಲಿರಲೀ ಎಂದು ಅವರ ಪಕ್ಷದ ಎಲ್ಲಾ ನಾಯಕರೂ ಬಾಯಿಗೆ ಬಂದಂತೆ ದಿನಕ್ಕೊಂದಂತೆ ವಯಕ್ತಿಕ ನಿಂದನೆಗಿಳಿದಿದ್ದು ಶೋಚನೀಯವಾಗಿತ್ತು.

ಇನ್ನು ಸೋಲಿಲ್ಲದ ಸರದಾರನೆಂದೇ ಖ್ಯಾತಿ ಪಡೆದು ಸತತ 9 ಬಾರಿ ಶಾಸಕರಾಗಿ ಮತ್ತು 3ನೇ ಬಾರಿ ಲೋಕಸಭೆಗೆ ಸ್ಪರ್ಧಿಸಿದ್ದ ಲೋಕಪಕ್ಷದ ವಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆಯವರನ್ನು ಈಬಾರಿ ಖಂಡಿತವಾಗಿಯೂ ಸೋಲಿಸಲೇ ಬೇಕೆಂದು ನಿರ್ಧರಿಸಿ ಅವರದೇ ಪಕ್ಷದಲ್ಲಿದ್ದ ಅವರ ಶಿಷ್ಯ ಉಮೇಶ್ ಜಾದವ್ ಅವರನ್ನು ಕಣಕ್ಕಿಸಿತು ಬಿಜೆಪಿ. ಯಾವಾಗ ತಮ್ಮ ವಿರುದ್ಧ ಪ್ರಧಾನಿಗಳೇ ಆಸ್ಥೆ ವಹಿಸಿದ್ದನ್ನು ಕಂಡು ನಖಶಿಖಾಂತ ಉರಿದು ಹೋದ ಖರ್ಗೆ, ತಮ್ಮ ಸ್ಥಿಮಿತ ಕಳೆದುಕೊಂಡು ಮೋದಿಯವರ ವಿರುದ್ಧ ಏಕವಚನದಲ್ಲಿ ವಯಕ್ತಿಕ ನಿಂದನೆಗಿಳಿದರೆ, ಕೇವಲ ತಂದೆಯ ನಾಮಬಲದಿಂದ ಗೆದ್ದು ಮಂತ್ರಿ ಪದವಿಗಿಟ್ಟಿಸಿಕೊಂಡಿರುವ ಅವರ ಮಗ ಪ್ರಿಯಾಂಕ್ ಕೂಡ ತಂದೆಯವರ ನಿಂದನೆಗಳಿಗೆ ಧನಿಯಾದರು. ಇವರಿಬ್ಬರ ಜೊತೆ ಮಾಜೀ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ದಿನೇಶ್ ಗುಂಡುರಾವ್ ಕೂಡ ತಮ್ಮ ಸಾಮರ್ಥ್ಯಕ್ಕೆ ತಕ್ಕಷ್ಟು ಪ್ರಧಾನಿಗಳನ್ನು ನಿಂದಿಸಿದ್ದದ್ದು ವಿಷಾಧನೀಯ.

ಒಟ್ಟು ಏಳು ಹಂತಗಳಲ್ಲಿ ಪಶ್ವಿಮ ಬಂಗಾಳ ಹೊರತು ಪಡಿಸಿ ಮಿಕ್ಕೆಲ್ಲಾ ಕಡೆಗಳಲ್ಲೂ ಶಾಂತಿಯುತವಾಗಿ ಚುನಾವಣೆ ನಡೆದರೆ, ಪಶ್ಚಿಮ ಬಂಗಾಳದ ದೀದಿ, ತನ್ನ ಸರ್ವಾಧಿಕಾರೀ ದರ್ಪನ್ನು ತೋರಿಸುತ್ತಾ ಮೋದಿ, ಅಮಿತ್ ಶಾ, ಯೋಗಿಯವರನ್ನು ನಿಂದಿಸಿದ್ದಲ್ಲದೇ ಪ್ರಚಾರಕ್ಕೆ ಪಶ್ವಿಮ ಬಂಗಾಳಕ್ಕೆ ಬಾರದಂತೆ ತಡೆಗಟ್ಟಿದ್ದು ಕಪ್ಪುಚುಕ್ಕೆಯಂತಾಯಿತು.

ಯಾರು ಏನೇ ಹೇಳಿದರೂ, ಯಾವುದೇ ಆರೋಪ ಪ್ರತ್ಯಾರೋಪಗಳನ್ನು ಮಾಡಿದರೂ ಅದಕ್ಕೆ ಪ್ರತಿ ಮಾತಾನಾಡದೇ ಘನ ಗಾಂಭೀರ್ಯದಿಂದ ಕಳೆದ ಬಾರಿ ಚಾಯ್ವಾಲದಂತೆ ಈ ಬಾರಿ ಮೇ ಭೀ ಚೌಕೀದಾರ್ ಎಂಬ ಅಭಿಯಾನದೊಂದಿಗೆ, ದಿಟ್ಟವಾಗಿ ತಮ್ಮ ಸಾಧನೆಗಳನ್ನು ಜನರ ಮುಂದಿಡುತ್ತಾ ಮತ್ತೊಮ್ಮೆ ತಮ್ಮನ್ನು ಏಕೆ ಪ್ರಧಾನ ಸೇವಕನನ್ನಾಗಿ ಆಯ್ಕೆ ಮಾಡಬೇಕು ಎಂಬುದನ್ನು ಸಮರ್ಥವಾಗಿ ಜನರ ಮುಂದಿಡುತ್ತಾ ಹೋದ ಪ್ರಧಾನಿಗಳು ಜನರ ಮನಸ್ಸೆಳೆದುಕೊಂಡು ಹೋಗಿ ಅದನ್ನೇ ಮತಗಳನ್ನಾಗಿ ಪರಿವರ್ತಿಸಿ ಕೊಳ್ಳುವುದರಲ್ಲಿ ಯಶಸ್ವಿಯಗಿ ಯಾರೂ ನಿರೀಕ್ಷಿಸದಂತೆ ಸ್ವತಃ ಬಿಜೆಪಿಯೇ 300+ ಮತ್ತು NDA ಮೈತ್ರಿ ಕೂಟ 350+ ಸ್ಥಾನ ಪಡೆದು ಕೊಳ್ಳಲು ಸಮರ್ಥರಾದರೆ, ಯಥಾ ಪ್ರಕಾರ ಕಾಂಗ್ರೇಸ್ 50, ಅವರ ಮೈತ್ರಿಕೂಟ 90 ಕ್ಕಿಂತ ಮೇಲೇರಲಿಲ್ಲ. ಇನ್ನೂ ಕಿಂಗ್ ಮೇಕರ್ ಎನಿಸಿಕೊಳ್ಳಲು ಹೋದ ಸಮಯಸಾಧಕರು 99ಕ್ಕಿಂತ ಮೀರಲು ಆಗದಿದ್ದದ್ದು ಪ್ರಜಾಪ್ರಭುತ್ವದ ಹೆಗ್ಗಳಿಕೆಯಾಯಿತು.

ಈ ಬಾರಿಯ ಚುನಾವಣಾ ವಿಶೇಷಗಳು ಹೀಗಿವೆ

  • ವಿರೋಧ ಪಕ್ಷಗಳ ಘಟಾನು ಘಟಿಗಳಾದ, ದೇವೇಗೌಡ, ರಾಹುಲ್ ಗಾಂಧಿ, ದಿಗ್ವಿಜಯಸಿಂಗ್, ಜ್ಯೋತಿರಾಧ್ಯ ಸಿಂಧ್ಯಾ, ಮಲ್ಲಿಕಾರ್ಜುನ ಖರ್ಗೆ, ವೀರಪ್ಪ ಮೋಯ್ಲಿ, ಮುನಿಯಪ್ಪ, ಉಗ್ರಪ್ಪ, ಮೀಸಾಭಾರತಿ, ಶೀಲಾದೀಕ್ಷಿತ್ ಮುಂತಾದವರು ಸೋಲನ್ನುಂಡರು
  • ಇನ್ನು ದೇಶವನ್ನು ತುಂಡರಿಸುತ್ತೇವೆ ಎಂದು ಹೊರಟ ತುಕುಡೇ ತುಕುಡೇ ಗ್ಯಾಂಗ್ ಪ್ರಮುಖರಾದ ಕನ್ನಯ್ಯಾ ಮತ್ತು ಪ್ರಕಾಶ್ ರಾಜ್ ಮಕಾಡೆ ಮಲಗಿದ್ದು ಗಮನಿಸಬೇಕಾದ ಅಂಶ
  • ವಿಧಾನ ಸಭೆ ಮತ್ತು ಲೋಕ ಸಭಾ ಚುನಾಚಣೆಯ ನಿಜಾವಾದ ಅರ್ಥವನ್ನು ಗ್ರಹಿಸಿದ ರಾಜಾಸ್ಥಾನ, ಮಧ್ಯಪ್ರದೇಶ ಮತ್ತು ಛತ್ತೀಸ್ ಘಡದ ಪ್ರಜೆಗಳು ಕಳೆದ ಆರು ತಿಂಗಳ ಹಿಂದೆ ಮಾಡಿದ್ದ ಆಯ್ಕೆಯ ತದ್ವಿರುದ್ದವಾಗಿ ಆಯ್ಕೆ ಮಾಡಿದ್ದದ್ದು ಗಮನಾರ್ಹ.
  • ಚುನಾವಣೆ ಎಂದರೆ ಕೇವಲ ಸಾಮಾನ್ಯ ಸ್ಪರ್ಧೆಯಲ್ಲ ಅದೊಂದು ತಂತ್ರಗಾರಿಗೆ ಎಂಬುದನ್ನು ತೋರಿಸುವಂತೆ ಉತ್ತರ ಪ್ರದೇಶದಲ್ಲಿ ಕಳೆದು ಕೊಳ್ಳಬಹುದಾದ ಸಂಖ್ಯೆಗಳನ್ನು ಸರಿದೂಗಿಸುವಂತೆ ಪಶ್ಚಿಮ ಬಂಗಾಳ ಮತ್ತು ಒರಿಸ್ಸಾ ರಾಜ್ಯಗಳಲ್ಲಿ ಹೆಚ್ಚಿನ ಶ್ರಮವಹಿಸಿ ನಿರೀಕ್ಷಿತ ಫಲಿತಾಂಶ ಪಡೆದು ಅಮಿತ್ ಶಾ ನಿಜವಾದ ಚುನಾವಣಾ ಚಾಣುಕ್ಯ ಎಂದು ಖ್ಯಾತಿ ಪಡೆದರು.
  • ಕಳೆದ ವಿಧಾನ ಸಭಾ ಚುನಾವಣೆಯಲ್ಲಿ ಬಿಜೆಪಿಯನ್ನು ಅಧಿಕಾರದಿಂದ ದೂರ ವಿಡಲು ಜನರ ಆದೇಶದ ವಿರುದ್ದವಾಗುವ ರೀತಿ ಮೈತ್ರಿ ಮಾಡಿಕೊಂಡು ಬಿಜೆಪಿಯನ್ನು ಒಂದಂಕಿಯ ಸ್ಥಾನಕ್ಕೆ ನಿಲ್ಲಿಸುತ್ತೇವೆ ಎಂದು ಹೇಳಿದ್ದ ಕಾಂಗ್ರೇಸ್ ಕರ್ನಾಟಕದಲ್ಲಿ ಸಂಪೂರ್ಣವಾಗಿ ನೆಲಕಚ್ಚಿ ಹೀನಾಮಾನವಾಗಿ ಸೋತು ಸುಣ್ಣವಾಗಿ ಕೇವಲ ಒಂದೇ ಒಂದು ಸ್ಧಾನ ಪಡೆದದ್ದು ಶೋಚನೀಯವಾಗಿತ್ತು.
  • ಜಾತಿ ಲೆಕ್ಕಾಚಾರ ಆಧಾರದ ಮೇಲೆ ಹಾಸನದಲ್ಲಿ ಮೂಮ್ಮಗ ಪ್ರಜ್ಬಲ್ ರೇವಣ್ಣ, ಮಂಡ್ಯಾದಲ್ಲಿ ಮತ್ತೊಬ್ಬ ಮೊಮ್ಮಗ ನಿಖಿಲ್ ಕುಮಾರ ಸ್ವಾಮಿ ಮತ್ತು ತುಮಕೂರಿನಲ್ಲಿ ತಾತ ದೇವೇಗೌಡ ಸ್ಪರ್ಧಿಸಿ HMT ಕ್ಷೇತ್ರಗಳು ಎಂದೇ ಪ್ರಸಿದ್ದಿ ಪಡೆದು ಅಂತಿಮವಾಗಿ HMTಯಲ್ಲಿ H ಮಾತ್ರ ಗೆಲುವು ಗಳಿಸಿ ಉಳಿದ MT (EMPTY) ಆಗಿದ್ದು ಪ್ರಜಾಪ್ರಭುತ್ವದ ಗರಿಮೆಯನ್ನು ಎತ್ತಿ ತೋರಿಸಿತು.
  • ತಾತ ಮತ್ತು ಮೊಮ್ಮಗನನ್ನು ಈ ರೀತಿ ಹೀನಾಯವಾಗಿ ಸೋಲಿಸುವ ಮೂಲಕ ಕಳೆದ ಸಲ ಚಾಮುಂಡೇಶ್ವರಿ ಚುನಾಚಣೆಯಲ್ಲಿ ತಮ್ಮನ್ನು ಸೋಲಿಸಿದ್ದ ಜಿಡಿಎಸ್ ವಿರುದ್ದ ಸಿದ್ದರಾಮಯ್ಯನವರು ಸೇಡು ತೀರಿಸಿಕೊಂಡರು ಎಂದು ಜನ ಮಾತನಾಡುಕೊಳ್ಳುವಂತಾಯಿತು.
  • ಇಡೀ ರಾಜ್ಯಸರ್ಕಾರವೇ ವಿರುದ್ಧವಾಗಿದ್ದರೂ ಪಕ್ಷೇತರವಾಗಿ ಸ್ಪರ್ಧಿಸಿ, ದಿಟ್ಟವಾಗಿ ಹೋರಾಡಿ ಪ್ರಪ್ರಥಮವಾಗಿ ವಿಜಯಶಾಲಿಯಾದ ಸುಮಲತಾ ಅಂಬರೀಶ್ ದೇಶದ ಗಮನ ಸೆಳೆದರು.
  • ಕಾಂಗ್ರೇಸ್ ಹೊರತಾಗಿ ಸತತವಾಗಿ ಎರಡನೇ ಬಾರಿಗೆ ಅಭೂತ ಪೂರ್ವ ವಿಜಯದೊಂದಿಗೆ ಮತ್ತೊಮ್ಮೆ ಮೋದಿಯವರ ಸರ್ಕಾರ ಅಧಿಕಾರಕ್ಕೆ ಏರಿರುವುದು ಶ್ಲಾಘನೀಯವಾಗಿತ್ತು.

ದೇಶದ ಅಭಿವೃಧ್ದಿಗಾಗಿ ಒಂದು ಸುಭಧ್ರ ಸರ್ಕಾರ ಅತ್ಯವಶ್ಯಕವಾಗಿದೆ. ಅದನ್ನು ಸರಿಯಾಗಿ ಮನಗಂಡ ದೇಶವಾಸಿಗಳು ಮತ್ತೊಮ್ಮೆ ಮೋದಿಯವರನ್ನು ಮತ್ತವರ ತಂಡವನ್ನು ಆಯ್ಕೆಮಾಡಿದ್ದಾರೆ. ಕೇವಲ ಮೋದಿಯವರೇ ಒಬ್ಬಂಟಿಯಾಗಿ ದೇಶಾದ್ಯಂತ ಎಲ್ಲಾ ಕೆಲಸಗಳನ್ನು ಮಾಡಲು ಸಾಧ್ಯವಿಲ್ಲದಿರುವ ಕಾರಣ, ಈ ಬಾರಿ ತಮ್ಮ ಸ್ವಸಾಮರ್ಥ್ಯವಿಲ್ಲದಿದ್ದರೂ, ಕೇವಲ ಮೋದಿಯವರ ಹೆಸರಿನಿಂದಲೇ ಆಯ್ಕೆಯಾದ ಸಂಸದರು ಮನಗಂಡು ಈ ಬಾರಿಯಾದರೂ ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಜನ ಸೇವೆ ಮಾಡಿ ಮೋದಿಯವರೊಂದಿಗೆ ಭಾರತವನ್ನು ವಿಶ್ವ ಗುರುವನ್ನಾಗಿಸುವ ಮೋದಿಯವರ ಕನಸನ್ನು ಸಾಕಾರ ಮಾಡುವಂತಾಗಲೀ.

ಏನಂತೀರೀ?

ಮನೆ ಮನೆಯಲ್ಲೂ , ಮನ ಮನದಲ್ಲೂ , ಮೋದಿ ಮತ್ತೊಮ್ಮೆ

ಕಳೆದ ವಾರಾಂತ್ಯದಲ್ಲಿ ಲೋಕಸಭಾ ಚುನಾವಣೆಯ ಪ್ರಚಾರಕ್ಕೆಂದು ನಮ್ಮ ಸ್ನೇಹಿತರೊಂದಿಗೆ ಮನೆ ಮನೆಗೂ ಭೇಟಿ ನೀಡಿ ಪ್ರತಿಯೊಬ್ಬರಿಗೂ ಮತದಾನದ ಮಹತ್ವವನ್ನು ತಿಳಿಸಿ ಕಡ್ಡಾಯವಾಗಿ ಮತದಾನ ಮಾಡಲು ವಿನಂತಿಸಿಕೊಂಡೆವು. ಸಾಧಾರಣವಾಗಿ ಹೀಗೆ ಮತ ಪ್ರಚಾರಮಾಡಲು ಬರುವವರನ್ನು ಎಲ್ಲರೂ ಕೇಳುವ ಪ್ರಶ್ನೆ, ನೀವು ಯಾವ ಪಕ್ಷದವರು? ಯಾರ ಸಮರ್ಥಕರು? ಆದರೆ ನಾವು ಯಾವುದೇ ಪಕ್ಷದ ಪರವಾಗಿರದೆ ಜನಜಾಗೃತಿ ಹೆಸರಿನಲ್ಲಿ ಪ್ರತಿಯೊಬ್ಬರಿಗೂ ಮತದಾನ ದಿನವನ್ನು ನೆನಪಿಸಿ, ಮತ ಪಟ್ಟಿಯಲ್ಲಿ ಅವರ ಹೆಸರು ಇದೆಯೇ ಎಂದು ಪರೀಕ್ಷಿಸಲು ತಿಳಿಸಿ,ಕಳೆದ ಬಾರೀ ಮತ ಚಲಾವಣೆ ಮಾಡಿದ್ದರೇ ಇಲ್ಲವೇ ಎಂದು ಕೇಳಿ ತಿಳಿದು ಅವರ ಹತ್ತಿರದ ಮತದಾನದ ಕೇಂದ್ರ ವಿಳಾಸ ತಿಳಿಸುತ್ತಿದ್ದದ್ದು ಎಲ್ಲರ ಮೆಚ್ಚುಗೆ ಪಡೆಯಿತು. ಈ ಬಾರಿಯಂತೂ ಸಾಲು ಸಾಲು ರಜಾ ದಿನಗಳು ಇರುವ ಕಾರಣ ಚುನಾವಣೆ ತಪ್ಪಿಸಿ ರಜೆಯ ಮಜವನ್ನು ಅನುಭವಿಸಿದರೆ ಮುಂದಿನ ಐದು ವರ್ಷಗಳು ಪರಿತಪಿಸಬೇಕಾಗುತ್ತದೆ. ಹರ್ಷದ ಕೂಳಿಗೆ ವರ್ಷದ ಕೂಳನ್ನು ಮರೆಯಬೇಡಿ ಎಂದು ಎಚ್ಚರಿಸಿ, ಮನೆಯಲ್ಲಿರುವ ಪ್ರತಿಯೊಬ್ಬ ವಯಸ್ಕ ಮತದಾರನೂ ಕಡ್ಡಾಯವಾಗಿ ಮತದಾನ ಮಾಡಲೇ ಬೇಕೆಂಬ ನಮ್ಮ ಕಳ ಕಳಿಯ ಮನವಿ ಅವರ ಮನಕ್ಕೆ ಖಂಡಿತವಾಗಿಯೂ ಮುಟ್ಟುತ್ತಿತ್ತು ಮತ್ತು ಬಹುತೇಕರು, ಇಲ್ಲಾ ಸಾರ್, ಕಳೆದ ಬಾರೀ ನಾನಾ ಕಾರಣಾಂತರಗಳಿಂದ ಮತದಾನ ತಪ್ಪಿಸಿಕೊಂಡಿದ್ದೆವು ಆದರೆ ಈ ಬಾರಿ ತಪ್ಪದೇ ನಮ್ಮ ಮತವನ್ನು ಚಲಾಯಿಸಿಯೇ ತೀರುತ್ತೇವೆ ಎಂಬ ವಾಗ್ದಾನ ನಮ್ಮ ಕೆಲಸಕ್ಕೆ ಸಾರ್ಥಕತೆ ತೋರುತ್ತಿತ್ತು.

ಯಾವುದೇ ಪಕ್ಷದ ಹೆಸರಿಲ್ಲದೆ ಜನಜಾಗೃತಿ ಎಂಬ ಹೆಸರಿನಲ್ಲಿ ಮನೆ ಮನೆ ಭೇಟಿ ನೀಡಿದಾಗ ಜನರ ನಾಡಿ ಮಿಡಿತ ಚೆನ್ನಾಗಿಯೇ ಅರಿವಾಯಿತು. ಹೆಚ್ಚಿನವರು ನಾವು ಯಾರಿಗೆ ಪ್ರಚಾರ ಮಾಡುತ್ತಿದ್ದೇವೆ ಎಂಬುದನ್ನು ಸೂಕ್ಷ್ಮವಾಗಿ ಗ್ರಹಿಸಿ ಹೌದು ಸಾರ್. ದೇಶ ಇನ್ನಷ್ಟು ಉದ್ದಾರವಾಗ ಬೇಕಿದ್ದರೆ ಮೋದಿಯವರೇ ಮತ್ತೊಮ್ಮೆ ಪ್ರಧಾನಿಯಗಬೇಕು ಎಂದರೆ ಬಹಳಷ್ಟು ಜನ. ಸಾರ್ ಈ ಸರೀನೂ ಮೋದಿನೇ ಬರೋದು ಸಾರ್. ಅವರನ್ನ ಬಿಟ್ಟರೆ ಬೇರೆ ಯಾರಿದ್ದಾರೆ ಹೇಳಿ? ಎಂದು ನಮ್ಮನ್ನೇ ಪ್ರಶ್ನಿಸಿದಾಗ ನಿಜ ಸಾರ್. ಎಲ್ಲರಿಗೂ ಈ ವಿಷಯವನ್ನು ತಪ್ಪದೆ ತಿಳಿಸಿ ಮೋದಿಯವರನ್ನೇ ಬೆಂಬಲಿಸಲು ತಿಳಿಸಿ ಎಂದಾಗ ಖಂಡಿತವಾಗಿಯೂ ಹೇಳುತ್ತಿದ್ದೇವೆ ಸಾರ್ ಎನ್ನುತ್ತಿದರು. ಸಾರ್ ನಮಗೂ ಮೋದಿಯವರ ಪರವಾಗಿ ಕೆಲಸಮಾಡಲು ಇಷ್ಟ ಸಾರ್. ನಮ್ಮನ್ನೂ ನಿಮ್ಮ ಜೊತೆ ಜೋಡಿಸಿಕೊಳ್ಳಿ ಎಂದು ಅನೇಕರು ನಮ್ಮೊಂದಿಗೇ ಪ್ರಚಾರಕ್ಕೆ ಬಂದು ಅದುವರೆಗೆ ಕೇವಲ ಹಿತೈಷಿಗಳಾಗಿದ್ದವರು ಈಗ ಸಕ್ರೀಯ ಕಾರ್ಯಕರ್ತರಾಗಿ ಮಾರ್ಪಾಟಾಗಿರುವುದು ಅಚ್ಚೇ ದಿನ್ ಆಗಯೇ ಹೈ ಎಂಬುದರ ಸಂಕೇತವೇ ಹೌದು.

ರಾಜಕೀಯ ವಿಷಯಗಳಲ್ಲಿ ಹೆಂಗಸರ ಆಸಕ್ತಿ ತುಸು ಕಡಿಮೆ ಎಂದು ಭಾವಿಸಿದ್ದ ನಮಗೆ ನಾವೆಲ್ಲರೂ ಹುಬ್ಬೇರಿಸುವಂತೆ ಅನೇಕ ಗೃಹಿಣಿಯರು ಮತ್ತು ವಯಸ್ಸಾದವರು ಸಹಾ ಈ ಸಲ ನಮ್ಮನೆಯ ಎಲ್ಲರ ಓಟ್ ಬಿಜೆಪಿಗೇ ಎಂದು ಹೇಳುತ್ತಿದ್ದದ್ದು ನಮ್ಮೆಲ್ಲರಿಗೂ ಅಚ್ಚರಿ ಮೂಡಿಸುತ್ತಿತ್ತು. ಇನ್ನು ಅನೇಕರು ಮೋದಿಯವರ ಪರ ಪ್ರಚಾರ ಮಾಡಲು ಹಿಂಜರಿಯುವುದೇಕೆ. ನೇರವಾಗಿಯೇ ಮೋದಿಯವರನ್ನು ಸಮರ್ಥನೆ ಮಾಡಿ ಎಂದು ನಮಗೆ ಸಲಹೆ ಕೊಟ್ಟಿದ್ದೂ ಉಂಟು.

ಹೀಗೆ ಎಲ್ಲಕಡೆಯಲ್ಲೂ ಬಿಜೆಪಿಯದ್ದೇ ಸದ್ದಾಗುತ್ತಿದ್ದರೆ ಅತ್ತ ಕಡೆ ರಾಜ್ಯದ ಮುಖ್ಯಮಂತ್ರಿ ಎಂಬುದನ್ನೂ ಮರೆತು ತಮ್ಮ ಕುಟುಂಬದ ಮೂರು ಸದಸ್ಯರನ್ನು ಕಣಕ್ಕಿಳಿಸಿ ಮತ್ತು ಸಮ್ಮಿಶ್ರ ಸರ್ಕಾರದ ಭಾಗವಾಗಿ ಉಳಿದ 27 ಲೋಕಸಭಾ ಕ್ಷೇತ್ರಗಳಲ್ಲಿಯೂ ತಮ್ಮ ಪ್ರಭಾವ ಬೀರಬೇಕು ಎಂಬುದನ್ನು ಮರೆತು, ಕೇವಲ ತಮ್ಮ ಮಗನ ಕ್ಷೇತ್ರದಲ್ಲಿಯೇ ಝಾಂಡ ಹೂಡಿ ಆವರ ಪ್ರತಿಸ್ಪರ್ಧಿ ಒಬ್ಬ ಹೆಣ್ಣು ಮಗಳು ಎಂಬುದನ್ನೂ ಲೆಕ್ಕಿಸದೆ, ತಮ್ಮ ಸಂಪುಟದ ಸಹೋದ್ಯೋಗಿಗಳು ಮತ್ತು ಪಕ್ಷದ ನಾಯಕರನ್ನು ಒಳಗೊಂಡು ಎಲ್ಲರೂ ಒಬ್ಬಹೆಣ್ಣು ಮಗಳನ್ನು ಸಾರ್ವತ್ರಿಕವಾಗಿ, ಅದೂ ವಯಕ್ತಿವಾಗಿ ಏಕವಚನದಲ್ಲಿ ನಿಂದಿಸುತ್ತಿರುವುದು ಮತ್ತು ಸರ್ಕಾರಿ ಅಧಿಕಾರಿಗಳನ್ನು ತಮ್ಮ ಅನುಕೂಲಕ್ಕೆ ತಕ್ಕಂತೆ ದುರುಪಯೋಗ ಪಡಿಸಿಕೊಳ್ಳುತ್ತಿರುವುದು ನಾಡಿನ ಜನರ ಮನಸ್ಸಿಗೆ ಬೇಸರ ತರಿಸುತ್ತಿದೆ.

ಸ್ವಾತಂತ್ರ್ಯ ಬಂದಾಗಲಿಂದಲೂ ಅಧಿಕಾರಕ್ಕಾಗಿ ಒಂದು ಧರ್ಮದವರನ್ನೇ ಓಲೈಸುತ್ತಾ ಬಂದ ಪಕ್ಷ ಮತ್ತು ಅದರ ನಾಯಕ ಇತ್ತೀಚಿನ ಚುನಾವಣಾ ಸಮಯಗಳಲ್ಲಿ ಮಂದಿರಗಳನ್ನು ಸುತ್ತುತ್ತಾ, ತನ್ನನ್ನು ಹಿಂದೂ ಎಂದೂ ಅದರಲ್ಲೂ ಕಾಶ್ಮೀರೀ ಬ್ರಾಹ್ಮಣ ಎಂದು ಅಂಗಿಯ ಮೇಲೆ ಜನಿವಾರ ಹಾಕಿಕೊಂಡು ಮೆರೆಡಾಡುತ್ತಿದ್ದವ ತನ್ನ ಸ್ವಕ್ಷೇತ್ರ ಅಮೇಥಿಯಲ್ಲಿ ಸೋಲುವ ಭಯದಿಂದ ಅಲ್ಪಸಂಖ್ಯಾತರೇ ಬಹು ಸಂಖ್ಯಾತರಾಗಿರುವ ಕೇರಳದ ವೈನಾಡಿನಿಂದ ಸ್ಪರ್ಧೆ ಮಾಡುತ್ತಾ ತನ್ನ ನಿಜವಾದ ಬಣ್ಣವನ್ನು ಜಗಜ್ಜಾಹೀರಾತು ಮಾಡಿದ್ದಾನೆ. ಮಹಾಭಾರತದ ವಿರಾಟ ಪರ್ವದಲ್ಲಿ ಹೆಂಗಳೆಯರ ಸುತ್ತ ಮುತ್ತವೇ ಜಂಬ ಕೊಚ್ಚುತ್ತಾ ಕಾಣ ಸಿಗುವ ಉತ್ತರ ಕುಮಾರನಂತೆ ತನ್ನ ಕೈಯಲ್ಲಿ ಪಕ್ಷವನ್ನು ನಡೆಸಲು ಸಾಧ್ಯವಿಲ್ಲ ಎಂಬುದನ್ನು ಅರಿತು ತನ್ನ ತಂಗಿಯನ್ನು ರಾಜಕೀಯಕ್ಕೆ ಕರೆತಂದು ಆಕೆಯನ್ನು ಗುರಾಣಿಯಂತೆ ಬಳೆಸಿಕೊಳ್ಳುತ್ತಿರುವುದು ಆತನ ಅಸಹಾಯಕತೆಗೆ ಹಿಡಿದ ಕನ್ನಡಿಯಾಗಿದೆ. ಸಾಲ ಮನ್ನ ಎನ್ನುವ ಕಣ್ಣೊರೆಸುವ ತಂತ್ರದಿಂದ ಈಗಾಗಲೇ ಆರ್ಥಿಕವಾಗಿ ಕಂಗೆಟ್ಟಿರುವ ದೇಶದ ಜನರಿಗೆ ದೇಶದ 20ಕೋಟಿ ಜನ ಬಡವರಿಗೆ ಪ್ರತೀವರ್ಷವೂ ಸರ್ಕಾರದ ಕಡೆಯಿಂದ 72000ರೂಪಾಯಿಗಳನ್ನು ಜೀವನಾಂಶವಾಗಿ ಕೊಡುತ್ತೇನೆ ಎಂದು ಘೋಷಿಸಿರುವುದು, ನಿಜವಾಗಿಯೂ ಬೆವರು ಸುರಿಸಿ ಸಂಪಾದಿಸಿ ತೆರಿಗೆ ಕಟ್ಟುವ ಮಂದಿಯ ಆಕ್ರೋಶಕ್ಕೆ ಕಾರಣವಾಗಿರುವುದು ಸುಳ್ಳಲ್ಲ. ತಮ್ಮ ರಾಜಕೀಯ ತೆವಲುಗಳನ್ನು ತೀರಿಸಿಕೊಳ್ಳಲು ಜನರ ತೆರಿಗೆ ಹಣವನ್ನು ಈ ರೀತಿಯಾಗಿ ಪೋಲು ಮಾಡುತ್ತಾ ಹೋದಲ್ಲಿ ದೇಶದ ಜನರು ಸೋಮಾರಿಗಳಾಗಿಯೇ ಉಳಿದು ಹೋದಲ್ಲಿ ಅವರನ್ನು ನಾವೇಕೆ ಸಾಕಬೇಕು ಎಂಬ ಅವರ ಪ್ರಶ್ನೆಗೆ ಉತ್ತರ ಕೊಡದೆ, ಹೋದ ಬಂದ ಕಡೆಯಲ್ಲೆಲ್ಲಾ ಉಡಾಫೆ ಮಾತನಾಡುತ್ತಿರುವದನ್ನು ಜನ ಸೂಕ್ಷ್ಮವಾಗಿ ಗಮನಿಸಿ ಅದಕ್ಕೆ ತಕ್ಕ ಉತ್ತರ ನೀಡಲು ಸಜ್ಜಾಗಿದ್ದಾರೆ ಎಂಬುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಅಣ್ಣಾ ಹಜಾರೆಯವರ ಚಳುವಳಿಯನ್ನೇ ತನ್ನ ರಾಜಕೀಯ ದಾಳವನ್ನಾಗಿ ಪರಿವರ್ತಿಸಿಕೊಂಡು ಹಲವಾರು ಉಚಿತ ಸೇವೆಗಳ ಆಮೀಷಗಳನ್ನು ತೋರಿಸಿ ದೆಹಲಿಯಲ್ಲಿ ಆಧಿಕಾರಕ್ಕೆ ಬಂದು ಮೋದಿಯವರ ಎದುರು ಕಳೆದ ಲೋಕಸಭಾ ಚುನಾವಣೆಯಲ್ಲಿ ವಾರಣಾಸಿಯಲ್ಲಿ ಹೀನಾಯವಾಗಿ ಸೋಲುಂಡ ಅರವಿಂದನ ಮುಖಾರವಿಂದ ಎಲ್ಲರಿಗೂ ಜನರಿಗೆ ಬೇಸರ ಮೂಡಿಸಿದೆ. ಇತರೇ ರಾಜ್ಯಗಳನ್ನು ಬಿಡಿ ದೆಹಲಿಯಲ್ಲೇ ಕಾಂಗ್ರೇಸ್ ಕೂಡ ಆತನೊಂದಿಗೆ ಸಖ್ಯ ಬೆಳೆಸಲು ಮುಂದಾಗದೇ ಯಾರಿಗೂ ಬೇಡದ ವ್ಯಕ್ತಿಯಾಗಿ ಅಂಡು ಸುಟ್ಟ ಬೆಕ್ಕಿನಂತೆ ಅತ್ತಿಂದಿತ್ತ ಅಲೆಯುತ್ತಿರುವುದು ನೋಡಲು ಮಜವಾಗಿದೆ.

ಅರವಿಂದನಂತೆಯೇ ಮತ್ತೊಬ್ಬ ವಿಲಕ್ಷಣ ಗೋಸುಂಬೆ ರಾಜಕಾರಣಿ ಆಂಧ್ರಪ್ರದೇಶದ ಚಂದ್ರಬಾಬು ನಾಯ್ಡು ಎಂದರೆ ತಪ್ಪಾಗಲಾರದು. ಸದಾ ತನ್ನ ಹಿತಕ್ಕಾಗಿ ಪರಾವಲಂಬಿಯಾಗಿ ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ಪಕ್ಷವನ್ನೇ ಆಶ್ರಯಿಸಿ ಹತ್ತುವ ವರೆಗೂ ಏಣಿ ಹತ್ತಿದ ನಂತರ ಏಣಿಯನ್ನು ಒದೆಯುವ ಚಾಳಿಯನ್ನೇ ಮುಂದುವರಿಸಿದ್ದಾನೆ. ಕಳೆದ ನಾಲ್ಕು ವರ್ಷಗಳವರೆಗೂ ಮೋದಿಯವರ ಸರ್ಕಾರದಲ್ಲಿ ಭಾಗಿಯಾಗಿ, ಯಾವಾಗ ಮೋದಿಯವರು ಆಂಧ್ರಕ್ಕೆ ನೀಡಿದ ಅನುದಾನದ ಲೆಕ್ಕವನ್ನು ಕೇಳಲು ಆರಂಭಿಸಿದಾಗ ಮೋದಿಯವರನ್ನು ತೆಗಳುತ್ತಾ ಅವರ ವಿರುದ್ಧ ಶತೃಗಳ ಶತೃ ತನ್ನ ಮಿತ್ರ ಎನ್ನುವಂತೆ ಮೋದಿಯವರ ವಿರೋಧಿಗಳನ್ನೆಲ್ಲಾ ಒಗ್ಗೂಡಿಸಿ ಮಹಾಘಟ್ವಂಧನ್ ಕಟ್ಟಲು ಹೋಗಿ ಈಗ ಅಕ್ಷರಶಃ ಯಾರಿಗೂ ಬೇಡವಾಗಿ ಏಕಾಂಗಿಯಾಗಿ ಚುನಾವಣೆಗಿಂತಲೂ ಮುಂಚೆ ಸೋಲನ್ನು ಒಪ್ಪಿಕೊಂಡಂತಾಗಿದೆ.

ಸಾವಿರಾರು ಕೋಟಿ ಮೇವಿನ ಹಗರಣದ ಆರೋಪ ಸಾಬೀತಾಗಿ ಜೈಲಿನಲ್ಲಿ ಬಂಧಿಯಾಗಿರುವ ಲಾಲು ಪ್ರಸಾದ್ ಯಾದವ್ ಕುಟುಂಬ ರಾಜಕಾರಣ ಮತ್ತೊಮ್ಮೆ ತಮ್ಮ ಯಾದವೀ ಕಲದಿಂದ ಇಬ್ಬಾಗವಾಗಿ ಅಣ್ಣಾ ತಮ್ಮಂದಿರೇ ಪರಸ್ಪರ ವಿರೋಧಿಗಳಾಗಿ ಚುನಾವಣೆ ಎದುರಿಸುತ್ತಿದ್ದರೆ ಅತ್ತ ಉತ್ತರ ಪ್ರದೇಶದಲ್ಲಿನ ಅಖಿಲೇಶ್ ಯಾದವ್ ಅವರ ಪಕ್ಷ ಮೂರು ಹೋಳಾಗಿ ಅಪ್ಪಾ, ಮಗ ಮತ್ತು ಚಿಕ್ಕಪ್ಪಂದಿರು ಪರಸ್ಪರ ಕಚ್ಚಾಡಿಕೊಳ್ಳುತ್ತಿದ್ದಾರೆ. ಅರ್ಹತೆ ಇಲ್ಲದಿದ್ದರೂ ಕೇವಲ ತನ್ನ ಜಾತೀಯ ಅಸ್ತ್ರವನ್ನು ಝಳಿಪಿಸುತ್ತಾ ಪ್ರಧಾನಿಯಾಗುವ ಕನಸನ್ನು ಕಾಣುತ್ತಿದ್ದ ಮಾಯಾವತಿಗೆ ತನ್ನ ಸೋಲಿನ ಅರಿವಾಗಿ ಈ ಬಾರಿ ಚುನಾವಣೆಗೇ ಸ್ಪರ್ಥಿಸದೇ ಅದೃಷ್ಟದ ಆಟದತ್ತ ಚಿತ್ತಹರಿಸಿರುವುದು ಸ್ಪಷ್ಟವಾಗಿದೆ.

ಕಮ್ಯೂನಿಷ್ಟರ ದಬ್ಬಾಳಿಕೆಗೆ ಎದೆ ಒಡ್ಡಿ ಅವರನ್ನು ನಿರ್ನಾಮ ಮಾಡಿ ಒಳ್ಳೆಯ ರಾಜ್ಯಾಭಾರ ನೀಡುತ್ತಾಳೆ ಎಂದು ಭಾವಿಸಿದ್ದ ಪಶ್ಚಿಮ ಬಂಗಾಳದ ಜನರಿಗೆ ಮಮತಾ ಬ್ಯಾನರ್ಜಿಯ ಕರಾಳ ಮುಖ ಅರಿವಾಗಲು ಇಷ್ಟು ಕಾಲ ತೆಗೆದುಕೊಂಡಿದ್ದು ನಿಜಕ್ಕೂ ದೌರ್ಭಾಗ್ಯವೇ ಸರಿ. ಸ್ವತಃ ಹಿಂದೂವಾಗಿದ್ದು, ಸದಾ ಅನ್ಯಧರ್ಮೀಯರನ್ನೇ ಓಲೈಕೆ ಮಾಡುತ್ತಾ ತನ್ನ ಓಟ್ ಬ್ಯಾಂಕ್ ವೃಧ್ದಿಗಾಗಿ ಅಕ್ರಮ ಸುಸುಳುಗೋರ ಬಾಂಗ್ಲಾದೇಶಿಯರನ್ನು ಸಕ್ರಮ ಮಾಡುತ್ತಾ, ಹಿಂದೂಗಳ ಹಬ್ಬಕ್ಕೆ ತಡೆ ಒಡ್ಡುತ್ತಿದ್ದನ್ನು ನೋಡಿ ಬಂಗಾಲಿಗಳ ಸಹನೆಯ ಕಟ್ಟೆ ಒಡೆದು ನಿಚ್ಚಳವಾಗಿ ಈ ಬಾರಿ ಬಿಜೆಪಿಯನ್ನು ಅಭೂತಪೂರ್ವವಾಗಿ ಬೆಂಬಲಿಸಲು ನಿರ್ಧರಿಸಿರುವುದು ಮತ್ತು ಆಕೆಯ ಪಕ್ಷದ ಅನೇಕ ಹಾಲೀ ಸಾಂಸದರೂ ಬಿಜೆಪಿಗೆ ಸೇರ್ಪಡೆಯಾಗಿರುವುದು ಮಮತಾಳ ನಿದ್ದೆಗೆಡಿಸಿರುವುದು ಸುಳ್ಳಲ್ಲ.

ಹೀಗೆ ಮೋದಿಯವರು ಸದ್ದಿಲ್ಲದೆ ತಮ್ಮ ಅಭಿವೃದ್ಧಿ ಕೆಲಸಗಳ ಮೂಲಕ ತಮ್ಮ ವಿರೋಧಿಗಳ ಮೇಲೂ ಸರ್ಜಿಕಲ್ ಸ್ಟ್ರೈಕ್ ಮಾಡುತ್ತಾ ಮಹಾ ಘಟ್ಬಂಧನ್ ಎಂಬ ದುಷ್ಟಕೂಟವನ್ನು ನುಚ್ಚು ನೂರು ಮಾಡಿ ವಿಜಯದತ್ತ ದಿಟ್ಟವಾಗಿ ನಡೆಯುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಹೀಗೆ ಮೋದಿಯವರ ಮೋಡಿ ಮನ ಮನೆಗಳಿಗೂ ತಲುಪಿ ಮೋದಿ ಮತ್ತೊಮ್ಮೆ ಎನ್ನುವುದು ಕೇವಲ ಒಬ್ಬ ವ್ಯಕ್ತಿಯ ಆರಾಧನೆಯಾಗದೆ, ಮೋದಿ ಮತ್ತೊಮ್ಮೆ ಎನ್ನುವುದು ಒಂದು ಆಂದೋಲನದ ರೀತಿಯ ಮಾರ್ಪಟ್ಟಿದೆ ಎಂದರೂ ತಪ್ಪಾಗಲಾರದು. ಇದೇ ಗತಿಯನ್ನು ಮತ್ತು ಮನೋಭಾವವನ್ನು ಚುನಾವಣೆಯವರೆಗೂ ಕಾಯ್ದುಕೊಂಡಲ್ಲಿ ಮೋದಿ ಮತ್ತೊಮ್ಮೆ ಭಾರೀ ಬಹುತದಿಂದ ಪ್ರಧಾನಿಗಳಾಗುವುದರಲ್ಲಿ ಎಳ್ಳಷ್ಟೂ ಸಂದೇಹವಿಲ್ಲ. ಹಾಗೆಂದ ಮಾತ್ರಕ್ಕೇ ನಾವೆಲ್ಲರೂ ಸುಮ್ಮನೆ ಕೂರಲು ಸಾಧ್ಯವಿಲ್ಲ. ಚುನಾವಣೆ ಮುಗಿಯುವವರೆಗೂ ನಮ್ಮ ಕ್ಷೇತ್ರದಲ್ಲಿ ಮೋದಿಯವರೇ ಸ್ಪರ್ಥಿಸುತ್ತಿದ್ದಾರೆ ಎನ್ನುವಂತೆಯೇ ಕೆಲಸ ಮಾಡಿ ನಮ್ಮ ಕ್ಷೇತ್ರದ ಅಭ್ಯರ್ಥಿಯನ್ನು ಗೆಲ್ಲಿಸುವುದರ ಮುಖಾಂತರ ಮೋದಿ ಮತ್ತೊಮ್ಮೆ ಆಂದೋಲನದಲ್ಲಿ ಭಾಗಿಯಾಗೋಣ.

ಏನಂತೀರೀ?

ಪರಿಶ್ರಮ

ಮೊನ್ನೆ RCB ಮತ್ತು MI ನಡುವೆ ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯ ರೋಚಕವಾಗಿತ್ತು. ಚೆನ್ನೈ ತಂಡ ಹಿಂದೆ ಮೊದಲನೇ ಪಂದ್ಯದಲ್ಲಿ ಕೇವಲ 70 ರನ್ ಗಳಿಸಿ ಅಲೌಟ್ ಆಗಿ ಸುಲಭವಾಗಿ ಪಂದ್ಯ ಸೋತಿದ್ದ ಕೋಹ್ಲಿ ಪಡೆ ಈ ಬಾರಿ ಟಾಸ್ ಗೆದ್ದು ಮುಂಬೈ ತಂಡಕ್ಕೆ ಮೊದಲು ಬ್ಯಾಟ್ ಮಾಡಲು ಹೇಳಿ 187 ರನ್ ಗಳಿಗೆ ಅವರನ್ನು ನಿರ್ಬಂಧಿಸಿ, ಬ್ಯಾಟ್ ಮಾಡಲು ಬಂದ RCB 20 ಓವರ್ಗಳಲ್ಲಿ ಕೇವಲ 181 ರನ್ ಗಳಿಸಲು ಸಾಧ್ಯವಾಗಿ 6 ರನ್ ಗಳಿಂದ ಪಂದ್ಯ ಸೋತಿರುವುದು ಈಗ ಇತಿಹಾಸ. ಸೋತ ನಂತರ ಕಡೆಯ ಚೆಂಡ್ ನೋಬಾಲ್ ಆಗಿತ್ತು. ಅಂಪೈರ್ ಅದನ್ನು ಸರಿಯಾಗಿ ಗಮನಿಸದ ಕಾರಣ RCB ತಂಡಕ್ಕೆ ಪಂದ್ಯ ಗೆಲ್ಲುವ ಒಂದು ಅವಕಾಶ ತಪ್ಪಿತು ಎಂದರೂ ತಪ್ಪಾಗಲಾರದು. ಒಂದು ಬಾರಿ ನೋಬಾಲ್ ಕೊಟ್ಟಿದ್ದಲ್ಲಿ ನಿಜಕ್ಕೂ ಪಂದ್ಯದ ಗತಿಯೇ ಬೇರೆ ಇರುತ್ತಿತ್ತು ಎಂದು ನಂತರ ನಾಯಕ ಕೋಹ್ಲಿ ಹಲುಬಿದ್ದು ನಿಜಕ್ಕೂ ಶೋಚನೀಯವಾಗಿತ್ತು.

ಬೆಂಗಳೂರಿನ ನಗರ ಪಾಲಿಕೆ ಚುನಾವಣೆಯಲ್ಲಿ ಬೆಂಗಳೂರಿಗರು, ಬಿಜೆಪಿ ಪಕ್ಷದ ಬರೋಬ್ಬರಿ 100 ಸದಸ್ಯರನ್ನು ಆಯ್ಕೆ ಮಾಡಿದ್ದರು. ಬಹುಮತಕ್ಕೆ ಕೇವಲ ಐದು ಸದಸ್ಯರು ಕಡಿಮೆ ಇತ್ತು. ಸಾಕಷ್ಟು ಪಕ್ಷೇತರರು ಆಯ್ಕೆಯಾಗಿದ್ದ ಪರಿಣಾಮ ಇನ್ನೇನು ಬಿಜೆಪಿಯ ಸದಸ್ಯರೇ ಮೇಯರ್ ಆಗುವುದರಲ್ಲಿ ಸಂದೇಹವೇ ಇಲ್ಲ ಎಂದು ಒಂದು ಕ್ಷಣ ಮೈಮರೆತ ಸಮಯದಲ್ಲೇ ಉಳಿದೆಲ್ಲ ಪಕ್ಷಗಳೂ ಪಕ್ಷೇತರರನ್ನು ಒಲಿಸಿಕೊಂಡು ಮೇಯರ್ ಮತ್ತು ಉಪಮೇಯರ್ ಪಟ್ಟವನ್ನು ಬಿಜೆಪಿಯ ಕೈಯಿಂದ ಕಿತ್ತುಕೊಂಡಿದ್ದು ಈಗ ಇತಿಹಾಸ.

ಕಳೆದ ವರ್ಷ ನಡೆದ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ ಪಕ್ಷ 104 ಸ್ಥಾನಗಳಿಸಿ ಬಹುಮತಕ್ಕೆ ಕೇವಲ 9 ಸ್ಥಾನಗಳು ಕಡಿಮೆಯಾದಾಗ, ಬಿಜೆಪಿಯನ್ನು ಅಧಿಕಾರದಿಂದ ಹೊರಗಿಡಬೇಕೆಂದು ತೀರ್ಮಾನಿಸಿದ ಕಾಂಗ್ರೇಸ್ ಕೇವಲ 38 ಸ್ಥಾನ ಗಳಿಸಿದ್ದ ಜನತಾದಳದೊಂದಿಗೆ ಪಕ್ಷೇತರೊಳಗೊಂಡು ಕೈ ಜೋಡಿಸಿದ ಪರಿಣಾಮ ಜನರ ತೀರ್ಮಾನದ ವಿರುದ್ಧವಾಗಿ ಕೇವಲ ಸಂವಿಧಾನಾತ್ಮಕವಾಗಿ ಸಂಖ್ಯಾಬಲದ ಮೇಲೆ ಅಧಿಕಾರಕ್ಕೆ ಬಂದಿರುವುದು ಎಲ್ಲರಿಗೂ ಗೊತ್ತಿರುವ ವಿಷಯವೇ ಸರಿ.

ಮೇಲೆ ತಿಳಿಸಿದ ಮೂರೂ ಸಂಧರ್ಭಗಳಲ್ಲಿಯೂ ಫಲಿತಾಂಶ ಹೊರಬಿದ್ದ ನಂತರ ಎಲ್ಲರ ಬಾಯಿಯಲ್ಲಿ ಬಂದ ಉದ್ಗಾರ ಒಂದೇ, ಛೇ, ಇನ್ನೂ ಸ್ವಲ್ಪ ಪರಿಶ್ರಮ ಪಟ್ಟಿದ್ದರೆ ಅಂತಿಮ ಗೆಲುವು ನಮ್ಮದೇ ಆಗಿರುತ್ತಿತ್ತು. ಇನ್ನೂ ಸ್ವಲ್ಪ ಯೋಜನೆ ಮಾಡಿದ್ದರೆ ನಾವೇ ಗೆಲ್ಲುತ್ತಿದ್ದೆವು. ಸೋತಿದ್ದೆಲ್ಲಾ ಕೇವಲ ಕೆಲವೇ ಕೆಲವು ರನ್ ಅಥವಾ ಓಟ್ ಗಳಿಂದ. 188 ರನ್ ಗಳಿಸಲು 20ನೇ ಓವರಿನ ಕಡೆಯ ಬಾಲ್ ವರೆಗೂ ಕಾಯುವ ಬದಲು 18ನೇ ಓವರ್ನಲ್ಲೇ ಗೆಲ್ಲುವ ಹಾಗೆ ಯೋಚಿಸಿ ಅದಕ್ಕೆ ತಕ್ಕಂತೆ ಆಡಿದ್ದರೆ ಏನಾದರೂ ಹೆಚ್ಚು ಕಡೆಮೆ ಆಗಿದ್ದಲ್ಲಿ ಕಡೆಯ 2 ಓವರ್ಗಳಲ್ಲಿ ಸರಿ ಪಡಿಸಿಕೊಳ್ಳ ಬಹುದಿತ್ತು. ಅದೇ ರೀತಿ ಎಲ್ಲ ಕಾರ್ಯಕರ್ತರೂ ಇನ್ನೂ ಸ್ವಲ್ಪ ಹೆಚ್ಚಿನ ಪರಿಶ್ರಮ ಪಟ್ಟು ಕೆಲಸ ಮಾಡಿದ್ದಲ್ಲಿ 5 ನಗರ ಸಭಾ ಸದಸ್ಯರು ಅಥವಾ 9 ವಿಧಾನ ಸಭಾ ಸದಸ್ಯರನ್ನು ಗೆಲ್ಲಿಸಿಕೊಂಡಿದ್ದಲ್ಲಿ ಯಾರನ್ನೂ ಆಶ್ರಯಿಸದೆ, ಯಾವ ಆಪರೇಷನ್ಗೂ ಕೈ ಹಾಕದೇ ಸ್ವಸಾಮರ್ಥ್ಯದಿಂದ ಅಧಿಕಾರವನ್ನು ಪಡೆಯ ಬಹುದಾಗಿತ್ತು.

ಇನ್ನೇನು ಕೆಲವೇ ದಿನಗಳಲ್ಲಿ ದೇಶಾದ್ಯಂತ ಈಗ ಲೋಕಸಭಾ ಚುನಾವಣೆ ನಡೆಯಲಿದೆ. ಕಳೆದ ಐದು ವರ್ಷಗಳಲ್ಲಿ ಪ್ರಧಾನಿ ಮೋದಿಯವರ ನೇತೃತ್ವದಲ್ಲಿ ಎಂದೂ ಕಂಡರಿಯದ ರೀತಿಯಲ್ಲಿ ದೇಶ ಅಭಿವೃದ್ಧಿ ಹೊಂದುತ್ತಲಿದೆ. ಪ್ರಧಾನಿಗಳು ತಮ್ಮ ಸತತ ವಿದೇಶೀ ಪ್ರವಾಸಗಳಿಂದ ವಿಶ್ವಾದ್ಯಂತ ಎಲ್ಲರೊಂದಿಗಿನ ಸ್ನೇಹ ಸಂಪಾದನೆ ಮಾಡಿರುವ ಪರಿಣಾಮ ಇಂದು ವಿಶ್ವದಲ್ಲಿ ಭಾರತ ದೇಶದ ಗರಿಮೆ ಹಿಂದೆಂದಿಗಿಂತಲೂ ಅತ್ಯುತ್ತಮವಾಗಿದೆ. ಪ್ರಧಾನಿಗಳು ನಾನೂ ತಿನ್ನುವುದಿಲ್ಲ ಮತ್ತು ಮತ್ತೊಬ್ಬರನ್ನು ತಿನ್ನಲು ಬಿಡುವುದಿಲ್ಲ ಎನ್ನುವ ನೀತಿಯ ಪರಿಣಾಮ ಕಳೆದ ಐದು ವರ್ಷಗಳಲ್ಲಿ ಯಾವುದೇ ಭ್ರಷ್ಟಾಚಾರವೂ ಇಲ್ಲದೇ, ದಿಟ್ಟ ಆರ್ಥಿಕ ನಿರ್ಣಯಗಳಿಂದ ದೇಶದ ಬಹುತೇಕ ಸಾಲಗಳನ್ನು ಹಿಂದಿರುಗಿಸಿ ದೇಶದ ಆರ್ಥಿಕ ಪರಿಸ್ಥಿತಿ ಸಧೃಡವಾಗಿದೆ. ಸೇನೆಗಳಿಗೆ ಹೆಚ್ಚಿನ ವಿಶೇಷ ಸೌಲಭ್ಯಗಳನ್ನು ಕಲ್ಪಿಸಿ ಕೊಟ್ಟು, ಅವರಿಗೆ ಗುಂಡು ನಿರೋಧಕ ಕವಚಗಳ ಜೊತೆ ಆಧುನಿಕ ಶಸ್ತ್ರಾಸ್ತ್ರಗಳನ್ನು ನೀಡಿ ಅವರನ್ನು ಸಧೃಡ ಪಡಿಸಿದ ಪರಿಣಾಮ ಇಂದು ಶತೃದೇಶಗಳ ದೇಶಕ್ಕೂ ನುಗ್ಗಿ ಭಯೋತ್ಪಾದಕರನ್ನೂ ಬಗ್ಗು ಬಡಿಯುವ ಸಾಮರ್ಥ್ಯಕ್ಕೆ ನಮ್ಮ ಹೆಮ್ಮೆಯ ಪ್ರಧಾನಿಗಳು ತಂದಿದ್ದಾರೆ ಎಂದು ಹೇಳಿದರೆ ತಪ್ಪಾಗಲಾರದು.

ಹೀಗೆಯೇ ದೇಶದ ಅಭಿವೃಧ್ಧಿ ಇನ್ನಷ್ಟು ಮುಂದುವರೆಯ ಬೇಕಿದ್ದಲ್ಲಿ ಇಂತಹ ಹೆಮ್ಮೆಯ ಪ್ರಧಾನಿಗಳನ್ನೇ ಮತ್ತೊಮ್ಮೆ ಆಯ್ಕೆ ಮಾಡುವುದು ನಮಗೆಲ್ಲರಿಗೂ ಅನಿವಾರ್ಯವಾಗಿದೆ. ಸದ್ಯಕ್ಕಂತೂ ಆ ಪಟ್ಟವನ್ನು ಅಲಂಕರಿಸಲು ಬೇರಾವುದೇ ಅಭ್ಯರ್ಥಿಗಳು ನಮ್ಮ ಮುಂದೆ ಇಲ್ಲವಾಗಿದೆ. ದೇಶದ ಪ್ರಧಾನಿಗಳಾಗಬೇಕು ಎಂದು ಈಗಾಗಲೇ ಸಾಲಿನಲ್ಲಿ ನಿಂತಿರುವ ಎಲ್ಲರನ್ನೂ ಒಂದು ತಕ್ಕಡಿಗೆ ಹಾಕಿ ಮೋದಿಯವರನ್ನು ಮತ್ತೊಂದು ತಕ್ಕಡಿಗೆ ಹಾಕಿ ನೋಡಿದಲ್ಲಿ ಮೋದಿಯವರ ಸಾಧನೆ ಮತ್ತು ಸಾಮರ್ಥ್ಯಗಳ ಮುಂದೇ ಅಷ್ಟೂ ಜನರು ಸೇರಿದರೂ ಅರ್ಧದಷ್ಟು ತೂಗಲಾರರು ಎನ್ನುವುದು ಜಗಜ್ಜಾಹೀರಾತಾಗಿದೆ. ಹಾಗಾಗಿ ಮೋದಿಯವರನ್ನೇ ಮತ್ತೊಮ್ಮೆ ಪ್ರಧಾನಿಗಳನ್ನಾಗಿ ಮಾಡಲು ಬಿಜೆಪಿ ಪಕ್ಷವನ್ನು ಬಹುಮತದಿಂದ ಆಯ್ಕೆ ಮಾಡಿದಲ್ಲಿ ಮಾತ್ರವೇ ಸಾಧ್ಯವಾಗುತ್ತದೆ . ಕೇವಲ ಮೋದಿಯವರೇ ಪ್ರಧಾನಿಯಾಗಬೇಕೆಂದು ಬಯಸುವ ನಾವು ಮಾಡ ಬೇಕಾದ ಎಕೈಕ ಕೆಲಸವೆಂದರೆ ನಮ್ಮ ಕ್ಷೇತ್ರದಲ್ಲಿ ಸ್ಪರ್ಧಿಸಿರುವ ಬಿಜೆಪಿ ಅಭ್ಯರ್ಥಿಗಳಿಗೇ ಮತ ಹಾಕಿ ಮತ್ತು ಹಾಕಿಸಿ ಅವರನ್ನು ಬಾರೀ ಬಹುಮತದಿಂದ ಗೆಲ್ಲಿಸಬೇಕಿದೆ. ನಮ್ಮ ಲಕ್ಷ್ಯ ಮೋದಿಯವರನ್ನು ಮತ್ತೊಮ್ಮೆ ಪ್ರಧಾನಿಗಳನ್ನಾಗಿ ಮಾಡಬೇಕು ಎನ್ನುವುದಾಗಿರುವುದರಿಂದ, ಈ ಬಾರಿ ಬಿಜೆಪಿ ಅಭ್ಯರ್ಥಿಗಳು ಯಾರೇ ಆಗಿರಲಿ ಅವರನ್ನು ಗೆಲ್ಲಿಸುವ ಜವಾಬ್ಧಾರಿ ನಮ್ಮದೇ ಆಗಿದೆ. ನಮ್ಮ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಗಳಿಗೆ ಮೋದಿಯಷ್ಟೇ ಸಾಮರ್ಥ್ಯ ಇಲ್ಲದಿರಬಹುದು. ಅವರ ಜನಪ್ರಿಯತೆ, ಪ್ರಾಮಾಣಿಕತೆ ಮತ್ತು ಕಾರ್ಯವೈಖರಿ ಮೋದಿಯವರಷ್ಟು ಆಕ್ರಮಣಕಾರಿ ಇಲ್ಲದಿರಬಹುದು ಆದರೆ ನಮ್ಮ ಉದ್ದೇಶ ಏನಿದ್ದರೂ ಮೋದಿಯನ್ನು ಮತ್ತೊಮ್ಮೆ ಸ್ವ ಸಾಮರ್ಥ್ಯದಿಂದ ಯಾವುದೇ ಮಿತ್ರ ಪಕ್ಷಗಳ ಬೆಂಬಲವಿಲ್ಲದೆ ಪ್ರಧಾನಿಯಾಗಿಸಬಲ್ಲಷ್ಟು ಸಂಖ್ಯಾ ಬಲ ಕೊಡುವುದಷ್ಟೇ. ಆ ನಂತರದಲ್ಲಿ ಅವರವರ ಸಾಮರ್ಥ್ಯಕ್ಕೆ ತಕ್ಕಂತೆ ಈ ಲೋಕಸಭಾ ಸದಸ್ಯರನ್ನು ಬಳೆಸಿಕೊಳ್ಳುವ ಮತ್ತು ಅವರಿಂದ ಸರಿಯಾದ ಕೆಲಸ ತೆಗೆಯುವ ಸಾಮರ್ಥ್ಯ ಮೋದಿಯವರಲ್ಲಿದೆ. ಈ ಶಕ್ತಿ ಸಾಮರ್ಥ್ಯವನ್ನು ಈಗಾಗಲೇ ಹಲವಾರು ಬಾರಿ ಮೋದಿಯವರು ಪ್ರದರ್ಶಿಸಿದ್ದಾರೆ. ಹಾಗಾಗಿ, ಶ್ರೀ ಕೃಷ್ಣನೇ ಭಗವದ್ಗೀತೆಯಲ್ಲಿ ಹೇಳಿರುವಂತೆ ನಮ್ಮ ಕೆಲಸವನ್ನು ನಾವು ಸರಿಯಾಗಿ ಮಾಡೋಣ. ನಮ್ಮ ಕ್ಷೇತ್ರದ ಬಿಜೆಪಿ ಆಭ್ಯರ್ಥಿಗಳನ್ನು ಗೆಲ್ಲಿಸಿಸೋಣ. ಫಲಾ ಫಲಗಳನ್ನು ಮೋದಿಯವರ ಮೇಲೇ ಬಿಡೋಣ.

ಹನಿ ಹನಿ ಗೂಡಿದರೆ ಹಳ್ಳ. ತೆನೆ ತೆನೆ ಗೂಡಿದರೆ ಬಳ್ಳ ಎನ್ನುವಂತೆ, ನಮ್ಮ ಪ್ರತಿಯೊಂದು ಮತವೂ ಅತ್ಯಮೂಲ್ಯವಾಗಿದೆ. ನಮ್ಮ ಒಂದೊಂದು ತಪ್ಪು ನಿರ್ಧಾರದ ಮತ ಚಲಾವಣೆ ದೇಶವೇ ಸೋಲಬಹುದಾಗಿದೆ. ಹಾಗಾಗಿ 2004 ರಲ್ಲಿ ನಭೂತೋ ನಭವಿಷ್ಯತಿ ಎನ್ನುವ ಹಾಗೆ ಆಡಳಿತ ನಡೆಸಿದ್ದರೂ ತಮ್ಮ ಕ್ಷೇತ್ರದ ಸಾಂಸದರಿಗೆ ಬುದ್ದಿ ಕಲಿಸಲು ಹೋಗಿ ವಾಜಪೇಯಿಯವರನ್ನು ಸೋಲಿಸಿ, 10 ವರ್ಷ ಒಬ್ಬ ಮೌನಿ ಪ್ರಧಾನಿಯನ್ನು ಆಯ್ಕೆ ಮಾಡಿದಂತೆ, ಈ ಬಾರಿ ಆಗದಿರಲಿ ಎಂದು ಆಶೀಸೋಣಈ ಬಾರಿ ಯೋಚಿಸಿ ಮತ ಚಲಾಯಿಸೋಣ. ಬಿಜೆಪಿ ಮತ್ತು ಬಿಜೆಪಿ ಬೆಂಬಲಿತ ಅಭ್ಯರ್ಥಿಗಳನ್ನೇ ಗೆಲ್ಲಿಸೋಣ. 

ಮೊಳಗಲಿ ಒಮ್ಮೆ, ಮೋದಿ ಮತ್ತೊಮ್ಮೆ


ಮೋದಿ ಮತ್ತೊಮ್ಮೆ, ಅದುವೇ ದೇಶದ ಹೆಮ್ಮೆ.

ಏನಂತೀರೀ?

ಮೋದಿ ಮತ್ತೊಮ್ಮೆ

ಒಂದು ಎರಡು ಮತದಾನಕ್ಕೆ ಹೊರಡು

ಮೂರು ನಾಲ್ಕು ಅದು ನಿನ್ನದೇ ಹಕ್ಕು

ಐದು ಆರು ತುಸು ಜಾಣ್ಮೆಯ ತೋರು

ಏಳು ಎಂಟು ಅದು ಪ್ರಜಾಪ್ರಭುತ್ವದ ನಂಟು

ಒಂಭತ್ತು ಹತ್ತು ಯೋಗ್ಯರಿಗೆ ಗುಂಡಿ ಒತ್ತು

 

ಒಂದರಿಂದ ಹತ್ತರವರೆಗಿನ ಆಟವು ಹೀಗಿತ್ತು

ಮೋದಿಯವರನ್ನು ಮತ್ತೆ ಪ್ರಧಾನಿ ಮಾಡಿಯಾಗಿತ್ತು.

 

ಜಿ. ಪಿ. ರಾಜರತ್ನಂ ಅವರಲ್ಲಿ ಕ್ಷಮೆ ಕೋರುತ್ತೇನೆ

ಭಾರತದ ಉತ್ತಮ ಭವಿಷ್ಯಕ್ಕಾಗಿ ಮೋದಿ ಮತ್ತೊಮ್ಮೆ

ನೀವೇನೂ ಮೋದಿ ಗೆಲ್ಬೇಕು ಅಂತಿರಾ ಆದ್ರೆ ನಮ್ಮ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿಗಿಂತ ಬೇರೆ ಪಕ್ಷದ ಅಭ್ಯರ್ಥಿ ಉತ್ತಮವಾಗಿ ಕೆಲಸ ಮಾಡ್ತಾನೆ ಏನ್ ಮಾಡೋದು ?

ಸದ್ಯಕ್ಕೆ ಬಹುತೇಕರು ಕೇಳೊ ಪ್ರಶ್ನೆ ಇದು, ಸಣ್ಣದಾಗಿ ಒಂದ್ ರೌಂಡ್ ಪುರಾಣ ಸುತ್ಕೊಂಡ್ ಬರೋಣ, ಕುಂತಿ ಮಾಡಿದ ತಪ್ಪಿಗೆ ಕರ್ಣನ ಜನನವಾಯ್ತು, ಆಮೇಲೆ ಕೀಳು ಜಾತಿಯಲ್ಲಿ ಬೆಳೆದವ ಎಂಬ ಕಾರಣಕ್ಕೆ ದ್ರೋಣರು ಕರ್ಣನಿಗೆ ವಿದ್ಯೆ ಕಲಿಸಲಿಲ್ಲ, ತಾನು ಬ್ರಾಹ್ಮಣ ಅಂತ ಸುಳ್ಳು ಹೇಳಿ ಕ್ಷತ್ರಿಯರ ಕಟು ವಿರೋಧಿ ಪರಶುರಾಮರ ಬಳಿ ವಿದ್ಯೆ ಕಲಿತಕೊಂಡ ಕರ್ಣನು ಕೊನೆಗೆ ಅಲ್ಲೂ ಸತ್ಯ ಗೊತ್ತಾಗಿ ಪರಶುರಾಮರಿಂದ ಶಾಪ ಅಂಟಿಸಿಕೊಂಡ …

ಇಷ್ಟೆಲ್ಲಾ ಕಷ್ಟಗಳನ್ನು ಎದುರಿಸಿ ಕೊನೆಗೆ ಎಲ್ಲಾ ವಿದ್ಯೆಗಳಲ್ಲಿ ಅರ್ಜುನನಿಗಿಂತ ತಾನೆ ಶ್ರೇಷ್ಠ ಎಂಬುದನ್ನ ಸಾಬೀತು ಮಾಡಿದ, ಕೊನೆಗೆ ಅನಿವಾರ್ಯವಾಗಿ ಕೌರವರ ಪಕ್ಷ ಸೇರಿದ, ಇತ್ತ ಅರ್ಜುನ ಅತ್ತ ಕರ್ಣ ಇಬ್ಬರೂ ಅಪ್ರತಿಮ ವೀರರು ಮೇಲಾಗಿ ಅಣ್ಣ ತಮ್ಮಂದಿರು ಆದರೆ ಪಕ್ಷ ಮಾತ್ರ ಬೇರೆ..

ಈಗ ಮೂಲ ವಿಷಯಕ್ಕೆ ಬರೋಣ, ನಿಮ್ಮ ಕ್ಷೇತ್ರದಲ್ಲಿ ಬಿಜೆಪಿಯಿಂದ ಅರ್ಜುನ ನಿಂತಿದ್ದಾನೆ ಬೇರೆ ಪಕ್ಷದಿಂದ ಕರ್ಣ ನಿಂತಿದ್ದಾನೆ ಅಂತ ಅನ್ಕೊಳ್ಳಿ ,ವಾಸ್ತವದಲ್ಲಿ ಅರ್ಜುನನಿಗಿಂತ ಕರ್ಣನೇ ಶ್ರೇಷ್ಠ ಅನ್ನೋದು ಸತ್ಯವಾದರೂ ಅವರಿಬ್ಬರನ್ನು ಮುನ್ನೆಡೆಸುವ ಪಕ್ಷಗಳನ್ನು ಸಹ ನಾವು ಗಮನಿಸಬೇಕು, ಅರ್ಜುನನ ಹಿಂದೆ ಮೋದಿಯಂತ ಶ್ರೀಕೃಷ್ಣ ಇದ್ದರೆ ಅತ್ತ ಕರ್ಣ ಇರುವುದು ದುರ್ಯೋಧನ ,ದುಶ್ಯಾಸನ,ಶಕುನಿ ಇರುವ ಮಹಾ ಘಟ್ ಬಂಧನ್ ಪಕ್ಷದಲ್ಲಿ,

ಇಲ್ಲಿ ಅರ್ಜುನ ತಪ್ಪು ಮಾಡಿದರೆ ತಿದ್ದಲು ಬಿಜೆಪಿಯಲ್ಲಿ ಕೃಷ್ಣ ಇದ್ದಾನೆ ಆದ್ರೆ ಕರ್ಣ ತಪ್ಪು ಮಾಡಿದ್ರೆ ಆ ತಪ್ಪುಗಳನ್ನು ಉತ್ತೇಜಿಸುವ ಮೂರ್ಖರು ಮಹಾ ಘಟ್ ಬಂಧನ್ ನಲ್ಲಿ ಇದಾರೆ ಅನ್ನೋದು ನೆನಪಿರಲಿ…

ಕೆಲವೊಮ್ಮೆ ವ್ಯಕ್ತಿಗಿಂತ ಆತನನ್ನು ನಿಯಂತ್ರಿಸುವ ಪಕ್ಷದ ಮೇಲೆ ನಂಬಿಕೆ ಇಡ್ಬೇಕಾಗುತ್ತೆ, ವ್ಯಕ್ತಿಯೇ ಮುಖ್ಯ ಅಂತ ಕೆಟ್ಟ ಪಕ್ಷದಲ್ಲಿ ಇರುವವನಿಗೆ ಬೆಂಬಲ ಕೊಟ್ರೆ ಆತನಿರುವ ಪಕ್ಷ ಆತನನ್ನು ಹಾಳು ಮಾಡುವುದಲ್ಲದೆ ಆತನಿಗೆ ಬೆಂಬಲ ಕೊಟ್ಟ ನಮ್ಮನ್ನು ಸಹ ಹಾಳು ಮಾಡುತ್ತೆ, ಸ್ವಲ್ಪ ಯೋಚಿಸಿ ಕೃಷ್ಣನಿರುವ ಪಕ್ಷ ಬೇಕೊ ಅಥ್ವಾ ಶಕುನಿ ಇರುವ ಪಕ್ಷ ಬೇಕೊ ಅಂತ…

ಹಾಗಂತ ಬಿಜೆಪಿಯಲ್ಲಿ ಇರುವವರೆಲ್ಲಾ ಅರ್ಜುನರು ಮತ್ತೆ ಮಹಾಕೆಟ್ ಬಂಧನ್ ನಲ್ಲಿ ಇರೋರೆಲ್ಲ ಕರ್ಣರು ಅಂತ ಅನ್ಕೋಬೇಡಿ, ಅಕಸ್ಮಾತ್ ನಿಮ್ಮ ಕ್ಷೇತ್ರದಲ್ಲಿ ಬಿಜೆಪಿಗಿಂತ ಬೇರೆ ಪಕ್ಷದ ಅಭ್ಯರ್ಥಿ ಉತ್ತಮ ಅನ್ಸಿದ್ರೆ ಮೇಲೆ ನಾ ಹೇಳಿದಂತೆ ಪಕ್ಷವನ್ನು ನೋಡಿ ಮತ ಹಾಕಿ ಅಷ್ಟೇ…

ಮಹಾಭಾರತದಲ್ಲಿ ಶ್ರೀಕೃಷ್ಣ ಹೇಗೆ ಪಾಂಡವರ ಪ್ರತಿ ಹೆಜ್ಜೆಯನ್ನು ಗಮನಿಸಿ ಅವರಿಗೆ ಸತ್ಯದ ಮಾರ್ಗ ತೋರಿಸುತ್ತಿದ್ದನೊ ಹಾಗೆ ನರೇಂದ್ರ ಮೋದಿ ಬಿಜೆಪಿ ನಾಯಕರ ಪ್ರತಿ ಹೆಜ್ಜೆಯನ್ನು ಗಮನಿಸುತ್ತಿದ್ದಾರೆ, ಸುಮ್ನೆ ಯೋಚಿಸಿ ಕಳೆದ ಐದು ವರ್ಷಗಳಲ್ಲಿ ಯಾವನಾದ್ರೂ ಒಬ್ಬ ಬಿಜೆಪಿ ನಾಯಕ ಹಗರಣ ಮಾಡಿದ್ದಾನ ಅಂತ? ಮಾಡಿಲ್ಲ ಅಲ್ವಾ ಯಾಕಂದ್ರೆ ಅವರ ಹಿಂದೆ ನರೇಂದ್ರ ಇದ್ದಾನೆ…

ಮುಂದೆ ಬರ್ತಿರೋದು ಕುರುಕ್ಷೇತ್ರ, ಕೃಷ್ಣನಿಗೆ ಬೆಂಬಲ ಕೊಟ್ಟು ದುರ್ಯೋಧನ ದುಶ್ಯಾಸನ ಶಕುನಿ ದ್ರೋಣರ ಮಹಾ ಘಟ್ ಬಂಧನ್ಗೆ ಅಂತಿಮ ಗೆರೆ ಎಳೆಯೋಣ…

ಭಾರತದ ಉತ್ತಮ ಭವಿಷ್ಯಕ್ಕಾಗಿ ಮೋದಿ ಮತ್ತೊಮ್ಮೆ

ಕೃಪೆ ವ್ಯಾಟ್ಯಾಪ್