ಕ್ಯಾನ್ಸರ್ ನನ್ನ ದೇಹವನ್ನು ಬಾಧಿಸಿರಬಹುದು. ಆದರೆ ಸಮಾಜಸೇವೆ ಮಾಡುವ ನನ್ನ ಸಂಕಲ್ಪವನ್ನು ಯಾವ ಕಾಯಿಲೆಯೂ ಸೋಲಿಸಲು ಸಾಧ್ಯವಿಲ್ಲ. ಈ ಮಾತುಗಳು ಕೇವಲ ಒಂದು ವಾಕ್ಯವಲ್ಲ; ಜೀವನದೊಂದಿಗೆ ಹೋರಾಡುತ್ತಲೇ ಇತರರ ಬದುಕಿಗೆ ಬೆಳಕಾಗುತ್ತಿರುವ ಸಮಾಜಸೇವಕ ಸಂತೋಷ್ ಕುಮಾರ್ ರೈ ಬೋಳಿಯಾರ್ ಅವರ ಬದುಕಿನ ಘೋಷವಾಕ್ಯ.
ಒಬ್ಬ ವ್ಯಕ್ತಿ ತನ್ನ ಜೀವ ಉಳಿಸಿಕೊಳ್ಳಲು ಹೋರಾಡುತ್ತಿರುವಾಗ, ಇನ್ನೊಬ್ಬರಿಗಾಗಿ ಬದುಕುವುದು ಅಪರೂಪ. ಆದರೆ ದಕ್ಷಿಣ ಕನ್ನಡ ಜಿಲ್ಲೆಯ ಉಳ್ಳಾಲ ಸಮೀಪದ ಬೋಳಿಯಾರ್‌ನ ಸಂತೋಷ್ ಕುಮಾರ್ ರೈ ಅವರು ಇಂದು ಅದನ್ನೇ ಬದುಕಿನಲ್ಲಿ ಸಾಬೀತುಪಡಿಸುತ್ತಿದ್ದಾರೆ. ಕರುಳಿನ ಕ್ಯಾನ್ಸರ್‌ನೊಂದಿಗೆ ಹೋರಾಡುತ್ತಲೇ, ಬಡ ಮತ್ತು ನಿರ್ಗತಿಕ ಕುಟುಂಬಗಳಿಗೆ ‘ನಮೋ ಕುಟೀರ’ ಹೆಸರಿನಲ್ಲಿ ಉಚಿತ ಮನೆಗಳನ್ನು ನಿರ್ಮಿಸಿಕೊಡುವ ಅವರ ಸೇವೆ ನಿಜಕ್ಕೂ ಸ್ಪೂರ್ತಿದಾಯಕ.
ಕ್ಯಾನ್ಸರ್ ಪತ್ತೆಯಾದ ಆಘಾತ
ಕೇರಳ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಪಕ್ಷದ ಸಂಘಟನಾ ಜವಾಬ್ದಾರಿಗಳಲ್ಲಿ ತೊಡಗಿಸಿಕೊಂಡಿದ್ದಾಗ, ಅವರ ದೇಹದ ತೂಕ ಹಠಾತ್ತನೆ ಸುಮಾರು 20 ಕೆ.ಜಿ. ಕಡಿಮೆಯಾಯಿತು. ಆರಂಭದಲ್ಲಿ ಇದನ್ನು ಸಾಮಾನ್ಯ ಆರೋಗ್ಯ ಸಮಸ್ಯೆ ಎಂದು ಭಾವಿಸಿದ್ದ ಅವರು ವೈದ್ಯಕೀಯ ಪರೀಕ್ಷೆಗೆ ಒಳಗಾದಾಗ, ಅವರಿಗೆ ಕರುಳಿನ ಕ್ಯಾನ್ಸರ್ (Colon Cancer) ಇರುವುದು ದೃಢಪಟ್ಟಿತು. ಈ ಸುದ್ದಿ ಕುಟುಂಬಕ್ಕೆ ಆಘಾತ ಉಂಟುಮಾಡಿತು. ಪತ್ನಿ ಮತ್ತು ಮಕ್ಕಳು ಕಣ್ಣೀರಾದರು. ಆದರೆ ಸಂತೋಷ್ ಕುಮಾರ್ ರೈ ಮಾತ್ರ ಧೈರ್ಯ ಕಳೆದುಕೊಳ್ಳಲಿಲ್ಲ.
“ನಾನು ನನ್ನ ಜೀವನದಲ್ಲಿ ಯಾರಿಗೂ ಅನ್ಯಾಯ ಮಾಡಿಲ್ಲ. ದೇವರು ನನಗೆ ಇನ್ನೊಂದು ಅವಕಾಶ ಕೊಟ್ಟಿದ್ದಾನೆ. ಅದನ್ನು ಸಮಾಜದ ಒಳಿತಿಗಾಗಿ ಬಳಸುತ್ತೇನೆ,” ಎಂದು ಅವರು ಆತ್ಮವಿಶ್ವಾಸದಿಂದ ಹೇಳಿಕೊಂಡರು.
10.5 ಗಂಟೆಗಳ ಶಸ್ತ್ರಚಿಕಿತ್ಸೆಯ ನಂತರವೂ ಸೇವೆಯೇ ಧ್ಯೇಯ
ಕಳೆದ ಕೆಲವು ತಿಂಗಳುಗಳಿಂದ ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಈಗಾಗಲೇ 10.5 ಗಂಟೆಗಳ ಕಾಲ ನಡೆದ ಸಂಕೀರ್ಣ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಪ್ರಸ್ತುತ ಕೀಮೋಥೆರಪಿ ಮತ್ತು ರೇಡಿಯೇಷನ್ ಚಿಕಿತ್ಸೆ ಮುಂದುವರಿದಿದ್ದರೂ, ಅವರ ಸಮಾಜಸೇವೆಯ ಉತ್ಸಾಹ ಮಾತ್ರ ಕ್ಷೀಣಿಸಿಲ್ಲ. ಆಸ್ಪತ್ರೆಯ ಹಾಸಿಗೆಯಲ್ಲಿದ್ದರೂ ಬಡವರಿಗೆ ಮನೆ ನಿರ್ಮಿಸುವ ಯೋಜನೆಗಳ ಬಗ್ಗೆ ಚರ್ಚಿಸುವುದು, ಸಹಾಯ ಕೇಳುವವರ ಸಮಸ್ಯೆಗಳಿಗೆ ಸ್ಪಂದಿಸುವುದು ಅವರ ದಿನಚರಿಯ ಭಾಗವಾಗಿದೆ.
‘ನಮೋ ಕುಟೀರ’ – ಆಶ್ರಯವಿಲ್ಲದವರಿಗೆ ಆಶಾಕಿರಣ
ಪ್ರಧಾನಿ ನರೇಂದ್ರ ಮೋದಿ ಅವರ ಸೇವಾ ಚಿಂತನೆ ಮತ್ತು ಬಡವರ ಕಲ್ಯಾಣದ ಯೋಜನೆಗಳಿಂದ ಪ್ರೇರಿತರಾದ ಸಂತೋಷ್ ಕುಮಾರ್ ರೈ, ವಸತಿಯಿಲ್ಲದ ಬಡ ಕುಟುಂಬಗಳಿಗೆ ತಮ್ಮ ಸ್ವಂತ ವೆಚ್ಚದಲ್ಲಿ ಮನೆ ನಿರ್ಮಿಸಿ ನೀಡುವ ಸಂಕಲ್ಪ ಮಾಡಿದರು. ಅದಕ್ಕೆ ಅವರು ‘ನಮೋ ಕುಟೀರ’ ಎಂಬ ಹೆಸರು ನೀಡಿದರು.
ಅವರ ಮೊದಲ ಗುರಿ 10 ಮನೆಗಳ ನಿರ್ಮಾಣ. ಲಭ್ಯವಿರುವ ಮಾಹಿತಿಯ ಪ್ರಕಾರ, ಅದರಲ್ಲಿ 7 ಮನೆಗಳು ಈಗಾಗಲೇ ಪೂರ್ಣಗೊಂಡಿವೆ.
ಈ ಮನೆಗಳ ಲಾಭ ಪಡೆದವರಲ್ಲಿ
- ಹಲವು ವರ್ಷಗಳಿಂದ ಸ್ವಂತ ಮನೆ ಇಲ್ಲದೆ ಬದುಕುತ್ತಿದ್ದ ಬಡ ಕುಟುಂಬಗಳು,
- ಸುಮಾರು 16 ವರ್ಷಗಳ ಹಿಂದೆ ಪತಿಯನ್ನು ಕಳೆದುಕೊಂಡ ವಿಧವೆ,
- ಆಸರೆಯಿಲ್ಲದ ವೃದ್ಧ ದಂಪತಿ,
- ಕೋಟೆಕಾರಿನ ಅಡ್ಡ ಶ್ರೀ ಭಗವತಿ ಕ್ಷೇತ್ರದ ದರ್ಶನಪಾತ್ರಿ ಶ್ರವಣ್ ಬೆಳಪ್ಪಾಡ ಅವರ ಕುಟುಂಬ, ಇವರಂತಹ ಅನೇಕರು ಸೇರಿದ್ದಾರೆ.
ಸಂತೋಷ್ ರೈ ಅವರ ಕನಸು ಇಲ್ಲಿಗೇ ನಿಲ್ಲುವುದಿಲ್ಲ.
“ಕನಿಷ್ಠ 100 ಬಡ ಕುಟುಂಬಗಳಿಗೆ ಉಚಿತ ಮನೆ ನಿರ್ಮಿಸಿ ಕೊಡಬೇಕು. ಅದೇ ನನ್ನ ಬದುಕಿನ ದೊಡ್ಡ ಗುರಿ,” ಎನ್ನುತ್ತಾರೆ ಅವರು.
ಕ್ಯಾನ್ಸರ್ ಬರುವ ಮುನ್ನವೇ ಆರಂಭವಾದ ಸೇವಾಯಾತ್ರೆ
ಸಂತೋಷ್ ಕುಮಾರ್ ರೈ ಅವರ ಸಮಾಜಸೇವೆ ಕ್ಯಾನ್ಸರ್ ಬಂದ ನಂತರ ಆರಂಭವಾದುದಲ್ಲ. ಅವರು ಜಿಲ್ಲಾ ಪಂಚಾಯತ್ ಸದಸ್ಯರಾಗಿದ್ದ ಅವಧಿಯಲ್ಲಿ ತಮಗೆ ದೊರೆಯುತ್ತಿದ್ದ ಗೌರವಧನವನ್ನು ಸಂಪೂರ್ಣವಾಗಿ ಕ್ಯಾನ್ಸರ್ ರೋಗಿಗಳ ಚಿಕಿತ್ಸೆಗೆ ಮೀಸಲಿಟ್ಟಿದ್ದರು. ಲಭ್ಯವಿರುವ ಮಾಹಿತಿಯ ಪ್ರಕಾರ,
- 162 ಕ್ಯಾನ್ಸರ್ ರೋಗಿಗಳ ಚಿಕಿತ್ಸೆಗೆ ನೇರ ಆರ್ಥಿಕ ನೆರವು ನೀಡಿದ್ದಾರೆ.
- 1,000ಕ್ಕೂ ಹೆಚ್ಚು ರೋಗಿಗಳಿಗೆ ಆಸ್ಪತ್ರೆ ಪ್ರವೇಶ, ಚಿಕಿತ್ಸೆ ಮತ್ತು ವೈದ್ಯಕೀಯ ಮಾರ್ಗದರ್ಶನ ಒದಗಿಸಿದ್ದಾರೆ.
- ಅನೇಕ ಬಡ ರೋಗಿಗಳ ಆಸ್ಪತ್ರೆ ವೆಚ್ಚವನ್ನು ಸ್ವತಃ ಭರಿಸಿದ್ದಾರೆ.
ವಿಶೇಷವೆಂದರೆ, ತಾವೇ ಕ್ಯಾನ್ಸರ್ ರೋಗಿಯಾಗಿದ್ದರೂ, ಇತರ ಕ್ಯಾನ್ಸರ್ ರೋಗಿಗಳಿಗೆ ನೆರವಾಗುವ ಅವರ ಸೇವೆ ನಿಂತಿಲ್ಲ.
ಕ್ಯಾನ್ಸರ್ ರೋಗಿಗಳಿಗಾಗಿ ಪ್ರತ್ಯೇಕ ಟ್ರಸ್ಟ್ ಸ್ಥಾಪನೆಯ ಸಂಕಲ್ಪ
ತಮ್ಮ ಬದುಕಿನ ಹೋರಾಟವನ್ನು ಕೇವಲ ತಮ್ಮಷ್ಟಕ್ಕೆ ಸೀಮಿತಗೊಳಿಸದೇ, ಅದೇ ನೋವನ್ನು ಅನುಭವಿಸುತ್ತಿರುವ ಬಡ ಕ್ಯಾನ್ಸರ್ ರೋಗಿಗಳ ನೆರವಿಗೆ ಧಾವಿಸಲು ಸಂತೋಷ್ ಕುಮಾರ್ ರೈ ಮತ್ತೊಂದು ಮಹತ್ವಾಕಾಂಕ್ಷೆಯ ಹೆಜ್ಜೆ ಇಡುತ್ತಿದ್ದಾರೆ.
ಭಾರತ ಸರ್ಕಾರದ ಆಯುಷ್ಮಾನ್ ಭಾರತ ಯೋಜನೆಯಡಿ ಬಿಪಿಎಲ್ ಕಾರ್ಡ್ ಹೊಂದಿರುವ ಅರ್ಹ ಫಲಾನುಭವಿಗಳಿಗೆ ಚಿಕಿತ್ಸೆಗಾಗಿ ₹5 ಲಕ್ಷದವರೆಗೆ ಆರ್ಥಿಕ ನೆರವು ದೊರೆಯುತ್ತದೆ. ಆದರೆ ಕ್ಯಾನ್ಸರ್ ರೋಗವನ್ನು ದೃಢೀಕರಿಸಲು ಅಗತ್ಯವಿರುವ PET Scan, Colonoscopy, Biopsy, MRI, CT Scan ಸೇರಿದಂತೆ ವಿವಿಧ ಪರೀಕ್ಷೆಗಳಿಗೆ ಸಾವಿರಾರು ರೂಪಾಯಿಯಿಂದ ಲಕ್ಷಾಂತರ ರೂಪಾಯಿವರೆಗೆ ವೆಚ್ಚವಾಗುತ್ತದೆ. ಈ ಆರಂಭಿಕ ವೆಚ್ಚವನ್ನು ಭರಿಸಲು ಅನೇಕ ಬಡ ಕುಟುಂಬಗಳು ಪರದಾಡುವ ಪರಿಸ್ಥಿತಿ ಇದೆ.
ಈ ನೋವನ್ನು ಸ್ವತಃ ಅನುಭವಿಸಿರುವ ಸಂತೋಷ್ ಕುಮಾರ್ ರೈ, ತಮ್ಮ ಪತ್ನಿ ವೀಣಾ ಎಸ್. ರೈ ಅವರ ಸಲಹೆಯಂತೆ, ಬಡ ಕ್ಯಾನ್ಸರ್ ರೋಗಿಗಳಿಗೆ ವೈದ್ಯಕೀಯ ಪರೀಕ್ಷೆ, ಚಿಕಿತ್ಸೆ ಹಾಗೂ ಅಗತ್ಯ ನೆರವು ಒದಗಿಸುವ ಉದ್ದೇಶದಿಂದ ಶೀಘ್ರದಲ್ಲೇ ಒಂದು ಸೇವಾ ಟ್ರಸ್ಟ್ ಸ್ಥಾಪಿಸುವ ಯೋಜನೆಯನ್ನು ಘೋಷಿಸಿದ್ದಾರೆ.
“ನನಗೆ ಬಂದಿರುವ ನೋವು ಮತ್ತೊಬ್ಬ ಬಡ ಕುಟುಂಬಕ್ಕೆ ಬರಬಾರದು. ಚಿಕಿತ್ಸೆ ಹಣದ ಕೊರತೆಯಿಂದ ಯಾರೊಬ್ಬರೂ ಜೀವ ಕಳೆದುಕೊಳ್ಳಬಾರದು” ಎಂಬುದೇ ಅವರ ಈ ಹೊಸ ಸಂಕಲ್ಪದ ಹಿಂದಿರುವ ಮಾನವೀಯ ಆಶಯ.
‘ನಮೋ ಕುಟೀರ’ ಸೇವಾಯಾತ್ರೆ ಮುಂದುವರಿಕೆ – ಎಂಟನೇ ಮನೆಗೆ ಶಿಲಾನ್ಯಾಸ
ಸಂತೋಷ್ ಕುಮಾರ್ ರೈ ಅವರ ಸೇವಾ ಕಾರ್ಯ ದಿನದಿಂದ ದಿನಕ್ಕೆ ವಿಸ್ತರಿಸುತ್ತಿದೆ. ಈಗಾಗಲೇ ಹಲವು ಬಡ ಕುಟುಂಬಗಳಿಗೆ ಆಶ್ರಯ ಕಲ್ಪಿಸಿರುವ ‘ನಮೋ ಕುಟೀರ’ ಯೋಜನೆಯಡಿ, ರಾಜೇಶ್ ಮಡಿವಾಳ ಅವರ ಕುಟುಂಬಕ್ಕಾಗಿ ನಿರ್ಮಿಸಲಾಗುತ್ತಿರುವ ಎಂಟನೇ ಮನೆಗೆ ನೀಲನಕ್ಷೆಯನ್ನು ಬಿಡುಗಡೆ ಮಾಡಲಾಗಿದೆ. ಇಂದಿನ ಸಮಾಜದಲ್ಲಿ ಅನೇಕರು ತಮ್ಮ ಹುಟ್ಟುಹಬ್ಬವನ್ನು ಬಾರ್ ಮತ್ತು ರೆಸ್ಟೋರೆಂಟ್‌ಗಳಲ್ಲಿ ಅರ್ಥಹೀನವಾಗಿ ಆಚರಿಸುತ್ತಾರೆ. ಆದರೆ ಸಂತೋಷ್ ಕುಮಾರ್ ರೈ ಅವರು 60 ನೇ ಹುಟ್ಟು ಹಬ್ಬದ ಸಂಧರ್ಭದಲ್ಲಿ ಬಡ ಮತ್ತು ನಿರ್ಗತಿಕ ಕುಟುಂಬಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಅವರ ಹೆಸರಿನಲ್ಲಿ ‘ನಮೋ ಕುಟೀರ’ ಮನೆಗಳನ್ನು ನಿರ್ಮಿಸಿ ಕೊಡುವ ಮೂಲಕ ಅರ್ಥಪೂರ್ಣವಾಗಿ ಆಚರಿಸುತ್ತಿದ್ದಾರೆ
ಇದರ ಜೊತೆಗೆ ಪಾಣೆಲ್ ಸರ್ಕಾರಿ ಶಾಲೆಗೆ ನಿರ್ಮಿಸಲಾಗುತ್ತಿರುವ ಸಭಾಂಗಣದ ಯೋಜನೆ ಹಾಗೂ ಕುರ್ನಾಡು ದತ್ತಾತ್ರೇಯ ಶಾಲೆಯ ಮೂಲಸೌಲಭ್ಯಗಳ ಅಭಿವೃದ್ಧಿಗಾಗಿ ₹50,000 ನೆರವಿನ ಚೆಕ್ ಅನ್ನು ಮಾಡೂರು ಮರಿಯಣ್ಣಪಾಲು ಶಿವದುರ್ಗಾಂಭ ಮಠದ ಶ್ರೀ ಶಿವಯೋಗಿ ದುರ್ಗಾನಂದ ಸ್ವಾಮೀಜಿಯವರು ಫಲಾನುಭವಿಗಳಿಗೆ ಹಸ್ತಾಂತರಿಸಿದರು. ಇದು ಕೇವಲ ಮನೆ ನಿರ್ಮಾಣದ ಯೋಜನೆಯಲ್ಲ; ಶಿಕ್ಷಣ, ಸಾಮಾಜಿಕ ಅಭಿವೃದ್ಧಿ ಹಾಗೂ ಗ್ರಾಮೀಣ ಮೂಲಸೌಕರ್ಯ ವೃದ್ಧಿಯತ್ತವೂ ಸಂತೋಷ್ ಕುಮಾರ್ ರೈ ಅವರ ಸೇವೆ ವಿಸ್ತರಿಸುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.
ಕುಟುಂಬವೇ ಅವರ ಶಕ್ತಿ
ಸಂತೋಷ್ ಕುಮಾರ್ ರೈ ಅವರ ಈ ಸೇವಾ ಕಾರ್ಯದ ಹಿಂದೆ ಅವರ ಕುಟುಂಬದ ಪ್ರೋತ್ಸಾಹವೂ ಅಷ್ಟೇ ದೊಡ್ಡದು. ಪತ್ನಿ ವೀಣಾ ಎಸ್. ರೈ, ಪುತ್ರ ಸಮ್ಯಕ್ ರೈ ಬೋಳಿಯಾರ್ ಹಾಗೂ ಪುತ್ರಿ ಸ್ಪರ್ಶ ಎಸ್. ರೈ ಅವರು ಪ್ರತಿಯೊಂದು ಸಮಾಜಮುಖಿ ಕಾರ್ಯದಲ್ಲೂ ಅವರೊಂದಿಗೆ ಹೆಜ್ಜೆ ಹಾಕುತ್ತಿದ್ದಾರೆ.
ಆಡಳಿತದಲ್ಲೂ ಸಾಧನೆ
ಸಂತೋಷ್ ಕುಮಾರ್ ರೈ ಅವರು ಸಮಾಜಸೇವಕರಷ್ಟೇ ಅಲ್ಲ, ಸಮರ್ಥ ಆಡಳಿತಗಾರರೂ ಹೌದು. ದಿ ಮೈಸೂರು ಎಲೆಕ್ಟ್ರಿಕಲ್ಸ್ ಸಂಸ್ಥೆಯ ಅಧ್ಯಕ್ಷರಾಗಿದ್ದ ಸಂದರ್ಭದಲ್ಲಿ, ನಷ್ಟದಲ್ಲಿದ್ದ ಸಂಸ್ಥೆಯನ್ನು ಲಾಭದ ಹಾದಿಗೆ ತರುವಲ್ಲಿ ಅವರು ಪ್ರಮುಖ ಪಾತ್ರವಹಿಸಿದ್ದರು ಎಂದು ವರದಿಗಳು ತಿಳಿಸುತ್ತವೆ. ಅಲ್ಲದೆ, ಸಂಸ್ಥೆಯ CSR ನಿಧಿಯ ಮೂಲಕ 42 ಸರ್ಕಾರಿ ಶಾಲೆಗಳಿಗೆ ವಿವಿಧ ರೀತಿಯ ನೆರವು ಒದಗಿಸುವ ಕಾರ್ಯಕ್ಕೂ ಮುಂದಾಗಿದ್ದರು.
“ಆಸ್ತಿ ಮಾರಬೇಕಾದರೂ ಮಾರುತ್ತೇನೆ”
ತಮ್ಮ ಸೇವಾ ಸಂಕಲ್ಪದ ಬಗ್ಗೆ ಮಾತನಾಡುವಾಗ ಅವರು ಹೇಳುವ ಮಾತು ಮನಸ್ಸಿಗೆ ತಟ್ಟುತ್ತದೆ.
“ಬೇಕಾದರೆ ನನ್ನ ಆಸ್ತಿಯನ್ನೇ ಮಾರುತ್ತೇನೆ. ಆದರೆ ಬಡವರಿಗೆ ಮನೆ ಕಟ್ಟಿಕೊಡುವ ಕೆಲಸ ನಿಲ್ಲಿಸುವುದಿಲ್ಲ. ಅವರ ಮುಖದಲ್ಲಿನ ಸಂತೋಷವೇ ನನಗೆ ಸಿಗುವ ದೊಡ್ಡ ಸಂಪತ್ತು.”
ಸಮಾಜಕ್ಕೆ ಅಗತ್ಯವಿರುವ ನಿಜವಾದ ನಾಯಕತ್ವ
ಇಂದು ಸಮಾಜದಲ್ಲಿ ಯಶಸ್ಸನ್ನು ಹಣ, ಅಧಿಕಾರ ಮತ್ತು ಖ್ಯಾತಿಯಿಂದ ಅಳೆಯುವ ಕಾಲ. ಆದರೆ ಸಂತೋಷ್ ಕುಮಾರ್ ರೈ ಅವರ ಬದುಕು ಮತ್ತೊಂದು ಸತ್ಯವನ್ನು ಹೇಳುತ್ತದೆ. ದೇಹವನ್ನು ಕ್ಯಾನ್ಸರ್ ಬಾಧಿಸಬಹುದು; ಆದರೆ ಸೇವಾ ಮನಸ್ಸು ದೃಢವಾಗಿದ್ದರೆ ಯಾವುದೇ ಕಾಯಿಲೆಯೂ ವ್ಯಕ್ತಿಯನ್ನು ಸೋಲಿಸಲಾರದು. ತಮ್ಮ ನೋವನ್ನು ಮರೆತು, ಇತರರ ಕಣ್ಣೀರನ್ನು ಒರೆಸುವ ವ್ಯಕ್ತಿಗಳು ಅಪರೂಪ. ಅಂತಹ ಅಪರೂಪದ ವ್ಯಕ್ತಿಗಳ ಸಾಲಿನಲ್ಲಿ ಸಂತೋಷ್ ಕುಮಾರ್ ರೈ ಅವರ ಹೆಸರು ಗೌರವದಿಂದ ಉಲ್ಲೇಖಿಸಲೇಬೇಕು. ಅವರ ಬದುಕು ನಮಗೆ ಒಂದು ಮಹತ್ವದ ಸಂದೇಶ ನೀಡುತ್ತದೆ:
“ಜೀವನ ಎಷ್ಟು ವರ್ಷ ಬದುಕಿದ್ದೇವೆ ಎಂಬುದಕ್ಕಿಂತ, ಎಷ್ಟು ಜನರ ಬದುಕಿನಲ್ಲಿ ಬೆಳಕಾಗಿದ್ದೇವೆ ಎಂಬುದೇ ನಿಜವಾದ ಸಾಧನೆ.”
ಕೊನೆಯ ಮಾತು
ಕ್ಯಾನ್ಸರ್ ವಿರುದ್ಧದ ಹೋರಾಟದ ಮಧ್ಯೆಯೂ, ಬಡವರಿಗೆ ಮನೆ ಕಟ್ಟಿಕೊಡುವುದು, ಶಾಲೆಗಳಿಗೆ ನೆರವು ನೀಡುವುದು, ಕ್ಯಾನ್ಸರ್ ರೋಗಿಗಳಿಗಾಗಿ ಟ್ರಸ್ಟ್ ಸ್ಥಾಪಿಸುವ ಸಂಕಲ್ಪ ಮಾಡುವುದು—ಇವೆಲ್ಲವೂ ಸಂತೋಷ್ ಕುಮಾರ್ ರೈ ಅವರ ವ್ಯಕ್ತಿತ್ವದ ನಿಜವಾದ ಎತ್ತರವನ್ನು ತೋರಿಸುತ್ತವೆ.
ತಮ್ಮ ದೇಹದ ನೋವಿಗಿಂತ ಸಮಾಜದ ನೋವನ್ನೇ ದೊಡ್ಡದು ಎಂದು ಭಾವಿಸುವ ಇಂತಹ ವ್ಯಕ್ತಿಗಳು ಸಮಾಜದ ನಿಜವಾದ ಆಸ್ತಿ. ಅವರು ಕಟ್ಟುತ್ತಿರುವುದು ಕೇವಲ ‘ನಮೋ ಕುಟೀರ’ ಮನೆಗಳಲ್ಲ. ಸಾವಿರಾರು ಬಡ ಕುಟುಂಬಗಳ ಬದುಕಿನಲ್ಲಿ ಹೊಸ ಭರವಸೆಯ ಅಡಿಪಾಯ.
ಅವರು ನಂಬಿರುವ ಅವರ ದೈವ ಆದಷ್ಟು ಶೀಘ್ರವೇ ಅವರ ಕ್ಯಾನ್ಸರ್ ರೋಗವನ್ನು ಗುಣಪಡಿಸುವ ಮೂಲಕ ಅವರು ಮತ್ತಷ್ಟು ಸಮಾಜಮುಖಿಗಳಾಗಿ ಸೇವೆ ಸಲ್ಲಿಸುವಂತಾಗಲಿ ಎಂದು ಹಾರೈಸೋಣ ಅಲ್ವೇ?
ಏನಂತೀರೀ?
ನಿಮ್ಮವನೇ ಉಮಾಸುತ