ಶುಭ ಇರಲಿ ಅಶುಭ ಇರಲಿ ಎರಡೂ ಕಾರ್ಯಕ್ರಮಗಳಲ್ಲಿಯೂ ನೈವೇದ್ಯಕ್ಕೆ ಸಲ್ಲುವ  ಸಾಂಪ್ರದಾಯಕ ಖಾದ್ಯವಾದ ಆಂಬೊಡೆ ಮತ್ತು ಜಿಹ್ವಾ ಚಪಲಕ್ಕಾಗಿ ಮಾಡುವ ಮಸಾಲ ವಡೆಯನ್ನು ಮಾಡುವುದನ್ನು ನಮ್ಮ ನಳಪಾಕ ಮಾಲಿಕೆಯಲ್ಲಿ ತಿಳಿದುಕೊಳ್ಳೋಣ.

ಸುಮಾರು 4-6 ಜನರಿಗೆ ಸಾಕಾಗುವಷ್ಟು ಆಂಬೋಡೆ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ನೆನೆಸಿದ ಕಡಲೇ ಬೇಳೆ – 1 ಬಟ್ಟಲು
• ಹಸಿರು ಮೆಣಸಿನಕಾಯಿ – 8-10
• ಶುಂಠಿ – 1 ಇಂಚು
• ಸ್ವಲ್ಪ ಕೊತ್ತಂಬರಿ ಸೊಪ್ಪು
• ಸ್ವಲ್ಪ ಕರಿಬೇವು
• ರುಚಿಗೆ ತಕ್ಕಷ್ಟು ಉಪ್ಪು
• ಕರಿಯಲು ಅಡುಗೆ ಎಣ್ಣೆ

ಮಸಾಲ ವಡೆಗೆ ಬೇಕಾದ ಸಾಮಗ್ರಿಗಳು

• ಕತ್ತರಿಸಿದ ಸಬ್ಸೀಗೆ ಸೊಪ್ಪು – 1/2 ಕಟ್ಟು
• ಕತ್ತರಿಸಿದ ಈರುಳ್ಳಿ – 1
• ಸ್ವಲ್ಪ ಪುದಿನ
• ಚಕ್ಕೆ ಪುಡಿ – 1/2 ಚಮಚ

ಆಂಬೋಡೆ ತಯಾರಿಸುವ ವಿಧಾನ

• ಆಂಬೊಡೆ ಮಾಡುವುದಕ್ಕೆ ಒಂದೆರಡು ಗಂಟೆಯ ಮುನ್ನ ಕಡಲೇಬೇಳೆಯನ್ನು ನೀರಿನಲ್ಲಿ ಚೆನ್ನಾಗಿ ನೆನಸಿಟ್ಟುಕೊಳ್ಳಿ
• ನೆನೆಸಿಟ್ಟು ಕೊಂಡ ಕಡಲೇಬೇಳೆ, ಶುಂಠಿ, ಹಸೀ ಮೆಣಸಿನಕಾಯಿಯನ್ನು ಮಿಕ್ಸಿಯಲ್ಲಿ ಹಾಕಿಕೊಂಡು ತರಿ ತರಿಯಾಗಿ ರುಬ್ಬಿಕೊಳ್ಳಬೇಕು.
• ರುಬ್ಬಿಕೊಂಡ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಕತ್ತರಿಸಿದ ಕೊತ್ತಂಬರಿ ಮತ್ತು ಕರಿಬೇವು ಸೊಪ್ಪನ್ನು ಸೇರಿಸಿ ಚೆನ್ನಾಗಿ ಕಲೆಸಿಕೊಳ್ಳಿ
• ಕಲೆಸಿಕೊಂಡ ಮಿಶ್ರಣವನ್ನು ಸಣ್ಣ ಸಣ್ಣ ಉಂಡೆಗಳನ್ನಾಗಿ ಮಾಡಿಕೊಂಡು ಅಂಗೈಯಲ್ಲಿ ತಟ್ಟಿ ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಹಾಕಿ, ಎಣ್ಣೆ ಕಾದ ನಂತರ ಚೆನ್ನಾಗಿ ಕೆಂಪಾಗಿ ಬರುವ ವರೆಗೂ ಕರಿದಲ್ಲಿ ರುಚಿ ರುಚಿಯದ ಆಂಬೊಡೆ ಸಿದ್ದ.

ಮಸಾಲೆ ವಡೆ ತಯಾರಿಸುವ ವಿಧಾನ

• ರುಬ್ಬಿಕೊಂಡ ಬೇಳೆ ಮಿಶ್ರಣಕ್ಕೆ ಕತ್ತರಿದ ಈರುಳ್ಳಿ, ಸಬ್ಸೀಗೆ ಸೊಪ್ಪು ಮತ್ತು ಚಕ್ಕೆ ಪುಡಿಯನ್ನು ಸೇರಿಸಿ ಚೆನ್ನಾಗಿ ಕಲೆಸಿಕೊಳ್ಳಿ
• ಕಲೆಸಿದ ಮಿಶ್ರಣವನ್ನು ಸಣ್ಣ ಸಣ್ಣ ಉಂಡೆಗಳನ್ನಾಗಿ ಮಾಡಿಕೊಂಡು ಅಂಗೈಯಲ್ಲಿ ತಟ್ಟಿ ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಹಾಕಿ, ಎಣ್ಣೆ ಕಾದ ನಂತರ ಚೆನ್ನಾಗಿ ಕೆಂಪಾಗಿ ಬರುವ ವರೆಗೂ ಕರಿದಲ್ಲಿ ರುಚಿ ರುಚಿಯದ ಮಸಾಲೆ ವಡೆ ಸಿದ್ದ.

ಈ ಆಂಬೊಡೆಯನ್ನು ಕಾಯಿ ಚೆಟ್ನಿಯೊಂದಿಗೂ ಮಸಾಲೆ ವಡೆಯನ್ನು ಚಿತ್ರಾನ್ನ, ಪಲಾವ್ ಮತ್ತು ಮೊಸರನ್ನದೊಡನೆ ಸವಿಯಲು ಮಜವಾಗಿರುತ್ತದೆ.

ಸಾಂಪ್ರದಾಯಕವಾದ ಆಂಬೊಡೆ ಮತ್ತು ಮಸಾಲೆ ವಡೆಯನ್ನು  ಮಾಡುವುದನ್ನು ಈ ವೀಡೀಯೋ ಮೂಲಕವೂ ನೋಡಿ ತಿಳಿಯ ಬಹುದಾಗಿದೆ.

 

ಇನ್ನೇಕೆ ತಡಾ ನೋಡ್ಕೋಳ್ಳಿ, ಓದ್ಕೋಳ್ಳಿ, ಮಾಡ್ಕೋಳ್ಳಿ, ತಿನ್ಕೊಳ್ಳಿ

ಏನಂತೀರೀ?

ಮದದಾಳದ ಮಾತು :  ಮನೆಯಲ್ಲಿಯೇ ಇರಬಹುದಾದ ಪರಿಕರಗಳಿಂದ ಅತ್ಯಂತ ಕಡಿಮೆ ಸಮಯದಲ್ಲಿ ತಯಾರಿಸಿದ ಈ ಅಂಬೋಡೆ ಮತ್ತು ಮಸಾಲಾವಡೆ ಈ ಮಳೆಗಾಲದಲ್ಲಿ ಸಂಜೆ ಹೊತ್ತು ಕಾಫೀ ಇಲ್ಲವೇ ಟೀ ಜೊತೆಯಲ್ಲಿ ತಿನ್ನಲು ಚೆನ್ನಾಗಿರುತ್ತದೆ.  ಕಡಲೇಬೇಳೆ ಹೊರತಾಗಿ ಬೇಯಿಸಿದ ಅವರೇಕಾಳು, ಮೆಕ್ಕೆಜೋಳ ಇಲ್ಲವೇ ನೆನೆಸಿಟ್ಟ ಹಲಸಂದೆ ಕಾಳು, ಹುರುಳೀ ಕಾಳಿನೊಂದಿಗೂ ಇದೇ ರೀತಿಯಲ್ಲಿ ವಡೆ ಮಾಡಬಹುದಾಗಿದೆ.