ಇಂದಿನ ಯುವ ಜನತೆಯ ಆದ್ಯತೆ ಮತ್ತು ಆದರ್ಶಗಳು

ಕಳೆದ ಒಂದೂವರೆ ವರ್ಷದಿಂದ  ಇಡೀ ಪ್ರಪಂಚದ ಆರ್ಥಿಕ ಪರಿಸ್ಥಿತಿ ಕರೋನಾದಿಂದಾಗಿ ಕೆಟ್ಟುಕೆರ ಹಿಡಿದು ಹೋಗಿರುವ ಸಂಗತಿ  ಎಲ್ಲರಿಗೂ ತಿಳಿದಿರುವ ವಿಷಯವಷ್ಟೇ.  ಇದರ ಪರಿಣಾಮದಿಂದಾಗಿ ಭಾರತದ ಆರ್ಥಿಕ ಪರಿಸ್ಥಿತಿ ಅಧೋಗತಿ ತಲುಪಿರುವುದನ್ನೇ ಎತ್ತಿ ತೋರಿಸುತ್ತಾ, ಜನರಿಗೆ ಎರಡು ಹೊತ್ತು ಊಟ ಸಿಗುತ್ತಿಲ್ಲ ಈ ಸರ್ಕಾರ ಏನು ಮಾಡ್ತಾ ಇದೇ? ಎಂದು  ಜನರನ್ನು ಸರ್ಕಾರದ ವಿರುದ್ಧ ಜನರನ್ನು ಎತ್ತಿಕಟ್ಟಿ ಅವರ ದಿಕ್ಕು ತಪ್ಪಿಸುವ ಕಾರ್ಯದಲ್ಲಿರುವಾಗಲೇ  ಈ ವಾರ ಬಹುನಿರೀಕ್ಷಿತವಾಗಿದ್ದ ಎರಡು ಸುಪ್ರಸಿದ್ಧ ನಾಯಕರುಗಳ ಸಿನಿಮಾ ಬಿಡುಗಡೆಯಾಗಿದೆ.  ಬಿಡುಗಡೆಯಾದ ಎರಡೇ ದಿನಗಳಲ್ಲಿಯೇ ಕೋಟಿ ಕೋಟಿ ರೂಪಾಯಿಗಳನ್ನು ಬಾಚಿಕೊಂಡ ಸುದ್ದಿಯನ್ನು ಮಾಧ್ಯಮದವರು ತೋರಿಸುತ್ತಿದ್ದಾರೆ.

ನಮ್ಮ ದೇಶದಲ್ಲಿ ಉನ್ನತ ವಿಜ್ಞಾನಿಗಳು, ವೈದ್ಯರು, ಎಂಜಿನಿಯರ್‌ಗಳು, ಪ್ರಾಧ್ಯಾಪಕರು, ಅಧಿಕಾರಿಗಳು ಮುಂತಾದವರು ವರ್ಷಕ್ಕೆ  30-40 ಲಕ್ಷ  ಅದಕ್ಕಿಂತ ಸ್ವಲ್ಪ ಹೆಚ್ಚು ಎಂದರೆ 50-60 ಲಕ್ಷ  ರೂಪಾಯಿಗಳಷ್ಟು ಪಡೆಯುತ್ತಾರೆ. ಆದರೆ ಅದೇ ಈ ದೇಶದಲ್ಲಿ ಚಲನಚಿತ್ರ ನಟ ನಟಿಯರು ಪ್ರತಿ ಚಿತ್ರಕ್ಕೂ ಕೋಟ್ಯಾಂತರ ಹಣವನ್ನೇ ಪಡೆಯುತ್ತಾ, ವರ್ಷಕ್ಕೆ 10 ಕೋಟಿಯಿಂದ 100 ಕೋಟಿ ರೂಪಾಯಿಗಳನ್ನು ಗಳಿಸುತ್ತಾರೆ.  ಆದರೆ ಆ ಹಣವನ್ನು ಏನು ಮಾಡ್ತಾರೆ? ಎನ್ನುವುದೇ ಇದುವರೆಗೂ ಯಕ್ಷ ಪ್ರಶ್ನೆಯಾಗಿಯೇ ಉಳಿದಿದೆ. ಈ  ದೇಶದ ಅಭಿವೃದ್ಧಿಗೆ ಈ ನಟಿಯರ ಕೊಡುಗೆ  ಏನು? ಅಷ್ಟು ದುಡಿದರೂ ಸರಿಯಾಗಿ ತೆರಿಗೆ ಕಟ್ಟುವುದನ್ನು ತಪ್ಪಿಸಿಕೊಳ್ಳಲು ಯತ್ನಿಸುವುದು ವಿಪರ್ಯಾಸವೇ ಸರಿ. ಈ ನಟ ನಟಿಯರು  ಒಂದು ವರ್ಷ ಗಳಿಸುವಷ್ಟು ಹಣವನ್ನು ದೇಶದ ಉನ್ನತ ವಿಜ್ಞಾನಿಗಳಿಸಲು ತಮ್ಮ ಜೀವಮಾನವನ್ನು ಕೆಲಸ ಮಾಡ ಬೇಕಾದರೆ ಇನ್ನು ಸಾಮಾನ್ಯ ವ್ಯಕ್ತಿ ಅಷ್ಟೊಂದು ಹಣ ಗಳಿಸಲು 100 ವರ್ಷಗಳಾದರು ಆಗುತ್ತದೆ ಎಂದರೂ ಅತಿಶಯವಲ್ಲ.

tukde_gangಇತ್ತಿಚಿನ ವರ್ಷಗಳಲ್ಲಿ ನಮ್ಮ ದೇಶದ ಯುವ ಜನತೆಯನ್ನು ಆಕರ್ಷಿಸುತ್ತಿರುವ  ಮೂರು ಕ್ಷೇತ್ರಗಳೆಂದರೆ,  ಸಿನಿಮಾ, ಕ್ರಿಕೆಟ್ ಮತ್ತು ರಾಜಕೀಯ. ಇದಕ್ಕೆ ಮುಖ್ಯ ಕಾರಣ ಈ ಮೂರೂ  ಕ್ಷೇತ್ರಗಳಲ್ಲಿ ದೊರೆಯುವ ಕೀರ್ತಿ, ಪ್ರತಿಷ್ಠೆ ಮತ್ತು ಹಣ.  ಹಾಗಾಗಿ ಈ ಮೂರು ಕ್ಷೇತ್ರಗಳು ಇಂದಿನ ಆಧುನಿಕ ಯುವಕರ ಅದ್ಯತೆಗಳಾಗಿರುವುದು ನಿಜಕ್ಕೂ ವಿಪರ್ಯಾಸ. ಹಾಗಾಗಿಯೇ ಈ ಮೂರೂ ಕ್ಷೇತ್ರಗಳಲ್ಲಿರುವವರು ಇಂದು  ದೇಶ ಮತ್ತು ಸಮಾಜಕ್ಕೆ ನಿಷ್ಪ್ರಯೋಜಕರಾಗಿದ್ದಾರೆ ಎಂದರೂ ತಪ್ಪಾಗದೇನೋ?

ಸಿನಿಮಾ ರಂಗದಲ್ಲಿ ಪ್ರತಿಷ್ಟೆ ಗಳಿಸುತ್ತಿದ್ದಂತೆಯೇ, ಮಾದಕ ದ್ರವ್ಯ,  ಮತ್ತು ವೇಶ್ಯಾವಾಟಿಕೆಯಾದರೆ,  ಕ್ರಿಕೆಟ್ ನಲ್ಲಿ ಮ್ಯಾಚ್ ಫಿಕ್ಸಿಂಗ್ ಜೊತೆಗೆ ಗೂಂಡಾಗಿರಿಯಾದರೇ  ರಾಜಕೀಯದಲ್ಲಿಯೂ ಗೂಂಡಾಗಿರಿ ಮತ್ತು ಭ್ರಷ್ಟಾಚಾರ ತಾಂಡಾವವಾಡುತ್ತಿದೆ. ಈ ರೀತಿಯ ಕುಕೃತ್ಯಗಳ ಹಿಂದೆ ಆವರು ಗಳಿಸುವ ಹಣವನ್ನು ಹೇಗೆ ಖರ್ಚು ಮಾಡುವುದು ಎಂಬುದರ ಪರಿವಿಲ್ಲದಿರುವುದು ಒಂದು ಕಾರಣವಾಗಿದೆ ಎನ್ನಬಹುದೇನೋ? ಇಂತಹವರನ್ನು  ಉದ್ಧಾರ ಮಾಡಲು ನಾವು ಬೆವರು ಸುರಿಸಿದ ಹಣವನ್ನು ಖರ್ಚು ಮಾಡುವುದು  ಒಂದು ರೀತಿಯ ಮೂರ್ಖತನದ ಪರಮಾವಧಿಯೇನೋ?

sachinನಿಜ ಹೇಳಬೇಕೆಂದರೆ, 70-80 ವರ್ಷಗಳ ಹಿಂದಿನ ಸುಪ್ರಸಿದ್ಧ ನಟರು ತಿಂಗಳು ಸಂಬಳಕ್ಕೆ ಅಭಿನಯಿಸುತ್ತಿದ್ದರು.   30-40 ವರ್ಷಗಳ ಹಿಂದಿನ ಕ್ರಿಕೆಟಿಗರ ಗಳಿಕೆ ಈಗಿನ ಫಸ್ಟ್ ಕ್ಲಾಸ್ ಆಟಗಾರರು ಗಳಿಸುವುದಕ್ಕಿಂತಲೂ ಕಡಿಮೆ ಗಳಿಸುತ್ತಿದ್ದರು.  ವಿದೇಶಗಳಿಗೆ ಹೋದಾಗ ಈಗಿನಂತೆ ಐಶಾರಾಮ್ಯ ಹೋಟೆಲ್ಲಿನ  ಬದಲಾಗಿ ರೈಲ್ವೇ ಕೋಚಿನಲ್ಲಿಯೇ ಉಳಿದುಕೊಂಡ ಉದಾಹರಣೆಯೂ ಇದೆ. ಇನ್ನು 30-40 ವರ್ಷಗಳ ಹಿಂದಿನ ರಾಜಕಾರಣಿಗಳು ನಿಸ್ವಾರ್ಥ ಸೇವೆಗೆ ಖ್ಯಾತರಾಗಿದ್ದರೇ ಹೊರತು  ಖಂಡಿತವಾಗಿಯೂ  ಈಗಿನಷ್ಟು ಲೂಟಿಯಂತೂ ಇರಲಿಲ್ಲ.

sankayduttಕೆಲ ವರ್ಷಗಳ ಹಿಂದಿನವರೆಗೂ ನಮ್ಮ ಸಂಸ್ಕಾರ ಮತ್ತು ಸಂಸ್ಕೃತಿಗಳ ಮೇಲೆ ನಮ್ಮವರಿಗೆ ಎಲ್ಲರಿಗೂ ಅಪಾರವಾದ ನಂಬಿಕೆ ಇತ್ತು. ನಮ್ಮ ಆಚಾರ ವಿಚಾರಗಳನ್ನು ಅನೂಚಾನವಾಗಿ ಪಾಲಿಸಿಕೊಂಡು ಹೋಗುತ್ತಿದ್ದರು.   ಚಲನಚಿತ್ರಗಳಲ್ಲಿ ಅಸಭ್ಯ ಮತ್ತು ಅನಾಗರೀಕವಾದ ವಿಷಯಗಳನ್ನು ತೋರಿಸುತ್ತಿರಲಿಲ್ಲ. ಕ್ರಿಕೆಟಿಗರು ಮತ್ತು ರಾಜಕಾರಣಿಗಳು ಇಷ್ಟೊಂದು ಸೊಕ್ಕಿನಿಂದ ಇರುತ್ತಿರಲಿಲ್ಲ. ದುರಾದೃಷ್ಟವಷಾತ್  ಇಂದು ಅದೇ ಚಿತ್ರ ನಟರು, ಕ್ರಿಕೆಟಿಗರು ಮತ್ತು ರಾಜಕಾರಣಿಗಳನ್ನು ದೇವರನ್ನಾಗಿಸಿ ಅವರನ್ನು ಆರಾಧಿಸುವ ಬೌದ್ಧಿಕ ದಿವಾಳಿತನದವರೇ ಹೆಚ್ಚಾಗಿದ್ದಾರೆ.

ನಿಧಾನವಾಗಿ ಅವರೆಲ್ಲರೂ ನಮ್ಮನ್ನು ದೋಚಲು ಆರಂಭಿಸಿದರೆ ನಮಗೆ ಗೊತ್ತಿಲ್ಲದಂತೆಯೇ ಸಂತೋಷದಿಂದ ನಾವುಗಳು ಅವರ ಅಂಧಾಭಿಮಾನಿಗಳಾಗಿಯೋ ಇಲ್ಲವೇ  ಹಿಂಬಾಲಕರಾಗಿ ಒಂದಿ ರೀತಿಯ  ಮಾಫಿಯಾದ ಹಿಡಿತದಲ್ಲಿ ಸಿಕ್ಕಿಹಾಕಿಕೊಳ್ಳುವ ಹಾಗೆ ಸಿಕ್ಕಿಕೊಳ್ಳುವ ಮೂಲಕ, ನಮ್ಮ, ನಮ್ಮ ಮಕ್ಕಳ ಮತ್ತು ನಮ್ಮ ದೇಶದ ಭವಿಷ್ಯವನ್ನು ನಾಶ ಮಾಡುತ್ತಿರುವುದಲ್ಲದೇ ನಮ್ಮೆಲ್ಲರ ಶ್ರಮವೆಲ್ಲವನ್ನೂ ವ್ಯರ್ಥಗೊಳಿಸುತ್ತಿದ್ದೇವೆ.

hochinಅದೊಮ್ಮೆ ವಿಯೆಟ್ನಾಂ ಅಧ್ಯಕ್ಷರಾಗಿದ್ದ ಹೋ-ಚಿ-ಮಿನ್ಹ್ ಭಾರತಕ್ಕೆ ಬಂದಿದ್ದಾಗ.  ಭಾರತೀಯ ಮಂತ್ರಿಗಳೊಂದಿಗೆ ಮಾತನಾಡುತ್ತಾ, ನೀವೇನು ಮಾಡಿಕೊಂಡಿದ್ದೀರಿ? ಎಂದು ವಿಚಾರಿಸಿದಾಗ ನಮ್ಮ ಮಂತ್ರಿಗಳೊಬ್ಬರು, ನಾವು ರಾಜಕೀಯ ಮಾಡಿಕೊಂಡಿದ್ದೇವೆ ಎಂದು ಉತ್ತರಿಸಿದರಂತೆ.

ಮಂತ್ರಿಗಳ ಉತ್ತರದಿಂದ ವಿಚಲಿತರಾದ  ವಿಯಟ್ನಾಂ ಅಧ್ಯಕ್ಷರು ಮತ್ತೊಮ್ಮೆ ನೀವೇನು ಕೆಲಸ ಮಾಡುತ್ತಿದ್ದೀರೀ? ಎಂದು ಬಿಡಿಸಿ ಕೇಳಿದಾಗಲೂ, ರಾಜಕೀಯವೇ ನಮ್ಮ ವೃತ್ತಿ ಎಂದರಂತೆ ನಮ್ಮ ಮಂತ್ರಿಗಳು.

hochin2ಮಂತ್ರಿಗಳ  ಈ ರೀತಿಯ ಉತ್ತರದಿಂದ ಸ್ವಲ್ಪ ಸಿಟ್ಟಾದ ಹೋ-ಚಿ-ಮಿನ್ಹ್ ಬಹುಶಃ ನೀವು ನನ್ನ ಪ್ರಶ್ನೆಯನ್ನು ಅರ್ಥವನ್ನು ಅರ್ಥಮಾಡಿಕೊಂಡಿಲ್ಲ ಎನಿಸುತ್ತದೆ  ನಾನೂ ಸಹಾ ರಾಜಕೀಯವನ್ನೂ ಮಾಡುತ್ತೇನೆ. ಆದರೆ ವೃತ್ತಿಯಲ್ಲಿ ನಾನು ಕೃಷಿಕ ಮತ್ತು ಜೀವನೋಪಾಯಕ್ಕಾಗಿ  ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ಒಕ್ಕಲುತನವನ್ನು ನಿಷ್ಠೆಯಿಂದ ಮಾಡುತ್ತೇನೆ. ಹಗಲಿನಲ್ಲಿ ನಮ್ಮ ದೇಶದ ರಾಷ್ಟ್ರಪತಿಯಾಗಿ ದೇಶದ ಜವಾಬ್ದಾರಿಯನ್ನು ಹೊರುತ್ತೇನೆ  ಎಂದಾಗ ನಮ್ಮ ದೇಶದ ನಿಯೋಗ ಮೂಗಿನ ಮೇಲೆ ಬೆರಳಿಟ್ಟುಕೊಂಡಿದ್ದಂತೆ.

ಅಮೇರಿಕಾವೂ ಸೇರಿದಂತೆ  ಅದೆಷ್ಟೋ ದೇಶಗಳ  ಅಧ್ಕಕ್ಷರು ಮತ್ತು ಪ್ರಧಾನಿಗಳು ತಮ್ಮ ಅಧಿಕಾರಧ ಅವಧಿ ಮುಗಿದ ನಂತರ ಜೀವನೋಪಾಯಕ್ಕಾಗಿ ಮಾಜೀ ಅಧ್ಯಕ್ಷರು ಎನ್ನುವ ಹಮ್ಮು ಬಿಮ್ಮು ಇಲ್ಲದೇ, ಯಾವುದೋ ಒಂದು ಕೆಲಸವನ್ನು ಮಾಡುವುದನ್ನು ನೋಡಬಹುದಾಗಿದೆ. ದುರಾದೃಷ್ಟವಷಾತ್ ನಮ್ಮ ದೇಶದಲ್ಲಿ ಒಂದು ಪಂಚಾಯಿತಿ ಸದಸ್ಯರೋ ಇಲ್ಲವೇ ನಗರ ಪಾಲಿಕೆ ಸದಸ್ಯರಾದರೂ ಸಾಕೂ ತಮ್ಮ ಮುಂದಿನ ಹತ್ತಾರು ತಲೆಮಾರಿಗೆ ಆಗುವಷ್ಟು ಅಕ್ರಮ ಆಸ್ತಿಗಳನ್ನು ಸಂಪಾದನೆ ಮಾಡುವುದು ನಿಜಕ್ಕೂ ಛೇಧಕರವೇ ಸರಿ. ಕಲ ವರ್ಷಗಳ ಹಿಂದಿನ ಸಮೀಕ್ಷೆಯ ಪ್ರಕಾರ ಭಾರತದಲ್ಲಿ 6 ಲಕ್ಷಕ್ಕೂ ಹೆಚ್ಚು ಜನರು ತಮ್ಮ ಜೀವನೋಪಾಯಕ್ಕೆ ರಾಜಕೀಯವನ್ನೇ ಆಶ್ರಯಿಸಿರುವುದಲ್ಲದೇ, ಈಗ ಅವರ  ಸಂಖ್ಯೆ ಕೋಟಿಗಳಿಗಿಂತಲು ಅಧಿಕವಾಗಿರುವುದು ನಿಜಕ್ಕೂ ಕಳವಳಕಾರಿಯಾದ ಸಂಗತಿಯಾಗಿದೆ.

cinimaಕೆಲವೇ ತಿಂಗಳುಗಳ ಹಿಂದೆ, ಕರೋನಾದಿಂದ ಇಡೀ ದೇಶದಲ್ಲಿ ತಿನ್ನಲು  ಆಹಾರವೇ ಇಲ್ಲ, ಲಸಿಕೆ ಇಲ್ಲಾ  ಎಂದು ಎಲ್ಲವನ್ನು ಸರ್ಕಾರವೇ ಉಚಿತವಾಗಿ ಕೊಡಬೇಕು ಎಂದು ಗೀಳಿಡುತ್ತಿದ್ದವರೇ ಹೊಟ್ಟೆಗೆ ಹಿಟ್ಟಿಲ್ಲದಿದ್ದರೂ ಜುಟ್ಟಿಗೆ ಮಲ್ಲಿಗೆ ಹೂ ಎನ್ನುವಂತೆ ಇಂದು ತಮ್ಮ ನೆಚ್ಚಿನ ನಾಯಕರುಗಳ ಸಿನಿಮಾ ಟಿಕೆಟ್ಟಿಗಾಗಿ ಸಾವಿರಾರು ರೂಪಾಯಿ ಖರ್ಚು ಮಾಡಲು ಸಿದ್ದರಿದ್ದಾರೆ ಎಂದರೆ ನಮ್ಮ ಇಂದಿನ ಯುವ ಜನತೆಯ ಆದ್ಯತೆಗಳು ಮತ್ತು ಆದರ್ಶಗಳು ಬದಲಾಗುತ್ತಿವೆ ಎಂಬುದಕ್ಕೆ ಸ್ಪಷ್ಟ ಉದಾಹಣೆಯಾಗಿದೆ.

block_cicketsಹಾಗೆ  ಟಿಕೆಟ್ ಸಿಗಲಿಲ್ಲ ಎಂದು ಬ್ಲಾಕ್ ಟಿಕೇಟ್ ತೆಗೆದುಕೊಂಡು ನೋಡುತಿದ್ದರೆ, ಇನ್ನೂ ಕೆಲವರು ಬ್ಲಾಕ್ ಟಿಕೇಟ್ ಸಹಾ ಸಿಗಲಿಲ್ಲ  ಎಂದು ಥಿಯೇಟರ್ ಮುಂದೆ ಥರಣಿ ನಡೆಸಿದ ಉದಾರಣೆಯನ್ನೂ  ಅದೇ ಮಾಧ್ಯಮದವರು ತೋರಿಸುತ್ತಿದ್ದಾರೆ.  ಹಾಗಾದರೆ ತಿನ್ನಲು ಆಹಾರವಿಲ್ಲ ಎಂದು ಜನರು ಹಸಿವಿನಿಂದ ಸಾಯುತ್ತಿದ್ದಾರೆ ಎಂದರೆ,  ಒಬ್ಬ ನಾಯಕ ನಟನ ಸಿನಿಮಾಕ್ಕೆ ನೂರಾರು ರೂಪಾಯಿಗಳನ್ನು  ಖರ್ಚು ಮಾಡಲು ಹಣ ಎಲ್ಲಿಂದ ಬರುತ್ತದೆ?  ಎಂದು ಯಾರಾದರೂ ಹೇಳಲು ಸಾಧ್ಯವೇ?

ಇಂದಿನ ಯುವ ಜನತೆಗೆ ವಿಜ್ಞಾನಿಗಳು, ಸಂಶೋಧಕರು, ಶಿಕ್ಷಣತಜ್ಞರು ಆದರ್ಶವಲ್ಲ. ಬದಲಾಗಿ ಸಿನಿಮಾ  ನಟರು, ರಾಜಕಾರಣಿಗಳು ಮತ್ತು ಕ್ರಿಕೆಟ್ ಆಟಗಾರರು  ಆದರ್ಶ ಮತ್ತು  ಆದ್ಯತೆಗಳಾಗುತ್ತಿದ್ದಾರೆ  ಯಾವ ದೇಶದಲ್ಲಿ ಇಂತಹ ಬೌದ್ಧಿಕ ದೀವಾಳಿತನ ಹೆಚ್ಚುತ್ತದೆಯೋ ಅಂತಹ ದೇಶ ಖಂಡಿತವಾಗಿಯೂ ಎಂದಿಗೂ ಪ್ರಗತಿಯಾಗುವುದಿಲ್ಲ. ಅಂತಹ ದೇಶವು ಸಾಂಸ್ಕೃತಿಕವಾಗಿ, ಕಾರ್ಯತಂತ್ರವಾಗಿ ದೇಶವು ಹಿಂದುಳಿಯುವುದಲ್ಲದೇ  ಅಂತಹ ದೇಶಗಳ  ಏಕತೆ ಮತ್ತು ಸಮಗ್ರತೆಯು ಯಾವಾಗಲೂ ಅಪಾಯದಲ್ಲಿರುತ್ತದೆ.

ಈ ರೀತಿಯಾಗಿ ಅನಗತ್ಯ ಮತ್ತು ಅಪ್ರಸ್ತುತ ವಲಯದ ಪ್ರಾಬಲ್ಯವು ಬೆಳೆಯುತ್ತಿರುವ ದೇಶವು  ದಿನದಿಂದ ದಿನಕ್ಕೆ ದುರ್ಬಲಗೊಳ್ಳುತ್ತದೆ ಮತ್ತು ಅಂತಹ  ದೇಶಗಳಲ್ಲಿ ಭ್ರಷ್ಟರು ಮತ್ತು ದೇಶವಿರೋಧಿಗಳ ಸಂಖ್ಯೆ ಹೆಚ್ಚುತ್ತಲೇ ಹೋಗುತ್ತದೆ. ಅಂತಹ ದೇಶದಲ್ಲಿ  ಪ್ರಾಮಾಣಿಕರು ಬದುಕಲು ನಿಜಕ್ಕೂ ಬವಣೆ ಪಡಬೇಕಾಗುತ್ತದೆ.

youthಹಾಗಂದ ಮಾತ್ರಕ್ಕೆ ಎಲ್ಲಾ ಕ್ಷೇತ್ರಗಳಲ್ಲಿಯೂ ಕೆಟ್ಟವರೇ ಇದ್ದಾರೆ ಎನ್ನುವಂತಿಲ್ಲ ಅಲ್ಲಿಯೂ ಕೆಲವು ಒಳ್ಳೆಯ ಜನರಿದ್ದಾರೆ. ಅಂತಹ ವ್ಯಕ್ತಿ ಮತ್ತು ವ್ಯಕ್ತಿತ್ವ ನಮಗೆ  ಸದಾಕಾಲವೂ  ಗೌರವವಿದೆ. ಹಾಗಾಗಿ ಅಂತಹ  ಪ್ರತಿಭಾವಂತರು, ಪ್ರಾಮಾಣಿಕರು, ನಿಸ್ವಾರ್ಥ  ಆತ್ಮಸಾಕ್ಷಿಯುಳ್ಳ  ಸಮಾಜ ಸೇವಕರು, ನಿಜವಾದ ದೇಶಭಕ್ತ ಹೋರಾಟಗಾರು, ಸ್ವಾರ್ಥವಿಲ್ಲದೇ ದೇಶಕ್ಕಾಗಿ ಆಡುವ ಆಟಗಾರು ಮತ್ತು ಸ್ವಾರ್ಥ ಕಡಿಮೆ ಸಮಾಜಕ್ಕೆ ಸರ್ವಸ್ವ ಎನ್ನುವಂತಹ, ಪರೋಪಕಾರಾಯ ಇದಂ ಶರೀರಂ ಎಂದು ಮತ್ತೊಬ್ಬರ ಸಹಾಯಕ್ಕೆ ತುಡಿಯುವಂತಹ ಮನಸ್ಸುಳ್ಳವರನ್ನು ಬೆಳಸುವಂತಹ ವಾತಾವರಣವನ್ನು ಸೃಷ್ಟಿಸುವ ಗುರುತರವಾದ ಜವಾಬ್ಧಾರಿಯು ನಮ್ಮ ನಿಮ್ಮೆಲ್ಲರ ಮೇಲಿದೆ.

ಏನಂತೀರೀ?

ನಿಮ್ಮವನೇ ಉಮಾಸುತ

ಸಾಮಾಜಿಕ ಜಾಲತಾಣವೊಂದರಲ್ಲಿ ಓದಿದ್ದ  ಆಂಗ್ಲ ಸಂದೇಶವೊಂದರಿಂದ ಪ್ರೇರಿತವಾದ ಲೇಖನವಾಗಿದೆ.

ಮೋಹಕ ನಟ ನಟಿಯರೋ? ಮಾದಕ ವ್ಯಸನಿಗಳೋ?

ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ) ಬೆಂಗಳೂರಿನ ಕಲ್ಯಾಣ್ ನಗರದ ರಾಯಲ್ ಸೂಟ್ಸ್ ಹೋಟೆಲ್ ಅಪಾರ್ಟ್ಮೆಂಟ್ನಿಂದ ಆಗಸ್ಟ್ 21 ರಂದು ಮಾಜಿ ಕಿರುತೆರೆ ನಟಿ ಅನಿಕಾ ಡಿ ಮತ್ತು ಅವರ ಇಬ್ಬರು ಸಹಚರರಾದ ಎಂ ಅನೂಪ್ ಮತ್ತು ಆರ್ ರವೀಂದ್ರನ್ ಅವರನ್ನು ಬಂಧಿಸಿ ಅವರಿಂದ 145 ಎಂಡಿಎಂಎ ಮಾತ್ರೆಗಳು ಮತ್ತು 2.2 ಲಕ್ಷ ರೂ.ಗಳ ಹಣವನ್ನು ವಶಪಡಿಸಿಕೊಂಡಿದ್ದಲ್ಲದೇ ಅವರ ಮಾಹಿತಿಯ ಮೇಲೆ ಇತರೇ ಹಲವಾರು ಕಡೆ ಧಾಳಿ ನಡೆಸಿ. 96 ಎಂಡಿಎಂಎ ಮತ್ತು 180 ಎಲ್ಎಸ್ಡಿ ಬ್ಲಾಟ್ಗಳನ್ನು ಮುಟ್ಟುಗೋಲು ಹಾಕಿಕೊಂಡು ನಂತರ, ದೊಡ್ಡಗುಬ್ಬಿಯಲ್ಲಿರುವ ಅನಿಖಾ ಡಿ ಅವರ ಮನೆಯಿಂದಲೂ 270 ಎಂಡಿಎಂ ಮಾತ್ರೆಗಳನ್ನು ವಶಪಡಿಸಿಕೊಂಡಿದೆ.

ತನಿಖೆಯ ಸಮಯದಲ್ಲಿ ಈ ಎಲ್ಲಾ ಮಾದಕದ್ರವ್ಯಗಳನ್ನು ಕನ್ನಡದ ಹಿರಿ ಮತ್ತು ಕಿರಿ ತೆರೆಯ ಪ್ರಮುಖ ಸಂಗೀತಗಾರರು, ನಟ, ನಟಿಯರಲ್ಲದೇ ರಾಜ್ಯದ ಉದ್ಯಮಿಗಳು ಮತ್ತು ರಾಜಕಾರಣಿಗಳ ಮಕ್ಕಳಿಗೆ ಸರಬರಾಜು ಮಾಡುತ್ತಿದ್ದರೆಂಬ ಭಯಂಕರ ವಿಷಯ ಹೊರಬಿದ್ದಿದ್ದು. ಸುಮಾರು ನಾಲ್ಕು ಪುಟಗಳಲ್ಲಿ ಬಹುತೇಕರ ಹೆಸರುಗಳನ್ನು ಬಹಿರಂಗ ಪಡಿಸಿದ್ದಾರೆ ಎಂಬ ಸುದ್ದಿ ಎಲ್ಲೆಡೆ ಹರಿದಾಡುತ್ತಿದೆ.

ಆರೋಪಿಗಳು ವಿದೇಶಗಳಿಂದ ಈ ಮಾದಕದ್ರವ್ಯಗಳನ್ನು ಕಳ್ಳಸಾಗಣೆ ಮಾಡಿ ಅದನ್ನು ಗುಟ್ಟಾಗಿ ನಗರದ ಖ್ಯಾತನಾಮರಿಗೆ ತಲುಪಿಸುತ್ತಿದ್ದರು ಎಂದು ತಿಳಿದು ಬಂದಿದೆ. ಆರೋಪಿಗಳ ಮೊಬೈಲಿನಲ್ಲಿರುವ ಮೊಬೈಲ್ ಸಂಖ್ಯೆಗಳಲ್ಲಿ ಬಹುತೇಕ ಖ್ಯಾತ ಕನ್ನಡ ಸಿನೆಮಾ ರಂಗದ ನಟ ನಟಿಯರು, ಪ್ರಮುಖ ಸಂಗೀತಗಾರರು ಮತ್ತು ವಿವಿಐಪಿಗಳ ಮಕ್ಕಳುಗಳಿಗೆ ಸೇರಿದ್ದಾಗಿದ್ದು ಅವರೊಡನೆ ಇರುವ ಅನೇಕ ಪೋಟೋಗಳೂ ಮೊಬೈಲಿನಲ್ಲಿ ಲಭ್ಯವಾಗಿದೆ ಎಂದು ತಿಳಿದು ಬಂದಿದೆ.

ಬಂಧಿತ ಡ್ರಗ್ ಡೀಲರ್ ಅನಿಕಾ, ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜಿನಲ್ಲಿ ಕನ್ನಡ ಸ್ಟಾರ್ ನಟಿಯೊಬ್ಬರು ಆಕೆಯ ಸಹಪಾಠಿಯಾಗಿದ್ದರು ಎಂಬ ಎಂಬ ವಿಚಾರ ತನಿಖೆಯ ಸಮಯದಲ್ಲಿ ಅಧಿಕಾರಿಗಳಿಗೆ ತಿಳಿದು ಬಂದಿದ್ದು, ಬಹುಶಃ ಆಕೆಯ ಮೂಲಕವೇ, ಅನಿಖಾ ಕಿರತೆರೆಯಲ್ಲಿ ಕೆಲ ಕಾಲ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸಿ, ಎಲ್ಲರ ಸಂಪರ್ಕ ಪಡೆದುಕೊಂಡ ನಂತರ ತನ್ನ ನಟನೆಯನ್ನು ನಿಲ್ಲಿಸಿ ಮಾದಕ ವಸ್ತುಗಳನ್ನು ಎಲ್ಲರಿಗೂ ಪೂರೈಸುತ್ತಿರಬಹುದಾ? ಎಂದು ತನಿಖೆ ನಡೆಸುತ್ತಿದ್ದಾರೆ.

ಈ ಸುದ್ದಿ ಕಾಳ್ಗಿಚ್ಚಿನಂತೆ ಹೊರ ಬೀಳಿತ್ತಿದ್ದಂತೆಯೇ. ಕ್ರೀಡಾಪಟು. ಪತ್ರಿಕೋದ್ಯಮಿ, ನಟ ಮತ್ತು ಖ್ಯಾತ ಚಲನಚಿತ್ರ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ಅವರು ಇದರ ಕುರಿತಂತೆ ನೀಡಿರುವ ಹೇಳಿಕೆ ಮತ್ತಷ್ಟು ಆಘಾತಕಾರಿಯಾಗಿದೆ. ಸಮಾಜಕ್ಕೆ ಒಳ್ಳೆಯದಾಗಬೇಕು, ಯುವ ಜನತೆ ಮಾದಕ ಜಾಲದಲ್ಲಿ ಸಿಲುಕಬಾರದು ಎಂಬ ಕಳಕಳಿಯಿಂದಾಗಿ ತಾನು ತನಗೆ ಗೊತ್ತಿರುವ ಎಲ್ಲಾ ಮಾಹಿತಿಗಳನ್ನೂ ನೀಡಲು ಸಿದ್ದ ಎಂದು ಹೇಳಿರುವ ಅವರು, ಇದರಿಂದ ತಮ್ಮ ಮೇಲೆ ಹಲ್ಲೆಗಳಾಗುವ ಸಂಭವಿದ್ದು ಅದಕ್ಕೆ ಸೂಕ್ತ ಭಧ್ರತೆಯನ್ನೂ ಪೋಲೀಸರಲ್ಲಿ ಕೋರಿದ್ದಾರೆ.
ಗಾಂಧೀನಗರದಲ್ಲಿ ದಿಢೀರನೆ ಹೆಸರು ಮಾಡಿದ ಕೆಲ ಯುವ ನಟ, ನಟಿಯರು ಡ್ರಗ್ ಜಾಲದಲ್ಲಿ ಸಿಲುಕಿರುವುದು ತಮ್ಮ ಗಮನಕ್ಕೆ ಬಂದಿದ್ದು ಈ ಕುರಿತಂತ ಅನೇಕ ಹಿರಿಯ ನಟರು ತಮ್ಮ ಬಳಿ ಅಳಲನ್ನು ತೋಡಿಕೊಂಡಿದ್ದಾರೆ ಇದರ ಬಗ್ಗೆ ನ್ಯಾಯಯುತವಾದ ತನಿಖೆ ನಡೆದು ಇದರ ಹಿಂದೆ ಯಾರು ಇದ್ದಾರೆ ಮತ್ತು ಈ ಜಾಲದಲ್ಲಿ ಚಲಚಿತ್ರರಂಗದ ಯಾರ್ಯಾರು ಭಾಗಿಗಳಾಗಿದ್ದಾರೆ ಎಂಬುದು ಹೊರಬರಬೇಕಿದೆ ಎಂದು ಹೇಳಿದ್ದಾರೆ.

ಮುಂಬೈ ಚಿತ್ರ ಜಗತ್ತಿನಲ್ಲಿ ಅನೇಕ ನಟ, ನಟಿಯರು ಇಂತಹ ಜಾಲದಲ್ಲಿ ಸಿಲುಕಿರುವುದು ಈಗಾಗಲೇ ಜಗಜ್ಜಾಹೀರಾಗಿದ್ದು ನಮ್ಮ ಚಂದನವನ ಅದೇ ದಾರಿಯನ್ನು ಹಿಡಿಯಬಾರದು ಎಂಬ ಆಶಯದೊಂದಿಗೆ ಪೋಲೀಸರ ತನಿಖೆಗೆ ಎಲ್ಲ ರೀತಿಯಲ್ಲಿಯೂ ಸಿದ್ಧರಿರುವುದಾಗಿ ಇಂದ್ರಜಿತ್ ಲಂಕೇಶ್ ತಿಳಿಸಿದ್ದಾರೆ. ಕನ್ನಡ ಚಿತ್ರರಂಗದ ಮಂದಿ ಡ್ರಗ್ಸ್ ಮಾಫಿಯಾದಲ್ಲಿ ಸಿಲುಕಿದ್ದಾರೆ ಎಂಬುದು ಹೋಸಾ ವಿಷಯವೇನಲ್ಲ. ಮೂರ್ನಾಲ್ಕು ವರ್ಷಗಳ ಹಿಂದೆಯೇ ಅಶೋಕ ಪಿಲ್ಲರ್ ಬಳಿ ಬೆಳ್ಳಂಬೆಳಿಗ್ಗೆ ಖ್ಯಾತ ಮದ್ಯ ಉದ್ಯಮಿಯ ಮೊಮ್ಮಗ ಮತ್ತು ಹಲವಾರು ಕನ್ನಡ ಚಿತ್ರರಂಗದ ಉದಯೋನ್ಮುಖ ನಟರು ಮತ್ತು ಹೆಸರಾಂತ ನಟರ ಮಗನ ಕಾರ್ ಅಪಘಾತಕ್ಕೆ ಒಳಗಾದ ಸಮಯದಲ್ಲಿ ಆ ಕಾರ್ ಒಳಗೆ ಇದ್ದವರೆಲ್ಲರೂ ಮಾದಕದ್ರವ್ಯದ ನಶೆಯಲ್ಲಿದ್ದರು ಮತ್ತು ಅಲ್ಲಿ ಮಾದಕ ವಸ್ತುಗಳು ದೊರೆಕಿತ್ತು ಎಂದು ಪ್ರತ್ಯಕ್ಷದರ್ಶಿಗಳೇ ತಿಳಿಸಿದರೂ ಕಾಣದ ಕೈಗಳ ವಶೀಲೀಕರಣದಿಂದಾಗಿ ತನಿಖೆ ಹಳ್ಳ ಹಿಡಿದದ್ದನ್ನು ಇಂದ್ರಜಿತ್ ಲಂಕೇಶ್ ನೆನಪಿಸಿದ್ದಾರೆ.

ಅದೇ ರೀತಿ ಲಾಕ್ಡೌನ್ ಆರಂಭದ ವೇಳೆಯಲ್ಲಿ ನಟಿ ಶರ್ಮಿಳಾ ಮಾಂಡ್ರೆ ಅವರ ಕಾರು ಮೌಂಟ್ ಕಾರ್ಮೆಲ್ ಕಾಲೇಜ್ ಬಳಿ ತಡರಾತ್ರಿಯಲ್ಲಿ ಅಪಘಾತವಾದ ಸಮಯದಲ್ಲಿಯೂ ಕಾರಿನಲ್ಲಿ ಇದ್ದವರೆಲ್ಲರೂ ಮಾದಕ ದ್ರವ್ಯಗಳನ್ನು ಸೇವಿಸಿದ್ದರು ಎಂಬ ಗಂಭೀರ ಆರೋಪ ಕೇಳಿಬಂದಿತ್ತು. ಆಗ ಶರ್ಮಿಳಾ ಮಾಂಡ್ರೆ ಅವರ ಜೊತೆ ಆ ಕಾರಿನಲ್ಲಿ ಇದ್ದದ್ದು ಬೆಂಗಳೂರಿನ ದೊಡ್ಡ ಡ್ರಗ್ಸ್ ಪೆಡ್ಲರ್ ಎಂಬ ಆರೋಪ ಕೇಳಿ ಬರುತ್ತಿದೆ.

ಈ ದಂಧೆ ಕೇವಲ ಮಾದಕ ದ್ರವ್ಯಕ್ಕೆ ಮಾತ್ರವೇ ಮೀಸಲಾಗಿರದೇ ಹಿರಿ ಮತ್ತು ಕಿರಿತೆರೆಯ ಉದಯೋನ್ಮುಖ ನಟಿಯರನ್ನು ಬಳಸಿಕೊಂಡು ಉದ್ಯಮಿಗಳು. ರಾಜಕಾರಣಿಗಳು ಮತ್ತು ಅವರ ಮಕ್ಕಳನ್ನು ಹನಿಟ್ರ್ಯಾಪ್ ಕೂಡಾ ಮಾಡಿದ ಆರೋಪ ಸಹ ಕೇಳಿ ಬರುತ್ತಿದೆ. ಇದಲ್ಲದೇ ಕೆಪಿಎಲ್ ಮ್ಯಾಚ್ ಫಿಕ್ಸಿಂಗ್ ಮತ್ತು ಸ್ಪಾಟ್ ಫಿಕ್ಸಿಂಗ್ನಲ್ಲಿ ಈಗಾಗಲೇ ಸಿಕ್ಕಿ ಹಾಕಿಕೊಂಡಿರುವ ಕರ್ನಾಟಕದ ಖ್ಯಾತ ಕ್ರಿಕೆಟಿಗರ ಜೊತೆಯೂ ಇದರ ಸಂಬಂಧ ಇರಬಹುದು ಎಂಬ ಅನುಮಾನ ಬಂದಿದ್ದು ಪೋಲೀಸರ ನಿಷ್ಪಕ್ಷಪಾತ ಅನಿಕೆಯ ಮುಖಾಂತರ ತಿಳಿದು ಬರುವ ಸಾಧ್ಯತೆ ಇದೆ.

ಕೆಲ ನಟ ನಟಿಯರು ಶೂಟಿಂಗ್ ಗೆ ಬರುವಾಗಲೂ ಮಾದಕದ್ರವ್ಯ ಸೇವಿಸಿ ನೆಶೆಯಲ್ಲಿ ಇರುತ್ತಾರೆ ಇಲ್ಲವೇ, ಶೂಟಿಂಗ್ ಮುಗಿದ ನಂತರ ತಮ್ಮ ಕ್ಯಾರಾವಾನ್ಗಳಲ್ಲಿ ಕುಳಿತು ಒಟ್ಟಾಗಿಯೇ ಮಾದಕದ್ರವ್ಯಗಳನ್ನು ಸೇವಿಸುತ್ತಾರೆ ಎಂಬ ಆರೋಪ ಕೇಳಿ ಬರುತ್ತಿದೆ. ಇದಕ್ಕೆ ಪುಷ್ಠಿ ನೀಡುವಂತೆ ಈ ನಟರು ಆಗ್ಗಾಗ್ಗೆ ತಮ್ಮ ಫಾರ್ಮ್ ಹೌಸಿನಲ್ಲಿಯೋ ಅಥವಾ ನಗರದ ಹೊರವಲಯದ ರೆಸಾರ್ಟ್ಗಳಲ್ಲಿ ರೇವ್ ಪಾರ್ಟಿ ನಡೆಸುತ್ತಾ ಅಲ್ಲಿಗೆ ಬರುವ ಅನೇಕ ನಟ ನಟಿಯರ ಕಾರ್ ಗಳಲ್ಲಿ ಬಹಳಷ್ಟು ಬಾರಿ ಮಾದಕ ವಸ್ತುಗಳು ಪತ್ತೆ ಯಾಗಿದ್ದರೂ ತಮ್ಮ ಪ್ರಭಾವ ಬಳಸಿ ಪ್ರಕರಣವನ್ನು ‌ಮುಚ್ಚಿಹಾಕಿದ್ದಾರೆ ಎನ್ನಲಾಗಿದೆ.

ಕೇವಲ ಒಂದೆರಡು ಚಿತ್ರಗಳಲ್ಲಿ ನಟಿಸಿದ ನಟ ನಟಿಯರೂ ಈ ರೀತಿಯ ವ್ಯವಹಾರದಿಂದಲೇ, ರಾತ್ರೋ ರಾತ್ರಿ ಬೆಂಜ್, ಮರ್ಸಿಡಿಸ್ ಕಾರ್ ಗಳಲ್ಲಿ ಓಡಾಡುತ್ತಿರುವುದು ಎಲ್ಲರ ಗಮನಕ್ಕೆ ಬಂದಿದೆ. ಇದಕ್ಕೆ ಸ್ಪಂದಿಸಿರುವ ಖ್ಯಾತ ನಿರ್ಮಾಪಕ ರಾಕ್‌ ಲೈನ್ ವೆಂಕಟೇಶ್ ನಮ್ಮ ಕನ್ನಡ ಇಂಡಸ್ಟ್ರಿಯಲ್ಲಿ ಆ ರೀತಿ ಯಾರೂ ಇಲ್ಲ ಎಂದು ತಿಪ್ಪೇ ಸಾರಿಸಿದ್ದರೆ, ಗುಳಿಗೆ ಕೆನ್ನೆಯ ನಟಿ ರಚಿತಾ ರಾಮ್, ಕರ್ಮ ಅನ್ನೋದು ಇದೆಯಲ್ಲಾ ನಾವು ಬಿಟ್ಟರೂ ಅದು ನಮ್ಮನ್ನ ಬಿಡೋದಿಲ್ಲ. ನಾನ್ ತಗೋಳೋದಿಲ್ಲ.. ತಗೋಳೋರ್ ಬಗ್ಗೆ ನನಗೆ ಗೊತ್ತಿಲ್ಲ.. ನಮ್ಮ ನಮ್ಮ ಫ್ಯಾಮಿಲಿನ ನಾವೇ ನೋಡ್ಕೋಬೇಕು.. ಯಾರೂ ಸಹ ಬಂದು ನೋಡ್ಕೋಳೊಲ್ಲ.. ಅದಕ್ಕಾಗಿ ಯಾರೂ ಸಹ ಇಂತಹ ವಸ್ತುಗಳಿಗೆ ದಾಸರಾಗಬೇಡಿ.. ಆರೋಗ್ಯ ಕಾಪಾಡಿಕೊಳ್ಳಿ ಎಂದಿದ್ದಾರೆ.

ಆದರೆ ಇದಕ್ಕೆ ತದ್ವಿರುದ್ದವಾಗಿ ಶ್ರೇಷ್ಠ ಮನುಜ ಜನ್ಮ! ಅದು ನಶ್ವರ ಸತ್ಯ! ಆದರೂ ಆ ನಶ್ವರ ದೇಹ ನಶಿಸುವ ಮುನ್ನ ಸಾರ್ಥಕಪಡಿಸಿ ಬದುಕಬೇಕು. ನಶೆ ಹಿಂದೆ ಬರೀ ಸಿನಿಮಾ ಅಲ್ಲಾ, ಸಮಾಜವೇ ಆಕರ್ಷಿತ ಆಗುತ್ತಿದೆ. ಯಾರು ಶ್ರಮಪಟ್ಟು ಜೀವನ ಗೆದ್ದಿರುತ್ತಾರೆ ಅವರ ಹೆಜ್ಜೆ ತಪ್ಪುದಾರಿ ತುಳಿಯದು. ಯಾರು ವಾಮಮಾರ್ಗದಲ್ಲಿ ಗೆದ್ದಿರುತ್ತಾರೆ ಅವರೇ ನಶೆಹಾದರದ ದಾಸರು. ಉಪ್ಪು ತಿಂದವ ನೀರು ಕುಡಿಯುವ ಎಂದು ಟ್ವೀಟ್ ಮಾಡಿರುವ ಹಿರಿಯ ನಟ ಜಗ್ಗೇಶ್‌. ಒಂದು ಹಳೇ ಘಟನೆಯನ್ನೂ ಅವರು ನೆನಪು ಮಾಡಿಕೊಂಡಿದ್ದಾರೆ. ಬಲವಂತಕ್ಕೆ 2017ರಲ್ಲಿ ಒಬ್ಬ ರಾಜಕಾರಣಿಯ ಪಾರ್ಟಿಗೆ ಹೋಗಿದ್ದೆ. ಅರ್ಧ ಗಂಟೆಗೆ ಆ ಜಾಗ ಅಲ್ಲಿದ್ದವರ ಆರ್ಭಟ. ಬಂದು ಸೇರಿದ ಅರ್ಧ ಉಡುಗೆ ಸುಂದರಿಯರನ್ನು ಕಂಡು ನಾನು ನನ್ನ ಆತ್ಮೀಯ ಯುವನಟ ಹೇಳದೆ ಕೇಳದೆ ಲಿಫ್ಟು ಬಳಸದೆ 12 ಮಹಡಿ ಇಳಿದು ಓಡಿ ಬಂದಿದ್ದೆವಯ.. ಅದೇ ಕಡೆ, ಇಂದಿಗೂ ನನಗೆ ಯಾರೂ ಕರೆಮಾಡದಂತೆ ಮೊಬೈಲ್ ವರ್ಜಿಸಿದೆ. ಅಲ್ಲಿದ್ದವರು ಸಮಾಜದ ಎಲ್ಲ ಮುಖಗಳು’ ಎಂದು ಜಗ್ಗೇಶ್‌ ಟ್ವೀಟ್‌ ಮಾಡಿದ್ದಾರೆ.

ಈ ರೀತಿಯ ವೈರುದ್ಯ ಹೇಳಿಕೆಯನ್ನು ಗಮನಿಸಿದರೆ ಚಂದನವನದಲ್ಲಿ ಎಲ್ಲವೂ ಸರಿಯಿಲ್ಲ. ಸರಿ ಪಡಿಸಿಕೊಳ್ಳುವ ಸಮಯ ಬಂದಿದ್ದರೂ ಅದನ್ನು ಸರಿಪಡಿಸಿಕೊಳ್ಳುವ ಮನಸ್ಥಿತಿಯಲ್ಲಿ ಹೆಚ್ಚಿನವರು ಇಲ್ಲ ಎಂದು ಸ್ಪಷ್ಟವಾಗಿ ಗೋಚರಿಸುತ್ತಿದೆ ಚಂದನವನದಲ್ಲಿ ಚಂದನದ ಘಮಲಿನ ಜೊತೆ ಚರಸ್ ಮತ್ತು ಗಾಂ‍ಜಾ ಘಮಲು ನಟ ನಟಿಯರ ಅಮಲೇರಿಸಿದೆ ಎನ್ನುವುದು ಘನ ಘೋರ ಸತ್ಯವಾಗಿದೆ.

ಈ ಕರಾಳ ದಂಧೆ ಕೇವಲ ಚಿತ್ರರಂಗ, ರಾಜಕೀಯ, ಉದ್ಯಮ ಮತ್ತು ಕ್ರೀಡಾರಂಗಕ್ಕೆ ಮಾತ್ರವೇ ಮೀಸಲಾಗಿರದೇ, ತನ್ನ ಕಬಂಧ ಬಾಹುಗಳನ್ನು ಮಧ್ಯಮ ವರ್ಗದ ಯುವಕ ಯುವತಿಯರತ್ತವೂ ಚಾಚಿ, ಬಾಳಿ ಬೆಳಗ ಬೇಕಾಗಿದ್ದವರು ಸಣ್ಣ ಸಣ್ಣ ವಯಸ್ಸಿಗೇ ಮಾದಕದ್ರವ್ಯಗಳಿಗೆ ದಾಸರಾಗಿ ಅನೈತಿಕ ಚಟುವಟಿಕೆಗಳು ಮತ್ತು ಕಾನೂನು ಬಾಹೀರ ಚಟುವಟಿಕೆಗಳಲ್ಲಿ ಭಾಗಿಯಾಗಿ ವಯಸ್ಸಲ್ಲದ ವಯಸ್ಸಿಗೆ ಸಾವನ್ನಪ್ಪಿ ಪೋಷಕರ ಕಣ್ಣೀರು ಕೋಡಿ ಹರಿಯುತ್ತಿರುವುದು ನಿಜಕ್ಕೂ ಆಘಾತಕಾರಿಯಾಗಿದೆ.

ಕಬ್ಬಿಣ ಕೆಂಪಗೆ ಕಾದಿರುವಾಗಲೇ ಬಗ್ಗಿಸಬೇಕು ಎನ್ನುವಂತೆ ಈ ಸುದ್ದಿ ಹಸಿಯಾಗಿರುವಾಗಲೇ ಯಾರದೇ ವಶೀಲಿಗೆ ಒಳಗಾಗದೇ ಸೂಕ್ತ ತನಿಖೆ ನಡೆಸಿ ಅಪರಾಧಿಗಳಿಗೆ ಶಿಕ್ಷೆ ಕೊಡಿಸುವ ಮೂಲಕ ಸಮಾಜವನ್ನು ಸರಿದಾರಿಗೆ ತರಬೇಕೆಂದು ಪೊಲೀಸ್ ಆಯುಕ್ತ ಕಮಲ್ ಪಂತ್ ಅವರಲ್ಲಿ ಈ ಮೂಲಕ ಕೇಳಿ ಕೊಳ್ಳೋಣ.

ಏನಂತೀರೀ?