ಕ್ರೀಡೆ ಎನ್ನುವುದು ಎಲ್ಲರನ್ನೂ ಒಟ್ಟು ಗೂಡಿಸುತ್ತದೆ ಎಂಬುದರ ಪ್ರತೀಕವಾಗಿ ಪ್ರತೀ ನಾಲ್ಕು ವರ್ಶಗಳಿಗೊಮ್ಮೆ ಪ್ರಪಂಚದ 200 ಕ್ಕೂ ಹೆಚ್ಚಿನ ರಾಷ್ಟ್ರಗಳೂ ಒಲಂಪಿಕ್ಸ್ ಕ್ರೀಡಾ ಕೂಟದಲ್ಲಿ ಭಾಗವಹಿಸಿ ವಿವಿಧ ಕ್ರೀಡೆಗಳಲ್ಲಿ ತಮ್ಮ ಸಾಮರ್ಥ್ಯವನ್ನು ಓರೆಗಚ್ಚಿ ಪ್ರಾಭಲ್ಯವನ್ನು ಮೆರೆಯುತ್ತವೆ. ಇಂತಹ ಕ್ರೀಡಾ ಕೂಟಗಳಲ್ಲಿ ನೂರಾರು ದಾಖಲೆಗಳು ನಿರ್ಮಾಣವಾಗುವುದರ ಜೊತೆಗೆ ಅನೇಕ ಅಚ್ಚರಿಯ ಸಂಗತಿಗಳೂ ನಡೆಯುವ ಮೂಲಕ ಕ್ರೀಡಾಕೂಟವನ್ನು ವಿಶೇಷ ಮಾಡುತ್ತವೆ ಅಂತಹವುಗಳಲ್ಲಿ  ವಿಶೇಷ ಮತ್ತು ಅಷ್ಟೇ ಕೂತಹಲಕಾರಿ ಎನಿಸುವಂತಹ ವಿಸ್ಮಯಕಾರಿ ಫಲಿತಾಂಶಗಳನ್ನು ಮೆಲುಕು ಹಾಕೋಣ ಬನ್ನಿ.

2024ರ ಒಲಂಪಿಕ್ಸ್  ಜುಲೈ 26 ಶುಕ್ರವಾರ  ಆರಂಭವಾಗಿ ಆಗಸ್ಟ್ 11 ಭಾನುವಾರದವರೆಗೂ ಇದ್ದ ಕಾರಣ, ಎಲ್ಲಾ ಕ್ರೀಡಾಪಟುಗಳು ಸಾಕಷ್ಟು ಮುಂಚಿತವಾಗಿಯೇ ತಮ್ಮ ತಮ್ಮ ಕ್ರೀಡೆಗಳು ನಡೆಯುವ ಸ್ಥಳಕ್ಕೆ  ಆಗಮಿಸಿದ್ದರು. ಭದ್ರತೆಯ ಕಾರಣದಿಂದಾಗಿ ಈ ಎಲ್ಲಾ ಕ್ರೀಡಾಳುಗಳು ಅನುಮತಿ ಇಲ್ಲದೇ ಆ ಕ್ರೀಡಾಗ್ರಾಮದಿಂದ ಹೊರಗೆ/ಒಳಗೆ ಬರುವಂತಿರಲ್ಲವಾದರೂ,  ಒಲಂಪಿಕ್ಸ್ ಆರಂಭವಾದ ಮೊದಲನೆಯ ದಿನವೇ, ಜುಲೈ 26 ರಂದು ಪ್ರಣಯ ನಗರಿ ಪ್ಯಾರಿಸ್‌ನ ಐಫೆಲ್ ಟವರ್‌ ನೋಡುವ ಸಲುವಾಗಿ ಕ್ರೀಡಾಧಿಕಾರಿಗಳ  ಅನುಮತಿಯಿಲ್ಲದೆ  ಬ್ರೆಜಿಲ್‌ನ ಈಜುಗಾರ್ತಿ ಅನಾ ಕೆರೊಲಿನಾ ವಿಯೆರಾ  ಮತ್ತು ಆಕೆಯ ಗೆಳೆಯ ಮತ್ತೊಬ್ಬ ಬ್ರೆಜಿಲ್  ಈಜುಗಾರರಾಗಿರುವ  ಗೇಬ್ರಿಯಲ್ ಸ್ಯಾಂಟೋಸ್‌ ಇಬ್ಬರೂ ಹೋಗಿದ್ದಲ್ಲದೇ, ಅಲ್ಲಿ ಕಳೆದ ಸುಂದರ ಕ್ಷಣಗಳ ಪೋಟೋಗಳನ್ನು ಸಾಮಾಜಿಕ ತಾಣಗಳಲ್ಲಿ  ಹಂಚಿಕೊಂಡಿದ್ದನ್ನು ಗಮನಿಸಿದ ಅಧಿಕಾರಿಗಳು ಆಕೆಯನ್ನು ವಿಚಾರಿಸಿಸಲು ಮುಂದಾದಾಗ ಆಕೆ ತೋರಿದ ಉದ್ದಟನದಿಂದಾಗಿ  ಉಟ್ಟಬಟ್ಟೆಯಲ್ಲೇ ಆಕೆಯನ್ನು ಒಲಿಂಪಿಕ್ ಗೇಮ್ಸ್ ವಿಲೇಜ್‌ನಿಂದ ಹೊರಹಾಕಲಾಯಿತಲ್ಲದೇ ತಕ್ಷಣವೇ ಬ್ರೆಜಿಲ್‌ಗೆ ಕಳುಹಿಸಿದರೆ,  ಆಕೆಯ  ಗೆಳೆಯನಿಗೆ ಎಚ್ಚರಿಕೆಯನ್ನು ನೀಡಿದ್ದು ಒಂದು ಕ್ರೀಡಾಕೂಟಕ್ಕೆ ಒಂದು ರೀತಿಯ ಕಪ್ಪು ಚುಕ್ಕೆಯಂತಾಯಿತು.

ಇನ್ನು ಭಾರತದ ಪರ 50 ಕೆಜಿ ಕುಸ್ತಿ ಪಂದ್ಯಾವಳಿಯಲ್ಲಿ ಪ್ರಪ್ರಥಮ ಬಾರಿಗೆ ಫೈನಲ್ಸ್ ತಲುಪಿ, ಇನ್ನೇನು ಚಿನ್ನ/ಬೆಳ್ಳಿ ಪದಕದೊಂದಿಗೆ ಭಾರತದ ಕೀರ್ತಿಪತಾಕೆಯನ್ನು ಹಾರಿಸಲು ತುದಿಗಾಲಿನಲ್ಲಿ ನಿಂತಿದ್ದ ವಿನೇಶ್ ಪೋಗಟ್ ಫೈನಲ್ಸ್ ಪಂದ್ಯಾವಳಿಯ ದಿನ ದೇಹದ ತೂಕ ಹೆಚ್ಚಿಗೆ ಇದ್ದ ಕಾರಣ ಹರ ಸಾಹಸ ಮಾಡಿ ಇಳಿಸಲು  ಪ್ರಯತ್ನಪಟ್ಟರೂ  ಅದು ವಿಫಲವಾಗಿ ಕೇವಲ 100 ಗ್ರಾಂ ಹೆಚ್ಚಿನ ತೂಕದಿಂದಾಗಿ ಪಂದ್ಯಾವಳಿಯಿಂದಲೇ ಅನರ್ಹಗೊಂಡು 140 ಕೋಟಿ ಭಾರತೀಯರ ದುಃಖಕ್ಕೆ ಕಾರಣಳಾದಳು. ಈ ಕುರಿತಂತೆ ಮನವಿಯನ್ನು ಸಲ್ಲಿಸಲಾಗಿದ್ದು ಅದರ ನಿರ್ಧಾರ ಇನ್ನೂ ಹೊರಬರಬೇಕಿದೆ,

ವಿನೇಶ್ ಪೊಗಟ್ ಪ್ರಸಂಗದಿಂದ ಎಚ್ಚೆತ್ತು ಕೊಂಡ ಭಾರತದ ಕೇವಲ 21 ವರ್ಷದ  ಕುಸ್ತಿ ಆಟಗಾರ ಅಮನ್ ಸೆಹ್ರಾವತ್ ಕಂಚಿನ ಪದಕಕ್ಕಾಗಿ ನಡೆಯುವ ಸ್ಪರ್ಧೆಗೂ ಮುಂಚೆ ಅವರ ದೇಹದ ತೂಕ ಸುಮಾರು 4.6 ಕೆಜಿ  ಹೆಚ್ಚಾಗಿದ್ದು, ಅನರ್ಹಗೊಳ್ಳುವ ಭೀತಿಯಿಂದಾಗಿ ಇಡೀ ರಾತ್ರಿ ಶ್ರಮವಹಿಸಿ ಕೇವಲ 10 ಗಂಟೆಗಳ ಕಾಲದಲ್ಲಿ ಮೊದಲ ಒಂದೂವರೆ ಗಂಟೆಗಳ ಕಾಲ ಮ್ಯಾಟ್ ಸೆಷನ್‌ನೊಂದಿಗೆ ಪ್ರಾರಂಭಿಸಿ, ಅಲ್ಲಿ ಅಮನ್ ನಿಂತಿರುವ ಕುಸ್ತಿಯಲ್ಲಿ ತೊಡಗಿಸಿಕೊಂಡು  ಚೆನ್ನಾಗಿ ಬೆವರುವ ಮೂಲಕ ಸ್ವಲ್ಪ ತೂಕವನ್ನು ಕಳೆದುಕೊಂಡರೆ ನಂತರ  ಒಂದು ಗಂಟೆಯ ಬಿಸಿನೀರಿನ ಸ್ನಾನ ಮಾಡಿ, ಅದಾದ ನಂತರ ಟ್ರೆಡ್‌ಮಿಲ್‌ನಲ್ಲಿ ತಡೆರಹಿತವಾಗಿ ಒಂದು ಗಂಟೆ ಓಡಿದ ಕಾರಣ, ದೇಹದಿಂದ ತೀವ್ರವಾಡ ಬೆವರುವಿಕೆಯಿಂದ ಸಾಕಷ್ಟು ತೂಕ ಕಡೆಮೆ ಮಾಡಿಕೊಂಡು ಸ್ವಲ್ಪ ವಿರಾಮದ ನಂತರ, ಅಮನ್ 5 ನಿಮಿಷಗಳ ಸೌನಾ ಸ್ನಾನದ ಐದು ಅವಧಿಗಳನ್ನು ಪೂರೈಸಿದರು. ಈ ರೀತಿಯ ಸತತ ಪ್ರಯತ್ನಗಳ ಹೊರತಾಗಿಯೂ, ಅಮನ್ ಇನ್ನೂ 900 ಗ್ರಾಂ ಮಿತಿಯನ್ನು ಮೀರಿದ್ದರು. ನಂತರ ತರಬೇತುದಾರರು ಅವರನ್ನು ಲಘು ಜಾಗಿಂಗ್ ಮತ್ತು ಹೆಚ್ಚುವರಿ ಓಟಗಳಿಗೆ  ಒಳಪಡಿಸಿ ಅಂತಿಮವಾಗಿ ಮುಂಜಾನೆ 4:30ರ. ಹೊತ್ತಿಗೆ, 56.9 ಕೆಜಿಗೆ ತಲುಪಿ  57ಕೆಜಿ ಮಿತಿಯ ಅಡಿಯಲ್ಲಿ ಕೇವಲ 100 ಗ್ರಾಂ ಕಡಿಮೆ ಇದ್ದು ಅಂತಿಮವಾಗಿ ಪೋರ್ಟೊ ರಿಕೊದ ಡೇರಿಯನ್ ಕ್ರೂಜ್ ಅವರನ್ನು ಸೋಲಿಸುವ ಮೂಲಕ ಕಂಚಿನ ಪದಕ ಪಡೆದು, ಪದಕ ಪಡೆದ ಭಾರತದ ಅತ್ಯಂತ ಕಿರಿಯ ಒಲಿಂಪಿಕ್ ಕ್ರೀಡಾಪಟು ಎಂಬ ಹೆಗ್ಗಳಿಕೆ ಪಾತ್ರರಾದರು.

ಹೆಚ್ಚಿನ ತೂಕದಿಂದಾಗಿ ವಿನೇಶ್ ಪದಕವನ್ನು ಕಳೆದುಕೊಂಡರೆ, ಜಿಮ್ನಾಸ್ಟಿಕ್ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆದ್ದಿದ್ದ ಅಮೇರಿಕಾದ  ಜೋರ್ಡನ್ ಚಿಲ್ಲೀಸ್ ಅವರ ಪದಕವನ್ನು  ತಾಂತ್ರಿಕ ಕಾರಣಗಳಿಂದಾಗಿ ಹಿಂಪಡೆದು ಅದನ್ನು ರುಮೇನಿಯಾ ದೇಶದ ಸ್ಪರ್ಧಿಗೆ ನೀಡಿರುವ  ಅಚ್ಚರಿಯ ಸಂಗತಿಯೊಂದು ನಡೆದಿದೆ. ಕಂಚಿನ ಪದಕಕ್ಕಾಗಿ ಅಮೇರಿಕ ಮತ್ತು ರುಮೇನಿಯಾ  ನಡುವಿನ ಪಂದ್ಯದ ಫಲಿತಾಂಶ ಪ್ರಕಟಗೊಂಡ ಬೆನ್ನಲ್ಲೇ ರೊಮೇನಿಯಾ ತೀರ್ಪಿನ ಆಕ್ಷೇಪಣೆ ಮಾಡಿದರೂ, ಮಧ್ಯ ಪ್ರವೇಶಿಸಿದ ಅಂತಾರಾಷ್ಟ್ರೀಯ ಜಿಮ್ನಾಸ್ಟಿಕ್ ಫೆಡರೇಷನ್ ಚಿಲ್ಲೀಸ್ ಸ್ಕೋರ್ ಪರಿಷ್ಕರಣೆ ಮಾಡಿದಾಗ ಇದರ ಕುರಿತಾಗಿ ರುಮೇನಿಯಾ  ಮೇಲ್ಮನವಿ ಸಲ್ಲಿಸಿತ್ತು. ಈ ಕುರಿತಂತೆ ಅಮೆರಿಕ ತಂಡವು ಒಂದು ನಿಮಿಷದೊಳಗಾಗಿ ತನ್ನ ಮೇಲ್ಮನವಿ/ಪ್ರತಿಭಟನೆ ಮಾಡಲು ಅವಕಾಶವಿತ್ತು. ಆದರೆ ಅಮೇರಿಕವು ಒಂದು ನಿಮಿಷದ 4 ಸೆಕೆಂಡ್ ಸಮಯದಲ್ಲಿ ಫಲಿತಾಂಶದ ಕುರಿತಂತೆ ಮೇಲ್ಮನವಿ ಸಲ್ಲಿಸಿತ್ತು. ಇದೇ ಹೆಚ್ಚುವರಿ  4 ಸೆಕೆಂಡ್ ಅಂಶವನ್ನು ಮುಂದಿಟ್ಟು ಕೊಂಡು ಕಂಚಿನ ಪದಕ ತಮಗೇ ಸಿಗಬೇಕು ಎಂದು ರೊಮ್ಯಾನಿಯಾ  ಕೋರ್ಟ್ ಮೆಟ್ಟಿಲೇರಿತು. ಈ ಕುರಿತಾಗಿ ವಾದ-ಪ್ರತಿವಾದ ಆಲಿಸಿದ ಅಂತಾರಾಷ್ಟ್ರೀಯ ಮಧ್ಯಸ್ಥಿಕೆ ನ್ಯಾಯಾಲಯ, ಈ ತಾಂತ್ರಿಕ ಕಾರಣದಿಂದಾಗಿ ರೊಮೇನಿಯನ್ ತಂಡದ ಪರವಾಗಿ ನಿಂತು  ಚಿಲೀಸ್‌ ಳಿಂದ ಕಂಚಿನ ಪದಕ ಹಿಂಪಡೆದು ಅದನ್ನು ರುಮೇನಿಯಾ ತಂಡಕ್ಕೆ ನೀಡಿರುವುದು  ಭಾರತೀಯ ಅಭಿಮಾನಿಗಳ ಪಾಲಿಗೆ ವಿನೇಶ್ ಪರವಾಗಿ ಇನ್ನೂ ಪದಕ ನಿರೀಕ್ಷೆಯನ್ನು ಜೀವಂತವಾಗಿಸಿದೆ.

ಆಗಸ್ಟ್ 1ರಂದು ಅಲ್ಜೀರಿಯಾ ಮತ್ತು ಇಟಲಿಯ ಮಹಿಳಾ ಬಾಕ್ಸಿಂಗ್ ಪಂದ್ಯದಲ್ಲಿ ಆಲ್ಜೀರಿಯಾದ ಬಾಕ್ಸರ್ ಇಮಾನೆ ಖೆಲಿಫ್ ಇಟಲಿಯ ಬಾಕ್ಸರ್ ಏಂಜೆಲಾ ಕ್ಯಾರಿನಿಳನ್ನು ಕೇವಲ 46 ಸೆಕೆಂಡುಗಳ ಹೋರಾಟದಲ್ಲಿ ಮಣಿಸುವ ಮೂಲಕ ಪಂದ್ಯವನ್ನು ಗೆದ್ದಾಗ, ಆಕೆಯ ಹೊಡೆತಗಳು ಸಾಮಾನ್ಯ ಹೆಂಗಸಿನ ಹೊಡೆತದಂತೆ ಇರದೇ ಬಲವಾದ ಗಂಡಸು ಹೊಡೆದಂತಿದೆ ಎಂದು ಆಕ್ಷೇಪಿಸಿದ್ದಲ್ಲದೇ, ಪಂದ್ಯ ಮುಗಿದ ನಂತರ ಕಣ್ಣೀರು ಸುರಿಸುತ್ತಲೇ ಆಕೆಯ ಕೈಕುಲುಕಲು ನಿರಾಕರಿಸಿ ಇದು ಅನ್ಯಾಯ ಎಂದು ಕೂಗುತ್ತಲೇ ಹೊರನಡೆದಳು. ಪಂದ್ಯ ಮುಗಿದ ನಂತರ ತಿಳಿದ ಬಂದ ಅಂಶವೆಂದರೆ, ಅಲ್ಜೀರಿಯಾದ ಬಾಕ್ಸರ್ ಹೆಚ್ಚಾಗಿ ಪುರುಷ ವರ್ಣತಂತುಗಳನ್ನು ಹೊಂದಿರುವ ಸಂಗತಿ ಬೆಳಕಿಗೆ ಬಂದಿತು, 2023 ರ ಇಂಟರ್ನ್ಯಾಷನಲ್ ಬಾಕ್ಸಿಂಗ್ ಅಸೋಸಿಯೇಷನ್ ​​ಅರ್ಹತಾ ಪರೀಕ್ಷೆಯ ಪ್ರಕಾರ ಇದೇ ಬಾಕ್ಸರ್ ಅನ್ನು ವಿಶ್ವ ಚಾಂಪಿಯನ್‌ಶಿಪ್‌ನಿಂದ ಅನರ್ಹಗೊಳಿಸಲಾಗಿತ್ತಾದರೂ, ಆಕೆ XY ಕ್ರೋಮೋಸೋಮ್‌ಗಳನ್ನು ಹೊಂದಿದ್ದರೂ, ಆಕೆ ಎಂದಿಗೂ ತಾನು ಮಂಗಳಮುಖಿ ಎಂದು ಗುರುತಿಸಿಕೊಳ್ಳದೇ ಇರುವುದು ಮತ್ತು ಆಕೆಯು ಯಾವುದೇ ರೀತಿಯ ಪುರುಷನ ದೈಹಿಕ ಗುಣಲಕ್ಷಣಗಳನ್ನು ಹೊಂದಿರದೇ ಸ್ತ್ರೀ ಲೈಂಗಿಕ ಗುಣಲಕ್ಷಣಗಳನ್ನು ಹೊಂದಿದ್ದಾಳೆ ಎಂಬ ಕಾರಣದಿಂದಾಗಿ ಆಕೆಯನ್ನು ಮಹಿಳೆಯೆಂದೇ ಪರಿಗಣಿಸಲಾಗಿದೆ ಎಂದು ಕ್ರೀಡಾಧಿಕಾರಿಗಳು ತಿಳಿಸಿ ವಿಷಯವನ್ನು ತಿಳಿಗೊಳಿಸಿದ್ದರು. ಇದೇ ಕಾರಣದಿಂದಾಗಿಯೇ 2023 ರ ವಿಶ್ವ ಚಾಂಪಿಯನ್‌ಶಿಪ್‌ನಿಂದ ಅನರ್ಹಗೊಂಡ ತೈವಾನ್ ಬಾಕ್ಸರ್ ಲಿನ್ ಯು-ಟಿಂಗ್ ಸಹಾ ಈ 2024ರ ಒಲಿಂಪಿಕ್ಸ್‌ನಲ್ಲಿ ಮಹಿಳಾ ವಿಭಾಗದಲ್ಲಿ ಸ್ಪರ್ಧೆ ಮಾಡಿರುವುದು ಗಮನಾರ್ಹವಾಗಿದೆ.

ಒಲಂಪಿಕ್ಸಿನಲ್ಲಿ ಒಂದು ಬಾರಿ ಆಡುವುದೇ ಮಹಾಭಾಗ್ಯ  ಎಂಡೆಣಿಸುವ ಸಂಧರ್ಭದಲ್ಲಿ ಕ್ಯೂಬಾದ ಪ್ರಸಿದ್ಧ ಕುಸ್ತಿಪಟು ಮಿಜೈನ್ ಲೋಪೆಜ್ ಅವರು ಸತತವಾಗಿ 6 ಒಲಂಪಿಕ್ಸಿನಲ್ಲಿ ಭಾಗವಹಿಸಿ, ಗ್ರೀಕೋ-ರೋಮನ್ ಕುಸ್ತಿಯಲ್ಲಿ ಸತತವಾಗಿ 5 ಚಿನ್ನದ ಪದಕಗಳನ್ನು ಗೆದ್ದ ಏಕೈಕ ಕ್ರೀಡಾಪಟು ಎಂಬ ಹೆಗ್ಗಳಿಕೆ ಪಾತ್ರರಾದರು. 41ರ ಹರೆಯದ ಲೋಪೆಜ್ ಒಲಂಪಿಕ್ಸ್ ಹಾದಿಯೇನು ಸುಗಮವಾಗಿರಲಿಲ್ಲ. ಪ್ರಥಮ ಚುಂಬನೇ ದಂತ ಭಗ್ನಂ ಎನ್ನುವಂತೆ 2004ರ ಅಥೆನ್ಸ್‌ ಒಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲಲು ವಿಫಲವಾದ ನಂತರ ಛಲ ಬಿಡದ ತ್ರಿವಿಕ್ತಮನಂತೆ ಅಭ್ಯಾಸ ನಡೆಸಿ,  2008ರ ಬೀಜಿಂಗ್ ಮತ್ತು 2012 ಲಂಡನ್‌ ಒಲಿಂಪಿಕ್ಸ್‌ನಲ್ಲಿ ಪುರುಷರ ಗ್ರೀಕೋ-ರೋಮನ್ 120 ಕೆಜಿ ವಿಭಾಗದಲ್ಲಿ ಸತತವಾಗಿ ಚಿನ್ನದ ಪದಕವನ್ನು ಗೆದ್ದರು.2016ರ ರಿಯೊ ಗೇಮ್ಸ್‌ನಲ್ಲಿ ತಮ್ಮ ದೇಹದ ತೂಕ 10ಕೆಜಿ ಹೆಚ್ಚಿದ್ದ ಪರಿಣಾಮ,  ಲೋಪೆಜ್ 130 ಕೆಜಿ ವಿಭಾಗದಲ್ಲಿ ಚಿನ್ನ ಗೆದ್ದರೆ, 2020 ರ ಟೋಕಿಯೊ ಕ್ರೀಡಾಕೂಟದಲ್ಲಿ ಒಂದೇ ಒಂದು ಅಂಕವನ್ನು ಕಳೆದುಕೊಳ್ಳದೆ  ಮತ್ತೊಮ್ಮೆ ಚಿನ್ನವನ್ನು ಗೆಲ್ಲುವ ಮೂಲಕ ಸತತ ನಾಲ್ಕು ಒಲಂಪಿಕ್ ಚಿನ್ನದ ಪದಕಗಳನ್ನು ಗೆದ್ದ ಮೊದಲ ಪುರುಷ ಕುಸ್ತಿಪಟು ಎಂಬ ಕೀರ್ತಿಗೆ ಭಾಜನರಾದರೆ, 2024ರ ಪ್ಯಾರಿಸ್ ಒಲಂಪಿಕ್ ಕ್ರೀಡಾಕೂಟದಲ್ಲಿ, ಮತ್ತೆ 130 ಕೆಜಿ ಗ್ರೀಕೋ-ರೋಮನ್ ಕುಸ್ತಿಯಲ್ಲಿ  ಲೋಪೆಜ್ ತನ್ನ ಐದನೇ ಚಿನ್ನದ ಪದಕವನ್ನು ಗೆಲ್ಲುವ ಮೂಲಕ, ಯಾವುದೇ ಕ್ರೀಡೆಯಲ್ಲಿ ಒಂದೇ ವೈಯಕ್ತಿಕ ಸ್ಪರ್ಧೆಯಲ್ಲಿ ಐದು ಚಿನ್ನದ ಪದಕಗಳನ್ನು ಗೆದ್ದ ಮೊದಲ ಒಲಿಂಪಿಕ್ ಆಟಗಾರ ಎನಿಸಿಕೊಂಡರು.

ಈ ವಿಜಯದ ನಂತರ  ನಮ್ರತಾ ಪೂರ್ವಕವಾಗಿ ತಮ್ಮ ಕುಸ್ತಿ ಬೂಟುಗಳನ್ನು  ಕಾಲಿನಿಂದ ತೆಗೆದು ಅದಕ್ಕೆ ನಮಸ್ಕರಿಸುವ ಮೂಲಕ ಕುಸ್ತಿ ಪಂದ್ಯಾವಳಿಗೆ ಭಾವನಾತ್ಮಕವಾಗಿ  ವಿದಾಯ ಹೇಳಿದ್ದು ಎಲ್ಲರ ಮನಸ್ಸನ್ನು ಸೂರೆಗೊಂಡಿತು. ಒಲಿಂಪಿಕ್ಸ್‌ನಲ್ಲಿ ಇತಿಹಾಸವನ್ನು ಸೃಷ್ಟಿಸುವುದರ ಜೊತೆಗೆ, ನಾಲ್ಕು ಬಾರಿ ವಿಶ್ವ ಚಾಂಪಿಯನ್ ಆಗಿರುವ ಹೆಗ್ಗಳಿಕೆಯೂ ಅವರದ್ದಾಗಿದೆ.

ಸಾಮಾನ್ಯವಾಗಿ ವೈದ್ಯರ ಮಗ, ವೈದ್ಯರಾಗೋದು, ಇಂಜಿನಿಯರ್  ಮಗ ಇಂಜಿನಿಯರ್ ಆಗುವುದರ ಮೂಲಕ ತಂದೆಯ ವೃತ್ತಿಜೀವನವನ್ನೇ ಮುಂದುವರೆಸುವುದು ಸಹಜ ಪ್ರಕ್ರಿಯೆ. ಆದರೆ ಒಂದು ಕ್ರೀಡೆಯ ಸಾಧಕನ ಮಗ ಮತ್ತೊಂದು ಕ್ರೀಡೆಯಲ್ಲಿ ಪ್ರಾವಿಣ್ಯತೆಯನ್ನು ಪಡೆದು ಒಲಿಂಪಿಕ್ಸ್​ನಲ್ಲಿ ಚಿನ್ನದ ಪದಕವನ್ನು ಗೆಲ್ಲುವುದು ಅತ್ಯಂತ ವಿರಳವಾಗಿದ್ದು, ಈ ಬಾರಿಯ ಒಲಿಂಪಿಕ್ಸ್​ನಲ್ಲಿ ಅಚ್ಚರಿ ಎನ್ನುವಂತೆ ಅಂತರಾಷ್ಟ್ರೀಯ ಕ್ರಿಕೆಟ್ ಆಟಗಾರೊಬ್ಬರ ಮಗ  ಅಥ್ಲೆಟಿಕ್ಸಿನಲ್ಲಿ ಚಿನ್ನದ ಪದಕಗಳನ್ನು ಗೆಲ್ಲುವ ಮೂಲಕ ವಿಭಿನ್ನವಾದ ಸಾಧನೆಯನ್ನು ಗೈದಿದ್ದಾನೆ.

2024ರ ಪ್ಯಾರಿಸ್ ಒಲಿಂಪಿಕ್ಸ್​ನ ಅಮೇರಿಕಾದ ರಾಯ್ ಬೆಂಜಮಿನ್ ಪುರುಷರ 400 ಮೀ ಹರ್ಡಲ್ಸ್ ರೇಸ್​ನಲ್ಲಿ ಚಿನ್ನದ ಪದಕ ಗೆದ್ದಿದ್ದಲ್ಲದೇ, 4×400 ಮೀಟರ್ ರಿಲೇ ಸ್ಪರ್ಧೆಯಲ್ಲಿಯೂ ಸಹಾ ತಂಡದ ಪರವಾಗಿ ಅಮೆರಿಕ ತಂಡಕ್ಕೆ ಚಿನ್ನದ ಪದಕವನ್ನು ಗೆಲ್ಲುವುದರ  ಭಾಗವಾಗಿದ್ದಾರೆ.  ಹೀಗೆ ಎರಡು ಚಿನ್ನದ ಪದಕ ಗೆದ್ದಿರುವ ರಾಯ್ ಬೆಂಜಮಿನ್ ಅವರ ವೆಸ್ಟ್  ಇಂಡೀಸ್ ತಂಡದ ಪರವಾಗಿ ಅಂತರಾಷ್ಟ್ರೀಯ ಪಂದ್ಯವನ್ನಾಡಿದ್ದ ವಿನ್​ಸ್ಟನ್ ಬೆಂಜಮಿನ್ ಅವರ ಮಗ ಎಂಬುದು ವಿಶೇಷ.

ವೆಸ್ಟ್ ಇಂಡೀಸ್ ಪರ 1986 ರಿಂದ 1995ರ ನಡುವೆ  21 ಟೆಸ್ಟ್ ಮತ್ತು 85 ಏಕದಿನ ಪಂದ್ಯಗಳನ್ನಾಡುವ ಮೂಲಕ  161 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ. ಮಾಜಿ ವೇಗದ ಬೌಲರ್ ವಿನ್‌ಸ್ಟನ್ ಬೆಂಜಮಿನ್ ಅವರ ಮಗ ರಾಯ್ ಬೆಂಜಮಿನ್. ತಮ್ಮ ನಿವೃತ್ತಿಯ ನಂತರ  ಅಮೇರಿಕಾದಲ್ಲಿ ವಿನ್‌ಸ್ಟನ್ ಬೆಂಜಮಿನ್ ನೆಲೆಸಿದ್ದರಿಂದ ಅಲ್ಲಿಯೇ ಜನಿಸಿದ ರಾಯ್ ಬೆಂಜಮಿನ್ ಆಮೇರಿಕಾ ಪೌರತ್ವ  ಪಡೆದು ತಂದೆಯಂತೆ ಕ್ರಿಕೆಟ್ ಆಟಕ್ಕೆ ಮಾರು ಹೋಗದೇ,  ಅಥ್ಲೆಟಿಕ್ಸ್ ಕಡೆ ಒಲವನ್ನು ತೋರಿಸಿ ಕಠಿಣ ಅಭ್ಯಾಸ ಮಾಡಿ, 2020ರ ಟೋಕಿಯೋ ಒಲಿಂಪಿಕ್ಸ್ ನಲ್ಲಿ ಪುರುಷರ 400 ಮೀ ಹರ್ಡಲ್ಸ್ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ತಮ್ಮ ಒಲಂಪಿಕ್ಸ್ ಅಭಿಯಾನವನ್ನು ಆರಂಭಿಸಿದರು.  ಆದರೆ ಈ ಬಾರಿ ಸರ್ವಸನ್ನದ್ಧರಾಗಿ ಮತ್ತಷ್ಟು ಕಠಿಣ ಪ್ರರಿಶ್ರಮ ವಹಿಸಿ ರಾಯ್ ಬೆಂಜಮಿನ್ ಎರೆಡೆರಡು  ಚಿನ್ನದ ಪದಕವನ್ನು ತನ್ನ ಕೊರಳಿಗೆ ಏರಿಸಿಕೊಂಡು ತಂದೆಯನ್ನು ಮೀರಿಸಿದ ಮಗ ಎಂಬ ಕೀರ್ತಿಗೆ ಪಾತ್ರರಾಗಿದ್ದಲ್ಲದೇ, ಒಲಿಂಪಿಕ್ಸ್​ನಲ್ಲಿ ಚಿನ್ನದ ಪದಕ ಗೆದ್ದ ಮೊದಲ ಕ್ರಿಕೆಟಿಗನ ಮಗ ಎನಿಸಿಕೊಂಡಿದ್ದಾರೆ.

ಒಲಂಪಿಕ್ಸ್ ಕ್ರೀಡಾ ಕೂಟದಲ್ಲಿ ಪದಗಳನ್ನು ಗೆಲ್ಲುವುದು ಬಿಡಿ, ಒಲಂಪಿತ್ಸ್ ಕ್ರೀಡಾಕೂಟದಲ್ಲಿ ಭಾಗವಹಿಸುವುದೇ ಬಹಳ ಹೆಮ್ಮೆಯ ಸಂಗತಿ. ಈ ಕ್ರೀಡಾಕೂಟದಲ್ಲಿ ಭಾಗವಹಿಸಲೆಂದೇ ಕ್ರೀಡಾಪಟುಗಳು ಹತ್ತಾರು ವರ್ಷಗಳ ಕಾಲ ತಪಸ್ಸಿನಂತೆ ಸಾಧನೆಗಳನ್ನು ಮಾಡಿ  ಅಲ್ಲಿ ಆಡಲು ಅರ್ಹತೆ ಗಳಿಸುತ್ತಿದ್ದಂತೆಯೇ ಇಡೀ ಜಗತ್ತನೇ ಜಯಿಸಿದಂತೆ ಸಂಭ್ರಮಿಸುತ್ತಾರೆ. ಹೀಗೆ ಪದಕಗಳನ್ನು ಗೆದ್ದು ಸೋಲುವ ಸೋತರೂ ಅದೃಷ್ಟದಿಂದ ಗೆಲ್ಲವ ಮತ್ತು ಸ್ಪರ್ಧೆಯಿಂದ ಅನರ್ಹಗೊಂಡರೂ ಸಹಾ ಹೂವಿನ ಜೊತೆಗೆ ನಾರೂ ಸಹಾ ದೇವರಿಗೆ ಅರ್ಪಿತವಾಗುವಂತೆ ಏಕಾ ಏಕಿ ರಾತ್ರಿಯಿಂದ ಬೆಳಗಾಗುವಷ್ಟರಲ್ಲಿ ವಿಶ್ವವಿಖ್ಯಾತರಾಗುವುದೂ ವಿಶೇಷ ಅಲ್ವೇ?

ಏನಂತೀರೀ?
ಸೃಷ್ಟಿಕರ್ತ, ಉಮಾಸುತ